Jesuseʼ tʼaanaj yoʼolal u Reinoil kaʼan. Tu kaʼansaj xan ka kʼáataʼak ich oración ka kiliʼichkúuntaʼak u kʼaabaʼ Dios, ka taalak u Reino yéetel ka beetaʼak baʼax u kʼáat way Luʼumeʼ. Wa yaan a paalaleʼ, áant u naʼatoʼob baʼax yaan u yil yéetel k-kuxtal le oracionaʼ. Jesuseʼ maʼ tu chaʼaj ka xuʼulsaʼak u meyajtik Dios tumen Satanasiʼ, baʼaxeʼ tu yeʼesaj jach u kʼáat u adorart Jéeoba. Jesús xaneʼ tu yéeyaj u apostoloʼob, letiʼob yáax táakpajoʼob teʼ Reinooʼ yéetel tsʼaʼab u beetoʼob junpʼéel nojoch meyajiʼ. Tsʼoʼoleʼ tumen u kʼáat u yáant u maasileʼ, Jesuseʼ tu tsʼakaj le kʼojaʼanoʼoboʼ, tu tséentaj le máakoʼoboʼ yéetel yaan máaxoʼob tu kaʼa kuxkíintaj. Le milagroʼob tu beetoʼ tu yeʼesaj baʼax ken u beet u Reino Dios yoʼolal le máakoʼoboʼ.