1-3. (a) Kabwarabwaraa te bae e noria Etekiera ao n ongo. (Nora te taamnei ni moan te mwakoro aei.) (b) Te mwaaka raa are e riki iai te baere e rinanona Etekiera, ao tera aron rotakina iai?

E KAREKEA taraani kiraroa Etekiera, rinanon nako te rereua ae bikebike. E kamakiki matana ao e a manga kaurei. E kangaanga bwa e na kakoauaa te bae e noria. N uakaan ma te oraitan ao e a tei nangin te angibuaka. Ma e rangi ni kaokoro te angibuaka aei. Ngke e a kare mai meang ao a a ukukaki iai irana ma kunnikaina, ao e a nora te nang ae matenten i eta. E ota mai nanoaana ni kiakian te ai, ao ngke e nora te ota, e a uringa iai te biti ae rangi ni kakawaki are kaburoaki n atoaki. * Ngke e a roko te nang arei iroun Etekiera, ao e a ririkirake ni korakora te karongoa, ae kangaa karongoaani mwanangan te taanga ni buaka ae korakora.​—Etek. 1:​4, 24.

² Tao ai 30 ana ririki teuaei ngke e nora moan iteran te bae aki kona ni mwanuokinaki aei. E namakina “bain Iehova” i aona ae te mwaaka ae rangi ni korakora ae te taamnei ae raoiroi. Te bae e kairaki bwa e na noria iroun te taamnei ma n ongo, e rangi ni kaminonano ao ni kamimi riki nakoni karaobirim aika kakaraoaki ngkai. E a kairaki Etekiera n te miitara aei  bwa e na bobaraaki nako aontano, bwa e rangi n taonakinako iai.​—Etek. 1:​3, 28.

³ Ma e bati riki te bae e iangoia Iehova bwa e na kaotia nakon teuaei nakon ae e na tii kamimia. A bati baika kakawaki ibukin Etekiera ao ana toro naba Iehova aika kakaonimaki ngkai, n ana moani miitara Etekiera aei ao ni miitara nako aika n te boki ni burabeti ae kakaongora aei. Ngaia are ti na nora raoi ngkai te baere e noria Etekiera ma n ongo.

4, 5. E riki ia te miitara are e noria Etekiera ao n ningai?

⁴ Wareka Etekiera 1:​1-3. Ti na kauringa moa te tabo ao te tai. Bon te ririki ae 613 B.C.E. N aron ae ti noria n te mwakoro are mai mwaina, e mena Etekiera i Baburon i buakoia raona n taenikai n te kaembwa teuana i rarikin te karaanga ae Keebara. N taraana ao e kenaki te karaanga aei irouia aomata, ao e raanga man te karaanga are Iuberetiti, ao imwina e a manga toma ma Iuberetiti.

⁵ Mwengaia taenikai aikai ae Ierutarem, bon 800 tabun te kiromita raroana. * Ao e a kabarekaaki te tembora are e bebeku iai taman Etekiera bwa te ibonga, n te babakanikawai ao n taromauriani bouannanti. Te kaintokanuea are i Ierutarem are a a tia ngkoa Tawita ma Toromon n tautaeka iai ma te karineaki, e a riki ngkai bwa nibwan te kamaamaeaki. Ao te Uea ae Ieoiakin ae aki onimaki e mena i Baburon ikai i buakoia taenikai. Oneani mwina are Tetekia, e toro naba iroun ueani Baburon ao bon te mwaane ae buakaka.​—2Uea 24:​8-12, 17, 19.

6, 7. E aera Etekiera ngke e bae n namakinna bwa e maiu n taai aika karawawata?

 ⁶ E taraa n ae bon taai aika rangi ni karawawata taai aikai ni maiun te mwaane ae onimaki ae Etekiera. Tao a iango ni kangai tabeman raona n taenikai: ‘E a kitanira Iehova n aki toki? Te koaua bwa te tautaeka ae buakaka ae Baburon ma atuana aika kewe aika rangi ni bati, a na boni kamauna taromaurian Iehova ae itiaki ao ana tautaeka man te aonnaba?’

⁷ N iaiangoan te rongorongo anne, e aera ko a aki moana am ukeuke n reirei i aona, ni warekan ana moani miitara Etekiera ae bwarabwara raoi aei? (Etek. 1:​4-28) Ngkana ko karaoa anne, ao iangoia bwa aongkoa ngkoe Etekiera, ae ko nori baike e nori ao ko ongo baike e ongo.

8. Tera ae e noria Etekiera n ana miitara, ao e kaineti ma tera te miitara aei?

⁸ Tera ae e noria Etekiera? Titeboo ma taraan te kaa ae kamimi, ae kabwarabwaraaki bwa te kaa ni buaka. Iai wirana aika aua aika totoa ao iai taamnei aika aman aika kamimi taraaia aika iriria, ake a ataaki imwina riki bwa kerubim. (Etek. 10:1) Iai i etaia te bae borababaua ae aroraki, ke te bao ae ai aron te aiti, ao e mena i etana ana kaintokanuea ae mimitong te Atua ao bon Iehova ae tekateka iai! Ma e tei ibukin tera te kaa ni buaka anne? E kaineti ana miitara Etekiera ma te bwai ae tii teuana aei: iteran  ana botaki ae mimitong Iehova ae kabutaa te iuniweeti, i karawa. E aera ngkai ti taekina anne? Iangoi baika tenua ake a kairira bwa ti na taekina anne.

9. E kangaa reitakin Iehova ma ana karikibwai ake i karawa n tonu raoi ma kabwarabwaraan te kaa aei?

⁹ Reitakin Iehova ma ana karikibwai ake i karawa. Noria bwa n te miitara aei ao e mena ana kaintokanuea Iehova i etaia kerubim. N Ana Taeka te Atua ao e kabwarabwaraaki naba ae aekakin anne ae Iehova e tekateka i aon te kaintokanuea i etaia ke i marenaia ana kerubim. (Wareka 2Uea 19:15; TeOti. 25:22; TaiAre. 80:1) E aki tekateka raoi i etaia ana kerubim, bwa aongkoa e kainnanoa uouotakina irouia anera aika korakora aikai, ao e aki naba kainnanoa te kaa raoi ni buaka ae e na totoka iai. Ma a boutokaa ana tautaeka kerubim, ao e kona ni kanakoia nakon taabo ake e tangiria bwa e na waakinaki iai ae e tangiria. N aroia ana anera ni kabane te Atua aika tabu, kerubim aikai a kakakororaoa naba ana moti Iehova, ngkai ana tabonibai ngaiia ke ana tia tei. (TaiAre. 104:4) N te aro anne ao ai aron ae e toka Iehova i aoia ni kabane, ni kaiririia bwa aia tia tautaeka, n aron ae kaanga a riki bwa te kaa tewaana ae totoa ae a bane ni katiteuanaaki iai.

10. Tera ae e kaotia bwa a bati riki nakon aman kerubim aika irekereke ma te kaa ni buaka mai karawa aei?

¹⁰ Bon tiaki tii kerubim ake a nanonaki n te kaa anne. Bon aman mwaitiia kerubim ake e noriia Etekiera. E kakabonganaaki te  ware anne n te Baibara ni kaota te bae tabwanin raoi ke ae akea te bwai teuana ae tiku mai iai. Nanona bwa ngkai aman kerubim aikai, a tei ngkanne ibukia natin Iehova aika taamnei ni kabane aika kakaonimaki. Noria naba bwa a onrake wira ao kerubim naba aikai ni maata, are a kaota aia taratara raoi te koraki aika bati riki ao tiaki tii taamnei ake aman ake a kaotaki. E oti n ana kabwarabwara Etekiera ibukin te kaa aei bwa e rangi n totoa, n te aro ae a a taraa n uarereke kerubim aika kamimi aikai. (Etek. 1:​18, 22; 10:12) N aron naba anne, e rangi ni bubura iteran ana botaki Iehova are i karawa, ao tiaki tii kaaina kerubim aika aman aikai.

11. Tera ana miitara Taniera ae aekakin ana miitara Etekiera, ao tera ae ti iangoia iai?

¹¹ Ana miitara Taniera ibukini karawa, ae aekakin anne. E kabanei ririki aika bati te burabeti ae Taniera bwa te taenikai ni kaawan Baburon, ao e anganaki naba te miitara ibukini karawa. E kakaongora bwa n te miitara naba anne ao iai wiran ana kaintokanuea Iehova. E kaatuuaki n ana miitara Taniera buburan ana utu n taamnei Iehova i karawa. E nora Taniera “teuana te mirion, ao . . . tebubua te mirion” natin te Atua aika taamnei ake a tei i matan Iehova. A tekateka kaanga n te tabo ni Boowi i karawa, ao a bane ni mena n aia tabo ake a katauaki iai. (Tan. 7:​9, 10, 13-18) E aki ngkanne taraa n eti riki iangoan ae ana miitara Etekiera aei e tei ibukin te botaki ae mimitong naba ae kaainaki irouia anera?

12. E aera ngkai boni kamanoara reiakinan rongorongo n aron aika mena n ana miitara Etekiera ibukin te kaa ni buaka mai karawa?

¹² E ataia Iehova ae boni kamanoara ngaira aika aomata kaatuuan ara iango i aoni bwaini karawa aikai, ake e arani te abotoro Bauro bwa “baika aki nonoraki.” Bukin tera? Ngkai ti karaoaki man te iriko ao te raraa, ti kan iaiangoi riki “baika nonoraki,” ae tabeaiangara n te itera n rabwata, ae baika aki teimaan. (Wareka 2 I-Korinto 4:18.) E kakabongana buaka mamaarara anne Tatan ao ni kairira bwa ti na kabatiaa iangoani bwaai n rabwata. Ibukini buokara ni kaitaraa te kariri anne, e tatangira Iehova ni katauraoi rongorongo n aron aika mena n ana taetae ni burabeti Etekiera, ni kakauringira mimitongin ana utu Iehova i karawa!

13, 14. (a) E kangaa Etekiera ni kabwarabwarai wira ake e nori? (b) Bukin tera bwa e tonu raoi ngkai iai wiran ana kaa ni buaka Iehova?

¹³ N te moantai ao e kaatuui taekaia kerubim ake aman Etekiera, ao ni Mwakoro 4 n te boki aei ti na nora iai reireiara ibukin Iehova mani baikai ao man teia aika kamimi. Ma e nori Etekiera wira aika aua i rarikia kerubim aikai, ae n taraana a tei ni koona aika aua ae reke iai te tikuea ae totoa. (Wareka Etekiera 1:​16-18.) A taraa ni karaoaki man te kerutorito ae te atibu ae rangi ni kakawaki ae kaanga e kiraati ma ni babobo, ke e babobo ni kiriin karana. E raneanea te bae rangi n tamaroa aei.

 ¹⁴ E rangi ni kaatuuaki taekani wiran te kaa ni buaka n ana miitara Etekiera. E rangi ni kamimi teina. Te kaintokanuea ae iai wirana! Ti kona n iangoa te kaintokanuea ae titiku ni nnena n aki mwaing kioina ngkai taan tautaeka aika aomata bon iai tiani mwaakan aia tautaeka. Ma e rangi ni kaokoro ana tautaeka Iehova ma aia tautaeka aomata. N aron ae e nang reiakinna Etekiera, bon akea tiani mwaakan ana tautaeka Iehova. (Neem. 9:6) Ni koauana, e kona n roko mwaakan ana Tautaeka n taabo nako!

15. Tera ae e noria Etekiera ni kaineti ma aron tein ao buburan taiani wira?

¹⁵ E tounako Etekiera ni buburan taiani wira. E korea ae kangai: “A rangi n rietata tinanikuni mronronin wira aikai ao a kakamaaku.” Ti kona n iangoa aron Etekiera n tararake n taraa totoan tinanikuni mronronin wiran te kaa aei ae rokoroko i karawa rietana. Ao e a manga kabwarabwaraa ni kangai: “Ao a on tinanikuni mronronin wira aika aua aikai ni maata ni kabutaa.” Ma tao te bae moan te kamimi riki bon aron teini wira aikai. E kabwarabwaraa ni kangai: “Taraaia ma teia kaanga ai aron ae te wira teuana e bangaki i nanon te wira teuana.” Tera ae kaotaki iai?

16, 17. (a) Kabwarabwaraa teini wira aikai ae taekinaki bwa iai te wira teuana i nanon te wira teuana? (b) Tera ae e kaotaki mani wira aikai ni kaineti ma aron ana kaa Iehova ni kona ni waekoa ni bibita butina ao kawaina?

¹⁶ E oti bwa wira ake e nori Etekiera n tatabeua nako, a kikiriuoua ma teuana e bangaki i nanon are teuana ao titeboo teia ae a etirake. E mataata ngkanne bukini mwamwakurin wira aikai n aron are e kabwarabwaraa Etekiera ni kangai: “Ngkana a mwaing, a kona ni buti nakon itera ake aua n aki raraibwakee ngkana a buti.” Tera ae oti ni wira aikai ibukin te kaa mai karawa are e noria Etekiera?

¹⁷ Wira aika riao rietataia aikai a kona ni kakeboa te tabo ae moan te takabubura, ni minoia naba ae tii teuana. E boni katereaki n te miitara bwa titeboo butimwaakan te kaa aei ma te itirua! (Etek. 1:14) Irarikina, e oti man wira aikai aika kaaitarai itera aika aua bwa e kona ni waekoa ni bibita butina ao kawaina, ae a aki kona ni karaoia intinia. E kona ni buti te kaa aei nakon itera aika kakaokoro n aki kerikaaki butina ke n raibwake naba! Ma tiaki n ae e a boni buti naba n aki akaka. Maata ake a kabutaa tinanikuni mronronin te wira, e katereaki iai ae te kaa aei e nori bwaai ni kabane n iterana nako.

18. Tera reireiara n totoani wira ao ni batin taiani mata?

¹⁸ Tera ngkanne ae e reireina Etekiera ao aomata nako aika kakaonimaki Iehova, ibukin iteran ana botaki are i karawa? Iangoa te bae ti a tia n noria. E mimitong ao e kamimi ma ni kakamaaku, n aron ae oti mani bwaini wira aika raneanea aikai ao buburaia. E atai bwaai ni kabane n aron ae oti ni batin te mata i aoni wira aikai. E nori bwaai ni kabane matan Iehova. (TaeRab. 15:3; Ier. 23:24) Ao iai mirion ma mirion naba ana toro aika anera ake e kona ni kanakoia nakon iteran nako te iuniweeti,  ao a kona n tuoi bwaai ao ni manga ribootin nakon aia tia Tautaeka.​—Wareka Ebera 1:​13, 14.

19. Tera reireiara ibukin Iehova ao iteran ana botaki are i karawa, mani butimwaakan ana kaa ni buaka ao waekoana ni bibita butina ao kawaina?

¹⁹ Ti noria naba bwa e rangi n riao butimwaakan te kaa ni buaka aei ao ni waekoa ni bibitaki kawaina nako ike e kan nako iai. Iangoa kaokoron iteran ana botaki Iehova are i karawa ma aia tautaeka aomata, aia rabwata, ao aia botaki nako! A aki konaa aia tautaeka aomata ao aia botaki nako ni katoki aia kangaanga aomata, ke ni kaangaraoi bwaai ni kaineti ma bitaki aika riiriki. Ao n tokina a na boni mauna ke a na oneaki mwia. Ma ana kaa ni buaka Iehova aei e kaota raoi aron te Atua are ngaia ae bairea aroni butin te kaa aei, ae e wanawana ao e kona ni kaangaraoi bwaai. N aron ae e oti n arana, e kona n riki bwa te bae kainnanoaki ibukini kakororaoan ana kantaninga. (TeOti. 3:​13, 14) N te katoto, e kona ni waekoa n riki bwa te tia Buaka ae korakora ae tei ibukia ana aomata, ma e kona ni manga waekoa n riki bwa te tia Kabwarai buure ae nanoanga ae tabeakinia taani bure ake a rangi n uruaki nanoia, ma ni kaoki naba marurungia.​—TaiAre. 30:5; Ita. 66:13.

20. E aera ngkai ti bon riai ni mimi ma ni karinea ana kaa ni buaka Iehova?

²⁰ Ti kona ni kairaki n ana miitara Etekiera ngkai bwa ti na titirakinira ni kangai: ‘Te koaua bwa I boni mimi ma ni karinea ana kaa ni buaka Iehova?’ Ti riai n uringnga bwa e tei te kaa ni buaka aei ibukin te bae e tabe ni buti ngkai. Ti aki riai n iangoa Iehova ma Natina ao anera ni kabane, bwa a aki nori kangaanga tabeua aika kabwarai nanora. Ti aki riai naba n raraomaeakina ae e na baenikai Atuara ni buokira, ke e na kabwaka ana botaki ni kaangaraoi bwaai ni kaineti ma baika tibwa riki ake a a riki n te waaki ae bibitaki aei. Ti wanawana ngkana ti ururinga are e mwamwakuri ana botaki Iehova ao n tabe ni buti ngkai. E bon ongo Etekiera te bwanaa mai karawa ae takarua ni kangai: “Wira!” E teretere iai ae e tua te bwanaa mai karawa aei nakoni wira aikai bwa a na buti. (Etek. 10:13) E aki ngkanne kamimi iangoan aron Iehova ni kaira butin ana botaki? Ma ti rangi ni mimi riki iroun Iehova.

21, 22. Ti na kangaa ni kabwarabwaraa te bwai ae katomai bwain nako te kaa ni buaka aei?

²¹ E katikakinako matan Etekiera mani wira aika rokoroko i eta aikai, nakon “te bwai ae kaanga te bao ae aroraki, ae takiakia n ai aron te aiti ae kamimi.” (Etek. 1:22) Ao iai te bao ae aroraki ae raneanea ma ni mimitong, ae karietataaki riki i etan atuia kerubim. Ma e boni bae te tia wareware ae bwaati ni mwakaeneke n rangi ni kautitiraki ibukin te kaa aei. N te katoto, tao iai aika a na kangai: ‘Tera ae e kamatoaa te bao are i etan taiani wira? Ao a kangaa ni buti raoi wira n akea bwain tomaaia? Ururinga are e aki irii tuan te karaobwai te kaa aei, bwa bon te  kaikonaki, ae bannan te bwai ae bon iai i karawa. Nori naba taeka aika kakawaki aikai: “Te taamnei are mwamwakuri i aoni baika maiu e mena naba ni wira aikai.” (Etek. 1:​20, 21) Tera te taamnei are mwamwakuri i aoia kerubim aikai ao i aon naba taiani wira?

²² Bon taamnein Iehova ae raoiroi, ae te mwaaka ae te kabanea ni mwaakaroiroi n te iuniweeti aei. E katomai bwain nako te kaa aei te mwaaka aei, e kamaiua bwa e na buti, ao e taua aroni butina n te aro ae kororaoi. N iaiangoan anne, ti na nora ngkai te baere e karekea taraana Etekiera ngke e a rairaki n taraa Teuare bairea aroni butin te kaa ni buaka anne.

23. Taeka raa ake e kakabonganai Etekiera ni kataia ni kabwarabwaraa iai Iehova, ao bukin tera?

²³ Wareka Etekiera 1:​26-28. Ni kabwarabwaraan te miitara aei iroun Etekiera, ao e kakabonganai taeka n aron “taraan,” “kaanga,” “ai aron,” ao “te bae kaanga.” Ma e rangi ni kakabonganai riki taeka aikai ni kiibu aikai. E taraa n ae e kataia n ukeri taeka ibukini kabwarabwaraan baike e nori bwa a a kangaanga kabwarabwaraaia. E nora “te bae kaanga taraan te atibu ae te tabeiro ao kaanga ai aron te kaintokanuea.” Ko kona n iangoa te kaintokanuea ae kaaraki man te tabeiro ae turu buruuna? Ao  e tekateka i aona te Burabura ae kakannato. Teiteina “kaanga taraan te aomata.”

24, 25. (a) E kauringira taekan tera nei wirara are katobibia ana kaintokanuea Iehova? (b) A kangaa n rotaki n tabetai ni miitara aikai mwaane aika onimaki aikai?

²⁴ Kaanga e aki oti raoi taraan te aomata ae kakannato aei bwa e karaoia Iehova bwa e na rabwatanaki n te ai ae mimitong mai bebeena rikaaki ao mai bebeena rake. Ti kona n iangoa te burabeti aei ni kamakiki matana ao n nangoi ngke e tataraa te burabura ae mimitong aei. Imwina ao e a korea ae kangai ibukin te baere e noria are e rangi n tamaroa: “Ao e katobibiaki teuaei n te raneanea ae kaanga ai aron nei wirara n te nang n te bong ae kakarau.” Ko a tia n nanamakina te kukurei ngkana ko nora nei wirara? Ai tereterera te kauring aei ibukini mimitongin ara tia Karikiriki! Te bae karakara ae bangaki i karawa aei, e kona naba ni kauringira taekan ana berita Iehova ibukin te raoi imwin te Ieka. (KBwaai 9:​11-16) E ngae ngke e korakora te Atua ae Moan te Mwaaka aei, ma bon te tia karekea te raoi. (Ebera 13:20) E tautaeka te raoi i nanona ao a rotaki naba iai naake a taromauria ma te kakaonimaki.

²⁵ Tera mwin norakini buraburani mimitongin Iehova ae te Atua? E korea te bae riki Etekiera ni kangai: “Ngke I noria, ao I katorobubua ni bobaraaki nako aontano.” E bobaraaki i aontano Etekiera bwa e taonakinako n te mimi ao ni maakakin te Atua ae aanaki n te karinerine. Anne naba aroia burabeti ake tabeman riki ngke a nori naba miitara mairoun Iehova. A bae n namakinna ae a rangi ni mangori ao n taonakinako naba iai. (Ita. 6:​1-5; Tan. 10:​8, 9; TeKao. 1:​12-17) Ma imwina riki ao a bon rangi ni kakorakoraaki mwaane akanne n te baere e kaotia Iehova nakoia. E bon riki anne nakon Etekiera. Ao e na tera aron rotakira ni warekan aeka n rongorongo man te Baibara aikai?

26. E kangaa ni kakorakoraaki Etekiera n ana miitara?

²⁶ Ngkana tao e karawawataaki Etekiera n te raraoma ke e tabeaianga ni baike a riki nakoia ana aomata te Atua i Baburon, ma e boni bae ni kakorakoraaki n te miitara aei. E teretere bwa e aki kakawaki bwa a mena ia ana aomata aika kakaonimaki te Atua, i Ierutarem ke i Baburon ke n te tabo riki teuana. E na bon roko irouia ana kaa ni buaka Iehova ae tamaroa aei! E kona mwaakan Tatan n tei ni kaitaraa te Atua ae bairea aroni butin te kaa ni buaka ae mimitong aei, ae taekan ana botaki i karawa? (Wareka Taian Areru 118:6.) E noria naba Etekiera bwa e aki rangi n raroa mairouia aomata te kaa mai karawa aei, bwa a toko wirana ma aontano! (Etek. 1:19) Ngaia are e rangi n tabe Iehova ma ana aomata aika kakaonimaki ake a taenikai. A tatabeakinaki iroun Tamaia ae tatangira aei!

27. Tera kakawakin ana miitara Etekiera nakoira ni boong aikai?

²⁷ E kakawaki ana miitara Etekiera ibukira ni boong aikai? Eng! Uringnga are e kaira ekakinakoan te taromauri ae itiaki  ibukin Iehova Tatan. E tangiria bwa ti na kakoauaa ae ti katukaki ma arora, ti raroanako, ao ti aki kona ni buokaki iroun Tamara are i karawa ao ana botaki. Tai kariaia keewe aikai bwa a na rota am iango ao am namakin! (TaiAre. 139:​7-12) Ti bon tau naba ni miroaroa n aron Etekiera. Tao ti na aki katorobubua ni bobaraaki n aron are e karaoia. Ma tiaki ti riai n tounako ao ni miroaroa ni mwaakan iteran ana botaki Iehova n te iuniweeti are i karawa, ni butimwaakana, n arona ni waekoa ni bibita butina ao kawaina, ni kaangaraoana, ao ni mimitongina?

28, 29. Tera ae e kaotia bwa e bon tabe ni buti ana kaa ni buaka Iehova tebubua te ririki n nako n uaa ngkai?

²⁸ Uringnga are iai naba n te aonnaba iteran ana botaki Iehova. E koaua ae e kaainaki iteran ana botaki aei irouia aomata aika aki kororaoi. Ma iangoa te bae e a tia ni kakororaoia Iehova n te aonnaba! E a tia Iehova ni buokiia aomata ni kabutaa te aonnaba bwa a na karaoa te bae a bon aki kona ni karaoia i bon irouia. (Ioa. 14:12) Ni warekan te boki ae E a Kairiri Ana Tautaeka n Uea te Atua! e kona ni kauringira kamimin raababanakon te mwakuri n uarongorongo i nanon tebubua te ririki n nako n uaa ngkai. Ti bae n uringi naba baike e a tia ni kakororaoi ana botaki Iehova ibukin reireinaia Kristian ni koaua, ni karekean te tokanikai n te boowi, ao ai ni kabonganaani kukune aika boou ibukini kakororaoan nanon te Atua!

²⁹ Ngkana ti iangoi bwaai ni kabane ake a karaoaki ibukini kaokan te taromauri ae itiaki ni kabaneani boong n te waaki ae buakaka ae ngkai, ao e mataata bwa e bon tabe ni buti ana kaa ni buaka Iehova. Ai kakabwaiaakira ngaira ngkai ti a kaaina te botaki aei ao ni beku ibukin te tia Tautaeka aei!​—TaiAre. 84:10.

30. Tera ae ti na rinanona n te mwakoro ae imwina?

³⁰ Ma e bati riki reireiara man ana miitara Etekiera. N te mwakoro ae imwina ao ti na rinanon taekaia “baika maiu” ake aman aika kamimi, ke kerubim. Tera reireiara iai ibukin ara tia Tautaeka ae mimitong ae Iehova ae te Atua?