ယ့ၣ်ၡူး​သိၣ်လိ​ပှၤဂၤ ဘၣ်ဃး​ဒီး​မူခိၣ်​ဘီမုၢ်​အဂ့ၢ်​လီၤ. ယ့ၣ်ၡူး​သိၣ်လိ​စ့ၢ်ကီး​အဝဲသ့ၣ်​လၢ က​ဃ့​ဘါ​ထုကဖၣ်​တၢ်​ဒ်သိး ကစၢ်​ယွၤ​အ​မံၤ​က​ဘၣ်​တၢ်​ပာ်စီဆှံ​အီၤ, ယွၤ​အ​ဘီမုၢ်​က​ဟဲ​ဒီး ယွၤ​အ​တၢ်တိာ်ပာ် က​ဟဲ​လၢပှဲၤ​ထီၣ်​လၢ ဟီၣ်ခိၣ်​ချၢ​အဂီၢ်​လီၤ. န​မ့မ့ၢ်​မိ​ပါ​န့ၣ် တဲ​နၢ်ပၢၢ်​န​ဖိ​ဘၣ်ဃး​ဒီး တၢ်​ထုကဖၣ်​အံၤ​အခီပညီ​တက့ၢ်. ယ့ၣ်ၡူး​တ​ဟ့ၣ်​အခွဲး​လၢ မုၣ်ကီၤလံၢ်​က​မၤ​ဟးဂီၤ​အ​တၢ်သးတီ​ဘၣ်. ယ့ၣ်ၡူး​ဃုထၢ​ထီၣ် အ​တၢ်မၢဖိ​တဖၣ်​လၢ က​မၤ​လၢပှဲၤ​မူဒါ​လၢ​အရ့ဒိၣ်​လၢ ယွၤ​အဘီ​အမုၢ်​အ​ပူၤ​လီၤ. ယ့ၣ်ၡူး​န့ၣ်​အ​သူၣ်ဆူၣ်​သးဆူၣ်​လၢ တၢ်ဘူၣ်​တၢ်ဘါ​အမ့ၢ်​အတီ​အဂီၢ်​လီၤ. မ့ၢ်​လၢ​ယ့ၣ်ၡူး​အဲၣ်ဒိး မၤစၢၤ​ပှၤဂၤ​အဃိ အဝဲ​မၤဘျါ​က့ၤ​ပှၤဆူး​ပှၤဆါ, ဒုးအီၣ်​ဒုးအီ​ပှၤလၢ​အ​လီၤဘဲ​တဖၣ် ဒီး​မၤ​သမူထီၣ်​က့ၤ​ပှၤသံ​တနီၤ​န့ၣ်​လီၤ. တၢ်​လီၤလး​လၢ ယ့ၣ်ၡူး​မၤဝဲ​တဖၣ်​န့ၣ် ပာ်ဖျါ​ထီၣ်​န့ၢ်​ပှၤလၢ ယွၤ​အ​ဘီမုၢ်​က​မၤ​လီၤမၢ်​ကွံာ် တၢ်ကီ​တၢ်ခဲ​တဖၣ်​အံၤ​လီၤ.