Iginpasamwak han mga Kristiano hadto an maopay nga sumat han Ginhadian tubtob ha pinakahirayo nga bahin han tuna. Gin-giyahan hira ni Jesus kon diin magsasangyaw ngan milagroso nga ginpahinabo nga makagtutdo gamit an linggwahe han ira kaistorya. Gintagan hira ni Jehova hin kaisog ngan kusog nga malamposan an mga pagtimaraot.

Gintagan ni Jesus hi apostol Juan hin bisyon han himaya ni Jehova. Ha usa pa nga bisyon, nakita ni Juan nga ginpirde han Ginhadian hi Satanas ngan gintapos an iya pagmando. Nakita ni Juan nga naghahadi hi Jesus upod an 144,000 nga iya igkasi-magmarando. Nakita liwat niya nga nagin paraiso an tuna diin an tanan mamurayawon ngan nagkakaurosa ha pagsingba kan Jehova.