1, 2. Paano si Jesus nakakadto sa kamingawan sang Judea sang tigragas sang 29 C.E., kag ano ang natabo sa iya didto? (Tan-awa ang piktyur sa umpisa sini nga kapitulo.)

TIGRAGAS sadto sang 29 C.E. Si Jesus ara sa kamingawan sang Judea, sa aminhan sang Patay nga Dagat. Gingiyahan sia sang balaan nga espiritu pakadto sa sini nga lugar pagkatapos sang pagbawtismo kag paghaplas sa iya. Sa sining daw desyerto, batuhon, kag madamo sing pil-as nga lugar, may tion si Jesus nga magpuasa, magpangamuyo, kag magpamalandong sing 40 ka adlaw. Mahimo nga sa sini nga tion, si Jehova nakighambal sa iya Anak, kag ginhanda sia sa matabo sa palaabuton.

² Sang gutom na gid si Jesus, ginpalapitan sia ni Satanas. Ang masunod nga natabo nagapakita sang importante nga hulusayon nga nagadalahig sa tanan nga nagahigugma sa putli nga pagsimba, lakip na ikaw.

3, 4. (a) Sa una kag ikaduha nga pagsulay, ano ang ginsiling ni Satanas, kag ano ang gusto niya nga hunahunaon ni Jesus? (b) Paano si Satanas nagagamit sing pareho nga paagi subong?

³ Basaha ang Mateo 4:1-7. Sa una kag ikaduha nga pagsulay, naggamit si Satanas sang indi hilmunon nga paagi sang nagsiling sia, “Kon ikaw anak sang Dios.” Nagaduhaduha bala si Satanas nga si Jesus Anak sang Dios? Wala. Ining ginsikway nga anghel nga  anak sang Dios kabalo gid nga si Jesus amo ang panganay nga Anak sang Dios. (Col. 1:15) Sigurado nga nabal-an man ni Satanas ang ginsiling ni Jehova halin sa langit sang ginbawtismuhan si Jesus: “Ini ang akon Anak, ang hinigugma, nga ginakahamut-an ko.” (Mat. 3:17) Mahimo gusto ni Satanas nga hunahunaon ni Jesus nga ang iya Amay indi masaligan kag wala nagaulikid sa iya. Sa una nga pagsulay nga himuon nga tinapay ang bato, daw nagapamangkot si Satanas: ‘Kon ikaw Anak sang Dios, ngaa ginpabay-an ka sang imo Amay nga magutuman sa sini nga kamingawan?’ Kag sa ikaduha nga pagsulay nga maglumpat halin sa ibabaw sang pader sang templo, daw nagapamangkot naman si Satanas: ‘Ti kay Anak ka sang Dios, nagasalig ka gid bala nga proteksionan ka sang imo Amay?’

⁴ Amo man sini ang paagi ni Satanas subong. (2 Cor. 2:11) Ang Panulay nagahulat lang nga magluya sa pisikal ukon maluyahan sing buot ang matuod nga mga sumilimba, kag dayon maatake sia sa indi hilmunon nga mga paagi. (2 Cor. 11:14) Gusto man sang Panulay nga papatihon kita nga indi kita palangga ni Jehova, wala gid sia nalipay sa aton, kag indi masaligan si Jehova kay indi niya pagtumanon ang iya mga promisa sa iya Pulong. Pero tanan ini kabutigan gid! (Juan 8:44) Paano naton ini mabatuan?

5. Ano ang ginhimo ni Jesus sa una kag ikaduha nga pagsulay?

⁵ Binagbinaga ang sabat ni Jesus sa una kag ikaduha nga pagsulay. Nagapati gid sia nga palangga sia sang iya Amay, kag may pagsalig gid sia sa iya Amay. Ginsikway gilayon ni Jesus si Satanas paagi sa pagkutlo sang Pulong sang iya Amay. Kag gingamit niya ang mga teksto nga may ngalan sang Dios nga Jehova. (Deut. 6:16; 8:3) Pamatuod ini nga ang Anak sang Dios may pagsalig sa iya Amay kay gingamit niya ang ngalan sang Dios, ang pinasahi nga ngalan nga nagagarantiya nga tumanon ni Jehova ang tanan niya nga promisa. *

6, 7. Paano naton mabatuan ang indi hilmunon nga mga pagsulay ni Satanas?

⁶ Mabatuan naton ang indi hilmunon nga mga pagsulay ni Satanas paagi sa pagsalig sa Pulong ni Jehova kag sa pagpamalandong sa kahulugan sang ngalan sang Dios. Kon kumbinsido kita sa ginasiling sang Biblia nga palangga ni Jehova kag ginakabalak-an ang iya mga sumilimba, lakip ang mga ginaluyahan, indi kita magpati sa kabutigan ni Satanas nga indi gid kita pagpalanggaon ni Jehova ukon wala gid sia nalipay sa aton. (Sal. 34:18; 1 Ped. 5:8) Kag kon dumdumon naton nga ginahimo gid ni Jehova ang kahulugan sang iya ngalan, indi gid kita magduhaduha nga saligan ang Manugtuman sang mga promisa.—Hulu. 3:5, 6.

⁷ Pero, ano gid ang luyag ni Satanas nga matabo? Ano gid ang gusto niya sa aton? Nangin maathag ang sabat sa sini sang ginsulay ni Satanas si Jesus sa ikatlo nga tion.

8. Sa ikatlo nga pagsulay, paano ginpakita ni Satanas kon ano gid ang iya gusto?

⁸ Basaha ang Mateo 4:8-11. Sa ikatlo nga pagsulay, wala na nagpalahidlahid si Satanas kundi prangka sia nga nagsiling kon ano gid ang iya gusto. Ginpakita niya kay Jesus (mahimo paagi sa palanan-awon) “ang tanan nga ginharian sang kalibutan kag ang gahom kag manggad sini”—pero indi lakip ang korapsion sini. Dayon nagsiling sia kay Jesus: “Ini tanan ihatag ko sa imo kon magyaub ka kag maghimo sing isa ka buhat sang pagsimba sa akon.” * Ang pagsimba—amo gid ina ang gusto ni Satanas! Gusto ni Satanas nga talikdan ni Jesus ang iya Amay kag simbahon niya ang Panulay bilang iya dios. Daw kanami sang tanyag ni Satanas kay Jesus. Makuha ni Jesus ang tanan nga gahom kag manggad sang mga pungsod kag indi sia kinahanglan mag-antos. Indi na niya maeksperiensiahan ang tunukon nga korona, lapdos, kag usok sang pag-antos. Kabalo si Jesus nga mahatag gid ini ni Satanas kay wala niya ginkuestyon ang awtoridad ni Satanas bilang manuggahom sang kalibutan. (Juan 12:31; 1 Juan 5:19) Handa gid si Satanas nga ihatag ang bisan ano para talikdan ni Jesus ang putli nga pagsimba sa iya Amay.

9. (a) Ano gid ang gusto ni Satanas nga himuon sang matuod nga mga sumilimba, kag paano niya kita ginasulay? (b) Ano ang nalakip sa aton pagsimba? (Tan-awa ang kahon nga “Ano ang Pagsimba?”)

⁹ Amo man sina ang gusto ni Satanas subong. Gusto niya nga simbahon naton sia—sa direkta ukon sa indi direkta nga paagi. Sia ang  “dios sini nga sistema sang mga butang,” gani sia ang nagabaton sang tanan nga pagsimba sang butig nga mga relihion sang Babilonia nga Daku. (2 Cor. 4:4) Pero indi sia kontento sa binilyon ka butig nga sumilimba, gusto pa niya sulayon ang matuod nga mga sumilimba nga supakon ang kabubut-on sang Dios. Ginatinguhaan niya nga sulayon kita nga unahon ang manggad kag kabantugan sini nga kalibutan imbes nga unahon ang kabubut-on sang Dios nga mahimo mag-antos kita “tungod sa pagkamatarong.” (1 Ped. 3:14) Kon magpadala kita sa mga pagsulay kag magbiya sa putli nga pagsimba kag mangin bahin sang kalibutan ni Satanas, pareho lang nga nagayaub kita kag nagahimo sing isa ka buhat sang pagsimba kay Satanas kag ginahimo naton sia nga aton dios. Paano naton mabatuan ini nga pagsulay?

10. Ano ang ginhimo ni Jesus sa ikatlo nga pagsulay, kag ngaa?

¹⁰ Talupangda ang sabat ni Jesus sa ikatlo nga pagsulay: “Palayo ka, Satanas!” Mainunungon gid sia kay Jehova, gani ginsikway niya gilayon ang Panulay. Pareho sa ginhimo niya sa una kag ikaduha nga pagsulay, ginkutlo ni Jesus ang teksto sa Deuteronomio nga may ngalan sang Dios: “Nasulat na: ‘Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.’” (Mat. 4:10; Deut. 6:13) Ginsikway ni Jesus ang prominente nga posisyon sa sini nga kalibutan kag ang matawhay nga kabuhi nga wala sing pag-antos kay temporaryo lang ini. Kabalo sia nga ang iya lang Amay ang dapat niya simbahon kag ang paghimo sing bisan isa lang ka “buhat sang pagsimba” nagakahulugan sing pagpasakop kay Satanas. Gani indi gid magsugot si Jesus nga mangin dios niya ang Panulay. Bangod sini, “ginbiyaan sia sang Yawa.” *

11. Paano naton mabatuan si Satanas kag ang iya mga pagsulay?

¹¹ Mabatuan man naton si Satanas kag ang mga pagsulay sining malain nga kalibutan, bangod pareho kay Jesus, makapili kita. Ginhatagan kita ni Jehova sing hamili nga regalo, ang kahilwayan sa pagpili. Gani, wala sing bisan sin-o, bisan ang gamhanan nga malaut nga espiritu nga Panulay, ang makapilit sa aton nga biyaan ang putli nga pagsimba. Kon mainunungon kita nga magtindog “batok [kay Satanas] kag mangin malig-on sa pagtuo,” pareho lang nga nagasiling kita: “Palayo ka, Satanas!” (1 Ped. 5:9) Tandai nga nagbiya si Satanas sang ginsikway sia gilayon ni Jesus. Ang Biblia nagapasalig man sa aton: “Pamatuki ang Yawa, kag magapalagyo sia sa inyo.”—Sant. 4:7.

12. Sa Eden, paano ginpakita ni Satanas nga sia ang kaaway sang putli nga pagsimba?

¹² Sa ikatlo nga pagsulay, ginpamatud-an ni Satanas nga sia ang una nga kaaway sang putli nga pagsimba. Linibo ka tuig antes sini, sa hardin sang Eden, una nga ginpakita ni Satanas ang iya kaakig sa pagsimba kay Jehova. Ginsulay niya si Eva, dayon gin-engganyo ni Eva si Adan nga indi pagtumanon ang sugo ni Jehova. Gani ginpaidalom sila ni Satanas sa iya pagpanguna kag pagkontrol. (Basaha  ang Genesis 3:1-5; 2 Cor. 11:3; Bug. 12:9) Pero ang matuod, bisan pa mahimo indi nila kilala ang nagsulay sa ila, nangin dios nila si Satanas kag nangin sumilimba niya sila. Sang gin-umpisahan ni Satanas ang pagrebelde sa Eden, ginhangkat niya indi lang ang pagkasoberano ukon ang kinamatarong ni Jehova sa paggahom, kundi gin-atake man niya ang putli nga pagsimba. Paano?

13. Ngaa lakip sa hulusayon parte sa pagkasoberano ang putli nga pagsimba?

¹³ Lakip sa hulusayon parte sa pagkasoberano ang putli nga pagsimba. Ang matuod nga Soberano, ang Isa nga ‘nagtuga sang tanan nga butang,’ amo lamang ang dapat simbahon. (Bug. 4:11) Sang gintuga ni Jehova ang perpekto nga mag-asawa nga sanday Adan kag Eva kag ginpaistar sa hardin sang Eden, katuyuan niya nga sa ulihi ang bilog nga duta mapuno sang perpekto nga mga tawo nga kinabubut-on nga magahatag sa Iya sing putli nga pagsimba halin sa matinlo nga tagipusuon. (Gen. 1:28) Ginhangkat ni Satanas ang pagkasoberano ni Jehova kay gusto niya agawon ang butang nga para lang sa Soberanong Ginuong Jehova—ang pagsimba.—Sant. 1:14, 15.

14. Nagmadinalag-on bala si Satanas sa iya pag-atake sa putli nga pagsimba? Ipaathag.

 ¹⁴ Nagmadinalag-on bala si Satanas sa iya pag-atake sa putli nga pagsimba? Nasulay niya sanday Adan kag Eva sa pagtalikod sa Dios. Halin sadto, nagapakig-away si Satanas sa putli nga pagsimba kag ginahimo niya ang tanan para magbiya ang madamo nga tawo kay Jehova nga Dios. Antes sang panahon sang mga Cristiano, wala nag-untat si Satanas sa pagsulay sa mga sumilimba ni Jehova. Sang unang siglo C.E., gingamit niya ang apostasya para higkuan ang Cristianong kongregasyon, amo nga daw nadula ang putli nga pagsimba. (Mat. 13:24-30, 36-43; Binu. 20:29, 30) Sugod sang ikaduha nga siglo C.E., ang mga sumilimba malawig nga nangin bihag sa espirituwal sang Babilonia nga Daku, ang bilog kalibutan nga emperyo sang butig nga relihion. Pero wala gid nagmadinalag-on si Satanas nga punggan ang katuyuan sang Dios parte sa putli nga pagsimba. Wala sing makapugong sa Dios sa pagtuman sang iya katuyuan. (Isa. 46:10; 55:8-11) Nadalahig ang iya ngalan, kag ginahimo gid niya ang kahulugan sang iya ngalan. Si Jehova Manugtuman gid sang iya katuyuan!

15. Ano ang ginhimo ni Jehova sa Eden para masilutan ang mga rebelde kag para matuman gid ang iya katuyuan?

¹⁵ May ginhimo gilayon si Jehova sa Eden para masilutan ang mga rebelde kag para matuman gid ang iya katuyuan. (Basaha ang Genesis 3:14-19.) Ginpamatbatan ni Jehova ang tatlo ka rebelde base sa kon sin-o ang una nga nakasala. Una si Satanas, sunod si Eva, kag ang katapusan si Adan, samtang ara pa ang mag-asawa sa hardin. Si Satanas ang ginahambalan ni Jehova sang nagtagna sia nga may isa ka “kaliwat” nga magadula sang tanan nga epekto sang pagrebelde. Ining ginsaad nga “kaliwat” may daku nga papel sa pagtuman sa katuyuan ni Jehova parte sa putli nga pagsimba.

16. Bisan pa sang pagrebelde sa Eden, paano padayon nga nagpanghikot si Jehova para matuman ang iya katuyuan?

¹⁶ Bisan pa sang pagrebelde sa Eden, padayon nga nagpanghikot si Jehova para matuman ang iya katuyuan. Indi na perpekto ang mga tawo, gani naghimo sia sing kahimusan nga dapat nila sundon para batunon niya ang ila pagsimba. Binagbinagon ini sa masunod nga kapitulo. (Heb. 11:4–12:1) Gingiyahan man niya ang pila ka manunulat sang Biblia lakip sanday Isaias, Jeremias, kag Ezequiel, para irekord ang makakulunyag nga mga tagna parte sa pagpasag-uli sang putli nga pagsimba. Ini nga pagpasag-uli isa sa panguna nga tema sa Biblia. Ang tanan nga tagna parte sa pagpasag-uli matuman paagi sa ginsaad nga “kaliwat,” nga sang ulihi nakilala nga si Jesucristo. (Gal. 3:16) Si Jesus Sumalakdag sang putli nga pagsimba kag ginpakita niya ini sa iya sabat sa ikatlo nga pagsulay. Sia gid ang ginpili ni Jehova sa pagtuman sang mga tagna parte sa pagpasag-uli. (Bug. 19:10) Hilwayon niya ang katawhan sang Dios sa espirituwal nga pagkabihag kag ipasag-uli ang putli nga pagsimba sa nagakaigo nga lugar sini.

17. Ngaa interesado gid kita sa mga tagna sa Biblia parte sa pagpasag-uli?

¹⁷ Makalilipay kag makapabakod sing pagtuo kon tun-an naton ang mga tagna sa Biblia parte sa pagpasag-uli. Interesado gid kita sa sini nga mga tagna, kay ginahulat gid naton ang tion nga ang tanan nga tinuga sa langit kag sa duta mahiusa sa putli nga pagsimba sa Soberanong Ginuong Jehova. Nagahatag man ini sa aton sing paglaum kay ginasugid sini ang makalilipay nga mga promisa nga mabasa sa Pulong sang Dios. Indi bala gusto na gid naton nga matuman ang mga promisa ni Jehova, pareho sang pagkabanhaw sang aton napatay nga mga pinalangga, bilog kalibutan nga paraiso, kag kabuhi nga wala sing katapusan nga may perpekto nga panglawas?—Isa. 33:24; 35:5, 6; Bug. 20:12, 13; 21:3, 4.

18. Ano ang tun-an naton sa sini nga publikasyon?

¹⁸ Sa sini nga publikasyon, tun-an naton ang makakulunyag nga mga tagna sa libro sang Ezequiel sa Biblia. Madamo sa sini nga mga tagna ang nagapokus sa pagpasag-uli sang putli nga pagsimba. Binagbinagon naton kon paano ang mga tagna ni Ezequiel naangot sa iban pa nga tagna, kon paano ini matuman paagi sa Cristo, kag kon paano kita nadalahig sa sini.—Tan-awa ang kahon nga “Sumaryo sang Ezequiel.”

19. Ano ang determinado mo nga himuon, kag ngaa?

¹⁹ Sang 29 C.E., sa kamingawan sang Judea, napaslawan gid si Satanas sa pagsulay kay Jesus nga biyaan ang putli nga pagsimba. Kamusta kita? Ginapabaskog pa gid ni Satanas ang iya paagi para mapahilayo kita sa matuod nga pagsimba. (Bug. 12:12, 17) Kabay nga ini nga publikasyon makapabakod sang aton determinasyon nga batuan ang malaut nga Panulay. Kag kabay pa nga ang aton ginahambal kag ginahimo nagapakita nga nagaugyon kita sa ginasiling sang Biblia nga “Si Jehova nga imo Dios ang dapat mo simbahon.” Kon himuon naton ini, may kahigayunan kita nga makita ang katumanan sang mahimayaon nga katuyuan ni Jehova, nga ang tanan sa langit kag sa duta mahiusa sa paghatag kay Jehova sang isa ka butang nga para gid lang sa iya, ang putli nga pagsimba halin sa matinlo nga tagipusuon!