Jizọs kụziiri ndị mmadụ banyere Alaeze eluigwe. Ọ kụzikwaara ha ka ha na-ekpe ekpere ka e doo aha Chineke nsọ, ka Alaeze ya bịa, nakwa ka e mee uche ya n’ụwa. Ọ bụrụ na ị bụ nne ma ọ bụ nna, kọwaara nwa gị uru ihe ndị e kwuru n’ekpere a bara. Jizọs ekweghị ka Setan mee ka ọ kwụsị ife Chineke. Jizọs họọrọ ndịozi ya, ha aghọọ ndị mbụ n’ime ndị ga-eso ya chịa n’Alaeze Chineke. Mee ka ọ ghọta na Jizọs ejighị ife Chineke gwuo egwu. Jizọs chọrọ inyere ndị mmadụ aka. Ọ bụ ya mere o ji gwọọ ndị ọrịa, nye ndị agụụ ji nri, kpọlitekwa ndị nwụrụ anwụ n’ọnwụ. O ji ọrụ ebube ndị a ọ rụrụ gosi ihe Alaeze Chineke ga-emere ndị mmadụ.