Achtoui Cristo itokilijkauaj tlajtolmoyajkej ipan altepemej tlen tlauel uejka mokauayaya. Jesús kiniljuik kanke monekiyaya tlajtolmoyauasej. Nojkia kichijki ma kamanaltikaj sekinok tlajtoli uan kiampa ueliskiaj kinmachtisej maseualmej ipan inintlajtol. Jehová kinpaleuik amo ma majmauikaj uan ma kiijiyouikaj kema kintlatsakuiltiskiaj.

Jesús kichijki apóstol Juan ma kiita kejuak ipan se temiktli Jehová iueyitilis, kinextilik: kenijkatsa toTeotsij iTlanauatijkayo kitsontlamiltis Satanás uan nochi tlen kinauatia, kema Jesús elis se Tlanauatijketl uan nopa 144,000 tekichiuasej iuaya, uan kema Tlaltipaktli mochiuas se xochimili uan nochi sansejko kiueyichiuasej Jehová ika tlaseuilistli.