Mbɔtwɛlɔ ka Etenyi 9
Etenyi kɛnɛ toshaka wetshelo wendana la ana, amvutshi ndo nkumi ya dikanga yakɛnya mbetawɔ kahadjama anya le Jehowa. La Suriya, yana ya yimato y’ose Isariyɛlɛ aki la mbetawɔ dia omvutshi wa Jehowa ayɔkɔnɔla Namana. Omvutshi Elisha aki l’eshikikelo k’efula dia Jehowa ayowokokɛ oma le alembe waki atunyi. Jɛhɔyada laki ɔlɔmbɛdi a laadiko akadje lɔsɛnɔ lande lo waale dia nkokɛ ɔlɔngɔlɔngɔ Jɛhɔashi oma le Ataliya tshɛnde ka womoto ka kɔlɔ. Nkumekanga Hɛzɛkiya aki la mbetawɔ dia Jehowa ayoshimbɛ Jɛrusalɛma ndo nde komboka wanelo w’ase Asuriya wɔma. Nkumekanga Jɔsiya akanya dikishi oma lo wodja, akanyomohika tɛmpɛlɔ ndo akakawoya ɔtɛmwɛlɔ wa mɛtɛ.
LO ETENYI KƐNƐ
Ɔndɔshi w’ata ndo yana ya yimato
Yana ya yimato y’ose Isariyɛlɛ ambotɛ nkumɛnde ka womoto awui wendana la wolo w’efula waki Jehowa ndo dui sɔ ambonga la etombelo w’oma lo dihindo.
Alembe waki Jehowa wa wolo
Woho wakayɛna okambi waki Elisha dia ‘wanɛ wele la so ndeka wanɛ wele la wɔ efula.’
Dihonga diaki Jɛhɔyada
Ɔlɔmbɛdi waki la kɔlamelo akalɔshana la nkumekanga ka womoto ka kɔlɔ.
Jehowa aki la solo dia lotutsha otsha le Jɔna
Ngande wakayokomaka omvutshi ɔmɔtshi waki Nzambi dia ndjɔmɛnama oma le lose la woke? Ngande wakandayotombaka? Ndo wetshelo akɔna wakawosha Jehowa?
Ondjelo wa Jehowa akakokɛ Hɛzɛkiya
Atunyi w’ase Juda wakate dia Jehowa hatokokɛ anto ande, koko kɛnɛ kakawate kaki kashi
Jɔsiya akalangaka Ɛlɛmbɛ waki Nzambi
Jɔsiya ambokoma nkumekanga etena kende la ɛnɔnyi enanɛi ndo ambokimanyiya wodja dia vɔ ntɛmɔla Jehowa.
