1-3. (a) Ihulagway an nakita ngan nabatian ni Ezekiel. (Kitaa an retrato hini nga pahina.) (b) Ano nga gahum an nagpahinabo han eksperyensya ni Ezekiel, ngan ano an epekto hito ha iya?

 HI Ezekiel nagkikinita ha hirayo, lahos pa ha haluag ngan mabaras nga kapatagan. Nan-gudti an iya mga mata, tapos nanagku. Haros diri hiya makatoo ha iya nakikita. Didto ha pinakasidsid han tuna, may napuporma nga bagyo. Pero diri ito ordinaryo nga bagyo. Samtang ginpapalid han makusog gud nga hangin tikang ha norte an iya buhok ngan bado, nakakita hiya hin daku hinduro nga dampog. Naglalamrag ito tungod han nag-iidlap nga kalayo ha sulod, ngan an ranggat hito nagpapahinumdom ha iya hin tinunaw nga presyoso nga metal. * Samtang an dampog madagmit nga nagtitikahirani ha iya, may nagtitikakusog nga aringasa nga pariho hin kasundalohan.​—Ezek. 1:4, 24.

² Mga 30 anyos ini nga batan-on han nakarawat niya an siyahan han sunod-sunod nga bisyon nga diri niya hingangalimtan. Inabat niya nga nagios ha iya “an kamot ni Jehova,” an diri mapugngan nga gahum han baraan nga espiritu ni Jehova. An iya makikita ngan mababatian pinaagi hito nga espiritu mas urusahon gud kay ha bisan ano nga hinimo han tawo nga salida nga may mga special effect.  Tungod hito hi Ezekiel mapapaluhod nga nahapa nga puno hin emosyon.​—Ezek. 1:3, ftn., 28.

³ Pero diri katuyoan ni Jehova nga pabilibon la ini nga tawo. An siyahan nga bisyon ni Ezekiel​—pariho han iba pa nga nakarekord ha iya eksayting nga libro hin mga tagna—​puno hin kahulogan, para ha iya ngan ha magtinumanon nga surugoon ni Jehova yana. Salit usisahon naton hin maopay an nakita ngan nabatian ni Ezekiel.

4, 5. Ano an kahimtang han nakita ni Ezekiel an iya bisyon?

⁴ Basaha an Ezekiel 1:1-3. Aton anay hinumdoman an kahimtang. Tuig 613 B.C.E. adto. Ha nauna nga kapitulo, aton hinbaroan nga hi Ezekiel naukoy ha Babilonya kaupod han iya mga igkasi-distyero ha usa nga komunidad ha ligid han salog han Kebar​—klaro nga usa nga hinimo han tawo nga salog nga naaagian hin mga sakayan. Nasanga ini tikang ha Salog Eufrates ngan ha unhan nasumpay utro hito.

⁵ An Jerusalem, nga gintikangan han mga distyero, mga 800 ka kilometro an kahirayo. * An templo diin nag-alagad an tatay ni Ezekiel sugad nga saserdote puno na hin kahugaw ngan idolatriya. An trono ha Jerusalem, diin hi David ngan hi Solomon mahimayaon nga naghadi hadto, usa na nga kaarawdan. An waray pagtoo nga hi Hadi Jehoiakin nakadto ha Babilonya kaupod han mga distyero. Ginsaliwnan hiya han maraot nga hi Zedekias, nga kontrolado han hadi han Babilonya.​—2 Hadi 24:8-12, 17, 19.

6, 7. Kay ano nga bangin inabat ni Ezekiel nga nabubuhi hiya ha makuri nga panahon?

⁶ Baga hin ini an pinakamakuri nga panahon ha kinabuhi ni Ezekiel, nga usa nga tawo nga may pagtoo. An iba niya nga igkasi-distyero bangin naghunahuna: ‘Ginbayaan na ba kita ni Jehova ha  kadayonan? Wawad-on gud ba hinin maraot ngan gamhanan nga Babilonya nga may damu gud nga buwa nga dios an putli nga pagsingba kan Jehova ngan an Iya pagmando ha tuna?’

⁷ Gamit ito nga impormasyon, kay ano nga diri tikangan an imo pag-aram hini nga topiko pinaagi ha pagbasa han klaro nga paghulagway ni Ezekiel han iya siyahan nga bisyon? (Ezek. 1:4-28) Imadyina nga ikaw hi Ezekiel, nga nakikita an iya nakikita ngan nababatian an iya nababatian.

8. Ano an nakita ni Ezekiel ha bisyon, ngan ano an ginrirepresentaran hito?

⁸ Ha kabug-osan, ano an nakita ni Ezekiel? Sugad ito hin daku gud ngan urusahon nga sarakyan, nga iginhulagway sugad nga karuwahe. May-ada ito upat nga dagku hinduro nga kaliding nga may sapit nga upat nga kakaiba nga espiritu nga linarang, nga ha urhi iginpakilala sugad nga mga kerubin. (Ezek. 10:1) Ha igbaw nira may hilapad nga entablado, o salóg, nga pariho hin yelo, ngan ha bawbaw hito aada an mahimayaon nga trono han Dios, nga ginlilingkoran ni Jehova mismo! Pero ano an ginrirepresentaran hito nga karuwahe? An bisyon ni Ezekiel mahimo gud magrepresentar hin usa la nga butang: an langitnon nga bahin han mahimayaon nga organisasyon ni Jehova ha uniberso. Kay ano nga nakasiring kita hito? Tagda an tulo nga butang.

9. Paonan-o an relasyon ni Jehova ha iya mga linarang ha langit maihuhulagway sugad nga usa nga sarakyan?

 ⁹ An relasyon ni Jehova ha iya mga linarang ha langit. Tigamni nga hini nga bisyon, an trono ni Jehova aada ha igbaw han mga kerubin. Ha iba nga bahin han Biblia, hi Jehova iginhuhulagway liwat nga nalingkod ha trono ha bawbaw o ha butnga han iya mga kerubin. (Basaha an 2 Hadi 19:15; Ex. 25:22; Sal. 80:1) Syempre, diri literal nga nalingkod hiya ha bawbaw han iya mga kerubin​—nga baga hin kinahanglan hiya alsahon hiton gamhanan nga mga linarang—​sugad la nga diri niya kinahanglan sumakay hin literal nga karuwahe. Pero ginsusuportaran han mga kerubin an iya pagkasoberano, ngan masusugo niya hira ha bisan diin ha uniberso basi tumanon an iya kaburut-on. Pariho han ngatanan nga baraan nga anghel han Dios, gintutuman nira an mga desisyon ni Jehova sugad nga iya mga ministro, o ahente. (Sal. 104:4) Hito nga paagi, hira ngatanan “ginsasakyan” ni Jehova​—ginigiyahan pinaagi han iya pagmando—​nga sugad hin usa la hira nga daku nga sarakyan.

10. Ano an nagpapakita nga diri la upat nga kerubin an nahiuupod ha langitnon nga karuwahe?

¹⁰ Diri la an mga kerubin an ginrirepresentaran han sarakyan. Upat nga kerubin an nakita ni Ezekiel. Ito nga numero agsob gamiton ha Biblia basi ipasabot an balanse nga sukol o pagin kompleto, nga nag-uupod han ngatanan. Salit matin-aw nga an upat nga kerubin nagrirepresentar han ngatanan nga maunungon nga espiritu nga mga anak ni Jehova. Tigamni liwat nga an mga kaliding ngan bisan an  mga kerubin puno hin mga mata, nga nagpapasabot han pagin mabinantayon han damu pa nga espiritu nga linarang, diri la han upat nga iginpakita. Ngan an paghulagway ni Ezekiel han sarakyan nagpapasabot nga daku gud ito salit gutiay na la pagkit-on bisan iton dagku nga kerubin. (Ezek. 1:18, 22; 10:12) Ha pariho nga paagi, an langitnon nga bahin han organisasyon ni Jehova daku gud, nga nag-uupod hin mas damu pa kay han upat nga kerubin.

11. Ano an puropariho nga bisyon ni Daniel, ngan ano an angayan la nga hunahunaon naton?

¹¹ An puropariho nga bisyon ni Daniel mahitungod han langit. Hi propeta Daniel maiha nga nadistyero ha syudad han Babilonya, ngan hiya liwat gintagan hin bisyon mahitungod han langit. Makapainteres nga hini nga bisyon, an trono ni Jehova may mga kaliding liwat. An bisyon ni Daniel nakapokus ha kadaku han espiritu nga pamilya ni Jehova ha langit. May nakita hiya nga “usa ka yukot nga tag-usa ka yukot . . . ngan napulo ka yukot nga tagnapulo ka yukot” nga espiritu nga mga anak han Dios nga natindog ha atubangan ni Jehova. Liningkod hira sugad nga langitnon nga Korte, matin-aw nga an kada tagsa may nakatoka nga pwesto. (Dan. 7:9, 10, 13-18) Diri ba angayan la hunahunaon nga ini nga hugpo han mahimayaon nga mga linarang amo gihapon an gintutudlok han bisyon ni Ezekiel?

12. Kay ano nga proteksyon ha aton an pag-aram ha mga asoy sugad han bisyon ni Ezekiel mahitungod han langitnon nga karuwahe?

¹² Maaram hi Jehova nga proteksyon ha mga tawo an pagpokus ha espirituwal nga mga reyalidad​—“an mga butang nga diri nakikita,” sumala kan apostol Pablo. Kay ano? Kay sugad nga mga linarang nga may unod ngan dugo, may tendensya kita nga sobra nga magpokus ha “mga butang nga nakikita,” an aton mga ginkakabarak-an, nga temporaryo la. (Basaha an 2 Corinto 4:18.) Agsob ito salingabuton ni Satanas ngan gin-aaghat kita nga magin unudnon an panhunahuna. Basi buligan kita nga atohan ito, mahigugmaon nga nagtatagana hi Jehova hin mga asoy sugad hini nga bisyon ha tagna ni Ezekiel, nga nagpapahinumdom ha aton han duro nga pagkaharangdon han langitnon nga pamilya ni Jehova!

13, 14. (a) Paonan-o iginhulagway ni Ezekiel an mga kaliding nga iya nakita? (b) Kay ano nga angayan la nga may mga kaliding an karuwahe ni Jehova?

¹³ Ha tinikangan, nagpokus hi Ezekiel ha upat nga kerubin, ngan ha Kapitulo 4 hini nga publikasyon, masasabtan naton kon ano an igintututdo hito nga mga linarang ngan han ira makatirigamnan nga hitsura mahitungod kan Jehova. Pero nakita ni Ezekiel an upat nga kaliding ha sapit han mga kerubin nga posible nga nakapwesto ha upat nga kanto​—daku nga kwadrado pagkit-on. (Basaha an Ezekiel 1:16-18.) Baga hin hinimo ini ha krisolito, usa nga marahalon nga bato nga masilhag ngan dulaw o berde nga madulaw-dulaw. Inin makaruruyag nga bato nagraranggat.

¹⁴ An bisyon ni Ezekiel nagpokus ha mga kaliding han karuwahe. Naiiba ito nga kombinasyon, diri ba? Trono nga may mga kaliding!  Bangin mahunahuna naton nga an usa nga trono aada la ha usa nga lugar, ngan natural la ito kay limitado an naaabot han impluwensya han tunan-on nga mga hadi. Pero an pagkasoberano ni Jehova iba gud ha pagmando han tawo. Hibabaroan ni Ezekiel nga an gahum ni Jehova sugad nga Soberano waray tubtoban. (Neh. 9:6) Oo, naipapatuman hini nga Soberano an iya awtoridad ha bisan diin!

15. Ano an naobserbaran ni Ezekiel ha pagkahimo ngan kadaku han mga kaliding?

¹⁵ Nahipausa gud hi Ezekiel ha kadaku han mga kaliding. Hiya nagsurat: “Hitaas gud an mga yanta hito salit makaharadlok ito.” Bangin maimadyin naton hiya nga nahangad ha daku gud ngan nagraranggat nga mga yanta nga baga hin naabot ha langit. Ngan igindugang niya inin makapainteres nga detalye: “Puno hin mga mata an mga yanta hiton upat nga kaliding.” Pero bangin an pinakamakapainteres amo an talagsahon nga porma han mga kaliding. Hiya nagsaysay: “An hitsura ngan pagkahimo hito sugad hin kaliding ha sulod han usa pa nga kaliding.” Ano an karuyag sidngon hito?

16, 17. (a) Ano an karuyag sidngon nga an karuwahe may mga kaliding ha sulod han mga kaliding? (b) Ano an aton hibabaroan ha mga kaliding mahitungod han pagin masayon maniobrahon han sarakyan ni Jehova?

¹⁶ Matin-aw nga an tagsa nga kaliding nga nakita ni Ezekiel sugad hin gintampo nga duha nga kaliding, nga an usa nabalabag ha sulod han usa pa. Salit nahihimo hito an sugad han iginhulagway ni Ezekiel: “Nakakakadto ito ha bisan hain han upat nga direksyon nga diri naliko.” Ano an iginpapasabot hito mahitungod han langitnon nga sarakyan nga nakita ni Ezekiel?

¹⁷ An sugad kadagku nga mga kaliding hirayo an nakakadtoan bisan ha usa la ka birik. Ngani, iginpapakita han bisyon nga an sarakyan pariho kalaksi han kidlat! (Ezek. 1:14) Dugang pa, an talagsahon nga mga kaliding nga nakakakadto ha upat nga direksyon nagpapasabot nga masayon gud ito maniobrahon, usa nga disenyo nga diri kaya himoon han mga endyinir. Ini nga sarakyan nakakagbag-o hin direksyon nga diri nagmiminor o naliko! Pero diri ini nagios hin talapang la. An mga mata ha mga yanta klaro nga nagpapasabot nga ini nga sarakyan maaram gud han ngatanan nga aada ha palibot hini.

18. Ano an aton hibabaroan ha kadaku han mga kaliding ngan ha kadamu han mga mata hito?

¹⁸ Salit ano an igintututdo ni Jehova kan Ezekiel​—ngan ha ngatanan nga matinumanon nga tawo—​mahitungod han langitnon nga bahin han Iya organisasyon? Tagda an aton na nakita. Mahimayaon ngan urusahon gud ito, sugad han iginpapasabot han nagraranggat nga mga kaliding ngan han kadaku hini. Maaram ito han ngatanan, sugad han iginpapasabot han kadamu han mata ha mga kaliding. An mga mata mismo ni Jehova nakakakita han ngatanan nga butang. (Prob. 15:3; Jer. 23:24) Ngan may-ada hiya minilyon nga surugoon nga anghel nga masusugo ha bisan diin ha uniberso, ngan nakakaobserbar hira hin maopay ngan nakakagsumat ha ira Soberano.​—Basaha an Hebreo 1:13, 14.

19. Ano an igintututdo ha aton han kalaksi ngan pagin masayon maniobrahon han karuwahe ni Jehova mahitungod kan Jehova ngan ha langitnon nga bahin han iya organisasyon?

 ¹⁹ Nakita liwat naton nga an karuwahe malaksi gud ngan masayon maniobrahon. Hunahunaa la an kaibahan han langitnon nga bahin han organisasyon ni Jehova ha mga gobyerno, institusyon, ngan organisasyon han tawo! May tendensya ito nga gumios hin waray direksyon ngan diri nakakapahiuyon ha pagbag-o han mga kahimtang. Salit diri ito maglalampos ngan mabubungkag ito. Pero an karuwahe ni Jehova hingpit nga repleksyon han makatadunganon ngan mapauyon-uyon nga Dios nga nagkukontrol hini. An iya mismo ngaran nagpapasabot nga mahimo hiya magin bisan ano nga ginkikinahanglan basi matuman an iya katuyoan. (Ex. 3:13, 14) Pananglitan, kaya niya magin makusog dayon nga Girriro nga nakikig-away para ha iya katawohan, pero mahimo liwat hiya dayon magin maloloy-on nga Parapasaylo nga nabulig ngan nagpapahiuli bisan han pinakamasurub-on nga makasasala nga nagbabasol.​—Sal. 30:5; Isa. 66:13.

20. Kay ano nga angay naton tahuron an karuwahe ni Jehova?

²⁰ Hini nga bahin han bisyon, bangin makagpakiana kita, ‘Gintatahod ko gud ba an karuwahe ni Jehova?’ Tigamnan naton nga an karuwahe nagrirepresentar hin reyalidad nga naeksister yana. Diri gud naton angay hunahunaon nga hi Jehova, an iya Anak, ngan an ngatanan nga anghel diri nakakakita han mga problema nga nagpapaluya ha aton. Diri liwat kita angay mabaraka nga an aton Dios mauurhi ha pagtagana han aton panginahanglan o nga an iya organisasyon diri makakapahiuyon ha mga pagbag-o hinin waray kasigurohan nga kalibotan. Hinumdoman naton nga an organisasyon ni Jehova aktibo ngan pirme nagios. Ngani, nakabati hi Ezekiel hin tingog ha langit nga naguliat: “O nabirik nga mga kaliding!”​—klaro nga nagsusugo ha mga kaliding nga dumalagan na. (Ezek. 10:13) Diri ba urusahon gud hunahunaon an paagi han pagpagios ni Jehova ha iya organisasyon? Pero hi Jehova an aton gintatagan han aton pinakahilarom nga pagtahod.

21, 22. Paonan-o naton maisasaysay kon ano an nagbubug-os han mga parte han karuwahe?

²¹ An atensyon ni Ezekiel nabalhin ha igbaw han mga kaliding, diin nakita niya nga “may sugad hin kristal nga salóg nga nag-iinggat-inggat pariho hin urusahon nga yelo.” (Ezek. 1:22) Hirayo ha igbaw han mga kerubin, makikita an nag-iiringgat nga masilhag nga salóg. Salit an magbarasa nga maaram ha makina bangin magkaada mga pakiana mahitungod hini nga sarakyan. Pananglitan: ‘Ano an nag-aalsa han salóg ha bawbaw han mga kaliding? Ngan paonan-o magana an mga kaliding nga waray man mga ehe nga nagdudugtong hito?’ Hinumdumi nga ini nga sarakyan diri kontrolado han pisikal nga mga balaud kay simboliko ini, nga naghuhulagway hin reyalidad ha kalangitan. Tigamni liwat inin importante nga mga pulong: “An espiritu nga nagios ha buhi nga mga linarang nakada liwat ha mga kaliding.” (Ezek. 1:20, 21) Ano nga espiritu an nagios hito nga mga kerubin ngan ha mga kaliding?

 ²² Sigurado nga ito an baraan nga espiritu ni Jehova, an pinakagamhanan nga pwersa ha uniberso. Ito nga aktibo nga pwersa an rason nga diri nagbuburublag an mga parte han sarakyan; ito liwat an nagpapadalagan ngan nagpapahinabo han urosa nga paggios hini. Tigamnan naton ito samtang ginsusundan naton an pagbalhin han pokus ni Ezekiel ngadto ha Usa nga nagkukontrol han karuwahe.

23. Ano nga mga pulong an gin-gamit ni Ezekiel ha paghulagway kan Jehova, ngan kay ano?

²³ Basaha an Ezekiel 1:26-28. Ha bug-os nga paghulagway ni Ezekiel hini nga bisyon, agsob hiya gumamit hin mga pulong sugad han “hitsura,” ‘pariho pagkit-on,’ “daw sugad,” “puropariho,” ngan “sugad hin.” Pero hini nga mga bersikulo, mas agsob niya ito gamiton. Baga hin namimiling hiya hin mga pulong para ha mga butang nga makuri gud ihulagway. Nakita niya an “sugad hin bato nga sapiro, ngan puropariho ito hin trono.” Naiimadyin mo ba an usa nga trono nga gin-ukit tikang ha daku nga sapiro nga madulom nga asul an kolor? Ngan nalingkod dida hito an usa nga harangdon nga Persona. “Puropariho hin tawo an [iya] hitsura.”

24, 25. (a) Ano an iginpapahinumdom ha aton han balangaw ha palibot han trono ni Jehova? (b) Ano an epekto usahay han sugad nga mga bisyon ha kalalakin-an nga may pagtoo?

²⁴ An harangdon nga persona makikita ha kabug-osan la, kay may nagawas kan Jehova nga mga laga han himaya tikang ha hawak  tipaubos ngan tikang ha hawak tipaigbaw. Bangin mahunahuna naton an propeta nga nan-gugudti an mga mata ngan ginsasalipdan ito han iya kamot samtang ginkikinita iton mahimayaon nga persona. Ha kataposan, gin-unabi ni Ezekiel an makaruruyag pa nga bahin han bisyon: “Ha bug-os niya nga palibot may kalamrag nga pariho han kalamrag han balangaw dida ha dampog ha adlaw nga mauran.” Nalipay ka ba han nakakita ka hin balangaw? Nagpapahinumdom gud ito han himaya han aton Maglalarang! Iton dekolores ngan matahom nga arko ha langit bangin magpahinumdom liwat ha aton han kasabotan ni Jehova para ha kamurayawan katapos han Delubyo. (Gen. 9:11-16) Bisan kon hiya an Makagarahum-ha-ngatanan, Dios hiya han kamurayawan. (Heb. 13:20) Puno hin kamurayawan an iya kasingkasing ngan naabot ito ha ngatanan nga matinumanon nga nagsisingba ha iya.

²⁵ Ano an epekto kan Ezekiel han pakakita niya han himaya ni Jehova nga Dios? Iginrekord niya an nahitabo: “Han nakita ko ito, linuhod ako nga nahapa.” Napuno hiya hin pagtahod ngan kahadlok ha Dios salit napaluhod hiya. Puropariho hito an reaksyon han iba nga propeta pakakarawat nira hin mga bisyon kan Jehova; sigurado nga inabat hira nga ubos gud la hira ngan napuno hin emosyon. (Isa. 6:1-5; Dan. 10:8, 9; Pah. 1:12-17) Kondi ha urhi, naparig-on gud hira han iginpakita ha ira ni Jehova. Sigurado nga naparig-on hi Ezekiel. Salit ano an angay magin epekto ha aton han pagbasa hin sugad hini nga mga asoy ha Kasuratan?

26. Paonan-o hi Ezekiel naparig-on han iya bisyon?

²⁶ Kon nagruhaduha o nabaraka hi Ezekiel ha sitwasyon han katawohan han Dios ha Babilonya, sigurado nga naparig-on hiya hito nga bisyon. Diri problema kon an matinumanon nga katawohan han Dios aadto ha Jerusalem o ha Babilonya o ha bisan diin. Maaabot gud hira han mahimayaon nga karuwahe ni Jehova! May-ada ba gobyerno nga kontrolado ni Satanas nga makakaato ha Dios nga nagkukontrol han mahimayaon gud nga langitnon nga bahin han iya organisasyon? (Basaha an Salmo 118:6.) Nakita liwat ni Ezekiel nga an langitnon nga sarakyan diri hirayo ha mga tawo. An mga kaliding hito nasaghid ha tuna mismo! (Ezek. 1:19) Salit interesado gud hi Jehova ha iya matinumanon nga katawohan nga nadistyero. Pirme hira maaabot han mahigugmaon nga pag-ataman han ira Amay!

27. Ano an kahulogan para ha aton yana han bisyon ni Ezekiel?

²⁷ May kahulogan ba para ha aton yana an bisyon ni Ezekiel? May-ada! Hinumdumi nga nag-oorganisar hi Satanas hin mas grabe nga mga pag-atake ha putli nga pagsingba kan Jehova. Karuyag niya kombinsihon kita nga nag-uusahan kita, nahibubulag, ngan diri maaabot han aton langitnon nga Amay ngan han iya organisasyon. Ayaw gud tuguti nga an imo hunahuna o kasingkasing maapektohan  hito nga mga buwa! (Sal. 139:7-12) Pariho kan Ezekiel, damu an aton rason nga mahipausa gud. Bangin diri kita lumuhod nga nahapa sugad han iya ginbuhat. Pero diri ba kita angay mahipausa gud ha gahum, kalaksi, pagin masayon maniobrahon, pagin mapauyon-uyon, ngan pagin mahimayaon gud han langitnon nga bahin han organisasyon ni Jehova ha uniberso?

28, 29. Ano an nagpapakita nga an karuwahe ni Jehova nagios hinin naglabay nga siglo?

²⁸ Hinumdumi liwat nga an organisasyon ni Jehova may tunan-on nga bahin. Oo, ginkukompwesto ito hin diri perpekto nga mga tawo. Pero hunahunaa an nahimo ni Jehova dinhi ha tuna! Ha bug-os nga kalibotan, nabuligan niya an ordinaryo nga mga tawo nga buhaton an diri gud nira makakaya ha ira la paningkamot. (Juan 14:12) An pagbasa-basa la han libro nga Nagmamando Na an Ginhadian han Dios! bangin magpahinumdom na ha aton han kahaluag han pagsangyaw nga nahimo hinin naglabay nga siglo. Bangin mahinumdoman liwat naton an daku nga pag-uswag han organisasyon ni Jehova ha pagtutdo ha tinuod nga mga Kristiano, ha pagdaog ha mga kaso ha korte, ngan bisan ha paggamit han pinakabag-o nga teknolohiya ha pagtuman han kaburut-on han Dios!

²⁹ Kon ginhuhunahuna naton an ngatanan nga nahimo ha pagpahiuli han putli nga pagsingba ha kataposan nga mga adlaw hinin maraot nga sistema, nagigin mas klaro gud nga nagios an karuwahe ni Jehova. Daku gud an aton pribilehiyo nga magin bahin hini nga organisasyon ngan mag-alagad ha sugad nga Soberano!​—Sal. 84:10.

30. Ano an aton uusisahon ha sunod nga kapitulo?

³⁰ Pero damu pa an igintututdo han bisyon ni Ezekiel. Ha sunod nga kapitulo, uusisahon naton hin maopay an upat nga makatirigamnan nga “buhi nga mga linarang,” o mga kerubin. Ano an ira igintututdo mahitungod han aton mahimayaon nga Soberano, hi Jehova nga Dios?