1-3. (a) Hlalosa hore na Ezekiele o bone’ng le ho utloa’ng. (Sheba setšoantšo se qalang.) (b) Ke’ng e ileng ea susumetsa Ezekiele hore a bone pono ee, hona o ile a ikutloa joang ka mor’a hore a e bone?

 EZEKIELE o eme tlekelele! O lahlela mahlo pele mane thoteng e nammeng. O sesefalitse mahlo o leka ho shebisisa hantle. Empa ha a re mahlo tloha! ha a kholoe seo a se bonang. Pele mane maru a matšo a ntse a teteana, ho bonahala ho tla sefefo se matla. Empa sena ha se sefefo feela se tloaelehileng. O utloa moea o matla, o hlabang o hlahang ka leboea o fefolang moriri le liaparo tsa hae. Ho nyoloha maru a maholo a tšosang. Maru ana a fehloa ke lehalima la mollo ’me ho benya ha ’ona ho mo hopotsa tšepe e phatsimang. a Ha maru ana a ntse a atamela Ezekiele ka sekhahla, ho utloahala molumo o ntseng o phahama o kang oa lebotho le leholo la masole a ntseng a tsamaea.—Ezek. 1:4, 24.

² Monna enoa ea lilemo li 30 o bona e ’ngoe ea lipono tse ngata tseo a ke keng a li lebala bophelong. O utloa “matla a Jehova” a le holim’a hae, ke matla a tšabehang a moea o halalelang oa Jehova. Lintho tseo moea oo o tla etsa hore a li bone le ho li utloa ke lintho tse hlollang ka ho fetisisa, mehlolo e fetang hole e hlahang lifiliming life kapa life tseo batho ba li etsang mehleng  ena. Pono ena eo Ezekiele a e bonang e tl’o etsa hore a khumame fatše a sale a ahlame.—Ezek. 1:3, 28.

³ Jehova o ne a sa bontše Ezekiele pono ena hobane feela a batla ho etsa hore a sale a hloletsoe. Pono ena ea pele eo Ezekiele a e boneng e tšoana le lipono tse ling tse hlahang bukeng ena e monate ea boprofeta. Ponong ena ho na le lintho tse ngata tsa bohlokoa haholo tseo a tla ithuta tsona le tseo bahlanka ba Jehova mehleng ena ba tla ithuta tsona. E-re re ke re hlahlobe lintho tsena tseo Ezekiele a li bonang le ho li utloa.

4, 5. Maemo e ne e le afe ha Ezekiele a bona pono ee?

⁴ Bala Ezekiele 1:1-3. A re ke re nahane ka hore na maemo e ne e le afe ha Ezekiele a tla bona pono ena. Selemo e ne e le sa 613 pele ho mehla ea Jesu. Joalokaha re ithutile khaolong e fetileng, Ezekiele o ne a le Babilona a lula pel’a noka ea Kebare le batho bao a neng a hapiloe le bona. Ho bonahala noka ena e ne e le molatsoana o iketselitsoeng ke batho o khelohang nokeng ea Eufrate ebe o boela o khutlela ho eona hape.

⁵ Motse oa batho bana ba hapiloeng e leng Jerusalema o ne o le bohole ba lik’hilomithara tse 800 ho tloha moo ba neng ba le teng. b Tempele e Jerusalema moo ntate oa Ezekiele a neng a kile a sebeletsa teng e le moprista, e ne e se e fetohile sebaka sa borapeli ba litšoantšo le bobolu. Motse ona oo ho oona ho neng ho kile ha busa Davida le Solomone marena a hlomphehang, o ne o se o fetohile mahlabisa-lihlong feela. Morena Jojakine ea  neng a sa tšepahale le eena o ne a hapiloe a isitsoe Babilona. Tsedekia e leng morena ea ileng a mo hlahlama boreneng e ne e le morena ea tsoileng tseleng ea neng a luletse ho huloa ka nko ke morena oa Babilona.—2 Mar. 24:8-12, 17, 19.

6, 7. Ke hobane’ng ha e ka ’na eaba Ezekiele o ile a utloa eka o phela linakong tse boima ka ho fetisisa bophelong ba hae?

⁶ Kaha Ezekiele o ne a rata Molimo, e tlameha ebe nako ena e ne e le e boima ka ho fetisisa bophelong ba hae. E ka ’na eaba ba bang ba Baiseraele ba neng ba hapuoe le eena ba ne ba ipotsa: ‘Na ebe Jehova o re lahletse ruri? Na ebe ’muso oo o khopo oa Babilona ka melimo ea oona e mengata ea bohata o tla hle o felise borapeli ba ’nete le puso ea Jehova lefatšeng?’

⁷ Joale u sa ntse u nahanne ka litaba tseo, ak’u ithute haholoanyane ka taba ena ka hore u bale tlhaloso e qaqileng ea pono ena ea pele eo Ezekiele a e boneng. (Ezek. 1:4-28) Ha u ntse u e bala, leka ho ikenya lieteng tsa Ezekiele, u bone lintho tseo a li boneng u be u utloe le lintho tseo a li utloileng.

8. Ezekiele o ile a bona’ng ponong? Ntho eo a e boneng e ne e emela’ng?

⁸ Ha re akaretsa pono ena, re ka re Ezekiele o bone’ng? O bone koloi e boholo bo makatsang. E ne e e-na le mabili a mane a maholo ’me pel’a ’ona ho eme mangeloi a mane a neng a shebahala ka tsela e sa tloaelehang a hlalosoang e le likerubime. (Ezek. 10:1)  Ka holim’a ’ona ho ne ho e-na le sepaka-paka se seholo se kang leqhoa. Ka holim’a sepaka-paka seo ho ne ho e-na le terone e khanyang ea Molimo eo ho eona ho neng ho lutse Jehova ka boeena. Empa ha e le hantle koloi ee e emela’ng? E emela ntho e le ’ngoe feela e leng karolo e leholimong ea mokhatlo o moholo oa Jehova oa bokahohleng bohle. Ke hobane’ng ha re cho joalo? Bona lintlha tsena tse tharo tse etsang hore re lumele seo.

9. Jehova o amana joang le mangeloi, hona taba eo re ka e tšoantša joang le koloi?

⁹ Kamano ea Jehova le mangeloi. Ponong ena, terone ea Jehova e lutse holim’a likerubime. Litemaneng tse ling tsa Bibele, Jehova o hlalosoa ka tsela e tšoanang. O hlalosoa a lutse teroneng ka holim’a likerubime kapa pakeng tsa tsona. (Bala 2 Marena 19:15; Ex. 25:22; Pes. 80:1) Ha se hore ehlile Jehova o lutse holim’a likerubime tseo joalokaha eka o hloka hore li mo kakase kapa hona hore o hloka ho palama koloi eo. Taba ea hore o lutse ka holim’a tsona e bontša hore likerubime tsena li tšehetsa bobusi ba hae kaha a ka li roma hohle ho phetha thato ea hae. Joaloka mangeloi a mang kaofela, le tsona li sebeletsa Jehova ka ho etsa thato ea hae. (Pes. 104:4) Ka kutloisiso eo, Jehova o lutse holim’a tsona kaofela, oa li laola joalokaha eka ke koloi e le ’ngoe e kholo e kopaneng.

10. Ke’ng e bontšang hore koloi ea Molimo ha e tšoantšetse likerubime tse ’nè feela?

 ¹⁰ Koloi ea Molimo ha e tšoantšetse likerubime feela. Ezekiele o bone likerubime tse ’nѐ. Hangata ka Bibeleng palo ’nѐ e hlalosa ntho e feletseng kapa e koetseng. Ho hlakile hore likerubime tse ’nѐ li emela mangeloi ’ohle a tšepahalang. Hlokomela hore mabili le likerubime tsena li tletse mahlo hohle e leng se bolelang hore mangeloi ’ohle a lula a le chatsi ebile a falimehile, eseng likerubime tsena tse ’nѐ feela. Ha Ezekiele a hlalosa boholo ba koloi ena, re hlokomela hore e ne e le kholo hoo le likerubime li neng li le nyenyane haholo ha li bapisoa le eona. (Ezek. 1:18, 22; 10:12) Ka tsela e tšoanang, karolo e leholimong ea mokhatlo oa Jehova e kholo haholo, e feta hole likerubime tsena tse ’nѐ.

11. Pono ea Daniele e tšoana joang le ea Ezekiele, hona re ka etsa qeto efe?

¹¹ Daniele o ile a bona pono e tšoanang ea leholimo. Moprofeta Daniele o qetile lilemo tse ngata a le botlamuoeng Babilona ’me le eena o ile a bona pono ea leholimo. Ntho e makatsang ke hore ponong ea hae terone ea Jehova e ntse e e-na le mabili. Pono ea Daniele e bua haholo ka lelapa le leholo la Jehova le leholimong. Daniele o ile a bona “likete tsa likete le limilione tse ngata” tsa mangeloi a Jehova a eme ka pel’a hae. A ne a lutse ka pel’a Molimo e le lekhotla, le leng le le leng sebakeng sa lona. (Dan. 7:9, 10, 13-18) Na ha se ntho e utloahalang ho lumela hore pono ea Ezekiele e emela lekhotla le tšoanang la leholimo?

12. Ho ithuta boprofeta bo kang boo ba Ezekiele ba pono ea koloi ea Molimo ho tla re sireletsa joang?

¹² Jehova oa tseba hore re tla sireletseha hafeela re lula re nahana ka lintho tsa leholimo tseo moapostola Pauluse a reng ke “lintho tseo re sa li boneng.” Hobane’ng? Kaha re batho ba nama le mali, re tloaetse ho nahana haholo ka “lintho tseo re li bonang” e leng litlhoko tsa rona tsa nakoana (Bala 2 Bakorinthe 4:18.) Satane o tseba bofokoli boo ba rona ’me o re tšoara hona moo. O etsa hore re qetelle re le batho ba lulang ba nahana ka lintho tseo re li bonang. E le hore re hlole maqiti ana a Satane, Jehova o re file lintho tse ka re thusang tse kang boprofeta bona ba Ezekiele bo re thusang ho tseba lelapa la Jehova le leholo le leholimong.

13, 14. (a) Ezekiele o ile a hlalosa mabili ao a a boneng joang? (b) Ke hobane’ng ha ho nepahetse hore ebe koloi ea Jehova e na le mabili?

¹³ Qalong Ezekiele o ile a shebisisa likerubime tsane tse ’nѐ. Khaolong ea 4 ea buka ena, re tla ithuta hore na likerubime tseo le chebahalo ea tsona e sa tloaelehang e re ruta’ng ka Jehova. Leha ho le joalo, Ezekiele o ile a bona mabili a mane a le pel’a likerubime, ho bonahala a ne a le mahlakoreng a mane. (Bala Ezekiele 1:16-18.) A ne a bonahala a entsoe ka lejoe la bohlokoa la krisolite leo e ka ’nang eaba le ne le bonaletsa hape le le lesehla kapa le le bosehla bo botala. Le ne le le letle ebile le phatsima.

 ¹⁴ Ntho e neng e hlile e hlahelletse haholo ponong ena ea Ezekiele ke mabili a koloi. Kannete e ne e le ntho e sa tloaelehang haholo hore ebe terone e na le mabili. Terone ke ntho eo re tloaetseng e lula nģa e le ’ngoe hobane ho na le moo matla a marena a lefatše a fellang teng. Empa ’Muso oa Jehova o fapane hole le mebuso ea batho. Joalokaha Ezekiele a ne a tla ithuta ha pono ena e ntse e tsoela pele, Jehova o na le matla a ho busa lintho tsohle. (Neh. 9:6) ’Muso oa hae o ka busa kae kapa kae.

15. Ezekiele o ile a bona mabili a le maholo hakae ebile a bopehile joang?

¹⁵ Ezekiele o ne a sa kholoe boholo ba mabili a koloi ena. O ile a re: “Lirimi tsa mabili ao a mane li ne li phahame ka tsela e makatsang.” Re se re ka inahanela Ezekiele e le eo a sheba holimo e le hore a bone lirimi tsena tse phatsimang tse boholo bo fihlang maholimong. O ile a boela a bua ntho ena e makatsang: “Lirimi tsa mabili ao a mane li ne li . . . tletse mahlo ka hohle.” Mohlomong ntho e neng e makatsa ka ho fetisisa ke tsela e sa tloaelehang eo mabili ana a neng a entsoe ka eona. Ezekiele o ile a hlalosa mabili ao tjena: “A ne a bonahala a entsoe joalokaha eka lebili le ka har’a lebili le leng.” Mantsoe aa a bolela’ng?

16, 17. (a) Ho boleloa’ng ha ho thoe lebili le ka har’a lebili le leng? (b) Mabili aa a re ruta’ng ka bokhoni ba koloi ea Jehova ba ho tjeka?

¹⁶ Ho bonahala lebili ka leng leo Ezekiele a le boneng e ne e le mabili a mabeli a kopaneng, le leng le shebile koana, le leng le shebile koana. Ke kahoo a neng a khona ho etsa ntho ena eo Ezekiele a e hlalosang: “Ha a tsamaea, a ne a khona ho ea mahlakoreng a ’ona a mane a sa tjeke.” Mabili aa a re ruta’ng ka koloi eo Ezekiele a e boneng?

¹⁷ Mabili a boholo bo makatsang tjena a ka tsamaea sebaka se selelele a bilikile hanngoe feela. Ha e le hantle, ponong ena ho bonahala hore koloi eo e ne e fofa ka lebelo le kang la lehalima. (Ezek. 1:14) Mabili ana a ikhetha ka ntho e ’ngoe hape. Ha ho na moenjiniere ofe kapa ofe lefatšeng ea ka khonang ho etsa mabili a tšoanang le ana. Koloi ena e khona ho ea mahlakoreng ’ohle e sa hloke ho fokotsa lebelo kapa ho tjeka. Empa ha se hore e tjeka feela e sa shebe hore na e ea hokae. Kaha e na le mahlo liriming, e khona ho bona ntho e ’ngoe le e ’ngoe e e pota-potileng.

18. Re ka ithuta’ng ka boholo ba mabili a koloi eo le ka mahlo a eona a mangata?

¹⁸ Ke’ng eo Jehova a neng a e ruta Ezekiele le bahlanka bohle ba hae ka karolo e leholimong ea mokhatlo oa hae? Nahana ka seo re seng re ithutile sona ho fihlela hona joale. Mabili ao a phatsimang a maholo aa bontša hore karolo e leholimong ea mokhatlo oa Jehova e kholo ebile e lokela ho hlomphuoa. Taba ea hore ebe mabili a tletse mahlo ka hohle ea bontša hore karolo e leholimong ea mokhatlo oa Jehova e bona ntho e ’ngoe le e ’ngoe. Esita le Jehova ka boeena o bona ntho e ’ngoe le e ’ngoe.  (Liprov. 15:3; Jer. 23:24) Hape o na le mangeloi a limilione a mo sebeletsang ao a ka a romang kae kapa kae moo a batlang. Mangeloi ana a sheba ntho e ’ngoe le e ’ngoe ka hloko ebe a khutlisetsa tlaleho ho ’Musi oa ’ona.—Bala Baheberu 1:13, 14.

19. Lebelo la koloi ea Jehova le taba ea hore e khona ho tjekela hohle li re ruta’ng ka Jehova le ka karolo e leholimong ea mokhatlo oa hae?

¹⁹ Hape rea ithuta hore lebelo la koloi ena lea tšabeha ebile e khona ho tjekela hohle. Nahana ka phapang e teng lipakeng tsa karolo e leholimong ea mokhatlo oa Jehova le mebuso ea batho le mekhatlo ea bona. Mebuso le mekhatlo ea batho ha e tsebe ho rarolla mathata a lefatše ebile ha e khone ho fetoha le maemo. Ka lebaka leo, e ke ke ea atleha ebile e tla fela. Empa koloi ea Jehova eona e bontša hantle hore e khannoa ke Molimo ea bohlale le ea fetohang le maemo. Lebitso la hae ka bolona lea bontša hore e ka ba eng kapa eng e hlokahalang e le hore a phethahatse morero oa hae. (Ex. 3:13, 14) Mohlala, a ka fetoha ka ho panya ha leihlo hore e be Mohlabani ea matla ea loanelang batho ba hae. A ka boela a fetoha kapele, ea e-ba Molimo ea mohau ea tšoarelang libe tsa rona le ea thobang lipelo tsa baetsalibe ba bakileng.—Pes. 30:5; Esa. 66:13.

20. Ke hobane’ng ha re lokela ho hlompha koloi ea Jehova?

²⁰ Boemong bona pono ea Ezekiele e ka etsa hore e mong le e mong oa rona a ipotse: ‘Na kannete ke hlompha koloi ee ea Jehova?’ Re lokela ho hopola hore koloi ena e emela lintho tse etsahalang hona joale. Le ka mohla re se ke ra nahana hore Jehova, Mora oa hae le mangeloi ’ohle ha ba bone mathata a re nyahamisang. Hape re se ke ra tšoenyeha hobane re nahana hore Jehova o tla lieha ho re fa lintho tseo re li hlokang kapa ra nahana hore mokhatlo oa hae o tla hloleha ho fetoha le maemo lefatšeng lena leo re sa tsebeng hore na ho tla etsahala’ng hosane. Re lokela ho hopola hore mokhatlo oa Jehova o sebetsa ka thata ebile o lula o hatela pele. Ezekiele o ile a utloa lentsoe le hlahang leholimong le reng: “Mabili tsamaeang!” (Ezek. 10:13) Ha re nahana ka tsela eo Jehova a tsamaisang mokhatlo oa hae ka eona, na ha re utloe re hloletsoe? Empa re utloa re hlolloa le ho feta ha re nahana ka Jehova ka boeena.

21, 22. U ka hlalosa joang hore na ke’ng e tšoereng koloi?

²¹ Ezekiele o ile a sheba ka holim’a mabili ao eaba o bona “ntho e kang sepaka-paka se benyang joaloka leqhoa ebile se hlolla.” (Ezek. 1:22) Sepaka-paka seo se ne se le holimo haholo le lihlooho tsa likerubime, se khanya ebile se benya. Boemong bona motho ea nang le litsebo tsa mechine a ka ’na a ipotsa lipotso li hana ho fela ka koloi ena. Mohlala, a ka ’na a re: ‘Ke’ng e tšoereng sepaka-paka see hore se lule se le ka holim’a mabili? Mabili aa a khona joang ho ea pele empa a sa kopanngoa ka liase?’ U hopole  hore koloi ena ke koloi ea tšoantšetso e bontšang lintho tse etsahalang leholimong. Kahoo ha e sebetse ka tsela e tšoanang le eo likoloi tse entsoeng ke batho li sebetsang ka eona. Hape hlokomela ntlha ena ea bohlokoa: “Moea o neng o tataisa mangeloi ao o ne o boetse o le mabiling.” (Ezek. 1:20, 21) Ke moea ofe oo o neng o tataisa likerubime ebile o le mabiling?

²² Ha re hloke le ho ipotsa, e ne e le moea o halalelang oa Jehova, moea o matla ka ho fetisisa bokahohleng bohle. Moea oo ke oona o tšoereng koloi ena. O e fa matla ebile oa e laola hore e tsamaee ka tsela e hlophisehileng hantle. Re sa ntse re nahanne ka taba ena, a re ke re bueng ka hore na Ezekiele o re’ng ka ea ntseng a khanna koloi ena.

23. Ezekiele o sebelisa lipoleloana life ho leka ho hlalosa Jehova? Hobane’ng?

²³ Bala Ezekiele 1:26-28. Ha Ezekiele a hlalosa pono ena, ka makhetlo a ’maloa o sebelisa lipoleloana tse kang “ntho e shebahalang joaloka,” “ho bonahala eka” le “ntho e kang.” Empa litemaneng tsena o li sebelisa hangata le ho feta. Ntho eo Ezekiele a e bonang e mo makatsa hoo a sitoang ho fumana mantsoe a nepahetseng a ho e hlalosa. O bona “ntho e shebahalang joaloka terone e entsoeng ka lejoe la safire.” Nahana feela terone e  entsoeng ka lejoe le leholo le boputsoa bo tebileng la safire! Holim’a eona “ho ne ho bonahala eka ho lutse motho.”

24, 25. (a) Mookoli o pota-potileng terone ea Jehova o re hopotsa’ng? (b) Lipono tse kang ee li ile tsa etsa hore bahlanka ba bang ba Jehova ba ikutloe joang?

²⁴ Ezekiele o ne a bona hore ho na le motho teroneng feela a sa mo bone hantle hobane ho tloha thekeng ho ea tlase le ho tloha thekeng ho ea holimo, Jehova o ne a ntša malakabe a khanyang. Re se re ka inahanela Ezekiele a tlameha ho penya mahlo le ho theha meriti ha a ntse a shebile ntho eo e khanyang e kang motho. Ka mor’a moo, Ezekiele a bona ntho ena e ileng ea mo qetela: “Ho ne ho e-na le khanya e mo potolohileng e joaloka ’mookoli o bang teng marung ha pula e na.” Na ha u thabe ha u bona mookoli? Mookoli oo o re hopotsa kamoo Jehova a khanyang kateng. Hape o ka re hopotsa selekane sa khotso seo Jehova a ileng a se etsa ka mor’a hore a felise lefatše ka moroallo. (Gen. 9:11-16) Le hoja Jehova a le matla ’ohle, ke Molimo oa khotso. (Baheb. 13:20) Ka pelong ea hae ho rena khotso ’me o e fa batho bohle ba mo rapelang ka botšepehi.

²⁵ Ezekiele o ile a ikutloa joang ka mor’a hore a bone khanya ea Jehova Molimo ponong ee? O re: “Ha ke e bona ke ile ka khumama.” Ka lebaka la ho hlolloa le ho tšoha, Ezekiele o ile a khumama. Ho na le baprofeta ba bang ba ileng ba ikutloa ka tsela e tšoanang ha ba bona lipono tse tsoang ho Jehova hobane lintho tseo ba li bonang li ne li hlolla ka tsela e tšosang. (Esa. 6:1-5; Dan. 10:8, 9; Tšen. 1:12-17) Hamorao tumelo ea bona e ile ea matlafala haholo ka lebaka la seo Jehova a ileng a ba senolela sona. Re kholisehile hore ho ile ha e-ba joalo le ka Ezekiele. Joale rona re lokela ho ikutloa joang ha re bala boprofeta bo kang boo?

26. Pono eo Ezekiele a e boneng e ile ea mo matlafatsa joang?

²⁶ Haeba Ezekiele o ne a e-na le lipelaelo, a tšoenyehile ka boemo ba batho ba Molimo ba Babilona, e tlameha ebe pono ena e ile ea mo matlafatsa. Ho hlakile hore ho ne ho sa tsotellehe hore na bahlanka ba Molimo ba hokae, hore na ba Jerusalema kapa ba Babilona, koloi e hlollang ea Jehova e ne e ka fihla hohle moo ba leng teng. Satane ha a na matla a ho sitisa Molimo ea laolang karolo e leholimong ea mokhatlo oa Molimo. (Bala Pesaleme ea 118:6.) Ezekiele o ile a bona hore koloi ea leholimo ha e hole le batho hobane mabili a eona a ne a thetsitse lefatšeng. (Ezek. 1:19) Taba ena e bontša hore Jehova o ne a ntse a tsotella batho ba hae ba tšepahalang ba botlamuoeng. Ntate oa bona ea lerato o ne a tla lula a ba tsotella ho sa tsotellehe hore na ba hokae.

27. Pono ea Ezekiele e ka re tsoela molemo joang mehleng ee?

²⁷ Le rona mehleng ena, pono ea Ezekiele e ka re tsoela molemo. Hopola hore Satane o lula a batla ho hlasela borapeli ba ’nete  ba Jehova. O batla hore re ikutloe eka re bang, ha re na mang-oe re be re utloe eka re hole le Ntate oa rona ea leholimong le mokhatlo oa hae. Le ka mohla u se ke be oa lumela mashano ao a Satane. (Pes. 139:7-12) Le hoja re ke ke ra oa fatše joaloka Ezekiele, le rona re lokela ho ikutloa re hloletsoe ke tsela eo karolo e leholimong ea mokhatlo oa Jehova oa bokahohleng bohle o leng matla, o leng lebelo, o khemang le linako le kamoo o feto-fetohang le maemo kateng.

28, 29. Ke’ng e bontšang hore haesale koloi ea Jehova e ntse e tsamaea lilemong tse lekholo tse fetileng?

²⁸ Mokhatlo oa Jehova o boetse o na le karolo e lefatšeng. Karolo ena e lefatšeng e entsoe ka batho ba sa phethahalang empa Jehova o e sebelisitse ho etsa lintho tse kholo. Lefatšeng lohle, o thusitse batho hore ba etse lintho tseo ba neng ba ke ke ba khona ho li etsa ka matla a bona. (Joh. 14:12) Ha re sheba bukeng ea ’Muso oa Molimo oa Busa! re bona mosebetsi o tsoileng matsoho oa ho ruta batho ka Molimo o entsoeng lilemong tse lekholo tse fetileng. Re ka boela ra hopola hore mokhatlo oa Jehova o sebelitse ka thata ho ruta Bakreste ba pele, ho hlola linyeoe le ho sebelisa marang-rang a morao-rao bakeng sa ho phetha thato ea Molimo.

²⁹ Ha re sheba lintho tseo mokhatlo oa Jehova o seng o li entse ho tsosolosa borapeli ba ’nete mehleng ena ea bofelo, eo ho eona re busoang ke mebuso e khopo, ho hlakile hore haesale koloi ea Molimo e ntse e tsamaea. Kannete ke tlotla e kholo hore ebe re karolo ea mokhatlo ona le hore re sebeletsa ’Musi ea tšoanang le Jehova.—Pes. 84:10.

30. Re tl’o bua ka’ng khaolong e latelang?

³⁰ Leha ho le joalo, ho sa na le lintho tse ngata tseo re tl’o ithuta tsona ponong ena ea Ezekiele. Khaolong e latelang, re tl’o ithuta haholoanyane ka “mangeloi” a mane kapa likerubime le hore na a re ruta’ng ka ’Musi oa rona Jehova Molimo.