1-3. (a) Hadia manö wanofu-nofu nitutunöda? (b) Hadia manö zi öfa ngawalö dane-dane wamosumange satulö nitutunöda? (Faigi gambara ba wamobörö wamahaʼö.)

IHAOGÖ wamaigi-maigi ngawawa mbiri-birinia Habeli. Iʼomasiʼö sibai ba yaʼia zangebuaʼö yaʼira iʼotarai ba waʼide-ide. Iadaʼa, ifili mato hauga ngaʼeu, itaba, aefa daʼö ibeʼe sumange khö Lowalangi. Hadia itema Yehowa zumange nibeʼe Habeli andrö niha si lö moʼahonoa?

² Imane sinenge sotöi Faulo si no manema eheha Lowalangi, ”Itema Lowalangi zumange nibeʼe [Habeli].” Hizaʼi lö omasi Yehowa zumange nibeʼe Gaʼino. (Baso Heberaiʼo 11:4.) Tola manö manofu-nofu dödöda: Hana wa itema Lowalangi zumange nibeʼe Habeli ba lö omasi ia zumange nibeʼe Gaʼino? Hadia wamahaʼönia khöda moroi khö Gaʼino hegöi Habeli awö niha nitötöi ba Heberaiʼo faza 11? Fanema linia daʼö zanolo yaʼita enaʼö aboto ba dödöda hadia manö zoʼamakhaita ba wamosumange satulö.

³ Tatutunö ösa zalua iʼotarai ba götö Habeli ofeta ba götö Hezekieli. Faigi hadia manö zi öfa dane-dane enaʼö itema zumange nibeʼeda Lowalangi: (1) Khö Yehowa mufanandrösa  zumange andrö, (2) enaʼö fondrege zi sökhi, (3) tefaudu lalania ba zomasi Lowalangi, ba (4) atulö gohitö dödö wa mufalua daʼö.

4, 5. Hezo iʼila Kaʼino wa ha khö Yehowa mufanandrösa zumange nibeʼenia?

⁴ Baso 1 Moze 4:2-5. Khö Yehowa ifanandrösa zumange nibeʼenia Kaʼino. Oya ginötö si tola iʼogunaʼö Kaʼino ba wamahaʼö yaʼia sanandrösa khö Yehowa. Te arakhagö 100 fakhe ndröfi Gaʼino me luo daʼö hegöi akhinia Habeli me labeʼe zumange andrö khö Lowalangi. * Te göi aboto ba dödöra nifotöi Kabu Edena iʼotarai ba waʼide-ide, ba tola manö lafaigi-faigi kabu satabö sinanö andrö moroi ba zaröu. Tatu manö göi laʼila ndra kerubi sanarogö lala weʼamöi bakha ba daʼö. (1 Mo. 3:24) Satuara zamatunö khöra wa Yehowa zomböi fefu saliwa-liwa ba gulidanö ba lö omasi ia na atua ba mate niha. (1 Mo. 1:24-28) Te daʼö mbörö wa iʼila Kaʼino ha khö Lowalangi mubeʼe zumange.

⁵ Hadia mbörö nasa wa ibeʼe zumange andrö Kaʼino? No irai iwaʼö Yehowa wa so dania ’maʼuwu’ si tohare, ba ’maʼuwu’ daʼö dania zomama högö ”gulö” sondrönisi Khawa ba wangai angetula si lö sökhi. (1 Mo. 3:4-6, 14, 15) Börö me ono siaʼa Gaʼino, tola manö so ba wangera-ngerania wa yaʼia ’maʼuwu’ nifabuʼu andrö. (1 Mo. 4:1) Me luo daʼö, fahuhuo nasa Yehowa ba niha hewaʼae no lafalua zala. Duma-dumania, me no aefa fasala Gadamo, fahuhuo nasa khönia Lowalangi te iʼogunaʼö ndra malaʼika. (1 Mo. 3:8-10) Fahuhuo göi Yehowa khö Gaʼino me no aefa ibeʼe zumange. (1 Mo. 4:6) Ba daʼö oroma wa iʼila Kaʼino ha Yehowa zinangea mufosumange.

6, 7. Hadia lö baga zumange nibeʼe Gaʼino mazui fasala lala wamaluania? Tutunö.

⁶ Na simanö, hana wa lö omasi Yehowa zumange nibeʼe Gaʼino? Hadia ambö sökhi zumange nibeʼenia? Lö nitutunö Zura Niʼamoniʼö. Ha daʼö niwaʼö Zura Niʼamoniʼö wa iʼohe Kaʼino ’mbua zinanö’. Ba Goroisa Moze, iʼombakhaʼö Yehowa wa tola mubeʼe mbua zinanö tobali sumange. (4 Mo. 15:8, 9) Angeragö göi zalua andre. Me luo daʼö, ha sayu faoma bua zinanö zi tola laʼa. (1 Mo. 1:29) Börö me no iʼelifi Lowalangi danö si so tanö baero Kabu Edena, daʼö mbörö wa marase Gaʼino ba wangalui sumange nibeʼenia. (1 Mo. 3:17-19) Sumange nibeʼenia yaʼia daʼö ö sangabölöʼö yaʼia, bua waʼerege dödönia! Hewaʼae simanö, lö itema Yehowa zumange nibeʼe Gaʼino.

⁷ Na simane daʼö, hadia lö aboto ba dödö Gaʼino hewisa lala wameʼe sumange mazui lö tefaudu ba zomasi Lowalangi? Tenga sibai daʼö mbörö. Me itimbagö zumange nibeʼe Gaʼino, lö niwaʼö Yehowa wa lö fao dödönia ba lala wameʼe sumange andrö.  Lö göi ifatunö Sura Niʼamoniʼö hadia manö nifalua Gaʼino hegöi Habeli na labeʼe zumange. Na simanö, hadia mbörö wa lö itema zumange Gaʼino?

8, 9. (a) Hana wa lö omasi Yehowa khö Gaʼino hegöi sumange nibeʼenia? (b) Hadia zadöni dödöda ba waö-waö Gaʼino hegöi Habeli nisura ba Zura Niʼamoniʼö?

⁸ Sura Waulo si no teʼehehaini nibeʼenia ba niha Heberaiʼo, daʼö zangoromaʼö wa fasala gohitö dödö Gaʼino ba wameʼe sumange andrö. Lö mamati ia. (Heb. 11:4; 1 Yo. 3:11, 12) Daʼö mbörö wa lö omasi Yehowa khö Gaʼino, tenga ha ba zumange nibeʼenia. (1 Mo. 4:5-8) Börö me Yehowa andrö Ama sebua faʼomasi, andrö wa iforege wameʼe mene-mene ba ndraononia. Hizaʼi, itimbagö Kaʼino wanolo moroi khö Yehowa. Lua-luania ifatörö ia tödönia si lö sökhi irege omasi ia ’waʼudusa, fasosota ba faʼolohu’. (Gal. 5:19, 20) Börö me simane daʼö dödönia, andrö wa lö eluaha zumange nibeʼenia hewaʼae afönu wamaluania lala si tölu ngawalö. Ba daʼa tola tafahaʼö ita wa famalua famosumange satulö tenga ha ba niʼila niha.

⁹ Oya nidunö-dunö Zura Niʼamoniʼö sanandrösa khö Gaʼino. Duma-dumania, taʼila hadia niwaʼö Yehowa khönia, fanema li nibeʼe Gaʼino hegöi töi ba amuata ngaʼötönia. (1 Mo. 4:17-24) Hizaʼi, lö itutunö Sura Niʼamoniʼö wa so ngaʼötö Habeli. Lö göi si tesura ngawua wehedenia. Hewaʼae simanö, tola tafahaʼö ita moroi ba nifalua Habeli. Hadia duma-dumania?

10. Hadia nifalua Habeli irege tobali ia duma-duma ba wamalua si öfa ngawalö dane-dane wamosumange satulö?

¹⁰ Sumange nibeʼe Habeli ifanandrösa khö Yehowa börö me aboto ba dödönia ha Yehowa zinangea mufosumange. Fondrege zi sökhi zumange nibeʼenia. Ifili mato ”hauga ngaʼeu nono mbiri-birinia siaʼa”. Sindruhu sa, lö taʼila hadia ba naha wanunu sumange ibeʼe zumange mazui tenga. Hizaʼi, lö fatimba khö Yehowa lala wameʼenia sumange. Sahöli-höli dödöda yaʼia daʼö ohitö dödö Habeli ba wameʼenia sumange. Hewaʼae no arakhagö önö ribu fakhe silalö, tola nasa tafahaʼö ita moroi ba duma-dumania andrö. Ibeʼe zumange andrö börö wamatinia khö Lowalangi ba omasi ia woloʼö amakhoita satulö khö Yehowa. Hezo taʼila daʼö?

11. Hana wa iwaʼö Yesu, Habeli andrö niha satulö?

¹¹ Si oföna, faigi hadia niwaʼö Yesu sanandrösa khö Habeli. Aboto ba dödö Yesu sanandrösa khö Habeli börö me ba zorugo so ia me auri Habeli ba gulidanö. Iʼameʼegö tödö nono Gadamo andre Yesu. (Amd. 8:22, 30, 31; Yoh. 8:58; Kol. 1:15, 16) Iʼila samösa hewisa waʼauri Habeli irege ifotöi ia niha satulö. (Mat. 23:35) Niha satulö, lafaduhuʼö wa Yehowa zinangea motatugöi hadia zatulö hegöi si sala. Baero daʼö, fehede hegöi amuatania tefaudu moloʼö goi-goi andrö. (Fatimbaisi Luka 1:5, 6.) Moguna ginötö enaʼö tola taʼokhögö döi si sökhi tobali  niha satulö. Börö daʼö, fatua lö ibeʼe zumange andrö Habeli khö Lowalangi, no iforomaʼö wa yaʼia niha soloʼö goi-goi Yehowa. Tola manö abua khönia wamalua daʼa. Tenga duma-duma si sökhi gaʼania Kaʼino börö me lö sökhi dödönia. (1 Yo. 3:12) No isawö goroisa Lowalangi inania ba no mamadaö namania khö Yehowa börö me omasi ia itatugöi samösa zi sökhi ba si lö sökhi. (1 Mo. 2:16, 17; 3:6) Sindruhu-ndruhu lö faʼataʼu khö Habeli ba wamili lala waʼauri si faböʼö moroi ba nösi nomonia!

12. Hadia mbörö wa faehu sibai Gaʼino moroi khö Habeli?

¹² Si dua, itutunö sinenge sotöi Faulo gamakhaita wamati hegöi amuata satulö. Imane, ”Börö wamati wa ibeʼe khö Lowalangi zumange sabölö sökhi Habeli moroi khö Gaʼino. Ba moroi ba wamatinia andrö göi tefaduhuʼö wa satulö ia.” (Heb. 11:4) Faböʼö sibai Habeli moroi khö Gaʼino. Moroi ba wehede Waulo oroma wa mamati Habeli khö Yehowa sandrohu faʼaurinia ba soroi ba dödö. Faduhu dödönia wa hasambalö atulö goi-goi hegöi nifalua Yehowa.

13. Hadia wamahaʼönia khöda moroi ba duma-duma Habeli?

¹³ Moroi ba duma-duma Habeli, tafahaʼö ita wa itema zumange nibeʼeda Lowalangi, ha na atulö gohitö dödöda, yaʼia daʼö mamati ita khö Yehowa ba taʼoʼö goi-goinia satulö soroi ba dödö. Tafahaʼö ita göi wa tenga ha sambua zinangea tafalua ba wamosumange satulö. Hizaʼi farahu ba daʼö fefu nifaluada awö zalua ba waʼaurida sero maʼökhö.

14. Hana wa itema Yehowa zumange nibeʼe Noakhi, Aberahamo hegöi Yakobo?

¹⁴ Habeli andrö niha si oföna mamalua famosumange satulö hewaʼae lö moʼahonoa ia. Hizaʼi, tenga yaʼia zafuria. Itutunö göi sinenge sotöi Faulo niha tanö böʼö sameʼe sumange nitema Yehowa, duma-dumania Noakhi, Aberahamo ba Yakobo. (Baso Heberaiʼo 11:7, 8, 17-21.) Me labeʼe zumange khö Yehowa, itema zumange nibeʼera andrö. Hadia mbörö? Börö me tenga ha asala labeʼe zumange. Laʼoʼö fefu dane-dane si no mufakhoi ba wamalua famosumange satulö. Datafatunö duma-duma nifaluara.

15, 16. Hewisa wamalua Noakhi zi öfa ngawalö dane-dane wamosumange satulö?

¹⁵ Tumbu Noakhi me no 126 fakhe mate Gadamo. Hizaʼi ba götönia no anönö gulidanö famosumange faya. * (1 Mo. 6:11) Fatua lö Anönö Danö Idanö, ha Noakhi awö nösi nomonia zamosumange Yehowa ba lala satulö. (2 Fe. 2:5) Me no teʼorifi ira moroi ba Waʼanönö Danö Idanö, tefarou dödö Noakhi wamazökhi naha wanunu sumange siföföna sibai tesura ba Zura Niʼamoniʼö, ba daʼö ibeʼe zumange khö Yehowa. Famosumange nifaluania soroi ba dödö, tobali duma-duma ba nösi nomonia hegöi ba ngaʼötönia wa ha khö Yehowa mufanandrösa zumange andrö börö me ha yaʼia Lowalangi sinangea mufosumange.  Moroi ba ngawalö gurifö maʼafefu, ifili ”mato hauga ngaʼeu gurifö ba mato hauga ngawua wofo si lö raʼiö” tobali sumange. (1 Mo. 8:20) Iwaʼö Yehowa wa lö raʼiö zumange andrö. Daʼö zangoromaʼö wa fondrege zi sökhi fefu zumange nibeʼenia.​—1 Mo. 7:2.

¹⁶ Ibeʼe zumange nitunu andrö Noakhi ba naha wanunu sumange nifazökhinia. Hadia itema Yehowa lala wamosumange simane daʼö? Tatu manö. Imane Sura Niʼamoniʼö wa omuso sibai dödö Yehowa ba hua zumange andrö, ba ifahowuʼö Noakhi awö ndraononia. (1 Mo. 8:21; 9:1) Hizaʼi, wa itema zumange nibeʼe Noakhi andrö Yehowa börö gohitö dödönia wamalua daʼö. Sumange nibeʼe Noakhi zangoromaʼö wa mamati sibai ia khö Yehowa ba faduhu dödönia wa hasambalö atulö goi-goi hegöi nifalua Yehowa. Börö me lö tebulö Noakhi woloʼö hegöi ba wamalua goi-goi Yehowa, andrö wa imane Sura Niʼamoniʼö, ”Itörö lala Lowalangi.” Lua-luania, tehöngö Noakhi irugi iadaʼa wa yaʼia andrö niha satulö.​—1 Mo. 6:9; Hez. 14:14; Heb. 11:7.

17, 18. Hewisa wamalua Gaberahamo zi öfa ngawalö dane-dane wamosumange satulö?

¹⁷ Toröi Gaberahamo ba mbanua Guri safönu famosumange faya. So ba daʼö gosali sebua ba wamosumange lowalangi mbaŵa sotöi Nanna. * Simanö göi nama Gaberahamo ba zilalö, ifosumange lowalangi faya. (Yos. 24:2) Hizaʼi, ifili Aberahamo ba wamosumange Yehowa. Te ifahaʼö ia sanandrösa khö Lowalangi sindruhu moroi khö duania Semi, samösa moroi ba gotalua nono Noakhi sauri ofeta 150 fakhe nasa ndröfi Gaberahamo.

¹⁸ Sandrohu faʼauri Gaberahamo, oya zumange si no ibeʼe. Fefu daʼö ifanandrösa khö Yehowa, Lowalangi si ha sambua sinangea manema sumange. (1 Mo. 12:8; 13:18; 15:8-10) Hadia aoha gölö Gaberahamo ba wameʼe sumange fondrege zi sökhi khö Yehowa? Ba daʼö taʼila, yaʼia me ibeʼe nono niʼomasiʼönia sotöi Izaʼaki tobali sumange. Me luo daʼö, ifatunö Yehowa khö Gaberahamo hewisa lala ba wameʼe sumange. (1 Mo. 22:1, 2) Omasi Gaberahamo woloʼö oroisa Yehowa irugi ba wondrege zide-ide. Sindruhu-ndruhu wa ibunu nononia na lö itaha ia Yehowa. (1 Mo. 22:9-12) Itema Yehowa wamosumange nifalua Gaberahamo, börö me atulö gohitö dödönia ba wameʼe sumange. Imane Faulo, ”Mamati Gaberahamo khö Yehowa, andrö wa lafotöi ia niha satulö.”​—Rom. 4:3.

19, 20. Hewisa wamalua Yakobo zi öfa ngawalö dane-dane wamosumange satulö?

¹⁹ Arakhagö sandrohu faʼauri Yakobo toröi ia ba Ganaʼana, tanö nifabuʼu Yehowa khö Gaberahamo hegöi ba ngaʼötönia. (1 Mo. 17:1, 8) Fondrege niʼogorofi wamosumange nifalua niha Ganaʼana irege imane Yehowa, ”Iʼutaʼö ira soi daʼö.” (3 Mo. 18:24, 25) Me no irugi 77 fakhe ndröfi Yakobo, iröi danö Ganaʼana  ba mangowalu ia. Aefa daʼö, mangawuli ia iʼohe fefu nösi nomonia. (1 Mo. 28:1, 2; 33:18) So ösa nösi nomonia sadöni tödö ba wamalua famosumange faya. Hizaʼi, me iwaʼö Yehowa khö Yakobo weʼamöi ba Mbetieli hegöi ba wamazökhi naha wanunu sumange, ifalua daʼö Yakobo si fao faʼafaduhu dödö. Fatua lö mofanö ira, imane ba nösi nomonia, ”Mitiboʼö nadu lowalangi faya andrö si so khömi ba miʼamoniʼö ami.” Aefa daʼö, iʼoʼö fefu wanuturu lala nibeʼe Yehowa.​—1 Mo. 35:1-7.

²⁰ So mato hauga ngawua naha wanunu sumange nifazökhi Yakobo ba Danö Amabuʼula, ba fefu wamosumange nifaluania ifanandrösa khö Yehowa. (1 Mo. 35:14; 46:1) Faʼasökhi zumange nibeʼe Yakobo, lala wamosumangenia Lowalangi hegöi ohitö dödönia ba wamalua daʼö, fatema ba dödö Lowalangi. Daʼö mbörö wa tefotöi Yakobo ba Zura niʼamoniʼö, ”niha si lö sinegu”, tandra sangoromaʼö wa omuso dödö Lowalangi khönia. (1 Mo. 25:27) Tobali duma-duma si sökhi waʼauri Yakobo ba ngaʼötönia, yaʼia daʼö iraono Gizaraʼeli.​—1 Mo. 35:9-12.

21. Moroi ba duma-duma ndra matua samati me götö föna, hadia wamahaʼö nihalöda sanandrösa ba wamosumange satulö?

²¹ Hadia wamahaʼönia khöda sanandrösa ba wamosumange satulö moroi khö ndra matua samati andrö? Niha ba zi fasuida mazui ösi nomoda, tola manö lasaisi ita enaʼö tenga ha khö Yehowa tabeʼe zumange. Enaʼö lö tedönisi dödöda, moguna taʼaroʼö wamatida khö Yehowa ba tafaduhusi tödö ha goi-goinia wondrege zi sökhi. No taforomaʼö wamati na taʼoʼö niwaʼö Yehowa, taʼogunaʼö ginötö, faʼabölö hegöi haratoda ba wangai halöwönia. (Mat. 22:37-40; 1 Ko. 10:31) Na taforege wamosumange Yehowa si tefaudu ba zomasi ia ba si fao ohitö dödö satulö, awena dania ifotöi ita niha satulö. Sindruhu wa si möi fangaro dödö daʼö!​—Baso Yakobo 2:18-24.

22-24. Hewisa Goroisa Moze wanutunönia (a) haʼökhö lafanandrösa zumange nibeʼera iraono Gizaraʼeli? (b) hewisa zinangeania zumange nibeʼera? (c) hewisa lala wamaluara famosumange?

²² Ibeʼe Goroisa Moze andrö Yehowa ba ngaʼötö Yakobo enaʼö aboto ba dödöra hadia zindruhunia zomasi ia. Na laʼoʼö niwaʼö Yehowa, tobali ’ira okhöta si tohude’ ba ”soi niʼamoniʼö”. (2 Mo. 19:5, 6) Faigi hewisa Goroisa Moze ba wangabakhaiʼö si öfa ngawalö dane-dane wamosumange satulö.

²³ No iʼombakhaʼö Yehowa ba ndraono Gizaraʼeli enaʼö ha khönia lafanandrösa zumange. Imane, ”Yaʼo zinangea mifosumange. Böi mifosumange lowalangi tanö böʼö.” (2 Mo. 20:3-5) Sumange nibeʼera enaʼö fondrege zi sökhi. Duma-dumania, urifö nibeʼera si tobali sumange enaʼö si lö fökhö ba si lö akela-kela. (3 Mo. 1:3; 5 Mo. 15:21; fatimbaisi Maleakhi 1:6-8.) Me luo daʼö, so dana khö ndra niha Lewi moroi ba zumange nibeʼe khö Yehowa, hewaʼae simanö moguna göi labeʼe zumange ”fondrege  zi sökhi” khö Yehowa moroi ’ba mbuala si no latema’. (4 Mo. 18:29) Baero daʼö, mufatunö ba ndraono Gizaraʼeli hewisa lala wamalua famosumange satulö. Tebeʼe khöra wanuturu lala si tefaudu hadia zinangea labeʼe tobali sumange, hezo so ba hewisa wameʼera daʼö. Töra mato 600 ngawua goroisa si möi fanuturu lala ba waʼaurira. Lafatunö khöra, ”Börö daʼö, böi zi lö mifalua fefu daʼö, simane niʼoroisi Yehowa Lowalangimi khömi. Böi miholeʼö ami ba gambölö mazui ba gabera.”​—5 Mo. 5:32.

²⁴ Hadia tola labeʼe zumange iraono Gizaraʼeli gofu hezo manö? Tebai. Iʼandrö Yehowa ba nono mbanuania enaʼö lafazökhi nose Lowalangi si tobali nahia wamosumange satulö. (2 Mo. 40:1-3, 29, 34) Me luo daʼö, enaʼö fatema ba dödö Lowalangi zumange nibeʼe ndraono Gizaraʼeli, ba daʼö laʼohe zumange nibeʼera. *​—5 Mo. 12:17, 18.

25. Hadia zabölö moguna na mubeʼe zumange? Tutunö.

²⁵ Hizaʼi, sabölö moguna yaʼia daʼö hadia gohitö dödö zi samösa iraono Gizaraʼeli wa ibeʼe zumange andrö! Ifalua daʼö börö waʼomasinia khö Yehowa soroi ba dödö ba sindruhu-ndruhu  iʼomasiʼö goi-goinia. (Baso 5 Moze 6:4-6.) Lö omasi Yehowa wamosumange nifalua ndraono Gizaraʼeli na ha fameta gesuanö. (Yes. 1:10-13) Lö telimo ia ba wamosumange si dua tödö. Imane Yehowa khö Yesaya samaʼleʼö, ”Lafosumange ndraʼo niha andre faoma bewera ba tödöra no aröu khögu.”​—Yes. 29:13.

26. Ba wamobörö, hewisa gosali nifazökhi Zelomo tobali nahia wamosumange satulö?

²⁶ Ngaotu fakhe me no toröi ndraono Gizaraʼeli ba Danö Amabuʼula, ifazökhi Selomo gosali Lowalangi yaʼia daʼö nahia wamosumange sabölö ebua moroi ba nose Lowalangi. (1 Ra. 7:51; 2 Ng. 3:1, 6, 7) Ba wamobörö, fefu zumange ba gosali andrö mufanandrösa ia khö Yehowa. Oya sibai zumange fondrege zi sökhi nibeʼe Zelomo hegöi ono mbanuania, ba lafalua daʼö moloʼö lala si no mutatugöi ba Goroisa Lowalangi. (1 Ra. 8:63) Itema zumange nibeʼera Yehowa tenga börö waʼebua domosa mazui faʼoya zumange nibeʼera. Hizaʼi, sabölö sökhi ba wamaigi Yehowa yaʼia daʼö ohitö dödöra ba wameʼe sumange andrö. Daʼö niʼabakhaiʼö Zelomo me teʼamoniʼö gosali andrö. Imane, ”Miʼosambuaʼö dödömi khö Yehowa Lowalangida ba miʼoʼö gamakhoita hegöi oroisania simane nifaluami maʼökhö.”​—1 Ra. 8:57-61.

27. Hewisa gamuata razo-razo ndraono Gizaraʼeli ba gafuriata hegöi ono mbanuara, ba hadia nifalua Yehowa?

²⁷ Alimagö sibai, ba gafuriata lö laʼoʼö iraono Gizaraʼeli mene-mene si sökhi andrö nifaʼema Zelomo. Lö laʼoʼö zi no mufakhoi ba wamalua famosumange satulö. No tefuyu dödö razo-razo ndraono Gizaraʼeli hegöi ono mbanuara. Lö mamati ira khö Yehowa ba laʼaohasi ba dödö goi-goinia satulö. Hizaʼi, börö me iʼomasiʼö ira Yehowa, lö aetu ifatenge ndra samaʼeleʼö khönia ba woʼamenesi yaʼira. Ifangelama ira hadia lua-lua nifaluara. (Yer. 7:13-15, 23-26) Samösa nifatengenia yaʼia daʼö Hezekieli. Auri ia ba ginötö si lö sökhi sagötö waö-waö wamosumange satulö.

28, 29. Hadia zaboto ba dödöda sanandrösa khö Hezekieli? (Faigi kotak ”Hezekieli​—Faʼauri ba Salua ba Götönia”.)

²⁸ Iʼila Hezekieli hewisa sibai wamosumange andrö ba gosali Zelomo. Amania andrö ere ba sangai halöwö ba gosali. (Hez. 1:3) Te omuso-muso dödö Hezekieli iʼotarai ba waʼide-idenia. Tatu manö ifahaʼö ia amania sanandrösa khö Yehowa hegöi ba Goroisa Moze. Me lasöndra ”mbuku Goroisa Moze” ba gosali, te mato döfi waʼebua-bua Hezekieli. * Me luo daʼö, mamatörö Razo Yosia si sökhi amuata. Fagöna sibai ba dödö razo me labaso mbuku andrö irege tobali famarou dödönia ba wotuhini famosumange satulö.​—2 Ra. 22:8-13.

²⁹ No ifalua Hezekieli zi öfa ngawalö dane-dane ba wamosumange satulö, simane nifalua ndra niha samati fatua lö si tumbu ia. Ba ginötö tafatunö mbuku Hezekieli, ba daʼö taʼila  hewisa ia wolulu faʼaurinia khö Yehowa, iforege wangai halöwö si sökhi ba iʼoʼö fefu goroisa Yehowa simane niʼandrö Yehowa khönia. Wa ifalua fefu daʼö Hezekieli börö wamatinia soroi ba dödö. Hizaʼi, ato niha me luo daʼö lö lafalua zimane nifaluania. Iʼotarai ba waʼide-ide, tatu manö no irongo-rongo nifaʼeleʼö Yeremia. Ibörögö mamaʼeleʼö Yeremia me 647 SM ba terou sibai dödönia ba wamaʼema famangelama ba niha sanandrösa ba wanguhuku nifalua Yehowa ba zi lö ara tö.

30. (a) Hadia manö zoroma ba wamaʼeleʼö Hezekieli? (b) Hadia wamaʼeleʼö andrö, ba hewisa zatulönia enaʼö aboto ba dödöda wamaʼeleʼö Hezekieli? (Faigi kotak ”Enaʼö Aboto ba Dödöda Wamaʼeleʼö Hezekieli”.)

³⁰ Nisura Hezekieli si no teʼehehaini, daʼö zangoromaʼö wa no fandröndröu sibai waʼelungu nono mbanua Lowalangi. (Baso Hezekieli 8:6.) Me ifalua wanguhukunia Yehowa ba niha Yehuda, fao Hezekieli ba niha sato niʼoloiʼö ba Mbabilona. (2 Ra. 24:11-17) Hizaʼi tenga daʼö geluahania göna fanguhuku Hezekieli. No ibeʼe khönia Yehowa halöwö enaʼö mamaʼeleʼö ia ba nono mbanuania si no teʼoloiʼö. Angilata hegöi famaʼeleʼö sahöli-höli dödö nifaʼema Hezekieli, daʼö zangoromaʼö wa ifuli tebohouni wamosumange satulö ba Yeruzalema. Hizaʼi tenga ha daʼö manö. Angilata hegöi famaʼeleʼönia zangoromaʼö wa sindruhu-ndruhu tebohouni wamosumange satulö ba niha sangomasiʼö Yehowa.

31. Hadia manö niʼilada moroi ba mbuku daʼa?

³¹ Ba faosatö mbuku daʼa dania, ifatunö khöda ösa hewisa nahia Yehowa, hawaʼabölö-bölö wotaʼunöisi famosumange satulö, hewisa Yehowa ba wamohouni famosumange satulö hegöi ba wangoʼawögö ono mbanuania. Ba taʼila maʼifu zalua ba zi so miföna na irugi dania inötönia fefu niha lafosumange Yehowa. Ba faza aefa daʼa, tatutunö gangilata siföföna nisura Hezekieli. Tola takhalaigö Yehowa hegöi organisasinia si so ba zorugo. Daʼö fefu zamaduhuʼö wa no sinangea khö Yehowa mufanandrösa wamosumange satulö.