1-3. (a) Konkhoskani vo Ezekiyeli wanguwona kweniso kuvwa. (Wonani chithuzi cho che pachanya.) (b) Kumbi ndi nthazi wuli yo yinguza paku Ezekiyeli, nanga yingumuwovya kuti wachitenji?

EZEKIYELI wenga muchigaŵa cha chidika cha mchenga ndipu wanguwona chinthu chinyaki cho chawonekanga chapatali. Iyu wanguphinyiriya masu ndipu pavuli paki wangungathwanuwa kuti wachiwonesesi. Ezekiyeli wanguzizwa ndi vo wanguwona. Iyu wachilereska kuchanya, wanguziŵa kuti kuputengi chimphepu. Kweni chimphepu ichi, chenga chimphepu ŵaka cha. Chimphepu ichi chenga chikulu, ndipu sisi laki latchupukanga kweniso vakuvwala vaki vaputanga. Pavuli paki wanguwona chimtambu chikulu. Mtambu uwu waŵalanga chifukwa cha motu wakukole wo wawonekanga mukati mwaki ndipu venivi vingumukumbusa chisulu chinyaki chakuzirwa chakusongono. * Mtambu uwu ungwamba kundere kufupi ndi Ezekiyeli ndipu pavwikanga chiwawa cha nge cha asilikali wo atchimbiya.—Ezeki. 1:4, 24.

² Pa nyengu iyi, Ezekiyeli wenga ndi vyaka pafufupi 30 ndipu wangwamba kuwona vinthu vambula kuluwika. Bayibolu likamba kuti “janja laku Yehova linguza paku iyu.” Janja ili ndi mzimu wakupaturika wo ndi nthazi yaku Yehova. Vo mzimu wenuwu ungumuchitiska  kuti wayambi kuwona ndi kuvwa, venga vapade ukongwa kweniso vakuziziswa. Ndipu palivi munthu yo wapanga mafilimu mazuŵa nganu yo wangapanga vinthu vakuyanana ndi vo Ezekiyeli wanguwona. Vo iyu wanguwona vingumuchitiska kuti wasindami mpaka chisku chaki pasi chifukwa cha mantha.—Ezeki. 1:3, 28.

³ Penga chifukwa cho Yehova wangulongore Ezekiyeli chiwona chenichi. Ezekiyeli kweniso ateŵeti akugomezgeka aku Yehova mazuŵa nganu, angasambira vinandi kutuliya pa chiwona chaki chakwamba, kweniso pa viwona vinyaki vosi vakuziziswa vo wakulemba mubuku laki. Sonu tiyeni tikambiskani vo Ezekiyeli wanguwona ndi kuvwa.

4, 5. Kumbi Ezekiyeli wenga pani wachiwona chiwona ichi?

⁴ Ŵerengani Ezekiyeli 1:1-3. Chakwamba, tiyeni tikambiskani ko vinguchitikiya. Vinthu ivi vinguchitika mu 613 B.C.E. Nge mo tinguwone mu Mutu 2, pa nyengu iyi Ezekiyeli wenga ku ukapolu ku Babiloni ko wajanga limoza ndi anyaki mumphepeti mwa msinji wa Kebara. Viwoneka kuti msinji uwu wenga ngalandi yikulu yo ŵanthu anguchita kukumba kuti apetuski maji kutuliya ku msinji wa Yufureti, ndipu pavuli paki maji yanga ngaweriyanga so mumsinji wenuwu.

⁵ Kutuwa ku Babiloni ko ŵanthu yaŵa ŵenga akapolu, kuchifika ku Yerusalemu, penga mtunda wa makilomita pafufupi 800. * Pa nyengu iyi, panyumba yakusopiyamu po awisi aku Ezekiyeli ateŵetiyanga nge asembi ŵanthu achitiyangapu vinthu vachinyengu kweniso asopiyangapu angoza. Ufumu wa ku Yerusalemu, wo nyengu yinyaki Davidi kweniso Solomoni angulamuliyapu mwaunkhankhu,  pa nyengu iyi wenga wakuyuyulika. Fumu Yehoyakini yo yenga yambula chivwanu, nayu yenga ku ukapolu ku Babiloni. Ndipu Zedekiya yo wangusere mumalu mwaki, wenga pasi pa fumu ya ku Babiloni ndipuso wenga munthu muheni.—2 Mafu. 24:8-12, 17, 19.

6, 7. Ntchifukwa wuli Ezekiyeli watenere kuti waŵanaŵananga kuti wajanga mu nyengu yakusuzga?

⁶ Nyengu iyi yitenere kuti yenga nyengu yakusuzga ukongwa kwaku Ezekiyeli yo wenga ndi chivwanu. Panyaki Ayisirayeli anyaki ajifumbanga kuti: ‘Kumbi Yehova watijowole limu? Kumbi ulamuliru uheni uwu wa Babiloni wo ŵanthu ŵaki asopa angoza, umalisengi kusopa kwauneneska kweniso ulamuliru waku Yehova pacharu chapasi?’

⁷ Mwechekuŵanaŵaniya venivi, sonu sambirani vo Ezekiyeli wanguwona mu chiwona chakwamba. (Ezeki. 1:4-28) Muchisambira, yeruzgiyani kuti yimwi ndimwi Ezekiyeli ndipu muwona vo iyu wanguwona kweniso mutuvwa vo wanguvwa.

8. Kumbi Ezekiyeli wanguwonanji mu chiwona, nanga vo wanguwona vimiyanji?

⁸ Kumbi Ezekiyeli wanguwonanji? Iyu wanguwona chinthu chikulu kweniso chakuchitiska mantha cho chikonkhoskeka kuti ndi galeta. Chinthu ichi chenga ndi vingelengeli vinayi vikuluvikulu, ndipu mumphepeti mwa vingelengeli venivi, mwenga vakulengeka vinayi vauzimu vo m’mavesi nganyaki vizumbulika kuti akerubi.  (Ezeki. 10:1) Pachanya pa vingelengeli kweniso akerubi, penga chinthu chisani, cha nge ayisi, ndipu pachanya pa chinthu chenichi penga mpandu waufumu waunkhankhu waku Chiuta wo panguja Yehova! Kumbi galeta lenili limiyanji? Vo Ezekiyeli wanguwona vimiya chigaŵa chakuchanya cha gulu laku Yehova. Ntchifukwa wuli tikamba viyo? Ŵanaŵaniyani vifukwa vitatu ivi:

9. Kumbi mo Yehova wachitiya vinthu ndi angelu vikoliyana wuli ndi fundu yakuti wakwera pa galeta?

⁹ Mo Yehova wachitiya vinthu ndi angelu. Mu chiwona ichi, Ezekiyeli wanguwona kuti Yehova waja pampandu waufumu pachanya pa akerubi. Mavesi nganyaki nangu mu Bayibolu ngakamba kuti Yehova waja pampandu wa ufumu pachanya pamwenga pakati pa akerubi. (Ŵerengani 2 Mafumu 19:15; Eki. 25:22; Salimo 80:1) Kumbi ivi ving’anamuwa kuti Yehova waja nadi pachanya pa akerubi, pamwenga kuti angelu anthazi ŵenaŵa akhumbika kumunyamuwa, kweniso kuti iyu wakhumbika kukwera pagaleta chayilu? Awa! Fundu njakuti akerubi atovya ulamuliru waki ndipu iyu wangaŵatuma kwekosi muchilengedu kuti afiski vo iyu wakhumba. Mwakuyanana ndi angelu wosi akupaturika aku Chiuta, akerubi achita vo Yehova waŵatuma nge ateŵeti ŵaki. (Salimo 104:4) Mwaviyo, tingakamba kuti Yehova “watenda” pachanya paku wosi, chifukwa ndiyu watiŵalongozga nge Fumu yawu nge kuti ŵe mu galeta limoza.

10. Ntchifukwa wuli tikamba kuti galeta lakuchanya lo Ezekiyeli wanguwona limiya akerubi anayi pe cha?

 ¹⁰ Galeta ili limiya akerubi pe cha. Akerubi wo Ezekiyeli wanguwona ŵengapu anayi. Kanandi Bayibolu ligwiriskiya ntchitu nambala yeniyi kuti lilongo kuti chinthu ntchakukwana muvigaŵa vosi kweniso asani likhumba kukonkhoska chinthu champhumphu kwambula kusiyaku kanthu. Mwaviyo, akerubi anayi amiya vakulengeka vosi vauzimu vakugomezgeka. Ezekiyeli wangukamba so kuti vingelengeli kweniso akerubi ve ndi masu peposi, venivi ving’anamuwa kuti mbakerubi anayi pe cha wo awona vo vichitika muchilengedu, kweni angelu wosi. Vo Ezekiyeli wangukonkhoska vilongo kuti galeta ili ndikulu ukongwa ndipu akerubi yaŵa awoneka amana. (Ezeki. 1: 18, 22; 10:12) Mwakuyanana ŵaka, chigaŵa chakuchanya cha gulu laku Yehova ntchikulu ukongwa ndipu che ndi akerubi anayi pe cha, kweni angelu anandi.

11. Kumbi ntchiwona wuli cho Daniyeli wanguwona cho chiyanana ndi cho Ezekiyeli wanguwona, nanga kumbi venivi vititiwovya kuziŵanji?

¹¹ Chiwona chakuyanana ŵaka cha vinthu vakuchanya cho Daniyeli wanguwona. Mchimi Daniyeli wanguja vyaka vinandi ku ukapolu ku Babiloni, ndipu nayu wanguwona chiwona cha vinthu vakuchanya. Mu chiwona chaku Daniyeli nachu, mpandu waufumu waku Yehova wenga ndi vingelengeli. Chiwona chaku Daniyeli chikonkhoska ukongwa ukulu wa banja laku Yehova lakuchanya. Iyu wanguwona angelu “masawuzandi nganandi . . . [ndipuso] mamiliyoni nganandi” wo anguma pa masu paku Yehova. Yiwu ŵenga Mumphara ya Milandu kuchanya, ndipu viwoneka kuti weyosi wenga pamalu ngaki. (Dani. 7:9, 10, 13-18) Kumbi mphakuvwika cha kukamba kuti chiwona chaku Ezekiyeli nachu chimiya gulu losi lenili la angelu?

12. Ntchifukwa wuli tivikilirika asani tisambira nkhani nge chiwona chaku Ezekiyeli cha galeta lakuchanya?

¹² Yehova waziŵa kuti tivikilirika asani tiŵanaŵaniya vinthu vauzimu pamwenga kuti “vinthu vambula kuwoneka” nge mo wakutumika Paulo wangukambiya. Ntchifukwa wuli tikamba viyo? Chifukwa chakuti te a ndopa ndi nyama, kanandi tiŵanaŵaniya ukongwa “vinthu vakuwoneka,” pamwenga vinthu va kanyengu kamanavi vo tikhumbika. (Ŵerengani 2 Akorinto 4:18.) Mwaviyo, Satana wasaniriyapu mwaŵi, ndipu watesesa kutikopa kuti tiyanjengi ukongwa vinthu vakuliŵavu. Kuti tileki kuwira, Yehova watitipaska nkhani nge zo ze mu uchimi waku Ezekiyeli, zo zititikumbusa banja launkhankhu laku Yehova lakuchanya!

13, 14. (a) Kumbi Ezekiyeli wanguvikonkhoska wuli vingelengeli vo wanguwona? (b) Ntchifukwa wuli mphakwenere kuti galeta laku Yehova lije ndi vingelengeli pamwenga kuti mateyala?

¹³ Pakwamba Ezekiyeli walereseskanga akerubi anayi pe. Mu Mutu 4 tikambiskanengi vo tisambira vakukwaskana ndi Yehova kutuliya kwa angelu ŵenaŵa. Kweni pavuli paki, Ezekiyeli wanguwona vingelengeli vinayi vo venga pafupi ndi akerubi. Viwoneka kuti vingelengeli ivi venga mumakona ngosi nganayi. (Ŵerengani Ezekiyeli 1:16-18.) Vingelengeli ivi vawonekanga kuti va mwa wa kurusolito. Mwa wakuzirwa wa kurusolito ulangala, ndipu uwoneka wantchetintcheti. Chifukwa cha venivi vingelengeli ivi vaŵalanga ukongwa.

 ¹⁴ Chiwona chaku Ezekiyeli chikonkhoska ukongwa vakukwaskana ndi vingelengeli va galeta. Kweni vakuziziswa kuti mpandu waufumu uje ndi vingelengeli pamwenga matayala. Kanandi mpandu waufumu utenda cha kweni uja pamalu ngamoza. Ve viyo chifukwa ŵanthu wo alamuliya panu pacharu chapasi aja ndi mphaka ya chigaŵa chawu. Kweni ulamuliru waku Yehova upambana ndi ulamuliru wa munthu weyosi. Ulamuliru waku Yehova ngwachilengedu chosi, ndipu ulivi mphaka. Fundu yeniyi ndiyu Ezekiyeli wangusambira wati wawona chiwona. (Nehe. 9:6) Kukamba uneneska, Chiuta Fumu Yikulu wangalongo mazaza ngaki kwekosi!

15. Kumbi Ezekiyeli wangulembanji vakukwaskana ndi ukulu kweniso kawonekeru ka vingelengeli?

¹⁵ Ezekiyeli wanguzizwa ukongwa wati wawona ukulu wa vingelengeli venivi. Iyu wangulemba kuti: “Vingelengeli vo venga vitali ukongwa ndipu vachitiskanga mantha.” Ezekiyeli watenere kuti wanguyunuska ukongwa mutu waki kuti waviwoni umampha vingelengeli vakung’anima vo venga vitali ukongwa. Iyu wangukamba so fundu yinyaki iyi: “Kubwalu kosi kwa vingelengeli vosi vinayi kunguzaza masu.” Kweni panyaki chinthu chakuziziswa ukongwa chenga mo vingelengeli venivi vawonekiyanga. Ezekiyeli wangukonkhoska kuti: “Kawonekeru kaki kweniso mo vingupangikiya vawonekanga nge kuti chingelengeli chinyaki che mukati mwa chinyaki.” Kumbi venivi ving’anamuwanji?

16, 17. (a) Kumbi vingelengeli va galeta lo Ezekiyeli wanguwona vawonekanga wuli? (b) Chifukwa cha mo vingelengeli va galeta laku Yehova vikupangikiya, kumbi galeta lenili litenda wuli?

¹⁶ Viwoneka kuti vingelengeli vosi vinayi vo Ezekiyeli wanguwona, vingupangika ndi vingelengeli viŵi, chinyaki chenga mukati mwa chinyaki mwakupinjika. Asani tiŵanaŵaniya fundu yeniyi, mphakuvwika kuti Ezekiyeli wangulemba kuti: “Asani vitenda, valutanga kuvigaŵa vosi vinayi kwambula kung’anamuka.” Kumbi venivi ving’anamuwanji?

¹⁷ Vingelengeli vitali viyo, vingayenda mtunda utali chinanga vingaŵa kuti vazunguliya kamoza pe. Mphaki kuti mu chiwona ichi Ezekiyeli wangukamba kuti galeta ili latchimbiyanga nge kung’anima kwa limphezi. (Ezeki. 1:14) Kweniso kumbukani fundu yakuti vingelengeli ivi venga vakupinjikana, vo vinguchitiska kuti vilazgi kosikosi. Asayansi angapanga cha matayala nga mtundu waviyo. Chifukwa cha venivi, galeta ili lingaluta kwekosi kwambula kung’anamuka chinanga kuti litchimbiya! Chinanga kuti ve viyo, galeta ili litenda kwachipulamutu cha. Vingelengeli ivi ve ndi masu peposi, venivi vilongo kuti galeta ili liwona vo vichitika kuvigaŵa vosi.

18. Kumbi tisambiranji pa fundu yakuti vingelengeli va galeta venga vikulu ukongwa kweniso venga ndi masu nganandi?

¹⁸ Kumbi penapa Yehova wakhumbanga kuti Ezekiyeli kweniso ŵanthu ŵaki akugomezgeka asambirenjipu vakukwaskana ndi chigaŵa chakuchanya cha gulu laki? Ŵanaŵaniyani vo takambiskana kali. Galeta ili, ndaunkhankhu kweniso ndakuchitiska mantha chifukwa cha mtundu wa mwa wo angugwiriskiya ntchitu pakupanga vingelengeli kweniso ukulu wa vingelengeli venivi. Chifukwa chakuti vingelengeli vaki ve ndi masu nganandi, liwona chechosi cho chichitika. Masu ngaku Yehova ngawona vinthu vosi.  (Nthanthi 15:3; Yere. 23:24) Kweniso iyu we ndi angelu mamiliyoni nganandi wo wangaŵatuma kwekosi muchilengedu. Ndipu angelu ŵenaŵa, angawona vo vichitika muchilengedu ndi kuchikambiya Fumu yawu Yikulu.—Ŵerengani Aheberi 1:13, 14.

19. Pakuti galeta laku Yehova litchimbiya ukongwa kweniso lingalazgiya kwekosi, kumbi venivi vititisambizanji vakukwaskana ndi Yehova kweniso chigaŵa chakuchanya cha gulu laki?

¹⁹ Tawona so kuti galeta ili litchimbiya ukongwa kweniso lingalazgiya kwekosi. Ŵanaŵaniyani ŵaka kupambana ko kulipu pakati pa chigaŵa chakuchanya cha gulu laku Yehova ndi maboma nga ŵanthu ndipuso mawupu. Maboma kweniso mawupu nga ŵanthu ngatondeka kumalisa masuzgu nga ŵanthu pacharu chapasi ndipuso ngatondeka kugwira ntchitu umampha asani vinthu vasintha pacharu. Pa chifukwa chenichi maboma kweniso mawupu nga ŵanthu ngangasintha cha vinthu ndipu ngazamubwangandulika. Kweni galeta laku Yehova lisuzgika cha asani vinthu vasintha chifukwa lilongozgeka ndi Chiuta. Mwakukoliyana ndi vo zina laki ling’anamuwa, Yehova wangaja chechosi kuti wafiski khumbu laki. (Eki. 3:13, 14) Mwakuyeruzgiyapu, iyu wangaja Msilikali wanthazi kuti wavikiliyi ŵanthu ŵaki, kweniso wangasintha nyengu yeniyo ndi kuja walisungu ukongwa, kuti wagowoke maubudi ndi kuchiska munthu wakulapa yo mtima waki wasweka.—Salimo 30:5; Yesa. 66:13.

20. Ntchifukwa wuli tikhumbika kuzukuma ndi galeta laku Yehova?

²⁰ Vo takambiskana mu chiwona chaku Ezekiyeli vingatichitiska kujifumba kuti, ‘Kumbi ndizukuma ndi galeta laku Yehova?’ Tikhumbika kukumbuka kuti galeta ili litenda. Titenere cha kukayika kuti Yehova, Mwana waki kweniso angelu wosi awona masuzgu ngo tikumana nangu. Ndipuso tikhumbika cha kufipa mtima kuti Chiuta waswerengi kuchitapu kanthu pamwenga kuti gulu laki litondekengi kuchita vinthu umampha asani vinthu mucharu ichi vasintha. Nyengu zosi tikumbukengi kuti gulu laku Yehova ndamoyu ndipu litenda. Mwakukoliyana ndi fundu yeniyi, Ezekiyeli wanguvwa mazu ngakudaniriza ngakuti: “Yimwi vingelengeli, nyamukani!” (Ezeki. 10:13) Tizukuma asani tiŵanaŵaniya mo Yehova watendese gulu laki. Kweni tizukuma so ukongwa asani tiŵanaŵaniya mo Yehova waliri.

21, 22. Kumbi ntchinthu wuli cho chilunga pamoza vigaŵa va galeta?

²¹ Ezekiyeli wati wamala kulereska vingelengeli, wanguyunuska mutu waki ndipu wanguwona “chinthu chisani chakung’anima nge ayisi.” (Ezeki. 1:22) Chinthu chisani chenichi, chenga pachanya ukongwa pa mitu ya akerubi ndipu chenga chakung’anima ndi unkhankhu. Venivi vingamuziziswa munthu yo waziŵa mo galeta liwoneke. Mwakuyeruzgiyapu, iyu wangajifumba kuti: ‘Kumbi ntchinthu wuli cho chichitiska kuti chinthu chisani chenichi chikho pachanya pa vingelengeli? Kumbi vingelengeli vifiska wuli kuzunguliya kwambula chisulu chapakati cho chilunga vingelengeli?’ Kweni kumbukani kuti galeta ili likupangika ndi munthu cha, ndipuso ndi galeta chayilu cha, limiya ŵaka vinthu vo vichitika kuchanya. Ndipuso ŵanaŵaniyani fundu iyi yo Ezekiyeli wangulemba:  “Mzimu wo wagwiranga ntchitu mu vamoyu vo ndiwu so wenga muvingelengeli.” (Ezeki. 1:20, 21) Kumbi ndi mzimu wuli wo wenga mwa akerubi kweniso muvingelengeli?

²² Kwambula kukayika, mzimu uwu ndi mzimu wakupaturika waku Yehova wo ngwanthazi ukongwa muchilengedu chosi. Mzimu uwu ndiwu ulunga vigaŵa vosi va galeta lenili pamoza, ndiwu upereka nthazi kweniso ndiwu ulongozga galeta lenili asani litenda. Kweni sonu tiyeni tilutirizgi kukambiskana vo Ezekiyeli wanguwona kuti tiziŵi Yo watendesa galeta ili.

23. Kumbi Ezekiyeli wangugwiriskiya ntchitu mazu wuli pakukonkhoska Yehova, nanga ntchifukwa wuli?

²³ Ŵerengani Ezekiyeli 1:26-28. Pakukonkhoska vinthu vo wanguwona mu chiwona ichi, Ezekiyeli wangugwiriskiya ntchitu mazu nge ngakuti, “pawonekanga nge,” “chenga nge,” “wawonekanga nge” ndipuso ngakuti “ chinthu chinyaki . . . nge.” Kweni mu mavesi yanga, mazu ngenanga wangungagwiriskiya ntchitu ukongwa. Panyaki iyu wapenjanga mazu ngo wangagwiriskiya ntchitu pakukonkhoska vinthu vakusuzga kuvikonkhoska vo wanguwona. Iyu wanguwona “chinthu cho chawonekanga nge mwa wa safiro, ndipu chawonekanga nge mpandu waufumu.” Kumbi muŵanaŵana kuti mpandu waufumu wo wapangika kutuliya ku mwa wa buluu wa  safiro ungawoneka wuli? Ezekiyeli wangukamba so kuti, “Yo wanguja pampandu wo wawonekanga nge munthu.”

24, 25. (a) Kumbi chiŵingavuwa cho chinguzunguliya mpandu waufumu waku Yehova chititikumbusanji? (b) Kumbi viwona nge venivi vaŵakwaskanga wuli ŵanthu achivwanu?

²⁴ Yapa Yehova wawonekanga ŵaka vulumutiyi, chifukwa iyu watuzganga ukweru wa unkhankhu kutuwa muchiwunu kusikiya pasi kweniso kutuwa muchiwunu kukwere kuchanya. Ezekiyeli watenere kuti waphinyiriyanga kweniso wajalanga kumasu ndi manja kuti wawonesesi Chiuta mu unkhankhu waki. Pakumaliya, muchiwona ichi Ezekiyeli wanguwona vinthu vakuziziswa ukongwa. Iyu wangulemba kuti: “Posi po iyu [Yehova] wenga paŵalanga ukongwa nge chiŵingavuwa mumtambu pa zuŵa la vuwa.” Kumbi mutuvwa wuli asani mwawona chiŵingavuwa? Chiŵingavuwa chititikumbusa unkhankhu wa Mlengi widu! Kweniso chititikumbusa phanganu laku Yehova pavuli pa Chigumula. (Gene. 9:11-16) Chinanga kuti Chiuta Ngwanthazizosi, kweni iyu ngwachimangu. (Ahe. 13:20) Chimangu chikuzaza mumtima mwaki ndipu chisapaliya kwaku wosi wo atimusopa mwakugomezgeka.

²⁵ Kumbi Ezekiyeli wanguvwa wuli wati wawona unkhankhu waku Yehova Chiuta? Iyu wangulemba vo vinguchitika, ndipu wanguti: “Ndati ndawona venivi, ndingujikama ndi kusindama mpaka chisku changu pasi.” Chifukwa chakuzizwa ndipuso mantha, Ezekiyeli wanguwa pasi. Venivi vinguchitikiya so achimi anyaki ŵati alonde viwona kutuliya kwaku Yehova, chifukwa vo anguwona vitenere kuti venga vakuziziswa kweniso vakuchitiska mantha. (Yesa. 6:1-5; Dani. 10:8, 9; Chivu. 1:12-17) Kweni asani pajumpha nyengu, ŵanthu ŵenaŵa achiskikanga ukongwa ndi vo Yehova waŵalongonga. Ezekiyeli nayu, watenere kuti wanguchiskika. Ndipu nasi tingachiskika asani tiŵerenga nkhani za mu Malemba nge zenizi.

26. Kumbi chiwona cho Ezekiyeli wanguwona chingumuchiska wuli?

²⁶ Asani Ezekiyeli wasuzgikanga maŵanaŵanu pamwenga kudandawula chifukwa cha mo vinthu venge ndi ŵanthu aku Chiuta ku Babiloni, iyu watenere kuti wanguchiskika ukongwa ndi chiwona chenichi. Iyu wanguziŵa kuti pengavi suzgu kaya munthu yo wasopa Chiuta mwakugomezgeka wangaŵa ku Yerusalemu, ku Babiloni pamwenga kunyaki kwekosi, chifukwa galeta laku Yehova lifika peposi! Kumbi Satana wangafiska kulimbana ndi Chiuta yo watendesa galeta launkhankhu lenili lakuchanya? (Ŵerengani Salimo 118:6.) Ezekiyeli wanguwona so kuti galeta lakuchanya lenga kutali cha ndi ŵanthu. Tikamba viyo chifukwa vingelengeli vaki vakwaskanga charu! (Ezeki. 1:19) Venivi vilongo kuti Yehova waŵaŵanaŵaniyanga ŵanthu ŵaki akugomezgeka wo ŵenga ku ukapolu. Iyu waŵaphweriyanga nyengu zosi!

27. Kumbi vo Ezekiyeli wanguwona vititikwaska wuli mazuŵa nganu?

²⁷ Kumbi vo Ezekiyeli wanguwona vititikwaska isi mazuŵa nganu? Hinya! Kumbukani kuti Satana watikuyukiya ukongwa kusopa kwauneneska mazuŵa nganu. Iyu wakhumba kuti tigomezgengi  kuti te tija, te kutali ndi Awusefwi akuchanya kweniso gulu lawu mwakuti angatiwovya cha. Mungazomerezanga cha kuti maboza ngenanga ngakugongoweseni. (Salimo 139:7-12) Mwakuyanana ndi Ezekiyeli, nasi te ndi vifukwa vinandi vakuthamikiya Yehova! Mbuneneska kuti isi tingawa pasi cha nge mo iyu wanguchitiya. Kweni titenere kuzizwa ndi kuzukuma chifukwa cha nthazi za chigaŵa chakuchanya cha gulu laku Yehova, mo litchimbiriya, mo lilazgiya kwekosi kwambula kusuzgika, mo ligwiriya ntchitu chinanga vinthu vingasintha kweniso chifukwa cha unkhankhu waki!

28, 29. Ntchinthu wuli cho chilongo kuti galeta laku Yehova laja lichiyenda muvyaka 100 vo vajumpha?

²⁸ Kumbukani kuti gulu laku Yehova le so ndi chigaŵa cha pacharu chapasi. Mbuneneska kuti chigaŵa cha pacharu chapasi chikupangika ndi ŵanthu ambula kufikapu. Kweni ŵanaŵaniyani vo Yehova wafiska kuchita panu pacharu chapasi! Pacharu chosi, Yehova wawovya ŵanthu kuti afiski kuchita vinthu vo atingi avifiskengi cha pakuŵija. (Yoha. 14:12) Buku la Ufumu Waku Chiuta Uwusa! lititikumbusa vo vachitika pa ntchitu yakupharazga muvyaka 100 vo vajumpha. Tingakumbuka so vo gulu laku Yehova lafiska pakusambiza Akhristu auneneska, kuwina milandu kweniso kugwiriskiya ntchitu vipangizu va mazuŵa nganu kuti lifiski khumbu laku Chiuta!

²⁹ Tikayika cha kuti galeta laku Yehova litenda asani tiŵanaŵaniya vosi vo vachitika kuti kusopa kwauneneska kuweriyepu mu mazuŵa nganu ngakumaliya. Ndi mwaŵi wapade kuteŵete ndi gulu lenili kweniso kuteŵete Fumu Yikulu!—Salimo 84:10.

30. Kumbi tikambiskanengenji mu Mutu 4?

³⁰ Kweni peche vinandi vo tingasambira kutuliya pa chiwona chaku Ezekiyeli. Mu Mutu 4 tikambiskanengi vakukwaskana ndi “vamoyu” vinayi vakuziziswa pamwenga kuti akerubi. Kumbi tingasambiranji vakukwaskana ndi Yehova Chiuta, Fumu Yikulu ya unkhankhu kutuliya kwaku yiwu?