1-3. a) Emombeʼu mbaʼépa ohecha ha ohendu Ezequiel. (Ehecha pe taʼanga oĩva iñepyrũme). b) ¿Mbaʼeichagua podérpa ohechauka vaʼekue Ezequiélpe upe visión, ha mbaʼéichapa haʼe oñeñandu?

EZEQUIEL okorre oikóvo pe desiértore ha omaña mombyry hína. Ha upeichaháguinte oñembohesaʼi ha ohecha peteĩ mbaʼe ni ndogueroviaséiva. Upépe ohecha opuʼãha peteĩ torménta, péro ndahaʼéi oimehaichagua torménta. Upe jave ou peteĩ yvytu nórteguio ládo ha hatã oipeju chugui ijao ha iñakãrangue, ha haʼe ohecha ouha peteĩ arai tuichaitereíva. Pe arai mbytépe overa ha omimbipa, ha pe hendy lája omomanduʼa Ezequiélpe umi pláta ha óro oñembojeheʼa vaʼekuépe. * Amáske oñemoag̃ui pe arai Ezequiel oĩha gotyo, oñehendu peteĩ rruído hatã hatãve hyapúva, upe rruído ojogua peteĩ ehérsito guasu oúvape hína (Ezeq. 1:4, 24).

² Ezequiel oreko vaʼekue 30 áñorupi orekórõ guare upe visión. Upéva hína pe primera visión, péro upéi haʼe ohecha ha ohasáta kuri hetave mbaʼe ijojahaʼỹva. Haʼe oñandu ‘Jehová podér ouha hiʼári’, upéva hína Jehová espíritu sánto ipoderosoitéva. Upe espíritu rupive Ezequiel ohecha ha ohendu heta mbaʼe ijojahaʼỹva, iporãiteve ha isorprendentevéva umi efékto espesiál orekóvagui umi pelíkula koʼag̃agua. Pe visión ohecháva Ezequiel osorprendeterei chupe ha upévare haʼe oñesũ ha omboja hova yvýre (Ezeq. 1:3, 28).

 ³ Péro Jehová ndahaʼéi vaʼekue osorprendesénteva Ezequiélpe. Pe primera visión ohecha vaʼekue Ezequiel, ha avei entéro umi ótro visión igustoitereíva oĩva pe lívro de profesíape, oreko heta signifikádo iñimportánteva chupe g̃uarã ha Jehová siervokuéra koʼag̃aguápe g̃uarã. Upéicharõ, jahechamína koʼág̃a umi mbaʼe Ezequiel ohecha ha ohendu vaʼekue.

4, 5. ¿Mbaʼe situasiónpa oĩ vaʼekue Ezequiel ohechárõ guare pe visión?

⁴ (Elee Ezequiel 1:1-3). Jahechamína primero umi mbaʼe oiko vaʼekue Ezequiel ohechárõ guare upe visión. Upérõ áño 613 a.C. kuri, ha jahecha haguéicha pe ótro kapítulope, Ezequiel oĩ vaʼekue Babilóniape ha oiko umi ojegueraha vaʼekuéndi prisionéroramo pe rrío Kebar ypýpe. Amalisia upe rrío haʼe vaʼekue peteĩ kanál kuimbaʼekuéra ojapo vaʼekue ha ikatúvare ojeviaha. Ko rrío osẽ vaʼekue pe rrío Éufratesgui ha upéi oho jey oñeuni hese.

⁵ Jerusalén, umi ojegueraha vaʼekue prisionéroramo válle opyta 800 kilómetrorupi upégui. * Pe témplo oservi haguépe saserdóteramo Ezequiel túa, oñemongyʼa adorasión fálsape ha taʼanga ñemombaʼeguasu káusare. Pe tróno oĩva Jerusalénpe, upe oipuru vaʼekue David ha Salomón ogoverna hag̃ua tuicha podér reheve, koʼág̃a oiko chugui peteĩ ñemotĩ. Pe rréi Joaquín ndojeroviaietéva oĩ Babilóniape umi ojegueraha vaʼekuéndi prisionéro, ha Sedequías, pe oñemoĩ vaʼekue hekovia rréiramo, iñaña ha pe rréi de Babilonia omanda hese igustoitépe (2 Rey. 24:8-12, 17, 19).

6, 7. ¿Mbaʼérepa oiméne Ezequiel oñandu oikoha pe tiémpo ijetuʼuvéva ohasa vaʼekuépe?

⁶ Umi persóna ojeroviávape g̃uarã Ezequiel ojapo haguéicha, ko tiémpo oiméne rakaʼe la ijetuʼuvéva ohasa vaʼekue hekovépe.  Oiméne umi ótro oĩva avei prisionéroramo oñeporandu: “¿Jehová piko ñanderejáma voi pára siémpre? ¿Oime piko pe Babilonia ipoderóso ha iñañaitéva, orekóva hetaite dios fálso, ohundíta pe adorasión verdadéra oñemeʼẽva Jehovápe, ha oipeʼaitéta ko yvy ape árigui umi orrepresentávape igoviérno?”.

⁷ Reikuaámarõ upe situasión, ¿mbaʼére piko nereñepyrũi restudia neañoháme upe oiko vaʼekue ha elee umi mbaʼe Ezequiel omombeʼúva pe primera visión ohecha vaʼekuépe? (Ezeq. 1:4-28). Ha upekuévo, eñehaʼã eñemoĩ Ezequiel lugárpe, ehecha umi mbaʼe haʼe ohecháva ha ehendu umi mbaʼe haʼe ohendúva.

8. ¿Mbaʼépa ohecha vaʼekue Ezequiel visiónpe, ha mbaʼépa orrepresenta upéva?

⁸ ¿Mbaʼépa upe ohecha vaʼekue Ezequiel? Haʼete vaʼekue peteĩ kárro tuichaiterei ha ijojahaʼỹva. Oreko 4 rruéda tuichaitereíva ha umíva ykére oĩ 4 keruvín (Ezeq. 10:1). Umi keruvín ári ojepyso peteĩ píso de vídrio joguaha, overa asýva ha omimbipáva vídrioicha ha upéva ári oĩ Ñandejára tróno ijojahaʼỹva, ha Jehovaite voi oguapy upépe. Péro, ¿mbaʼépa orrepresenta vaʼekue upe kárro? Ezequiel visiónpe upe kárro katuete orrepresenta hína ko mbaʼe: Jehová organisasión ijojahaʼỹva, pe párte oĩva yvágape. ¿Mbaʼérepa ikatu jaʼe upéva? Jahechami mbohapy mbaʼe ohechaukáva upéva.

9. ¿Mbaʼérepa ikatu jaʼe Jehová odirihiha enterove umi ánhelpe haʼeramoguáicha peteĩ kárro?

 ⁹ Pe posisión Jehová orekóva ha umi ikeruvinkuéra. ¿Rehechakuaápa pe visiónpe Jehová tróno oĩha umi keruvín ári? La Bíbliape ótra pártepe heʼi avei Jehová oguapyha umi keruvín ári térã oĩha imbytepekuéra (elee 2 Reyes 19:15; Éx. 25:22; Sal. 80:1). Ñantende ningo Jehová añetehápe ndoguapyiha hína umi keruvín ári, oikotevẽramoguáicha ogueraha chupe umi keruvín ipoderosoitéva. Ha avei haʼe noikotevẽi peteĩ kárro okorre hag̃ua. Péro umi keruvín oapoja Jehová goviérno, ha haʼe ikatu omondo chupekuéra oimehápe pe univérsope okumpli hag̃ua ivolunta. Umi keruvín ha avei enterove umi ánhel orekóva Ñandejára, okumpli hína umi siérvoicha umi mbaʼe Jehová odesidíva (Sal. 104:4). Haʼe rupi igovernantekuéra, Ñandejára heʼi chupekuéra mbaʼépa ojapo vaʼerã. Upéicha rupi ikatu jaʼe Jehová odirihiha enterove umi ánhelpe haʼeramoguáicha peteĩ kárro. Ha upe kárro tuichaitévape, enterove umi ánhel oservi en unida.

10. ¿Mbaʼérepa ikatu jaʼe pe kárro yvagapegua ndahaʼeiha umi 4 keruvínpente orrepresentáva?

¹⁰ Pe kárro ndahaʼéi umi 4 keruvínpente orrepresentáva, síno hetave mbaʼe. Ezequiel ohecha vaʼekue ivisiónpe 4 keruvín. Upe número ojepuru jepi la Bíbliape ojeʼe hag̃ua álgo ikompletoha, térã ndofaltaiha chupe mbaʼeve. Upéicharõ ikatu jaʼe umi 4 keruvín orrepresentaha enterove umi ánhel iñeʼẽrendúvape Jehovápe. Avei umi rruéda ha umi keruvín henyhẽ teságui, ha upéva ohechauka oĩha hetave ojesarekóva oñatende hag̃ua, ha ndahaʼéi umi 4 keruvín  ojehecha vaʼekuénte. Ha pe Ezequiel heʼíva pe kárrore ohechauka tuichaitereiha, ha umi 4 keruvín ijojahaʼỹva opyta michĩeterei upe kárro rovake (Ezeq. 1:18, 22; 10:12). Upéicha avei Jehová organisasión, pe párte oĩva yvágape tuichaiterei, ha upévape oike heta mbaʼe, ndahaʼéi umi 4 keruvín añónte.

11. ¿Mbaʼeichagua visiónpa oreko vaʼekue avei Daniel, ha mbaʼépa ikatu jaʼe upévare?

¹¹ Daniel oreko vaʼekue avei peichagua visión yvágagui. Proféta Daniélpe ojegueraha vaʼekue prisionéroramo hetãgui ha oiko heta áño pe siuda de Babilóniape, ha oreko vaʼekue avei peteĩ visión pe yvágagui. Upe visiónpe haʼe ohecha avei Jehová tróno irruedapáva. Pe visión Daniel ohecha vaʼekuépe oñeñeʼẽve pe família espirituál tuichaitévare Jehová orekóva yvágape. Daniel ohecha oĩha “un millón [...] ha 100 millón” umi ánhel haʼéva Ñandejára raʼy oĩva Jehová renondépe. Haʼekuéra oforma hína peteĩ Trivunál yvagapegua, ha amalisia káda únope oñeasigna peteĩ lugár (Dan. 7:9, 10, 13-18). Upévare ikatu jaʼe pe kárro Ezequiel ohecha vaʼekue orrepresentaha avei upéva upe grúpo de ánhelpe.

12. ¿Mbaʼérepa ikatu jaʼe haʼeha peteĩ proteksión ñandéve g̃uarã jastudiáramo pe visión Ezequiel ohecha vaʼekueichagua?

¹² Jehová oikuaa haʼeha peteĩ proteksión ñandéve g̃uarã jajesarekóramo umi mbaʼe espirituálva rehe, umívape apóstol Pablo ohenói vaʼekue ‘umi mbaʼe ndaikatúiva jahecha’. ¿Mbaʼérepa? Pórke ñande ningo yvypóra, ha katuete ñapensaiterei jepi “umi mbaʼe ikatúvare jahecha”, umi mbaʼe ñanekevrantávare káda día, umíva ningo sapyʼaiteguánte hína (elee 2 Corintios 4:18). Satanás ningo oikuaa upéva, upéicha rupi ojapo ikatumíva entéro ñapensa meme hag̃ua umi deséo jarekóvare. Jehová katu mborayhúpe ñanepytyvõ ñandepuʼaka hag̃ua umívare. Upearã haʼe ojevale por ehémplo Ezequiel profesíare, ñanemomanduʼáva Jehová família yvagapegua tuichaitereiha.

13, 14. a) ¿Mbaʼépa heʼi vaʼekue Ezequiel umi rruéda ohecha vaʼekuére? b) ¿Mbaʼérepa Jehová tróno oreko rruéda?

¹³ Ñepyrũrã Ezequiel oñeʼẽ raẽ umi 4 keruvín rehe, ha upéi ko lívrope kapítulo 4-pe jahecháta mbaʼépa ñanemboʼe Jehovágui koʼã keruvín ha pe fórma orekóva hikuái. Péro koʼág̃a ñañeʼẽta umi 4 rruéda Ezequiel ohecha vaʼekuére ha oĩva umi keruvín ykére. Oiméne umíva oĩ raʼe 4 eskínape ha oforma peteĩ kuadrádo guasu (elee Ezequiel 1:16-18). Umi rruéda ojogua krisólitope, péva peteĩ ita iporãva ha itransparénteva, saʼyjúva térã saʼyju vérde léntova. Ko ita iporãitéva ningo omimbi voi.

¹⁴ Pe visión Ezequiel ohecha vaʼekuépe ojehechauka iñimportanteha umi rruéda orekóva pe kárro. Ajépa iñextráño peteĩ tróno orekóva rruéda. Ñande ñapensa jepi peteĩ tróno oĩha fihoite peteĩ lugárpe. Ha upéva oĩ porã, pórke umi governánte omanda iterritóriopente ha ndohasái jepi upéva. Péro Jehová goviérno idiferentete voi yvyporakuéra goviérnogui. Upéi Ezequiel ohecháta kuri  ndaiporiha límite Jehová goviérnope g̃uarã térã ipodérpe g̃uarã (Neh. 9:6). ¡Jehová ningo peteĩ Rréi ikatúva oipuru ijautorida oimeraẽ lugárpe!

15. ¿Mbaʼe mbaʼépa heʼi Ezequiel umi rruédare?

¹⁵ Ezequiel ohecharamoiterei mbaʼeichaitépa tuicha umi rruéda. Haʼe oskrivi: “Umi illantakuéra ningo ijyvatetereígui oporomongyhyje”. Ñande ikatu ñañeimahina Ezequiel ojovayvaha hína omaña hag̃ua umi rruéda tuichaitévare, omimbipáva ha ijyvatetereíva, haʼetévaicha voi ohupytýva pe yvága. Haʼe omombeʼu avei peteĩ mbaʼe iñinteresánteva: “Umi 4 llántare oĩ hetaiterei tesa pe ijerére kompletoite”. Oiméne pe iñinteresanteve vaʼekue mbaʼe fórmapa oreko umi rruéda. Haʼe heʼi: “Umi rruéda ojejapo lája haʼete peteĩ rruéda oĩva ótro rruéda kuápe”. ¿Mbaʼépa heʼise upéva?

16, 17. a) ¿Mbaʼérepa umi rruéda oĩ ótro rruéda kuápe? b) ¿Mbaʼéichapa umi rruéda ohechauka pe kárro ikatuha okambia de direksión?

¹⁶ Oiméne káda rruéda Ezequiel ohecha vaʼekue añetehápe haʼe vaʼekue mokõi rruéda oĩva ojokuápe, péro káda rruéda oapunta diferénte direksiónpe ha peteĩ éhente oreko. Upévare umi rruéda ikatu ojapo umi mbaʼe Ezequiel heʼi vaʼekue: “Orroda jave ikatu oho oimeha gotyo umi 4 direksiónpe ha natekotevẽi ojevolea okambia hag̃ua de direksión”. ¿Mbaʼépa ohechauka ñandéve koʼã rruéda pe kárro yvagapeguáre Ezequiel ohecha vaʼekue?

¹⁷ Peichagua rruéda tuicháva ningo ikatu oho mombyryeterei peteĩ vuéltapente. Hiʼarive pe visiónpe heʼi pe kárro pyaʼeterei ohoha, umi rrájoicha voi (Ezeq. 1:14). Avei ojejapo lája umi 4 rruéda ndaijojahái, pórke ikatu okambia de direksión, upéva oiméne umi inheniéro ojaposeterei avei péro ndaikatúi. Ko kárro okambia hag̃ua de direksión natekotevẽi oho mbegueve térã ojere. Péro upéva ndeʼiséi ndoikuaaiha moõ gotyopa oho. Umi rruédare oĩ hetaiterei tesa ha upéva ohechauka upe kárro ohechaha entéro mbaʼe oĩva ijerére, tahaʼe haʼéva direksiónpe.

18. Umi rruéda orekóva pe kárro ningo tuicha ha henyhẽ teságui, ¿mbaʼépa ñanemboʼe upéva?

¹⁸ Upéicharõ, ¿mbaʼépa Jehová omboʼese raʼe Ezequiélpe ha enterove isiervokuéra iñeʼẽrendúvape iñorganisasióngui, pe párte oĩvagui yvágape? Ñanemanduʼamíta umi mbaʼe jahecháma vaʼekuére koʼa peve. Jehová organisasión yvagapegua tuichaiterei ha ndaijojahái, tuicha ha omimbiháicha umi rruéda tuichaitéva ñañeʼẽ vaʼekuére. Ohecha entéro mbaʼe oikóva, ohechaukaháicha umi rruéda henyhẽtéva teságui. Jehová resakuéra ningo ohecha opaite mbaʼe (Prov. 15:3; Jer. 23:24). Jehová oreko avei miles de millones umi ánhel oservíva chupe. Haʼe ikatu omondo chupekuéra oimehápe ko univérsope, ha haʼekuéra ikatu ohecha entéro mbaʼe oikóva ha omombeʼu jey hikuái upéva Igovernántepe (elee Hebreos 1:13, 14).

19. Pe kárro ningo ipyaʼeterei ha ikatu sapyʼaitépe okambia de direksión, ¿mbaʼépa ñanemboʼe upéva Jehovágui ha iñorganisasióngui, pe párte oĩvagui yvágape?

¹⁹ Avei pe kárro ipyaʼeterei ha ikatu sapyʼaitépe okambia de direksión. Ñapensamínte mbaʼeichaitépa idiferénte Jehová organisasión yvagapegua umi yvyporakuéra goviérnogui, institusión ha organisasióngui. Koʼãva ningo ndaikatúi osolusiona umi provléma oĩva ko  múndope, haʼekuéra ndaikatúi okambia ojadapta hag̃ua umi situasión okambia jave, amo ipahápe odesidi vai hikuái ha upévare ohupyty chupekuéra heta mbaʼe vai. Péro Jehová omaneha ikárro, ha haʼe hína peteĩ Dios ikatúva okambia opensa lája asegún pe situasión oñepresentáva. Ha héra voi ohechaukaháicha, haʼe ikatu okambia tekotevẽramo okumpli hag̃ua ivolunta (Éx. 3:13, 14). Por ehémplo, haʼe pyaʼe ikatu okambia ha oiko chugui peteĩ Gerréro ipoderósova oñorairõva odefende hag̃ua ipuévlope. Peteĩ tesapirĩme ikatu okambia jey oiko hag̃ua chugui peteĩ Dios operdonáva ha okonsoláva umi pekadór oñembyasývape ha oñarrepentívape (Sal. 30:5; Is. 66:13).

20. ¿Mbaʼérepa ñamombaʼeterei vaʼerã Jehová kárro yvagapegua?

²⁰ Koʼa peve, pe visión ohecha vaʼekue Ezequiel ikatu ñanemomýi ñañeporandu hag̃ua: “¿Añetehápepa amombaʼeterei Jehová kárro yvagapegua?”. Ñanemanduʼa vaʼerã pe kárro orrepresentaha peteĩ mbaʼe oikóva hína ñane tiémpope. Arakaʼeve nañapensái vaʼerã Jehová, Itaʼýra ha enterove umi ánhel ndohechaiha umi provléma ñanembohasa asýva ha ñanemokangýva. Ndovaléi jajepyʼapy ñapenságui Jehová otardataha omeʼẽ hag̃ua ñandéve ñaikotevẽva, térã iñorganisasión ndaikatumoʼãiha ojadapta umi kámbio pyʼỹi oikóvare ko múndope. Ñanemanduʼa vaʼerã Jehová organisasión siémpre ombaʼapoha, núnka ndopytái. Ezequiel ningo ohendu voi kuri oñeʼẽva yvága guive ha heʼíva: “¡Perrodáke!”. Ha upéva ohechauka oñemandaha umi rruédape okuʼe hag̃ua (Ezeq. 10:13). ¡Ajépa ñamombaʼete jahecha haguére mbaʼéichapa Jehová odirihi iñorganisasión! Péro opa mbaʼe ári, upe ñanesorprendevéva haʼe Jehovaite voi.

21, 22. ¿Mbaʼépa oipytyvõ pe kárrope oiko hag̃ua? Emyesakã.

²¹ Upéi Ezequiel ojesareko umi mbaʼe oĩvare umi rruéda ári. Haʼe ohecha upépe “peteĩ píso de vídrio joguaha, overa asýva ha omimbipáva vídrioicha” (Ezeq. 1:22). Umi keruvín ári ojepyso peteĩ píso tuicháva, omimbi ha ñanesorprendéva. Péro ko pártepe peteĩ ontendéva mekánika ikatu oñeporandu heta mbaʼe pe kárrogui, por ehémplo: “¿Mbaʼépa ojoko pe píso umi rruéda ári? ¿Ha mbaʼéicha piko umi rruéda oikóta ndorekóiramo peteĩ éhe ombojoajúva chupekuéra?”. Ñanemanduʼa vaʼerã pe kárro nodependeiha umi léi físikare, pe kárro ningo simbóliko ha orrepresenta pe oikóva pe lugár oikohápe umi espíritu. Avei ñañatende vaʼerã koʼápe heʼívare: “Pe espíritu omomýiva umi keruvínpe omomýi avei umi rruédape” (Ezeq. 1:20, 21). ¿Mbaʼe espíritupa hína upe omomýiva umi keruvínpe ha umi rruédape?

²² Upéva katuete haʼe hína Jehová espíritu sánto, pe fuérsa ipoderosovéva oĩva ko univérsope. Upe espíritu sánto omomýi pe kárro,  ombojoaju ojuehe umi párte orekóva ha ogoverna káda movimiénto ojapóva. Koʼág̃a jahecha jeýta mávapa Upe odirihíva pe kárro.

23. ¿Mbaʼe palávrapa oipuru Ezequiel oñeʼẽ hag̃ua Jehováre, ha mbaʼérepa?

²³ (Elee Ezequiel 1:26-28). Pe visión Ezequiel ohecha vaʼekuépe, haʼe oipuru jepi umi palávra “ojoguáva”, “haʼete”, ha “haʼete voi”. Péro koʼã versíkulope haʼe oipuru hetave vése koʼã palávra. Amalisia Ezequiel ndotopái umi palávra ikatúva omyesakã porã umi mbaʼe ohecháva. Haʼe ohecha “peteĩ mbaʼe ojoguáva safírope, ha haʼete peteĩ tróno”. ¿Ikatúpa ñañeimahina peteĩ tróno ojejapóva peteĩ ita guasúgui, peteĩ safíro ikolór hovyetévagui? Ha upépe oguapy hína peteĩ Persóna iñimportantetereíva, “peteĩ ojoguáva yvypórape”.

24, 25. a) ¿Mbaʼépa ñanemomanduʼa pe árko íris ojeréva Jehová trónore? b) ¿Mbaʼépa ojapo vaʼekue avei umi ótro proféta orresivírõ guare umi visión?

²⁴ Ndaikatúi vaʼekue ojehecha porã upe Persóna iñimportantetévape, pórke Jehovágui osẽ upe haʼetéva tata, ikuʼágui yvy gotyo ha yvate gotyo. Ikatu voi ñañeimahina pe profétape oñembohesaʼívo ohecha hag̃ua, omimbipa rupi upe mbaʼe ohecháva hína. Upéi Ezequiel ohecha peteĩ mbaʼe ijojahaʼỹva omohuʼãva pe visión: “Overapa ijerére kompletoite, haʼete voi peteĩ árko íris osẽva pe araíre oky jave”. Ajépa ñanemopirĩmba jepi jahechávo peteĩ árko íris. ¡Péva ñanemomanduʼa mbaʼeichaitépa ipoderóso ha ndaijojahái  ñande Apohare! Upe árko íris ikolór porãitéva ha ñanetrankilisáva, ñanemomanduʼa avei pe kompromíso de paz Jehová ojapo vaʼekuére pe dilúvio rire (Gén. 9:11-16). Jehová ningo haʼe hína Ñandejára Todopoderóso, péro haʼe avei pe Ñandejára omeʼẽva pyʼaguapy (Heb. 13:20). Pe pyʼaguapy ningo henyhẽ Jehová korasõme, ha enterove isiervokuéra ifiélva oreko avei pe pyʼaguapy.

²⁵ ¿Mbaʼépa ojapo raʼe Ezequiel ohechárõ guare pe visiónpe mbaʼeichaitépa Jehová tuicha? Ezequiel omombeʼu: “Ahechárõ guare upéva, añesũ ha amboja che rova yvýre”. Ezequiel orrespeta ha omombaʼeterei rupi Ñandejárape ipyʼaite guive, oñesũ pe yvýpe. Umi ótro proféta ojapo vaʼekue avei upéicha orresivírõ guare umi visión Jehovágui. Katuete oiméne haʼekuéra oñesorprendeterei rakaʼe, ha ohechakuaa michĩetereiha hikuái Ñandejára rovake (Is. 6:1-5; Dan. 10:8, 9; Apoc. 1:12-17). Péro tiémpo rire, upe Jehová ohechauka vaʼekue umi visiónpe, omombarete chupekuéra. Ha Ezequiel oiméne oñeñandu rakaʼe avei upéicha. Ha ñande, ¿mbaʼéichapa ñañeñandu jalee jave la Bíbliape koʼãichagua mbaʼe?

26. ¿Mbaʼérepa pe visión oiméne omombarete rakaʼe Ezequiélpe?

²⁶ ¿Oime piko Ezequiel ojepyʼapyeterei térã oñekevranta rakaʼe pe situasión ohasávare Ñandejára puévlo Babilóniape? Oiméramo upéicha, upe visión omombareténe raʼe chupe. ¿Mbaʼérepa? Pórke toĩ oĩháme Ñandejára puévlo iñeʼẽrendúva chupe, tahaʼe Babilóniape, Jerusalénpe térã oimeraẽ ótro lugárpe, haʼekuéra núnka noĩmoʼãi peteĩ lugár ndaikatumoʼãihápe og̃uahẽ Jehová kárro ijojahaʼỹva. Satanás ndaikatúi ojapo mbaʼeve ipuʼaka hag̃ua Ñandejárare, pe odirihíva hína pe organisasión ndaijojaháiva yvagapegua (elee Salmo 118:6). Ezequiel ohecha vaʼekue avei pe kárro yvagapegua noĩriha mombyry yvyporakuéragui. Añetehápe umi rruéda orekóva pe kárro oja voi pe yvýre (Ezeq. 1:19). Upéicharõ, Jehová ojepyʼapyeterei vaʼekue ipuévlo iñeʼẽrendúvare oĩva prisionéroramo Babilóniape. Haʼekuéra núnka noĩri vaʼekue mombyry Jehovágui, haʼe siémpre oñangareko hesekuéra mborayhúpe peteĩ túaicha.

27. ¿Mbaʼérepa iñimportánte ñandéve g̃uarã koʼág̃arupi pe visión ohecha vaʼekue Ezequiel?

²⁷ ¿Iñimportánte piko ñandéve g̃uarã koʼág̃arupi pe visión ohecha vaʼekue Ezequiel? ¡Katuete ningo iñimportánte! Ñanemanduʼa vaʼerã Satanás kontinuadoite oatakaha hína pe adorasión verdadéra oñemeʼẽva Jehovápe. Satanás oipotaiterei ñapensa ñaimeha ñaneaño, ha mombyry voi oĩha ñandehegui ñande Ru yvagapegua ha iñorganisasión. Aníkena arakaʼeve jaguerovia umichagua japu, ani jaheja umíva oike ñane akãme ha ñane korasõme (Sal. 139:7-12). Ezequiel rehe oiko haguéicha, ñande avei ikatu japyta ñañesorprendeterei. Ikatu añete ñande nañañesũi ni nañambojái ñande rova yvýre haʼe ojapo haguéicha. Péro katuete ñamombaʼeterei ha ñanemopirĩmba  umi mbaʼe ñaaprendéva Jehová organisasióngui, pe párte oĩvagui yvágape. Jahecharamoiterei mbaʼeichaitépa ko organisasión ipoderóso, omimbipa, ipyaʼe, ikatu okambia de direksión ha ojadapta asegún umi situasión.

28, 29. ¿Mbaʼépa ohechauka Jehová kárro okuʼe hague oikóvo umi 100 áño ohasa vaʼekuépe?

²⁸ Ñanemanduʼa vaʼerã avei Jehová organisasión orekoha peteĩ párte oĩva ko yvy ape ári. Añetehápe ningo upe pártepe oĩ yvyporakuéra iñimperféktova, péro ñapensamíntena mbaʼe mbaʼépa Jehová ojapo hína ko yvy ape ári. Opárupi ko múndope, Jehová oipytyvõ yvyporakuérape ojapo hag̃ua umi mbaʼe arakaʼeve ndaikatumoʼãiva ojapo ijehegui rei (Juan 14:12). Ñamañamíntena pe lívro héravare ¡Ñandejára Rréino ogovernáma!, ha ñanemanduʼáta umi mbaʼe ojehupytýmava predikasiónpe umi 100 áño ohasa vaʼekuépe. Avei ikatu ñanemanduʼa ojehupytyha hetaiterei mbaʼe Jehová organisasiónpe, por ehémplo mbaʼéichapa Jehová omboʼe ipuévlope, oñegana heta káso legál ha ojepuru umi teknolohía osẽ ramóva oñekumpli hag̃ua Ñandejára volunta.

²⁹ Oñemohuʼãvo ohóvo ko múndo aña ára paha, jahechakuaa Jehová kárro pyaʼeterei okuʼeha, pórke hetaiterei mbaʼéma ojejapo ojeadora jey hag̃ua Jehovápe haʼe oipotaháicha. Tuichaiterei priviléhio ningo ñandéve g̃uarã ñaime ko organisasiónpe ha jaservi Ñandejára ogovernávape opa mbaʼe (Sal. 84:10).

30. ¿Mbaʼépa jahecháta pe kapítulo oúvape?

³⁰ Pe visión ohecha vaʼekue Ezequiel ñanemboʼéta gueteri hetave mbaʼe. Pe kapítulo oúvape, ñaaprendevéta umi 4 keruvíngui. ¿Mbaʼépa ñanemboʼe hikuái Ñandejára Jehová ogovernávagui opa mbaʼe?