Jisas i tijim ol man long saed blong Kingdom blong God. Hem i tijim olgeta blong oli prea se nem blong God i tabu, Kingdom i kam, mo samting we God i wantem i kamtru long wol ya. Sipos yu gat pikinini, yu eksplenem mining blong prea ya long hem. Jisas i no letem Setan i pulum hem blong i lego Jehova. Jisas i jusum ol aposol blong hem, mo olgeta nao oli kam ol faswan long Kingdom. Makem gud strong tingting we Jisas i gat blong mekem tru wosip. Jisas i wantem givhan long ol man, taswe hem i tekemaot ol sik blong olgeta, i givim kakae long olgeta, mo i mekem dedman i laef bakegen. Ol merikel ya oli soemaot samting we Kingdom bambae i mekem long olgeta man.