Impulong na saray inmunan Kristiano so maong a balita na Panarian anggad sankaarawian ya lugar diad dalin. Imbaga nen Jesus no iner ira manpulong tan diad makapakelaw a paraan et inikdan to ra na pakayarin bangatan iray totoo ed mismon lenguahe da. Tinulongan ira nen Jehova pian ag-ira ontakot ya manpulong. Pinabiskeg to met ira pian ag-ira ontunda anggano bawalan tan pairapen da ra.

Diad sakey a pasingawey et impanengneng nen Jesus ed si apostol Juan so marakdakep ya trono nen Jehova. Diad sakey nin pasingawey, anengneng nen Juan ya tinalo na Panarian ed tawen si Satanas kanian agto lan balot nauleyan so mundo. Anengneng nen Juan ya si Jesus et Ari la tan walay kaiba ton 144,000 ya arari. Anengneng met nen Juan ya paraiso lay interon dalin, ya amin ya totoo et mandadayew ed si Jehova tan wala so kareenan tan pankakasakey.