Ol stori we oli kam biaen, oli kamaot long Matiu kasem Revelesen. Jisas i bon long wan famle we i no gat haenem, mo i stap long wan smol taon nomo. Hem i wok wetem papa blong hem we i wan kapenta. Jehova i jusumaot Jisas blong i sevem olgeta man mo i kam King blong Kingdom long heven. Sipos yu gat pikinini, yu makem gud se Jehova i jusum wan famle we i lavem hem mo i wosipim hem, blong lukaot long Jisas. Yu tokbaot olsem wanem Jehova i lukaot gud long Jisas blong Herod i no kilim hem i ded, mo se i no gat wan samting we i save blokem stamba tingting blong Jehova. Yu tokbaot olsem wanem Jehova i yusum Jon blong rerem rod blong Jisas. Mo yu makem gud se taem Jisas i pikinini nomo, hem i laekem tumas waes blong Jehova.