1, 2. Hana wa tola ofeta Yesu ba Danö si Mate Yudea me baŵa wangaruru 29 M, ba hadia zalua ba daʼö? (Faigi gambara ba wamobörö wamahaʼö.)

ME BÖRÖTA mbaŵa wangaruru 29 M, ba Danö si Mate Yudea so Yesu, lö aröu moroi ba Nasi si Mate tanö yöu. Eheha niʼamoniʼö zolohe yaʼia ba daʼö me no aefa tebayagö ia idanö ba tebayoini. Lö sinanö, mokara ba ebolo ndraso ba nahia daʼö. No 40 hari fuasö Yesu, mangandrö ia ba so niʼangerönusinia. Te ba ginötö daʼö fahuhuo Yehowa khö Nononia ba ifaʼanö enaʼö tola ifalua halöwönia.

² Me marase Yesu börö waʼolofo, iʼondrasi ia Satana. Salua aefa daʼö zangoromaʼö so sambua zabölö tohude soʼamakhaita ba niha somasi manuhini famosumange satulö, tefarahu ndraʼugö.

3, 4. (a) Hewisa Zatana wamörögö fanandraigö si dombua nifaluania, ba hadia zomasi ia iʼasogö ba dödö Yesu? (b) Hewisa göi wangogunaʼö Zatana fanandraigö simane daʼö iadaʼa?

³ Baso Mataiʼo 4:1-7. Dombua wanandraigö siföföna nibeʼe Zatana, ibörögö faoma fehede, ”Na ono Lowalangi ndraʼugö.” Hadia aombö dödö Zatana wa Yesu andrö Ono Lowalangi? Löʼö. Börö me ono Lowalangi göi Zatana si tobali malaʼika si lö sökhi, andrö wa hasambalö iʼila wa Yesu Ono siaʼa khö Lowalangi.  (Kol. 1:15) Iʼila göi me tebayagö idanö Yesu, imane Yehowa moroi ba zorugo, ”Onogu daʼa, niʼomasiʼögu, omuso dödögu khönia.” (Mat. 3:17) Te omasi Zatana na aombö dödö Yesu khö Namania, hadia tola ifaduhusi tödö ba iʼameʼegö tödö ia. Si oföna, itandraigö Yesu ba wombaliʼö kara tobali roti. Hulö na imane, ’Yaʼugö andrö Ono Lowalangi, hana wa lö ibeʼe göu Amau ba danö si mate andre?’ Si dua, itandraigö ia Satana enaʼö ifazaumba ia moroi ba mbumbu gosali. Hulö na imane, ’Yaʼugö andrö Ono Lowalangi, hewisa wa lö faduhu dödöu wa ilumöʼö ndraʼugö Amau?’

⁴ Iʼogunaʼö wanandraigö simane daʼö Satana iadaʼa. (2 Ko. 2:11) Ibalo-baloi hawaʼara atage ita ba ide-ide dödöda, ba daʼö zasesenia iʼogunaʼö wanandraigö si lö oroma ba wolawa yaʼita. (2 Ko. 11:14) Omasi ia na faduhu dödöda wa lö iʼomasiʼö ita Yehowa. Iforege göi enaʼö so ba dödöda wa tebai mufaduhusi tödö Yehowa ba lö ifalua zi no ifabuʼu ba Daromalinia. Sindruhu-ndruhu falimosa sebua daʼö. (Yoh. 8:44) Hewisa enaʼö lö telimo ita?

5. Hewisa dödö Yesu ba wanandraigö si dombua salua khönia?

⁵ Nehegö hadia nifalua Yesu ba zi dombua fanandraigö siföföna. Lö aombö dödönia wa iʼomasiʼö ia Amania, ba sindruhu-ndruhu ifaduhusi tödö Namania. Andrö wa iʼanemaiʼö itimbagö wanandraigö nibeʼe Zatana, iʼogunaʼö nösi Daromali moroi khö Namania. Itötöi nösi ayati si tefaudu sangogunaʼö töi Lowalangi, Yehowa. (5 Mo. 6:16; 8:3) Eluaha döi Yehowa zangaʼaroʼö tödöda wa hasambalö ifalua fefu zi no ifabuʼu. Me iʼogunaʼö döi daʼö Yesu, iforomaʼö wa faduhu dödönia khö Namania. *

6, 7. Hewisa wanimbagöda fanandraigö si lö oroma moroi khö Zatana?

⁶ Tola tatimbagö wanandraigö si lö oroma moroi khö Zatana na taʼodaligö Daromali Yehowa ba taʼangerönusi geluaha döinia. Imane Sura Niʼamoniʼö wa iʼomasiʼö ba iʼameʼegö tödö fefu zamosumange yaʼia Yehowa, mendrua manö ba ginötö ide-ide dödöra. Na faduhu dödöda daʼö, tebai ilimo ita Satana samöbögö si lö duhu wa lö irai iʼomasiʼö ita Yehowa. (Si. 34:18; 1 Fe. 5:8) Na lö aetu itörö tödöda wa ifalua Yehowa hadia ia moloʼö eluaha döinia, lö aombö dödöda wa no sinangea tafaduhusi tödö Yehowa börö me lö mamalö ifalua mbuʼusa linia.​—Amd. 3:5, 6.

⁷ Hadia zi oföna gohitö dödö Zatana? Hadia niʼandrönia khöda? Oroma wanema linia me itandraigö Yesu ba zi medölu kali.

8. Ba wanandraigö si medölu, hadia sindruhunia zomasi Zatana ba hewisa wamaluania daʼö?

⁸ Baso Mataiʼo 4:8-11. Ba wanandraigö si medölu, tenga saʼae fanandraigö si lö oroma niʼogunaʼönia. Ifaʼema hadia zomasi ia. Iforomaʼö khö Yesu (te ba gangilata) ”fefu wamatörö  ba gulidanö awö lakhöminia”, hizaʼi lö iforomaʼö zi lö sökhi si so ba daʼö. Imane khö Yesu, ”Ubeʼe khöu daʼa fefu asala ötuhi danö ba mangalulu ndraʼugö khögu hewaʼae ha sakali manö.” * Ba daʼö oroma wa omasi Zatana na yaʼia nifosumange! Omasi ia na faröi Yesu khö Namania ba ifaduhuʼö wa Satana andrö lowalanginia. Hulö lala foto nibeʼenia andrö. Hulö na imane khö Yesu wa tola iʼokhögö wamatörö hegöi faʼakayo ba gulidanö daʼa ba lö moguna itörö wamakao. Eluahania, lö labeʼe ba högönia dakula sodoi, laleasi mazui labunu ia ba döla geu. Tola ibeʼe daʼö Satana börö me khönia fefu wamatörö ba gulidanö andre. Lö fabuʼa Yesu ba daʼö. (Yoh. 12:31; 1 Yo. 5:19) Ibeʼe fefu hadia ia khö Yesu asala iröi wamosumange satulö, si lö tola löʼö mubeʼe khö Namania.

9. (a) Hadia sindruhunia niʼandrö Zatana ba niha samosumange satulö, ba hewisa wanandraigönia yaʼira? (b) Hadia zi farahu ba wamosumangeda Lowalangi? (Faigi kotak ”Hadia Wamosumange Andrö?”)

⁹ Iadaʼa, omasi Zatana na tafosumange ia mazui na tafalua hadia zi lö tefaudu ba zomasi Yehowa. Börö me yaʼia andrö ”lowalangi si sagötö tanö”, yaʼia lowalangi nifosumange agama faya nifotöi Babilona Sebua ba Zura Niʼamoniʼö. (2 Ko. 4:4) Hizaʼi, hewaʼae miliaran waʼato niha si fao ba agama faya, lö nasa ahono dödö Zatana. Omasi ia na fao niha samosumange satulö ba wolawa ohitö dödö Lowalangi. Iforege ba wondrönisi  tödöda ba wangalui harato hegöi kuaso, tenga enaʼö tobali niha Keriso sindruhu si tola manö göna ’famakao börö wamalua satulö’. (1 Fe. 3:14) Na tedönisi dödöda ba wondröi famosumange satulö ba tobali ösi gulidanö Zatana, no amaedola ’tatuhi danö ba mangalulu’ ita khö Zatana, ba no tabaliʼö ia lowalangida. Hewisa enaʼö lö tedönisi dödöda?

10. Hewisa dödö Yesu ba wanandraigö si medölu, ba hadia mbörö?

¹⁰ Nehegö hadia nifalua Yesu ba wanandraigö si medölu. Iforomaʼö waʼalöfaröinia khö Yehowa, iʼanemaiʼö ifofanö Zatana ba imane, ”Betaʼögö Satana!” Simane si no irai ifalua, itötöi nösi ayati sangogunaʼö töi Lowalangi ba mbuku 5 Moze. Imane, ”So ba zura, ’Ha khö Yehowa Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.’” (Mat. 4:10; 5 Mo. 6:13) Lö tedönisi dödö Yesu ba wamili lala waʼauri si lö abula dödö. Lö adöni dödönia ba wangokhögö töi si sökhi ba gulidanö si lö arara andre. Aboto ba dödönia wa ha Amania zinangea mufosumange, ba na ’ituhi danö ba wamosumange’ Satana, hewaʼae ha sakali, eluahania daʼö no mangalulu ia khö Zatana. Lö omasi ia na Satana zi tobali lowalanginia. Itimbagö daʼö ba ”iröi ia Afökha”. *​—Mat. 4:11.

11. Hewisa wolawada Satana hegöi fondrönisi dödö nifaluania?

¹¹ Simane Yesu, tola tafili ba talawa wanandraigö moroi khö Zatana hegöi fondrönisi dödö moroi ba gulidanönia si lö sökhi. No ibeʼe Yehowa khöda mbuala sebua böli ba wamili somasi ita. Börö daʼö, lö hadöi si tola mamaso yaʼita ba wondröi famosumange satulö. Tebai ifalua daʼö Satana hewaʼae abölö ia. Na lö faröi ita ba ’talawa ia si fao famati saro’, no tamane, ”Betaʼögö Satana!” (1 Fe. 5:9) Törö tödöu wa mofanö Zatana me no aefa itimbagö ia Yesu si fao faʼaro dödö. Ifaduhuʼö göi ba dödöda Sura Niʼamoniʼö, ”Milawa Gafökha ba iröi ami.”​—Yak. 4:7.

12. Ba Kabu Edena, hezo taʼila wa Satana andrö tobali udu wamosumange satulö?

¹² Fanandraigö si medölu zangoromaʼö wa Satana zi tobali udu siföföna ba wamosumange satulö. Me hauga ribu fakhe silalö, ba Kabu Edena, ibörögö iforomaʼö wa lö omasi ia na Yehowa nifosumange. Itandraigö Khawa, ba ifaweʼe woʼomonia Adamo ba wolawa oroisa Yehowa. Me lafalua daʼö, Satana zamatörö yaʼira. (Baso 1 Moze 3:1-5; 2 Ko. 11:3; Fam. 12:9) Satana saʼae zi tobali lowalangira, ba tobali samosumange Satana ira, hewaʼae na lö laʼila haniha zindruhunia zamaelungu yaʼira. Me ibörögö Satana wamadaö ba Gedena, tenga saʼae ha faʼasinangea Yehowa ba wamatörö nitandrawaisinia, hizaʼi ilawa göi wamosumange satulö. Hana wa tola tawaʼö zimanö?

13. Hadia gamakhaita wamosumange satulö hegöi faʼasinangea Yehowa ba wamatörö?

¹³ Moʼamakhaita wamosumange satulö ba waʼasinangea Yehowa ba wamatörö. Yehowa andrö Lowalangi Fondrege Zalawa,  sinangea mamatörö ba Somböi fefu hadia ia. Börö daʼö, ha yaʼia zinangea mufosumange. (Fam. 4:11) Moʼahonoa wamazökhinia Adamo hegöi Khawa ba Kabu Edena, ba omasi ia na afönu gulidanö andre niha soʼahonoa, samosumange yaʼia soroi ba dödö ba samalua famosumange satulö. (1 Mo. 1:28) Hewaʼae ha Lowalangi Fondrege Zalawa sotöi Yehowa zinangea mufosumange, hizaʼi omasi göi Zatana na lafosumange ia. Andrö wa itandrawaisi waʼasinangea Yehowa ba wamatörö.​—Yak. 1:14, 15.

14. Hadia mofozu nifalua Zatana enaʼö teböhöli wamosumange satulö? Tutunö.

¹⁴ Hadia mofozu nifalua Zatana enaʼö teböhöli wamosumange satulö? Iʼotarai me no ifaelungu Gadamo hegöi Khawa irege laröi Lowalangi, iforege manö nasa ba wolawa famosumange satulö. Iʼalui lala enaʼö itugu ato niha sondröi Lowalangi Yehowa. Fatua lö mufasindro mbanua niha Keriso, iforege Satana ba wanandraigö niha samosumange Yehowa. Aefa daʼö, ba abad siföföna, ifobörö  wondröi sindruhu irege raʼiö mbanua niha Keriso ba hulö saʼae tebato wamosumange satulö. (Mat. 13:24-30, 36-43; Hal. 20:29, 30) Iʼotarai me abad si dua, no ara teʼoloiʼö ba wamati nono mbanua Lowalangi ba Mbabilona Sebua, yaʼia daʼö agama faya ba zi sagörö ulidanö. Hizaʼi, lö mofozu Zatana ba wamawukaisi ohitö dödö Lowalangi sanandrösa ba wamosumange satulö. Lö si tola manaisi Lowalangi ba wamalua ohitö dödönia. (Yes. 46:10; 55:8-11) Moʼamakhaita daʼö ba döinia, ba lö tebulö ifalua hadia ia moloʼö töinia. Hasambalö ifalua gohitö dödönia Yehowa!

15. Hadia nifalua Yehowa me so zamadaö ba Kabu Edena, ba hewisa enaʼö alua gohitö dödönia?

¹⁵ Iʼanemaiʼö so nifalua Yehowa khö ndra samadaö andrö ba iʼalui lala enaʼö alua gohitö dödönia. (Baso 1 Moze 3:14-19.) Me so nasa Gadamo hegöi Khawa ba Kabu Edena, ihuku zamadaö si datölu andrö Yehowa, iʼotarai ba ziföföna mamalua horö:  si oföna Satana, si dua Khawa, ba safuria Adamo. Me fahuhuo Yehowa khö Zatana, samaweʼe si lö oroma andrö, ifatunö khönia Yehowa wa so dania ’maʼuwu’ sangeheta lua-lua wamadaö andrö. Tohude sibai nifalua ’maʼuwu’ andrö ba wamalua ohitö dödö Yehowa, soʼamakhaita ba wamosumange satulö.

16. Me no alua wamadaö ba Kabu Edena, hadia nifalua Yehowa enaʼö lö tebulö gohitö dödönia?

¹⁶ Me no aefa wamadaö ba Gedena, lö tebulö iʼalui lala Yehowa enaʼö alua gohitö dödönia. Ifatunö ba niha si lö moʼahonoa lala satulö ba wamosumange yaʼia, simane nitutunöda ba wamahaʼö aefa daʼa. (Heb. 11:4–12:1) Ibeʼe göi gehehania khö ndra sanura Sura Niʼamoniʼö simane Yesaya, Yeremia hegöi Hezekieli ba wanura famaʼeleʼö sahöli-höli dödö sanandrösa ba wamohouni famosumange satulö. Asese mutötöi daʼö ba Zura Niʼamoniʼö, ba tola alua ia börö ’maʼuwu’ si no ifabuʼu Lowalangi. Si oföna sibai khö Yesu Keriso manandrösa ngawua wehede ’maʼuwu’ andre. (Gal. 3:16) Moroi ba wanema li nibeʼe Yesu me itandraigö ia Satana ba zi medölu kali, ba daʼö oroma wa yaʼia andrö Sangoʼawögö famosumange satulö. Yaʼia nifili Yehowa ba wamalua fefu si no tefaʼeleʼö sanandrösa ba wamohouni. (2 Ko. 1:20; Fam. 19:10) Iheta dania nono mbanua Lowalangi si no teʼoloiʼö ba wamati, ba ibohouni wamosumange satulö.

17. Hana wa adöni dödöda ba wamaʼeleʼö Zura Niʼamoniʼö sanandrösa ba wamohouni?

¹⁷ Teʼaroʼö wamatida na tafahaʼö ita ba wamaʼeleʼö sanandrösa ba wamohouni. Adöni dödöda ba wamaʼeleʼö daʼö, börö me  tadöna-döna ginötönia teʼosambuaʼö fefu gomböila danga Lowalangi, he si so ba zorugo hegöi ba gulidanö ba wamalua famosumange satulö khö Yehowa, Lowalangi Fondrege Zalawa. So ösa mbuʼusa li Lowalangi si möi fangohahau dödöda ba wamaʼeleʼö andrö. Omasi sibai ita na alua daʼö, duma-dumania tesusugi dania zi fahuwu khöda hegöi ösi nomoda, tobali Faradaiso zi sagörö ulidanö ba moʼahonoa waʼaurida sagötö faʼara, ba lö hadöi fökhö.​—Yes. 33:24; 35:5, 6; Fam. 20:12, 13; 21:3, 4.

18. Hadia nifahaʼöda yaʼita ba mbuku daʼa?

¹⁸ Ba mbuku daʼa, tatutunö wamaʼeleʼö sahöli-höli dödöda moroi ba mbuku Hezekieli si so ba Zura Niʼamoniʼö. Oya duho soʼamakhaita ba wamohouni famosumange satulö. Tatutunö hadia gamakhaita wamaʼeleʼö Hezekieli ba wamaʼeleʼö tanö böʼö, hewisa wamalua Keriso daʼö, ba hadia gamakhaitania khöda.​—Faigi kotak ”Nehegö Mbuku Hezekieli”.

19. Hadia gangetula nihalöu, ba hadia mbörö?

¹⁹ Me föna, ba Danö si Mate Yudea me 29 M, lö mofozu nifalua Zatana me idönisi dödö Yesu ba wondröi famosumange satulö. Hewisa göi ita? Iadaʼa, abölö iforege nasa Satana ba wamandröndröu yaʼita moroi ba wamosumange satulö. (Fam. 12:12, 17) Yamöi fanoloda mbuku daʼa ba wangaʼaroʼö angetulada ba wanimbagö fanandraigö moroi khö Zatana si lö sökhi. Dataforomaʼö ba wehede hegöi ba nifaluada wa fao dödöda ba niwaʼö Yesu, ”Ha khö Yehowa Lowalangiu mangalulu ndraʼugö ba öfosumange ia.” Na tafalua daʼö, tola taʼila hewisa waʼalua gohitö dödö Lowalangi sahöli-höli dödöda. Ba ginötö daʼö dania, teʼosambuaʼö fefu gomböila dangania, he si so ba zorugo he ba gulidanö ba wamalua famosumange satulö soroi ba dödö, börö me ha Yehowa zinangea mufosumange!