ပှၤခရံာ်ဖိ​လၢညါ​တဖၣ် တဲဘၣ်​ပှၤ​အါဂၤ​လၢ အ​အိၣ်​လၢ​ဟီၣ်ခိၣ်​ဒီဘ့ၣ်​ဘၣ်ဃး​ဒီး ဘီမုၢ်​တၢ်သးခု​ကစီၣ်​န့ၣ်​လီၤ. ယ့ၣ်ၡူး​မၤစၢၤ အပျဲၢ်​အဘီၣ်​တဖၣ်​ဒ်သိး အဝဲသ့ၣ်​က​သ့ၣ်ညါ​ဝဲ​လၢ က​ဘၣ်​စံၣ်တဲၤ​တဲလီၤ​တၢ်​လၢ တၢ်လီၢ်​ဖဲလဲၣ်​န့ၣ်​လီၤ. ဒီး​အဝဲ​ဟ့ၣ်လီၤ​စ့ၢ်ကီး အပျဲၢ်​အဘီၣ်​တၢ်စိ​တၢ်ကမီၤ ဒ်သိး​အဝဲသ့ၣ်​တဲ​ကျိာ်​လၢ​အဂၤ ကဘၣ်ဝဲ​အဂီၢ်​လီၤ. ယဟိဝၤ​ယွၤ​ဟ့ၣ်လီၤ​အဝဲသ့ၣ် တၢ်သးဒူ​ဒီး တၢ်ဂံၢ်​တၢ်ဘါ​ဒ်သိး အဝဲသ့ၣ်​လဲၤခီဖျိ​ဝဲ တၢ်ကီ​တၢ်ခဲ ဒီး​တၢ်​မၤနး​မၤဖှီၣ်​က​န့ၢ်​အဂီၢ်​လီၤ.

ယ့ၣ်ၡူး​ဒုးထံၣ် တၢ်မၢဖိ​ယိၤဟၣ် တၢ်ထံၣ်​လၢညါခီ ဘၣ်ဃး​ဒီး ယဟိဝၤ​ယွၤ​အလၤကပီၤ​လီၤ. တၢ်ထံၣ်​လၢညါခီ​လၢ​အဂၤ​တခါ​န့ၣ် စီၤ​ယိၤဟၣ်​ထံၣ်ဝဲ မူခိၣ်​အ​ဘီမုၢ်​မၤနၢၤ​ဝဲ​မုၣ်ကီၤလံၢ်​ဒီး မၤ​ဟးဂီၤ​ကွံာ် မုၣ်ကီၤလံၢ်​အ​တၢ်ပၢ လီၤထူ​လီၤယိာ်​လီၤ. စီၤ​ယိၤဟၣ်​ထံၣ်ဝဲ ယ့ၣ်ၡူး​ပၢတၢ်​ဒ်​စီၤပၤ​အသိး​ဒီး ပှၤ ၁၄၄,၀၀၀ လၢ​အ​ပၢ​ဃုာ်​တၢ်​ဒီး​အီၤ​န့ၣ်​လီၤ. ဒီး​စီၤ​ယိၤဟၣ်​ထံၣ်​စ့ၢ်ကီး​ဝဲ​လၢ ဟီၣ်ခိၣ်​ဒီဘ့ၣ်​ကဲထီၣ်​ပၤရဒံစူး ဒီး​ပှၤ​ခဲလၢာ်​ဘူၣ်ထီၣ်​ဘါထီၣ် ယဟိဝၤ​ယွၤ​လၢ​တၢ်မုာ်​တၢ်ခုၣ် ဒီး​တၢ်ဃူ​တၢ်ဖိး​အ​ပူၤ​လီၤ.