1-3. (a) Chaza loko Hezekeli lakubonako nalakuvako. (Buka sitfombe lesisekucaleni kwalesehluko.) (b) Abevelaphi lamandla lenta Hezekeli wabona letintfo, futsi watsintseka njani?

HEZEKELI uphonsa emehlo akhe khashane, endzaweni lebekile lenesihlabatsi. Uyafifiyela, aphindze avule emehlo. Akakukholwa loku lakubonako. Lakuphelela emehlo akhe khona, kubonakala ngatsi kuta siphepho. Kodvwa lesi akusiso siphepho lesivamile. Njengobe umoya lochamuka enyakatfo uphephula tinwele takhe futsi uphephetelisa netimphahla takhe, ubona lifu lelikhulu lelesabekako. Kulelifu kunembane lomanyatako, futsi kumanyata kwawo kumkhumbuta litje lelitsite leliligugu. * Njengobe lelifu lisondzela ngekushesha, kuvakala umsindvo lochubeka ukhula—lofana nemsindvo welibutfo lelikhulu lemphi.—Hez. 1:4, 24.

² Lelijaha lelineminyaka lengaba ngu-30 budzala, licala kubona tintfo lelingeke lize litikhohlwe ekuphileni kwalo. Liva “emandla aJehova” asetikwalo, lokungemandla emoya longcwele waJehova lelingeke likhone kuwabalekela. Loko lomoya longcwele lotawenta lelijaha likubone futsi likuve kutawumangalisa kwendlula nobe ngumiphi imisindvo netitfombe letikhetsekile letentiwa bantfu bemafilimu lamuhla. Lombono utawushiya Hezekeli agucile,  atsintse ngebuso emhlabatsini futsi amangele kakhulu.—Hez. 1:3, 28.

³ Nanobe kunjalo, Jehova bekacabanga lokungetulu nje kwekumane ashiye lelijaha limangele. Umbono waHezekeli wekucala—njengayo yonkhe leleminye imibono lebhalwe encwadzini yakhe lesiphrofetho—beyisho lokutsite kuye, kanye nasetincekwini taJehova letetsembekile lamuhla. Ngako asesihlolisise kutsi Hezekeli ubonani futsi uvani.

4, 5. Besinjani simo ngalesikhatsi Hezekeli abona lombono?

⁴ Fundza Hezekeli 1:1-3. Ase sicale sicabange ngekutsi bekukunini futsi bekwentekani. Bekungumnyaka wa-613 B.C.E. Njengobe sifundzile esehlukweni lesisuka kuso, Hezekeli bekaseBhabhulona ahlala nebantfu lebekatfunjwe nabo endzaweni lebeyiseceleni kwemfula iKhebari, lokungenteka bekungumfula lobewuphambukiswe bantfu emfuleni lomkhulu iYufrathe futsi bewuphindze uhlangane nawo ngentasi.

⁵ Lidolobha lalabantfu lebebebatfutjiwe, lokuyiJerusalema, belikhashane ngemakhilomitha langu-800. * Lithempeli lapho babe waHezekeli wake waba ngumphristi khona, bese lingcoliswe kukhonta kwemanga kanye nekukhonta tithico. Sihlalo sebukhosi lebesiseJerusalema lapho Davide naSolomoni bake babusa khona besesitselwe ngelihlazo. INkhosi Jehoyakhini lete kukholwa nayo beyiseBhabhulona nalabatfunjiwe. Sedekiya lowabusa esikhundleni sakhe bekalawulwa yinkhosi yaseBhabhulona futsi bekayindvodza lekhohlakele.—2 Khos. 24:8-12, 17, 19.

6, 7. Kungani singatsi Hezekeli wativa aphila esikhatsini lesimatima?

 ⁶ Kumuntfu lonekukholwa njengaHezekeli, lesi bekusikhatsi lesimatima kakhulu ekuphileni kwakhe. Kungenteka labanye lebekatfunjwe nabo bebatibuta lemibuto: ‘Jehova sewusishiye siphelane yini? Lombuso waseBhabhulona lomubi kanye nabonkulunkulu bawo bemanga labanyenti batakucedza yini kukhonta lokuhlantekile kwaJehova kanye nekubusa kwakhe emhlabeni?’

⁷ Unalolwati engcondvweni, kungani ungatidadisheli lendzaba ngekutsi ufundze ngaloko Hezekeli lakuchaza mayelana nembono wakhe wekucala? (Hez. 1:4-28) Njengobe wenta njalo, yetama kutibona ngeliso lengcondvo unguHezekeli, ubona tintfo latibona futsi uva tintfo lativa.

8. Yini Hezekeli layibona embonweni, futsi beyimelelani?

⁸ Kulombono sewuwonkhe, yini Hezekeli layibona? Wabona intfo lebeyibukeka njengencola lenkhulu naleyesabekako, lebeyichazwa ngekutsi yinkalishi. Beyinemasondvo lamakhulu lebekahambisana netidalwa temoya letingakavami, ngekuhamba kwesikhatsi letachazwa ngekutsi ngemaKherubhi. (Hez. 10:1) Ngetulu kwawo bekunentfo lenjengemkhatsi, bekucwebetela njengelichwa, futsi ngetulu bekunesihlalo sebukhosi saNkulunkulu lesikhatimulako futsi kuso bekuhleti Jehova matfupha! Kodvwa singatsi lenkalishi beyimelela  ini? Lombono waHezekeli umelela intfo yinye: incenye yenhlangano yaJehova lesezulwini lekhatimulako. Kungani sisho njalo? Cabanga ngemaphuzu lamatsatfu laholela kuleso siphetfo.

9. Buhlobo baJehova netidalwa takhe letisezulwini bufana njani nendlela lokuchazwa ngayo lencola?

⁹ Buhlobo Jehova lanabo netidalwa takhe letisezulwini. Naka kutsi kulombono sihlalo sebukhosi saJehova singetulu kwemakherubhi. Ngendlela lefanako, kuletinye tincenye teliVi laNkulunkulu, Jehova uchazwa ngekutsi uhleti esihlalweni sebukhosi ngetulu kwemakherubhi nobe emkhatsini wawo. (Fundza 2 Emakhosi 19:15; Eks. 25:22; Hla. 80:1) Liciniso likutsi Jehova akahlali ngetulu kwemakherubhi, kube shengatsi udzinga kwetfwalwa tidalwa temoya, futsi akakudzingi kugibela incola. Kodvwa lamakherubhi asekela bukhosi bakhe futsi angawatfuma nobe ngukuphi kuze afeze injongo yakhe. Njengato tonkhe tingilosi taNkulunkulu letingcwele, nawo afeza tincumo letitsetfwe nguJehova njengetisebenti takhe nobe titfunywa. (Hla. 104:4) Kungako-ke kutsiwa Jehova ugibele etikwato tonkhe letidalwa ngobe uyaticondzisa asebentisa bukhosi bakhe kube shengatsi yincola lenkhulu lesebenta ngekuvumelana.

10. Yini lekhombisa kutsi inkalishi yasezulwini inetidalwa letinyenti kwendlula emakherubhi lamane?

¹⁰ Lencola imelela lokungetulu nje kwalamakherubhi. Emakherubhi labonwa nguHezekeli bekamane. LiBhayibheli lisebentisa lesibalo kuze lichaze kuphelela, lokusho kuphelela lokumayela nendzawo  yonkhe. Kuyafaneleka-ke kutsi lamakherubhi lamane bekamelela onkhe emadvodzana aJehova letsembekile emoya. Naka kutsi lamasondvo nalamakherubhi bekugcwele emehlo, lokusho kubona nobe kwati ngelizinga lelisetulu, futsi loko akwentiwa nguletidalwa temoya letine nje kuphela. Indlela Hezekeli lachaza ngayo iveta kutsi lencola yinkhulu kakhulu lokwenta kutsi nalamakherubhi lamangalisako abonakale amancane. (Hez. 1:18, 22; 10:12) Ngendlela lefanako, incenye yenhlangano yaJehova lesezulwini yinkhulu kakhulu futsi inetidalwa letinyenti kwendlula nje emakherubhi lamane.

11. Ngumuphi umbono lofanako lowabonwa nguDanyela, futsi loko kusenta sifike kusiphi siphetfo?

¹¹ Danyela wabona umbono welizulu lofanako. Umphrofethi Danyela waphila sikhatsi lesidze atfunjwe eBhabhulona, futsi naye waniketwa umbono lomayelana nelizulu. Naye embonweni wakhe wabona sihlalo saJehova sebukhosi sinemasondvo. Umbono waDanyela waveta bukhulu bemndeni waJehova losezulwini wetidalwa temoya. Danyela wabona “tinkhulungwane tetinkhulungwane . . . netinkhulungwane letilishumi letiphindvwe katinkhulungwane letilishumi” temadvodzana aNkulunkulu langumoya time embikwaJehova. Betihleti takhe iNkantolo yasezulwini, ngayinye ihleti endzaweni leyabelwe yona. (Dan. 7:9, 10, 13-18) Kunengcondvo kuphetsa ngekutsi umbono waHezekeli bewumelela letidalwa letikhatimulako letibutsene lapha.

12. Kusivikela njani kufundza indzaba yembono waHezekeli wenkalishi yasezulwini?

¹² Jehova uyati kutsi kuvikela tsine kunaka tintfo tasezulwini, ‘lokutintfo letingabonwa,’ njengobe umphostoli Pawula asho. Kungani? Kungobe njengobe sitidalwa tenyama nengati, sivame kunaka kakhulu “tintfo letibonwako,” lokutidzingo tetfu tesikhashana. (Fundza 2 KubaseKhorinte 4:18.) Sathane usebentisa loko kuze asente sicabange ngetidzingo tetfu. Kute simelane naloko, ngelutsandvo Jehova usiniketeke imibhalo lefana nalesiphrofetho saHezekeli kuze asikhumbute ngebuhle bemndeni waJehova losezulwini!

13, 14. (a) Hezekeli uwachaza njani lamasondvo lawabona? (b) Kungani kufaneleka kutsi inkalishi yaJehova ibe nemasondvo?

¹³ Ekucaleni, Hezekeli ukhuluma ngemakherubhi lamane, futsi kuSehluko 4 salencwadzi sitawubona kutsi letidalwa nendlela letibukeka ngayo tisifundzisani ngaJehova. Nobe kunjalo, Hezekeli ubona emasondvo lamane aseceleni kwalamakherubhi futsi bekasetindzaweni letine letenta sikwele lesikhulu. (Fundza Hezekeli 1:16-18.) Bewafanana nekhrisolithe, lokulitje leliligugu lelicwebetela libonakalise ngale futsi umbala walo bewumtfubi, nobe umtfubi sakuba luhlata. Litje laloluhlobo luyacwebetela.

¹⁴ Umbono waHezekeli ukhuluma kakhulu ngemasondvo alenkalishi. Akukavami kutsi sihlalo sebukhosi sibe nemasondvo. Ngalokuvamile  tihlalo temakhosi tite emasondvo futsi tihlala endzaweni yinye, loku kungenca yekutsi emakhosi asemhlabeni akhona kubusa endzaweni yinye. Kodvwa bukhosi baJehova behluke kakhulu emibusweni yebantfu. Njengobe Hezekeli asetawubona, kute umkhawulo emandleni ebukhosi baJehova. (Neh. 9:6) Ecinisweni, Jehova angasebentisa emandla akhe ebukhosi nobe ngukuphi!

15. Yini Hezekeli layinaka mayelana nekwakheka nebukhulu balamasondvo?

¹⁵ Hezekeli wamangaliswa bukhulu balamasondvo. Wabhala watsi: “Emarimu alamasondvo bekaphakeme ngendlela lemangalisako.” Singambona ngeliso lengcondvo aphakamisa inhloko abukisisa lamarimu lamakhulu nalamanyatelako njengobe kuphakama kwawo bekufika esibhakabhakeni. Wabese wengeta naku lokunye lokumangalisako ngalamasondvo: “Lamarimu awo omane bekagcwele emehlo yonkhe indzawo.” Kodvwa kungenteka lebekumangalisa kakhulu yindlela lebekakheke ngayo lamasondvo. Wachaza watsi: “Kubukeka kwawo nendlela lakheke ngayo bekungatsi lelinye lisondvo lisekhatsi kwalelinye.” Bekusho kutsini loko?

16, 17. (a) Kushiwo ngamuphi umcondvo kutsi lenkalishi beyinemasondvo emkhatsini kwalamanye emasondvo? (b) Yini levetwa ngulamasondvo mayelana nekushintjashintja kwalencola yaJehova?

¹⁶ Ecinisweni, lisondvo ngalinye kulawa Hezekeli lawabona, belakhiwa ngemasondvo lamabili lahlangene ngobe lisondvo linye belingene lavundla emkhatsini walelinye, futsi omabili bekahlanganiswe emkhatsini wawo ngemgcala munye losuka etulu uye phansi. Kungako lamasondvo bekahamba ngendlela Hezekeli layichaza ngayo nakatsi: “Nawahamba, abekhona kuya kuto totine tinhlangotsi angagucuki.” Lamasondvo asho kutsini ngencola yasezulwini leyabonwa nguHezekeli?

¹⁷ Emasondvo lamakhulu ngalendlela avala indzawo lenkhulu ngekugicika nje kwawo kanye. Ecinisweni lombono utsi litubane lalencola nayihamba bekungatsi kumanyata kwembane! (Hez. 1:14) Ngetulu kwaloko, kubuka kwawo etinhlangotsini letine lokungakavami kukhombisa indlela langakhona ngayo kushintjashintja nawahamba, futsi kute longakhona kwakha emasondvo lanjalo emhlabeni. Lencola ingaya kunobe nguluphi luhlangotsi ngaphandle kwekwehlisa litubane nobe isuluke! Kodvwa ayimane nje iye nobe ngabe ngukuphi ingaboni. Emehlo lagcwele kulamarimu awuveta ngalokucacile umcondvo wekutsi lencola yati konkhe lokwentekako emaceleni ayo, kuto tonkhe tinhlangotsi.

18. Sifundzani nasibona bukhulu balamasondvo kanye nalamehlo lamanyenti?

¹⁸ Ngako yini Jehova layifundzisa Hezekeli, kanye nabo bonkhe bantfu bakhe labetsembekile mayelana nencenye yenhlangano yakhe lesezulwini? Cabanga ngaloko lesesikubonile kuze kube ngunyalo. Iyakhatimula futsi iyamangalisa, njengobe sesibonile endleleni lamasondvo lamakhulu ngayo nalacwebetela ngayo. Yati konkhe, njengobe kuvetiwe endleleni lamehlo lamanyenti ngayo kulamasondvo. Emehlo aJehova abona tonkhe tintfo. (Taga 15:3; Jer. 23:24) Ngetulu kwaloko, unetigidzi tetingilosi langatitfuma kunobe  nguyiphi indzawo futsi tingafike tihlolisise indzaba bese tibuyisela umbiko eNkhosini yato.—Fundza KumaHebheru 1:13, 14.

19. Litubane kanye nekushintjashintja kwencola yaJehova, kusifundzisani ngaJehova kanye nencenye lesezulwini yenhlangano yakhe?

¹⁹ Ngetulu kwaloko, siyabona kutsi lenkalishi inelitubane lelikhulu futsi ijika nobe nini. Cabanga nje kutsi mkhulu kangakanani umehluko emkhatsini wencenye yenhlangano yaJehova lesezulwini nabohulumende bebantfu, kanye netinhlangano letikhona! Bohulumende bebantfu kanye netinhlangano abakhoni kucatulula tinkinga letisemhlabeni nobe bashintje kute bativumalanise netimo. Ngaleso sizatfu, angeke baphumelele futsi batawubhujiswa. Kodvwa inkalishi yaJehova ikhombisa kutsi Nkulunkulu loyicondzisako uyashintja kute avumelane netimo futsi uyacabangela. Loko siyakubona ngisho nasegameni lakhe njengobe lisho kutsi angaba ngunobe ngabe yini ledzingekako kuze afeze injongo yakhe. (Eks. 3:13, 14) Angashintja ngekushesha abe Lichawe lelinemandla kuze alwele bantfu bakhe, angaphindze ashintje abe ngumuntfu lonemusa naLotsetselela tono futsi lonakekela aphindze advudvute ngisho netoni letiphukile enhlitiyweni letiphedvukako.—Hla. 30:5; Isa. 66:13.

20. Kungani isimangalisa inkalishi yaJehova?

²⁰ Umbono waHezekeli ungahle usente sitibute: ‘Iyangimangalisa yini inkalishi yaJehova?’ Kufanele sikhumbule kutsi lenkalishi imelela intfo lekhona mbamba. Akukafaneli sicabange kutsi Jehova, iNdvodzana yakhe kanye nato tonkhe tingilosi abatiboni tinkinga letisicindzetelako. Akukafaneli sikhatsateke nangekutsi Nkulunkulu wetfu utawephuta kusisita etintfweni lesitidzingako nobe kutsi inhlangano yakhe itawehluleka kushintja kuze ivumelane netimo letimatima kulelive lesiphila kulo. Senta kahle kukhumbula kutsi inhlangano yaJehova ayikemi ndzawonye, ihlale ihamba. Ecinisweni, Hezekeli weva livi livela ezulwini limemeta litsi: “Masondvo hambani!”—lokungumyalo lotjela lamasondvo kutsi achubeke ahamba. (Hez. 10:13) Akusijabulisi yini kucabanga ngendlela Jehova lacondzisa ngayo inhlangano yakhe? Kodvwa lokusijabulisa kakhulu nguJehova matfupha!

21, 22. Singatsi yini lehlanganisa tincenye talenkalishi kuze ingahlukani?

²¹ Nyalo Hezekeli uphakamisa emehlo futsi nakabuka ngetulu kwalamasondvo “bekunalokufana nemkhatsi futsi bekucwebetela njengelichwa lelimhlophe cwa.” (Hez. 1:22) Ngetulu kwetinhloko talamakherubhi bekunemkhatsi lowendlalekile, futsi ucwebetela ngenkhatimulo lebeyibonakalisa ngale. Nyalo kungenteka umfundzi loyicondza kahle indlela imishini lesebenta ngayo sewutibuta imibuto ngalencola. Nasi sibonelo, labanye bangatibuta: ‘Yini lebambe lomkhatsi lowendlaleke ngetulu kwalamasondvo? Lamasondvo asebenta njani kube kute imigcala lewahlanganisa onkhe  ndzawonye?’ Khumbula kutsi lencola ayisebenti ngendlela bantfu labacabanga ngayo, ingumfanekiso, imelela lokutsite lokusendzaweni yemoya. Cabanga futsi nganawa emavi latsi: “Umoya lobewusebenta kuletidalwa bewukhona nakulamasondvo.” (Hez. 1:20, 21) Ngumuphi lomoya lebewusebenta kulamakherubhi nakulamasondvo?

²² Ngaphandle kwekungabata, lona ngumoya longcwele waJehova, lokungemandla lamakhulu endzaweni yonkhe. Lomoya wenta kutsi lencola ingehlukani, uyinike emandla, wente nekutsi ihambe ngekuvumelana. Sinaloko engcondvweni, asilandzelele njengobe Hezekeli abona Loyo locondzisa lenkalishi.

23. Hezekeli usebentisa maphi emagama kute etame kuchaza Jehova, futsi kungani?

²³ Fundza Hezekeli 1:26-28. Endleleni lachaza ngayo lombono, Hezekeli uhle asebentisa emavi latsi “lokubonakala,” “lokufana,” “lokubonakala ngatsi.” Kodvwa kulamavesi uwasebentisa kakhulu lamavi. Kubonakala shengatsi wetama kutfola emagama langawasebentisa kuze achaze tintfo latibona lebekulukhuni kutichaza. Wabona ‘lebekufanana nelitje lesafire futsi bekufanana nesihlalo sebukhosi.’ Uyasibona yini ngeliso lengcondvo sihlalo sebukhosi lesiluhlata ngalokutopele njengesafire? Kuso bekuhleti  lebekubonakala ngatsi Ngumuntfu. Kubukeka kwakhe ‘bekufanana nekwemuntfu.’

24, 25. (a) Usikhumbutani umushi wenkosazana lotungelete sihlalo sebukhosi saJehova? (b) Imibono lenjengalena beyihle iwatsintsa njani emadvodza lanekukholwa?

²⁴ Loku bekubonakala ngatsi ngumuntfu bekungabonakali kahle, ngobe Jehova bekavutsa emalangabi enkhatimulo kusukela elukhalo kuya phansi, nekusuka elukhalo kuya etulu. Singahle simbone ngeliso lengcondvo lomphrofethi afifiyela futsi asinga njengobe abuke loku lokukhatimulako. Ekugcineni Hezekeli ubona lokutsite lokuhle kulombono njengobe atsi: “Bekatungeletwe kukhanya lokukhulu lokufana nemushi wenkosazana loba semafini nalina.” Kuyenteka yini ujabule nawubona umushi wenkosazana? Usikhumbuto lesicacile seMdali wetfu! Lentfo lenhle lemibalabala leba sesibhakabhakeni isikhumbuta ngesivumelwane sekuthula Jehova lasenta ngemuva kwaZamcolo. (Gen. 9:11-16) Ngisho nobe Somandla anemandla lamakhulu, kodvwa unguNkulunkulu wekuthula. (Heb. 13:20) Kuthula kuhlala enhlitiyweni yakhe bese kwendlulela kubo bonkhe labamkhonta ngekwetsembeka.

²⁵ Waba yini umphumela wekubona umfanekiso wenkhatimulo yaJehova Nkulunkulu? Hezekeli wabhala loko lokwenteka watsi: “Ngatsi nangikubona, ngaguca ngatsintsa ngebuso phansi.” Amangele kakhulu futsi agcwele kwesaba Nkulunkulu, Hezekeli wawela phansi emhlabatsini. Nalabanye baphrofethi benta ngendlela lefanako nabatfola imibono levela kuJehova; kungenteka yabenta bativa babancane futsi babanjwe kwesaba. (Isa. 6:1-5; Dan. 10:8, 9; Semb. 1:12-17) Nobe kunjalo, labaphrofethi batfola emandla lamakhulu nabeva loko Jehova labembulela kona. Siyaciniseka kutsi naHezekeli wativa ngaleyondlela. Tsine-ke kungasitsintsa njani kufundza tindzaba letiseBhayibhelini letifana naleti?

26. Kungenteka wamcinisa njani Hezekeli lombono lawubona?

²⁶ Nangabe Hezekeli bekagcwele kungabata kutsi Nkulunkulu utabasita yini bantfu bakhe labaseBhabhulona, kungenteka lombono wamkhutsata. Kuyacaca-ke kutsi bekungenandzaba kutsi bantfu baNkulunkulu labetsembekile bebaseJerusalema, eBhabhulona nobe kulenye indzawo. Bebangeke babe ngephandle kwenkalishi yaJehova lemangalisako! Akhona yini emandla aSathane langakhona kumelana naNkulunkulu locondzisa inhlangano lenjengalena? (Fundza Tihlabelelo 118:6.) Hezekeli waphindze wabona kutsi lenkalishi yasezulwini ayikho khashane nebantfu. Emasondvo ayo ashayisa emhlabeni. (Hez. 1:19) Ngako Jehova bekanendzaba nebantfu bakhe labetsembekile lebebatfunjiwe. Babe wabo lobanakekela ngelutsandvo bekahlale advutane nabo!

27. Umbono waHezekeli usho kutsini kitsi lamuhla?

²⁷ Umbono waHezekeli uyasitsintsa yini tsine lamuhla? Usitsintsa kakhulu! Khumbula kutsi Sathane uhlela kuhlasela kukhonta  lokuhlantekile kwaJehova. Ufuna kusenta sitive silahliwe, sinesitunge, futsi singakhoni kuchumana naBabe wetfu wasezulwini kanye nenhlangano yakhe. Ungacali uvumele emanga lanjalo kutsi ahlale engcondvweni nasenhlitiyweni yakho! (Hla. 139:7-12) NjengaHezekeli, natsi sinato tonkhe tizatfu tekusala simangele. Kona angeke siwe phansi ngebuso njengobe enta. Nanobe kunjalo, akusimangalisi yini kubona emandla, litubane, kushintjashintja, kuvumelana netimo kanye nenkhatimulo lenkhulu yencenye yenhlangano yaJehova lesezulwini?

28, 29. Yini lekhombisa kutsi inkalishi yaJehova beyisolo ihamba kuleminyaka lengu-100 leyendlulile?

²⁸ Khumbula nekutsi inhlangano yaJehova inencenye lesemhlabeni. Kuliciniso kutsi lencenye lesemhlabeni yakhiwa bantfu labanesono. Kodvwa cabanga ngaloko Jehova lakufezile lamhlabeni! Emhlabeni wonkhe, Jehova wente bantfu bakhona kwenta tintfo lebebangeke bakhone kutenta ngemandla abo. (Joh. 14:12) Kufundza incwadzi letsi UMbuso WaNkulunkulu Uyabusa! kungasikhumbuta lizinga lelikhulu umsebenti wekushumayela lowentiwe ngalo kuleminyaka lengu-100 leyengcile. Singakhumbula naloko inhlangano lekwentile nakutiwa endzabeni yekufundzisa emaKhristu eliciniso, ekuphumeleleni etinkantolo, nasekusebentiseni tintfo tebucwephesha takamuva kuze kufezwe intsandvo yaNkulunkulu!

²⁹ Nasikhumbula tonkhe tintfo letentiwe mayelana nekubuyisela kukhonta lokuhlantekile kulamalanga ekugcina alelive lelibi, kuvele kucace nje kutsi inkalishi yaJehova beyisolo ihamba. Kulilungelo lelikhulu kakhulu kuba kulenhlangano nekuba neNkhosi lefana nalena!—Hla. 84:10.

30. Sitawucoca ngani esehlukweni lesilandzelako?

³⁰ Kodvwa kusenalokunyenti lesingakufundza embonweni waHezekeli. Kulesehluko lesilandzelako, sitawubuka kabanti ‘letidalwa letine letiphilako,’ nobe emakherubhi. Singafundzani kuto mayelana neNkhosi yetfu lekhatimulako Jehova Nkulunkulu?