1-3. (a) Lumbununenu vyuma amwene Ezekele nakwivwa. (Talenu muvwimbimbi wakulivanga.) (b) Chuma muka chamulingishile amone vyuma vyakukomwesa, kaha evwile ngachilihi?

ACHISHINGANYEKENU Ezekele nemana mulikundu, kaha mwamwena hahasuku chuma chimwe chakukomwesa chakwivwisa woma. Mwevwa peho yanyamanganda yili nakwiza. Yize peho nayitohwa chikuma, ngocho nayipekumuna jikambu nauvwalo wenyi. Kufumaho mwamona livwi lyalinene chikuma. Livwi kana linakumunyika nge kakahya, kaha kumunyika chacho chili kwijiva nge malolwa andando yayinene. * Omu livwi lili nakupandama kuli ikiye, chivumo chalyo nachivwakana nge vyema vyalizavu lyamaswalale.—Ezeke. 1:4, 24.

² Ezekele aputukile kumona vyuma kanevi vyakukomwesa omu apwile namyaka yakusemuka kafwe 30. Amwene ngwenyi shipilitu yajila yize yapwa “ngolo jaYehova” yapwile hali ikiye. Vyuma vize shipilitu yajila yamulingishile amone nakwivwa vyapwile vyakukomwesa chikuma kuhambakana najivindiyo jakukomwesa vali nakutunga makumbi ano. Chuma vamwenesele  Ezekele chamwivwishile woma nakumulingisa ‘afukame chameso hamavu.’—Ezeke. 1:3, 28.

³ Yehova kasakile kukomwesa kaha Ezekele nachakumwenesa kanako, oloze asakile nawa kumunangula vyuma vyavilemu vyavivulu. Vyakumwenesa vyosena vize vamwenesele Ezekele vyapwile naulumbunwiso waulemu kuli ikiye nakuli vangamba jaYehova vakushishika makumbi ano. Shikaho tushimutwilenu havyuma amwene Ezekele navize evwile.

4, 5. Vyuma muka vyapwile nakusoloka halwola luze Ezekele vamumwenesele chakumwenesa?

⁴ Tangenu Ezekele 1:1-3. Tuvangilenu kushimutwila havyuma vyapwile nakusoloka. Ngana muze twalinangulanga mukapetulu nafumuho, mumwaka wa 613 B.C.E., Ezekele atwaminenga muMbavilone hamwe navakwavo vafunge kukalwiji Kevale. Kalwiji kana apwile wakufula kuvatu, vamufulile kufuma hakalwiji Yufwalate nakuwila cheka hakalwiji youmwe.

⁵ Nganda yaYelusalema yize vafumine ava vafunge yapwile kwakusuku naMbavilone kafwe tunda yajikilomita 800. * Tembele yize azachililenga ise yaEzekele mulimo waupilishitu, vayalumwine jino kupwa chihela chakulemesela makombelo. Kaha litanda lyamwaza lyaupahu lize atwaminenga Ndavichi naSolomone, kalyapwile jino naulemuko. Mwangana Yehoyakine uze ahonene kupwa wakushishika nayikiye apwile hamwe navafunge muMbavilone. Kaha Zetekiya uze amushishile hawangana nayikiye apwile wakuhuka, kaha nawa vapwile nakumulweza vyakulinga kuli mwangana waMbavilone.—Vamya. 2, 24:8-12, 17, 19.

6, 7. Mwomwo ika Ezekele evwililile kupihya havyuma vyapwile nakusoloka?

⁶ Twafwelela ngwetu Ezekele hakupwa lunga walufwelelo, atela evwilenga kupihya hakumona vakwavo vafunge vanazeye kushipilitu kweseka navyuma vyasolokelenga halwola kana.  Twafwelela nawa ngwetu vakwavo vafunge pamo valihulishilenga ngwavo: ‘Uno Yehova natuseze kunahu tahi? Uno echi chiyulo chachipi chavaMbavilone chakundwiza kulemesa tulunga vamakuli nachifumisako kulemesa chamuchano nachiyulo chaYehova hano hamavu tahi?’

⁷ Shikaho omu namupwanga hachilongesa chenu chauka, munahase kutanga mujimbu uze wasolola chakumwenesa chatete vamwenesele Ezekele. (Ezeke. 1:4-28) Nge muli nakutanga mujimbu kana, shinganyekenu nge yenu muli nakumona nakwivwa vyuma vamwenesele Ezekele.

8. Chuma muka vamumwenesele Ezekele, kaha chemanyinyineko ika?

⁸ Chuma muka amwene Ezekele? Amwene chuma chakufwana nge minyau yayinene yize yapwile yakukomwesa, yize vavuluka ngwavo litemba. Litemba kana lyapwile natufumbo vavanene vawana, kuze kwapwile vaka-kuyoya vawana vaze vavuluka ngwavo vakeluve. (Ezeke. 10:1) Helu lyavaze vakeluve hapwile utangatanga wakufwana nge kulusutalu haze hapwile litanda lyaupahu lize atwamineho Yehova. Uno lize litemba amwene Ezekele lyemanyinyineko yika? Lyemanyinyineko chihanda  chaliuka lyaYehova lyamwilu. Mwomwo ika tunambila ngocho? Tushimutwilenu vyuma vitatu vize vyatulingisa twambenga ngocho.

9. Uno usoko atwama nawo Yehova navaka-kuyoya vamwilu wapwa ngachilihi nge minyau yize vamwenesele Ezekele?

⁹ Usoko atwama nawo Yehova navaka-kuyoya vamwilu. Anukenu ngwenu muchakumwenesa vamwenesele Ezekele, litanda lyaYehova lyapwile helu lyavakeluve. Kaha muVisoneka vyeka, Yehova vamusolola natwame helu chipwe mukachi kavakeluve. (Tangenu Vamyangana 2, 19:15; Kulo. 25:22; Samu 80:1) Echi kachalumbununa nge Yehova atwama helu lyavakeluve kwijiva nge ali nakusaka vamuzundule kuli ava vaka-kuyoya vangolo vakushipilituko. Oloze echi chalumbununa nge vakeluve veji kukundwizanga wata wenyi, ngocho eji kuvatumanga vayenga kala kwosena okwo nasake mangana valinge mwaya kujina chenyi. Ngana mwavangelo vosena, vakeluve veji kulinganga vyuma vyosena eji kuvalwezanga Yehova, hakuwana nge vapwa valuwa jenyi. (Samu 104:4) Shikaho chize kutwama helu lyavakeluve chalumbununa nge Yehova ikiye kaha eji ‘kutambukisanga’ vaka-kuyoya vakushipilitu vosena, nakuvalweza vyuma vatela kulinga, kwijiva nge vaka-kuyoya vosena vali muminyau yayinene kaha ali nakuvatambukisa.

10. Mwomwo ika natwambila ngwetu keshi vakeluve vawana kaha vakiko vatwama mulitemba lyaYehova lyamwiluko?

¹⁰ Ezekele amwene kaha vakeluve vawana. Kakavulu muMbimbiliya nambala 4 yemanyinako kuzuka mwosena. Shikaho vaze vakeluve vawana vemanyinako vana vaYehova vakushipilitu vakushishika vosena. Kaha vaze tufumbo navakeluve vosena vapwile  nameso, kulumbununa nge vaka-kuyoya vosena vakushipilitu vapwa vakuvanguluka. Kweseka namuze alumbunwine Ezekele, yize minyau yapwile yayinene chikuma kaha yalingishile vaze vakeluve vasoloke kupwa vavandende. (Ezeke. 1:18, 22; 10:12) Chochimwe nawa, chihanda chaliuka lyaYehova lyamwilu chapwa chachinene chikuma mwomwo mwatwama vaka-kuyoya vavavulu keshi vakeluve vawana kahako.

11. Ndanyele nayikiye vamumwenesele chakumwenesa muka, kaha chatulingisa tukukulule ngwetu ika?

¹¹ Ndanyele nayikiye vamumwenesele vyuma vyamwilu. Kapolofweto Ndanyele atwamine myaka yayivulu muufunge muMbavilone, kaha nayikiye vamumwenesele vyuma vyamwilu. Amwene litanda lyaYehova lili natufumbo. Chakumwenesa kana chasolwele kuvula chavana vaYehova vamwilu. Ndanyele amwene “makombakaji namakombakaji . . . tununu natununu” twavana vaKalunga vanemana kumeso aYehova. Vosena vatwamine muZango Yakusopela, kaha mutu himutu atwamine muchitwamo chenyi vamuhana. (Ndanye. 7:9, 10, 13-18) Echi nachitulingisa tukukulule ngwetu chakumwenesa chize vamwenesele Ezekele chemanyinako vaze vaka-kuyoya vakushipilitu amwene Ndanyele.

12. Mwomwo ika chapwila chachilemu kuli etu kushinganyeka hamujimbu walitemba lyaYehova lize vamwenesele Ezekele?

¹² Yehova atachikiza ngwenyi chapwa chachilemu kuli etu vatu kushinganyekanga havyuma vyakushipilitu vize kaposetolo Paulu avulukile ngwenyi, “vyuma vahona kumona.” Mwomwo ika? Hakuwana nge twapwa tuvatu, shikaho twafwila kushinganyeka ‘havyuma twamona.’ Chakutalilaho, tweji kulizakaminanga havyuma vyasakiwa mukuyoya vize vyapwa vyakatando kakandende kaha. (Tangenu Wavaka-Kolinde 2, 4:18.) Kakavulu Satana afwila kutulingisa tushinganyeke chikuma havyuma vyamukuyoya. Yehova atulweza mijimbu yayivulu yakufwana nge upolofweto waEzekele uze wasolola tanga yayinene atwama nayo mwilu, mangana yitukafwe tufungulule tufuta twaSatana.

13, 14. (a) Ezekele alumbunwine ngachilihi tufumbo vaze amwene? (b) Mwomwo ika litemba lyaYehova lyapwila natufumbo?

¹³ Hakavanga Ezekele ahanjikile hali vakeluve vawana, kaha muKapetulu wamuchiwana mumukanda uno, natukalinangula vyavivulu hali Yehova hakumona omu vasoloka ava vakeluve. Chipwe ngocho Ezekele amwene tufumbo vawana, kaha kusali yakafumbo hikafumbo kwapwile keluve, kaha vatambukilenga mumitamba yosena yiwana chakuzeneka kwalumuka. (Tangenu Ezekele 1:16-18.) Vaze tufumbo vasolokele nge vavatungile namalolwa akulusolite. Awa malolwa apwa ausungwa, kaha nawa eji kukejimanga, ngocho vaze tufumbo vavyakuminenga.

¹⁴ Chakumwenesa vamwenesele Ezekele chashindakanyine chikuma hali vaze tufumbo twalitemba. Hakumona litanda lyawangana lili  natufumbo, hichuma chakukomwesa chiyovo. Mwomwo etu vatu twatachikiza ngwetu litanda lyamwangana lyatwama muchihela chimwe muze eji kutwamanga mwangana nakuyula. Oloze wata waYehova walihandununa naviyulo vyavatu. Kweseka navyuma alinangwile Ezekele, ngolo jaYehova kajatwama noho jakuminako. (Nehe. 9:6) Echi chinakusolola nge ou Mwata Wangolo Josena nahase kuzachisa ngolo jenyi kala kwosena okwo nasake.

15. Vyuma muka amwene Ezekele kutalisa kujila vasolokelelemo tufumbo kana nakutohwa chavo?

¹⁵ Ezekele alikomokelele chikuma hakumona kutohwa chatufumbo. Kaha asonekele ngwenyi: “Tufumbo kana vapwile vakuzandama vakwivwisa woma.” Achishinganyekenu Ezekele nandula mutwe ali nakutala vaze tufumbo vakuvyakuma, vanakunyengumuka muutangatanga. Kaha ambile nawa ngwenyi vaze tufumbo vawana, “vapwile nameso kwosena jingulwishi.” Oloze chasoloka nge chuma chamukomwesele chikuma shina jila vatungilililemo tufumbo kana, kaha alumbunwine ngwenyi: “Vasolokelenga kwijiva nge mukachi muli kafumbo kakwavo.” Uno echi chalumbunwine ika?

16, 17. (a) Mwomwo ika kafumbo hikafumbo wakulitemba apwililile nakafumbo kakwavo mukachi? (b) Uno tufumbo kana twasolola ngachilihi omu yeji kutambukanga minyau yaYehova?

¹⁶ Chasoloka nge kafumbo hikafumbo kaze amwene Ezekele kapwile nakafumbo kakwavo mukachi. Echi chasolola mulimo veji kuzatanga tufumbo kana ngana muze alumbunwine Ezekele ngwenyi: “Omu vatambukilenga, vahashilenga kuya mumitamba yosena yiwana chakuzeneka kwalumuka.” Uno ava tufumbo valumbununa ngachilihi minyau yamwilu yize amwene Ezekele?

¹⁷ Kuzandama chatufumbo kana cheji kulingisanga eyi minyau yitambuke tunda yayisuku halwola lwalundende. Chakumwenesa kana chasolola nge minyau kana yatambukilenga washiwashi nge kuvesa chamuveso. (Ezeke. 1:14) Kaha nawa jila yakukomwesa veji kutambukilangamo ava tufumbo yinalingisa vamanjimela vafwile kutunga tufumbo kana oloze veji kuhonanga. Eyi minyau yeji kuyanga kukala chihela yinasake chakuzeneka kwalumuka. Oloze kayeshi kuya kukala chihela chamuyilako. Meso atwama kuze kutufumbo asolola nge eyi minyau yatachikiza vyuma vyosena vyeji kusolokanga kumitamba yosena.

18. Vyuma muka natulinangula kukutohwa chatufumbo nakuvula chameso aze atwama kutufumbo kana?

¹⁸ Uno vyuma muka Yehova apwile nakunangula Ezekele navatu vosena vakushishika kutalisa kuchihanda chaliuka lyenyi lyamwilu? Tuchishinganyekenu havyuma tunashimutwila. Litemba kana lyapwa lyaupahu kaha nawa lyakukomwesa mwomwo tufumbo twalyo vapwa vavanene kaha nawa vavatungisa namalolwa akukejima. Litemba kana lyatachikiza vyuma vyosena vyeji kusolokanga mwomwo lyatwama nameso kutufumbo twalyo. Meso aYehova eji kumonanga vyuma vyosena. (Vishi. 15:3; Yele. 23:24) Kaha nawa atwama namakombakaji avangelo aze eji kutumanga kukala chihela mangana vakalinge vyuma mwavalweza, nakukekesa kanawa vyuma vyosena mangana vezenga vamulweze.—Tangenu WavaHepeleu 1:13, 14.

19. Uno kutambuka washiwashi chalitemba lyaYehova mujila yakukomwesa chatunangula ika hali Yehova, nahachihanda chaliuka lyenyi lyamwilu?

 ¹⁹ Tunalinangula nge litemba kana lyeji kutambukanga washiwashi kaha nawa mujila yakukomwesa. Evi vyuma tunalinangula vinasolola chihandwa chatwama hachihanda chaliuka lyaYehova lwamwilu, nahajifulumende javatu, namauka veji kutwaminyinanga kuvatu. Jifulumende javatu kajatachikiza mwakukumishila ukalu wamukayeko, kaha nawa nge vyuma vinalumuka veji kuhonanga kuzachilaho washiwashi. Ngocho navakajinongesa mwomwo jinahono kukumisa ukalu wavatu. Oloze litemba lyaYehova lyasolola kanawa omu Yehova eji kwashiwisanga muchima nge vyuma vinalumuka. Ngana muze lyalumbununa lijina lyenyi, nahase kupwa mweshomwo nasake mangana atesemo kujina chenyi. (Kulo. 3:13, 14) Chakutalilaho, nahase kulyalumuna kupwa Liswalale wangolo uze mwalwila vatu jenyi, kaha nahase kwalumuka cheka nakupwa namuchima wakutetela nakukonekela mutu uze nalingi shili nge napihilila nakwalumuka.—Samu 30:5; Isa. 66:13.

20. Mwomwo ika twatela kulikomokela hakumona litemba lyaYehova?

²⁰ Chakumwenesa vamwenesele Ezekele chatela kutulingisa tulihulise ngwetu, ‘Kutala nguli nakulikomokela hakumona litemba lyaYehova tahi?’ Twatela kutachikiza ngwetu eli litemba kana lili nakutambuka noholyapwa. Katwatela kushinganyeka ngwetu Yehova, naMwanenyi, navangelo kavatachikijile ukalu uze uli nakutuhombesako. Oloze twatela kufwelela ngwetu Kalunga keshi kulangisa kutukafwako. Kaha nawa nge vyuma vili mukaye vinalumuka, liuka lyenyi nalyalumunangako vyuma mangana litukafwe. Twatela kutachikiza ngwetu liuka lyaYehova lili nakutambuka lika. Ezekele evwile lizu lyakufuma mwilu nalitambakana ngwalyo: “Enu tufumbo nyengumukenu!” kusolola nge apwile nakulweza tufumbo mangana vatambuke. (Ezeke. 10:13) Kutala kacheshi kupwa chachilemu kushinganyeka omu Yehova ali nakutambukishilamo liuka lyenyiko tahi? Yehova kaha ikiye twatela kuvumbika mwomwo ikiye ali nakulinga vyuma vyakukomwesa muliuka lyenyi.

21, 22. Ika yakwata vihanda vyosena vyalitemba lyaYehova?

²¹ Ezekele alikomokelele hakumona nawa helu lyatufumbo hali “chuma chimwe chakufwana nge utangatanga, chakuvyakuma chikuma nge kulusutalu.” (Ezeke. 1:22) Kaha helu lyamitwe yavakeluve hapwile utangatanga uze wapwile nakuvyakuma chikuma. Mutu uze alinangula kanawa omu yazata minyau nahase kuhulisa vihula vyavivulu hajila vatungilamo minyau tunashimutwila. Chakutalilaho, vamwe vanahase kuhulisa ngwavo: ‘Chuma muka chakwata uze utangatanga watwama helu lyatufumbo? Kaha tufumbo vakuzeneka mingochi (vikungo vyakwata tufumbo) vanahase ngachilihi kutambukila hamwe?’ Twatela kutachikiza ngwetu litemba kana lyapwa lyachifwanyisa, lyemanyinako vyuma vyamwilu. Talenu nawa mazu ano amalemu akwamba  ngwavo: “Shipilitu yize yapwile muli vaze vaka-kuyoya yapwile namutufumbo nawa.” (Ezeke. 1:20, 21) Uno shipilitu muka yapwile nakuzata hali vaze vakeluve nahali vaze tufumbo?

²² Yapwile shipilitu yajila yaYehova, yize yapwa ngolo jajinene mwilu nahamavu. Shipilitu kana yikiko yakwata eyi minyau nakuyihana ngolo jize jeji kuyilingisanga yitambuke kanawa. Kweseka navyumevi tunashimutwila, tutalenu vyuma amwene Ezekele hali uze apwile nakutambukisa lize litemba.

23. Mazu muka azachishile Ezekele hakusaka kulumbununa omu asoloka Yehova, kaha mwomwo ika?

²³ Tangenu Ezekele 1:26-28. Ezekele azachishile mazu akufwana nge “wakufwana,” “[na]chapwile nge,” “[na]chakufwana nge,” ‘nachuma chimwe nge’ hakulumbununa vyuma amwene muchakumwenesa. Shikaho mujivesi kaneji azachishile chikuma mazu kana awa. Echi chasolwele nge chakumwenesa kana chamukomwesele chikuma kaha ahonene namazu akuzachisa hakulumbununa vyuma amwene. Amwene “chuma chimwe chasolokele nge lilolwa lyasafwila, chize chafwanyine nge litanda.” Munahase kulikomokela chikuma hakumona litanda lize vatunga nalilolwa lyalinene lyasafwila. Halitanda kana “hatwamine umwe wakufwana nge mutu.”

24, 25. (a) Uno kongolo uze ajingilikile litanda lyaYehova eji kutwanukisanga ika? (b) Uno vyakumwenesa kana vyakafwile ngachilihi vangamba jaKalunga?

²⁴ Ezekele kalumbunwine kanawa omu asolokele Yehovako, mwomwo Yehova apwile nakuvyakuma naupahu kufuma  hambunda yenyi nakutwala kwishi nakwilu. Achishinganyekenu ou kapolofweto ali nakushishika amone kanawa echi chuma chapwile nakuvyakuma naupahu. Kutwala muze amwene chuma chaukelenga, kaha ambile ngwenyi: “Kuli ikiye kwamunyikile jingulwishi nge kongolo uze ali mulivwi halikumbi lyavula.” Kutala mweji kwivwanga kuwaha nge munamono kongolo tahi? Uze kongolo eji kusololanga nge Tengi yetu atwama naupahu. Kaha nawa eji kutwanukisanga lushiko lwakuunda luze Yehova ashikile omu Livaji lyamumakumbi aNowa lyakumine. (Kupu. 9:11-16) Numba tuhu apwa Kalunga Wangolo Josena, oloze apwa hiKalunga wakuunda. (Hepe. 13:20) Eji kuyulanga mukuunda nakukafwa nawa vaze veji kumuzachilanga nakashishi vapwenga vakuunda.

²⁵ Chuma muka alingile Ezekele omu amwene upahu waYehova Kalunga? Asonekele ngwenyi: “Omu ngwachimwene, ngwafukamine chameso hamavu.” Chuma muka chalingishile Ezekele afukame chameso hamavu? Mwomwo alikomokelele chikuma nakwivwa Kalunga woma. Navapolofweto veka valingile mwomumwe omu Yehova avamwenesele vyakumwenesa vize vyavevwishilenga woma. (Isa. 6:1-5; Ndanye. 10:8, 9; Kuso. 1:12-17) Vyakumwenesa kana vyazamishilenga lufwelelo lwavo. Chikupu vene Ezekele naikiye azamishile lufwelelo lwenyi. Uno kutanga mijimbu yamuMbimbiliya yakufwana ngana nachitukafwa ngachilihi?

26. Chakumwenesa vamwenesele Ezekele chazamishile ngachilihi lufwelelo lwenyi?

²⁶ Kachi nge Ezekele ahuhwasanyine numba nge Kalunga atachikijile ukalu vapwile nakumona vatu jenyi muMbavilone, kahanyi echi chakumwenesa chazamishile lufwelelo lwenyi. Chikupu vene, Kalunga amwenenga vatu jenyi vakushishika kala kwosena kuze vapwile, numba vapwa muYelusalema chipwe muMbavilone. Yehova eji kukafwanga vatu jenyi kala kwosena kuze vali. Hakuwana nge Kalunga ikiye eji kutwaminyinanga liuka lyenyi, ngocho Satana keshi kuhasa kumuhonesako. (Tangenu Samu 118:6.) Kaha nawa Ezekele amwene yize minyau yamwilu yili kwakamwihi navatu mwomwo tufumbo twayo twakwachile hamavu. (Ezeke. 1:19) Echi chasolola nge Yehova azakaminenga chikuma vatu jenyi vakushishika vapwile muufunge. Chamokomoko nakuchihela vapwile, Yehova avakafwilenga.

27. Vyuma muka natulinangula kuchakumwenesa vamwenesele Ezekele?

²⁷ Uno nayetu makumbi ano tunahase kulinangulako yika kuchakumwenesa vamwenesele Ezekele? Tachikizenu ngwenu Satana ali nakuzata nangolo mangana afumbukile kulemesa chamuchano. Ali nakufwila kutukunyula tufwelele ngwetu Setu wamwilu atusuvilila, kaha naliuka lyenyi nawa kalyatukafwako. Kanda kwitavila Satana amikunyule mufwelele vyuma kanevi  vyamakuliko. (Samu 139:7-12) Ngana mwaEzekele, nayetu tuli navyuma vyavivulu vize vyatela kutulingisa tulikomokele hangolo jaKalunga. Numba tuhu katweshi kufukama chameso hamavu ngana muze alingile Ezekeleko, oloze tunahase kulikomokela chikuma hakumona omu chihanda chaliuka lyaYehova lyamwilu chili nakutambuka washiwashi, nakwalumuka nge vyuma vimwe vinalumuka nakuzata mujila yakukomwesa.

28, 29. Vyuma muka vyasolola nge litemba lyaYehova lili nakutambuka?

²⁸ Twatela kutachikiza nawa ngwetu chihanda chikwavo chaliuka lyaYehova chatwama hano hamavu. Muchihanda kana mwatwama vatu vakuhona kukupuka. Chipwe ngocho, achishinganyekenu havyuma nalingi Yehova hano hamavu. Mukaye kosena, Yehova nakafwe vatu jenyi vazate milimo yize kaveshi kuhasa kuzata mungolo javoko. (Yowa. 14:12) Mukanda waWangana waKalunga Unakuyula wasolola kutohwa chamulimo wakwambulula mujimbu wamwaza uze tunazate mumyaka yakuhambakana 100. Achishinganyekenu nawa vyuma linalinginga liuka lyaYehova omu linanangulanga vaka-Kulishitu vamuchano, nomu vanasambenga milonga kujizango jakusopela, nomu liuka linazachisanga makina amakumbi ano mangana litesemo kujina chaKalunga.

²⁹ Hakumona vyuma vyosena evi linatesamo liuka kutalisa kukukindulwisa kulemesa chamuchano mumakumbi ano akukuminyina, vinasolola hatoma nge litemba lyaYehova lili nakutambuka. Ocho kutokwa kana hakupwa muliuka kaneli, nakuzachila Mwata Wakulitulaho Yehova!—Samu 84:10.

30. Vyuma muka natukashimutwila mukapetulu nakavangizaho?

³⁰ Tunahase kulinangula vyuma vikwavo kuchakumwenesa vamwenesele Ezekele. Mukapetulu nakavangizaho natukashimutwila hali vaze “vaka-kuyoya” vawana chipwe ngwetu vakeluve. Natukamona vyuma natukalinangula hali Yehova Kalunga kuvakeluve kana.