Naʻe akoʻi ʻe Sīsū ʻa e kakaí fekauʻaki mo e Puleʻanga ʻo hēvaní. Naʻá ne toe akoʻi kinautolu ke nau lotu ke fakamāʻoniʻoniʻi ʻa e huafa ʻo e ʻOtuá, ke hoko mai hono Puleʻangá, pea ke fai hono finangaló ʻi māmani. Kapau ko ha mātuʻa koe, fakamatalaʻi ki hoʻo kiʻi tamá ʻa e ʻuhinga ʻo e lotu ko ení kiate kitautolú. Naʻe ʻikai ke fakaʻatā ʻe Sīsū ke maumauʻi ʻe Sētane ʻa ʻene mateakí. Naʻe fili ʻe Sīsū ʻa ʻene kau ʻapositoló, pea naʻa nau hoko ko e ngaahi mēmipa tefito ʻo e Puleʻangá. Fakatokangaʻi ange ʻa e faivelenga ʻa Sīsū ʻi he lotu moʻoní. Koeʻuhi naʻá ne loto ke tokoniʻi ʻa e niʻihi kehé, naʻe fakamoʻui ʻe Sīsū ʻa e kau puké, fafangaʻi ʻa e fiekaiá, pea aʻu ʻo toe fokotuʻu hake ʻa e kau maté. Naʻá ne fakahāhā ʻi he ngaahi mana kotoa ko ení ʻa e meʻa ʻe fai ʻe he Puleʻangá maʻá e faʻahinga ʻo e tangatá.