1, 2. Fa Yesus doro na ini a sabana fu Yudea na ini a yari 29 èn san e pasa drape? (Luku a prenki na a bigin fu a kapitel.)

 NA INI a yari 29, Yesus ben de na ini a sabana fu Yudea, na a noordsei fu a Dede Se. Baka di a dopu èn di Gado salfu en, a santa yeye tyari en go na a presi dati. Na ini a drei sabana disi di lai nanga bergi nanga lagipresi, Yesus ben de en wawan 40 dei langa. A heri pisi ten disi a ben e faste, a ben e begi èn a ben denki dipi. Kande Yehovah ben e taki tu nanga en Manpikin fu sreka en gi den sani di a ben musu du.

² Di Yesus ben kon swaki fu di angri ben e kiri en, dan Satan kon na en. Den sani di pasa baka dati e sori taki ala sma di lobi a tru anbegi musu teki wan prenspari bosroiti. Sobun, yu srefi musu teki a bosroiti disi.

3, 4. (a) San Satan taki di a tesi Yesus den fosi tu leisi èn fu san ede a taki den sani dati? (b) Fa Satan wani kori wi na a srefi fasi?

³ Leisi Mateyus 4:1-7. Den fosi tu leisi di Satan tesi Yesus, a bigin nanga den wortu disi: „Efu yu na wan manpikin fu Gado.” A de so taki Satan no ben sabi taki Yesus na Gado Manpikin? Nôno. Na engel disi di drai baka gi Gado ben sabi  heri bun taki Yesus na a fosi Manpikin fu Gado (Kol. 1:15). Satan ben sabi tu san Yehovah ben taki komoto fu hemel di Yesus dopu. Yehovah taki: „Disi na mi Manpikin, a lobiwan di mi feni bun” (Mat. 3:17). Kande Satan ben wani meki Yesus lasi frutrow na ini en Papa èn a kan taki a ben wani meki a tweifri efu Yehovah ben lobi en trutru. A fosi leisi di Satan tesi Yesus, a taigi en fu meki ston tron brede. Te yu luku en bun, Satan taki: ’Efu yu na Gado Manpikin, dan fu san ede yu Papa no e gi yu nyanyan na ini a drei sabana disi?’ A di fu tu leisi di Satan tesi Yesus a taigi en fu dyompo fu a skotu fu a tempel go na gron. Fu taki en leti Satan taki: ’Efu yu na Gado Manpikin, dan sori taki yu e bribi taki yu Papa o kibri yu.’

⁴ Satan e du a srefi sani na ini a ten disi (2 Kor. 2:11). A e wakti teleki tru anbegiman kon swaki noso lasi-ati, dan a e suku fu kori den (2 Kor. 11:14). A wani kori wi fu bribi taki Yehovah no lobi wi noso taki a no feni wi bun. Boiti dati, Satan wani taki wi no musu frutrow Yehovah èn a wani taki wi bribi taki Yehovah no o du san a pramisi. Ma den sani disi na soso lei (Yoh. 8:44). San o yepi wi fu no bribi den lei disi?

5. San Yesus taki den fosi tu leisi di Satan tesi en?

⁵ Prakseri san Yesus piki Satan den fosi tu leisi. Yesus no ben tweifri srefisrefi taki en Papa lobi en èn a ben frutrow trutru tapu en Papa. Wantewante Yesus kakafutu gi Satan èn a taigi en san skrifi na ini a Wortu fu en Papa. A fiti taki Yesus gebroiki Bijbeltekst di abi a nen fu Yehovah (Deut. 6:16; 8:3). A moro bun fasi fa a Manpikin fu Gado ben kan sori taki a e frutrow en Papa, na fu gebroiki en nen. A nen fu Yehovah e gi wi a dyaranti taki ala ten a e du san a pramisi. a

6, 7. Fa wi kan kakafutu gi den tesi fu Satan?

⁶ Wi kan kakafutu gi den tesi fu Satan te wi e studeri Gado Wortu èn te wi e denki dipi fu a nen fu Yehovah èn san a nen wani taki. Na ini Bijbel Yehovah e sori taki a lobi den anbegiman fu en èn taki a e broko en ede nanga den, sosrefi nanga den wan di lasi-ati. Te wi e bribi san den tekst dati e taki, dan wi o si taki Satan e lei te a e taki dati Yehovah no lobi wi (Ps. 34:18; 1 Petr. 5:8). Efu wi e hori na prakseri san a nen fu Yehovah wani taki èn taki ala ten a e du san a pramisi, dan wi o frutrow na en tapu nanga wi heri ati.​—Odo 3:5, 6.

⁷ Ma fu san ede Satan e kori sma? San a wani trutru? Wi e si dati te wi e luku a di fu dri leisi di Satan tesi Yesus.

8. Fa a di fu dri tesi sori san Satan wani trutru?

⁸ Leisi Mateyus 4:8-11. Di Satan tesi Yesus a di fu dri leisi, a no kon nanga triki moro, ma a sori krin san a ben wani  trutru. Satan sori Yesus (na ini wan fisyun) „ala den kownukondre fu grontapu nanga a moi fu den”, ma a no sori en fa den kruka. A taigi Yesus: „Mi o gi yu ala den sani disi efu yu boigi èn anbegi mi wán leisi nomo.” b Dati na san Satan wani. A wani taki sma musu anbegi en! Satan ben wani taki Yesus ben musu drai baka gi en Papa fu anbegi en leki gado. Satan ben wani meki Yesus bribi taki wan moro makelek fasi ben de fu tron kownu. A ben wani sori Yesus taki a ben kan kisi ala makti nanga gudu fu grontapu sondro fu nyan pina. A no ben o abi fu weri wan kransi fu maka, sma no ben o wipi en èn a no ben o abi fu dede na wan postu. Satan ben kan gi Yesus ala den kownukondre disi fu di den de fu en èn Yesus ben sabi disi (Yoh. 12:31; 1 Yoh. 5:19). A de krin taki Satan ben de klariklari fu gi Yesus iniwan sani, soso fu meki a tapu fu anbegi en Papa.

9. (a) San Satan wani taki tru anbegiman musu du èn fa a e pruberi fu kori wi? (b) San na anbegi? (Luku a faki „San na anbegi?”)

⁹ Na ini a ten disi Satan wani taki wi musu anbegi en. Son leisi wi kan du dati sondro fu wi sabi srefi. Na en na „a gado fu a grontapu disi”. Dati meki te den falsi kerki e anbegi den gado fu den, dan fu taki en leti na Satan den e anbegi (2 Kor. 4:4). Ma a no nofo gi Satan taki milyardmilyard sma de na  ini falsi kerki. A wani kori tru anbegiman fu du sani di Gado no feni bun. A wani kori wi fu suku gudu nanga posisi na ini a grontapu disi, na presi fu teki na eksempre fu Yesus di ben de klariklari fu nyan pina (1 Petr. 3:14). Efu wi ben o gowe libi a tru anbegi èn efu wi tron wan pisi fu a grontapu fu Satan, dan fu taki en leti wi ben o boigi gi Satan noso anbegi en. Na so wi ben o meki en tron wi gado. Fa wi kan sorgu taki disi no pasa nanga wi?

10. Di Satan tesi Yesus a di fu dri leisi, san Yesus piki en èn fu san ede a piki en so?

¹⁰ Luku san Yesus taki di Satan tesi en a di fu dri leisi. Fu sori taki a wani anbegi Yehovah wawan, a taigi Satan wantewante: „Gowe fu dya, Satan!” Neleki fa Yesus ben du dati den fosi tu leisi di Satan tesi en, a gebroiki wan tekst fu Deuteronomium di abi a nen fu Gado. A taki: „Gado Buku taki: ’Na Yehovah yu Gado, yu musu anbegi èn na en wawan yu musu dini’” (Mat. 4:10; Deut. 6:13). Yesus sori krin taki a no ben wani wan hei posisi nanga wan switi libi na ini a grontapu disi. A ben sabi taki den sani disi ben o de fu wan syatu pisi ten nomo. A ben sabi taki sma musu anbegi en Papa wawan èn taki efu a ben ’anbegi Satan wán leisi nomo’, dan dati ben o sori taki a e saka ensrefi na Satan ondro. Yesus weigri fu si Satan leki en gado. Di Satan si taki Yesus no du san a taki, a „gowe libi en”. c

11. Fa wi kan kakafutu gi Satan nanga den tesi fu en?

¹¹ Wi kan kakafutu gi Satan nanga en grontapu fu di neleki Yesus, wi srefi kan bosroiti san wi wani du. Na so Yehovah meki wi. Dati meki nowan sma man dwengi wi fu drai baka gi a tru anbegi. Srefi Satan di abi so furu makti, no man du dati. Te wi abi wan tranga bribi èn te wi e kakafutu gi Satan, dan a de neleki wi e taki: „Gowe fu dya, Satan!” (1 Petr. 5:9) No frigiti taki Satan gowe libi Yesus baka di a kakafutu gi en. Dati meki Bijbel e taki: „Kakafutu gi Didibri èn a o lon gowe fu unu.”​—Yak. 4:7.

12. Fa Satan sori na ini a dyari fu Eden taki en na wan feanti fu a tru anbegi?

¹² A di fu dri tesi e sori krin taki Satan na a fosi feanti fu a tru anbegi. Dusundusun yari na fesi, na ini a dyari fu Eden, Satan ben sori kaba taki a no lobi a tru anbegi srefisrefi. A kori Eva, èn Eva meki taki Adam trangayesi Yehovah. Na so Satan tron den tiriman (leisi Genesis 3:1-5; 2 Kor. 11:3; Openb. 12:9). Fu taki en leti, a tron den gado èn den tron futuboi fu en, aladi a kan taki den no ben sabi suma ben kori den. Di Satan meki sma trangayesi Gado na ini Eden, dan a ben wani meki sma bribi taki Yehovah no abi a reti fu tiri. Ma boiti dati a ben wani pori a tru anbegi. Fa so?

13. Satan ben taki dati Yehovah no abi a reti fu tiri. Fu san ede wi kan taki dati a sani disi abi fu du tu nanga a tru anbegi?

 ¹³ Satan ben wani meki sma bribi taki Yehovah no abi a reti fu tiri. A sani disi abi fu du tu nanga a tru anbegi, fu di Bijbel e sori taki na a sma di „meki ala sani”, na en wawan wi musu anbegi (Openb. 4:11). Di Yehovah meki Adam nanga Eva, a poti den na ini a dyari fu Eden. A ben wani taki den ben musu furu a heri grontapu nanga libisma èn taki den sma dati ben o anbegi en nanga wan krin ati (Gen. 1:28). Satan opo ensrefi teige Yehovah fu di a ben abi bigi-ai. A ben wani taki sma anbegi en aladi na Yehovah wawan sma musu anbegi.​—Yak. 1:14, 15.

14. Satan ben man pori a tru anbegi? Tyari disi kon na krin.

¹⁴ Satan ben man pori a tru anbegi? A ben man kisi Adam nanga Eva fu drai baka gi Gado. Sensi a ten dati Satan e feti teige a tru anbegi. A e meki muiti fu kisi so furu sma leki a man fu drai baka gi Yehovah Gado. Satan tan pruberi fu kori  den anbegiman fu Yehovah na ini a ten fosi a Kresten gemeente seti. Na ini a ten fu den apostel a kori son Kresten fu drai baka gi a tru bribi. Baka wan pisi ten den sma disi pori a Kresten gemeente èn a ben gersi leki a tru anbegi ben lasi gowe (Mat. 13:24-30, 36-43; Tori 20:29, 30). Syatu baka a yari 100, tru Kresten go na ini katibo fu Babilon a Bigiwan fu wan langa pisi ten. Ma Satan no ben man sorgu taki a tru anbegi lasi gowe. Noti no man tapu Gado fu du san a abi na prakseri (Yes. 46:10; 55:8-11). A nen fu en de na ini a tori èn ala ten Yehovah e du san a pramisi!

15. San Yehovah du nanga den sma di opo densrefi teige en na ini Eden? San a du fu sorgu taki a wani fu en kon tru te fu kaba?

¹⁵ Di sma opo densrefi teige Yehovah na ini Eden, dan wantewante Yehovah du wan sani fu sorgu taki a wani fu en kon  tru te fu kaba. (Leisi Genesis 3:14-19.) Yehovah leisi strafu gi den dri sma di trangayesi en. A fosiwan na Satan, baka dati Eva èn leki lasti Adam. Yehovah taigi Satan taki wan „pikin” ben o kon di ben o seti ala sani kon bun baka. Nanga yepi fu a „pikin” disi Yehovah ben o seti a tru anbegi baka.

16. Baka di sma opo densrefi teige Yehovah na ini Eden, san Yehovah bigin du fu seti a tru anbegi baka?

¹⁶ Baka di sma opo densrefi teige Yehovah na ini Eden, Yehovah tan du sani fu seti a tru anbegi baka. A seti sani so taki sondu libisma ben man anbegi en na wan fasi di a feni bun, soleki fa wi o si na ini a tra kapitel (Hebr. 11:4–12:1). A meki Bijbel skrifiman soleki Yesaya, Yeremia nanga Esekièl skrifi moi profeititori di e sori taki a tru anbegi ben o seti baka. A tori disi e kon na krin na ini heri Bijbel. A „bakapikin” di Yehovah ben pramisi o meki ala den profeititori disi kon tru. Bijbel e sori taki a bakapikin disi na Yesus (Gal. 3:16). Yesus na a sma di e feti gi a tru anbegi. A sori dati krin na ini a piki di a gi di Satan tesi en a di fu dri leisi. Iya, nanga yepi fu profeititori Yehovah sori taki a tru anbegi ben o seti baka. A poti Yesus fu meki den profeititori disi kon tru (Openb. 19:10). Yesus ben o puru Gado pipel na ini katibo fu Babilon a Bigiwan èn a ben o seti a tru anbegi baka.

17. Fu san ede wi lobi den profeititori di e sori fa a tru anbegi ben o seti baka?

¹⁷ A moi fu studeri den Bijbel profeititori di e sori fa Yehovah ben o seti a tru anbegi baka. Wi lobi den profeititori  disi fu di den e tranga wi bribi èn den e sori taki wan ten o kon te ala sma na hemel nanga grontapu o dini a Moro Hei Tiriman Yehovah wawan. Den profeititori disi e gi wi howpu tu, fu di den e taki tu fu wan tu fu den moro moi sani di Gado pramisi na ini en Wortu. Wi no man wakti fu si fa den pramisi fu Yehovah o kon tru. Wi wani si fa den lobiwan fu wi di dede o kisi wan opobaka, fa heri grontapu o tron wan paradijs èn fa wi o libi fu têgo sondro fu kon siki noso owru.​—Yes. 33:24; 35:5, 6; Openb. 20:12, 13; 21:3, 4.

18. San wi o studeri na ini a buku disi?

¹⁸ Na ini a buku disi wi o studeri den span profeititori na ini a Bijbel buku Esekièl. Furu fu den profeititori dati e taki fa a tru anbegi ben o seti baka. Wi o luku tu san den profeititori fu Esekièl abi fu du nanga tra profeititori, fa Yesus meki den kon tru èn san den abi fu du nanga wi.​—Luku a faki „Den tori na ini a buku Esekièl”.

19. San yu bosroiti fu du èn fu san ede?

¹⁹ Di Yesus ben de na ini a sabana fu Yudea na ini a yari 29, Satan no ben man kori en fu gowe libi a tru anbegi. Ma fa a de nanga wi? Satan e meki moro muiti now fu kori wi fu gowe libi a tru anbegi (Openb. 12:12, 17). Meki a buku disi yepi wi fu meki moro muiti fu kakafutu gi den tesi fu Satan. Èn meki den sani di wi e taki èn den sani di wi e du sori taki wi e agri nanga den wortu disi nanga wi heri ati: „Na Yehovah yu Gado, yu musu anbegi.” Te wi e du dati, dan wi o kisi a grani fu si fa a wani fu Yehovah o kon tru te fu kaba. Wi o si fa ala sma na hemel nanga grontapu o dini Yehovah wawan nanga den heri ati! Iya, na Yehovah wawan abi a reti disi.