1, 2. Kay ano nga hi Jesus nahingadto ha kamingawan han Judea ha katrakdag han 29 C.E., ngan ano an nahitabo ha iya didto? (Kitaa an retrato hini nga pahina.)

 TEMPRANO ha katrakdag han 29 C.E., hi Jesus nakadto ha kamingawan han Judea, ha norte han Dagat nga Patay. Gin-giyahan hiya han baraan nga espiritu nga kumadto katapos hiya bawtismohan ngan dihogan. Didto hiton uga nga lugar nga batoon ngan may mga pangpang, nagkaada hiya 40 ka adlaw para magpuasa, mag-ampo, ngan mamalandong. Bangin hito nga panahon, hi Jehova nakigkomunikar ha iya Anak basi iandam hiya ha mga mahitatabo.

² Han maluya na hi Jesus tungod ha gutom, gindaop hiya ni Satanas. An sunod nga nahitabo nagpapakita hin importante nga isyu diin nahidadabi an ngatanan nga nahigugma ha putli nga pagsingba, upod ka na.

3, 4. (a) Paonan-o gintikangan ni Satanas an siyahan nga duha nga pagsulay, ngan ano an bangin karuyag niya nga pagruhaduhaan ni Jesus? (b) Paonan-o hi Satanas nagamit hin puropariho nga mga taktika yana?

³ Basaha an Mateo 4:1-7. Gintikangan ni Satanas an siyahan nga duha nga pagsulay pinaagi han tuso nga mga pulong, “Kon anak ka han Dios.” Nagruhaduha ba hi Satanas nga hi Jesus Anak han Dios? Waray. Inin nakasala nga anghel nga anak han Dios maaram gud nga hi Jesus an suhag nga Anak han Dios. (Col. 1:15) Sigurado nga maaram liwat hiya han ginsiring ni Jehova tikang ha langit ha bawtismo  ni Jesus: “Ini an akon Anak nga hinigugma, nga gin-uuyonan ko.” (Mat. 3:17) Bangin karuyag ni Satanas nga magruhaduha hi Jesus kon an iya Amay masasarigan ba ngan interesado gud ha iya. Ha siyahan nga pagsulay​—nga himoon nga tinapay an mga bato—​sugad hin nagpakiana hi Satanas: ‘Anak ka han Dios, pero kay ano nga diri ka ginpapakaon han imo Amay dinhi hinin uga nga kamingawan?’ Ha ikaduha nga pagsulay​—nga lumayog tikang ha barandilya ha bawbaw han templo—​sugad hin nagpakiana hiya: ‘Anak ka han Dios, pero nasarig ka gud ba nga puproteksyonan ka han imo Amay?’

⁴ Hi Satanas nagamit hin puropariho nga mga taktika yana. (2 Cor. 2:11) An Paragsulay naghuhulat nga manluya o mahulop an tinuod nga mga magsiringba, ngan dida hito naatake hiya, agsob ha diri abat nga mga paagi. (2 Cor. 11:14) Naniniguro hiya paglimbong ha aton basi hunahunaon naton nga diri gud naton makakarawat an gugma o pag-uyon ni Jehova. Naniniguro liwat hiya nga patoohon kita nga hi Jehova diri masasarigan, nga diri niya tutumanon an iya iginsaad dida ha iya Pulong. Kondi mga buwa gud ito. (Juan 8:44) Paonan-o naton ito maaatohan?

5. Ano an baton ni Jesus ha siyahan nga duha nga pagsulay?

⁵ Tagda an baton ni Jesus ha siyahan nga duha nga pagsulay. Sigurado hiya nga hinigugma hiya han iya Amay, ngan bug-os nga sinarig hiya ha Iya. Waray pag-alang nga iginsalikway ni Jesus hi Satanas pinaagi ha pagkotar han Pulong han iya Amay. Angayan la nga nagkotar hiya hin mga teksto diin mababasa an ngaran han Dios, nga Jehova. (Deut. 6:16; 8:3) Waray na mas maopay nga paagi nga maipapakita han Anak han Dios nga nasarig hiya ha iya Amay kay ha paggamit han Iya ngaran​—an waray kapariho nga ngaran nga naggagarantiya nga tutumanon ni Jehova an ngatanan niya nga saad. *

6, 7. Paonan-o naton maaatohan an diri abat nga mga pag-atake ni Satanas?

⁶ Maaatohan naton an diri abat nga mga pag-atake ni Satanas pinaagi ha paggamit han Pulong ni Jehova ngan pagpamalandong ha kahulogan han Iya ngaran. Kon huhunahunaon naton nga para liwat ha aton an ginsisiring han Kasuratan mahitungod han gugma ngan interes ni Jehova ha iya mga magsiringba, pati na ha mga nanluluya, maaatohan naton an buwa ni Satanas nga diri gud naton makakarawat an gugma o pag-uyon ni Jehova. (Sal. 34:18; 1 Ped. 5:8) Ngan kon hihinumdoman naton nga hi Jehova pirme nagios uyon ha kahulogan han iya ngaran, diri kita magruruhaduha nga an Paratuman han mga saad angay naton sarigan hin bug-os.​—Prob. 3:5, 6.

⁷ Kondi ano an nangunguna nga intensyon ni Satanas? Ano gud ba an karuyag niya ha aton? Nagin klaro an baton hito ha iya ikatulo nga pagsulay kan Jesus.

8. Ha ikatulo nga pagsulay, paonan-o ginklaro ni Satanas an tinuod nga isyu?

⁸ Basaha an Mateo 4:8-11. Ha ikatulo nga pagsulay, ginklaro na ni Satanas an iya intensyon. Iginpakita niya kan Jesus (posible ha usa  nga bisyon) “an ngatanan nga ginhadian han kalibotan ngan an ira himaya”​—kondi diri upod an karaotan hito. Katapos, nagsiring hiya: “Ini ngatanan ihahatag ko ha imo kon lumuhod ka ngan maghimo hin usa nga buhat han pagsingba ha akon.” * Pagsingba​—ito an tinuod nga isyu! Karuyag ni Satanas nga bayaan ni Jesus an iya Amay ngan kilalahon an Paragsulay sugad nga iya dios. Igintanyag ni Satanas kan Jesus an baga hin masayon nga solusyon. Sugad hin iginpasabot niya nga magkakaada hi Jesus han ngatanan nga gahum ngan karikohan han mga nasud ngan diri na kinahanglan mag-antos​—waray korona nga mga tunok, waray paglatigo, ngan waray pasakitan nga kahoy. Tinuod an pagsulay. Waray rumiwa hi Jesus nga hi Satanas an nagkukontrol ha mga gobyerno han kalibotan! (Juan 12:31; 1 Juan 5:19) Sigurado nga ihahatag ni Satanas an bisan ano basi la italikod hi Jesus ha putli nga pagsingba ha iya Amay.

9. (a) Ano gud ba an karuyag ni Satanas ha tinuod nga mga magsiringba, ngan paonan-o hiya naniniguro ha pagsulay ha aton? (b) Ano an nahiuupod ha aton pagsingba? (Kitaa an kahon nga “Ano an Pagsingba?”)

⁹ Yana liwat, karuyag gud ni Satanas nga singbahon naton hiya—ha direkta man o diri direkta nga paagi. Sugad nga “dios hini nga sistema han mga butang,” hiya an nakakakarawat han ngatanan nga buwa nga pagsingba han mga relihiyon han Babilonya nga Gamhanan. (2 Cor. 4:4) Pero diri pa hiya kontento ha binilyon nga buwa nga magsiringba, salit karuyag niya sulayon an tinuod nga mga magsiringba nga supakon an kaburut-on han Dios. Naniniguro hiya paglit-ag ha  aton nga magpariko ngan magin prominente ha iya kalibotan imbes nga magkinabuhi sugad nga Kristiano nga mahimo mag-upod hin pag-antos “tungod han katadongan.” (1 Ped. 3:14) Kon magpadara kita ha pagsulay nga bayaan an putli nga pagsingba ngan magin bahin han kalibotan ni Satanas, sugad hin nayukbo kita ngan naghihimo hin usa nga buhat han pagsingba ha iya, salit nagigin dios naton hiya. Paonan-o naton maaatohan an sugad nga pagsulay?

10. Ano an baton ni Jesus ha ikatulo nga pagsulay, ngan kay ano?

¹⁰ Tigamni an baton ni Jesus ha ikatulo nga pagsulay. Iginpakita niya an iya bug-os nga pagkamaunungon kan Jehova pinaagi ha pagsiring dayon ha Paragsulay: “Iwas, Satanas!” Katapos, sugad han iya ginbuhat ha siyahan nga duha nga pagsulay, nagkotar hiya hin teksto ha Deuteronomio diin mababasa an ngaran han Dios: “Nahisurat na: ‘Hi Jehova nga imo Dios an kinahanglan mo singbahon, ngan hiya gud la an kinahanglan mo tagan hin sagrado nga pag-alagad.’” (Mat. 4:10; Deut. 6:13) Hito nga paagi gin-atohan ni Jesus an pagsulay nga magkaada prominente kondi temporaryo la nga karera ha kalibotan ngan an hayahay nga kinabuhi nga waray pag-antos. Ginkilala niya nga an iya Amay gud la an angay singbahon ngan an paghimo hin bisan usa la nga “buhat han pagsingba” kan Satanas sugad hin pagpasakop na ha iya. Marig-on hiya nga nagdumiri nga himoon nga iya dios an Paragsulay. Tungod kay waray magpadara hi Jesus, “ginbayaan hiya han Yawa.” *

11. Paonan-o naton maaatohan hi Satanas ngan an iya mga pagsulay?

¹¹ Maaatohan naton hi Satanas ngan an mga pagsulay han iya maraot nga kalibotan kay pariho kan Jesus, makakapili kita. Gintagan kita ni Jehova han presyoso nga regalo nga kagawasan ha pagbuot. Salit waray bisan hin-o nga makakapirit ha aton nga bayaan an putli nga pagsingba​—bisan an gamhanan nga maraot nga espiritu nga Paragsulay. Kon maunungon nga ‘gin-aatohan naton hi Satanas, marig-on ha pagtoo,’ sugad hin nasiring kita: “Iwas, Satanas!” (1 Ped. 5:9) Hinumdumi nga binaya hi Satanas katapos hiya marig-on nga isalikway ni Jesus. Ha pariho nga paagi, an Biblia nagpapasarig ha aton: “Atohi an Yawa, ngan mapalagiw hiya ha iyo.”​—San. 4:7.

12. Ha Eden, paonan-o iginpakita ni Satanas nga hiya an kaaway han putli nga pagsingba?

¹² Ha ultimo nga pagsulay, ginpamatud-an ni Satanas nga hiya an siyahan nga kaaway han putli nga pagsingba. Yinukot ka tuig antes pa, ha garden han Eden, siyahan nga iginpakita niya an iya kangalas ha pagsingba kan Jehova. Ginlimbongan niya hi Eva, nga nag-aghat naman kan Adan nga talapason an sugo ni Jehova, salit nagin sakop hira han iya pagmando ngan pagkontrol. (Basaha an Genesis 3:1-5; 2 Cor. 11:3; Pah. 12:9) Ha tinuod la, nagin dios nira hiya, ngan nagin mga magsiringba niya hira, bisan kon bangin diri hira maaram kon hin-o an naglimbong ha ira. Dugang pa, ha pagpatikang hito nga pagrebelde ha Eden, diri la kay ginkwestyon ni Satanas an pagkasoberano ni Jehova, o an Iya katungod ha pagmando, kondi gin-atake liwat niya an putli nga pagsingba. Kay ano nga nasiring naton ito?

13. Paonan-o nahiuupod an putli nga pagsingba ha isyu han pagkasoberano?

 ¹³ An isyu han pagkasoberano nag-uupod han putli nga pagsingba. An tinuod nga Soberano gud la, Hiya nga “naglarang han ngatanan nga butang,” an angay singbahon. (Pah. 4:11) Han ginlarang ni Jehova an perpekto nga hira Adan ngan Eva ngan iginbutang hira ha garden han Eden, katuyoan Niya nga ha urhi an bug-os nga tuna mapuno hin perpekto nga mga tawo nga kinaburut-on nga magsisingba ha Iya​—maghahatag hin putli nga pagsingba tikang ha putli nga kasingkasing. (Gen. 1:28) Ginkwestyon ni Satanas an pagkasoberano ni Jehova kay naghingyap hiya hin butang nga para gud la kan Jehova nga Soberano nga Ginoo​—an pagsingba.​—San. 1:14, 15.

14. Naglampos ba hi Satanas ha pag-atake ha putli nga pagsingba? Isaysay.

¹⁴ Naglampos ba hi Satanas ha pag-atake ha putli nga pagsingba? Naitalikod niya ha Dios hira Adan ngan Eva. Tikang hito nga panahon, nakikig-away hiya ha tinuod nga pagsingba ngan naniningkamot nga italikod kan Jehova nga Dios an pinakadamu tubtob nga posible. Padayon niya nga ginsulay an mga magsiringba ni Jehova antes han panahon  han mga Kristiano. Han siyahan nga siglo C.E., nagpahinabo hiya hin apostasya nga nakahugaw han Kristiano nga kongregasyon, ngan ha urhi baga hin nawara an putli nga pagsingba. (Mat. 13:24-30, 36-43; Buh. 20:29, 30) Tikang han ikaduha ka siglo C.E., an mga magsiringba maiha nga nagin bihag ha espirituwal han Babilonya nga Gamhanan, an imperyo han buwa nga relihiyon ha kalibotan. Kondi hi Satanas waray maglampos ha pagpugong han katuyoan han Dios may kalabotan ha putli nga pagsingba. Waray makakapugong ha Dios ha pagtuman han iya katuyoan. (Isa. 46:10; 55:8-11) Nahidadabi an iya ngaran, ngan pirme hiya nagios uyon ha kahulogan han iya ngaran. Hi Jehova an diri napapakyas nga Paratuman han iya katuyoan!

15. Ano an ginhimo ni Jehova ha Eden basi sirotan an mga rebelde ngan siguruhon nga matutuman an iya katuyoan?

¹⁵ Ha Eden, may ginhimo dayon hi Jehova basi sirotan an mga rebelde ngan siguruhon nga matutuman an iya katuyoan. (Basaha an Genesis 3:14-19.) Bisan han nakadto pa hira Adan ngan Eva ha garden,  ginsentensyahan niya an tulo nga rebelde uyon ha pagkasurunod han ira pakasala​—siyahan hi Satanas, sunod hi Eva, tapos hi Adan. Ha mga pulong nga ginyakan kan Satanas, an diri nakikita nga promotor han pagrebelde, igintagna ni Jehova an pag-abot han usa nga “tulin” nga magwawara han mga epekto hito nga pagrebelde. Iton iginsaad nga “tulin” may importante nga papel ha pagtuman han katuyoan ni Jehova may kalabotan ha putli nga pagsingba.

16. Katapos han pagrebelde ha Eden, paonan-o hi Jehova padayon nga ginios basi matuman an iya katuyoan?

¹⁶ Katapos han pagrebelde ha Eden, padayon nga ginios hi Jehova basi matuman an iya katuyoan. Naghimo hiya hin mga kahikayan basi an diri perpekto nga mga tawo makagsingba ha iya ha paagi nga iya kinakarawat, sugad han aton hibabaroan ha sunod nga kapitulo. (Heb. 11:4–12:1) Gin-giyahan liwat niya an pipira nga parasurat han Biblia​—upod na hira Isaias, Jeremias, ngan Ezekiel—​nga magrekord hin eksayting nga mga tagna mahitungod ha pagpahiuli han putli nga pagsingba. Ito nga pagpahiuli importante nga tema han Biblia. Ito ngatanan nga tagna tutumanon han iginsaad nga “tulin,” nga an siyahan nga bahin amo hi Jesu-Kristo. (Gal. 3:16) Hiya an Paradepensa han putli nga pagsingba, ngan nakita gud ito ha iya baton ha ikatulo nga pagsulay. Oo, hi Jesus an ginpili ni Jehova nga magtuman han mga tagna mahitungod ha pagpahiuli. (Pah. 19:10) Tatalwason niya an katawohan han Dios tikang ha espirituwal nga pagkabihag ngan ipapahiuli an putli nga pagsingba ha husto nga lugar hito.

17. Kay ano nga ginpapabilhan gud naton an mga tagna han Biblia mahitungod ha pagpahiuli?

¹⁷ Eksayting ngan makaparig-on ha pagtoo an pag-usisa han mga tagna han Biblia mahitungod ha pagpahiuli. Ginpapabilhan gud naton  ito nga mga tagna kay ginpapamulat naton an panahon nga an ngatanan nga linarang ha langit ngan ha tuna urosa na ha putli nga pagsingba kan Jehova nga Soberano nga Ginoo. Naghahatag liwat ito ha aton hin paglaom, kay aada hito an pipira han pinakamakalilipay nga mga pasarig nga mababasa ha Pulong han Dios. Hin-o ha aton an diri naruruyag nga makita an katumanan han mga saad ni Jehova​—upod na an pagbanhaw ha aton mga hinigugma, an bug-os-tuna nga paraiso, ngan an kinabuhi nga waray kataposan nga may perpekto nga kahimsog?​—Isa. 33:24; 35:5, 6; Pah. 20:12, 13; 21:3, 4.

18. Ano an uusisahon naton hini nga publikasyon?

¹⁸ Hini nga publikasyon, uusisahon naton an eksayting nga mga tagna ha libro han Biblia nga Ezekiel. Damu hito an nakapokus ha pagpahiuli han putli nga pagsingba. Hihisgotan naton kon ano an koneksyon han mga tagna ni Ezekiel ha iba pa nga mga tagna, kon paonan-o ito matutuman pinaagi han Kristo, ngan kon paonan-o kita nahidadabi hito.​—Kitaa an kahon nga “Sumaryo han Ezekiel.”

19. Ano an imo determinasyon, ngan kay ano?

¹⁹ Ha kamingawan han Judea han 29 C.E., napakyas gud hi Satanas nga aghaton hi Jesus nga talikdan an putli nga pagsingba. Pero kumusta man kita? Mas determinado gud hi Satanas yana nga ipahirayo kita ha tinuod nga pagsingba. (Pah. 12:12, 17) Hinaot mabuligan kita hini nga publikasyon nga parig-unon an aton determinasyon nga atohan iton maraot nga Paragsulay. Ngan hinaot ipakita naton ha pulong ngan buhat nga nauyon gud kita ha mga pulong, “Hi Jehova nga imo Dios an kinahanglan mo singbahon.” Kon himoon naton ini, may paglaom kita nga makita an katumanan han mahimayaon nga katuyoan ni Jehova​—an ngatanan ha langit ngan ha tuna nagkakaurosa ha paghatag kan Jehova han putli nga pagsingba tikang ha putli nga kasingkasing, nga angay gud ha iya!