1-3. (a) Kuyini uHezekheli akubonayo lakuzwayo? (Khangela umfanekiso osekuqaliseni.) (b) Kuyini okwenza uHezekheli abone umbono futhi usala esizwa njani?

 UHEZEKHELI ume ekhunjini lomfula amehlo akhe ethe nhlo phambili. Kakukholwa akubonayo. Uthi nxa ekhangela abone kuqubuka isiphepho esikhulu, kuvunguze umoya olamandla uvela enyakatho uphephule inwele lezigqoko zakhe. Kusenjalo ubona inkalakatha yeyezi. Eyezini lelo kuphazima umbane okhazimula angathi yinsimbi ecazimulayo eyenziwe ngegolide lesiliva. Iyezi lisondela kuHezekheli ngesiqubu esikhulu, azwe umsindo omkhulu ongathi ngowebutho elihlokomayo. Nxa iyezi lilokhu lisondela kuye, umsindo lawo uqhubeka ukhula.—Hez. 1:4, 24.

² Ngesikhathi kusenzakala konke lokhu, uHezekheli angabe eleminyaka engu-30. Ubona izinto ezimangalisayo angasoze afa azikhohlwa. Uyezwa ukuthi umoya ongcwele kaJehova olamandla amakhulu ususebenza ngaphakathi kwakhe, “isandla sikaJehova” sesiphezu kwakhe. Umoya lo wenza uHezekheli azwe futhi abone izinto ezimangalisayo esingeke sazibona kuloba yiphi ifilimu engenziwa ngabantu lamuhla. Lokho akubonayo kumtshiya ephelelwe  aze azilahle phansi athi mbo ngobuso emhlabathini.—Hez. 1:3, 28.

³ Ayisikho ukuthi uJehova ufuna ukutshiya uHezekheli emangele nje kuphela kodwa uhlose ukuthi athole izifundo ezinengi ezizamnceda, ziphinde zincede labantu abakhonza uJehova lamuhla. Umbono kaHezekheli wokuqala kanye leminye ebhalwe ebhukwini lakhe iyasinceda kakhulu. Khathesi asihloleni lokho okwabonwa nguHezekheli kanye lalokho akuzwayo.

4, 5. UHezekheli wawubona nini umbono lo futhi izinto zazihamba njani eJerusalema?

⁴ Bala uHezekheli 1:1-3. UHezekheli wabona umbono lo ngo-613 B.C.E. Njengoba sibonile esahlukweni esidlulileyo, wayehlala eBhabhiloni labantu bakibo ababethunjiwe. Babehlala eduze lomfula uKhebhari owawugejwe ngabantu usuka emfuleni uYufrathe. Kukhanya angathi emfuleni lo kwakuhamba izikepe futhi phambili wawuphinda uhlangane lomfula uYufrathe.

⁵ Idolobho lakibo eleJerusalema lalikhatshana lomfula uKhebhari ngamakhilomitha angaba yi-800. a Uyise kaHezekheli wayeke wasebenza ethempelini elaliseJerusalema engumphristi. Kodwa ethempelini lelo kwasekusenziwa izinto ezimbi futhi sekukhonzelwa izithombe. Amakhosi ayesebusa eJerusalema ayesenza izinto ezilihlazo. Lanxa umbuso lo wawuhlonitshwa ngesikhathi sikaDavida loSolomoni, khathesi wawusudelelekile. Inkosi yeBhabhiloni yayithumbe inkosi embi uJehoyakhini yayiletha eBhabhiloni, yatshiya ifake uZedekhiya esihlalweni sobukhosi. UZedekhiya wayebusa engaphansi kwenkosi yeBhabhiloni futhi laye wayesenza izinto ezimbi.—2 Amakho. 24:8-12, 17, 19.

6, 7. Kuyini okungabe kwakuzwisa uHezekheli ubuhlungu?

 ⁶ UHezekheli wayeyindoda elokholo, yikho kumele ukuthi wayesizwa ubuhlungu nxa ebona amanye amaJuda engaselakholo ngenxa yalokho okwakusenzakala ngalesosikhathi. Mhlawumbe ayesezibuza ukuthi uJehova usewalahlile yini lokuthi umbuso weBhabhiloni labonkulunkulu bawo bamanga babezakutshabalalisa yini ukukhonza kweqiniso futhi baqede lombuso omele ubukhosi bukaJehova emhlabeni.

⁷ Ukucabangisisa ngalokho okwakusenzakala ngalesosikhathi kuzakunceda ukuthi uwuzwisise kuhle umbono kaHezekheli wokuqala. Okunye okungakunceda yikuqala uwubale wonke umbono lo okuHezekheli 1:4-28. Ngesikhathi uwubala zama ukubona ngelihlo lengqondo lokho uHezekheli akubonayo futhi uzwe lalokho akuzwayo.

8. UHezekheli wabonani embonweni futhi lokhu kwakumelani?

⁸ Ngamafitshane singathi uHezekheli wabonani? Wabona okwakungathi yinqola enkulu eyayilamaviri amane amakhulu. Eceleni kwamaviri lawo kwakulezidalwa zomoya ezine. Ngokuhamba kwesikhathi kwavezwa ukuthi izidalwa lezo ngamakherubhi. (Hez. 10:1) Phezu kwamakhanda azo kwakulento eyayendlalekile eyayingathi ngungqwaqwane. Phezu kwento le kwakulesihlalo sobukhosi esikhazimulayo futhi uJehova uNkulunkulu nguye owayehlezi kuso.  Inqola eyabonwa nguHezekheli imelani? Imela ingxenye yenhlanganiso kaJehova esezulwini. Kasixoxeni ngezinto ezintathu ezenza sitsho njalo.

9. Inqola eyabonwa nguHezekheli embonweni itshengisa njani ukuthi zonke izingilosi zingaphansi kukaJehova?

⁹ Zonke izingilosi zingaphansi kukaJehova. Nanzelela ukuthi embonweni lo isihlalo sobukhosi sikaJehova siphezu kwamakherubhi. Kwamanye amavesi eBhayibhili lakho sitshelwa ukuthi uJehova uhlezi phezu kwamakherubhi kumbe phakathi laphakathi kwawo. (Bala u-2 AmaKhosi 19:15; Eks. 25:22; Hubo. 80:1) Lokhu akutsho ukuthi uJehova uhlezi sibisibili phezu kwamakherubhi loba ukuthi amthwele. Kanti njalo akulanqola engathwala uJehova. Ngakho amavesi la aveza ukuthi amakherubhi ayabusekela ubukhosi bukaJehova lokuthi angawathuma loba ngaphi ukuthi ayekwenza intando yakhe. Ayafanana lezinye izingilosi ngoba lawo ayizinceku zikaJehova futhi enza lokho ayabe ewatshele khona. (Hubo. 104:4) Ngakho nxa iBhayibhili lisithi uJehova uphezu kwezingilosi litsho ukuthi nguye oziqondisayo njengoba enguMbusi wazo. Lanxa izingilosi lezi zizinengi, zisebenza zimanyene. Zonke zingaphansi kwakhe njengenqola eyabonwa nguHezekheli embonweni.

10. Kuyini okutshengisa ukuthi inqola eyabonwa nguHezekheli ayimeli amakherubhi amane nje kuphela?

¹⁰ Inqola le ayimeli amakherubhi kuphela. UHezekheli wabona amakherubhi amane. EBhayibhilini inani leli lijayele ukusetshenziswa  nxa kukhulunywa ngokuphelela loba ngento egoqela konke. Ngakho amakherubhi amane amela zonke izingilosi zikaJehova ezithembekileyo. Nanzelela ukuthi uHezekheli wabona ukuthi amaviri ayegcwele amehlo, lokuthi amakherubhi lawo ayegcwele amehlo. Lokhu kutshengisa ukuthi amakherubhi la amane ayisiwo wodwa abona okwenzakalayo kodwa lazo zonke ezinye izingilosi zikhangele. Kanti njalo indlela uHezekheli achasisa ngayo inqola le itshengisa ukuthi inkulu kakhulu, okokuthi amakherubhi acina ekhanya esemancane. (Hez. 1:18, 22; 10:12) Ingxenye yenhlanganiso kaJehova esezulwini layo inkulu njengenqola uHezekheli ayibonayo, yikho ibunjwa yizo zonke izingilosi ezisezulwini hatshi ngamakherubhi amane kuphela.

11. Yiwuphi umbono uDanyeli aba lawo ohambelana lokaHezekheli futhi lokhu kwenza siphethe ngokuthini?

¹¹ Umbono kaHezekheli uhambelana lokaDanyeli. Umphrofethi uDanyeli wahlala iminyaka eminengi ethunjiwe eBhabhiloni futhi laye wabona umbono otshengisa okusezulwini. Wabona isihlalo sobukhosi sikaJehova silamaviri. Umbono lo wawuveza ukuthi imuli kaJehova esezulwini inkulu kangakanani. UDanyeli wabona izingilosi ‘eziyizinkulungwane eziphindwe ngezinkulungwane lezinkulungwane ezilitshumi eziphindwe ngezinkulungwane ezilitshumi’ zimi phambi kukaJehova. Kwakungathi yinkundla enkulu, ingilosi ngayinye isendaweni yayo. (Dan. 7:9, 10, 13-18) Lokhu kwenza siphethe ngokuthi izingilosi lezi ezabonwa nguDanyeli zibuthene yizo ezimelwa yinqola eyabonwa nguHezekheli embonweni.

12. Ukufunda ngeziphrofetho ezinjengesombono kaHezekheli wenqola yasezulwini kusivikela njani?

¹² UJehova uyakwazi ukuthi kuyasivikela ukuhlala sicabanga ngezinto ezisezulwini. UPhawuli wazibiza ngokuthi ‘yizinto esingaziboniyo.’ Kusivikela njani ukucabanga ngezinto lezo? Thina abantu sijayele ukuhlala sicabanga ‘ngezinto esizibonayo’ loba izinto esizidingayo empilweni lanxa izinto lezo zingezesikhatshana. (Bala u-2 Khorinte 4:18.) USathane uyakwazi ukuthi sinjalo yikho ezama ukusenza siqakathekise izinto zomhlaba ukwedlula ukukhonza uNkulunkulu. UJehova wenza ukuthi eBhayibhilini kubhalwe iziphrofetho ezinjengalesi esikaHezekheli ukuze asincede ukuthi singathatheki ngezinto zomhlaba. Iziphrofetho lezo zenza sicabange ngobukhulu bukaJehova lobemuli yakhe esezulwini.

13, 14. (a) UHezekheli wathi anjani amaviri awabonayo? (b) Kungani kuqondile ukuthi inqola kaJehova ibe lamaviri?

¹³ UHezekheli wathi ebhala lokho ayekubone embonweni, waqalisa ngokuchasisa ngamakherubhi la amane. ESahlukweni 4 sizaxoxa ngokuthi izidalwa lezo lendlela ezikhangeleka ngayo kusifundisani ngoJehova. Eceleni kwamakherubhi la kwakulamaviri amane ayesemakhoneni enqola. (Bala uHezekheli 1:16-18.) Kwakungathi enziwe ngekhrisolithe, ilitshe eliligugu elikhanyiselayo njalo elicazimulayo elilombala ongathi ulithanga. Ayemahle kakhulu futhi ekhazimula.

 ¹⁴ Embonweni lo uHezekheli wakhuluma kakhulu ngamaviri enqola. Wabona isihlalo sobukhosi esasilamaviri. Kodwa lokhu akujayelekanga. Okujayelekileyo yikuthi isihlalo sobukhosi sibe sendaweni eyodwa, lapho inkosi ebusa khona. Kodwa ubukhosi bukaJehova butshiyene kakhulu lobabantu. Ababusi abangabantu ngeke baqhelise imibuso yabo iyefika lapho abafuna khona, kodwa ubukhosi bukaJehova bona akula lapho obuphelela khona. (Neh. 9:6) UHezekheli wafunda ukuthi uJehova unguMbusi wendawo yonke!

15. UHezekheli wathi amaviri enqola ayenganani futhi enziwe njani?

¹⁵ UHezekheli wamangala ebona ubukhulu bamaviri la. Wabhala wathi: “Amaviri la ayemakhulu okumangalisayo.” Mhlawumbe wakhangela phezulu ezama ukubona ukuthi amaviri la acina ngaphi. Kulokunye futhi okumangalisayo akubhalayo ngamaviri la, wathi: “Womane ayegcwele amehlo yonke indawo.” Kodwa okwakumangalisa ukwedlula konke lokhu yindlela amaviri la ayebunjwe ngayo. UHezekheli wawachasisa wathi: “Nxa wawuwakhangele kwakungathi iviri liphakathi kwelinye iviri.” Kuyini okwakusenza ukuthi amaviri la abenjalo?

16, 17. (a) Iviri ngalinye lalibunjwe njani futhi kungani ayenjalo? (b) Amaviri asitshengisani ngenqola kaJehova eyabonwa nguHezekheli?

¹⁶ Kukhanya angathi iviri ngalinye elabonwa nguHezekheli embonweni lalibunjwe ngamaviri amabili, elinye linqume phakathi kwelinye. Yikho uHezekheli wathi echasisa indlela ayehamba ngayo wabhala wathi: “Ayesithi nxa ehamba enelise ukuya kuloba yiliphi icele engazange atshibilike.” Amaviri la asifundisani ngenqola kaJehova eyabonwa nguHezekheli?

¹⁷ Inqola elamaviri amakhulu kangako ingafika khatshana lanxa amaviri ayo ebhode kanye nje kuphela. Yikho inqola eyabonwa nguHezekheli yayihamba ngesiqubu esikhulu kakhulu angathi yikuphazima kombane! (Hez. 1:14) Kanti njalo inqola le yayisenelisa ukuya loba ngaphi ingazange yehlise isiqubu loba ikhone ngoba yayilamaviri anqume phakathi kwamanye. Lanxa omanjinela bengafisa ukwenza amaviri anjalo ngeke baphumelele. Kodwa indlela amaviri la ayenziwe ngayo ayitsho ukuthi inqola le yayiphonguphaphatheka nje igcwale yonke indawo, ingazi lapho eya khona. Yayisenelisa ukubona konke okusemaceleni kwayo lalapho eyakhona ngoba amaviri ayo ayegcwele amehlo.

18. Ubukhulu bamaviri kanye lokuthi ayegcwele amehlo kusifundisani?

¹⁸ Nxa sikhangela lokho esesixoxe ngakho, singathi kuyini uJehova ayefuna uHezekheli lamanye ama-Israyeli ayethembekile bakufunde mayelana lengxenye yenhlanganiso yakhe esezulwini? Ubukhulu bamaviri enqola kanye lokuthi ayakhazimula kutshengisa ukuthi ingxenye yenhlanganiso kaJehova esezulwini iyakhazimula njalo inkulu okwamagama. Amehlo amanengi asemavirini atshengisa ukuthi ibona konke okwenzakalayo. IBhayibhili lisitshela ukuthi amehlo kaJehova lawo abona zonke izinto. (Zaga. 15:3; Jer. 23:24) Kanti njalo ulezingilosi ezinengi angazithuma ukuthi ziye  loba ngaphi lapho afuna khona. Ingilosi lezi ziyenelisa ukuhlolisisa konke okwenzakalayo, besezibuyela kuJehova ziyembikela.—Bala uHebheru 1:13, 14.

19. Isiqubu inqola ehamba ngaso kanye lokuthi iyenelisa ukutshintsha iye loba ngaphi kusifundisani ngoJehova langengxenye yenhlanganiso yakhe esezulwini?

¹⁹ Okunye esikubonileyo yikuthi inqola ihamba ngesiqubu esikhulu kakhulu futhi iyenelisa ukutshintsha iye loba ngaphi. Kulomehluko omkhulu phakathi kwengxenye yenhlanganiso kaJehova esezulwini labohulumende babantu kanye lezinhlanganiso zabo. Inhlanganiso zabantu zijayele ukwenza amaphutha nxa zisenza izinqumo njalo ziyehluleka ukutshintsha masinyane zivumelane lezimo. Lokhu kubangela ukuthi ezikwenzayo kucine kungasaphumelelanga. Kodwa okwenziwa yinqola kaJehova kutshengisa ukuthi unguNkulunkulu ozwisisayo futhi otshintshayo ukuze avumelane lezimo. UJehova wenza okuhambelana lengcazelo yebizo lakhe. Angaba yiloba yini ukuze agcwalise inhloso yakhe. (Eks. 3:13, 14) Ngokwesibonelo, angaba liqhawe elilamandla alwele abantu bakhe, aphinde atshintshe abe lesihawu futhi athethelele isoni esiyabe sesiphendukile njalo asiduduze.—Hubo. 30:5; Isaya. 66:13.

20. Indlela inqola kaJehova echasiswe ngayo isifundisani?

²⁰ Esesixoxe ngakho ngombono kaHezekheli kusitshiya sibambe owangaphansi futhi siyihlonipha kakhulu ingxenye yenhlanganiso kaJehova esezulwini. Indlela inqola le echasiswe ngayo isikhumbuza ukuthi uJehova leNdodana yakhe kanye lazo zonke izingilosi bayazibona zonke inhlupho ezingabe zisiqeda amandla. Akumelanga sikhathazeke ngokuthi uNkulunkulu angaphuza ukusincedisa ngalokho esikudingayo. Kanti njalo akumelanga sibone angani inhlanganiso yakhe ingehluleka ukutshintsha ihambelane laloba yisiphi isimo esingaba khona emhlabeni lo oqhubeka usiba mubi. Kufanele sihlale sikhumbula ukuthi inhlanganiso kaJehova ayimanga. Phela uHezekheli wezwa ilizwi elivela ezulwini litshela amaviri ukuthi ahambe aye phambili. Wezwa limemeza lisithi: “Maviri, phambili!” (Hez. 10:13) Iyamangalisa sibili indlela uJehova ayikhokhela ngayo inhlanganiso yakhe. Kodwa okumangalisa kakhulu yilokho iBhayibhili elisitshela khona ngaye ngokwakhe.

21, 22. Kuyini okwenza inqola kaJehova ihlale ibambene?

²¹ UHezekheli wathi ephakamisa amehlo wabona into eyayifanana lesibhakabhaka, ‘eyayicazimula njengongqwaqwane.’ (Hez. 1:22) Isibhakabhaka leso sasendlaleke kuhle phezu kwamakhanda amakherubhi futhi sasikhazimula. Nxa umuntu ebala ngombono lo angazibuza ukuthi: ‘Kuyini okubambe into le esasibhakabhaka ukuthi iqhubeke isemoyeni? Amaviri wona ahamba njani kungela ma-ekiseli (axle) awabambileyo?’ Kodwa khumbula ukuthi inqola esikhuluma ngayo ayisiyo nqola ejayelekileyo, yinqola emela ingxenye yenhlanganiso kaJehova esezulwini. Nanzelela lamazwi la aqakathekileyo abhalwa nguHezekheli: “Umoya owawusebenza  ezidalweni eziphilayo yiwo owawusebenza lasemavirini.” (Hez. 1:20, 21) Kanti yiwuphi umoya lo owawusebenza emavirini lasemakherubhini?

²² Asithandabuzi ukuthi ngumoya ongcwele kaJehova. Umoya lo ulamandla ukwedlula loba yini futhi yiwo owenza ukuthi inqola le ihlale ibambene njalo yenelise ukuya loba ngaphi lapho okumele iye khona. Khathesi asiqhubekeni ngombono kaHezekheli, sizwe ukuthi wamchasisa njani lowo otshayela inqola.

23. Yiwaphi amabala asetshenziswa nguHezekheli ezama ukuchasisa uJehova futhi kungani wasebenzisa wona?

²³ Bala uHezekheli 1:26-28. Ngesikhathi uHezekheli echasisa ayekubone embonweni wayesebenzisa izifaniso. Wayelokhu ebhala esithi “kwakufanana,” “kwakungathi,” futhi “kwakukhanya angathi.” Kodwa emavesini la wawasebenzisa kakhulu amabala la. Kukhanya angani wayezama ukudinga amabala okuchasisa lokho ayekubona kodwa kwakunzima ukuwathola. Wathi wabona ‘okwakungathi lilitshe lesafire futhi kwakufanana lesihlalo sobukhosi.’ Isihlalo sobukhosi leso sasisihle kakhulu! Phela kukhanya angathi sasenziwe ngenkalakatha yelitshe lesafire eliluhlaza okwesibhakabhaka. UHezekheli waqhubeka wathi: “Owayehlezi khonale phezulu esihlalweni sobukhosi wayengathi ngumuntu.”

24, 25. (a) Umchilowamakhosikazi owawugombolozele isihlalo sobukhosi sikaJehova usikhumbuzani? (b) Ukubona imibono evela kuJehova kwawanceda njani amadoda akudala ayelokholo?

 ²⁴ Lapha uHezekheli wayesitsho uJehova. Kodwa wayengamboni kuhle ngenxa yokuthi kusukela ekhalweni lwakhe kusehla kusiya phansi kwakungathi ngumlilo, futhi kusukela ekhalweni lwakhe kusiya phezulu kwakuyibunkanyankanya bodwa. Akumcabange umphrofethi lo efaka isandla sakhe ebunzini evala amehlo ukuze angaphandlwa. Okokucina uHezekheli akubonayo wakuchasisa wathi: “Lapho ayekhona kwakuyibunkanyankanya indawo yonke, kungathi ngumchilo wamakhosikazi emayezini nxa kusina izulu elikhulu.” Nxa ubona umchilowamakhosikazi esibhakabhakeni uzwa njani? Ubuhle bawo busikhumbuza ukuthi uMdali wethu ulenkazimulo emangalisayo. Umchilowamakhosikazi uphinda usikhumbuze isivumelwano sokuthula uJehova asenza ngemva kukaZamcolo. (Gen. 9:11-16) Lokhu kutshengisa ukuthi lanxa uJehova elamandla amakhulu, unguNkulunkulu wokuthula. (Heb. 13:20) Uyakuthanda kakhulu ukuthula futhi ufuna bonke abantu abamkhonzayo babelokuthula.

²⁵ UHezekheli wezwa njani ebona inkazimulo kaJehova uNkulunkulu? Wabhala wathi: “Ngathi ngikubona lokho ngazilahla phansi ngathi mbo ngobuso emhlabathini.” Uvalo lwamtshaya lwameqa uHezekheli, waze wazilahla phansi. Labanye abaphrofethi benza njalo ngesikhathi bethola imibono evela kuJehova. Kukhanya ababekubona kwakubatshiya bephelelwe futhi bengelamandla. (Isaya. 6:1-5; Dan. 10:8,9; Isam. 1:12-17) Kodwa lokho uJehova ayebatshengisa khona kwakuluqinisa ukholo lwabo. Ngakho asithandabuzi ukuthi umbono lo wamqinisa loHezekheli. Manje thina kusinceda ngani ukubala izindaba ezinje ezibhalwe eBhayibhilini?

26. Umbono kaHezekheli ungabe wamqinisa njani?

²⁶ Kungenzakala ukuthi uHezekheli wayekhathazekile ngesimo abantu bakibo ababekuso eBhabhiloni. Kodwa umbono lo wamqinisa ngoba wenza kwamcacela ukuthi inqola kaJehova emangalisayo yayingafika loba ngaphi. UJehova wayengabanceda abantu bakhe kungelani lokuthi baseJerusalema loba baseBhabhiloni kumbe kwenye indawo. USathane labantu bakhe babengeke benelise ukumelana loNkulunkulu olamandla oqondisa inqola le yasezulwini. (Bala iHubo 118:6.) UHezekheli wabona lokuthi inqola yayingekho khatshana labantu ngenxa yokuthi amaviri ayo ayethinte emhlabeni. (Hez. 1:19) Lokhu kwakutshengisa ukuthi uJehova wayelendaba labantu bakhe abathembekileyo ababethunjiwe. Wayezahlala ebathanda futhi ebancedisa.

27. Umbono kaHezekheli usinceda njani lamuhla?

²⁷ Umbono owabonwa nguHezekheli uyasinceda yini lamuhla? Khumbula ukuthi khathesi uSathane usesilwa ngamandla efuna ukuqeda ukukhonza kweqiniso. Ufuna sizikhangelele phansi, sicabange ukuthi kasibantu balutho lokuthi uJehova kasithandi njalo  inhlanganiso yakhe ayilandaba lathi. La ngamanga aluhlaza tshoko okungamelanga siwakholwe ngitsho. (Hubo. 139:7-12) Ingxenye yenhlanganiso kaJehova esezulwini iyenelisa ukufika loba ngaphi lokwenza loba yini njalo iyakhazimula. Amandla ayo lesiqubu sayo kuyamangalisa. Lanxa thina singeke sizilahle phansi njengoHezekheli, ukucabangisisa ngobukhulu bayo langezinto ezenzayo kusitshiya sibambe owangaphansi.

28, 29. Kuyini okutshengisa ukuthi inqola kaJehova ibihamba ngesiqubu esikhulu eminyakeni engu-100 edlulileyo?

²⁸ Kodwa khumbula ukuthi inhlanganiso kaJehova ikhona lasemhlabeni. Ingxenye yenhlanganiso kaJehova esemhlabeni ibunjwa ngabantu abalesono. Lanxa kunjalo kunengi uJehova asekwenzile lapha emhlabeni. Unika abantu bakhe amandla okwenza imisebenzi emikhulu ababengeke benelise ukuyenza bengancediswa nguye. (Joh. 14:12) Nxa ungabala ibhuku elithi UMbuso KaNkulunkulu Usubusa! uzabona ukuthi kwenziwe umsebenzi wokutshumayela omkhulu kangakanani eminyakeni engu-100 edlulileyo. Lendlela abantu bakaJehova abafundiswa ngayo iqhubeka ithuthukiswa. Kanti njalo manengi amacala esinqobe kuwo emithethwandaba, okwenza ukuthi umsebenzi wethu ube semthethweni. Sisebenzisa lezempucuko ukuze umsebenzi woMbuso uhambe ngesiqubu esikhulu.

²⁹ Kunengi sibili osekwenziwe ukuze kuvuselelwe ukukhonza kweqiniso kulezinsuku zokucina ezimbi kangaka. Lokhu kwenza kube segcekeni ukuthi inqola kaJehova iyahamba. Kuyisibusiso esikhulu ukuba senhlanganisweni le emangalisayo lokukhonza iNkosi Enkulu uJehova!—Hubo. 48:10.

30. Sizaxoxa ngani esahlukweni esilandelayo?

³⁰ Kodwa zinengi izifundo esizithola embonweni kaHezekheli. Esahlukweni esilandelayo sizaxoxa ‘ngezidalwa ezine eziphilayo’ ezibizwa langokuthi ngamakherubhi. Sizabona ukuthi kuyini ezingasifundisa khona ngeNkosi Enkulu uJehova.