Йесо адӕмӕн хъусын кодта уӕларвон Паддзахады тыххӕй. Стӕй ма сӕ ахуыр кодта ахсджиаг хъуыддӕгты тыххӕй кувын: цӕмӕй Хуыцауы ном срухс уа, йӕ Паддзахад ӕрцӕуа ӕмӕ йӕ фӕндон уа зӕххыл дӕр, уӕлӕрвты куыд ис, афтӕ. Ныййарджытӕ, уӕ сывӕллӕттӕн бамбарын кӕнут, уыцы куывды ныхӕстӕ махӕн цӕуыл дзурӕг сты, уый. Йесо Хӕйрӕджы нӕ бауагъта, цӕмӕй йӕ фӕрӕдийын кодтаид. Йесо йӕхицӕн равзӕрста апостолты, ӕмӕ уыдон систы, Хуыцауы Паддзахады ахсджиаг хӕстӕ чи хъуамӕ ӕххӕст кодтаид, уыдонӕй фыццӕгтӕ. Уӕ сывӕллӕттӕн сӕ хъус ӕрдарут, Йесо раст диныл куыд ӕнувыд уыд, уымӕ. Фӕндыди йӕ адӕмӕн ӕххуыс кӕнын, ӕмӕ-иу рынчынты дзӕбӕх кодта, ӕххормаг адӕмы ӕфсӕста ӕмӕ ма-иу суанг мӕрдты дӕр райгас кодта. Йесо уыцы диссӕгтӕ аразгӕйӕ равдыста, Хуыцауы Паддзахад адӕмӕн цы хорздзинӕдтӕ ӕрхӕсдзӕн, уый.