3-تاراۋ
«قۇدايدان ايان الدىم»
ويباعدار: ەزەكيەلدىڭ اياندا كوكتەگى اربانى كورۋى
1—3. ا) ەزەكيەلدىڭ نە كورىپ، نە ەستىگەنىن بايانداپ بەرىڭىز. (تاراۋدىڭ باسىنداعى سۋرەتتى قاراڭىز.) ٵ) ەزەكيەل كۋا بولعان جاعدايدىڭ ارتىندا قانداي كۇش تۇردى جانە پايعامبار قانداي اسەر الدى؟
ەزەكيەل الىستاعى كەڭ جازىققا قاراپ تۇر. ٴبىر كەزدە كوزى شاراسىنان شىعا جازدادى. ول ٶز كوزىنە ٶزى سەنەر ەمەس! كوكجيەكتەن وتە ەرەكشە ٴبىر داۋىل كوتەرىلىپ كەلە جاتتى. سولتۇستىكتەن سوققان دۇلەي جەل شاشى مەن كيىمىن جۇلقىلاپ جاتسا دا، ونىڭ بار نازارى ٴتونىپ كەلە جاتقان الىپ بۇلتتا ەدى. بۇلتتىڭ ىشىنەن الاۋلاعان وت كورىندى. ونىڭ الاۋى جالتىراعان التىن مەن كۇمىستىڭ قوسپاسىنا ۇقسايتىن. بۇلت ەزەكيەلگە قاراي جاقىنداعان سايىن قالىڭ اسكەردىڭ شۋىنداي داۋىس تا كۇشەيە بەردى (ەزەك. 1:4، 24).
2 وسىلاي ەزەكيەل شامامەن 30 جاسىندا ماڭگى ەستەن كەتپەس العاشقى ايانىن كوردى. ول ەحوبانىڭ قۇدىرەتىن، ياعني كيەلى رۋحىنىڭ عالامات زور كۇشىن سەزىندى. ەزەكيەلدىڭ سول رۋحتىڭ اسەرىمەن كورگەن كورىنىستەرى قازىرگى زاماننىڭ ەڭ كۇشتى دەگەن سپەسەففەكتىلەرى بار فيلمدەرىن باسىپ وزاتىن. مۇنداي اياننان كەيىن بويىندا ەش ٵل قالماي، ەزەكيەل جەرگە ەتپەتتەي قۇلادى (ەزەك. 1:3، 28).
3 ٴبىراق ەحوبانىڭ ماقساتى ەزەكيەلدى جاي اڭ-تاڭ ەتۋ عانا ەمەس ەدى. ەزەكيەل كىتابىندا جازىلعان بارلىق ايان ىسپەتتى بۇل ايان دا ٴمان-ماعىناعا تولى بولاتىن. ونىڭ تەك ەزەكيەلگە عانا ەمەس، ەحوبانىڭ بۇگىندەگى ادال قىزمەتشىلەرىنە دە ايتارى كوپ. قازىر ەزەكيەلدىڭ وسى ٴبىرىنشى اياندا نە نارسەگە كۋا بولعانىنا تولىعىراق توقتالايىق.
سول كەزەڭدەگى احۋال
4، 5. ەزەكيەل ايان العان ۋاقىتتا جاعداي قانداي ەدى؟
4 ەزەكيەل 1:1—3 وقىڭىز. الدىمەن سول كەزدەگى جاعدايعا نازار اۋدارايىق. بۇل ب.ز.ب. 613-جىل ەدى. الدىڭعى تاراۋدان بىلگەنىمىزدەي، ەزەكيەل بابىلعا جەر اۋدارىلعان قانداستارىمەن بىرگە كەبار وزەنىنىڭ ماڭىندا تۇرىپ جاتتى. كەبار قولدان جاسالعان، تەرەڭ ٵرى ارناسى كەڭ كانال بولسا كەرەك. ول ەۆفراتتان تارماقتالىپ، كەيىن قايتادان ەۆفراتقا قۇياتىن.
ەزەكيەل كەبار وزەنىنىڭ ماڭىندا جەر اۋدارىلعان ياھۋديلەرمەن بىرگە تۇرىپ جاتتى (4-ابزاستى قاراڭىز)
5 تۋعان قالالارى يەرۋساليم شالعايدا، بابىلدان 800 دەي شاقىرىم جەردە جاتتى *. كەزىندە ەزەكيەلدىڭ اكەسى ٴدىني قىزمەتكەرلىك مىندەتىن اتقارعان عيباداتحانا بولسا جالعان عيباداتپەن، پۇتتارمەن ارامدالدى. ال ٴداۋىت پەن سۇلەيمەندەي ۇلى پاتشالار وتىرعان تاق ٴسان-سالتاناتىنان ايىرىلدى. سەنىمنەن جۇرداي ەحونيا پاتشا يەرۋساليمنەن جەر اۋدارىلىپ، ونىڭ ورنىنا بابىل پاتشاسىنىڭ قولشوقپارىنا اينالعان زۇلىم سەدەكيا كەلدى (پات. 2-ج. 24:8—12، 17، 19).
6، 7. ەزەكيەلدىڭ جانىنا نە نارسە قاتتى باتتى؟
6 قارا تۇنەك باسقان بۇل كەزەڭ قۇدايدىڭ ادال قىزمەتشىسى ەزەكيەلدىڭ جانىنا قاتتى باتتى. ونىڭ جەر اۋدارىلعان باۋىرلارىنىڭ كەيبىرى: «ەحوبا ٴبىزدى ٴبىرجولاتا تاستاپ كەتكەنى مە؟ جالعان تاڭىرلەرگە تولى بابىل يمپەرياسى تازا عيبادات پەن ەحوبانىڭ جەردەگى بيلىگىن شىنىمەن-اق قۇرتىپ جىبەرە مە؟»— دەپ، سارىۋايىمعا سالىنسا كەرەك.
7 وسى جايتتاردى ويدا تۇتىپ، جەكە زەرتتەۋىڭىزدە ەزەكيەلدىڭ العاشقى ايانىن تىڭعىلىقتى زەرتتەپ كورىڭىز (ەزەك. 1:4—28). ونىڭ ەستىگەنى مەن كورگەنىن ەلەستەتىپ، سەزىمدەرىن تۇلا بويىڭىزبەن سەزىنۋگە تىرىسىڭىز.
ەۆفرات وزەنى (كارحەميستىڭ ماڭى) (5—7-ابزاستاردى قاراڭىز)
تەڭدەسى جوق كولىك
8. ەزەكيەل اياندا نە كوردى جانە ول نەنى بەينەلەيدى؟
8 ەزەكيەل اياندا نە كوردى؟ ول ادام بويىن تۇرشىكتىرىپ، اڭ-تاڭ قىلاتىن وتە ۇلكەن، عالامات ٴبىر كولىك كوردى دەسەك بولادى. ونىڭ سۋرەتتەگەنى كوبىنە ارباعا نە كۇيمەگە ۇقسايتىن. بۇل كولىكتىڭ ايبىندى الىپ ٴتورت دوڭگەلەگى بولدى. دوڭگەلەكتەردىڭ جانىندا ٴتورت ەرەكشە تىرشىلىك يەسى، ياعني ەزەكيەل كەيىنىرەك سيپاتتاعانداي، ٴتورت كەرۋب تۇردى (ەزەك. 10:1). ولاردىڭ توبە جاعىندا مۇز ايدىنىنا ۇقسايتىن جالتىراعان ۇلكەن تاقتا توسەلىپ جاتتى. تاقتانىڭ ۇستىندە ەحوبانىڭ ٶزى وتىرعان سالتاناتتى تاق تۇردى! بۇل اربا ەحوبانىڭ بۇكىلالەمدىك ۇيىمىنىڭ كوكتەگى بولىگىن بەينەلەيدى. بۇلاي دەۋگە نەگىز بولار ٷش جايت بار.
9. ەحوبانىڭ كوكتەگى جاراتىلىستارىنىڭ ۇستىنەن بيلىك جۇرگىزۋى قاي جاعىنان كولىك جۇرگىزۋگە ۇقسايدى؟
9 ەحوبا كوكتەگى جاراتىلىستارىنىڭ ۇستىنەن بيلىك جۇرگىزەدى. بايقاعانىمىزداي، اياندا ەحوبانىڭ وتىرعان تاعى كەرۋبتەردىڭ توبە جاعىندا ورنالاسقان. كيەلى كىتاپتىڭ باسقا جەرلەرىندە دە ەحوبانىڭ تاعى كەرۋبتەردىڭ ۇستىندە يا اراسىندا تۇرعانى ايتىلادى (پاتشالار 2-جازبا 19:15 وقىڭىز؛ مۇس. 2-ج. 25:22؛ ٴزاب. 80:1). ارينە، ەحوبا تۋرا ماعىنادا كەرۋبتەردىڭ ۇستىندە وتىرمايدى. ول وسى قۇدىرەتتى رۋحاني جاراتىلىستاردىڭ ونى كوتەرىپ جۇرۋىنە دە، كادىمگى كولىكپەن جۇرۋگە دە مۇقتاج ەمەس. كەرۋبتەر ەحوبانىڭ بۇكىلالەمدىك بيلىگى ٷشىن قام جەيتىن پەرىشتەلەر. ەحوبا ولاردى نيەتىن جۇزەگە اسىرۋ ٷشىن عالامنىڭ كەز كەلگەن بۇرىشىنا جىبەرە الادى. ولار كوكتەگى كۇللى پەرىشتەلەر سياقتى ەحوبانىڭ شەشىمىن ىسكە اسىرادى (ٴزاب. 104:4). مىنە، وسى ماعىنادا ەحوبا اربانىڭ «جۇرگىزۋشىسى» رەتىندە بارلىق پەرىشتەلەرىن بەينە ٴبىر كولىك ىسپەتتى باسقارىپ، ولارعا بۇكىلالەمدىك بيلىگىن جۇرگىزەدى.
10. كوكتەگى اربا ٴتورت كەرۋبتى عانا ەمەس، اناعۇرلىم كوپ رۋحاني جاراتىلىستى قامتيتىنىن نەدەن بىلەمىز؟
10 ايانداعى ٴتورت تىرشىلىك يەسى كەرۋبتەردى عانا بىلدىرمەيدى. ەزەكيەل كورگەن كەرۋبتەردىڭ سانى تورتەۋ ەدى. جازبالاردا 4 دەگەن سان ادەتتە ٴبىر نارسەنى تۇگەلىمەن، تولىق قامتىعاندا قولدانىلادى. دەمەك، ٴتورت كەرۋب ەحوبانىڭ بۇكىل ادال رۋحاني ۇلدارىن بەينەلەيدى. نازار اۋداراتىن تاعى ٴبىر جايت، كەرۋبتەردىڭ وزدەرى دە، دوڭگەلەكتەر دە كوزدەرگە تولى بولعان. بۇل دەگەنىمىز ٴتورت تىرشىلىك يەسىنىڭ عانا ەمەس، بۇكىل رۋحاني جاراتىلىستىڭ سەرگەك تە قىراعى ەكەنىن بىلدىرەدى. بۇعان قوسا، ەزەكيەلدىڭ اربانى قالاي سيپاتتاعانىنان ونىڭ كولەمى اسا ۇلكەن ەكەنىن بىلۋگە بولادى (ەزەك. 1:18، 22؛ 10:12). ٴيا، ەحوبانىڭ ۇيىمىنىڭ كوكتەگى بولىگى ٴتورت كەرۋبتەن دە كوپ رۋحاني جاراتىلىستى قامتيتىنداي وتە ۇلكەن.
اياندا ەحوبانىڭ كوكتەگى ارباسىن كورىپ ەزەكيەل تاڭ-تاماشا بولدى! (8—10 ابزاستاردى قاراڭىز)
11. دانيال قانداي ۇقساس ايان كورگەن جانە بۇدان قانداي تۇجىرىمعا كەلەمىز؟
11 دانيال دا ۇقساس ايان كورگەن. ول بابىلدا ۇزاق جىل تۇتقىندا بولعان. ەحوبا وعان دا ايان بەرىپ، كوكتەگى الەمدى كورسەتكەن. سول اياندا دا ەحوبانىڭ تاعىنىڭ دوڭگەلەكتەرى بولدى. دانيالدىڭ ايانى ەحوبانىڭ كوكتەگى رۋحاني وتباسىنىڭ وتە ۇلكەن ەكەندىگىنە باسا نازار اۋدارادى. دانيال ەحوبانىڭ الدىندا «ميلليونداعان... ٴجۇز ميلليونداعان» پەرىشتەنىڭ تۇرعانىن كورگەن. بۇل پەرىشتەلەر كوكتەگى سوت وتىرىسىنا جينالعانىن ەسكەرسەك، ولاردىڭ ٵرقايسىسىنىڭ تاعايىندالعان ٶز ورنى بولعانعا ۇقسايدى (دان. 7:9، 10، 13—18). ەزەكيەل كورگەن ايان دا وسى رۋحاني جاراتىلىستاردى بەينەلەيدى دەۋ قيسىندى ەمەس پە؟!
12. ەزەكيەلدىڭ ايانى سياقتى وقيعالاردى زەرتتەۋ بىزگە قاي جاعىنان قورعانىش؟
12 «كوزگە كورىنبەيتىن» رۋحاني نارسەلەر جايلى ويلانۋ ٴبىز ٷشىن قورعانىش ەكەنىن ەحوبا جاقسى بىلەدى. ەت پەن سۇيەكتەن جارالعان پەندە بولعاندىقتان، ٴبىز «كوزگە كورىنەتىن»، ياعني تاندىك ٵرى وتكىنشى نارسەلەرگە كوپ ٴمان بەرۋگە بەيىمبىز (قورىنتتىقتارعا 2-حات 4:18 وقىڭىز). شايتان سول بەيىمدىلىگىمىزدى پايدالانىپ، ٴبىزدى تەك ٴتاننىڭ كۇيىن كۇيتتەيتىن ادام ەتكىسى كەلەدى. ونىڭ وسىنداي قىسىمىنا توتەپ بەرۋىمىز ٷشىن، قامقور اكەمىز ەحوبا ەزەكيەلدىڭ ايانى سياقتى وقيعالاردىڭ كيەلى كىتاپقا جازىلۋىن قامدادى. سولاردى زەرتتەۋدىڭ ارقاسىندا ٴبىز ەحوبانىڭ كوكتەگى وتباسىنىڭ اسقاق ۇلىلىعىن ٵردايىم ويدا ۇستايمىز!
«اينالىپ تۇرعان دوڭگەلەكتەر!»
13، 14. ا) ەزەكيەل اربانىڭ دوڭگەلەكتەرىن قالاي سيپاتتاعان؟ ٵ) ەحوبانىڭ تاعىنىڭ دوڭگەلەكتەرى بولعانى نەگە ورىندى؟
13 ەزەكيەل الدىمەن ٴتورت كەرۋبكە نازار اۋدارعان. وسى باسىلىمنىڭ 4-تاراۋىنان بۇل تىرشىلىك يەلەرىنىڭ ەرەكشە ٴتۇر-تۇرپاتى ەحوبا جايىندا نە ايتاتىنىن بىلەمىز. ال قازىر سول كەرۋبتەردىڭ جانىندا ٴبىر-بىردەن تۇرعان دوڭگەلەكتەرگە كوڭىل بۇرايىق. ٴتورت جەردە تۇرعان بۇل دوڭگەلەكتەر ۇلكەن ٴتورتبۇرىش جاساپ تۇردى (ەزەكيەل 1:16—18 وقىڭىز). ولار سارى نە سارعىش جاسىل ٴتۇستى ٴمولدىر حريزوليت تاسىنان جاسالعانداي كورىندى، ٵرى جالت-جۇلت ەتىپ كوزدىڭ جاۋىن الىپ تۇردى.
14 ەزەكيەل اربانىڭ دوڭگەلەكتەرىن ەرەكشە ەكپىن ٴتۇسىرىپ سيپاتتادى. بۇنىسى تۇسىنىكتى دە. كوز الدىڭىزعا دوڭگەلەگى بار پاتشالار تاعىن ەلەستەتىپ كورىڭىزشى. وتە قىزىق، سولاي ەمەس پە؟! ادەتتە تاق بەكىتىلگەن جەرىندە عانا تۇرادى. ونىڭ ۇستىندە وتىرعان پاتشانىڭ دا بيلىگىنىڭ اياسى شەكتەۋلى بولادى. ٴبىراق ەحوبانىڭ باسقا پاتشالاردان ايىرماشىلىعى جەر مەن كوكتەي. ونىڭ بۇكىلالەمدىك بيلىگىنىڭ شەگى دە، شەتى دە جوق (نەح. 9:6). ٴيا، الەمنىڭ ٵمىرشىسى ەحوبا ٶز بيلىگىن كەز كەلگەن جەرگە جۇرگىزە الادى!
15. ەزەكيەل دوڭگەلەكتەردىڭ كولەمى مەن قۇرىلىسىن قالاي سيپاتتادى؟
15 دوڭگەلەكتەردىڭ كولەمى ەزەكيەلدى قايران قالدىردى. ول: «دوڭگەلەك قۇرساۋلارىنىڭ ۇلكەندىگى سونشا — بويىڭدى ۇرەي بيلەيدى»،— دەپ جازدى. جالت-جۇلت ەتىپ، اسپانمەن تالاسقان الىپ دوڭگەلەكتەرگە شالقايا قاراپ تۇرعان ەزەكيەلدى ەلەستەتىپ كورىڭىزشى. ول: «قۇرساۋلاردىڭ تورتەۋى دە اينالدىرا كوزدەرگە تولى ەدى»،— دەپ عاجايىپ جايتقا نازار اۋداردى. الايدا بارىنەن اسىپ تۇسەتىنى دوڭگەلەكتەردىڭ بىرەگەي قۇرىلىسى ەدى. «ٴبىر دوڭگەلەكتىڭ ىشىندە تاعى ٴبىر دوڭگەلەك ورنالاسقانداي كورىنەتىن»،— دەپ سيپاتتادى ەزەكيەل.
16، 17. ا) دوڭگەلەكتىڭ ىشىندە تاعى ٴبىر دوڭگەلەك بولعانىن قالاي تۇسىنۋگە بولادى؟ ٵ) مۇنداي دوڭگەلەكتەرمەن كوكتەگى اربا قالاي جۇرەتىن؟
16 ەزەكيەل كورگەن اياندا ٴبىر دوڭگەلەكتىڭ ٶزى ەكى دوڭگەلەكتەن تۇراتىن. ەكى دوڭگەلەكتىڭ دە ديامەترى بىردەي ٵرى ٴبىر-بىرىمەن تىك بۇرىش جاساپ قيىلىسقان بولسا كەرەك. وسىنىڭ ارقاسىندا «دوڭگەلەكتەر قوزعالعاندا، بۇرىلماي-اق ٴتورت باعىتتىڭ بىرىنە قاراي جۇرە بەرەتىن». مۇنداي دوڭگەلەكتەر كوكتەگى اربا جايىندا نەنى ايان ەتەدى؟
17 دوڭگەلەكتەردىڭ ۇلكەندىگى سونشا — ولار ٴبىر اينالعاندا ٴبىرتالاي القاپتى باسىپ وتەتىن. ەزەكيەلدىڭ سوزدەرىنەن كوكتەگى كولىكتىڭ نايزاعايداي جىلدام جۇرەتىنىن دە اڭعارۋعا بولادى (ەزەك. 1:14). ول — ول ما، ٴتورت باعىتتى دوڭگەلەكتەرىنىڭ ارقاسىندا بۇل كولىك ەپتى قوزعالىپ، باعىتىن وڭاي ٵرى لەزدە وزگەرتەتىن. وسىنداي مانيوۆر جاساي الاتىن مەحانيزمدى جاساپ شىعارۋ — ينجەنەرلەر ٷشىن قول جەتپەس ارمان عانا! كوكتەگى ارباعا باعىتىن وزگەرتۋ ٷشىن جىلدامدىقتى باسەڭدەتۋدىڭ دە، ول تۇگىلى بۇرىلۋدىڭ دا قاجەتى جوق! ٴبىراق ول كەز كەلگەن باعىتقا بەيبەرەكەت جۇرە بەرمەيدى. قۇرساۋلارى كوزدەرگە تولى بولعاندىقتان، بۇل كولىك قاي تاراپقا بەت الماسىن، جان-جاعىن تولىق كورىپ، سەزىپ وتىرادى.
كولەمى وتە ۇلكەن دوڭگەلەكتەر كوز ىلەستىرمەي زۋلايتىن (17-ابزاستى قاراڭىز)
18. دوڭگەلەكتەردىڭ وتە ۇلكەن جانە كوزدەرگە تولى بولعانى نەنى كورسەتەدى؟
18 سونىمەن، ەحوبا ەزەكيەلگە جانە كۇللى ادال ادامدارىنا ٶز ۇيىمىنىڭ كوكتەگى بولىگى جايلى نە ايتقىسى كەلدى؟ وسىعان دەيىن قاراستىرعانىمىزدى تۇيىندەيىك. دوڭگەلەكتەردىڭ جالتىراعان تاستان جاسالعانىن جانە كولەمىنىڭ ۇلكەندىگىن ەسكەرسەك، بۇل ۇيىم داڭقتى دا سالتاناتتى، ٵرى قاستەرلى سەزىم وياتادى. ال دوڭگەلەكتەردىڭ كوزدەرگە تولى بولعاندىعى ۇيىمنىڭ بارلىق ٴمان-جايدى ٴبىلىپ وتىراتىنىن كورسەتەدى. ەحوبانىڭ ٶزى دە ٴبارىن كورىپ وتىرادى (ناق. س. 15:3؛ ەرم. 23:24). بۇعان قوسا، ول سان ميلليونداعان پەرىشتەسىن عالامنىڭ كەز كەلگەن نۇكتەسىنە جىبەرە الادى. ولار بولسا ٴبارىن اسقان مۇقياتتىلىقپەن باقىلاپ، زەردەلەپ، كورگەندەرىن الەمنىڭ امىرشىسىنە باياندايدى (ەۆرەيلەرگە 1:13، 14 وقىڭىز).
ەرەكشە قۇرىلىسىنىڭ ارقاسىندا دوڭگەلەكتەر عاجاپ ەپتىلىكپەن قوزعالاتىن (17، 19-ابزاستى قاراڭىز)
19. كوكتەگى اربانىڭ وتە جىلدام ٵرى وتە ەپتى قوزعالاتىنىنان ەحوبا مەن ونىڭ ۇيىمىنىڭ كوكتەگى بولىگى جايلى نە بىلەمىز؟
19 سونداي-اق ٴبىز كوكتەگى اربانىڭ وتە جىلدام ٵرى وتە ەپتى قوزعالاتىنىن بىلدىك. ەحوبانىڭ ۇيىمىنىڭ كوكتەگى بولىگى ادامي ۇكىمەتتەر مەن ۇيىمداردان قانشالىقتى ەرەكشەلەنەدى دەسەڭىزشى! ولار دۇنيەدەگى كۇردەلى ماسەلەلەردىڭ شەشىمىن كورۋگە دارمەنسىز، ۇنەمى قۇبىلىپ تۇراتىن جاعدايلارعا دا يكەمدەلە المايدى. سول سەبەپتى زاماننان قالىپ ەسكىرىپ، اقىرىندا قۇردىمعا كەتەدى. ال كوكتەگى اربا ونى باسقارىپ وتىرعان ەحوبانىڭ پاراساتپەن ارەكەت ەتەتىن، جاڭا جاعدايعا تەز بەيىمدەلەتىن قۇداي ەكەنىن اڭعارتادى. ەسىمى انىق ايتىپ تۇرعانداي، ەحوبا ٶز نيەتىن جۇزەگە اسىرۋ ٷشىن كىم بولۋ كەرەك بولسا، سول بولا الادى (مۇس. 2-ج. 3:13، 14). مىسالى، ول حالقىن قورعاۋ ٷشىن ايباتتى جاۋىنگەر بولا الادى، سويتە تۇرا، كەشىرىمدى قۇداي رەتىندە، شىن وكىنگەن، جۇرەگى جارالى كۇناكاردى مەيىرىمدىلىكپەن تۇزەتىپ، قايتا اياققا تۇرعىزا الادى (ٴزاب. 30:5؛ يشايا 66:13).
20. نەگە ەحوبانىڭ ارباسى بويىمىزدا قاستەرلى سەزىم وياتۋ كەرەك؟
20 ايانداعى ەحوبانىڭ ارباسى بويىڭىزدا قاستەرلى سەزىم وياتتى ما؟ اربا رەتىندە سۋرەتتەلگەن ەحوبانىڭ ۇيىمى شىنىمەن بار، ٵرى ول ٴدال قازىر ارەكەت ەتىپ جاتىر. ەحوبا دا، ونىڭ ۇلى مەن كۇللى پەرىشتەلەرى دە جانىمىزعا باتقان قيىندىقتارىمىزدى كورمەيدى دەگەن جاڭساق ويعا بەرىلمەيىك. «ەحوبا قاجەت ۋاقىتتا كومەكتەسە المايدى، ۇيىمى دا قۇبىلمالى مىنا دۇنيەدەگى جاعدايلارعا بەيىمدەلە المايدى» دەپ ۋايىمدامايىق. ەزەكيەل كوكتەن «اينالىپ تۇرعان دوڭگەلەكتەر!» دەگەن داۋىستى ەستىگەن ەدى (ەزەك. 10:13). بۇدان ەحوبانىڭ كوكتەگى ارباسى ۇنەمى قوزعالىستا ەكەنىن كورەمىز. وسى ماڭىزدى جايتتى ەستە ۇستاعايمىز. ەحوبانىڭ ٶز ۇيىمىن قالاي باسقارىپ وتىرعانى ٴبىزدى قايران قالدىرادى، سولاي ەمەس پە؟! ال ەحوبانىڭ وزىنە نازار اۋدارىپ، قانداي قۇداي ەكەنى جايلى ويلانساق، بويىمىزدى ودان سايىن قاستەرلى سەزىم كەرنەيدى.
تەڭدەسسىز كولىكتىڭ «جۇرگىزۋشىسى»
21، 22. كوكتەگى اربانىڭ بولشەكتەرى قالاي تۇتاسىپ تۇرعانىن ٴتۇسىندىرىپ بەرىڭىز.
21 ەزەكيەل كوزىن ودان دا جوعارى كوتەرىپ ەدى، «ادامدى تاڭ-تاماشا قالدىراتىن جالتىراعان مۇز ايدىنىنا ۇقسايتىن تاقتا سياقتى بىردەڭەنى» كوردى (ەزەك. 1:22). ٴموپ-ٴمولدىر بۇل تاقتا كەرۋبتەردىڭ توبە جاعىندا، وتە بيىكتە توسەلىپ جاتتى. كولىكتىڭ قۇرىلىسىن بەس ساۋساقتاي بىلەتىن ادامدا مىنانداي سۇراقتار تۋىندايتىن شىعار: «بۇل تاقتا دوڭگەلەكتەرگە بەكىتىلمەسە، ول قالاي تۇر؟ دوڭگەلەكتەردىڭ اراسىندا جۇرگىزگىش بەلدەمە بولماسا، ولار قالاي اينالىپ تۇر؟» ٴبىراق مىنا نارسەنى ەسكەرەيىك: كوكتەگى اربا فيزيكالىق زاڭدارعا تاۋەلدى ەمەس، ول — رۋحاني الەمدى سيپاتتايتىن بەينەلى ماعىناداعى كولىك. ونىڭ ۇستىنە: «تىرشىلىك يەلەرىندەگى رۋح دوڭگەلەكتەردە دە بولدى»،— دەپ جازىلعان (ەزەك. 1:20، 21). كەرۋبتەر مەن دوڭگەلەكتەردەگى بۇل قانداي رۋح؟
22 ارينە، بۇل — عالامداعى ەڭ عالامات كۇش ەحوبانىڭ كيەلى رۋحى! كولىكتى تۇتاس بىرىكتىرىپ، وعان قۋات بەرىپ، بولشەكتەرىن ٴبىر ۋاقىتتا بىردەي قوزعالتىپ وتىرعان — وسى كۇش. ال ەندى وسى كۇشتىڭ يەسىنە، اربانىڭ ۇستىندە وتىرعان «جۇرگىزۋشىگە» نازار اۋدارايىق.
ەزەكيەل سوزبەن ايتىپ جەتكىزۋ مۇمكىن ەمەس نارسەلەردى كورگەن
23. ەزەكيەل ەحوبانى سيپاتتاۋ ٷشىن قانداي سوزدەردى قولداندى جانە نەگە؟
23 ەزەكيەل 1:26—28 وقىڭىز. كوكتەگى اربانى سيپاتتاۋ بارىسىندا ەزەكيەل «ۇقسايتىن»، «سياقتى»، «ىسپەتتەس»، «بىردەڭە» دەگەن سوزدەردى ٴجيى قولدانعانىن بايقايمىز. ال كەلتىرىلگەن تارماقتاردا وسىنداي سوزدەر تىپتەن كوپ. سوعان قاراعاندا، ەزەكيەل سوزبەن ايتىپ ٴتۇسىندىرۋ مۇمكىن ەمەس نارسەلەردى سيپاتتاۋعا تىرىسقان. ول «تاققا ۇقسايتىن»، «جاقۇت تاسى سياقتى بىردەڭەنى» كورگەن ەدى. ەلەستەتىپ كورىڭىزشى، الدىڭىزدا قويۋ كوك ٴتۇستى الىپ جاقۇت تاسىنان تۇتاستاي قاشالعان تاق تۇر! ال ونىڭ «ۇستىندە ادام ىسپەتتەس بىرەۋ وتىر».
24، 25. ا) ەحوبانىڭ تاعىنىڭ اينالاسىنداعى كەمپىرقوساق نەنى ەسىمىزگە سالادى؟ ٵ) كورگەن اياندارى قۇدايدىڭ كەيبىر قىزمەتشىلەرىنە قالاي اسەر ەتكەن؟
24 تاقتىڭ ۇستىندە وتىرعان ەحوبا ەدى. ٴبىراق ول كوزگە انىق كورىنبەدى، ويتكەنى بەلىنەن تومەن جانە جوعارى قاراي وتتاي لاۋلاپ تۇردى. داڭقى مەن سالتاناتى وسىلاي نۇر شاشقان ەحوباعا ەزەكيەل بەتىن الاقانىمەن قالقالاپ، كوزىن سىعىرايتىپ ارەڭ قاراسا كەرەك. ال «ونىڭ اينالاسىنداعى ساۋلە جاڭبىرلى كۇنى بۇلت اراسىنان شىعاتىن كەمپىرقوساققا ۇقسايتىن». بۇل كورىنىستى كورگەندە، ەزەكيەل تاڭ-تاماشا بولدى. جاۋىننان كەيىن زەڭگىر اسپاندى جايناتىپ جىبەرەتىن كەمپىرقوساق كىمدى ٴتانتى ەتپەيدى دەيسىز؟! ول جاراتۋشىمىزدىڭ عالامات سالتاناتىن ويىمىزدا جاڭعىرتىپ تۇرادى. كوك اسپاندا كەرىلگەن ٴتۇرلى-ٴتۇستى بۇل جولاق تاعى ٴبىر جايتتى — ەحوبانىڭ توپان سۋدان كەيىن ادامدارمەن جاساسقان تىنىشتىق پەن بەيبىتشىلىك كەلىسىمىن — ەسىمىزگە سالادى (مۇس. 1-ج. 9:11—16). قۇدىرەتى قانشا شەكسىز بولسا دا، ەحوبا «تىنىشتىقتىڭ قۇدايى» بولىپ قالا بەرەدى (ەۆر. 13:20). تىنىشتىق ونىڭ جۇرەگىندە مەكەندەيدى، ٵرى بۇل تىنىشتىق ونىڭ بارلىق ادال قىزمەتشىلەرىنە دە داريدى.
ەحوبا وتىرعان تاقتىڭ اينالاسىنداعى كەمپىرقوساق تىنىشتىقتىڭ قۇدايىنا قىزمەت ەتەتىنىمىزدى ەسكە سالادى (24-ابزاستى قاراڭىز)
25 ەحوبا قۇدايدىڭ داڭقى مەن سالتاناتىنا كۋا بولعانى ەزەكيەلگە قالاي اسەر ەتتى؟ «مۇنى كورگەندە، مەن جەرگە ەتپەتتەي كەتتىم»،— دەپ جازدى ول. تۇلا بويىن قاستەرلى سەزىم مەن ۇرەي مەڭدەگەن ەزەكيەل جەرگە قۇلاي كەتتى. وزگە دە پايعامبارلار ەحوبادان ايان العاندا ٴدال وسىنداي كۇي كەشكەن. ولار وزدەرىن تۇككە تۇرعىسىز سەزىنىپ، ٴتىپتى ٵل-دارمەننەن ايىرىلعان (يشايا 6:1—5؛ دان. 10:8، 9؛ ايان 1:12—17). ٴبىراق كەيىن ولار كورگەن اياندارىنان ەرەكشە كۇش-جىگەر العان. ەزەكيەل جايىندا دا سولاي دەي الامىز. كيەلى كىتاپتان وسى ىسپەتتى تاراۋلاردى وقىعاندا، ٴبىز دە سونداي اسەر الۋعا تىرىسايىق.
26. كورگەن ايانى ەزەكيەلدى قالاي نىعايتتى؟
26 ەگەر ەزەكيەل بابىلداعى قۇداي حالقىن ۋايىمداپ، ساناسىن كۇماندى ويلار بيلەگەن بولسا، كورگەن ايانى ونى ٴبىر نىعايتىپ تاستاعانى ٴسوزسىز. شىنىمەن دە، قۇداي حالقى يەرۋساليمدە بولا ما، بابىلدا نە باسقا جەردە بولا ما — ەحوبانىڭ عالامات ارباسى ولارعا ٴبارىبىر جەتە الار ەدى! شايتاننىڭ قول استىنداعى ەشقانداي ۇكىمەت كوكتەگى ايبىندى اربانى باسقارىپ وتىرعان قۇدايعا كەدەرگى بولا المايدى! (ٴزابۇر 118:6 وقىڭىز). ەزەكيەل كورگەندەي، اربا ادامزات مەكەنىنە جاقىن جۇرگەن. دوڭگەلەكتەرى ٴتىپتى جەرگە تيگەن! (ەزەك. 1:19). بۇل ەحوبا بابىلعا ايدالعان ادال حالقىنىڭ كۇيىنە بەيجاي قاراماعانىن كورسەتەدى. ولار قاي جەردە جۇرسە دە، ٴسۇيۋشى اكەلەرىنىڭ قامقورلىعىنان شەت قالماعان.
كوكتەگى اربا جانە ٴسىز
27. ەزەكيەل كورگەن اياننىڭ ٴبىز ٷشىن قانداي ٴمانى بار؟
27 ەزەكيەل كورگەن اياننىڭ ٴبىز ٷشىن قانداي ٴمانى بار؟ وتە زور ٴمانى بار دەي الامىز! مىنانى ۇمىتپايىق، شايتان تازا عيباداتقا شابۋىلىن كۇشەيتە بەرمەك. ول ٴبىزدى «ٴبىز جالعىزبىز، كوكتەگى اكەمىز دە، ونىڭ ۇيىمى دا بىزدەن الىستا» دەگەنگە سەندىرگىسى كەلەدى. مۇنداي وتىرىكتىڭ سانامىز بەن جۇرەگىمىزگە ەنۋىنە ەشقاشان جول بەرمەيىك! (ٴزاب. 139:7—12). ەزەكيەل سياقتى قاستەرلى سەزىمگە بولەنۋدىڭ سەبەپتەرى بىزدە دە جەتىپ-ارتىلادى. ارينە، ول سياقتى جەرگە ەتپەتتەي قۇلامايتىن شىعارمىز. الايدا ەحوبانىڭ بۇكىلالەمدىك ۇيىمىنىڭ كوكتەگى بولىگى قانشالىقتى قۇدىرەتتى، جىلدام، ەپتى، بەيىمدەلگىش، سالتاناتتى ەكەنى ٴبىزدى دە قايران قالدىرىپ، تاڭ-تاماشا ەتەدى ەمەس پە؟!
28، 29. ەحوبانىڭ ارباسى ٴبىر ورىندا تۇرماعانى وتكەن عاسىردا قالاي بايقالدى؟
28 ەحوبانىڭ ۇيىمىنىڭ جەردەگى بولىگى دە بار ەكەنىن ەستەن شىعارمايىق. ٴبىراق ٴبىر ايىرماشىلىعى، بۇل بولىگى كەمەلسىز ادامداردان تۇرادى. وسىعان قاراماستان ەحوبا ٶز قىزمەتشىلەرىن قولدانىپ، نەندەي ىستەردى جۇزەگە اسىرعانى جايلى ويلاپ كورىڭىزشى! ارينە، ەحوبانىڭ كومەگىنسىز جۇمىر باستى پەندەلەر دۇنيەجۇزى بويىنشا مۇنداي عالامات ىستەردى اتقارا الماس ەدى (جوح. 14:12). وتكەن عاسىردا ۋاعىز ٸسىنىڭ قانشالىقتى كەڭ كولەمدە جۇرگەنىن «قۇداي پاتشالىعى بيلىك ەتۋدە!» كىتابىنىڭ بەتتەرىنەن كورە الامىز. قۇداي ۇيىمىنىڭ شىنايى ماسىحشىلەرگە ٴتالىم بەرۋدە العا باسقانى، سوت ىستەرىندەگى جەڭىستەرى، قۇداي ەركىن ىسكە اسىرۋ ٷشىن ەڭ زاماناۋي تەحنولوگيالاردى قولدانعانى دا تاڭعالدىرادى!
29 زۇلىم دۇنيەنىڭ سوڭعى كۇندەرىندە تازا عيباداتتى قالپىنا كەلتىرۋ ٷشىن قانداي شارالار جاسالعانىن كورگەندە، ەحوبانىڭ ارباسى ٴبىر ورىندا تۇرماعانىنا انىق كوزىمىز جەتەدى. وسىنداي ۇيىمنىڭ مۇشەسى بولىپ، الەمنىڭ امىرشىسىنە قىزمەت ەتۋ نەتكەن زور مارتەبە دەسەڭىزشى! (ٴزاب. 84:10).
ەحوبانىڭ ۇيىمىنىڭ جەردەگى بولىگى ىلگەرى جىلجۋدا (28، 29-ابزاستى قاراڭىز)
30. كەلەسى تاراۋ نە جايلى بولادى؟
30 ەزەكيەلدىڭ ايانىنان بىلەتىنىمىز بۇل عانا ەمەس. كەلەسى تاراۋدا ايانداعى ەرەكشە ٴتورت «تىرشىلىك يەسىنە»، ياعني كەرۋبتەرگە نازار اۋدارامىز. ولاردىڭ دا ۇلى الەمنىڭ ٵمىرشىسى ەحوبا جايلى ۇيرەتەرى مول.
^ 5-ابزاس 800 دەي شاقىرىم دەگەن ەكى جەردىڭ اراسىن تىكەلەي ولشەگەندەگى اراقاشىقتىق. ٴبىراق بابىلعا ايدالعان ياھۋديلەر اينالما جولمەن ٴجۇرىپ، ودان ەكى ەسە كوپ جۇرسە كەرەك. «بابىلعا اپارعان ۇزاق جول» دەگەن كارتانى قاراڭىز.
