Jesu i gondzisile vanhu xungetano hi Mufumo wa le tilweni. I gondzisile vanhu kambe lezvaku va kombelela kasi a vito ga Nungungulu gi basisiwa, a Mufumo wa Nungungulu wuta ni lezvaku a kurandza kakwe ku mahiwa laha misaveni. Loku u hi mupswali, tlhamusela n’wana wa wena a ku a mukombelo lowu wula yini ni lezvi hi vhunekisako zvona hi wona. Jesu a nga vhumelangi ku Sathani a mu tsandzekisa ku tsumbeka. Jesu i hlawulile vapostoli vakwe, lava va ngava zviro zvo sangula zva Mufumo wa Nungungulu va tlhela va nyikiwa ntiro wa lisima nguvhu mufun’weni lowo. Wona lezvi Jesu a nga hisekisa zvona hi wukhozeli ga lisine. Kota lezvi Jesu a nga lava ku vhuna vanhu, i no va hanyisa mababyi, a va nyika zvakuga vaga ni ku tlhela a vhuxa lava va nga file. Hi ku maha zvihlamaliso zvontlhe lezvo, i wo komba lezvi a Mufumo wa Nungungulu wu to mahela vanhu cikhatini ci tako.