1-3. 1) ¿Kʼusi laj yil xchiʼuk laj yaʼi li Esekiele? (Kʼelo li lokʼol ta slikebal kapituloe). 2) ¿Buchʼu ta sjuʼel li kʼusi akʼbat yil xchiʼuk laj yaʼi li Esekiele, xchiʼuk kʼu yelan laj yaʼi sba?

 LI Esekiele oy kʼusi yakal tskʼel batel ta nom ta stukʼil li takixokol balumil ta stenlejaltike, chakʼ persa yoʼ skʼel li kʼusi te xvinaje. Vaʼun, la svikʼ lek li sate, mu xchʼun li kʼusi yakal tskʼele, yuʼun chvinaj ti chtal tsatsal ikʼ ti mu staleluk jeche. Solel tsots xjumumet li ikʼ ti chtal ta nortee. Xvililet tajek skʼuʼ xchiʼuk stsotsil sjol li Esekiele. Xvinaj ti xvolet tal jun mukʼta tok ti xleblajet skʼakʼale, stsʼayayet tajek laj yil Esekiel kʼuchaʼal oro ti kapbil ta platae. Kʼalal yantik xnopaj talel ta anil li mukʼta toke, mas to xkaʼitik ti chbakʼ kʼuchaʼal epal soltaroetike (Esek. 1:4, 24).

² Taje jaʼ li kʼusi baʼyel akʼbat yil Esekiel ti muʼyuk chchʼay-o ta sjole, pe oy to yan kʼusitik labalik sba ch-akʼbat yil. Kʼalal jech laj yile, yichʼoj toʼox van 30 sjabilal. Vaʼun, laj yaʼi ti ‹vul ta stojolal sjuʼel Jeova› o li xchʼul espiritue. Li sjuʼel Jeova ti mu albajuke jaʼ chkoltaat-o Esekiel yoʼ skʼel xchiʼuk xaʼi li kʼusi toj echʼ noʼox labal sba ch-akʼbat yile, ti mas to toj lek xvinaj ti mu jechuk li pelikulaetik ti toj lekik pasbile. Ta skoj ti toj labal sba laj yil li Esekiele, ‹la spatan sba ta balumil› (Esek. 1:3, 28).

 ³ Li kʼusi oy ta yoʼonton Jeovae maʼuk ti labal sba chaʼi li Esekiele. Li kʼusi baʼyel akʼbat yil Esekiel xchiʼuk li yan kʼusi akʼbat yil ta tsʼakal ti te tsʼibabil ta slivroal Esekiele, toj ep sbalil la stabe xchiʼuk ep sbalil tstabeik li yajtuneltak Jeova li avi kʼakʼale. Jaʼ yuʼun, kaʼibetik lek smelolal li kʼusi akʼbat yil xchiʼuk li kʼusi laj yaʼie.

4, 5. ¿Kʼusi yakal chkʼot ta pasel kʼalal jaʼo oy kʼusi akʼbat yil li Esekiele?

⁴ (Kʼelo Esekiel 1:1-3). Baʼyel jkʼeltik kʼu toʼox yelan li vaʼ orae. Jaʼo ta sjabilal 613 kʼalal muʼyuk toʼox talem Jesuse. Jech kʼuchaʼal laj kiltik li echʼ kapituloe, li Esekiele te oy ta Babilonia xchiʼuk li judaetik ti chukbil batike. Te nakalik ta jun jteklum ta stsʼel ukʼum Kebar xchiʼuk yaʼeluke jaʼ krixchanoetik la smeltsanik li ukʼum taje, ti tsta sba xchiʼuk li ukʼum Eufratese.

⁵ Li buchʼutik chukbilik batel ta Babiloniae te van vaxakib sien kilometro xilik li slumalik Jerusalene. * Li templo ti bu tun ta paleal li stot Esekiele noj ta yichʼel ta mukʼ santoetik xchiʼuk ta choplejal. Li chotlebal sventa ajvalilal ti bu toj lek la spasik mantal li ajvalil David xchiʼuk Salomone, avie jaʼ xa noʼox chakʼ kʼexlal. Li ajvalil Joakin ti muʼyuk tukʼ laj yakʼ sbae te xchiʼuk li buchʼutik chukbilik batel ta Babiloniae. Jech xtok, li buchʼu och ta xkʼexol ta ajvalilal ti jaʼ li Sedekiase jaʼ jun chopol ajvalil ti jaʼ noʼox pasbil ta mantale (2 Rey. 24:8-12, 17, 19).

6, 7. ¿Kʼu yuʼun chopol laj yaʼi sba Esekiel ta skoj li kʼusi yakal chkʼot ta pasel li vaʼ orae?

⁶ Li Esekiel ti tsots xchʼunel yoʼontone xuʼ van toj tsots laj yaʼi kʼalal laj yil ti lik lajuk xchʼunel yoʼonton xchiʼiltak ta skoj li kʼusi yakal  chkʼot ta pasel li vaʼ orae. Junantik judaetik ti chukbilik batele xuʼ van la snopik ti muʼyuk xa tsakbilik ta venta yuʼun Jeovae xchiʼuk xuʼ van xi la snopik ta stojolal li chopol Babilonia xchiʼuk li jecheʼ diosetik yuʼunike: «¿Mi tslajesbeik van skʼoplal li melel yichʼel ta mukʼ Dios xchiʼuk li ajvaliletik svaʼanoj Dios ta balumile?».

⁷ Avi ti jnaʼojtik skotol taje, ¿kʼu yelan chavil ti chlik achan li versikuloetik ti chal li baʼyel kʼusi labal sba akʼbat yil li Esekiele? (Esek. 1:4-28). Kʼalal jaʼo chachan batele, nopo noʼox avaʼi ti voʼot li Esekiele, teuk xa akʼeloj xchiʼuk chachikinta yaʼeluk li kʼusi akʼbat yile.

8. ¿Kʼusi akʼbat yil li Esekiele, xchiʼuk kʼusi smelolal?

⁸ ¿Kʼusi akʼbat yil li Esekiele? Li kʼusi akʼbat yile xkoʼolaj ta jun mukʼta kareta ti oy chanib smukʼta yantailtak yilel ti jaʼ set-set takʼinetike, ta xokon li jujun set-set takʼine oy jujun anjel ti toj labal sbae xchiʼuk ta mas jelavele laj yichʼ alel ti jaʼik keruvinetike (Esek. 10:1). Ta sba li set-set takʼinetike oy kʼusi te pechpech ti xkoʼolaj kʼuchaʼal nen ti stsʼayayete xchiʼuk ti labal sbae, ta sba li kʼusi pechpeche te oy jun chotlebal sventa ajvalilal ti jun to yutsile xchiʼuk jaʼ te chotol stuk li Jeovae. ¿Kʼusi skʼan xal li mukʼta kareta taje? Li kʼusi akʼbat yil li Esekiele jtos noʼox kʼusi skʼan xal: jaʼ li jvokʼ  s-organisasion Jeova ta sjunul vinajele. ¿Kʼu yuʼun chkaltik ti jaʼ skʼoplal taje? Jkʼeltik oxib srasonal.

9. ¿Kʼu yuʼun chkaltik ti xkoʼolaj ta jun kareta ti kʼu yelan xil sbaik Jeova xchiʼuk li yaj-anjeltake?

⁹ Li Jeovae jaʼ tspas ta mantal li anjeletike. Li kʼusi akʼbat yil li Esekiele, te chvinaj ti te oy ta yakʼol keruvinetik li xchotleb sventa ajvalilal yuʼun Jeovae. Ta yan versikuloetik ta Vivliae chakʼ ta ilel ek ti chotol ta jun chotlebal sventa ajvalilal li Jeovae xchiʼuk ti te oy ta sba li keruvinetike o ti te oy ta oʼlole (kʼelo 2 Reyes 19:15; Eks. 25:22; Sal. 80:1). Li Jeovae muʼyuk chotol ta sba li keruvinetik sventa xkuchat batel ti bu xal yoʼontone, yuʼun muʼyuk onoʼox chtun yuʼun junuk kareta yoʼ xanav batel. Li kʼusi chakʼ ta ilele jaʼ ti chchʼunbeik smantal Jeova kʼuchaʼal Jpasmantal yuʼunik li keruvinetike xchiʼuk ti xuʼ buyuk noʼox chtakatik batel sventa spasik li kʼusi oy ta yoʼontone. Li keruvinetik xchiʼuk li yan anjeletike jaʼik yajtuneltak Jeova xchiʼuk oy ta sbaik spasel li kʼusi chkʼot ta nopel yuʼun Jeovae (Sal. 104:4). Xkoʼolaj yaʼeluk ti chotol batel Jeova ta sba skotol li anjeletik sventa xbeiltasvan batel kʼuchaʼal jun Mukʼul Jpasmantale xchiʼuk ti xkoʼolajik ta jun mukʼta karetae.

10. ¿Kʼu yuʼun chkaltik ti maʼuk noʼox skʼoplal chanib keruvinetik li skareta Jeovae?

¹⁰ Li karetae maʼuk noʼox skʼoplal li keruvinetike. Li Esekiele laj yil chanvoʼ keruvinetik. Kʼalal chanib xi li ta Vivliae, jaʼ skʼan xal jtos kʼusi lek tajek, ti lek tsʼakal o ti smakojbe skʼoplal skotole. Jaʼ yuʼun,  kʼalal chal ti oy chanvoʼ keruvinetike yakal chalbe skʼoplal skotol li anjeletik ta vinajele o li xnichʼnabtak Diose, maʼuk noʼox li keruvinetike. Jech xtok, li set-set takʼinetik xchiʼuk li keruvinetike noj ta bekʼ satiletik, taje jaʼ skʼan xal ti skotol li anjeletike yilojik lek li kʼusi chkʼot ta pasele, maʼuk noʼox li chanvoʼ keruvinetike. Li Esekiele laj yal ti batsʼi mukʼ tajek li skareta Jeovae yuʼun bikʼitik xa xvinaj li tsatsal keruvinetike (Esek. 1:18, 22; 10:12). Taje chakʼ ta ilel ti batsʼi mukʼ tajek li s-organisasion Jeova ta vinajele ti maʼuk noʼox chanvoʼ keruvinetik oye.

11. ¿Kʼusi akʼbat yil Daniel ti xkoʼolaj xchiʼuk li kʼusi laj yil Esekiele? ¿Kʼusi chkʼot ta nopel kuʼuntik ta skoj taje?

¹¹ Oy kʼusi ti xkoʼolaj akʼbat yil Daniel ta sventa li vinajele. Li j-alkʼop Daniele te kuxi ta Babilonia ti kʼu sjalil chukbil batike xchiʼuk oy kʼusi akʼbat yil ta sventa li vinajele. Labal sba ta aʼiel, pe li chotlebal sventa ajvalilal yuʼun Jeova ti laj yil Daniele oy syantailtak ek. Li kʼusi akʼbat yile jaʼ mas te skʼoplal li yutsʼ yalal Jeova ta vinajel ti ep tajeke. Li Daniele laj yil ti batsʼi epik tajek ti te vaʼalik ta yeloval Jeovae, yuʼun laj yal ti laj yil ‹jun miyon anjeletik xchiʼuk te vaʼal sien miyon anjeletik›, jech xtok li jujun anjele choti ti bu akʼbil yavilik ti bu chchapanvan li Diose (Dan. 7:9, 10, 13-18). Li kareta akʼbat yil Esekiele, jaʼ skʼoplal skotol li anjeletike, ¿mi mu jechuk?

12. ¿Kʼu yuʼun tskoltautik tajek kʼalal ta jchantik loʼiletik ta Vivlia jech kʼuchaʼal li skareta Jeova ta vinajele?

¹² Li Jeovae snaʼoj ti ta jtabetik sbalil kʼalal jaʼ ta jnopbetik skʼoplal «ta sventa li kʼusitik mu xkiltike». ¿Kʼu yuʼun jech laj yal li Pabloe? Yuʼun ta skoj ti lum achʼelutik noʼoxe, jaʼ mas chbat ta koʼontontik snopbel skʼoplal «li kʼusitik xkiltike», jaʼ xkaltik, li kʼusitik chtun kuʼuntike xchiʼuk li kʼusi ta jvul-o koʼontontik jujun kʼakʼal ti j-echʼel be noʼoxe (kʼelo 2 Korintios 4:18). Li Satanase snaʼoj ti jaʼ jech ta jnoptike, jaʼ yuʼun tsujutik sventa jaʼuk tsots skʼoplal xkiltik li kʼusi tskʼan koʼontontike. Pe ta skoj ti skʼanojutik li Jeovae, tskoltautik sventa mu stsalutik li Satanase. Li loʼiletik jech kʼuchaʼal li albil kʼopetik yuʼun Esekiele tskoltautik sventa xkakʼtik venta ti toj labal sba li yutsʼ yalal Jeova ta vinajele. ¡Taje toj labal sba!

13, 14. 1) ¿Kʼu yelan laj yil Esekiel li syantailtak karetae? 2) ¿Kʼusi chakʼ ta ilel ti oy syantail li chotlebal sventa ajvalilal yuʼun Jeovae?

¹³ Li Esekiele jaʼ baʼyel laj yalbe skʼoplal li chanvoʼ keruvinetike. Li ta yan kapituloe ta jkʼeltik kʼusi chakʼ jchantik ta sventa Jeova ti kʼu yelan toj labal sba pasbilik li keruvinetike. Li Esekiele laj yalbe skʼoplal li chanib set-set takʼin ti xkoʼolaj ta yantaetik ti te oyik ta stsʼel li keruvinetike. Jech xtok, li jujun set-set takʼine chanjot bu oyik, yuʼun xkoʼolaj ta jun mukʼta kuadrado (kʼelo Esekiel 1:16-18). Li set-set takʼinetike stsʼayayetik kʼuchaʼal krisolito ton, yoxyoxtik skʼanal xchiʼuk xkiltik jelavel osil ta spat.

¹⁴ Li Esekiele laj yalbe skʼoplal xtok li syantailtak karetae. Nopo avaʼi taje, jun chotlebal sventa ajvalil ti oy syantailtake, ¿mi mu jechuk  ti yan jutuk ta aʼiele? Yuʼun jnaʼojtik ti jun noʼox yavil li xchotleb ajvaliletike. Li ajvaliletik ta balumile mu xuʼ spasik mantal mi maʼuk xa ti bu sventainojike, pe li spasob mantal Jeovae jelel tajek. Jutuk xa ox skʼan sventa x-akʼbat yil Esekiel ti muʼyuk spajeb sjuʼel li Jeovae xchiʼuk ti bu tspas mantale (Neem. 9:6). ¡Li Jeovae xuʼ tspas mantal ti bu tskʼan yoʼontone!

15. ¿Kʼusi to yan laj yal Esekiel ta sventa li syantailtak karetae?

¹⁵ Li Esekiele solel labal sba laj yil smukʼul li syantailtak karetae, xi laj yale: «Li set-set takʼinetike labal sba tajek ta skoj ti toj mukʼtike». ¿Mi xnop avuʼun ti tstoy muyel sat Esekiel sventa tskʼel li yantaetik o li set-set takʼinetike? Oy to kʼusi laj yal Esekiel ta sventa li set-set takʼinetike, xi laj yale: «Li stiʼiltake noj ta bekʼ satil ta sjoylejal». Li kʼusi mas labal sbae jaʼ ti kʼu yelan pasbil jujune, xi to laj yale: «Ti kʼu yelan pasbile xkoʼolaj kʼuchaʼal xojol ochel yan set-set takʼin ta yut li jun set-set takʼine». ¿Kʼusi skʼan xal taje?

16, 17. 1) ¿Kʼusi skʼan xal ti oy jun set-set takʼin ta yut yan set-set takʼine? 2) ¿Kʼusi chakʼ jchantik ti xuʼ buyuk noʼox xbat li syantailtake?

¹⁶ Li Esekiele akʼbat yil jun set-set takʼin ti «xkoʼolaj kʼuchaʼal xojol ochel yan set-set takʼin ta yut li jun set-set takʼine» xchiʼuk ti jmoj lek napʼajtike. Taje chakʼ ta ilel ti oy srasonal kʼalal xi laj yal li Esekiele: «Xuʼ xbatik ta buyuk noʼox ta xchanjotal ti bu skʼelojik batel kʼalal chbakʼike, mu persauk chjoypʼijik». ¿Kʼusi chakʼ jchantik li kʼusi laj yil Esekiel ta sventa li skareta Jeovae?

¹⁷ Ta skoj ti solel toj mukʼtik li syantailtake, xuʼ ep chanav akʼo mi juteb noʼox stselelin sbaik. Chakʼ ta ilel noxtok ti anil tajek chanave, yuʼun «xkoʼolaj kʼuchaʼal saksevul ti xleblajete» (Esek. 1:14). Ti kʼu yelan toj labal sba pasbil li syantailtake, ti chbat ta jujujote, chakʼ ta ilel ti xtojob lek li buchʼu yakal tsbeiltas batele. Taje xuʼ van jech skʼan tsmeltsanik jkotuk karo li pʼijil krixchanoetike, pe mu spas yuʼunik. Li kareta taje xuʼ xbat ta jujot xchiʼuk mu persauk xpaj ta xanbal sventa xjoypʼij. Taje maʼuk skʼan xal ti mu snaʼ bu chbate, yuʼun li bekʼ satiletik ti oy ta yantaetike chakʼ ta aʼiel ti snaʼoj lek bu chbat li karetae xchiʼuk ti xil skotole.

18. ¿Kʼusi chakʼ jchantik ti mukʼtik tajek li syantailtake xchiʼuk ti noj ta bekʼ satiletike?

¹⁸ ¿Kʼusi oy ta yoʼonton Jeova ti akʼo snaʼ li Esekiel xchiʼuk li tukʼil yajtuneltak ta sventa li jvokʼ s-organisasion ta vinajele? Jvules ta joltik li kʼusi laj xa jchantik ta sventa li karetae. Toj labal sba, yuʼun toj mukʼtik li set-set stakʼinaltake xchiʼuk xvikʼlajet tajek ti kʼu yelan pasbile. Xil skotol, taje jaʼ ta skoj ti noj ta satiletik li jujun set-set takʼine. «Li Jeovae chajal ta sba sat skotol» (Prov. 15:3; Jer. 23:24). Jech noxtok, li Jeovae oy ta smiyonal noʼox yaj-anjeltak xchiʼuk xuʼ buyuk noʼox xtakatik batel yuʼun li Jeovae, xuʼ xilik li kʼusi chkʼot ta pasele xchiʼuk chkʼot yalbeik li Mukʼul Jpasmantal yuʼunike (kʼelo Ebreos 1:13, 14).

19. Ti anil chanav li karetae xchiʼuk ti xuʼ chbat ta jujujote, ¿kʼusi chakʼ jchantik ta sventa Jeova xchiʼuk li s-organisasion ta vinajele?

¹⁹ Laj kiltik noxtok ti toj anil chanav li karetae xchiʼuk ti xuʼ chbat ta jujujote. Toj echʼ noʼox jelel li s-organisasion Jeova ta  vinajel xchiʼuk li ajvaliletike, institusionetik xchiʼuk li jeltos organisasionetik oy ta balumile. Li organisasionetik ta balumile mu snaʼik kʼusi tspasik. Jech xtok, mu snaʼik kʼusi xuʼ spasik mi la snuptan svokolike o xuʼ chlaj-o skʼoplalik. Pe mu jechuk li skareta Jeova ti jaʼ tstsʼot batele, yuʼun chakʼ ta ilel ti snaʼ xrasonaje xchiʼuk ti xuʼ sjel li kʼusi snopoje. Taje jaʼ jech smelolal li sbie, yuʼun li Jeovae xuʼ kʼusiuk noʼox spas sba sventa tspas li kʼusi oy ta yoʼontone (Eks. 3:13, 14). Jech kʼuchaʼal liʼe, li Jeovae xuʼ spas sba kʼuchaʼal jun tsatsal jpaskʼop ti tspoj li steklumale o ta jun jchapanvanej ta stojolal li buchʼutik tstoy sbaike. Xuʼ spas sba ta anil xtok ta jun jkʼanvanej Dios ti chchʼaybe smul li krixchanoetike xchiʼuk tskolta li buchʼutik lilijem yoʼontonik ti sutesoj yoʼontonike (Sal. 30:5; Is. 66:13).

20. ¿Kʼu yuʼun skʼan ti labaluk sba xkiltik xchiʼuk ti masuk jtsaktik ta mukʼ li skareta Jeovae?

²⁰ Avi ti laj xa jchantik li kʼusi laj yil Esekiele, lek onoʼox ti xi jakʼbe jbatike: «¿Mi labal sba chkil xchiʼuk mi mas to ta jtsak ta mukʼ li skareta Jeovae?». Jvules ta joltik ti jech-o chanav avi li skareta Jeovae. Mu jnoptik ti muʼyuk stsakoj ta venta Jeova, Xnichʼon xchiʼuk yaj-anjeltak kʼalal oy kʼusi ta jnuptantik ti chijchibaj-o yuʼune. Mu jnoptik xtok ti skʼan jal tajek jmalatik sventa chakʼbutik Jeova li kʼusi chtun kuʼuntike o ti mu xa snaʼ kʼusi tspas s-organisasion kʼalal oy kʼusitik chjelanuk ta balumile. Tskoltautik tajek kʼalal tey ta joltik ti mu xpaj ta xanbal o ta abtel li s-organisasion Jeovae. Li Esekiele laj yaʼi ti oy buchʼu xi tsots avane: «¡Tselelin abaik!», taje jaʼ van jech albatik li set-set takʼinetik sventa mu xpajik ta xanbale (Esek. 10:13). ¿Mi mu labaluk sba ta kʼelel kʼu yelan tsbeiltas s-organisasion li Jeovae? Pe li kʼusi mas labal sba ta skotole jaʼ stuk li Jeovae.

21, 22. Albo skʼoplal kʼusi chakʼ xanavuk li skareta Jeovae.

²¹ Li Esekiele jaʼ xa lik yalbe skʼoplal li kʼusi oy ta yakʼol li set-set takʼinetike, laj yil ti oy kʼusi «te pechpech ti xkoʼolaj kʼuchaʼal nen ti stsʼayayete xchiʼuk ti labal sbae» (Esek. 1:22). Ta yakʼol li keruvinetike oy kʼusi te pechpech ti xkoʼolaj kʼuchaʼal nen ti stsʼayayete xchiʼuk ti labal sbae. Li buchʼutik chchanik li albil kʼop liʼe xchiʼuk ti snaʼojik kʼuxi ch-abtej li makinaetike, xuʼ van xi tsjakʼbe sbaike: «¿Kʼusi oy ta sba li kʼusi mukʼ te pechpeche? ¿Kʼuxi ch-abtej li syantailtak ti chʼabal kʼusi tsakal-o yilele?». Jvules ta joltik ti maʼuk ch-abtej-o ta smantaltak vinajel balumil ti tspas ta mantal li kʼusitik oye (leyes físicas), yuʼun li kareta taje jaʼ jun skʼelobil ti bu nakal li Diose. Jtsaktik ta venta liʼe: «Li espiritu ti te oy ta stojolal li anjeletike te oy ta stojolal li set-set takʼinetik eke» (Esek. 1:20, 21). ¿Kʼusi skʼoplal li espiritue?

²² Li espiritu taje jaʼ skʼoplal li xchʼul espiritu Jeovae, jaʼ xkaltik,  li juʼel ti stuk noʼox jech ta sjunul vinajel balumile. Li juʼelal taje jaʼ li kʼusi chakʼ xanavuk li karetae, ti jmoj oy sjunul li karetae xchiʼuk koʼol bu chbatik. Pe li Esekiele lik yalbe skʼoplal li buchʼu yakal tsbeiltase, jkʼeltik kʼusi la sta ta kʼelel.

23. ¿Kʼusitik jpʼelantik kʼop la stunes li Esekiele? ¿Kʼu yuʼun ep ta velta la stunes sventa xalbe skʼoplal li Jeovae?

²³ (Kʼelo Esekiel 1:26-28). Kʼalal laj yal Esekiel li kʼusi laj yile, ep ta velta la stunes li jpʼelantik kʼop liʼe: «Xkoʼolaj yilel», «xkoʼolaj kʼuchaʼal» xchiʼuk «xkoʼolaj», pe jaʼ mas to la stunes li ta versikuloetik taje. Kʼalal jech la stunese, chakʼ ta aʼiel ti tskʼel kʼuxi xuʼ xalbe skʼoplal li kʼusi yakal tskʼel ti mu xa noʼox snaʼ kʼuxi chalbe skʼoplale. Oy kʼusi laj yil ti «xkoʼolaj yilel ta safiro tone xchiʼuk xkoʼolaj yilel kʼuchaʼal jun chotlebal sventa ajvalil». Nopo avaʼi kʼu van yelan jun chotlebal sventa ajvalilal ti pasbil ta mukʼta safiro tone xchiʼuk ti oy buchʼu te chotol ti tsots tajek skʼoplal ti «xkoʼolaj yilel kʼuchaʼal jun krixchanoe».

24, 25. 1) ¿Kʼusi tsvules ta joltik li vaknakʼobal ti oy ta spat xokon li chotlebal sventa ajvalilal yuʼun Jeovae? 2) Li viniketik ti oy xchʼunel yoʼontonike, ¿kʼu yelan laj yaʼi sbaik kʼalal laj yilik li kʼusitik taje?

²⁴ Mu xvinaj lek ta kʼelel li kʼusi toj labal sba te oye, yuʼun li ta xchukbenal kʼalal to ta akʼole xchiʼuk li ta xchukbenal Jeova kʼalal to ta olone oy kʼusi te chlokʼ ti xkoʼolaj kʼuchaʼal kʼokʼ ti xleblajet tajeke. Xuʼ van chtal ta joltik kʼu yelan tsmutsʼ sba yaʼi sat li Esekiele xchiʼuk ti smakoj sat ta skʼob ta skoj ti toj tsots xojobal li kʼusi  skʼeloj batele. Toj labal sba kʼu yelan la stsutses sloʼil li Esekiele, xi laj yale: «Oy kʼusi xojobinaj ta spat xokon ti xkoʼolaj kʼuchaʼal vaknakʼobal ta tok kʼalal jaʼo chakʼ voʼe». ¿Mi oy chʼayal komem avoʼonton kʼalal laj avil junuk vaknakʼobale? ¡Taje chakʼ ta ilel kʼu yelan smukʼulal li Jpasvanej kuʼuntike! Li vaknakʼobal ti chakʼ jun oʼontonal kʼalal ta jkʼeltike tsvules ta joltik li trato sventa jun oʼontonal la spas Jeova kʼalal echʼ xa ox li Nojelal ta voʼe (Jen. 9:11-16). Li Mukʼul Dios kuʼuntike chojobinaj ta skoj sjuʼel xchiʼuk jaʼ jun Dios ti chakʼ jun oʼontonale (Ebr. 13:20). Solel jun yoʼonton li Jeovae xchiʼuk chakʼbe jun oʼontonal li buchʼutik tukʼ chakʼ sbaik ta stojolale.

²⁵ ¿Kʼu yelan laj yaʼi sba Esekiel kʼalal laj yilbe smukʼulal li Jeova Diose? Xi laj yal stuk li j-alkʼope: «Kʼalal laj kile, la jpatan jba ta balumil». Ta skoj ti toj labal sba laj yile xchiʼuk ti sta-o ichʼel ta mukʼ laj yile, la spatan sba ta balumil. Oy yan j-alkʼopetik ti jech laj yaʼi sbaik kʼalal oy kʼusi akʼbat yilik yuʼun li Jeovae. Buchʼuuk noʼox ti jech ch-akʼbat yile, xuʼ muʼyuk xa sbalil chaʼi sba xchiʼuk chʼayal chkʼot yoʼonton (Is. 6:1-5; Dan. 10:8, 9; Apok. 1:12-17). Pe li viniketik ti jech akʼbat yilik yuʼun li Jeovae mas to tsatsub-o yoʼontonik, jaʼ jech kʼot ta stojolal li Esekiele. Li voʼotike, ¿kʼu yelan chkaʼi jbatik kʼalal ta jchantik li loʼiletik jech kʼuchaʼal taje?

26. ¿Kʼu yuʼun xuʼ xkaltik ti tsatsub-o yoʼonton Esekiel li kʼusi akʼbat yile?

²⁶ Tsatsubtasbat van tajek yoʼonton Esekiel li kʼusi akʼbat yile, mas to mi jaʼo chat yoʼonton xchiʼuk mi mu xa snaʼ kʼusi tspas ta skoj li kʼusi yakal snuptanik ta Babilonia li steklumal Diose. Mu ventauk mi te oyik ta Jerusalen o ta Babilonia li steklumal Dios ti tukʼ yakʼoj sbaike, pe ta onoʼox xchabiatik yuʼun li skareta Jeova ti labal sba tajeke. Jech oxal, li buchʼutik pasbilik ta mantal yuʼun Satanase mu onoʼox stsal yuʼunik li Dios ti tsbeiltas li s-organisasion ta vinajele (kʼelo Salmo 118:6). Li Esekiele laj yil ti mu nomuk xil krixchanoetik li skareta Jeovae, yuʼun li set-set takʼinetike chkʼot kʼalal to ta balumil (Esek. 1:19). Jaʼ yuʼun, jamal xkiltik ti jech-o chchabi li yajtuneltak ti chukbilik batele. Skotol ora chichʼik kʼelel xchiʼuk chabiel yuʼun li Stotik ta vinajele.

27. ¿Kʼuxi tskoltautik avi li kʼusi akʼbat yil Esekiele?

²⁷ ¿Mi te to van tsakal jkʼoplaltik xchiʼuk li kʼusi akʼbat yil Esekiele? Tey, skʼan jvules ta joltik ti mas xa tsotsik kʼusitik tstunes Satanas yoʼ slajesbe skʼoplal li melel yichʼel ta mukʼ Diose. Yuʼun tskʼan ti jtuk chkaʼi jbatike, ti xijnamaj ta stojolal yantike, ti xijnamaj ta stojolal Jeova xchiʼuk li s-organisasione. ¡Mu me xkakʼtik ti x-och ta koʼontontik xchiʼuk ta jnopbentik li jutbil kʼopetik yuʼun Satanase! (Sal. 139:7-12). Jech kʼuchaʼal li Esekiele, oy ep kʼusitik ti xuʼ labal sba chkiltik ta stojolal li Jeovae xchiʼuk ti chkichʼtik-o  ta mukʼe. Xuʼ van ta jpatan jbatik ta balumil jech kʼuchaʼal la spas li Esekiele. Toj labal sba chkiltik li jvokʼ s-organisasion Jeova ta vinajele, li smukʼulale, li sjuʼele, ti toj anil chanave xchiʼuk ti xuʼ buyuk noʼox chbate.

28, 29. Li ta sien jabil echʼem tale, ¿kʼusi chakʼ ta ilel ti yakal-o ta xanbal li skareta Jeovae?

²⁸ Skʼan teuk ta joltik ti oy jvokʼ s-organisasion ta balumil li Jeovae. Li organisasion taje jaʼik krixchanoetik ti muʼyuk stukʼilike. Pe skʼan teuk ta joltik li kʼusitik spasoj ta balumil li Jeovae, yuʼun skoltaoj krixchanoetik ta spʼejel balumil yoʼ spas yuʼunik li kʼusi oy ta yoʼontone (Juan 14:12). ¿Mi xuʼ jkʼeltik li livro ¡Chventainvan xa li Ajvalilal yuʼun Diose!? Yuʼun tskoltautik sventa xkakʼtik venta bu to kʼalal yakal chichʼ cholel mantal avi ti oy xa mas ta sien jabil slikele. Te chkakʼtik venta ti mas xa ep kʼusitik spasoj sventa chchanubtasvan li s-organisasion Jeovae, ti ep spasoj kanal li chapaneletik ta stojolal ajvaliletik xchiʼuk ti ep kʼu yelan yichʼoj tunesel li kʼusitik achʼ chlokʼanuk talel sventa xichʼ pasel li kʼusi tskʼan yoʼonton Diose.

²⁹ Ep kʼusitik lek kʼotem ta pasel sventa sta yav yan velta li melel yichʼel ta mukʼ Dios avi ti jutuk xa skʼan xlaj li kʼusitik chopol oy ta balumile. Taje chakʼ ta ilel ti muʼyuk pajem-o ta xanbal li skareta Jeovae xchiʼuk jaʼ mukʼta matanal chkaʼitik ti te jkʼoplaltik li ta s-organisasione xchiʼuk ti chijtun ta stojolal li Mukʼul Jpasmantale (Sal. 84:10).

30. ¿Kʼusi chkalbetik skʼoplal li ta yan kapituloe?

³⁰ Ep to kʼusitik xuʼ jchantik ta sventa li kʼusitik akʼbat yil Esekiele, jaʼ yuʼun li ta yan kapituloe ta jkʼelbetik skʼoplal li chanvoʼ anjeletik o keruvinetik laj yile. ¿Kʼusi chakʼ jchantik li chanvoʼ anjeletik ta stojolal Jeova ti jaʼ li Mukʼul Jpasmantal kuʼuntike?