1-3. (a) Taarĩria maũndũ marĩa Ezekieli oonire na akĩigua. (Rora mbica kĩambĩrĩria-inĩ gĩa gĩcunjĩ gĩkĩ.) (b) Nĩ hinya ũrĩkũ watũmire Ezekieli one kĩoneki, na ũndũ ũcio wamũhutirie atĩa?

 TA HŨŨRA mbica Ezekieli arorete kũndũ kũraya, agacũthĩrĩria kũndũ kwaraganu na kũrĩ na mũthanga. Akahinga maitho hanini agacoka akamahingũra biũ. Ndaretĩkia maũndũ marĩa arona. Arora harĩa maitho make mangĩkinya, akona kĩhuhũkanio kĩnene gĩgĩũka. No kĩhuhũkanio kĩu gĩtihaana ta iria ingĩ. Rũhuho rũnene kuuma mwena wa rũgongo rũkahuruta njuĩrĩ yake na nguo ciake, na akona itu inene mũno. Itu rĩu rĩrĩ na ũtheri wa mwaki ũramenũka thĩinĩ warĩo, na ũtheri ũcio ũkamũririkania cuma ya goro ĩtweketio. a O ũrĩa itu rĩu rĩrathiĩ na ihenya na kũrĩa Ezekieli arĩ, noguo araigua mũgambo ũgĩthiĩ ũnenehete, mũgambo warurumaga ta mbũtũ nene ĩgĩthiĩ.—Ezek. 1:4, 24.

² Ezekieli arĩ na mĩaka ta 30 nĩrĩo oonire kĩoneki kĩa mbere harĩ cioneki nyingĩ itangĩriganĩra iria oonire. Akaigua “guoko kwa Jehova” kũrĩ igũrũ rĩake, hinya wa roho wa Jehova ũrĩa ũtangĩgirĩrĩka. Maũndũ marĩa roho ũcio ũgũtũma one na aigue nĩ ma magegania mũno, gũkĩra thenema o yothe ĩthondeketwo na  tekinolonjĩ ya kĩĩrĩu. Kĩoneki kĩa Ezekieli gĩgũtũma egũithie aturumithie ũthiũ thĩ, agegete biũ.—Ezek. 1:3, 28.

³ O na kũrĩ ũguo, Jehova arĩ na ũndũ ũngĩ meciria-inĩ gũkĩra o gũtũma Ezekieli agege. O ta cioneki iria ingĩ cia gũcanjamũra ciandĩkĩtwo thĩinĩ wa ibuku rĩu rĩa ũrathi, kĩoneki kĩa mbere kĩa Ezekieli nĩ gĩkoragwo na maũndũ maingĩ ma kwĩruta, harĩ we na harĩ ndungata njĩhokeku cia Jehova ũmũthĩ. Nĩ ũndũ ũcio, reke tũthuthurie maũndũ marĩa Ezekieli oonire na akĩigua.

4, 5. Kwahaanaga atĩa hĩndĩ ĩrĩa Ezekieli oonire kĩoneki?

⁴ Thoma Ezekieli 1:1-3. Reke twambe twĩririkanie ũrĩa kwahaanaga. Kwarĩ mwaka wa 613 M.M.M. O ta ũrĩa twerutire thĩinĩ wa gĩcunjĩ gĩa 2, Ezekieli aarĩ Babuloni na aatũũraga gatagatĩ-inĩ ka andũ arĩa maatwarĩtwo ithamĩrio na maaikaraga hakuhĩ na rũũĩ rwa Kebari—no kũhoteke rũũĩ rũu rwarĩ rũnene na rũriku na rweenjetwo nĩ andũ kuuma harĩ rũũĩ rwa Farati na thutha ũcio rũkanyitana naruo rĩngĩ.

⁵ Jerusalemu, mũciĩ wa andũ acio maatwarĩtwo ithamĩrio, yarĩ kilomita ta 800 kuuma kũu. b Hekarũ ĩrĩa ithe wa Ezekieli aatungatĩte arĩ mũthĩnjĩri-Ngai, nĩ yahũthagĩrũo na ũthathaiya wa maheeni na ũhoi mĩhianano. Gĩtĩ kĩa ũnene kĩrĩa kĩarĩ Jerusalemu, kũrĩa Daudi na Suleimani maathamakaga marĩ na riri, nĩ gĩatuĩkĩte gĩconoko. Mũthamaki Jehoiakini ũrĩa ũtaarĩ na wĩtĩkio aarĩ kũu Babuloni hamwe na andũ arĩa angĩ maatwarĩtwo kuo ithamĩrio. Zedekia, ũrĩa wacokire ithenya rĩake, aarĩ mũndũ mũũru na aathanaga rungu rwa mũthamaki wa Babuloni.—2 Ath. 24:8-12, 17, 19.

6, 7. Nĩ kĩĩ kĩngĩatũmire Ezekieli aigue ta aatũũraga mahinda-inĩ maritũ?

 ⁶ No mũhaka akorũo rĩu rĩarĩ ihinda iritũ mũno ũtũũro-inĩ wa mũndũ warĩ na wĩtĩkio ta Ezekieli. No kũhoteke amwe arĩa maarĩ ithamĩrio hamwe nake nĩ meeyũragia ũũ: ‘Hihi Jehova nĩ atũtiganĩirie biũ? Hihi wathani ũyũ mũũru wa Babuloni na ngai nyingĩ cia maheeni iria irĩ kuo nĩ ũkũniina kaimana ũthathaiya mũtheru wa Jehova na wathani wake thĩinĩ wa thĩ?’

⁷ Ũrĩ na ũhoro ũcio meciria-inĩ, no wambĩrĩrie wĩruti waku wĩgiĩ ũndũ ũcio na njĩra ya gũthoma ũrĩa Ezekieli ataarĩirie kĩoneki gĩake kĩa mbere. (Ezek. 1:4-28) Ũgĩthoma, geria kwĩĩkĩra iratũ-inĩ cia Ezekieli, ũhũũre mbica ũkĩona maũndũ marĩa oonire na ũkĩigua maũndũ marĩa aaiguire.

8. Ezekieli oonire kĩĩ kĩoneki-inĩ, na kĩarũgamĩrĩire kĩĩ?

⁸ Nĩ ũndũ ũrĩkũ Ezekieli oonire? Oonire ngaari yarĩ nene mũno na ya kũgegania. Yarĩ na magũrũ mana manene hamwe na ciũmbe inya cia roho, iria ciacokire kũmenyeka atĩ nĩ akerubi. (Ezek. 10:1) Igũrũ rĩacio haarĩ na mũtambũrũko mũnene wahaanaga ta mbarabu, na igũrũ rĩaguo haarĩ na gĩtĩ kĩa ũnene kĩrĩ riri kĩa Ngai, na gĩaikarĩirũo nĩ Jehova we mwene! Hihi ngaari ĩyo yarũgamĩrĩire kĩĩ? Kĩoneki kĩa Ezekieli kĩrũgamĩrĩire ũndũ o ũmwe tu: gĩcunjĩ kĩa igũrũ kĩa ithondeka rĩa Jehova rĩrĩ na riri. Tũngiuga  ũguo nĩkĩ? Ta wĩcũranie maũndũ maya matatũ mangĩtũma tũkinyĩrĩre itua rĩu.

9. Gũkorũo atĩ Jehova nĩwe wathaga ciũmbe ciake cia igũrũ kũratwarana atĩa na ũrĩa ngaari ĩyo ĩtaarĩirio?

⁹ Jehova nĩwe wathaga ciũmbe ciake cia igũrũ. Ririkana atĩ thĩinĩ wa kĩoneki kĩu, gĩtĩ kĩa ũnene kĩa Jehova kĩrĩ igũrũ rĩa akerubi. O na maandĩko mangĩ ma Kiugo kĩa Ngai nĩ mataaragĩria kana makonania Jehova aikarĩire gĩtĩ kĩa ũnene igũrũ rĩa akerubi ake kana gatagatĩ kao. (Thoma 2 Athamaki 19:15; Tham. 25:22; Thab. 80:1) Hatarĩ nganja, ti kuuga atĩ akoragwo aikarĩire akerubi ake, ta arabatara gũkuuo nĩ ciũmbe icio irĩ hinya cia roho, o ta ũrĩa atabataraga gũkuuo nĩ ngaari. No akerubi acio manyitaga mbaru ũnene wake, na no amatũme kũndũ o guothe igũrũ na thĩ nĩguo mahingie wendi wake. O ta araika arĩa angĩ othe atheru a Ngai, mahingagia matua ma Jehova marĩ ndungata, kana atũmwo ake. (Thab. 104:4) Kwoguo Jehova akoragwo arĩ igũrũ rĩao othe na njĩra ya atĩ nĩwe ũmatongoragia kũgerera wathani wake, othe mahaana ta ngaari ĩmwe nene marĩ na ũrũmwe.

10. Nĩ kĩĩ kĩronania atĩ ngaari ĩyo ya igũrũ ĩrũgamĩrĩire makĩria ma akerubi ana?

¹⁰ Ngaari ĩyo ndĩrũgamĩrĩire o akerubi oiki. Akerubi arĩa Ezekieli oonire maarĩ ana. Kaingĩ namba inya nĩ ĩhũthĩrĩtwo Bibilia-inĩ kuonania ũigananu kana gũtaarĩria kĩndũ kĩrĩ gĩothe hatarĩ kĩndũ gĩtigĩrĩirũo. Ũguo nĩ kuuga atĩ, akerubi acio ana marũgamĩrĩire ariũ othe a roho ehokeku a Jehova. Ningĩ, rora wone atĩ  magũrũ macio o hamwe na akerubi acio maiyũire maitho, ũndũ ũcio ũkonania atĩ, makĩria ma ciũmbe icio inya cia roho, kũrĩ na angĩ aingĩ maikarĩte meiguĩte. Na ũrĩa Ezekieli aataarĩirie ngaari ĩyo kuonanagia atĩ yarĩ nene mũno, ũũ atĩ akerubi acio marĩ riri moonekaga marĩ anini. (Ezek. 1:18, 22; 10:12) Na njĩra o ta ĩyo, gĩcunjĩ kĩa igũrũ kĩa ithondeka rĩa Jehova nĩ kĩnene mũno, na gĩkoragwo na makĩria ma akerubi acio ana.

11. Nĩ kĩoneki kĩrĩkũ Danieli oonire kĩhaana ta kĩa Ezekieli, na nĩ ũndũ ũrĩkũ tũngĩkinyĩrĩra gũtua?

¹¹ Kĩoneki o ta kĩu kĩa igũrũ kĩrĩa Danieli oonire. Mũnabii Danieli nĩ aatũũrire ihinda iraihu arĩ ithamĩrio itũũra-inĩ rĩa Babuloni, na o nake nĩ oonirio kĩoneki kĩa igũrũ. Ũndũ wa mwanya nĩ atĩ, o na kĩoneki-inĩ kĩu, gĩtĩ kĩa ũnene kĩa Jehova nĩ kĩarĩ na magũrũ. Kĩoneki kĩa Danieli kĩonanagia ũrĩa famĩlĩ ya Jehova ya ciũmbe cia roho kũrĩa igũrũ ĩrĩ nene. Danieli oonire ariũ a roho a Ngai ‘ngiri maita ngiri na ngiri ikũmi maita ngiri ikũmi’ marũgamĩte mbere ya Jehova. Maaikarĩte thĩ marĩ Igooti rĩa igũrũ, hihi o mũndũ arĩ harĩa agaĩirũo. (Dan. 7:9, 10, 13-18) Na githĩ ti ũndũ mwagĩrĩru gũtua atĩ kĩoneki kĩa Ezekieli kĩarũgamĩrĩire gĩkundi o ro kĩu gĩa ciũmbe cia roho irĩ riri?

12. Nĩkĩ gũthuthuria icunjĩ itiganĩte ta kĩoneki kĩa Ezekieli kĩgiĩ ngaari ya igũrũ nĩ ũgitĩri harĩ ithuĩ?

¹² Jehova nĩ oĩ atĩ nĩ ũgitĩri harĩ ithuĩ kũiga meciria maitũ harĩ maũndũ ma kĩĩroho ma ma, marĩa mũtũmwo Paulo eetire “maũndũ marĩa matonekaga.” Nĩkĩ? Tondũ tũrĩ ciũmbe cia nyama na thakame, nĩ tũkoragwo na mwerekera wa gwĩciragia mũno “maũndũ marĩa monekaga,” maũndũ ma kĩĩmwĩrĩ, marĩa makoragwo marĩ ma ihinda inini. (Thoma 2 Akorintho 4:18.) Kaingĩ Shaitani nĩ ahũthagĩra mwerekera ũcio witũ, agatũtindĩkĩrĩria tũtuĩke andũ marĩ na mwĩcirĩrie wa kĩĩmwĩrĩ. Nĩguo Jehova atũteithie kũregana na hatĩka ĩyo, nĩ atũheete icunjĩ itiganĩte ta kĩrĩa kĩrĩ thĩinĩ wa ũrathi ũyũ wa Ezekieli, igatũririkania ũrĩa famĩlĩ ya Jehova ya igũrũ ĩkoragwo na riri mũnene!

13, 14. (a) Ezekieli aataarĩirie atĩa magũrũ marĩa oonire? (b) Nĩkĩ nĩ ũndũ mwagĩrĩru gũkorũo atĩ ngaari ya Jehova nĩ ĩrĩ magũrũ?

¹³ Kĩambĩrĩria-inĩ, Ezekieli eerekeirie meciria make harĩ akerubi acio ana, na Gĩcunjĩ gĩa 4 kĩa ibuku rĩrĩ nĩ kĩonanĩtie ũrĩa tũngĩĩruta igũrũ rĩgiĩ Jehova kuumana na ciũmbe icio na mũhianĩre wacio wa magegania. No Ezekieli oonire magũrũ macio marĩ hakuhĩ na akerubi acio, hihi mĩena ĩna ĩtiganĩte, magathondeka thikwea nene. (Thoma Ezekieli 1:16-18.) Moonekaga ta mathondeketwo na krisolito, ihiga rĩa goro rĩhaana ta gĩcicio rĩa rangi wa yerũ kana yerũ ĩtukanĩte na ngirini. Magũrũ macio nĩ maahenagia.

¹⁴ Kĩoneki kĩa Ezekieli nĩ kĩarĩrĩirie mũno ũhoro wa magũrũ ma ngaari ĩyo. Kĩrĩa Ezekieli oonire kĩarĩ kĩa mwanya. Oonire gĩtĩ kĩa ũnene kĩrĩ na magũrũ ma ngaari! Nĩ ũndũ wa ndũire gwĩciria  ũhoro wa gĩtĩ kĩa ũnene kĩrĩ o handũ hamwe, tondũ wathani wa athamaki a gũkũ thĩ nĩ ũkoragwo na mĩhaka. No ũnene wa Jehova ndũtariĩ ta wathani o wothe wa andũ. O ta ũrĩa Ezekieli aacokire kũmenya, hinya wa Jehova wa gwathana ndũrĩ mĩhaka. (Neh. 9:6) Ũrĩa kũrĩ nĩ atĩ, gũtirĩ kũndũ wathani wake ũtangĩkinya!

15. Nĩ maũndũ marĩkũ Ezekieli oonire megiĩ ũrĩa magũrũ macio maathondeketwo na ũrĩa maaiganaga?

¹⁵ Ezekieli nĩ aagegirio nĩ ũrĩa magũrũ macio maaiganaga. Aandĩkire ũũ: “Mĩbara yamo yaraihĩte na igũrũ mũno ũũ atĩ yarĩ ya kũgegania.” No tũhũũre mbica Ezekieli agĩtiira maitho make na igũrũ nĩguo erorere mĩbara ĩyo mĩnene na yahenagia, ĩrĩa yakinyĩte o matu-inĩ. Aacokire akĩongerera ciugo ici cia kũgegania: “Mĩbara ya magũrũ macio mothe mana yaiyũire maitho kũndũ guothe.” Ĩndĩ no kũhoteke atĩ ũndũ ũrĩa warĩ wa kũgegania makĩria nĩ ũrĩa magũrũ macio maathondeketwo. Aataarĩirie akiuga ũũ: “Mũhianĩre na mũthondekere wamo woonekaga ta o kũgũrũ kwaharũkĩte thĩinĩ wa kũngĩ.” Hihi ũguo nĩ kuuga atĩa?

16, 17. (a) Nĩ na njĩra ĩrĩkũ ngaari ĩyo yarĩ na magũrũ maharũkanĩte thĩinĩ wa mangĩ? (b) Magũrũ macio monanagia ũndũ ũrĩkũ wĩgiĩ ũhoti wa gũcenjia wa ngaari ya Jehova?

¹⁶ Harĩ magũrũ macio Ezekieli oonire, no kũhoteke o kũgũrũ kwarĩ magũrũ merĩ manyitanĩte, kũgũrũ kũmwe kũharũkĩte thĩinĩ wa kũngĩ na marorete mĩena ngũrani. Ũndũ ũcio nĩ ũronania gĩtũmi kĩa magũrũ macio mahote kũruta wĩra ũrĩa Ezekieli aataarĩirie akiuga: “Magĩthiĩ-rĩ, maathiaga mwena o wothe harĩ mĩena yothe ĩna matekũgarũrũka magĩthiĩ.” Hihi magũrũ macio maronania atĩa igũrũ rĩgiĩ ngaari ya igũrũ ĩrĩa Ezekieli oonire?

¹⁷ Magũrũ maraihu ũguo no mathiĩ kũndũ kũnene mũno o na mathiũrũrũkĩte riita rĩmwe tu. Kĩoneki kĩu kĩonanagia atĩ ngaari ĩyo yathiaga na ihenya ta rũheni! (Ezek. 1:14) Makĩria ma ũguo, gũkorũo atĩ magũrũ macio ma mwanya no mathiĩ na mĩena ĩna kũronania atĩ nĩ marĩ ũhoti mũnene ũrĩa o na ataaramu matangĩhota gũthondeka. Ngaari ĩyo no ĩhote gũcenjia mwena ũrĩa ĩgũthiaga ĩtekũnyihia ihenya o na kana kũgarũrũka! No ndĩcenjagia o ũguo hatarĩ gĩtũmi. Maitho marĩa maiyũire mĩbara-inĩ maronania atĩ ngaari ĩyo nĩ ĩmenyaga wega maũndũ mothe marĩa mamĩthiũrũrũkĩirie, mĩena yothe.

18. Tũreruta atĩa kuumana na ũnene wa magũrũ macio na ũrĩa maitho mamo marĩ maingĩ?

¹⁸ Hihi nĩ maũndũ marĩkũ Jehova eendaga kũruta Ezekieli—hamwe na andũ othe arĩa ehokeku—megiĩ gĩcunjĩ kĩa igũrũ kĩa ithondeka Rĩake? Reke tuone maũndũ marĩa twĩrutĩte gũkinyĩria hau. Gĩcunjĩ kĩu nĩ kĩrĩ riri na nĩ gĩa kũgegania, o ta ũrĩa kũhenia kwa magũrũ macio na ũnene wamo kũronania. Nĩ kĩmenyaga maũndũ mothe, ũndũ ũrĩa ũronanio nĩ maitho maingĩ marĩa marĩ magũrũ-inĩ macio. Maitho ma Jehova we mwene monaga maũndũ mothe. (Thim. 15:3; Jer. 23:24) Makĩria ma ũguo, nĩ arĩ araika milioni nyingĩ arĩa angĩtũma handũ o hothe igũrũ na thĩ, na araika  acio no mahote gũtuĩria maũndũ na kinyi na thutha ũcio matwarĩre Mũnene wao riboti.—Thoma Ahibirania 1:13, 14.

19. Nĩ maũndũ marĩkũ tũreruta megiĩ Jehova na gĩcunjĩ kĩa igũrũ kĩa ithondeka rĩake kuumana na ihenya rĩa ngaari ya Jehova na ũhoti wayo wa gũcenjia?

¹⁹ Ningĩ nĩ tuona atĩ ngaari ĩyo ĩthiaga na ihenya mũno na nĩ ĩrĩ ũhoti mũnene wa gũcenjia mwena ũrĩa ĩgũthiaga. Ta wĩcirie ngũrani gatagatĩ ka gĩcunjĩ kĩa igũrũ kĩa ithondeka rĩa Jehova na thirikari cia andũ hamwe na mathondeka mao! Thirikari icio ithũkagia maũndũ itekũmenya, ikaremwo gũtwarana na ũrĩa maũndũ maracenjia, nginya igekora thĩna-inĩ kana ikeherio. No ngaari ya Jehova yonanagia na njĩra nginyanĩru atĩ we nĩ Ngai ũkoragwo na ũigananĩru na nĩ ahotaga kũmĩtongoria kũringana na ũrĩa maũndũ maracenjia. O ta ũrĩa rĩĩtwa rĩake rĩonanagia, no atuĩke kĩndũ o gĩothe kĩngĩbatarania nĩguo ahingie muoroto wake. (Tham. 3:13, 14) Kwa ngerekano, no atuĩke Njamba ya Ita ĩrĩ hinya nĩguo arũĩrĩre andũ ake, ĩndĩ no acenjie o rĩmwe atuĩke Muohanĩri ũrĩ tha wa kũrũmbũiya ehia arĩa merirĩte o na mangĩkorũo mathuthĩkĩte ngoro atĩa.—Thab. 30:5; Isa. 66:13.

20. Nĩkĩ nĩ twagĩrĩirũo kũhutio ngoro nĩ ngaari ya Jehova?

²⁰ Maũndũ marĩa twĩrutĩte kĩoneki-inĩ kĩa Ezekieli gũkinyĩria hau no matũme twĩyũrie atĩrĩ, ‘Hihi niĩ nĩ hutagio ngoro nĩ ngaari ya Jehova?’ Nĩ twagĩrĩirũo kũririkana atĩ ngaari ĩyo nĩ ĩrathiĩ nginyagia rĩu. Tũtiagĩrĩirũo gwĩciria atĩ Jehova, Mũrũ wake, na araika othe no mage kuona thĩna ũrĩa ũratũma tũigue tũkuĩte ngoro. Ningĩ tũtiagĩrĩirũo gũtangĩka atĩ Ngai witũ nĩ egũcererũo gũtũhingĩria mabataro maitũ kana atĩ ithondeka rĩake no rĩremwo gũcenjia kũringana na ũritũ o wothe ũrĩa ũngiumĩra thĩinĩ wa thĩ ĩno ĩtamenyagĩrũo. Twagĩrĩirũo kũririkana atĩ ithondeka rĩa Jehova nĩ rĩraruta wĩra, na gũtirĩ hĩndĩ rĩrũgamaga. O na Ezekieli nĩ aaiguire mũgambo kuuma igũrũ ũgĩatha magũrũ macio mathiĩ ũkiuga: “Magũrũ marĩa marathiũrũrũka, ambatai!” (Ezek. 10:13) Githĩ tũtihutagio ngoro mũno twecũrania ũrĩa Jehova atwarithagia ithondeka rĩake? No ũndũ ũrĩa wagĩrĩire gũtũhutia o na makĩria nĩ gwĩcũrania ũhoro wa Jehova we mwene.

21, 22. Tũngĩtaarĩria atĩa kĩrĩa kĩnyitithanagia ngaari ĩyo hamwe?

²¹ Maitho ma Ezekieli nĩ maagucĩrĩirio nĩ kĩndũ kĩngĩ makĩehera harĩ magũrũ macio, akĩrora igũrũ akĩona “kĩndũ gĩatariĩ ta mũtambũrũko wakengaga ta mbarabu ya magegania.” (Ezek. 1:22) Igũrũ rĩa mĩtwe ya akerubi, kwarĩ na mũtambũrũko mũnene wakengaga ũrĩ na riri. Gũkinyĩria hau, mũndũ ũtaũkagĩrũo nĩ ũrĩa macini irutaga wĩra no akorũo na ciũria nyingĩ ciĩgiĩ ngaari ĩyo. Kwa ngerekano, andũ amwe no meyũrie ũũ: ‘Nĩ kĩĩ kĩnyitĩrĩire mũtambũrũko ũcio ũrĩ igũrũ rĩa magũrũ? Na magũrũ macio mangĩruta wĩra atĩa matarĩ na kĩndũ gĩa kũmanyitithania hamwe?’ Ririkana atĩ ngaari ĩyo ndĩtongoragio nĩ mawatho ma  ndũire, tondũ nĩ ya mũhaano, ĩkĩonania maũndũ marĩa mekĩkaga thĩinĩ wa gĩikaro kĩa roho. Ningĩ wĩcirie ũhoro wa ciugo ici cia bata: “Roho ũrĩa watongoragia ciũmbe icio irĩ muoyo noguo warĩ thĩinĩ wa magũrũ macio.” (Ezek. 1:20, 21) Nĩ roho ũrĩkũ warutaga wĩra harĩ akerubi acio na harĩ magũrũ macio?

²² Hatarĩ nganja nĩ roho mũtheru wa Jehova, hinya ũrĩa mũnene mũno igũrũ na thĩ. Hinya ũcio wa gwĩka maũndũ nĩguo ũnyitithanagia ngaari ĩyo hamwe, ũkamĩhe hinya, na ũkamĩtongoria kũrĩa ĩgũthiĩ. Tũrĩ na maũndũ macio meciria-inĩ, reke tũrũmĩrĩre Ezekieli akĩroria maitho na kũrĩ Ũrĩa ũtongoragia ngaari ĩyo.

23. Nĩ ciugo ta irĩkũ Ezekieli aahũthĩrire kũgeria gũtaarĩria ũhoro wĩgiĩ Jehova, na nĩkĩ?

²³ Thoma Ezekieli 1:26-28. Ezekieli agĩtaarĩria kĩoneki gĩake, kaingĩ ahũthĩrĩte ciugo ta “mũhianĩre,” “hoonekaga ta arĩ,” “kĩahaanaga,” na “gĩatariĩ ta.” No mĩhari-inĩ ĩno nĩ ahũthĩrĩte ciugo icio o na makĩria. Onekaga akĩgeria gũcaria ciugo cia gũtaarĩria maũndũ marĩa oonire mataarĩ mahũthũ gũtaarĩrio. Oonire “kĩndũ gĩatariĩ ta ihiga rĩa safia, na kĩahaanaga ta gĩtĩ kĩa ũnene.” Ta hũũra mbica gĩtĩ kĩa ũnene gĩcongetwo kuuma harĩ ihiga rĩmwe inene rĩa safia ya rangi wa mburuu! Na ũrĩa wagĩikarĩire aarĩ na “mũhianĩre ta wa mũndũ.”

24, 25. (a) Mũkũnga-mbura ũrĩa ũkoragwo ũthiũrũrũkĩirie gĩtĩ kĩa ũnene kĩa Jehova ũtũririkanagia maũndũ marĩkũ? (b) Rĩmwe cioneki ta icio ciahutagia atĩa arũme arĩa maarĩ na wĩtĩkio?

 ²⁴ Ezekieli ndangĩahotire gũtaarĩria wega kĩrĩa oonire, tondũ Jehova nĩ aarutaga kĩndũ kĩahaanaga mwaki kĩarĩ na riri kuuma njohero-inĩ gũcoka na thĩ na kuuma njohero-inĩ kwambata na igũrũ. No tũhũũre mbica mũnabii ũcio akĩhingahinga maitho make akĩĩrorera riri ũcio. Mũthia-inĩ, Ezekieli akĩona ũndũ ũyũ wa kũgegania o na makĩria: “Aathiũrũrũkĩirio nĩ ũtheri mũkengu watariĩ ta wa mũkũnga-mbura ũrĩ itu-inĩ gũkiura.” Hihi ũrĩ waigua ũcanjamũkĩte nĩ ũndũ wa kuona mũkũnga-mbura? Kĩu nĩ kĩririkania kĩega kĩa riri wa Mũũmbi witũ. Mũkũnga-mbura, o ũcio ũkoragwo na marangi mathaka ũrĩ igũrũ, ningĩ no ũtũririkanie kĩrĩkanĩro kĩa Jehova gĩa thayũ thutha wa Mũiyũro. (Kĩam. 9:11-16) O na gũtuĩka Mwene-Hinya-Wothe nĩ arĩ hinya mũingĩ, we nĩ Ngai wa thayũ. (Ahib. 13:20) Akoragwo aiyũirũo nĩ thayũ ngoro-inĩ yake na ũgatherema kũrĩ arĩa othe mamũthathayagia na wĩhokeku.

²⁵ Ezekieli aahutirio atĩa nĩ ũndũ wa kuona riri wa Jehova Ngai? Ezekieli nĩ aandĩkire ũrĩa gwekĩkire: “Rĩrĩa ndawonire, ngĩĩgũithia ngĩturumithia ũthiũ thĩ.” Aagũire thĩ aiyũirũo nĩ kĩmako na wĩtigĩri Ngai. Anabii angĩ o nao nĩ meekire o ro ũguo thutha wa kuonio cioneki nĩ Jehova; no mũhaka akorũo ũndũ ũcio nĩ ũtũmaga mũndũ enyihie mũno, na aigue athirĩtwo nĩ hinya. (Isa. 6:1-5; Dan. 10:8, 9; Kũg. 1:12-17) O na kũrĩ ũguo, thutha wa ihinda arũme acio nĩ meekĩragwo hinya mũno nĩ maũndũ marĩa Jehova aamaguũragĩria. Hatarĩ nganja, o na Ezekieli nĩ eekĩrirũo hinya. Nĩ ũndũ ũcio-rĩ, tũbatiĩ kũhutio atĩa rĩrĩa twathoma ũhoro ta ũcio kuuma Maandĩko-inĩ?

26. Kĩoneki kĩa Ezekieli kĩamwĩkĩrire hinya atĩa?

²⁶ Angĩkorũo Ezekieli nĩ aatangĩkaga kana aarĩ na nganja ũhoro-inĩ wĩgiĩ andũ a Ngai arĩa maarĩ Babuloni, no mũhaka akorũo kĩoneki kĩu nĩ kĩamwĩkĩrire hinya. Gũtiamakanagia kana andũ a Ngai arĩa ehokeku maarĩ Jerusalemu, kana Babuloni, kana kũndũ kũngĩ o guothe. Gũtirĩ hĩndĩ mangĩakorirũo marĩ kũraihu ũndũ mangĩagire gũkinyĩrũo nĩ ngaari ya magegania ya Jehova! Nĩ hinya ũrĩkũ wa Shaitani ũngĩhota gwĩtiiria Ngai ũrĩa ũratongoria ithondeka ta rĩu rĩa igũrũ rĩrĩ riri? (Thoma Thaburi 118:6.) Ningĩ Ezekieli nĩ oonire atĩ ngaari ĩyo ya igũrũ ndĩarĩ haraya na andũ. Magũrũ mayo maahutĩtie thĩ! (Ezek. 1:19) Kwoguo Jehova nĩ aarũmbũyagia mũno andũ ake ehokeku arĩa maarĩ ithamĩrio. Hingo ciothe nĩ mangĩakinyĩrirũo nĩ wendo wa Ithe wao!

27. Kĩoneki kĩa Ezekieli gĩtũhutagia atĩa ũmũthĩ?

²⁷ Hihi kĩoneki kĩa Ezekieli nĩ kĩratũhutia ũmũthĩ? Ĩĩ, nĩ kĩratũhutia. Ririkana atĩ Shaitani nĩ arabanga tharĩkĩro nene o na makĩria  kwerekera ũthathaiya wa Jehova. No ende gũtũma twĩtĩkie atĩ tũrĩ ithuiki, nĩ tũtiganĩirio, na atĩ tũrĩ kũraihu na Ithe witũ wa igũrũ na ithondeka rĩake. Ndũkanetĩkĩrie maheeni ta macio maingĩre meciria-inĩ kana ngoro-inĩ yaku! (Thab. 139:7-12) O ta Ezekieli, o na ithuĩ nĩ twagĩrĩirũo kũhutio ngoro. Twahota kwaga kwĩgũithia tũturumithie ũthiũ thĩ ta ũrĩa eekire. No rĩrĩ, na githĩ tũtiagĩrĩirũo kũgegio mũno nĩ ũrĩa gĩcunjĩ kĩa igũrũ kĩa ithondeka rĩa Jehova gĩkoragwo na hinya, ihenya, ũhoti wa gũcenjia kũrĩa kĩrathiĩ, gũtwarana na ũrĩa maũndũ maracenjia, na riri mũnene?

28, 29. Nĩ kĩĩ kĩronania atĩ ngaari ya Jehova ĩkoretwo ĩgĩthiĩ na mbere ihinda-inĩ rĩa karine ĩmwe hĩtũku?

²⁸ Ningĩ ririkana atĩ ithondeka rĩa Jehova nĩ rĩrĩ gĩcunjĩ gĩa gũkũ thĩ. Gĩcunjĩ kĩu gĩa gũkũ thĩ, gĩkoragwo na andũ matarĩ akinyanĩru. O na kũrĩ ũguo, ta wĩcirie maũndũ marĩa Jehova ahingĩtie gũkũ thĩ. Thĩinĩ wa thĩ yothe, Jehova nĩ ateithĩtie andũ gwĩka maũndũ gũtarĩ hĩndĩ mangĩhota na hinya wao. (Joh. 14:12) Kũhĩtũkĩra ibuku rĩa Ũthamaki wa Ngai nĩ Ũrathana! no gũtũririkanie ũrĩa wĩra wa kũhunjia ũrutĩtwo na gĩkĩro kĩnene karine ĩmwe hĩtũku. Ningĩ no tũririkane makinya marĩa ithondeka rĩa Jehova rĩkinyũkĩtie harĩ kũruta Akristiano a ma, kũhootana maciira, o na nginya kũhũthĩra tekinolonjĩ ya kĩĩrĩu kũhingia wendi wa Ngai!

²⁹ Tũngĩĩcũrania maũndũ marĩa mothe mekĩtwo megiĩ gũcokia ũthathaiya mũtheru matukũ-inĩ ma kũrigĩrĩria ma mũtabarĩre ũyũ mũũru wa maũndũ, no tuone wega makĩria atĩ ngaari ya Jehova ĩkoretwo ĩgĩthiĩ na mbere. Na githĩ ti mweke wa mwanya mũno gũkorũo tũkĩnyitanĩra na ithondeka rĩrĩ, na tũgĩtungatĩra Mũnene ta ũcio!—Thab. 84:10.

30. Tũkwarĩrĩria ũndũ ũrĩkũ gĩcunjĩ-inĩ kĩrĩa kĩrũmĩrĩire?

³⁰ O na kũrĩ ũguo, no twĩrute maũndũ mangĩ maingĩ kuumana na kĩoneki kĩa Ezekieli. Gĩcunjĩ-inĩ kĩrĩa kĩrũmĩrĩire, tũkwarĩrĩria ‘ciũmbe icio inya irĩ muoyo,’ kana akerubi. Hihi nĩ maũndũ marĩkũ ingĩtũruta megiĩ Mũnene witũ ũrĩ riri, Jehova Ngai?