Le yáax cristianoʼoboʼ tu kʼaʼaytoʼob tak tu maas náachil yóokʼol kaab baʼax ken u beet le Reinooʼ. Jesús nuʼuktoʼob utiaʼal u yojéeltikoʼob tuʼux unaj u kʼaʼaytajoʼob. Yéetel u yáantaj le kiliʼich muukʼoʼ tu kaʼansoʼob u jaajil ichil le idiomaʼob ku tʼanik le máakoʼoboʼ. Jéeobaeʼ tu yáantoʼob utiaʼal maʼ u chʼaʼikoʼob saajkil yéetel tu tsʼáaj u muukʼil tiʼob utiaʼal u aktáantkoʼob le chʼaʼpachtajiloʼ.

Ichil junpʼéel náay wa visioneʼ, Jesuseʼ tu tsʼáaj u yil apóstol Juan u nojbeʼenil Jéeoba. Tuláakʼ náayeʼ, tu yeʼesaj tiʼ bix kun xuʼulsbil junpuliʼ tiʼ Satanás tumen le Reinooʼ. Juaneʼ tu yilaj xan Jesús tsʼoʼok u tsʼaʼabal u beet u Reyil yéetel 144,000 máakoʼob táan  u gobernaroʼob tu yéetel. Tu yilaj xan bix kun suut paraísoil le luʼumaʼ yéetel bix kun múul meyaj ich jeetsʼelil le máaxoʼob adorartik Jéeobaoʼ.