1-3. (a) Basi zẹẹmẹ nuhe Ezekiẹli mọ bosọ sè lẹ tọn. (Pọ́n yẹdide he tin to bẹjẹeji hosọ ehe tọn.) (b) Huhlọn tẹwẹ to godona numimọ he Ezekiẹli mọ lọ, podọ nawẹ enẹ yinuwadeji gbọn?

EZEKIẸLI to nupọn tlintlin hlan olá, yèdọ zẹ̀ dankló gblagada he gọ́ na kọ́gudu lọ go. E miọn nukun etọn lẹ yẹẹ whẹ́ bo wá hùn yé gblegede. E vẹawuna ẹn taun nado yí nuhe mọ e te sè. Pọ́n, yujẹhọn sinsinyẹn de to awuwle ja sọn olá. Amọ́, e ma yin yujẹhọn depope poun. Dile jẹhọn ahizi de fọ́n sọn agewaji bo to yìnyìn gbọn oda etọn lẹ mẹ bosọ to awù etọn fú, e mọ aslọ daho blibata he yiaga taun de hlan. Miyọ́n sisẹ́ de to gbigbòdlán sọn aslọ lọ ṣẹnṣẹn podọ sisẹ́ etọn hẹn ẹn flin lehe ogàn akuẹgegenu tọn de nọ sẹ́ to miyọ́n mẹ do. * Dile aslọ lọ to tẹnsẹ po awuyiya po ja Ezekiẹli dè, ewọ to nudidọ daho he fọ́n bo to sinsinyẹn deji de sè—yèdọ zingidi he taidi awhànpa daho he to awhànfọ de de tọn.—Ezek. 1:4, 24.

² Tintan niyẹn to numimọ ayidego tọn debọdo-dego he dẹpẹ he tindo nudi owhe 30 ehe na mọ lẹ mẹ. E mọdọ “huhlọn Jehovah tọn,” yèdọ huhlọn gbigbọ wiwe Jehovah tọn he nkọ ma pé awe tin to emi ji. Nuhe gbigbọ enẹ na wá hẹn ẹn nado mọ bosọ sè lẹ jiawu taun, bo sẹhundaga tlala hú nudepope he gbẹtọ lẹ sọgan wleawuna nado hẹn awuji mẹ to sinima egbezangbe tọn lẹ  mẹ. Nuhe Ezekiẹli mọ húagbọ́ ẹ sọmọ bọ e họ́jai bo ṣinyọ́n nukunmẹ ai.—Ezek. 1:3, 28.

³ Ṣigba, yanwle Jehovah tọn ma yin nado hẹn awuji dawe ehe poun. Numimọ tintan Ezekiẹli tọn—kẹdẹdi devo he yin kinkandai to owe dọdai tọn he fọnjlodotenamẹ enẹ mẹ lẹ—gọ́ na zẹẹmẹ susu na ewọ podọ na devizọnwatọ nugbonọ Jehovah tọn lẹ to egbehe. Enẹwutu, mì gbọ mí ni yí sọwhiwhe do gbadopọnna nuhe Ezekiẹli mọ bo sè lẹ.

4, 5. Ninọmẹ tẹlẹ mẹ wẹ Ezekiẹli mọ numimọ etọn te?

⁴ Hia Ezekiẹli 1:1-3. Jẹnukọn whẹ́, mì gbọ mí ni flin lẹdo nujijọ lọ tọn. Owhe 613 J.W.M. wẹ. Dile mí mọ to weta he wayi mẹ do, Ezekiẹli tin to Babilọni to kanlinmọ hatọ etọn lẹ ṣẹnṣẹn to lẹdo de mẹ to tọ̀sisa Kẹbali tọn kọ̀n—yèdọ tándo he mẹ tọjihun gán gbọn de he na ko yin kùnkùn gbọn gbẹtọ dali, ehe zẹ̀alà sọn tọ̀sisa Euflate go to awà de ji bo wá ṣá dopọ hẹ ẹ to awà devo ji.

⁵ Fie kanlinmọ lọ lẹ wá sọn, yèdọ Jelusalẹm dẹn do finẹ na nudi kilomẹtlu 800. * Tẹmpli he mẹ otọ́ Ezekiẹli tọn sẹ̀n taidi yẹwhenọ te ko lẹzun nọtẹn walọ gblezọn po boṣiọ-sinsẹ̀n po tọn. Ofìn gigonọ he ji Davidi po Sọlomọni po dugán te wayi to Jelusalẹm ko lẹzun aṣagbọ́nu todin. Ahọlu Jehoiakini he ma yin nugbonọ lọ lọsu tin to Babilọni hẹ kanlinmọ lọ lẹ. Mẹjẹmẹtẹnmẹ etọn Zedekia ma yin nudevo de hú alọnugbọvi podọ kanylantọ de poun.—2 Ahọ. 24:8-12, 17, 19.

6, 7. Naegbọn ojlẹ he mẹ Ezekiẹli nọgbẹ̀ te sọgan ko taidi ojlẹ zinvlu tọn de na ẹn?

⁶ Na gbẹtọ nugbonọ Ezekiẹli nkọ de, ojlẹ enẹ na ko taidi ojlẹ zinvlu gọ́ngọ́n tọn de. Delẹ to kanlinmọ hatọ etọn lẹ mẹ sọgan  ko nọ kanse yede dọ: ‘Jehovah ko jo mí do petepete wẹ ya? Be gandudu ylankan Babilọni tọn ehe po yẹwhe lalo madosọha etọn lẹ po na sukúndona sinsẹ̀n-bibasi wiwe-ṣeke Jehovah tọn bo de gandudu etọn sẹ̀ sọn aigba ji nugbonugbo wẹ ya?’

⁷ Po nudọnamẹ ehelẹ po to ayiha mẹ, naegbọn a ma na bẹ oplọn mẹdetiti tọn towe jẹeji do hosọ ehe ji gbọn zẹẹmẹ họnwun he Ezekiẹli basi gando numimọ tintan etọn go hihia dali? (Ezek. 1:4-28) Dile a to mọwà, tẹnpọn bo ze dewe do otẹn Ezekiẹli tọn mẹ bo mọ nuhe e mọ lẹ bosọ sè nuhe e sè lẹ.

8. Etẹwẹ Ezekiẹli mọ to numimọ mẹ, podọ etẹwẹ e nọtena?

⁸ To bladopọ mẹ, etẹwẹ Ezekiẹli mọ? E mọ nuhe taidi tẹnsẹnamẹnu jiawu blibata de, he yin zẹẹmẹ-basina taidi osọ́-kẹkẹ de. Tẹnsẹnamẹnu lọ tindo kẹkẹfọ daho-gbó ẹnẹ bọ mẹdida gbigbọnọ dabla ẹnẹ he wá yin yiylọ to nukọn mẹ dọ kelubimi lẹ to apá na yé. (Ezek. 10:1) Nudi oplò kavi dovlomẹ gblagada he taidi osin-agó de tin to aga na yé bọ ofìn gigonọ Jiwheyẹwhe tọn tin to e ji, podọ Jehovah lọsu to aisinsin to e ji! Ṣigba, etẹwẹ osọ́-kẹkẹ enẹ nọtena? Onú dopo gee wẹ nuhe Ezekiẹli mọ lọ sọgan nọtena po gbesisọ po: enẹ wẹ adà olọn mẹ tọn titobasinanu gigonọ Jehovah tọn. Naegbọn mí do dọ mọ? Onú atọ̀n delẹ die he hẹn mí wá tadona enẹ kọ̀n.

9. Nawẹ kanṣiṣa he to Jehovah po nudida olọn mẹ tọn etọn lẹ po ṣẹnṣẹn sọgan yin yiyijlẹdo tẹnsẹnamẹnu de go gbọn?

 ⁹ Kanṣiṣa he to Jehovah po nudida olọn mẹ tọn etọn lẹ po ṣẹnṣẹn. Doayi e go dọ to numimọ ehe mẹ, ofìn Jehovah tọn tin to aga na kelubimi lẹ. To wefọ devo lẹ mẹ, Ohó Jiwheyẹwhe tọn basi zẹẹmẹ Jehovah tọn to aliho dopolọ mẹ taidi mẹhe sinai do ofìn ji to aga na kelubimi lẹ kavi to ṣẹnṣẹn yetọn. (Hia 2 Ahọlu lẹ 19:15; Eks. 25:22; Salm. 80:1) E họnwun dọ e ma nọ sinai to aga na kelubimi etọn lẹ to aliho tlọlọ tọn mẹ—taidi dọ e tindo nuhudo dọ nudida gbigbọnọ huhlọnnọ enẹlẹ ni hẹn ẹn wẹ nkọ—mọjanwẹ e masọ do hudo osọ́-kẹkẹ paa de tọn nado sẹtẹn do niyẹn. Ṣigba, kelubimi lẹ nọ nọgodona nupojipetọ-yinyin etọn podọ e gán do yé hlan fidepope to wẹkẹ lọ mẹ nado hẹn ojlo etọn taidi Nupojipetọ di. Kẹdẹdi angẹli wiwe Jiwheyẹwhe tọn he pò lẹpo, kelubimi lẹ nọ hẹn nuhe Jehovah magbe etọn lẹ di taidi lizọnyizọnwatọ kavi wẹnsagun etọn lẹ. (Salm. 104:4) Linlẹn enẹ mẹ wẹ Jehovah nọ “nọ̀ aga” na yemẹpo te, dile e yí aṣẹpipa Nupojipetọ tọn etọn do to anadena yé, taidi dọ tẹnsẹnamẹnu daho de wẹ yemẹpo yin to pọmẹ.

10. Etẹwẹ dohia dọ e ma yin kelubimi ẹnẹ poun wẹ osọ́-kẹkẹ olọn mẹ tọn lọ na ko bẹhẹn?

¹⁰ Tẹnsẹnamẹnu lọ nọtena nususu hú kelubimi lẹ kẹdẹ. Kelubimi ẹnẹ wẹ Ezekiẹli mọ. Sọha enẹ nọ saba yin yiyizan to Biblu mẹ nado do zẹ́nsisọ kavi gigọ́-yinyin nude tọn hia—yèdọ nado dlẹnalọdo nude he gando mẹlẹpo go. Enẹwutu, e sọgbe nado dọ dọ kelubimi ẹnẹ he sọawuhia lọ lẹ ze afọ visunnu gbigbọmẹ tọn nugbonọ  Jehovah tọn lẹpo tọn dai. Sọ doayi e go dọ kẹkẹfọ lọ lẹ podọ etlẹ yin kelubimi lọ lẹpo wẹ gọ́ na nukun lẹ lẹdo pé, yèdọ yẹhiadonu aṣejininọ sinsinyẹn tọn de he zẹ̀ mẹdida gbigbọnọ ẹnẹ he sọawuhia lọ lẹ kẹdẹ tọn go. Podọ zẹẹmẹ he Ezekiẹli basi gando tẹnsẹnamẹnu lọ go dohia dọ e klo sọmọ bọ kelubimi jiawu enẹlẹ lọsu whè to nukọn etọn. (Ezek. 1:18, 22; 10:12) Mọdopolọ, adà olọn mẹ tọn titobasinanu Jehovah tọn gbloada taun bo bẹ nususu hẹn hú kelubimi ẹnẹ poun.

11. Numimọ mọnkọ tẹwẹ Daniẹli mọ, podọ tadona tẹ kọ̀n wẹ enẹ hẹn mí wá?

¹¹ Numimọ mọnkọ he Daniẹli mọ gando olọn go. Yẹwhegán Daniẹli nọgbẹ̀ to kanlinmọgbenu-ninọ owhe susu tọn lọ whenu to tòdaho Babilọni tọn mẹ, podọ ewọ lọsu mọ numimọ de gando olọn go. E jẹna ayidego dọ to numimọ enẹ lọsu mẹ, ofìn Jehovah tọn tindo kẹkẹfọ lẹ. Numimọ Daniẹli tọn dọ̀n ayidonugo wá obá he mẹ whẹndo gbigbọmẹ tọn Jehovah tọn he to olọn mẹ gbloada jẹ ji. Daniẹli mọ bọ “fọtọ́n donu fọtọ́n . . . podọ fọtọ́n ao donu fọtọ́n ao” ovi gbigbọmẹ tọn Jiwheyẹwhe tọn lẹ tọn ṣite to Jehovah nukọn. Yé sinai to pọmẹ taidi Whẹdatẹn olọn mẹ tọn de, bọ dopodopo yetọn tin to otẹn he yin didena ẹn mẹ. (Dan. 7:9, 10, 13-18) Be e ma taidi nuhe sọgbe hẹ lẹnpọn dagbe nado wá tadona kọ̀n dọ pipli gbigbọmẹ tọn gigonọ enẹ dopolọ wẹ nuhe Ezekiẹli mọ to numimọ mẹ lọ nọtena ya?

12. Naegbọn e do nọ yin hihọ́ de na mí nado plọn adà Owe-wiwe tọn delẹ taidi dehe gando osọ́-kẹkẹ olọn mẹ tọn he Ezekiẹli mọ lọ go?

¹² Jehovah yọnẹn dọ hihọ́ de wẹ e nọ yin na míwu gbẹtọvi lẹ nado ze ayiha do onú jọnun gbigbọmẹ tọn lẹ ji—yèdọ nuhe apọsteli Paulu ylọdọ “nuhe ma nọ yin mimọ lẹ.” Etẹwutu? Na mí yin nudida he tindo agbasalan lẹ wutu, mí nọ tindo ayilinlẹn lọ nado ze ayiha do “nuhe nọ yin mimọ lẹ” ji, yèdọ ahunmẹdunamẹnu agbasa tọn mítọn lẹ he nọ nọ̀ aimẹ na ojlẹ gli de poun. (Hia 2 Kọlintinu lẹ 4:18.) Satani nọ saba yí ayilinlẹn enẹ zan nado tẹnpọn bo hẹn mí zun gbẹtọ agbasanọ lẹ. Na mí nido penugo nado duto kọgbidinamẹ enẹ ji, Jehovah gbọn owanyi dali wleawuna kandai delẹ, taidi dehe to dọdai Ezekiẹli tọn mẹ ehe nado flinnu mí to aliho ojlofọndotenamẹ tọn mẹ dọ whẹndo gigonọ olọn mẹ tọn Jehovah tọn jiawu taun!

13, 14. (a) Nawẹ Ezekiẹli basi zẹẹmẹ kẹkẹfọ he e mọ lẹ tọn gbọn? (b) Naegbọn e do sọgbe dọ osọ́-kẹkẹ Jehovah tọn ni tindo kẹkẹfọ lẹ?

¹³ To tintan whenu, Ezekiẹli ze ayidonugo do kelubimi ẹnẹ lẹ ji. To Weta 4tọ owe ehe tọn mẹ, mí na mọ nuhe mẹdida enẹlẹ po awusọhia jiawu yetọn po plọn mí gando Jehovah go. Ṣigba, Ezekiẹli mọ kẹkẹfọ ẹnẹ lọ lẹ to apá na kelubimi lọ lẹ, yèdọ to agosu ẹnẹ mẹ sọmọ bọ yé wleawuna adà blibata de he sọzẹn to awà ẹnẹ lẹpo ji. (Hia Ezekiẹli 1:16-18.) E taidi dọ klisọlite wẹ yè do wleawuna yé, yèdọ zannu họakuẹ de he sọgan ko tindo sinmẹ koklo-jonọ kavi koklo-jo flusọ́ hẹ amamú tọn bo nọ to sisẹ́ mlanmlan. Sisẹ́ núzinzan whanpẹnọ ehe tọn jẹna ayidego.

 ¹⁴ Numimọ Ezekiẹli tọn dọ̀n ayidonugo wá kẹkẹfọ osọ́-kẹkẹ lọ tọn lẹ ji taun. Etẹ nkọ, nuhe ma yá mimọ de wẹ! Yèdọ ofìn de he tindo kẹkẹfọ lẹ! Linlẹn he mí nọ saba tindo gando ofìn de go to jọwamọ-liho wẹ yindọ otẹn dopo mẹ wẹ e nọ yin didoai do, na fie gandutọ aigba ji tọn lẹ sọgan dlẹnkanna aṣẹpipa yetọn jẹ tindo dogbó. Ṣigba, nupojipetọ-yinyin Jehovah tọn gbọnvona gandudu gbẹtọvi tọn taun. Dile Ezekiẹli na wá mọ do, huhlọn Jehovah tọn taidi Nupojipetọ ma tindo dogbó. (Nẹh. 9:6) Na taun tọn, Nupojipetọ ehe gán yí aṣẹpipa etọn zan to fidepope!

15. Etẹ go wẹ Ezekiẹli doayi gando kiklo kẹkẹfọ lọ lẹ tọn po lehe yé yin awuwlena do po go?

¹⁵ Kiklo kẹkẹfọ lọ lẹ tọn hẹn awuji Ezekiẹli. E wlan dọmọ: “Agbá kẹkẹfọ lọ lẹ tọn yiaga sọmọ bo jiawu.” Mí gán yí nukun homẹ tọn do pọ́n Ezekiẹli dile e jlọkọ̀ dẹẹdẹ bo to lehe agbá daho blibata he to sisẹ́ lọ lẹ jlọ pànta agahomẹ do pọ́n. E sọ yí zẹẹmẹ he fọnjlodotenamẹ ehe dogọ dọmọ: “Agbá [kẹkẹfọ] ẹnẹ lọ lẹpo tọn wẹ gọ́ na nukun lẹ lẹdo pé.” Amọ́, nuhe na ko sọ dọ̀n ayidonugo hú ehe lẹpo wẹ aliho jiawu he mẹ kẹkẹfọ lọ lẹ yin awuwlena te. Ezekiẹli basi zẹẹmẹ dọmọ: “Awusọhia yetọn po aliho he mẹ yé yin awuwlena te po nọ taidi dọ kẹkẹfọ de tin to devo mẹ wẹ nkọ.” Etẹwẹ enẹ zẹẹmẹdo?

16, 17. (a) Linlẹn tẹ mẹ wẹ kẹkẹfọ osọ́-kẹkẹ lọ tọn lẹ sọawuhia taidi dọ ode tin to devo mẹ te? (b) Nawẹ kẹkẹfọ lọ lẹ do obá he mẹ tẹnsẹnamẹnu Jehovah tọn yọ́n anadena jẹ hia gbọn?

¹⁶ E họnwun dọ kẹkẹfọ dopodopo he Ezekiẹli mọ nọ yin kẹkẹfọ awe topọ, bọ ode nọ ján do awetọ go to ṣẹnṣẹn dile yé topọ gbanun-gbanun. Nuhe zọ́n niyẹn bọ kẹkẹfọ lọ lẹ sọgan nọ sẹtẹn dile Ezekiẹli basi zẹẹmẹ etọn do dọmọ: “Eyin yé sẹtẹn, yé ma nọ lilẹ́ whẹpo do yì fidepope to adà ẹnẹ lọ lẹ mẹ.” Etẹwẹ kẹkẹfọ ehelẹ dohia gando tẹnsẹnamẹnu olọn mẹ tọn he Ezekiẹli mọ lọ go?

¹⁷ Eyin kẹkẹfọ he yiaga sọmọ lẹ tlẹ bli whladopo tata, fihe yé na yì ma na whè. Na nugbo tọn, numimọ lọ dohia dọ tẹnsẹnamẹnu lọ nọ sẹtẹn po awuyiya po dile abì nọ gbòdlán do! (Ezek. 1:14) Humọ, aliho jiawu he mẹ kẹkẹfọ lọ lẹ sọgan yì awà ẹnẹ ji po awubibọ po te dohia dọ yé yọ́n anadena hú nudepope he maṣinu-zọ́nwatọ azọ́nyọnẹntọ lẹ gán kudlọ etọn. E ma tlẹ biọ dọ tẹnsẹnamẹnu ehe ni de wezun pò kavi lilẹ́ whẹpo do tlọ́n awà de ji dedo devo ji to ojlẹ depope mẹ! Amọ́, e ma nọ dedo fidepope poun. Nukun he gọ́ agbá lọ lẹ go dohia hezeheze dọ tẹnsẹnamẹnu ehe nọ doayi nuhe to jijọ lẹdo e pé lẹpo go to awà lẹpo ji.

18. Etẹwẹ kiklo kẹkẹfọ lọ lẹ tọn po nukun he gọ́ yé go lẹ po plọn mí?

¹⁸ Eyin mọ wẹ, etẹwẹ Jehovah jlo na plọn Ezekiẹli—gọna nugbonọ lẹpo—gando adà olọn mẹ tọn titobasinanu Etọn tọn go? Lẹnnupọndo nuhe mí ko gbadopọnna kakajẹ din lẹ ji. Osọ́-kẹkẹ lọ jiawu bo do gigo hia taun, dile núzinzan sisẹ́ he yè do wleawuna kẹkẹfọ lọ lẹ po kiklo yetọn po dohia do. E nọ doayi nulẹpo go, dile nukun susugege he to kẹkẹfọ lọ lẹ go dohia do. Mọwẹ, nukun Jehovah tọn lẹ nọ mọ nulẹpo. (Howh. 15:3; Jel. 23:24) Humọ, ewọ tindo angẹli livi susu he to devizọnwana ẹn, ehe e gán dohlan fidepope to wẹkẹ lọ mẹ bọ yé na pọ́n nuhe to jijọ lẹ tlintlin bo lẹkọwa dogbè na Nupojipetọ yetọn.—Hia Heblu lẹ 1:13, 14.

19. Etẹwẹ awuyiya osọ́-kẹkẹ Jehovah tọn po lehe e yọ́n anadena do po plọn mí gando Jehovah po adà olọn mẹ tọn titobasinanu etọn tọn po go?

 ¹⁹ Gbọnvona enẹ, osọ́-kẹkẹ lọ nọ sẹtẹn po awuyiya po bosọ yọ́n anadena taun. Pọ́n lehe adà olọn mẹ tọn titobasinanu Jehovah tọn gbọnvona gandudu, nuzedai po titobasinanu gbẹtọvi tọn lẹ po do! Yewlẹ nọ to yìyì gọ̀-gọ̀-gọ̀ bo ma nọ diọada sọgbe hẹ ninọmẹ he to didiọ lẹ kakajẹ whenue yé sọta adó kavi masọ yọ́n na nude ba. Amọ́, osọ́-kẹkẹ Jehovah tọn uwọ nọ yinuwa pẹpẹ dile Jiwheyẹwhe lẹnpọn dagbenọ podọ alọdiọtọ he to anadena ẹn lọ nọ wà do. Dile yinkọ etọn lọsu dohia do, ewọ gán lẹzun nudepope he yin dandan nado hẹn lẹndai etọn di. (Eks. 3:13, 14) Di apajlẹ, bleun dopo wẹ e gán lẹzun Awhànfuntọ huhlọnnọ de nado hoavùn do omẹ etọn lẹ tamẹ, ṣigba mọjanwẹ e sọ sọgan diọ plaun bo lẹzun Jonamẹtọ lẹblanunọ de do nado vọ́ huhlọn na ylandonọ he lẹnvọjọ bọ ahun yetọn tlẹ ko jẹflumẹ pete lẹ.—Salm. 30:5; Isa. 66:13.

20. Naegbọn awú dona nọ ji mí gando osọ́-kẹkẹ Jehovah tọn go?

²⁰ Po fie mí jẹ din po, numimọ Ezekiẹli tọn gán whàn mí nado kanse míde dọ, ‘Be osọ́-kẹkẹ Jehovah tọn nọ hẹn awuji mi nugbo ya?’ Mí dona flindọ onú jọnun he to nuyiwa to alọnu de wẹ osọ́-kẹkẹ lọ nọtena. Mí ma dona lẹn gbede dọ Jehovah po Visunnu etọn po gọna angẹli lẹpo gán nọma mọdona nuhahun he to hinhẹn mí gbọjọ lẹ. Mọjanwẹ mí ma dona nọ hanú dọ Jiwheyẹwhe mítọn na dọngbàn nado penukundo nuhudo mítọn lẹ go kavi dọ titobasinanu etọn na gboawupo nado diọada sọgbe hẹ avùnnukundiọsọmẹnu yọyọ de to aihọn he fọ́n bo to didiọ ehe mẹ do niyẹn. Mí na wà dagbe nado nọ flindọ titobasinanu Jehovah tọn to mizọnmizọn ji bo ma nọ blá alọ dogo gbede. Na nugbo tọn, Ezekiẹli sè bọ gbedide de wá sọn olọn mẹ dọmọ: “Kẹkẹfọ lẹ ni lilẹ́!” (Ezek. 10:13) Be awú ma ji we nado mọ lehe Jehovah nọ deanana titobasinanu etọn do ya? Amọ́, nuhe dona hẹn awuji mí hugan wẹ Jehovah lọsu na ede.

21, 22. Nawẹ mí sọgan basi zẹẹmẹ nuhe hẹn adà voovo osọ́-kẹkẹ lọ tọn lẹ dote tọn gbọn?

²¹ Nudevo dọ̀n ayidonugo Ezekiẹli tọn sọn kẹkẹfọ lọ lẹ ji wá aga yetọn, fie e mọ “nuhe taidi dovlomẹ he to sisẹ́ di osin-agó he jiawu de” te. (Ezek. 1:22) To aga pete kelubimi lọ lẹ tọn, dovlomẹ de vlọ́n plẹsẹ bo to sisẹ́ po gigo daho po. Eyin mẹhe mọdona maṣinu-zọ́n wiwà ganji de hiawe jẹ fi, kanbiọ susu gán fọ́n to ayiha etọn mẹ gando tẹnsẹnamẹnu lọ go. Di apajlẹ, mẹdelẹ gán kanse dọ: ‘Etẹwẹ hẹn nudi oplò enẹ dote to aga kẹkẹfọ lọ lẹ tọn? Podọ nawẹ kẹkẹfọ lọ lẹ gán wazọ́n gbọn to whenuena e yindọ nude ma blá yé dopọ?’ Hẹn do ayiha mẹ dọ tẹnsẹnamẹnu ehe ma nọ yin anadena gbọn osẹ́n jọwamọ tọn lẹ dali, na yẹhiadonu de wẹ, yèdọ ohia onú jọnun de tọn he tin to agblò gbigbọmẹ tọn mẹ. Sọ doayi hogbe tangan ehelẹ go: “Gbigbọ he to anadena  mẹdida lọ lẹ dopolọ wẹ to anadena kẹkẹfọ lọ lẹ lọsu ga.” (Ezek. 1:20, 21) Gbigbọ tẹwẹ to anadena kelubimi lọ lẹ po kẹkẹfọ lọ lẹ po?

²² Ayihaawe ma tin dọ gbigbọ wiwe Jehovah tọn wẹ, yèdọ huhlọn daho hugan wẹkẹ tọn. Huhlọn-yido-wazọ́n ehe wẹ nọ hẹn tẹnsẹnamẹnu lọ dopọ, bo nọ na ẹn huhlọn bosọ nọ deanana aliho pipé he mẹ e nọ sẹtẹn po gbesisọ po te. Po enẹ po to ayiha mẹ, mì gbọ mí ni hodo Ezekiẹli dile e lilẹ́ ayidonugo etọn hlan Anadenanutọ osọ́-kẹkẹ lọ tọn.

23. Hogbe wunmẹ tẹlẹ wẹ Ezekiẹli yizan dile e to tintẹnpọn nado basi zẹẹmẹ gando Jehovah go, podọ etẹwutu?

²³ Hia Ezekiẹli 1:26-28. To zẹẹmẹ he Ezekiẹli basi gando numimọ ehe go lẹpo mẹ, e nọ saba yí hogbe delẹ zan taidi “awusọhia,” “nude he di,” “nuhe sọawuhia taidi,” podọ “nude he taidi.” Ṣigba to wefọ ehelẹ mẹ, e sọ vọ́ wàmọ hugan dai tọn. E taidi dọ hogbe whèdo e nado basi zẹẹmẹ onú mayọnjlẹ he e mọ lẹ tọn. E mọ “nuhe taidi zannu safili tọn de [he] sọ taidi ofìn de.” Be a gán yí nukun homẹ tọn do pọ́n ofìn he yin pipà sọn zannu safili tọn juju daho blibata de mẹ ya? Podọ Omẹ gigonọ de wẹ sinai to e ji, yèdọ “mẹde he tindo awusọhia gbẹtọ tọn” nkọ.

24, 25. (a) Etẹwẹ aidowhẹdo he lẹdo ofìn Jehovah tọn pé lọ nọ hẹn mí flin? (b) Nawẹ numimọ mọnkọtọn lẹ ko yinuwado nugbonọ delẹ ji gbọn?

²⁴ Nukunmẹ gigonọ mẹlọ tọn ma gán yin mimọ gblegede, na gigo Jehovah tọn to sisẹ́ di miyọ́n sọn alinkàn dedo odò podọ sọn alinkàn dedo aga. Mí gán yí nukun homẹ tọn do pọ́n yẹwhegán lọ  dile e to dandannu glọ nado miọn nukun yẹẹ bosọ yí alọ do hẹ́ nukun nado pọ́n awusọhia gigonọ lọ hlan tlintlin. Nuhe Ezekiẹli mọ bọdego hẹn awuji mẹ jẹ obá godo tọn mẹ: “Lẹdo etọn lẹpo sọ to sisẹ́ taidi sisẹ́ aidowhẹdo de tọn to aslọ mẹ to jikun whenu.” Be whanpẹ aidowhẹdo de tọn ko jiawu na we pọ́n ya? Lehe e nọ hẹn mí flin gigo Mẹdatọ mítọn tọn do sọ! Aidowhẹdo he tọ́n dẹẹdẹ to agahomẹ po sinmẹ voovo etọn lẹ po sọ sọgan hẹn mí flin alẹnu jijọho tọn he Jehovah basi to Singigọ lọ godo. (Jen. 9:11-16) Mahopọnna lehe Ganhunupotọ lọ dohuhlọn sọ, Jiwheyẹwhe jijọho tọn de wẹ ewọ. (Heb. 13:20) Nuyiwa etọn lẹpo wẹ nọ gọ́ na jijọho bọ jijọho etọn sọ nọ dlẹnkan jẹ mẹhe nọ sẹ̀n ẹn po nugbonọ-yinyin po lẹpo dè.

²⁵ Nawẹ gigo Jehovah Jiwheyẹwhe tọn he Ezekiẹli mọ yinuwadeji gbọn? E kàn nuhe jọ lọ dole: “To whenue yẹn mọ, yẹn ṣinyọ́n nukunmẹ ai.” Awujimẹ po budisi Jiwheyẹwhe po hẹn Ezekiẹli nado họ́ jẹ kọmẹ. Yẹwhegán devo lẹ ko yinuwa to aliho dopolọ mẹ to whenue yé mọ numimọ lẹ sọn Jehovah dè; nujijọ he sẹhundaga mọnkọtọn lẹ nọ hẹn yé mọdọ yé ma sọtẹ́n. (Isa. 6:1-5; Dan. 10:8, 9; Osọ. 1:12-17) Amọ́, to nukọn mẹ, nuhe Jehovah dehia yẹwhegán enẹlẹ wá hẹn yé lodo taun. E họnwun dọ mọ wẹ e yì do na Ezekiẹli lọsu. Eyin mọ wẹ, nawẹ kandai Owe-wiwe tọn ehelẹ nkọ hihia dona nọ yinuwado mí ji gbọn?

26. Nawẹ nuhe Ezekiẹli mọ lọ na ko hẹn ẹn lodo gbọn?

²⁶ Eyin Ezekiẹli ko tindo ayihaawe kavi ahunmẹdunamẹnu depope gando ninọmẹ omẹ Jiwheyẹwhe tọn he to Babilọni finẹ lẹ tọn go janwẹ, numimọ enẹ na ko vọ́ huhlọnna ẹn. E họnwun dọ eyin omẹ nugbonọ Jiwheyẹwhe tọn lẹ tlẹ to Jelusalẹm, Babilọni kavi fidevo depope, e ma yin enẹ wẹ yin nujọnu lọ. Fide ma tin he yé na te bọ osọ́-kẹkẹ jiawu Jehovah tọn ma gán yì! Nuzedai Satani tọn tẹwẹ gán jlẹ́te hẹ Jiwheyẹwhe he to anadena titobasinanu olọn mẹ tọn gigonọ mọnkọtọn? (Hia Salmu lẹ 118:6.) Ezekiẹli sọ mọdọ tẹnsẹnamẹnu olọn mẹ tọn lọ ma dẹn do gbẹtọ lẹ. Na nugbo tọn, kẹkẹfọ etọn lẹ tlẹ wá kaka aigba ji! (Ezek. 1:19) E dohia dọ Jehovah tindo ojlo vẹkuvẹku to omẹ nugbonọ etọn he to kanlinmọgbenu to finẹ lẹ mẹ. Yé na nọ tin to nukunpedomẹgo Otọ́ owanyinọ yetọn tọn glọ to whepoponu!

27. Zẹẹmẹ tẹwẹ numimọ Ezekiẹli tọn tindo na mí to egbehe?

²⁷ Be numimọ Ezekiẹli tọn tindo zẹẹmẹ na mí to egbehe ya? Gbau! Flindọ, Satani fọ́n bo to nukundiọsọ sinsẹ̀n-bibasi wiwe-ṣeke Jehovah tọn hú gbede pọ́n. Homẹ etọn na hùn eyin e sọgan hẹn mí kudeji dọ mí tin to ṣokẹdẹ bo ma do mẹde bosọ dẹn do Otọ́ olọn mẹ tọn mítọn po titobasinanu etọn po. A dike lalo enẹlẹ mọtẹn to ayiha kavi ahun towe mẹ gbede blo! (Salm. 139:7-12) Taidi Ezekiẹli, mí tindo whẹwhinwhẹ́n lẹpo nado dibusi  Jiwheyẹwhe. Mí gán nọma ṣinyọ́n nukunmẹ ai dile ewọ wà do. Etomọṣo, be aliho he mẹ adà olọn mẹ tọn titobasinanu gigonọ Jehovah tọn dohuhlọn, nọ yawu yinuwa, yọ́n anadena bo nọ diọalọ te ma dona nọ hẹn awuji mí ya?

28, 29. Etẹwẹ dohia dọ osọ́-kẹkẹ Jehovah tọn to  mizọnmizọn ji to owhe  kanweko he wayi gblamẹ?

²⁸ Sọ flindọ, titobasinanu Jehovah tọn tindo adà aigba ji tọn de. Nugbo wẹ dọ gbẹtọvi mapenọ lẹ wẹ adà aigba ji tọn lọ bẹhẹn. Ṣigba, saa lẹnnupọndo nuhe Jehovah ko wadotana to aigba ji fi lẹ ji! Lẹdo aihọn pé, Jehovah ko whàn gbẹtọvi tata lẹ nado wà nuhe yelọsu na yede ma na ko penugo nado wà pọ́n gbede. (Joh. 14:12) Weda voovo owe Ahọluduta Jiwheyẹwhe Tọn to Gandu! tọn lẹ hùnhùn poun ko pé nado flin aliho jiawu he mẹ azọ́n yẹwhehodidọ tọn lọ gbloada te to owhe kanweko he wayi gblamẹ. Mí sọ sọgan flin nukọnyiyi ayidego tọn he titobasinanu Jehovah tọn ko basi na nuhe dù nupinplọn Klistiani nugbo lẹ, duduto whẹho osẹ́n tọn lẹ ji, podọ etlẹ yin azọ́nwanu nuyọnẹn wintinwintin tọn agọe tọn lẹ yiyizan nado hẹn ojlo Jiwheyẹwhe tọn di!

²⁹ Eyin mí lẹnnupọndo nuhe ko yin wiwadotana nado hẹn sinsẹ̀n-bibasi wiwe-ṣeke gọwá to azán godo tọn titonu ylankan ehe tọn lẹ mẹ lẹpo ji, e nọ họnwun hugan gbede pọ́n dọ osọ́-kẹkẹ Jehovah tọn to mizọnmizọn ji nugbo. Lẹblanulọkẹyi jiawu nankọ die nado kọnawudopọ hẹ titobasinanu ehe, podọ nado to Nupojipetọ mọnkọtọn de sẹ̀n!—Salm. 84:10.

30. Etẹwẹ mí na gbadopọnna to hosọ he bọdego mẹ?

³⁰ Amọ́, nususu gbẹ́ pò he mí gán plọn sọn numimọ Ezekiẹli tọn mẹ. To weta he bọdego mẹ, mí na na ayidonugo “mẹdida,” kavi kelubimi ayidego tọn ẹnẹ lọ lẹ yinukọn dogọ. Etẹwẹ yé sọgan plọn mí gando Nupojipetọ gigonọ mítọn Jehovah Jiwheyẹwhe go?