1, 2. Engkai maka banci Jesus seh bas Taneh Mesawang Judea bas tahun 29 M? Janah kai si terjadi i je? (Nen gambar bas awal pasal.)

KIRA-KIRA bas pendungi bulan Oktober ntah pe awal bulan November tahun 29 M, Jesus sangana bas Taneh Mesawang Judea, la ndauh arah sebelah utara Laut Mati. Ibabai kesah si badia ia ku je kenca ia iperidiken ras kenca ia ipilih Dibata. Ingan e gersang, erbatu-batu, ras melala lembahna. Enggo 40 wari Jesus i je sisada, puasa ia i je, ertoto, janah mbages ia rukur. Banci saja paksa si e, Jahwe pe ngerana ras AnakNa e guna nampati ia ngasup ndalani tugasna si nandangi reh.

² Sanga Jesus lemah perban melihe, reh Setan ndahi ia. Kai si terjadi kenca si e ncidahken sada kejadin si penting, si erban kerina kalak si atena nembah Jahwe ikut terpengaruh, termasuk kam.

3, 4. (a) Kai nina Setan sanga tangtangna godana Jesus? Ate Setan gelah Jesus sangsi kerna kai? (b) Gundari uga cara Setan nggoda umat Dibata?

³ Baca Matius 4:1-7. Setan e licik kel, tangtangna lit dua kali godana Jesus, imulaina nggodasa alu ngataken, “Adi anak Dibata kin kam.” Sangsi kin Setan maka Jesus e Anak Dibata?  Lang. Setan e anak Dibata si mberontak janah dungna jadi malekat jahat, emaka pasti tehna Jesus e Anak Dibata sintua. (Kol. 1:15) Pasti teh Setan ka nge ngerana Jahwe arah surga sanga Jesus iperidiken, nina, “Enda me AnakKu si Kukelengi, ia me si ngena ateKu.” (Mat. 3:17) Mungkin ate Setan gelah Jesus la tek man Bapakna janah gelah sangsi ia Bapakna e ermediate man bana. Si pertama, goda Setan me Jesus gelah banna batu jadi roti, tempa-tempa nina, ‘Kam me Anak Dibata, engkai maka la bere Bapakndu kam man bas taneh mesawang enda?’ Si peduaken, suruh Setan me Jesus gelah lompat arah ingan si meganjangna bas rumah pertoton, tempa-tempa nina, ‘Kam me Anak Dibata, mbiar kam la lindungi Bapakndu kam?’

⁴ Gundari pe bage ka nge cara Setan nggoda umat Dibata. (2 Kor. 2:11) Timaina ndigan kita lemah ntah pe kitik ukurta, nce serangna kita. Biasana pakena cara si halus guna nyerang kita. (2 Kor. 11:14) Ate Setan gelah ula kita tek maka keleng ate Jahwe kita. Ate Setan pe gelah la kita tek man Jahwe janah sangsi kita man janji-janjiNa si lit bas Pustaka. Ngeri kel bual Setan e. (Joh. 8:44) Uga carana gelah ula kita tertipu?

5. Kai jawapen Jesus sanga tangtangna ia igoda?

⁵ Bas godan si pertama ras si peduaken, perdiateken uga nina Jesus ngaloi. Sitik pe la ia sangsi maka keleng ate Bapakna man bana, janah tek kel ia man Bapakna. Emaka mis ijawap Jesus kata-kata Setan ndai alu make kata-kata Bapakna si lit bas Kitap si Badia. Ipakena ayat-ayat si cocok si lit i je gelar Dibata Jahwe. (Ul. 6:16; 8:3) Erti gelar Jahwe jadi jaminen maka pasti tepati Dibata kerina janjiNa. Emaka sanga pake Jesus gelar Jahwe, e buktina tek Jesus man Bapakna. *

6, 7. Uga carata ngelawan godan Setan si halus?

⁶ Adi siandalken Kata Dibata janah siukuri kai erti gelar Dibata banci silawan godan Setan si halus e. Nina Pustaka, keleng ate Jahwe kita janah ermediate Ia man kalak si nembah Ia amin pe kalak e sangana kitik ukur. Adi tek kita kerna si e, la kita banci itipu Setan si ngataken maka la keleng ate Jahwe kita. (Ms. 34:18; 1 Pet. 5:8) Adi siinget maka Jahwe lalap ertindak menurut erti gelarNa, labo kita sangsi man baNa janah tek kita pasti lalap tepatiNa janjiNa.​—Kua. 3:5, 6.

⁷ Situhuna kai tujun utama Setan? Kai si arapkenna arah kita? Jelas kari siteh jawapenna sanga Jesus igoda Setan petelu kaliken.

8. Sanga Jesus igoda Setan petelu kaliken, uga Setan ncidahken sura-surana situhuna?

⁸ Baca Matius 4:8-11. Sanga Jesus igoda Setan petelu kaliken lanai pakena cara si halus, tapi terus terang katakenna kai  sura-surana. Cidahkenna man Jesus (mungkin arah pengenehenen) “kerina kerajan doni enda ras kemulianna,” tapi la cidahkenna bagin si la mehuli. Kenca si e nina, “Kerina enda kubereken kari man bandu adi sujud kam janah nembah sekali saja man bangku.” * Jelas teridah merhat kel Setan isembah! Atena gelah tadingken Jesus Bapakna janah akuina Setan jadi dibatana. Si itawarken Setan e tempa-tempa nampati Jesus. Tempa-tempa kataken Setan man Jesus maka banci ia erkuasa, banci ia jadi kalak bayak, janah la ia perlu rate mesui. Maksudna la perlu pake Jesus mahkota si erduri, la perlu ia icambuk, ntah pe ibunuh i tiang siksan. Banci bereken Setan kerina si tawarkenna e sebap situhuna kerina pemerentahen bas doni enda jangna kap, Jesus pe tehna kerna si e! (Joh. 12:31; 1 Joh. 5:19) Kai pe pasti bereken Setan man Jesus gelah ula nai sembahna Bapakna, padahal Jahwe saja ngenca si patut isembah.

9. (a) Kai situhuna sura-sura Setan nandangi kalak si nembah Dibata? Uga cara Setan nggoda kalak e? (b) Kai saja si termasuk nembah Dibata? (Nen kotak “Kai Maksudna Nembah?”)

⁹ Gundari pe, ate Setan gelah sisembah ia ntah pe silakoken kai si la cocok ras sura-sura Jahwe. Selaku “dibata doni enda,” Setan kap dibata arah kerina agama palsu, si bas Pustaka igelari Babilon si Mbelin. (2 Kor. 4:4) Tapi amin pe enggo miliaren kalak lit bas agama palsu, Setan lalap lenga puas. Atena  gelah kalak si nembah Dibata pe lanai ngelakoken sura-sura Dibata. Usahaken Setan nggoda kita guna ndarami kebayaken ras kekuasan bas doni enda, labo atena gelah kita jadi kalak Kristen situhu-tuhu si banci saja arus ngenanami “kiniseran perban kai si benar.” (1 Pet. 3:14) Adi sempat kita tergoda nadingken Dibata janah jadi bagin bas doni Setan enda, tempa-tempa sujud kita nembah Setan janah siban ia jadi dibatata. Uga carana gelah ula kita tergoda?

10. Kai nina Jesus sanga igoda ia petelu kaliken janah engkai?

¹⁰ Kai nina Jesus sanga igoda ia petelu kaliken? Perban setia ia man Jahwe mis katakenna, “Laweslah, Setan!” Bagi si tangtangna Jesus igoda, ipake Jesus ayat si lit i je gelar Dibata, ipakena ayat bas buku Ulangen nina, “Lit tertulis, ‘Jahwe Dibatandu si arus isembahndu, man baNa saja ngenca kam arus mereken pelayanen si badia.’” (Mat. 4:10; Ul. 6:13) La nggit Jesus milih kegeluhen si entabeh, si la ngenanami kesusahen. La ka tena ngayaki pendahin si mejile bas doni enda si labo ndekah tahan. Tehna maka Jahwe ngenca si patut isembah, emaka adi ‘sembahna’ Setan amin pe sekali ngenca, e ertina patuh ia man Setan. La nggit Jesus erban Setan jadi dibatana, lawan Jesus ia emaka “tadingken Iblis ia.” *—Mat. 4:11.

11. Uga carata ngelawan Setan ras godanna?

¹¹ Banci silawan Setan ras godan arah doni si jahat enda, perban bali bagi Jesus kita pe banci milih. Enggo bereken Jahwe hadiah si merga banta eme bebas erban pilihen. Emaka la lit si banci maksa kita gelah lanai nembah Dibata. Mahluk roh si megegeh bagi Setan pe la banci. Adi tetap kita setia janah sipilih guna ‘ngelawan Setan alu kiniteken si paguh’ tempa-tempa ninta “Laweslah, Setan!” (1 Pet. 5:9) Perlu siinget, lawes Setan nadingken Jesus kenca pang Jesus ngelawan Setan. Bage ka pe Pustaka mereken jaminen man banta, “Lawanlah Iblis, pasti kiam Iblis e arah kena nari.”​—Jak. 4:7.

12. Bas Taman Eden, uga cara Setan ncidahken maka ersura-sura ia gelah kerina kalak ngadi nembah Jahwe?

¹² Arah godan si peteluken, jelas teridah maka Setan si tangtangna ersura-sura gelah kerina kalak ngadi nembah Jahwe. Bas Taman Eden, ribun tahun si enggo lewat, mulai icidahken Setan maka la ia senang adi Jahwe isembah. Godana Hawa, kenca si e pengaruhi Hawa ka Adam gelah ikut ngelanggar perentah Jahwe. Emaka banci kuasai Setan kalak e ras kendalikenna. (Baca Kejadin 3:1-5; 2 Kor. 11:3; Ket. 12:9) Setan me dungna jadi dibata kalak e janah kalak e jadi si nembah Setan, amin pe banci saja la teh kalak e ise situhuna si nipu kalak e. Setan me si mbenaisa pemberontaken bas Taman Eden, labo ngenca hak Jahwe guna merentah si isangsikenna, tapi kalak si nembah Jahwe pe ikut iserangna. Engkai maka banci sikataken bage?

13. Kai hubungenna nembah Jahwe ras hakNa guna merentah?

 ¹³ Nembah Jahwe lit hubungenna ras hak Jahwe guna merentah. Jahwe kap Tuhan Si Meganjangna, lit hakNa guna merentah janah Ia kap “si nciptaken kerina si lit,” emaka Ia ngenca si patut isembah. (Ket. 4:11) Sanga Adam ras Hawa iciptaken Dibata alu sempurna, janah tamaNa kalak e bas Taman Eden, ateNa gelah doni enda dem alu manusia si sempurna, si nembah Ia arah ukurna nari. (Kej. 1:28) Amin pe Jahwe Tuhan Si Meganjangna ngenca si patut isembah, tapi merhat kel Setan isembah. Emaka isangsikenna hak Jahwe guna merentah.​—Jak. 1:14, 15.

14. Berhasil nge Setan erban kerina kalak ngadi nembah Dibata? Jelasken.

¹⁴ Berhasil nge Setan erban kerina kalak ngadi nembah Dibata? Kenca banna Adam ras Hawa nadingken Dibata, terus iserangna kalak si nembah Dibata. Usahakenna gelah reh buena kalak si nadingken Dibata Jahwe. Sope lit runggun Kristen,  lalap goda Setan kalak si nembah Jahwe. Kenca mate rasul-rasul, ban Setan gelah lit kalak murtad. Emaka runggun Kristen lanai bersih janah kalak si nembah Dibata tempa-tempa lanai lit. (Mat. 13:24-30, 36-43; Perb. 20:29, 30) Seratus tahun kenca si e, umat Dibata ndekah ipengaruhi Babilon si Mbelin eme agama palsu sebelang doni. Tapi la berhasil Setan erban kerina kalak lanai nembah Dibata. La lit si banci erban sura-sura Dibata gagal. (Jes. 46:10; 55:8-11) Engkai? Perban sura-suraNa e lit pengaruhna man gelarNa janah lalap Ia ertindak sesuai ras erti gelarNa. Payo, sura-sura Jahwe lalap terjadi!

15. Sanga terjadi pemberontaken bas Taman Eden, kai si lakoken Jahwe gelah sura-suraNa tetap terjadi?

¹⁵ Sanga terjadi pemberontaken bas Taman Eden, mis atur Jahwe gelah sura-suraNa tetap terjadi. (Baca Kejadin 3:14-19.)  Amin pe Adam ras Hawa bas taman e denga, enggo bereken Jahwe hukumen man teluna pemberontak e. BereNa hukumen e menurut ise si leben erdosa, si pertama Setan, si peduaken Hawa, janah si terakhir Adam. Sanga ngerana Jahwe man Setan, pengajuk-ngajuk si la teridah e, ikataken Jahwe maka lit pagi ‘keturunen’ si meneken akibat pemberontaken e. Penting kel tugas ‘keturunen’ e guna erban sura-sura Jahwe terjadi gelah kerina kalak nembah Jahwe.

16. Kenca pemberontaken bas Taman Eden, kai si ilakoken Jahwe gelah sura-suraNa tetap terjadi?

¹⁶ Kenca pemberontaken bas Taman Eden, aturken Jahwe gelah sura-suraNa tetap terjadi. KatakenNa man manusia si la sempurna uga cara si benar bas nembah Ia, bagi si nandangi sibahas bas pasal seterusna. (Heb. 11:4–12:1) Arah kesah si badia, sampati Dibata kalak si nulis Pustaka bagi Jesaya, Jeremia, ras Esekiel guna nulis nubuat-nubuat si luar biasa kerna lit pagi masana kerina kalak nembah Jahwe saja. Nubuat-nubuat e rusur iceritaken bas Pustaka janah kerina nubuat e terjadi pagi arah ‘keturunen’ si ijanjiken Dibata. Bagin utama ‘keturunen’ e eme Jesus Kristus. (Gal. 3:16) Arah jawapen Jesus sanga ia igoda petelu kaliken, jelas teridah maka ate Jesus gelah kerina kalak nembah Jahwe. Ia me si ipilih Jahwe guna erban kerina nubuat e terjadi. (2 Kor. 1:20; Ket. 19:10) Bebaskenna pagi umat Dibata si ipengaruhi agama palsu janah dungna kerina kalak nembah Jahwe saja bagi si arusna.

17. Inubuatken Pustaka maka lit pagi masana kerina kalak nembah Jahwe saja, engkai maka meriah siakap mpelajari nubuat e?

¹⁷ Sanga sipelajari nubuat Pustaka si ngataken maka lit pagi masana kerina kalak nembah Jahwe saja, e erban kinitekenta reh paguhna. Meriah kel ukurta mpelajari nubuat-nubuat e, perban sitimai waktuna kerina ciptan si lit i surga ras i doni ersada pagi i bas nembah Jahwe Tuhan Si Meganjangna. Nubuat-nubuat e pe mereken arapen si mpepalem pusuhta. Merhat kel kita ngidah janji-janji Dibata terjadi. Pasti merhat kel kita jumpa mulihi ras teman-teman ntah pe keluargata si enggo mate. Merhat kel kita ngidah doni enda jadi Pardis, janah lanai pagi lit si mesuita ras banci kita nggeluh si rasa lalap.​—Jes. 33:24; 35:5, 6; Ket. 20:12, 13; 21:3, 4.

18. Kai kari sipelajari bas buku enda?

¹⁸ Bas buku enda, sipelajari kari nubuat-nubuat si luar biasa bas buku Esekiel si lit bas Pustaka. Mbue nubuatna khusus mbahas kerna lit pagi masana kerina kalak nembah Jahwe saja. Sibahas kari kai hubungenna nubuat Esekiel ras nubuat-nubuat si debanna, uga Kristus erban nubuat e terjadi, janah kai hubungenna ras kita gundari. Nen kotak “Nandai Buku Esekiel.”

19. Kai si atendu ilakokenndu janah engkai?

¹⁹ Mbarenda bas Taneh Mesawang Judea bas tahun 29 M, gagal Setan nggoda Jesus gelah lanai nembah Jahwe. Uga kita gundari? Gundari pe ate Setan ula nai min sisembah Jahwe. Usahakenna kel nggoda kita lebihen asangken si enggo-enggona. (Ket. 12:12, 17) Mbera-mbera buku enda erban reh belinna sura-surata guna ngelawan godan Setan si jahat. Mbera-mbera ranan ras perbahanenta mbuktiken maka setuju kita ras kai si ikataken Jesus, “Jahwe Dibatandu si arus isembahndu.” Alu bage, banci pagi siidah sura-sura Dibata si luar biasa terjadi. Sanga si e, kerina ciptan Dibata Jahwe si lit i surga ras i doni ersada guna nembah Jahwe arah ukurna nari, sebap Jahwe ngenca si patut kel isembah!