1．仁愛上帝慈悲憐憫，

疼惜眾生發自內心。

恩賜土地，日光露水，

互咱生活飽足滿意。

上帝寬赦懺悔的心，

詳細聽咱懇求聲音。

帶念咱是土粉之身，

體諒包容，表現憐憫。

2．犯罪的心痛苦憂悶，

向望上帝憐憫開恩。

聽從耶穌苦勸的話，

坦白認罪，悔改行善。

耶和華饒赦咱的罪，

咱嘛寬赦人欠的債；

毋通拾恨心放互開，

得著內心平靜安寧。

3．效法上帝顯出憐憫，

像月光溫暖人的心。

毋是欲得著人謳咾，

是希望人會當快樂。

恬恬施捨免報人聽，

天頂上帝斟酌啲看。

表現憐憫的有福氣，

上帝看做媠閣寶貴。