KANSION 43
Pikakasi na Pisasalamat
-
1. Ibalikas mid sika O Jehova,
pisasalamat tan dayew Ama.
Dia ed sika manlingkor kamin lanang,
amta min agmo kami pulyanan.
Naynay kami ya mankakasalanan,
kerewen mi so panamerdonam.
Diad panangarom dinondoy bilay mi,
diad satan et misalamat kami.
-
2. Dios ya Jehova salamat ed aro
ta makaapit kami ed sika.
Tulongan pa ya sikay mas nakabat
tan manmatoor, mansiansian matua.
Iikdan moy pakpel pian mansalita,
on, misalamat kami ed saya.
Pansiansiaen mo kamin mauyamo,
say inyasingger mo ran lingkor mo.
(Nengnengen met so Sal. 65:2, 4, 11; Fil. 4:6.)