Dispela seksen bai skulim yumi long ol yangpela, ol profet, na ol king husat i soim olsem ol i gat strongpela bilip long Jehova. Long Siria, liklik meri Israel i bilip olsem profet bilong Jehova inap oraitim Naman. Profet Elisa i bilip tru olsem Jehova bai protektim em long wanpela birua ami. Hetpris Jehoiada i redi long lusim laip bilong em yet long protektim yangpela Jehoas long bubu meri nogut bilong em, Atalia. King Hesekia i trastim Jehova long seivim Jerusalem, na Hesekia i no pret taim ol Asiria i laik pait long em. King Josaia i rausim pasin bilong lotuim ol imis long kantri, stretim gen tempel, na stiaim lain Israel long mekim gen lotu i tru.