Makristo nyo pheye ma tshumayede mahungu nya yadi nya Mufumo wa Nungungulu kala ga malanga ya hwindzo ngudzu nya mafu. Jesu a di va yeyedzide omu va nga ba va yede gu tshumayela umo a bwe a gira gilewugiso nya gu va ganeya malimi nya vathu va nga hadzi va tshumayela. Jehovha a di va ninga gutiya-hwambo ni tshivba nyo timiseye vo ba va tshaniswa.

Jesu a di yeyedza mupostoli Johane giwoniso nya gungangameye ga Jehovha. Ga gimbe giwoniso, Johane a di wona Mufumo wa ndzadzini na wu pala Sathane wu bwe wu fuvisa mifumo yatshavbo kala gupindruga. Johane a di wona Jesu kha nga Pfhumu na ari ni ava nya 144 000. A di  wona gambe mafu yatshavbo na ma vbindrugedza ma khala paradhesi, omu vathu vatshavbo va nga ba va khozeya Jehovha khu gurula ni gupwanana.