SEHLUKO 1
“Kufanele Ukhotsamele Jehova Nkulunkulu Wakho”
LOKUTAWUKHULUNYWA NGAKO: Kungani kukhonta lokuhlantekile kudzinga kubuyiselwa
1, 2. Kwenteka njani kutsi Jesu abe sehlane laseJudiya ngelikwindla la-29 C.E., futsi kwentekani kuye lapho? (Buka sitfombe lesisekucaleni kwalesehluko.)
KUSANDZA kungena likwindla nga-29 C.E., Jesu usehlane laseJudiya, enyakatfo yeLwandle Lolufile. Waholelwa ngumoya longcwele kulendzawo ngemuva kwekubhajatiswa nekugcotjwa kwakhe. Njengobe akulendzawo lelugwadvule, lenemadvwala netindvonga, Jesu besekacitse emalanga langu-40, azile kudla, athantaza futsi azindla. Ngaleso sikhatsi, kungenteka Jehova abekhuluma neNdvodzana yakhe ayilungiselela loko lobekuseta.
2 Nyalo, njengobe Jesu besekaphelelwa ngemandla ngenca yendlala, Sathane weta kuye. Lokwenteka ngemuva kwaloko kuveta indzaba lebalulekile letsintsa bonkhe labatsandza kukhonta lokuhlantekile, kuhlanganise nawe.
“Nangabe Uyindvodzana YaNkulunkulu . . . ”
3, 4. (a) Sathane wacalisa tilingo takhe letimbili tekucala ngemavi latsini, futsi kungenteka bekafuna kutsi Jesu angabate ini? (b) Sathane uwasebentisa kanjani emachinga lafanako lamuhla?
3 Fundza Matewu 4:1-7. Sathane uveta tilingo tekucala letimbili ngendlela lebhacile asebentisa emavi latsi, “nangabe uyindvodzana yaNkulunkulu.” Sathane bekakungabata yini vele kutsi Jesu uyiNdvodzana yaNkulunkulu? Cha. Lengilosi yaNkulunkulu leyawa, beyati kahle kamhlophe kutsi Jesu uyiNdvodzana yaNkulunkulu lelitibulo. (Khol. 1:15) Asingabati nekutsi Sathane abewati emavi Jehova lawasho kuJesu ngesikhatsi abhajatiswa latsi: “Lena yiNdvodzana yami letsandzekako, ngiyemukele.” (Mat. 3:17) Kungenteka Sathane abefuna Jesu angabate Babe wakhe futsi angasametsembi kutsi utawukhona mbamba kumnakekela. Kulesilingo sekucala sekutsi Sathane atsi kuJesu akashintje ematje abe sinkhwa, bekufana nekutsi utsi: ‘Njengobe uyiNdvodzana yaNkulunkulu, kungani Babe wakho angakuniki kudla kulelihlane leliligwadvule?’ Kulesilingo sesibili sekutsi Sathane atsi kuJesu akatijike phansi asuka esicongweni selithempeli, bekufana nekutsi utsi: ‘Njengobe uyiNdvodzana yaNkulunkulu, umetsemba mbamba yini Babe wakho kutsi angakuvikela?’
4 Sathane usebentisa emachinga lafanako nalamuhla. (2 Khor. 2:11) Umlingi uyalindza kuze kube ngulapho tikhonti teliciniso tiphelelwa ngemandla nobe tidvumateka, bese uyatihlasela, ngalokuvamile ngetindlela letibhacile. (2 Khor. 11:14) Uzama kusikhohlisa kutsi sikholelwe kutsi Jehova angeke aze asitsandze nobe asemukele. Lomlingi uphindze etame kusenta sikholelwe kutsi Jehova angeke size simetsembe, nekutsi loko lasetsembise kona eVini lakhe angeke aze akwente. Kodvwa lawo ngemanga lamabi. (Joh. 8:44) Singamelana njani nawo?
5. Jesu wenta njani kuletilingo letimbili tekucala?
5 Cabanga ngendlela Jesu laphendvula ngayo kuletilingo letimbili tekucala. Abengangabati kutsi Babe wakhe uyamtsandza, futsi abemetsemba kakhulu. Ngaphandle kwekungabata, Jesu wamelana naSathane ngekutsi acaphune emaVi aBabe wakhe laphefumulelwe. Jesu wacaphuna imibhalo lebeyineligama laNkulunkulu, Jehova. (Dut. 6:16; 8:3) Lena yindlela lehamba embili lekhombisa kutsi iNdvodzana yaNkulunkulu iyametsemba Babe wayo, ngekutsi isebentise ligama lakhe—leli ligama lelikhetsekile lelikhombisa kutsi Jehova utatigcwalisa tetsembiso takhe. *
6, 7. Singamelana njani nekuhlasela kwaSathane lokubhacile?
6 Singamelana netilingo taSathane letibhacile ngekutsi setsembele eVini laJehova futsi sizindle ngekutsi ligama laNkulunkulu lisho kutsini. Nangabe sikusebentisa loko imiBhalo lekushoko ngelutsandvo lwaJehova nangekutsi uyatikhatsalela tikhonti takhe, lokufaka ekhatsi labo labaphukile etinhlitiyweni, singamelana nemanga aSathane ekutsi Jehova angeke aze asitsandze nobe asemukele. (Hla. 34:18; 1 Phet. 5:8) Nangabe sihlale sikhumbula kutsi Jehova wenta tintfo ngekuvumelana neligama lakhe, angeke singabate kutsi natsi singametsemba Loyo lofeza tetsembiso.—Taga 3:5, 6.
7 Uyini vele umgomo waSathane loyinhloko? Ufunani mbambambamba kitsi? Imphendvulo iyacaca nasibuka silingo sesitsatfu lalinga ngaso Jesu.
‘Guca Kanye Nje Ungikhonte’
8. Esilingweni sesitsatfu, Sathane wakuveta njani loko bekakufuna mbamba?
8 Fundza Matewu 4:8-11. Kulesilingo sesitsatfu, Sathane wakushiya phansi kusebentisa tindlela letibhacile futsi wativeta kutsi mbambambamba ufunani. Sathane wakhombisa Jesu (lokungenteka embonweni) “yonkhe imibuso yemhlaba nebuhle bayo”—kepha wangamkhombisi bubi bayo. Wabese utsi kuJesu: “Tonkhe letintfo ngitakunika tona nawungaguca kanye nje ungikhonte.” * Kumkhonta—nguloko lobekubalulekile kuSathane! Sathane abefuna kutsi Jesu alahle Babe wakhe bese Lomlingi sewuba ngunkulunkulu wakhe. Sathane wavete loko lebekubonakala shengatsi kuyindlela lemelula yekuphumelela. Ngalamanye emavi, Jesu angaba nawo onkhe emandla nemcebo wetive, futsi angeke kudzingeke kutsi ahlupheke, kute umchele wemanyeva lebewutawubekwa enhloko yakhe, futsi bekangeke ashaywe nobe abetselwe elugodvweni. Lesi bekusilingo mbamba. Jesu akazange aphikise Sathane kutsi nguye lolawula bohulumende bemhlaba! (Joh. 12:31; 1 Joh. 5:19) Kuyacaca kutsi Sathane abengenta nobe yini kute ente Jesu angasakusekeli kukhonta lokuhlantekile kwaBabe wakhe.
9. (a) Yini mbambambamba Sathane layifuna etikhontini teliciniso, futsi wetama kanjani kusilinga? (b) Kukhonta kwetfu kufaka ekhatsi ini? (Buka libhokisi lelitsi “Kuyini Kukhonta?”)
9 Nalamuhla, Sathane ukufuna mbamba kutsi simkhonte, kungaba ngetindlela leticondzile nobe letibhacile. ‘Njengobe angunkulunkulu walelive,’ nguye lokhontwa ngito tonkhe tinkholo teBhabhulona Lenkhulu. (2 Khor. 4:4) Ngenca yekutsi akenetiseki ngetigidzigidzi tetikhonti temanga, ufuna nekulinga tikhonti teliciniso kutsi tingasayenti intsandvo yaNkulunkulu. Wetama kusiyengela kutsi sifune umcebo nemandla kulelive lakhe kunekutsi silandzele indlela yebuKhristu lengahle ifake ekhatsi kuhlupheka “ngenca yekulunga.” (1 Phet. 3:14) Nangabe sivuma kulingwa nguSathane bese silahla kukhonta lokuhlantekile sibe yincenye yelive lakhe, loko kutawukhombisa kutsi siguca embikwakhe siyamkhonta, simenta nkulunkulu wetfu. Singamelana njani nalesilingo?
10. Jesu wenta njani esilingweni sesitsatfu, futsi kungani?
10 Naka kutsi Jesu wenta njani kulesilingo sesitsatfu. Akhombisa kuba cotfo kuJehova, ngekushesha watsi kuLomlingi: “Hamba, Sathane!” Njengobe entile kuletilingo letimbili tekucala, Jesu wacaphuna umbhalo lokuDutheronomi lonemavi laneligama laNkulunkulu latsi: “Kubhaliwe kutsi: ‘Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.’” (Mat. 4:10; Dut. 6:13) Ngaleyondlela, Jesu wakwala kuphila imphilo lenhle nalesetulu futsi lete kuhlupheka kodvwa letawutsatsa sikhashana. Bekati kutsi nguBabe wakhe kuphela lokufanele akhontwe nekutsi kwenta sento sinye nje ‘sekukhonta’ Sathane bekutawusho kutsi sewutitfoba ngaphansi kwakhe. Ngekutimisela Jesu wala kukhonta Lomlingi lomubi. Ngesizatfu sekutsi Jesu akazange akwemukele loko, “Develi wamshiya.” *
“HAMBA SATHANE!” (Buka sigaba 10)
11. Singamelana njani naSathane netilingo takhe?
11 Singamelana naSathane netilingo talelive lelibi ngobe njengaJesu, natsi sinenkhululeko yekutikhetsela. Jehova usinikete sipho lesiligugu, lokuyinkhululeko yekutikhetsela. Ngaleso sizatfu, kute longasiphocelela kutsi silahle kukhonta lokuhlantekile—ngisho nalesidalwa semoya lesinemandla nalesibi—angeke sikhone kusiphocelela. Nangabe ‘simelana naSathane’ ngekwetsembeka futsi ‘sicine ekukholweni,’ kufana nekutsi sitsi: “Hamba Sathane!” (1 Phet. 5:9) Khumbula, Sathane wesuka kuJesu ngemuva kwekutsi amcoshe. Ngendlela lefanako, natsi liBhayibheli liyasicinisekisa litsi: “Nimelane naDeveli, futsi utanibalekela.”—Jak. 4:7.
Singakhetsa kumelana netilingo talelive laSathane (Buka tigaba 11, 19)
Sitsa Sekukhonta Lokuhlantekile
12. E-Edeni, Sathane waveta njani kutsi usitsa sekukhonta lokuhlantekile?
12 Kulesilingo sekugcina Sathane lalinga ngaso Jesu, wakwenta kwacaca kutsi nguye sitsa sekucala sekukhonta lokuhlantekile. Ngesikhatsi asensimini yase-Edeni eminyakeni lengemakhulu leyendlulile, Sathane waveta kutsi akatsandzi kutsi kukhontwe Jehova. Ngekutsi ayenge Eva, lowabese ukhohlisa Adamu, kutsi bangawulaleli umtsetfo waJehova. Sathane wabenta bobabili baba ngephansi kwekubuswa nekulawulwa nguye. (Fundza Genesisi 3:1-5; 2 Khor. 11:3; Semb. 12:9) Ecinisweni, wabese uba ngunkulunkulu wabo, futsi bona baba tikhonti takhe, ngisho nobe kungenteka bebangati kutsi ngubani mbambambamba lona bekabadukisa. Ngetulu kwaloko, ngekuvukela e-Edeni, Sathane akazange amelane nebukhosi baJehova nobe kubusa kwakhe nje kuphela, kodvwa waphindze wahlasela kukhonta lokuhlantekile. Wakwenta njani loko?
13. Kukhonta lokuhlantekile kungena njani endzabeni yebukhosi baNkulunkulu?
13 Lendzaba yebukhosi ifaka ekhatsi kukhonta lokuhlantekile. NguMbusi weliciniso kuphela, Loyo ‘lowadala tonkhe tintfo,’ lonelilungelo lekukhontwa. (Semb. 4:11) Ngesikhatsi Jehova adala Adamu na-Eva bete sono ababeka ensimini yase-Edeni, injongo yaKhe beyikutsi wonkhe umhlaba ugcwale bantfu labete sono lebebatatinikela kuye ngekutitsandzela futsi bamkhonte ngendlela lehlantekile nangetinhlitiyo letihlantekile. (Gen. 1:28) Sathane wamelana nebukhosi baJehova ngobe bekafuna kutsatsa loko bekukweNkhosi Lephakeme Jehova, kuphela—kukhontwa.—Jak. 1:14, 15.
14. Chaza kutsi Sathane waphumelela yini ekuhlaseleni kukhonta lokuhlantekile.
14 Waphumelela yini Sathane kulokuhlasela kukhonta lokuhlantekile? Wakhona kukhohlisa Adamu na-Eva kutsi bakhweshe kuNkulunkulu. Kusukela lapho, Sathane ulwa nekukhonta kweliciniso futsi ufuna bantfu labanyenti bakhweshe kuJehova Nkulunkulu. Sathane akazange aphele emandla emetameni yakhe yekulinga tikhonti taJehova kusukela endvulo ngaphambi kwekutsi kusungulwe libandla lebuKhristu. Ngelikhulu lekucala C.E., wabangela kutsi kube netihlubuki ebandleni lebuKhristu, lokwenta kutsi lelibandla lingasabi ngulelihlantekile, lokwabese kubonakala shengatsi kukhonta lokuhlantekile akusekho. (Mat. 13:24-30, 36-43; Imis. 20:29, 30) Kwatsi nakucala likhulu lesibili C.E., tikhonti taNkulunkulu tangena esikhatsini lesidze sekutfunjwa yiBhabhulona Lenkhulu, lokungumbuso welive wenkholo yemanga. Kodvwa Sathane akaphumeleli ekwehlulekiseni injongo yaNkulunkulu lemayelana nekukhonta lokuhlantekile. Kute lokungavimba Nkulunkulu kutsi agcwalise injongo yakhe. (Isa. 46:10; 55:8-11) Lendzaba ifaka ekhatsi ligama lakhe, futsi uhlale enta ngekuvumelana naloko lokushiwo yinchazelo yalo. Jehova akehluleki kugcwalisa injongo yakhe!
Umvikeli Wekukhonta Lokuhlantekile
15. Ngutiphi tinyatselo Jehova latitsatsa ensimini yase-Edeni kuze alungise lenkinga yekuvukela futsi acinisekise kutsi injongo yakhe itawuphumelela?
15 Jehova watsatsa tinyatselo ngekushesha kute ehlulele labo labavukela ensimini yase-Edeni futsi wenta sicinisekiso sekutsi injongo yakhe itawugcwaliseka. (Fundza Genesisi 3:14-19.) Jehova wakhipha sigwebo kuletihlubuki letintsatfu tisesensimini yase-Edeni, kwaya ngendlela letone ngayo—kwacala Sathane, kwalandzela Eva, kwagcina Adamu. Emavini latjelwa Sathane, lositsa lesingabonakali, Jehova washo kusengaphambili kutsi kutawuta ‘intalelwane’ lebeyitawulungisa umonakalo lobangwe ngulokuvukela. ‘Lentalelwane’ leyetsenjisiwe beyitawudlala indzima lebalulekile ekugcwaliseni injongo yaNkulunkulu lemayelana nekukhonta lokuhlantekile.
16. Kulandzela kuvukela e-Edeni, Jehova wenta njani kute aciniseke kutsi injongo yakhe iyaphumelela?
16 Kusukela kulokuvukela kwase-Edeni, Jehova bekasolo asebentela kugcwalisa injongo yakhe. Wenta tindlela tekutsi bantfu labanesono bamkhonte ngendlela leyemukelekako, njengobe sitawubona esehlukweni lesilandzelako. (Heb. 11:4–12:1) Waphindze waphefumulela babhali beliBhayibheli—njenga-Isaya, Jeremiya, naHezekeli—kutsi babhale tiphrofetho letimangalisako letimayelana nekubuyiselwa kwekukhonta lokuhlantekile. Lokubuyiselwa kwekukhonta lokuhlantekile kuyindzaba yeliBhayibheli lehamba embili. Letiphrofetho betitawugcwaliseka tonkhe ‘ngentalelwane’ leyetsenjisiwe, ngalokuyinhloko, lokunguJesu Khristu. (Gal. 3:16) Jesu unguMvikeli wekukhonta lokuhlantekile, njengobe aveta ngalokucacile endleleni laphendvula ngayo Sathane esilingweni sesitsatfu lamlinga ngaso. Jehova ukhetse Jesu kutsi kube nguye logcwalisa tiphrofetho letimayelana nekubuyiselwa kwekukhonta kweliciniso. (Semb. 19:10) Bekatawukhulula bantfu baNkulunkulu ekutfunjweni yinkholo yemanga futsi abuyisele kukhonta lokuhlantekile endzaweni yako.
Yini Wena Lotawuyenta?
17. Kungani sititsandza tiphrofetho teliBhayibheli letimayelana nekubuyiselwa kwekukhonta lokuhlantekile?
17 Kuyajabulisa futsi kucinisa kukholwa kuhlola tiphrofetho teliBhayibheli letimayelana nekubuyiselwa kwekukhonta lokuhlantekile. Letiphrofetho sititsandza kakhulu ngobe sisibuke ngalabovu sikhatsi lapho tonkhe tidalwa letisezulwini naletisemhlabeni titawuba munye ekukhonteni lokuhlantekile kweNkhosi Lephakeme Jehova. Letiphrofetho tiphindze tisinike litsemba ngobe ticuketse emavi ladvudvutako nalasicinisekisako latfolakala eVini laNkulunkulu. Ngubani nje emkhatsini wetfu longakulangateleli kugcwaliseka kwetetsembiso taJehova—letifaka ekhatsi kuvuswa kwebantfu labafile, umhlaba wonkhe sewulipharadisi, kanye nekuphila phakadze sibe siphile saka?—Isa. 33:24; 35:5, 6; Semb. 20:12, 13; 21:3, 4.
18. Sitawucoca ngani kulencwadzi?
18 Kulencwadzi, sitawuhlola tiphrofetho letimangalisako letitfolakala encwadzini yeliBhayibheli yaHezekeli. Letinyenti taletiphrofetho timayelana nekubuyiselwa kwekukhonta lokuhlantekile. Sitawucoca ngendlela tiphrofetho taHezekeli letihlobana ngayo naletinye tiphrofetho, ngekutsi titawugcwaliseka njani ngaKhristu, nangekutsi tsine tisitsintsa kanjani.—Buka libhokisi lelitsi “An Overview of Ezekiel.”
19. Yini lotimisele kuyenta, futsi kungani?
19 Nga-29 C.E., ehlane laseJudiya, Sathane wehluleka emetameni yakhe yekukhweshisa Jesu ekukhonteni lokuhlantekile. Kodvwa kutsiwani ngatsi? Sathane utimisele kakhulu kunakucala kusikhweshisa ekukhonteni kweliciniso. (Semb. 12:12, 17) Shengatsi lencwadzi ingasisita sicinise kutimisela kwetfu kutsi simelane naLomlingi lomubi. Shengatsi singakhombisa ngemavi nangetento kutsi etinhlitiyweni tetfu sivumelana nemavi latsi: “Kufanele ukhotsamele Jehova Nkulunkulu wakho.” Ngaleyondlela, sitawuphila ngendlela lekhombisa kutsi sifuna kubona injongo yaJehova lekhatimulako igcwaliseka ekugcineni—lapho wonkhe umuntfu ezulwini nasemhlabeni, atawuniketa Jehova loko lokumfanele mbamba, lokukumkhonta lokuhlantekile lokusuka etinhlitiyweni letihlantekile!
^ sig. 5 Ligama lelitsi Jehova labanye balicondza ngekutsi lisho kutsi “Ubangela Kutsi Kube Khona.” Lenchazelo imfanela kahle Jehova njengobe anguMdali wato tonkhe tintfo futsi uyatigcwalisa netinjongo takhe.
^ sig. 8 Mayelana nemavi aSathane, lenye incwadzi lechaza liBhayibheli itsi: “Njengalapho Sathane alinga Adamu na-Eva kwekucala, futsi behluleka . . . , lombuto umayelana nekutsi bafuna kwenta intsandvo yaSathane yini nobe yaNkulunkulu, lokufaka ekhatsi kukhetsa kukhonta munye kulaba lababili. Ecinisweni Sathane uyatikhukhumeta, ufuna kube nguye nkulunkulu esikhundleni saNkulunkulu lokukuphela kwakhe.”
^ sig. 10 LiVangeli laLukha lilandzelanisa letilingo ngendlela leyehlukile, kodvwa kulandzisa kwaMatewu kutisho ngendlela letilandzelana ngayo. Cabanga nganati tizatfu letibangela loko. (1) Matewu wetfula lesilingo sesibili ngemavi latsi “ngemuva kwaloko,” lokusho kutsi bekuyintfo lelandzela yekucala. (2) Kunengcondvo kutsi letilingo letimbili letibhacile—ngasinye sato sicala ngemavi latsi, “Nangabe uyindvodzana yaNkulunkulu”—betitawulandzelwa silingo lesisebaleni lesiphula umtsetfo wekucala. (Eks. 20:2, 3) (3) Emavi aJesu latsi: “Hamba Sathane!” abetawulandzelwa silingo sesitsatfu nesekugcina.—Mat. 4:5, 10, 11.
