1-3. (a) Longosorani ivyo Ezekiyeli wakawona na kupulika. (Wonani chithuzi chakwamba.) (b) Kasi ivyo Ezekiyeli wakawona vikafuma nkhu, ndipo vikamukhwaska wuli?

 EZEKIYELI wakaŵa mu chipalamba chikuru chakuzura na mchenga, ndipo wakadodoliskanga chinthu chinyake icho chikawonekeranga patali. Wakaphinyanga maso ghake na kughabenura kuti wawone makora. Wakazizwa chomene na ivyo wakawonanga. Wakawonanga chimphepo chikwiza kufuma kutali. Kweni chikaŵa chimphepo bweka yayi. Apo chimphepo chankhongono chakufuma kumpoto ichi chikaputanga sisi na malaya ghake, Ezekiyeli wakawona bingu likuru na litali chomene. Mukati mwa bingu ili mukaŵa moto wakung’anima, ndipo pakuwona kuŵala kwa moto uwu Ezekiyeli wakakumbuka umo chisulo chikuwonekera para ŵachiwotcha pamoto. a Apo bingu ili likasendeleranga luŵiro kwa Ezekiyeli, chongo nacho chikakuranga chomene, pakaŵa kupoma nga nkhwa ŵasilikari ŵanandi awo ŵakwenda.—Ezek. 1:4, 24.

² Pa nyengo iyi, Ezekiyeli wakaŵa na vyaka pafupifupi 30, ndipo wakawona vinthu vyambura kuluwika. Wakawona “woko la Yehova” liza pa iyo, nkhongono yikuru ya mzimu utuŵa wa Yehova.  Ivyo mzimu uwu ukamupangiska kuwona na kupulika vikaŵa vyapadera chomene, vikaŵa vyakuzizika chomene kuluska ivyo ŵanthu ŵakupanga mafilimu ŵangapanga. Ezekiyeli wakasindama pasi chisko chake chifukwa cha mboniwoni iyo wakawona, wakawopa chomene.—Ezek. 1:3, 28.

³ Kweni Yehova wakakhumbanga kumuphalira vinandi Ezekiyeli padera pa kumuzizika waka. Mboniwoni yakwamba ya Ezekiyeli, nga ni zinyake zose izo zili kulembeka mu buku lauchimi ili, yikaŵa na ng’anamuro likuru kwa iyo kweniso ku ŵateŵeti ŵa Yehova wose mazuŵa ghano. Ntheura tiyeni tiwone ivyo Ezekiyeli wakawona na kupulika.

4, 5. Kasi Ezekiyeli wakaŵa nkhu apo wakawonanga mboniwoni?

⁴ Ŵazgani Ezekiyeli 1:1-3. Chakwamba tiyeni tikumbuke uko vinthu ivi vikachitikira. Mukaŵa mu chaka cha 613 B.C.E. Nga umo tikasambilira mu mutu wajumpha, Ezekiyeli wakaŵa ku Babuloni, pamoza na ŵazga ŵanyake awo ŵakakhalanga mumphepete mwa mlonga wa Kebara. Vikuwoneka kuti mlonga uwu ŵanthu ndiwo ŵakachita kuwupatuskirako kufuma mu mlonga wa Yufurate.

⁵ Yerusalemu, chikaya cha ŵazga aŵa, wakaŵa kutali makilomita pafupifupi 800. b Tempile ilo awiske ŵa Ezekiyeli ŵakateŵeterangapo nga mbasembe, ŵanthu ŵakachitirangamo vimbundi na kusoperamo vikozgo. Chitengo cha mu Yerusalemu, icho chikaŵa chauchindami mu nyengo ya Davide na Solomoni, pa nyengo iyi chikaŵa chakuyuyulika. Themba lambura kugomezgeka  Yehoyakini nalo likaŵa ku wuzga ku Babuloni. Zedekiya, uyo wakahalirapo, nayo wakaphalirikanga waka chakuchita na themba la Babuloni, kweniso wakaŵa muheni.—2 Mathe. 24:8-12, 17, 19.

6, 7. Kasi Ezekiyeli wakwenera kuti wakajipulika wuli kuti wakakhalanga mu nyengo ziheni?

⁶ Izi zikaŵa nyengo ziheni chomene kwa munthu wachipulikano nga ni Ezekiyeli. Panyake ŵanji mwa ŵazga ŵanyake ŵakafumbanga kuti: ‘Kasi ndikuti Yehova watitayirathu? Kasi ufumu uheni uwu wa Babuloni pamoza na ŵachiuta ŵake ŵatesi umazgirengethu kusopa kutuŵa na kuwuskapo muwuso wa Yehova pa charu chapasi?’

⁷ Pakuti mwamanya fundo izi, yambani kusambira pamwekha nkhani iyi ndipo ŵazgani umo Ezekiyeli wakalongosolera mboniwoni yakwamba iyo wakawona. (Ezek. 1:4-28) Apo mukuŵazga, jitorani kuti ndimwe Ezekiyeli, ndipo mukuwona ivyo wakawona na kupulika ivyo wakapulikanga.

8. Kasi Ezekiyeli wakawona vichi mu mboniwoni, ndipo vikimiranga vichi?

⁸ Kasi icho Ezekiyeli wakawona chikaŵa chivichi? Icho wakawona chikawonekanga nga ntchinthu chikuru na chakofya, icho chikulongosoreka kuti ni gileta. Chikaŵa na makhwiro ghakurughakuru ghanayi ghakulondezgana na vyamoyo vyachilendo vinayi, ivyo pamanyuma wakavilongosora kuti mbakerubi.  (Ezek. 10:1) Pachanya pa ŵakerubi pakaŵa chinthu chisani nga ni mlengalenga ndipo pakaŵa chitengo chauchindami cha Chiuta, uyo wakakhalapo wakaŵa Yehova! Kweni kasi gileta ili likimiranga vichi? Ntchakwenelera kuyowoya kuti mboniwoni ya Ezekiyeli yikimiranga chigaŵa chakuchanya cha gulu lauchindami la Yehova. Chifukwa wuli tikuyowoya nthena? Wonani vifukwa vitatu.

9. Kasi umo Yehova wakukhalira na vilengiwa vyake vyakuchanya vikuyana wuli na chinthu icho chikwenda?

⁹ Yehova na vilengiwa vyake vyakuchanya. Wonani kuti mu mboniwoni iyi, chitengo cha Yehova chili pachanya pa ŵakerubi. Mavesi ghanyake mu Baibolo nagho ghakuyowoya kuti Yehova wakhala pa chitengo pachanya, panji pakati pa ŵakerubi. (Ŵazgani 2 Mathemba 19:15; Eks. 25:22; Sal. 80:1) Ichi chikung’anamura kuti Yehova wakukhala nadi pachanya pa ŵakerubi yayi, nga ni para ndiwo ŵakumunyamura, kweniso wakwenda nadi pa gileta yayi. Kweni ŵakerubi ŵakukhozgera muwuso wake, ndipo wangaŵatuma kulikose kuti ŵakafiske khumbo lake. Nga mbangelo ŵanyake wose, ŵakerubi nawo ŵakuchita ivyo Chiuta wayowoya, pakuŵa ŵateŵeti ŵake, panji ŵimiliri. (Sal. 104:4) Pa chifukwa ichi tingati Yehova “wakwenda” pa wose, wakuŵalongozga pakuŵa fumu yawo, nga kuti iwo ni gileta likuru.

10. Kasi ntchivichi chikulongora kuti gileta lakuchanya lili na ŵakerubi ŵanandi kujumpha pa ŵanayi?

¹⁰ Gileta ili likwimira ŵakerubi pera yayi. Ezekiyeli wakawona ŵakerubi ŵanayi. Mu Baibolo, nambara iyi yikwimira chinthu  icho ntchakukwana, kwambura kusidako kalikose. Ipo ntchakwenelera kuyowoya kuti ŵakerubi ŵanayi aŵa ŵakimiranga ŵana ŵauzimu wose ŵa Yehova awo mbakugomezgeka. Wonaniso kuti makhwiro na ŵakerubi ŵakazura na maso, kulongora kuti padera pa vyamoyo vinayi ivyo Ezekiyeli wakawona, paliso ŵangelo ŵanyake ŵanandi awo ŵali maso. Umo Ezekiyeli wali kulongosolera gileta ili vikulongora kuti ndikuru chomene, mwakuti nanga mbakerubi ŵakuwoneka ŵachoko. (Ezek. 1:18, 22; 10:12) Chigaŵa chakuchanya cha gulu la Yehova nacho ntchikuru, chili na ŵangelo ŵanandi padera pa ŵakerubi ŵanayi aŵa.

11. Kasi Daniyeli wakawona mboniwoni wuli yakuyana waka, ndipo yikutovwira kuti tifike pa fundo wuli?

¹¹ Mboniwoni ya kuchanya iyo Daniyeli wakawona. Ntchimi Daniyeli yikakhalako vyaka vinandi chomene ku wuzga mu msumba wa Babuloni, ndipo nayo yikawona mboniwoni ya kuchanya. Mu mboniwoni iyi namo, chitengo cha Yehova chikaŵa na makhwiro. Mboniwoni ya Daniyeli yikalongosora chomene vya ukuru wa mbumba yauzimu ya Yehova kuchanya. Daniyeli wakawona “vikwi na vikwi . . . vikwi 10 kwandaniska na vikwi 10” vya ŵana ŵauzimu ŵa Chiuta awo ŵakimilira panthazi pa Yehova. Ŵakaŵa nga ŵakhala mu Mphara, waliyose wakwenera kuti wakaŵa pa malo agho wali kupika. (Dan. 7:9, 10, 13-18) Kasi ntchakupulikikwa yayi kuyowoya kuti mboniwoni ya Ezekiyeli nayo yikimiranga ungano wenewuwu wa ŵana ŵauzimu ŵakuchanya?

12. Chifukwa wuli ntchiwemi kwa ise kusambira nkhani ya mboniwoni ya gileta lakuchanya ilo Ezekiyeli wakawona?

¹² Yehova wakumanya kuti tikuŵa ŵakuvikilirika para tikuŵika maghanoghano ghithu pa vinthu vyauzimu, panji kuti “vinthu vyambura kuwoneka,” nga umo mpositole Paulosi wakayowoyera. Chifukwa wuli? Pakuŵa vilengiwa vya thupi na ndopa, tikutemwa kuŵika mtima chomene pa “vinthu vyakuwoneka,” panji kuti vinthu vyathupi, ivyo ni vyakanyengo waka. (Ŵazgani 2 Ŵakorinte 4:18.) Satana wakusangirapo mwaŵi pa maghanoghano agha ndipo kanandi wakutipangiska kuti tighanaghanenge chomene vyathupi. Pakukhumba kutovwira kuti tikane maghanoghano agha, Yehova watipa nkhani za nga ni iyi ya mu uchimi wa Ezekiyeli, izo zikutikumbuska vya mbumba yikuru iyo Yehova wali nayo kuchanya!

13, 14. (a) Kasi Ezekiyeli wakalongosora wuli makhwiro agho wakawona? (b) Chifukwa wuli ntchakwenelera kuti gileta la Yehova lili na makhwiro?

¹³ Pakwamba, maso gha Ezekiyeli ghakaŵa pa ŵakerubi ŵanayi, ndipo mu Mutu 4 wa buku ili, tiwonenge ivyo vilengiwa ivi na mawonekero ghawo ghapadera vikutisambizga pakuyowoya vya Yehova. Kweni pamoza na ŵakerubi aŵa, Ezekiyeli wakawona makhwiro ghanayi, panji ghakaŵa mu malo ghanayi, ndipo ghakapanga chinthu chikuru cha vigaŵa vinayi vyakuyana kosekose. (Ŵazgani Ezekiyeli 1:16-18.) Makhwiro agha ghakawonekanga nga ngakupangika na kurusitalo, libwe lakuzirwa ilo ndakulangara  ndipo likuŵa layelo panji girini wakusazgikana na yelo. Chinthu ichi chikaŵa chakugadima maseŵera cha!

¹⁴ Mboniwoni ya Ezekiyeli yikudidimizga chomene pa makhwiro gha gileta. Ntchakuzizika chomene kuti chitengo chiŵe na makhwiro. Kanandi tikughanaghana waka vya chitengo chaufumu icho chikuŵa waka pa malo ghamoza, ndipo ntchakupulikikwa, chifukwa mafumu gha charu mazaza ghawo ghakufika patali yayi. Kweni muwuso wa Yehova ukupambana chomene na wa ŵanthu. Nga umo Ezekiyeli wakamanyira pamanyuma, nkhongono za Yehova zilije chigoti. (Neh. 9:6) Ichi chikulongora kuti Fumu Yikuru iyi yingalongora mazaza ghake kulikose!

15. Kasi Ezekiyeli wakawona vichi pa nkhani ya ivyo vikaŵa mu makhwiro na sayizi yake?

¹⁵ Ezekiyeli wakachita wofi na ukuru wa makhwiro. Wakalemba kuti: “Vingelengele vya makhwiro vikaŵa vitali chomene mwakuti vikawofyanga.” Tiŵe nga tikuwona Ezekiyeli wakwinuska mutu kuti wawoneseske vingelengele vikuru na vyakunyezimira ivi apo vikunyamuka kulazga kuchanya. Ezekiyeli wakayowoyaso kuti: “Vingelengele vya makhwiro ghose ghanayi vikaŵa na maso zingilizge.” Kweni panji chakuzizika chomene ni umo makhwiro ghakaŵira. Wakalongosora kuti: “Kawonekero na kapangikiro kake kakaŵa nga ni para khwiro lili mukati mwa khwiro linyake.” Kasi ichi chikang’anamuranga vichi?

16, 17. (a) Kasi gileta ili likaŵa na makhwiro mukati mu makhwiro ghanyake munthowa wuli? (b) Kasi makhwiro ghakuvumbura vichi za umo gileta la Yehova likwendera?

¹⁶ Vikuwoneka kuti khwiro lililose ilo Ezekiyeli wakawona, ghakaŵa makhwiro ghaŵiri agho ghakaŵa pamoza, ndipo khwiro lililose likakhala mwakupinjikana na linyake. Panji ndicho chifukwa makhwiro agha ghakachitanga ivyo Ezekiyeli wakalongosora. Iyo wakati: “Para ghakwenda, ghakalutanga ku chigaŵa chilichose cha vigaŵa vinayi kwambura kuzgoka.” Kasi makhwiro agha ghakutiphalira vichi vya gileta lakuchanya ilo Ezekiyeli wakawona?

¹⁷ Makhwiro ghatali nthena ngakuti ghangenda mtunda utali chomene nanga ghangazingilira kamoza pera. Nakuti mboniwoni iyi yikulongora kuti gileta ili likendanga pa sipidi ya leza! (Ezek. 1:14) Chinyake ntchakuti umo makhwiro ghanayi agha ghali kukhalira vikulongora kuti ngakusuzga yayi kukhweta. Gileta ili lingasintha kwakuluta kwambura kugowozgako dankha sipidi panji kuzgoka! Kweni likwenda bweka kuko yayi. Maso agho ghali mu vingelengele ghakulongora kuti gileta ili likuwona vinthu vyose, kulikose uko likwenda.

18. Kasi tikusambirako vichi ku ukuru wa makhwiro na unandi wa maso?

¹⁸ Ipo kasi Yehova wakakhumbanga kuti Ezekiyeli, na ŵanthu wose ŵakugomezgeka, ŵasambireko vichi ku chigaŵa chakuchanya cha gulu lake? Wonani ivyo tasambira kuzakafika apa. Gulu ili ndauchindami na lakofya, nga umo chinthu chakugolera cha makhwiro na ukuru wake chikulongolera. Likumanya vyose ivyo vikuchitika, nga umo maso ghanandi gha mu makhwiro ghakulongolera. Maso gha Yehova ghakuwona vinthu vyose. (Zinth. 15:3;  Yer. 23:24) Kweniso Yehova wali na ŵangelo mamiliyoni ghanandi awo wangaŵatuma kulikose, ndipo ŵangelo aŵa ŵangawona vinthu vyose na kukaphalira Fumu yawo Yikuru.—Ŵazgani Ŵahebere 1:13, 14.

19. Kasi sipidi kweniso kusintha kwakuluta, ivyo gileta la Yehova likuchita vikutisambizgachi vya Yehova na chigaŵa chakuchanya cha gulu lake?

¹⁹ Chinyake ntchakuti, tikuwona kuti gileta ili likuchimbira chomene ndipo likukaŵa yayi kusintha kwakuluta. Ghanaghanirani waka umo chigaŵa chakuchanya cha gulu la Yehova chikupambanirana na maboma gha ŵanthu, mawupu, kweniso magulu! Maboma gha ŵanthu ghakujichitira bweka vinthu, ndipo ghakutondeka kuchitapo kanthu mwaluŵiro para vinthu vyasintha m’paka vinthu vinangikirethu. Kweni umo gileta la Yehova likuchitira vikulongora kuti Chiuta uyo wakulilongozga ngwamahara, ndipo wakuchitapo kanthu mwaluŵiro para vinthu vyasintha. Kuyana na ng’anamuro la zina lake, Chiuta wangazgoka chilichose icho chikukhumbikwa kuti wafiske khumbo lake. (Eks. 3:13, 14) Wangazgoka Chinkhara chankhondo kuti wavikilire ŵanthu ŵake, kweni wangasintha mwaluŵiro na kuŵa munthu walusungu uyo wakugowokera zakwananga na kuŵaso paubwezi na ŵanthu awo ŵapera kufumira pasi pa mtima.—Sal. 30:5; Yes. 66:13.

20. Chifukwa wuli tikwenera kuzizikika na gileta la Yehova?

²⁰ Mboniwoni ya Ezekiyeli yingatichitiska kujifumba kuti, ‘Kasi ine nkhuzizikika na gileta la Yehova?’ Tikwenera kukumbuka kuti gileta likwimira vinthu ivyo vikuchitika nadi, sono nthe. Tileke kughanaghana kuti Yehova, Mwana wake, na ŵangelo wose ŵakuwona yayi masuzgo ghanyake agho ghakutigongoweska. Kweniso tileke kufipa mtima kuti Chiuta wachedwenge kuchitapo kanthu pa masuzgo ghithu panji kuti gulu lake litondekenge kuchita makora para vinthu vyasintha mu charu. Tingachita makora kukumbuka kuti gulu la Yehova ndakutokatoka, nyengo zose likwenda. Nakuti Ezekiyeli wakapulika munthu munyake kuchanya wakuchemerezga kuti: “Makhwiro zingilirani!” Vikuwoneka kuti apa wakaphaliranga makhwiro kuti ghambe kwenda. (Ezek. 10:13) Tikuzizikika chomene pakughanaghanira umo Yehova wakwendeskera gulu lake. Kweni chomene tikwenera kuzizikika na Yehova.

21, 22. Kasi tingati ntchivichi chikovwira kuti vigaŵa vyose vya gileta vikhalenge mu malo ghake?

²¹ Maso gha Ezekiyeli sono ghakamba kulaŵiska pa makhwiro pachanya, ndipo wakawona “chinthu chinyake chakuwoneka nga ni mlengalenga icho chikanyezimiranga nga ni maji ghakukhoma ghakuchitiska wofi.” (Ezek. 1:22) Pachanya chomene pa mitu ya ŵakerubi, chinthu ichi chikatandawuka, na kunyezimira na uchindami. Kweni panji ivi vingazizika ŵanthu awo ŵakumanya umo makina ghakugwilira ntchito. Panji ŵanji ŵangajifumba kuti: ‘Kasi ntchivichi icho chikukhozga chinthu ichi pachanya pa makhwiro?  Kasi makhwiro ghangagwira wuli ntchito kwambura masipindulu?’ Kumbukani kuti gileta ili likulongozgeka na malango gha chilengiwa yayi, chifukwa likwimira waka vinthu ivyo vikuchitika kuchanya. Wonaniso mazgu ghakuti: “Mzimu uwo ukaŵa pa vyamoyo ukaŵaso mu makhwiro.” (Ezek. 1:20, 21) Kasi ni mzimu wuli uwo ukaŵa pa ŵakerubi kweniso pa makhwiro?

²² Tikukayika yayi kuti ukaŵa mzimu utuŵa wa Yehova, uwo ni nkhongono yikuru chomene mu chilengiwa chose. Nkhongono iyi ndiyo yikukhozga gileta ili, kulipa nkhongono, na kulilongozga pakwenda. Pakuti tamanya fundo iyi, sono tiyeni tiyendere lumoza na Ezekiyeli apo wakwamba kuwona uyo wakwendeska gileta ili.

23. Kasi Ezekiyeli wakayowoya mazgu wuli kuti walongosore Yehova, ndipo chifukwa wuli?

²³ Ŵazgani Ezekiyeli 1:26-28. Pakulongosora ivyo wakawona mu mboniwoni iyi, Ezekiyeli mu malo ghanandi wali kulemba mazgu ghakuti “vikawonekanga nga ni,” “vyakuwoneka nga ni,” “vikaŵa nga,” na “chinthu chakuwoneka nga ni.” Kweni mu mavesi agha ndimo wakughazunura chomene mazgu agha. Wakayezgayezga kusanga mazgu ghakulongosolera vinthu vyakusuzga kulongosora ivyo wakawona. Wakawona “chinthu chakuwoneka  nga ni libwe la safiro, ndipo chikawonekanga nga ntchitengo chaufumu.” Jitorani kuti mukuwona chitengo icho chajobeka kufuma ku libwe labuluu la safiro. Ndipo pachanya pa chitengo ichi pali Munyake uyo “wakuwoneka nga ni munthu.”

24, 25. (a) Kasi chiŵingavula icho chikuzingilizga chitengo cha Yehova chikutikumbuska vichi? (b) Kasi nyengo zinyake mboniwoni zanthena izi zikuŵakhwaska wuli ŵanthu ŵachipulikano?

²⁴ Chithuzi chakutindika ichi chikawonekanga mwapachanyapachanya waka, pakuti Yehova wakaŵaliska dimi lauchindami kufuma mu chiwuno kukhilira musi kweniso kufuma mu chiwuno kukwelera muchanya. Tiŵe nga tikuwona ntchimi iyi yikuphinya na kusikizga maso ghake apo yikalaŵisiskanga chinthu chauchindami ichi. Pamanyuma, Ezekiyeli wakalemba chakuzizika icho wakawona, wakati, “Pakaŵa ungweru ukuru uwo ukamuzingilizga nga ntchiŵingavula icho chili mu bingu pa zuŵa ilo vula yikulokwa.” Kasi mukukondwa para mwawona chiŵingavula? Chikutikumbuska waka uchindami wa Mlengi withu! Kweniso chiŵingavula chikutikumbuska phangano la mtende ilo Yehova wakachita na ŵanthu pamanyuma pa Chigumula. (Gen. 9:11-16) Nangauli Yehova Ngwankhongonozose, kweni ni Chiuta wa mtende. (Heb. 13:20) Mu mtima wake muli kuzura mtende ndipo ukuthandazgikira ku wose awo ŵakumusopa mwakugomezgeka.

²⁵ Kasi Ezekiyeli wakajipulika wuli wakati wawona uchindami wa Yehova Chiuta? Ezekiyeli wakalemba ivyo vikachitika, wakati: “Nkhati nawona, nkhasindamira pasi chisko chane.” Chifukwa cha kuzizikika kweniso wofi, Ezekiyeli wakawa pasi. Ndimo zikachitiraso ntchimi zinyake zikati zapokera mboniwoni kufuma kwa Yehova. Ivyo ŵakawonanga vikaŵa vikuru na vyakofya. (Yes. 6:1-5; Dan. 10:8, 9; Chivu. 1:12-17) Kweni pamanyuma, ŵanthu aŵa ŵakakhozgekanga chomene na ivyo Yehova wakaŵavumbuliranga. Ezekiyeli nayo wakwenera kuti wakakhozgeka. Ipo kasi tikwenera kujipulika wuli para tikuŵazga nkhani za mu Malemba nga ni izi?

26. Kasi mboniwoni iyo Ezekiyeli wakawona yikwenera kuti yikamukhozga wuli?

²⁶ Usange Ezekiyeli wakakayikanga panji kudandawura na umo ŵanthu ŵa Chiuta ŵakakhaliranga ku Babuloni kura, mboniwoni iyi yikwenera kuti yikamukhozga chomene. Wakamanya kuti vilije kanthu kuti ŵanthu ŵakugomezgeka ŵa Chiuta ŵaŵe ku Yerusalemu panji ku Babuloni panji kunyake kulikose. Kulikose uko ŵangaŵa, ŵangaŵa kutali yayi na gileta lakuzizika la Yehova! Satana walije nkhongono zakutondera Chiuta uyo wakulongozga gulu lauchindami lakuchanya ili. (Ŵazgani Salimo 118:6.) Ezekiyeli wakawonaso kuti gileta lakuchanya ili likaŵa kutali yayi na ŵanthu. Makhwiro ghake ghakakhwaskanga pasi! (Ezek. 1:19) Ichi chikulongora kuti Yehova wakaŵawonanga ŵanthu ŵake ŵakugomezgeka awo ŵakaŵa ku wuzga. Adada ŵawo ŵakuchanya ŵakaŵa ŵakunozgeka kuŵawovwira nyengo zose!

27. Kasi mboniwoni ya Ezekiyeli yikutovwira wuli ise mazuŵa ghano?

²⁷ Kasi mboniwoni ya Ezekiyeli nase yikutikhwaska? Nkhanira kwali! Kumbukani kuti Satana wakulimbana chomene na kusopa kutuŵa. Wangakondwa chomene para ise tingamba kujiwona kuti tili tekha, tajowoleka, tili kutali na Adada ŵithu ŵakuchanya na gulu lawo. Tingazomerezganga yayi kuti maghanoghano agha ghazenge linga mu mtima withu! (Sal. 139:7-12) Nase tili na vifukwa vyose vyakuchitira wofi, nga ni Ezekiyeli. Ise tingasindama pasi nga umo iyo wakachitira yayi. Kweni tikwenera kuzizwa na kutindikika na nkhongono, sipidi, kendero, kusinthasintha, na uchindami wa chigaŵa chakuchanya cha gulu la Yehova.

28, 29. Kasi ntchivichi chikulongora kuti gileta la Yehova likendanga mu vyaka 100 ivyo vyajumpha?

²⁸ Kumbukaniso kuti gulu la Yehova lili na chigaŵa cha pa charu chapasi. Ndipo chigaŵa cha pa charu chapasi ichi chili na ŵanthu ŵakwananga. Kweni ghanaghanirani waka ivyo Yehova wachita pano pasi! Yehova wawovwira ŵanthu pa charu chose chapasi kuchita ivyo paŵekha ŵangakwaniska yayi. (Yoh. 14:12) Para tingaŵazga buku la Ufumu wa Chiuta Ukuwusa! tiwonenge umo mulimo wa kupharazga wachitikira mu vyaka 100 ivyo vyajumpha. Tiwonengeso umo gulu la Yehova lalutira panthazi pakusambizga Ŵakhristu ŵaunenesko, kuwina milandu, kweniso kugwiliskira ntchito tekinoloje yasono pakufiska khumbo la Chiuta!

²⁹ Para tikughanaghanira vyose ivyo vyachitika pa kuwezgerapo kusopa kutuŵa mu mazuŵa ghaumaliro gha charu chiheni ichi, tikufikapo nadi kuti gileta la Yehova likwenda nyengo zose. Tili na mwaŵi ukuru chomene kukolerana na gulu ili kweniso kuteŵetera Fumu Yikuru yanthena iyi!—Sal. 84:10.

30. Kasi tisambirenge vichi mu mutu wakulondezgapo?

³⁰ Kweni mboniwoni ya Ezekiyeli yikutisambizga vinandi. Mu mutu wakulondezgapo, tiwonenge chomene “vyamoyo” vyakuzizwiska vinayi, panji kuti ŵakerubi. Kasi vingatisambizga vichi vya Yehova Chiuta, Fumu yithu yauchindami?