1-3. (a) Ṱalutshedzani uri Hesekiele u vhona na u pfa mini. (Sedzani tshifanyiso tsha u thoma.) (b) Ndi maanḓa afhio e a ita uri Hesekiele a vhone na u pfa zwenezwi zwithu, nahone zwo mu kwama hani?

HESEKIELE u sedza kule-kule magumoni a mudavhi muhulu. O thoma o lavhelesa a tshi nga o bonya maṱo, a mbo ḓi ruḓa maṱo nga u ṱavhanya. Ha kholwi zwine a khou zwi vhona. Musi a tshi sedza kulenyana, u a kona u vhona uri hu khou ḓa ḓumbu. Fhedzi a ḽi sokou vha ḓumbu zwaḽo. Musi a tshi khou vhudzulwa mavhudzi na zwiambaro nga ḽeneḽo ḓumbu ḽihulu ḽi bvaho vhubvaḓuvha, u vhona hu tshi takuwa gole ḽihulu. Ḽeneḽo gole ḽo vha ḽi tshi khou penya nga mulilo u re nga ngomu khaḽo nahone honoho u penya hu mu humbudza tsimbi i penyaho. * Musi gole ḽi tshi khou ḓela hune Hesekiele a vha hone, mubvumo u ya u tshi hulela, hu tshi pfala mutsindo u no nga wa mmbi ya maswole a tshi khou hwenya.—Hesek. 1:4, 24.

² Onoyu muṱhannga a re na miṅwaha i ṱoḓaho u vha 30, u khou vhona zwithu zwi sa hangwei zwe a vha a sa athu u vhuya a zwi vhona vhutshiloni hawe. U pfa “tshanḓa tsha Yehova” tshi khae, maanḓa mahulu a muya mukhethwa wa Yehova. Wonoyo muya mukhethwa u ḓo ita uri a vhone na u pfa zwithu zwi akhamadzaho.  Zwi mangadzaho u fhira zwine zwa itwa kha mimuvi ine ya itwa nga vhaiti vha dzifilimu vha ano maḓuvha. Bono ḽa Hesekiele ḽi ḓo mu sia o gwadama, o hanganea tshoṱhe.—Hesek. 1:3, 28.

³ Fhedzi Yehova u kha ḓi ḓo ita zwithu zwinzhi zwi fhiraho u sokou mangadza onoyu munna. U fana na maṅwe mabono o ṅwalwaho kha yeneyi bugu ya vhuporofita i takadzaho, bono ḽa Hesekiele ḽa u thoma ḽi amba zwinzhi khae na kha vhashumeli vha Yehova vha fhulufhedzeaho ṋamusi. Zwino kha ri livhise ṱhogomelo kha zwine Hesekiele a zwi vhona na u zwi pfa.

4, 5. Vhuimo ho vha vhu hani musi Hesekiele a tshi vhona bono?

⁴ Vhalani Hesekiele 1:1-3. Kha ri humbule nga ha nḓila ye vhuimo ha vha vhu ngayo. Ho vha hu nga 613 B.C.E. Samusi ro zwi pfa kha ndima yo fhiraho, Hesekiele o vha e Babele, a tshi dzula na vhathu vhe a vha o thubiwa navho tsini na mulambo wa Kebara. Zwi vhonala u nga wo vha u mugero wo bvaho kha mulambo wa Yufuratha we nga murahu wa dovha wa ṱumana nawo.

⁵ Yerusalema hune ha vha haya ha vhathu vho thubiwaho, ho vha hu kule nga khilomithara dzi ṱoḓaho u vha 800. * Thembele ye khotsi a Hesekiele vha shuma khayo sa tshifhe, yo vha yo no ḓala vhufhura, hu tshi gwadamelwa na midzimu ya zwifanyiso. Khuluṋoni ya muḓi wa Yerusalema ye Davida na Salomo vha vhuya vha vhusa khayo vhe na vhugala, yo vha i tshi vho shonisa. Yehoyakini Khosi i si na lutendo, o vha e henefho Babele na vho thubiwaho. Tsedekia we a vha khosi vhuimoni ha Yehoyakini, o vha e muvhi nahone a tshi langiwa nga Nebukadanetsara.—2 Dzikh. 24:8-12, 17, 19.

6, 7. Ndi ngani Hesekiele a tshi nga vha o pfa u nga u khou tshila zwifhingani zwi konḓaho?

 ⁶ Tshenetshi tshi nga vha tsho vha tshi tshifhinga tshi konḓaho vhukuma kha Hesekiele munna a re na lutendo. Khamusi vhe a thubiwa navho vho ḓivhudzisa uri: ‘Naa Yehova o ri ṱutshela tshoṱhe? Naa wonoyu muvhuso muvhi wa Babele na midzimu yawo minzhi-minzhi ya mazwifhi, u ḓo fhelisa vhurabeli ha Yehova ho kunaho na vhuvhusi hawe kha ḽifhasi?’

⁷ Ni na zwenezwo muhumbuloni, khezwi ni sa thomi ngudo yaṋu nga u vhala nga ha bono ḽa u thoma ḽa Hesekiele ḽi nyanyulaho? (Hesek. 1:4-28) Musi ni tshi vhala, lingedzani u ḓivhona ni kha vhuimo ha Hesekiele, ni vhone zwe a zwi vhona na u pfa zwe a zwi pfa.

8. Hesekiele o vhona mini kha bono, nahone zwo vha zwi tshi imela mini?

⁸ Hesekiele o vhona mini? O vhona tshithu tshi ngaho goloi khulu i mangadzaho ine ya fanyiswa na gariki. Yo vha i na malinga maṋa mahulwane e a vha e na zwivhumbiwa zwiṋa zwi songo ḓoweleaho, zwe nga murahu ha ambiwa uri ndi vhakerube. (Hesek. 10:1) Nga nṱha ha zwenezwo zwivhumbiwa ho vha hu na pulatifomo khulu kana lutombo lu ngaho gwada ḽa maḓi, nṱha hayo hu na Yehova o dzula kha khuluṋoni yawe ya vhugala! Yeneyo gariki yo vha i tshi imela mini? Bono ḽa Hesekiele ḽi nga imela tshithu tshithihi fhedzi, tshine tsha vha ndangulo ya Yehova ya vhugala  i re ṱaḓulu. Ndi ngani ri tshi ralo? Kha ri vhone zwithu zwiraru zwi itaho uri ri ambe nga u ralo.

9. Vhushaka ha Yehova na zwivhumbiwa zwawe zwa ṱaḓulu vhu tshimbidzana hani na nḓila ye goloi ya ṱaluswa ngayo?

⁹ Vhushaka ha Yehova na zwivhumbiwa zwawe zwa ṱaḓulu. Ṱhogomelani uri kha heḽi bono, khuluṋoni ya Yehova i nṱha ha vhakerube. Kha zwiṅwe zwipiḓa zwa Ipfi ḽa Mudzimu, Yehova u ṱaluswa kana u fanyiswa nga yeneyo nḓila, sa o dzulaho kha khuluṋoni nṱha ha vhakerube kana vhukati havho. (Vhalani 2 Dzikhosi 19:15; Ek. 25:22; Ps. 80:1) Fhedzi ho ngo tou dzula nṱha ha vhakerube vhawe zwa vhukuma, zwa nga u ṱoḓa u hwaliwa nga zwenezwo zwivhumbiwa zwa maanḓa, ha ṱoḓi na u tou ṋamela gariki ya vhukuma. Fhedzi vhakerube vhawe vha tikedza vhuvhusahoṱhe hawe, a nga vha ruma huṅwe na huṅwe uri vha ite zwine a zwi funa. Vha dovha vha shuma sa vhaḓinḓa kana vhaimeli vhawe u itela u ita zwine Yehova a ṱoḓa zwi tshi itwa, samusi na vhaṅwe vharuṅwa vhakhethwa vha tshi ita nga u ralo. (Ps. 104:4) Yehova u khou vha livhisa sa muvhusi wavho, zwa tou nga vha vhumba tshiendedzi tshithihi tshihulwane tshi re na vhuthihi.

10. Ndi mini zwi sumbedzaho uri a si vhakerube vhaṋa fhedzi vha re kha goloi ya ṱaḓulu?

¹⁰ Goloi a i imeli vhakerube fhedzi. Vhakerube vhe Hesekiele a vha vhona vho vha vhe vhaṋa. Bivhilini, nomboro 4 i anzela u shumiswa u itela u ambela kha tshithu tsho fhelelaho kana zwithu zwoṱhe. Ngauralo, u vha hone ha vhakerube vhaṋa zwi amba uri ho  imelwa vharwa vha Yehova vhoṱhe vha fhulufhedzeaho vha re ṱaḓulu. Ṱhogomelani uri malinga na vhakerube zwi na maṱo manzhi. Zwenezwi zwi sumbedza uri a si vhakerube vhaṋa fhedzi vho fhaṱuwaho, fhedzi vharuṅwa vhoṱhe vho fhaṱuwa. Hesekiele u ṱalusa uri yeneyo goloi ndi khulwane, zwine zwa ita uri vhenevho vhakerube vha vhonale vhe vhaṱuku. (Hesek. 1:18, 22; 10:12) Nga hu fanaho, ndangulo ya Yehova i re ṱaḓulu yo ṱanḓavhuwa, i katela zwi fhiraho vhakerube vhaṋa.

11. Daniele o vhona bono ḽifhio ḽi fanaho na ḽeneḽi, nahone ri nga phetha nga uri mini?

¹¹ Daniele o vhona bono ḽi fanaho na ḽeneḽi. Muporofita Daniele o tshila miṅwaha minzhi e phuli Babele, na ene o sumbedzwa bono ḽa ṱaḓulu. Zwi takadzaho ndi uri na kha ḽeneḽo bono, khuluṋoni ya Yehova yo vha i na malinga. Bono ḽa Daniele ḽo livhisa ṱhogomelo kha nḓila ine muṱa wa Yehova wa ṱaḓulu wa vha muhulwane ngayo. Daniele o vhona vharwa vha Mudzimu “vha miḽioni . . . vha miḽioni dza ḓana” vho ima phanḓa ha Yehova. Muṅwe na muṅwe o vha a tshi khou ita mushumo we a ṋewa wone. (Dan. 7:9, 10, 13-18) Ri nga phetha nga ḽa uri bono ḽa Hesekiele ḽo vha ḽi tshi imela honohu u kuvhangana ha zwivhumbiwa zwa ṱaḓulu zwi re na vhugala.

12. Ndi ngani u guda mafhungo a ngaho a bono ḽa Hesekiele ḽa goloi ya ṱaḓulu zwi tshi ri tsireledza?

¹² Yehova u a zwi ḓivha uri zwi a ri tsireledza u dzula ri tshi humbula nga ha zwithu “zwi sa vhonali,” samusi muapostola Paulo o zwi amba nga u ralo. Ndi ngani? Sa vhathu, ro ḓowela u humbulesa nga ha zwithu “zwine zwa vhonala” kana zwine ra kona u zwi vhona, zwine zwa ri vhilaedzisa. Zwenezwi ndi zwithu zwa tshifhinganyana. (Vhalani 2 Vhakorinta 4:18.) Kanzhi Saṱhane u shumisa zwenezwo u itela uri ri vhe vhathu vha langwaho nga zwithu zwa shango. U itela u ri thusa uri ri kone u imedzana na wonoyo mutsiko, Yehova o ri ṋea mafhungo a ngaho haya a re kha vhuporofita ha Hesekiele. Enea mafhungo a ri humbudza nga ha vhugala vhu akhamadzaho ha muṱa wa Yehova wa ṱaḓulu!

13, 14. (a) Hesekiele o ṱalusa hani malinga e a a vhona? (b) Ndi ngani zwo tea uri goloi ya Yehova i vhe na malinga?

¹³ Hesekiele o thoma nga u livhisa ṱhogomelo kha vhakerube vhaṋa. Kha Ndima 4 ya ino bugu, ri ḓo vhona zwine zwenezwo zwivhumbiwa na mbonalo yazwo yo khetheaho zwa ri funza zwone nga ha Yehova. Fhedzi Hesekiele o vhona malinga o livhana na vhenevho vhakerube kha thungo nṋa, a tshi tou nga ndi bogisi ḽihulwane. (Vhalani Hesekiele 1:16-18.) O vha a tshi nga o itwa nga khirisoḽaithi ine ya vha tombo ḽi ḓuraho ḽine ḽa nga ḽi a vhonadza, ḽi re na muvhala wa yeḽo kana yeḽo yo ṱanganaho na muvhala mudala. Ḽeneḽi tombo ḽa u naka ḽo vha ḽi tshi penya.

¹⁴ Bono ḽa Hesekiele ḽo vha ḽo livhisesa ṱhogomelo kha malinga a gariki. Khuluṋoni na malinga ndi zwithu zwi sa tshimbidzani, a si zwone? Khuluṋoni i re na malinga! Zwo ḓowelea u humbula uri khuluṋoni i dzula fhethu huthihi ngauri mahosi a kha ḽifhasi a  vhusa fhethu huthihi. Fhedzi vhuvhusahoṱhe ha Yehova a vhu fani na vhuvhusi ha vhathu. Samusi Hesekiele o vha a tshi ḓo zwi vhona hu si kale, maanḓa a Yehova muvhusahoṱhe ha na mikano. (Neh. 9:6) Ngoho ndi ya uri Yehova ane a vha Muvhusahoṱhe a nga shumisa maanḓa awe a u vhusa huṅwe na huṅwe.

15. Hesekiele o ṱhogomela mini nga ha nḓila ye malinga a itwa ngayo na vhuhulwane hao?

¹⁵ Hesekiele o mangadzwa nga vhuhulwane ha eneo malinga. O ṅwala a ri: “Rimu dzao dzo vha dzi khulu vhukuma dzi tshi mangadza.” Ri nga vhona Hesekiele nga maṱo a muhumbulo o tshingamisa ṱhoho, o lavhelesa uri a vhone rimu khulu dzi penyaho, dzo lapfelaho nṱha. O dovha a ri: “Rimu dza eneo malinga maṋa dzo vha dzi na maṱo u mona nadzo.” Fhedzi khamusi zwi mangadzesaho ndi nḓila i songo ḓoweleaho ye malinga a vha e ngayo. O ṱalutshedza a ri: “Mbonalo yao na tshivhumbeo tshao zwo vha zwi tshi tou nga linga ḽi kha ḽiṅwe linga.” Zwo vha zwi tshi amba mini?

16, 17. (a) Goloi yo vha i na malinga nga ngomu ha malinga nga nḓila-ḓe? (b) Malinga a dzumbulula mini nga ha u khonisea ha goloi ya Yehova?

¹⁶ Zwi khagala uri linga ḽiṅwe na ḽiṅwe ḽe Hesekiele a ḽi vhona, ḽo vha ḽi malinga mavhili o dzhenanaho, he a ṱumana hone ho livhana nṱha na fhasi. Ndi ngazwo haya malinga o vha a tshi gidima nga nḓila ye Hesekiele a ṱalusa ngayo: “Musi a tshi gidima, o vha a tshi kona u ya thungo dzoṱhe nṋa, a sa khoni musi a tshi khou ṱuwa.” Enea malinga a ri humbudza mini nga ha goloi ya ṱaḓulu ye Hesekiele a i vhona?

¹⁷ Nga nṱhani ha uri eneo malinga ndi mahulwane, a kanda fhethu huhulwane nga u mona huthihi fhedzi. Zwi re zwone ndi uri ḽeneḽi bono ḽi ri humbudza uri yeneyi goloi yo vha i tshi gidima nga luvhilo lwa lupenyo! (Hesek. 1:14) Zwiṅwe hafhu, malinga a yaho thungo nṋa a khonisea nga nḓila ine na vhainzhiniere vha nga si kone u edzisa u ita malinga o raloho naho vha zwi funa hani. Yeneyi goloi i a kona u ya thungo dzoṱhe i songo fhungudza luvhilo kana u rembuluwa! Fhedzi a i sokou ya thungo dzoṱhe zwi songo tea. Rimu dza yeneyi goloi dzo ḓalaho maṱo dzi sumbedza uri i vhona zwoṱhe zwi re tsini nayo thungo dzoṱhe.

18. Ri guda mini kha uri yeneyo goloi i na malinga mahulu na maṱo manzhi?

¹⁸ Yehova o vha a tshi khou funza mini Hesekiele na vhathu vhoṱhe vha fhulufhedzeaho nga ha ndangulo Yawe i re ṱaḓulu? Humbulani nga ha zwe ra zwi vhona u swika zwino. Yeneyi ndangulo ndi ya vhugala nahone i a mangadza, samusi zwo sumbedzwa nga u penya ha malinga na vhuhulwane hao. I vhona zwoṱhe, samusi malinga ayo e na maṱo manzhi. Maṱo a Yehova a vhona zwithu zwoṱhe. (Mir. 15:3; Yer. 23:24) Zwiṅwe hafhu, u na vhalanda vhanzhi-vhanzhi vha vharuṅwa vhane a nga vha ruma huṅwe na huṅwe. Vhenevho vhalanda vha nga sedzulusa mafhungo nga vhuronwane nahone vha vhudza Yehova ane a vha Muvhusahoṱhe wavho.—Vhalani Vhahevheru 1:13, 14.

19. Luvhilo na u khonisea ha goloi ya Yehova zwi ri funza mini nga ha Yehova na ndangulo yawe i re ṱaḓulu?

¹⁹ Zwiṅwe hafhu, ri vhona uri yeneyi goloi i na luvhilo luhulu nahone i a khonisea nga hu leluwaho. Humbulani nga ha  phambano i re hone vhukati ha ndangulo ya Yehova ya ṱaḓulu na mivhuso ya vhathu, zwiimiswa na mahoro! Yeneyi mivhuso a i koni u tandulula thaidzo dza shango nahone a i tshimbidzani na zwiimo zwine zwa khou shanduka. Nga nṱhani ha zwenezwo, i ḓo dzula i tshi kundelwa nahone i ḓo fheliswa. Fhedzi goloi ya Yehova Mudzimu i sumbedza zwavhuḓi uri u a humbulela na uri u a tshimbidzana na zwiimo, samusi hu ene ane a khou i reila. U vha zwiṅwe na zwiṅwe zwine zwa ṱoḓea uri a swikelele tshipikwa tshawe, samusi zwi tshi tshimbidzana na zwine dzina ḽawe ḽa amba zwone. (Ek. 3:13, 14) Sa tsumbo, a nga ṱavhanya a vha Muhali a re na maanḓa a lwelaho vhathu vhawe. Fhedzi a nga shanduka nga u bonya ha iṱo a vha Muhangweli wa zwivhi ane a khathutshela, a kwengweledza na u ṱanganedza vhaitazwivhi vho rembuluwaho, vho kwashekanaho dzimbilu.—Ps. 30:5; Yes. 66:13.

20. Ndi ngani ri tshi fanela u ṱhonifha goloi ya Yehova?

²⁰ U swika zwino, bono ḽa Hesekiele ḽi nga ita uri ri ḓivhudzise uri, ‘Naa ndi a ṱhonifha zwa vhukuma yeneyi goloi ya Yehova?’ Ri zwi humbule uri heyi goloi i khou gidima zwa vhukuma zwino. Ri songo vhuya ra humbula uri Yehova, Murwa wawe na vharuṅwa a vha vhoni dziṅwe thaidzo dzine dza ri kula nungo. Kana ra vhilaela uri Mudzimu u ḓo lenga u ri ṋea zwine ra zwi shaya kana uri ndangulo yawe i ḓo kundelwa u tshimbidzana na zwiṅwe zwiimo zwa ḽino shango ḽine ḽa khou tshinyala ḽi tshi ya. Ndi zwavhuḓi u humbula uri ndangulo ya Yehova i khou shuma na uri a yo ngo ima fhethu huthihi. Hesekiele o pfa ipfi ḽi bvaho ṱaḓulu ḽi tshi ri: “Malinga kha mone!” Zwi tou pfala uri ndi ndaela ya uri malinga a gidime. (Hesek. 10:13) Naa a zwi mangadzi u humbula nga ha nḓila ine Yehova a tshimbidza ngayo ndangulo yawe? Fhedzi ane ra mu ṱhonifhesa ndi Yehova.

21, 22. Ri nga ṱalutshedza hani zwine zwa ita uri zwipiḓa zwa goloi zwi farane?

²¹ Musi Hesekiele a tshi sedza malinga u ya nṱha, o vhona “tshithu tshine tsha nga pulatifomo, i tshi penya sa gwada ḽa maḓi.” (Hesek. 1:22) Nṱha-nṱha ha ṱhoho dza vhakerube, ho vha ho navha pulatifomo, ine ya khou penya nga vhugala. Fhedzi zwenezwi zwi nga ita uri muvhali a ḓivhesaho zwa mitshini a vhe na mbudziso nnzhi nga ha yeneyi goloi. Sa tsumbo, vhaṅwe vha nga ḓivhudzisa uri: ‘Yeneyo pulatifomo yo tikwa nga mini nṱha ha malinga? Zwiṅwe hafhu, malinga a nga shuma hani a si na tsimbi dzi a ṱumekanyaho?’ Ri songo hangwa uri heyi goloi a i langiwi nga milayo ya mupo ngauri ndi ya pfanyisedzo, i fanyisela zwithu zwine zwa khou itea ṱadulu. Kha ri ṱhogomele na haya maipfi a ndeme: “Muya une wa tshimbidza zwivhumbiwa zwi tshilaho wo vha u tshi tshimbidza na malinga.” (Hesek. 1:20, 21) Ndi muya ufhio we wa vha u tshi khou shuma kha vhenevho vhakerube na kha malinga?

 ²² Zwi tou vha khagala uri wo vha u muya mukhethwa wa Yehova une wa vha maanḓa a shumaho nga nḓila khulwane fhethu hoṱhe. Eneo maanḓa a shumaho ndi one o faraho heyi goloi, a i ṋea maanḓa na u langa nḓila ine ya tshimbila ngayo. Ri na zwenezwo muhumbuloni, kha ri vhone nga maṱo a muhumbulo uri hu itea mini musi Hesekiele o lavhelesa yeneyo goloi i tshi khou khonela kha Ane a khou i langa.

23. Hesekiele o shumisa maipfi afhio musi a tshi lingedza u ṱalusa Yehova, nahone ndi ngani?

²³ Vhalani Hesekiele 1:26-28. Musi Hesekiele a tshi ṱalusa ḽeneḽi bono, u anzela u shumisa maipfi a ngaho “tshivhumbeo,” “tshi ngaho,” “zwine zwa nga” na “tshithu tshi ngaho.” Fhedzi o shumisesa enea maipfi kha dzenedzi ndimana. U vhonala a sa ḓivhi uri a ṱalutshedzise hani zwine a khou zwi vhona. O vhona “hu na tshithu tshine tsha nga tombo ḽa safire, tshine tsha nga khuluṋoni.” Naa ni nga vhona nga maṱo a muhumbulo khuluṋoni yo vhaḓwaho ya tombo ḽithihi ḽihulu ḽa safire, ḽa muvhala wa lutombo wo swifhalelaho? We a vha o dzula henefho o “vha e na tshivhumbeo tshi ngaho tsha muthu.”

24, 25. (a) Musengavhadzimu wo tangaho khuluṋoni ya Yehova u ri humbudza mini? (b) Nga zwiṅwe zwifhinga, mabono o raloho o kwama hani vhanna vha re na lutendo?

²⁴ Zwo vha zwi tshi konḓa u tou ḓivha zwavhuḓi-vhuḓi uri tshenetsho tshivhumbeo tshi ṱhonifheaho ndi mini, nga nṱhani ha uri Yehova o vha e na vhugala u bva khunduni u tsela fhasi. U bva  khunduni u gonya, honoho vhugala ho vha vhu tshi nga mudugudugu wa mulilo. Ri nga vhona nga maṱo a muhumbulo onoyo muporofita a tshi nga u khou ḓitsira maṱo nga tshanḓa musi a tshi sedza tshenetshi tshivhumbeo tsha vhugala. Mafheleloni Hesekiele o ṱhogomela zwi tevhelaho kha ḽeneḽi bono ḽi mangadzaho: “Ho vha hu na tshedza u mona nae tshi ngaho musengavhadzimu une wa vhonala kha makole musi mvula yo na.” No no vhuya na pfa no takala musi ni tshi vhona musengavhadzimu? Ndi khumbudzo ya ndeme lungafhani ya vhugala ha Musiki washu! Yeneyo mivhala i re kha lutombo, i nga dovha ya ri humbudza mulanga wa mulalo we Yehova a u vhofha nga murahu ha Maḓi Mahulu. (Gen. 9:11-16) Naho Mudzimu e Ramaanḓa oṱhe, ndi Mudzimu wa mulalo. (Vhahev. 13:20) U na mulalo nahone u ita uri vhoṱhe vhane vha mu gwadamela nga u fhulufhedzea na vhone vha vhe na mulalo.

²⁵ Ho itea mini musi o no vhona tshifanyiso tsha vhugala ha Mudzimu? Hesekiele o ṅwala zwo iteaho, a ri: “Musi ndi tshi tshi vhona nda gwadama.” Hesekiele o vha o mangala, a ofha Mudzimu, a wela fhasi. Na vhaṅwe vhaporofita vho ita zwi fanaho musi Yehova a tshi vha sumbedza mabono; zwi nga vha zwi tshi ofhisa na u ita uri muthu a ḓiṱukufhadze. (Yes. 6:1-5; Dan. 10:8, 9; Nzumb. 1:12-17) Fhedzi vhenevho vhanna vho fhedza vho khwaṱhiswa vhukuma nga zwe Yehova a vha dzumbululela zwone. Zwi tou vha khagala uri na Hesekiele zwo mu khwaṱhisa. Zwino riṋe ri fanela u kwamea hani musi ri tshi vhala mafhungo o raloho Bivhilini?

26. Hesekiele a nga vha o khwaṱhiswa hani nga bono ḽe a ḽi vhona?

²⁶ Arali Hesekiele o vha a tshi khou timatima nga ha vhuimo ha vhathu vha Mudzimu vha re henefho Babele, ḽeneḽo bono ḽi fanela u vha ḽo mu khwaṱhisa. Zwi tou vha khagala uri zwo vha zwi si zwa ndeme uri vhathu vha Mudzimu vha gai, vha Yerusalema, vha Babele kana vha huṅwe fhethu. Goloi ya Yehova i mangadzaho yo vha i tshi nga swika huṅwe na huṅwe hune vha vha hone! Naa Saṱhane u na maanḓa a u imedzana na Mudzimu ane a khou langa ndangulo yo raloho ya ṱaḓulu i re na vhugala? (Vhalani Phisalema ya 118:6.) Hesekiele o vhona na uri goloi ya ṱaḓulu i tsini na vhathu ngauri malinga ayo o kanda kha ḽifhasi! (Hesek. 1:19) Ngauralo, Yehova o vha a songo hangwa vhathu vhawe vha fhulufhedzeaho vha re vhuthubwani. Khotsi avho wa lufuno o vha a tshi ḓo dzula a tshi vha ṱhogomela tshifhinga tshoṱhe!

27. Bono ḽa Hesekiele ḽi amba mini kha riṋe ṋamusi?

²⁷ Naa bono ḽa Hesekiele ḽi na zwine ḽa amba zwone kha riṋe ṋamusi? A zwi vhuyi zwa vhudziswa! Ri songo hangwa uri Saṱhane o ḓiimisela vhukuma u ṱhasela vhurabeli ha Yehova ho kunaho. U ṱoḓa u ita uri ri humbule uri a hu na muthu ane a vha na  ndavha na riṋe, ri pfe u nga ri kule na Khotsi ashu wa ṱaḓulu na ndangulo yawe. Ri songo vhuya ra tenda enea mazwifhi a tshi kwama nḓila ine ra ḓipfa ngayo kana zwine ra zwi humbula. (Ps. 139:7-12) Ri na tshiitisi tsha u ofha u fana na Hesekiele. Ri nga kha ḓi sa gwadama u fana na zwe a zwi ita. Fhedzi naa a ri mangadzwi nga nḓila ine ndangulo ya Yehova i re ṱaḓulu ya vha ngayo? I na maanḓa na luvhilo, i a khonisea nga hu leluwaho, i a tendelana na zwiimo nahone i na vhugala vhuhulu.

28, 29. Ndi mini zwi sumbedzaho uri goloi ya Yehova yo vha i tshi khou gidima ḓanani ḽa miṅwaha ḽo fhiraho?

²⁸ Ri songo hangwa na uri hu na tshipiḓa tsha ndangulo ya Yehova kha ḽifhasi. Fhedzi ndangulo ya Yehova i re kha ḽifhasi yo vhumbiwa nga vhathu vha re na tshivhi. Fhedzi kha ri humbule nga ha zwe Yehova a zwi khunyeledza fhano kha ḽifhasi! Yehova u thusa vhathu shangoni ḽoṱhe uri vha ite zwithu zwine vha nga si kone u zwi ita nga vhone vhaṋe. (Yoh. 14:12) U vhala bugu ya Muvhuso Wa Mudzimu U A Vhusa! zwi nga ri humbudza nga ha nḓila ye mushumo wa u huwelela wa itwa ngayo nga nḓila khulwane ḓanani ḽa miṅwaha ḽo fhiraho. Ri nga dovha ra humbula nga ha zwe ndangulo ya Yehova ya zwi ita u itela u gudisa Vhakriste vha ngoho, u kunda khothe dza shango na u shumisa thekinolodzhi u itela u ita zwi funwaho nga Mudzimu!

²⁹ Musi ri tshi sedza zwoṱhe zwo itwaho u itela u vusulusa vhurabeli ho kunaho kha ano maḓuvha a vhufhelo ha ḽino shango ḽo tshinyalaho, zwi tou pfala uri ndi kale goloi ya Yehova i tshi khou gidima. Ri na ndugelo yavhuḓi lungafhani ya u vha kha yeneyi ndangulo na u shumela Muvhusahoṱhe o raliho!—Ps. 84:10.

30. Ri ḓo guda mini kha ndima i tevhelaho?

³⁰ Fhedzi ri kha ḓi ḓo guda zwinzhi kha bono ḽa Hesekiele. Kha ndima i tevhelaho, ri ḓo guda nga ha “zwivhumbiwa zwi tshilaho” zwiṋa zwo khetheaho kana vhakerube. Zwenezwo zwivhumbiwa zwi nga ri gudisa mini nga ha Yehova Mudzimu ane a vha Muvhusahoṱhe washu a re na vhugala?