1-3. (a) Ceritaken kai si idah Esekiel ras kai si begina. (Nen gambar bas awal pasal.) (b) Kuasa kai si gejapken Esekiel, janah kai pengaruhna man bana?

TATAP Esekiel ndauh ku lebe, ku gurun pasir si mbelang. Mbelang matana ngenenca, arah ndauh nari idahna sada badai. Badai enda la bagi biasa. Meter rembus angin arah utara janah embusna buk Esekiel ras uisna. Kenca si e, lit embun si mekapal reh ndeheri ia. Embun e tempa-tempa gara perban bas embun e lit kilap api, janah warnana bagi campuren emas ras pirak. Kenca si e, terbegi sora si reh dekahna reh gangna, bagi sora prajurit si enterem si sangana erdalan.​—Esek. 1:4, 24.

² Enda pengenehenen si pertama arah piga-piga pengenehenen si la terlupaken Esekiel. Paksa si e, umur Esekiel kira-kira 30 tahun. ‘Gejapkenna kuasa Jahwe’ eme kesah si badia si luar biasa. Perban kuasa e, banci idahna ras begina kai si luar biasa, si ndauh hebaten asangken film si canggihna pe si banci iban manusia. Kenca idahna pengenehenen enda, sujud ia perban luar biasa kel akapna.​—Esek. 1:3, 28.

 ³ Bereken Jahwe pengenehenen enda labo gelah Esekiel takjup saja. Kerina pengenehenen si itulis bas buku Esekiel, termasuk pengenehenen si pertama enda, mbages kel ertina man Esekiel bage pe man umat Jahwe gundari. Emaka mari sipelajari terbagesen kerna kai si idah Esekiel ras kai si begina.

4, 5. Jelasken uga situasina sanga dat Esekiel pengenehenen si pertama.

⁴ Baca Esekiel 1:1-3. Mari sibayangken uga situasina. Paksa si e tahun 613 SM. Esekiel sangana bas Babilon bagi si enggo sibahas bas pasal sebelumna. Tading ia ras tabanen si debanna i deher Lau Kebar. Banci saja lau e manusia si erbanca gelah banci ibentasi kapal. Lau e rehna arah Lau Eprat, kenca si e maler ka mulihi ku Lau Eprat.

⁵ Kuta kalak si itaban e eme Jerusalem, lit kira-kira 800 kilometer dauhna arah Babilon. * Rumah pertoton si mbarenda i je bapak Esekiel ngelayani selaku imam lanai badia, enggo sembah kalak berhala i je. Lanai ergai kalak tahta kerajan si mulia, si mbarenda i je Daud ras Salomo merentah. Raja Joyakin si la erkiniteken enggo itaban ku Babilon. Si nggantiken ia eme Raja Sedekia, lalap lakoken Raja Sedekia si la mehuli. Ia jadi boneka si iatur-atur raja Babilon saja ngenca.​—2 Raj. 24:8-12, 17, 19.

6, 7. Engkai maka latih kel ukur Esekiel paksa si e?

 ⁶ Perban Esekiel kalak si erkiniteken, latih kel ukurna ngidah teman-temanna si itaban e si enggo mulai urak kinitekenna. Piga-piga umat Jahwe si itaban e banci saja rukur, ‘La kin lah enggo tadingken Jahwe kita? La kin lah kerajan Babilon ras dibata-dibatana enggo meneken pemerentahen Jahwe bas doni enda? La kin lah kari lanai lit si nembah Jahwe alu cara si benar?’

⁷ Janahndu mbayangken situasi enda, bacalah keterangen si menarik si tulis Esekiel kerna pengenehenen si pertama, janah ban e jadi pelajaren pribadindu. (Esek. 1:4-28) Sanga bacandu, bayangken kam me Esekiel e si ngidah pengenehenen e ras si megi sorana.

8. Kai si idah Esekiel janah kai si igambarken pengenehenen e?

⁸ Kai kin si idah Esekiel? Idahna sada gereta si galang kel janah luar biasa. Bas baginna si arah teruh, lit empat roda si galang janah empat mahluk si nggeluh si dungna igelari kerubim. (Esek. 10:1) I datas takal kerubim-kerubim e, lit si bali bagi lante es janah i datas lante e lit tahta Dibata si  mulia. Kundul Jahwe bas tahta e. Kai si igambarken gereta e? Sada ngenca si cocok igambarken gereta e, eme bagin organisasi Jahwe si lit i surga. Ja nari banci siteh? Mari sibahas telu alasenna.

9. Engkai maka gereta e cocok nggambarken hubungen Jahwe ras ciptanNa si lit i surga?

⁹ Hubungen Jahwe ras ciptanNa si i surga. Bas pengenehenen enda, tahta Jahwe lit i datas kerubim-kerubim. Bas ayat-ayat si deban, tahta Jahwe pe ikataken lit i datas kerubim-kerubim ntah pe i antara kerubim-kerubim. (Baca 2 Raja 19:15; Kel. 25:22; Ms. 80:1) E labo ertina Dibata kundul i datas kerubim-kerubim e, perban labo Ia perlu iangkat ciptanNa si megegeh e. Janah guna lawes ku japa pe, labo Ia perlu gereta. Jadi kai ertina e? Perban akui kerubim-kerubim e Jahwe Penguasa Si Meganjangna, banci suruh Jahwe kerubim-kerubim e ku japa pe guna ngelakoken sura-suraNa. Bali bagi malekat si debanna, lakoken kerubim-kerubim e perentah Jahwe perban ia pelayanNa ntah pe wakilNa. (Ms. 104:4) Ipinpin Jahwe kerina ciptanNa si lit i surga, emaka kerina e cocok nggambarken sada gereta si galang si ikendaliken Jahwe.

10. Ja nari banci siteh maka gereta Jahwe e labo nggambarken empat kerubim saja?

 ¹⁰ Gereta e labo nggambarken empat kerubim saja. Kerubim si idah Esekiel lit empat. Biasana bas Pustaka, angka empat ertina la lit si kurang ntah pe lengkap. Jadi empatna kerubim e cocok nggambarken kerina anak Jahwe si setia si lit i surga. Roda-roda e ras kerubim-kerubim e dem alu mata. E ertina kerina anak Jahwe banci ngidah ras mperdiateken kerinana. Pengenehenen e pe ncidahken maka galang kel gereta e, si erban kerubim-kerubim si luar biasa pe teridah kitik. (Esek. 1:18, 22; 10:12) Bage ka me bagin organisasi Jahwe si lit i surga seh kel galangna, labo empat kerubim saja ngenca.

11. (a) Ceritaken pengenehenen Daniel si mirip ras pengenehenen Esekiel. (b) Kesimpulen kai si banci sidat?

¹¹ Daniel pe datna pengenehenen kerna surga bali bagi Esekiel. Nabi Daniel pe enggo ndekah itaban i Babilon. Paksa si e me datna pengenehenen kerna surga. Si menarik, tahta Jahwe si idahna pe lit rodana. Tapi pengenehenen Daniel e si utamana kerna uga teremna keluarga Jahwe si lit i surga. Idah Daniel “lit seribu kali seribu . . . janah lit sepuluh ribu kali sepuluh ribu” anak Dibata si tedis i lebe-lebe Jahwe. Reh ia kerina ku pengadilen si lit i surga, janah kerinana lit inganna ras tugasna masing-masing. (Dan. 7:9, 10, 13-18) Jadi masuk akal, adi sikataken gereta si idah Esekiel e pe nggambarken kerina mahluk roh si mulia e.

12. Engkai maka banci kita ilindungi adi sipelajari isi Pustaka kerna gereta Jahwe si idah Esekiel?

¹² Iteh Jahwe maka banci kita ilindungi adi rusur siukuri kerna “kai si la teridah” bagi si kataken Rasul Paulus, eme kerina si lit hubungenna ras Jahwe. Engkai maka bage? Perban kita manusia, rusuren siukuri kerna “kai si teridah.” Contohna bagi erta, pendahin, pendidiken si meganjang, ras si debanna. (Baca 2 Korinti 4:18.) Perukuren si bage rusur gunaken Setan gelah lanai lit waktuta ngukuri kerna Jahwe. Tapi perban keleng ate Jahwe kita janah gelah ula kita terpengaruh, berekenNa nubuat Esekiel enda. Nubuat e nampati kita gelah siinget maka lit keluarga Jahwe si luar biasa i surga.

13, 14. (a) Kai si kataken Esekiel kerna roda-roda si idahna? (b) Engkai maka cocok ikataken gereta Jahwe lit rodana?

¹³ Si tangtangna perdiateken Esekiel eme empatna kerubim e. Bas Pasal 4 buku enda kari, banci sipelajari kerna Jahwe arah empatna mahluk e ras arah bentukna si luar biasa. Tapi gundari, sibahas lebe empat roda si idah Esekiel. Empatna roda e lit i samping kerubim-kerubim si lit bas empat sudut. Emaka terbentuk me empat segi si mbelang. (Baca Esekiel 1:16-18 ras cataten i teruh) Banci saja roda-roda  e iban arah batu permata krisolit si ersinar, si warnana agak megersing ntah pe meratah janah lit pergersing-gersingna. Mejile kel batu permata e.

¹⁴ Melala tulis Esekiel keterangen kerna empatna roda si lit i teruh tahta Jahwe. Luar biasa kel tahta e perban lit roda-rodana. Biasana adi ikataken tahta labo lit rodana, sebap kem saja ngenca ia. Tahta manusia la perlu ipindah-pindahken, perban rajana erkuasa bas daerah tertentu saja ngenca. Tapi pemerentahen Jahwe beda ras manusia. Bali bagi pengenehenen Esekiel si nandangi sipelajari, kuasa Jahwe la lit batasna. (Neh. 9:6) Perban Jahwe Penguasa Si Meganjangna, banci Ia erkuasa i japa pe!

15. Kai si kataken Esekiel kerna roda-roda e?

¹⁵ Jengang kel Esekiel ngidah roda-roda si galang e. Itulisna, “Meganjang kel roda-roda e, luar biasa kel.” Banci sibayangken, ndauh nen Esekiel ku datas, ku roda-roda si meganjang e, tempa-tempa seh tena roda e ku langit. Tulisna ka keterangen si menarik enda, “Bagin si arah darat roda-roda e dem alu mata.” Banci saja si menarikna eme bentuk roda-roda e. Nina, “Bentuk roda e bagi roda i bas roda.” Kai maksudna?

16, 17. (a) Kai maksudna roda i bas roda? (b) Kai si banci siteh kerna perdalan gereta Jahwe?

¹⁶ Banci saja tiap roda e eme dua roda si ipasang ersilang. Perban si e, nina Esekiel, “Sanga erdalan roda e, banci ia erdalan ku arah japa pe, la perlu belok.” Arah keterangen enda, kai si banci siteh kerna gereta Jahwe?

¹⁷ Perban meganjang roda e, sekali erputar banci ndauh si idalanina. Kataken Esekiel ka maka meter kel gereta e erdalan bali bagi kilap terna. (Esek. 1:14) La lit ahli mesin si banci erban roda si bage, si banci erdalan ku kerina arah. Tetap ia meter janah la perlu belok amin pe berubah tujunna. Tapi enda labo maksudna perdalan gereta e la teratur. Bas pinggir roda-roda e dem alu mata. Emaka gereta e banci idahna ku kerina arah janah tehna kai saja si lit i sekelilingna.

18. Galang kel roda-roda e janah bas pinggirna dem alu mata. Kai si banci sipelajari arah e?

¹⁸ Kai ate Jahwe si ajarkenNa man Esekiel ras umatNa kerna bagin organisasiNa si lit i surga? Enggo sibahas maka bali bagi roda-roda si galang kel ras ersinar, bagin organisasi Jahwe si lit i surga e mulia ras luar biasa. Janah bali bagi roda-roda si dem alu mata, bagin organisasi Jahwe si lit i surga e pe tehna kerinana. Mata Jahwe banci ngidah kerinana. (Kua. 15:3; Jer. 23:24) Selain si e, lit ratusen juta malekat Jahwe ntah banci saja miliaren malekatNa si banci  suruhNa ku japa pe. Kai pe banci perdiateken malekat-malekat e janah laporkenna man Penguasana.​—Baca Heber 1:13, 14.

19. Arah perdalanna gereta Jahwe e, kai si banci sipelajari kerna Jahwe ras bagin organisasiNa si lit i surga?

¹⁹ Enggo sibahas maka gereta Jahwe e luar biasa terna janah banci erdalan ku kerina arah. Beda kel bagin organisasi Jahwe si lit i surga ras pemerentahen manusia bage pe organisasina. Organisasi manusia la jelas tindakenna, la banci ikutkenna perubahen jaman, janah dungna hancur. Gereta si lit i surga e ikendaliken Jahwe, Ia Dibata si masuk akal ras la kaku. Bali bagi erti gelarNa, Jahwe banci jadi kai pe gelah seh sura-suraNa. (Kel. 3:13, 14) Contohna, banci Ia rempet jadi pejuang si hebat si erperang guna umatNa, ntah pe jadi hakim guna ngukum umatNa si mberontak. Tapi banci ka Ia rempet jadi Bapak si perkuah, nggit ngampuni, mpegegehi, ras ngalo-ngalo kalak si erdosa situhu-tuhu ertobat.​—Ms. 30:5; Jes. 66:13.

20. Uga perasanta kenca sipelajari kerna gereta Jahwe e, janah engkai?

²⁰ Kenca sipelajari pengenehenen Esekiel, banci saja tersungkun-sungkun bas pusuhndu, ‘Luar biasa nge kuakap kerna gereta Jahwe?’ Perlu siinget maka gereta e sangana erdalan. Ula pernah siakap la lit si mperdiateken kita. Sebap Jahwe, AnakNa, ras kerina malekat idahna masalah kai pe si erban kitik ukurta. Teklah kita maka pasti bereken Jahwe keperlunta bas waktu si tepat. OrganisasiNa pasti banci lalap ngadapi tentangen-tentangen si mbaru bas doni si berubah-ubah enda. Perlu ka siinget maka organisasi Jahwe terus erdalan. Bas pengenehenen e, begi Esekiel sora arah surga, nina, “O roda si erputar, majulah!” (Esek. 10:13) Sanga siukuri uga organisasi enda erdalan, pasti luar biasa siakap. Tapi si luar biasana kel eme Jahwe, Si Ngendaliken organisasi enda.

21, 22. Engkai maka gereta Jahwe e banci erdalan?

²¹ Gundari si iperdiateken Esekiel eme si lit i datas roda-roda e. Idahna “lit si bagi lante es si erndilap.” (Esek. 1:22) I datas takal kerubim-kerubim e lit lante si mbelang si erndilap. Sanga kalak si ngangkai mesin mbaca kerna si enda, banci saja mamang atena janah rukur ia, ‘Kai si mpersada lante ras roda-rodana? Uga empatna roda e banci erputar alu ratur adi la lit asna ntah pe si ngubungkenca?’ Arus siinget, gereta enda nggambarken kai si lit i surga. Emaka perdalanna la ibatasi hukum alam. Perdiateken ka kata-kata si penting enda, “Kesah si badia si nuruh mahluk  e pe lit bas roda-roda e.” (Esek. 1:20, 21) Uga kesah si badia e nuruh kerubim-kerubim ras roda-roda e?

²² Kesah si badia Jahwe eme gegeh si hebatna bas alam semesta enda. Kesah si badia e banci erban gereta Jahwe tetap ersada, erdalan, janah kerina bagin gereta e radu ras erdahin. Gundari, mari sipelajari penjelasen Esekiel kerna Si Ngendaliken gereta e.

23. Kata-kata si uga si ipake Esekiel guna nggambarken Jahwe, janah engkai?

²³ Baca Esekiel 1:26-28. Sanga ceritaken Esekiel pengenehenen e, rusur pakena kata-kata “lit si bagi,” “bagi,” janah “teridah bagi.” Tapi rusuren pakena kata-kata si bage bas teluna ayat enda. Banci saja mesera kapna njelasken kai si idahna. Idahna ‘lit si bagi batu sapir janah bentukna bagi tahta.’ Cuba bayangkenndu sada tahta si ipahat arah batu sapir raksasa, si warnana biru tua. Bas tahta e lit si kundul “bagi manusia.”

24, 25. (a) Pelangi si lit i sekeliling tahta Jahwe ngingetken kita kerna kai? (b) Uga tanggapen umat Dibata si dat pengenehenen?

²⁴ Situhuna, si inen Esekiel e Jahwe. Tapi la banci jelas idah Esekiel, perban awakNa nari ku teruh ras awakNa nari ku datas, kemulian Jahwe ersinar bali bagi api. Sanga tatap  Esekiel kemulian Jahwe si ercahaya bagi api, banci saja mesilo kapna janah tutupina matana. Lit ka idah Esekiel si luar biasa. ‘I sekeliling Jahwe lit cahaya bagi pelangi i embun sanga udan.’ Uga perasanndu sanga idahndu pelangi? Pasti meriah ukurndu. Pelangi e ngingetken kita kerna kemulian Si Nciptaken kita. Pelangi si erbage-bage warnana pe banci erban pusuhta dame. Selain si e, ingetkenna ka kita kerna perjanjin dame si ban Jahwe kenca Banjir si Mbelin. (Kej. 9:11-16) Amin pe kuasa Jahwe la lit batasna, tapi kedamen si ngerajai pusuhNa. Ia kap Dibata kedamen. Emaka kerina kalak si nembah Ia, banci nggejapken kedamen.​—Heb. 13:20.

²⁵ Uga tanggapen Esekiel sanga idahna kemulian Jahwe? Tulis Esekiel kerna kai si terjadi. “Sanga kuidah e, sujud aku.” Luar biasa kel akap Esekiel janah ergaina kel Dibata, emaka sujud ia. Nabi-nabi si deban pe bage lakokenna sanga datna pengenehenen, perban sadar kalak e maka kalak e labo japahna pe adi bandingken ras Jahwe. (Jes. 6:1-5; Dan. 10:8, 9; Ket. 1:12-17) Tapi kenca si e, terpegegehi kel kalak e perban kai si idahna. Bage ka me si gejapken Esekiel. Emaka, uga arusna tanggapenta sanga sibaca ayat-ayat kerna pengenehenen si bage?

26. Engkai maka terpegegehi Esekiel kenca datna pengenehenen e?

²⁶ Bicara kitik ukur Esekiel ntah pe kuatir ia sanga idahna keadan umat Jahwe i Babilon, pengenehenen e pasti mpegegehi ia. I japa pe umat Jahwe tading, la soal i Jerusalem, i Babilon, ntah pe bas ingan si debanna, pasti banci perdiateken Jahwe kalak e arah geretaNa. Kerina pemerentahen si ikuasai Setan la ngasup ngelawan Dibata si ngendaliken organisasi si luar biasa e. (Baca Masmur 118:6.) Banci ka idah Esekiel gereta Jahwe e la ndauh arah manusia, perban roda-rodana seh ku taneh. (Esek. 1:19) Ermediate kel Jahwe man umatNa si itaban. Kalak e tetap lit bas kekelengen Bapakna si i surga.

27. Kai pengaruhna pengenehenen Esekiel e banta?

²⁷ Kai pengaruhna pengenehenen Esekiel man banta? Gundari, la erngadi-ngadi serang Setan kalak si nembah Jahwe. Ate Setan gelah sisada siakap banta, janah ndauh siakap banta arah Bapakta bage pe arah organisasiNa. Ula pediat perasan si bage turah bas pusuh ras perukurenndu. Sebap si e labo tuhu! (Ms. 139:7-12) Bali bagi Esekiel, pasti luar biasa kel siakap ngidah organisasi Jahwe. Banci saja  labo kita sujud bagi Esekiel. Tapi pasti luar biasa kel siakap ngidah organisasi Jahwe si lit i surga e si seh kel gegehna, meter perdalanna, banci erdalan ku kerina arah, la kaku, janah mulia kel.

28, 29. Sedekah seratus tahun enda, kai buktina gereta Jahwe sangana erdalan?

²⁸ Selain i surga, lit ka bagin organisasi Jahwe si lit i doni. Amin pe si lit bas organisasiNa enda manusia si la sempurna, tapi melala si enggo ilakoken kalak e alu penampat Jahwe. Hasilna, i belang-belang doni, banci ilakoken kalak e kai si la ngasup kalak e ngelakokenca alu gegehna saja. (Joh. 14:12) Buku Kinirajan Dibata Merentah! enggo ncidahken asa kai belangna dahin erberita sedekah seratus tahun enda. Arah buku e pe, banci siteh uga organisasi Jahwe terus mereken pengajaren man kalak Kristen situhu-tuhu, banci menang bas pengadilen, janah uga organisasi nggunaken teknologi si terbaru bas ngelakoken peraten Dibata.

²⁹ Bas wari-wari pendungi enda, enggo melala si ilakoken gelah banci sembah kalak Jahwe alu cara si benar. Adi siukuri alu mbages kerna si e, reh tekna kita maka gereta Jahwe tuhu-tuhu sangana erdalan. Sada kehamaten kel siakap banci ikut jadi bagin organisasi Jahwe janah silayani Ia selaku Penguasa!​—Ms. 84:10.

30. Kai kari sibahas bas pasal seterusna?

³⁰ Lit denga si banci sipelajari arah pengenehenen Esekiel. Bas pasal seterusna, sibahas kari kerna empat “mahluk si nggeluh,” ntah pe empat kerubim e. Kai si banci sipelajari kerna Dibata Jahwe, Penguasata si mulia?