Sünain shiʼipakat tüü, ekirajaainjana waya nachiki waneinnua tepichi, nünüikimaajana Maleiwa otta waneinnua aluwataalii. Kanoulashii maʼin naya wayuukana. Suluʼu tü mmakat Siria, eejatü wanee jintut israeliita anoujaka sünain anainjachin Naamán nutuma chi nünüikimaajachikai Maleiwa. Niʼitaain naaʼin Eliseo nünain Jeʼwaa sünain naaʼinmajüinjachin nia noulia watta naalii surulaat. Eejachi wanee laülaashi napüleerua na sacerdootekana kanüliakai Jehoiadá. Naaʼinmajüin Jehoiadá wanee jintüi Jehoás nünülia. Naaʼinmajüin nia suulia Atalía, tü noushukot chi jintüikai. Mojulaasü maʼin shia otta eeshi süpüla nuʼutunuin naaʼin Jehoiadá sünainjee tü naaʼinrakat. Niʼitaain naaʼin Ezequías nünain Jeʼwaa otta nnojotsü naapüin shikii Jerusalén namüin na asiriokana. Najaʼttirüin chi  aluwataashikai Josías sukuwaʼipa aʼwaajaa maleiwayaasü, nukumajirüin tü aʼwaajüleekat Maleiwa otta nükaaliinjain tü wayuukalüirua süpüla naʼwaajüinjachin Jeʼwaa nachikuaʼa.