1, 2. 1) ¿Ezequielan kunanak luratapas jaqenakatakejj mayjäna? (Aka yatichäwi qalltan utjki uka dibujo uñjjattʼäta). 2) ¿Ezequielajj kuntï lurkäna ukajj kunanak pasañapsa uñachtʼayäna?

 EZEQUIELAJJ kunanaktï lurkäna ukanak uñjasajj jaqenakajj wal parlapjjäna. Babiloniar apatäpkäna uka judionakajj Ezequielar wal uñchʼukisipkäna, jupajj mä semanpachaw wali llakita qontʼatäskäna, janirakiw kuns arskänti, ukampis mä akatjamat sartasajj utapar mantasaw jistʼantasjjarakïna. Vecinonakapajj kunatï pasaskäna uk janiw amuyapkänti. Ukatjja Ezequielajj mayamp uñstanisaw mä ladrillo irtasajj jupa nayraqatar uchäna, uka ladrillorojj Jerusalén marka dibujtʼasaw khitsurakïna. Ukjjarusti jan kun arsusakiw uka ladrillorojj mä jiskʼa perqamp muytayäna (Ezeq. 3:10, 11, 15, 24-26; 4:1, 2).

² Ezequielar uñchʼukir jaqenakajj jukʼat jukʼat waljaptasajj inas akham jisktʼasipjjchïna: “¿Kuntï lurki ukajj kamsañarak munpachasti?” sasa. Ezequielajj kuntï lurkäna ukajja, kuna jan walinakatï puriniñampïskäna ukwa uñachtʼayäna, mä arunjja Jehová Diosajj colerasitapat kun lurañsa amtäna ukwa uñachtʼayäna, ukampis Babiloniar apat judionakajj walja maranak qhepatwa ukanak sumpach amuyasipkäna. ¿Kunanakas pasañampïskäna? ¿Kunjamsa ukanakajj nayra Israel markar jan waltʼayäna? Kunanakatï paskäna ukanakajj ¿kunsa jichha tiempon Jehová Diosan servirinakapar yatichistu?

3, 4. 1) ¿Diosajj kun lurañtï amtkäna ukanak kunjamsa Ezequielajj kimsa toqet uñachtʼayäna? 2) ¿Jerusalenajj qʼala muyuntatäniwa sañatakejj kunanaksa Ezequielajj luräna?

³ Khä 613 antes de Cristo (a.C.) mara jakʼanakanjja, Jehová Diosajj kunjamsa Jerusalenar castigani uk uñachtʼäwinakampi qhanañchañapatakiw Diosajj Ezequielar mayïna. Ukarjamajj aka kimsanakaw Jerusalenan pasañapäna: qʼala muyuntatäñapänwa, markankirinakajj wal tʼaqesipjjañapäna, markasa jaqenakasa qʼala tukjatäpjjañapänwa. * Kunjamsa ukanakajj Jerusalenan phoqasïna uk uñjañäni.

⁴ Jerusalenajj qʼala muyuntatänwa. Diosajj Ezequielar akham sänwa: ‘Jumajj mä ladrillo katum, uksti juma nayraqatar ucharakim. Uka ladrillorusti Jerusalén marka dibujtʼam [...], uka markarojj mä perqamp muyuntayam’ sasa (Ezequiel 4:1-3 liytʼañataki). Uka ladrillojj Jerusalén markamp sasïnwa, Ezequielajj Babilonian ejercitopampi sasirakïnwa, Diosajj uka ejército toqew kuntï amtkäna uk phoqañapäna. Ukatjja Ezequielajj markamp saski uka ladrillorojj mä jiskʼa perqampiw muytayañapäna, uka markar nuwantañatakisti mä laqʼa montonampi mä qhawqha arietenakampwa lurañaparakïna. * Ukanakajj ladrillo muytpachar uchatäñapänwa. Ukham lurasajja, kunjamsa Jerusalenar enemigonakapajj qʼal jarkʼantasin atacapjjani ukwa uñachtʼayäna. Uka marka atakiri enemigo soldadonakajj fierror uñtasit wali chʼamanïniwa sañatakejja, Ezequielajj markampit jupampit chika taypirojj mä ‘fierro plancha’ uchäna, ukatjja markar wal uñchʼukirakïna. Taqe ukanakajja ‘israelitanakatakejj mä señalänwa’, kuna jan walinakatï niya pasañampïskäna ukanak uñachtʼayäna. Jehová Diosajja Jerusalenan enemigopäki uka ejercitompiw uka mark qʼal jarkʼantayañapäna. Jerusalenajj Diosan markapatak wali importantënwa, ¡templojj ukankänwa!

5. ¿Jerusalén markankir jaqenakarojj kunatï pasañapäkäna uk kunjamsa Ezequielajj uñachtʼayäna?

⁵ Jerusalén markankir jaqenakajj wal tʼaqesipjjäna. Diosajj Ezequielar akham sänwa: ‘Jumasti trigompi, cebadampi, jawasampi, lentejampi, mijompi, espeltampi katuñamawa, ukanaksti mä fuenter uchasajj jumatak tʼantʼa lurasim’, ukatsti ‘pestʼasajj mä 230 gramonakwa sapüru manqʼasïta’ sasa. Ukatjja ‘nayaw Jerusalén markan manqʼañanak jan utjaykäti’ sasaw Diosajj sarakïna (Ezeq. 4:9-16). Aka uñachtʼäwinjja, Ezequielajj janiw Babilonia ejercitompi sasjjänti, jan ukasti Jerusalenankir jaqenakampi sasjjänwa. Kuntï Ezequielajj lurkäna ukajja, Jerusalenan qʼala muyuntatätap kawsajj kunjamsa manqʼat pistʼañajj wal utjañapäna ukwa uñachtʼayäna. Ezequielajj kunayman jakʼunakatwa tʼantʼa lurasïna, ukampejja jaqejj kuntï katkani ukakwa manqʼasini sañwa munäna. Sintipuniw manqʼat pistʼapjjañapäna. Jerusalenankirinakarus parlkaspa ukhamwa Ezequielajj akham säna: ‘Jumanak taypin wawanakapar manqʼantir awk taykanakaw utjani, awk taykanakapar manqʼantir wawanakaw utjarakini’ sasa. Ukjjarusti, ‘manqʼatjam jiwayir flechanakajj’ walpun jaqenakar tʼaqesiyañapäna, qʼal tukusipjjañaparakïna (Ezeq. 4:17; 5:10, 16).

6. 1) ¿Ezequielajj kunampi sasïnsa uk kunjamsa pä toqet uñachtʼayäna? 2) ¿Ezequielajj khuchurat ñikʼutap pestʼasin jaljañapäkäna ukajj kamsañsa munäna?

 ⁶ Jerusalén markasa jaqenakapasa qʼala tukjatäpjjänwa. Aka uñachtʼäwinjja, Ezequielajj kunampi sasïnsa ukwa pä toqet uñachtʼayäna. Maya, kuntï Jehová Diosajj lurkani ukwa uñachtʼayäna. Diosajj jupar akham sänwa: ‘Jumajj mä afilat espada katum, ñikʼutampi sunkhampi mururirin cuchillopar tukuyam’ sasa (Ezequiel 5:1, 2 liytʼañataki). Espada katkäna uka amparapajj Jehová Diosan amparapampi sasïnwa, mä arunjja kunjamsa Diosajj babilonio ejercitompejj Jerusalenar qʼal tukjayani ukwa uñachtʼayäna. Paya, kunjamsa judionakajj wal tʼaqesipjjani ukwa Ezequielajj uñachtʼayäna. Diosajj jupar akham sänwa: ‘Jumajj sunkhampi ñikʼutampi afeitasim’ sasa. Ukham lurasajja judionakajj atacatäpjjaniwa, jaqenakas wal jiwarapjjani sañwa munäna. Ukatjja ‘khuchurat ñikʼutam mä balanzar pestʼasajj kimsa parter jalanoqam’ sasaw Diosajj sarakïna. Ukajja Diosan amtapajj janiw ina loqheki phoqaskaniti, jan ukasti taqpachaw phoqasini sañwa munäna.

7. ¿Kunatsa Jehová Diosajj khuchurat ñikʼutap kimsa parter jalanoqañap Ezequielar mayïna, kunatsa ukham sispachäna?

 ⁷ Kunjamtï uñjaniwayktanjja, khuchurat ñikʼutam kimsa parter jalanoqam, ukatsti uka ñikʼutamampejj janiw mä igualaki lurätati sasaw Jehová Diosajj Ezequielar säna (Ezequiel 5:7-12 liytʼañataki). Khuchurat mä parte ñikʼutapjja Ezequielajj ‘marka manqharuw’ phichantäna, ukham lurasajja Jerusalenan jakirinakat yaqhepajj pachpa markanwa jiwapjjani sañwa munäna. Ukjjarusti, khuchurat payïr parte nikʼutapjja ‘marka muytpacharuw’ espadamp khuchunoqäna, ukham lurasajj yaqhepajj marka anqan jiwayatäpjjaniwa sañwa munäna. Khuchurat kimsïr parte nikʼutapjja ‘thayaruw’ willtäna, ukham lurasajj yaqhepajj yaqha markanakaruw escapapjjani, ukampis ‘mä espadaw’ jupanakar arktani sañwa munäna. Ukhamasti, escapirinakatak janiw sum jakasiñajj utjañapäkänti.

8. 1) ¿Ezequielajj kuntï uñachtʼaykäna ukarjamajja salvasirinakajj utjänti? 2) ¿Ezequielajj mä jukʼa ñikʼutap isipar imaskäna uka profeciajj kunjamsa phoqasïna?

⁸ Ukampis kuntï Ezequielajj uñachtʼaykäna ukajja, mä qhawqha salvasirinakan utjañapwa qhanstayarakïna. Ezequielajj pʼeqep afeitaskäna ukjjat parlkasajja, Jehová Diosajj akham sänwa: ‘Ñikʼutamat mä jukʼa aptasajja, isimajj doblatäki uka cheqaruw imañama’ sasa (Ezeq. 5:3). Ezequielan ukham luratapajja, yaqha markanakar escapapkani uka judionakat mä qhawqhanejj jakasipkakiniwa sañwa munäna. Babiloniar apatäsin 70 maranak pasatat Jerusalenar kuttʼapkäna ukanakasa, ‘jukʼa ñikʼutäkis’ ukanak taypinkarakïnwa (Ezeq. 6:8, 9; 11:17). ¿Ezequielan uka profeciapajj phoqasïnti? Jïsa. Babilonia markar apatäpkäna ukanakajj antutatäjjapjjäna ukhat mä qhawqha maranak qhepatjja, yaqha markanakar apata judionakajj Jerusalenaruw kuttʼjjapjje sasaw Ageo profetajj säna. Khitinakatï kuttʼapkäna ukanakarojj akham sasïnwa: ‘Jupanakajj jilïr jaqenakäjjapjjänwa nayrïr utsa uñjapjjarakïnwa’ sasa, mä arunjja jupanakajj Salomonan templopwa uñtʼapjjäna (Esd. 3:12; Ageo 2:1-3). Kunjamtï Diosajj arskänjja, jupa saparuk adoririnakajj  janiw qʼal chhaqtkänti. 9 yatichäwinwa Jehová Dios saparuk adorañat jukʼamp yatjjataskañäni (Ezeq. 11:17-20).

9, 10. ¿Ezequielajj kunanaktï lurkäna ukanakajj jutïrin kunanak pasañapsa amtayistu?

⁹ Kunanakatï jutïr urunakat Biblian qellqatäki ukanakwa Ezequielan uñachtʼäwinakapajj amtayistu. ¿Ukanakatjja mä qhawqhajj kawkïrinakasa? Jehová Diosajj kuntï nayra Jerusalén markampejj lurkäna uka pachparakwa jutïrin lurani, mä arunjja gobiernonakampiw taqpach falso religionanakar tukjayani (Apoc. 17:16-18). Jerusalenan tʼunjäwipajj ‘jan kikpani mä jan waltʼawïnwa’, ‘jachʼa tʼaqesiñ tiempojj’ Armagedón guerrampi tukuykani ukajj jukʼamp jan walïniwa (Ezeq. 5:9; 7:5; Mat. 24:21).

¹⁰ Bibliarjamajja, Jehová Diosajj taqpach falso religionanak tukjkani ukhajj religionanakar apoyiri jaqenakat jilapartejj janiw jiwapkaniti. Ukampis wal ajjsarapjjatap laykojj kunayman jaqenak taypinwa imantasiñ thaqapjjani (Zac. 13:4-6; Apoc. 6:15-17). Ukajja kunatï Jerusalenankir jaqenakar paskäna ukwa amtayistu, markajj qʼala tukjatakäna ukhajja yaqhepajj salvasipjjänwa, yaqha markanakar escapasajj ‘thayampi apatäpkaspas’ ukhamänwa. Kunjamtï  7 parrafon yatjjataniwayktanjja, yaqhepanakajj qalltan salvasipkchïnsa Jehová Diosajj jupanakar ‘arktañatakejj mä espada’ apsusïna (Ezeq. 5:2). Ukhamarakiw religionanakar tukjaskani ukat salvasirinakajj kawkir imantasiñsa jan puedepkaniti, Jehová Diosan espadapat janiw kunas jupanakar jarkʼaqkaniti. Jupanakajj Armagedonanwa ‘cabranaka’ sasin uñtʼatäpki ukanakamp chikajj qʼal jiwarapjjani (Ezeq. 7:4; Mat. 25:33, 41, 46; Apoc. 19:15, 18).

11, 12. 1) Jerusalenar muyuntañat parlki uka profecía sum amuyañajja, ¿kunjam predicañatakis yanaptʼistu? 2) ¿Prediktan ukasa yatiyktan ukasa kunjamsa mayjtʼpachäni?

¹¹ Uka profecía amuytʼañajja kunjamsa Diosan arunakap yatiyasktan, kunatsa yatiyañajj wali wakiskiri uk amuyañatakiw yanaptʼistu. Jehová Diosar servipjjañapatakejja, jichhaw qhawqtï puedktan ukarjam jaqenakar yanaptʼañasa. ¿Kunatsa ukham sistanjja? ‘Taqe markanakankir jaqenakar’ Jesusan discipulopar tukuyañatakejj jukʼa tiempokiw utj-jje (Mat. 28:19, 20; Ezeq. 33:14-16). Diosajj ‘varampi castigañ’ qalltkani, mä arunjja gobiernonakajj religionanak contra sartapkani ukhaw Diosan arunakap jan yatiyjjañäniti (Ezeq. 7:10). Mä qhawqha tiempojja Ezequielajj ‘amutukiw’ quedasïna, mä arunjja janiw profecía arunakap yatiyjjänti. Ukhamarakiw jiwasajj amutu tukjjañäni, mä arunjja janiw salvasipjjañapatak suma yatiyäwinak yatiyjjañäniti (Ezeq. 3:26, 27; 33:21, 22). Falso religionanakar tukjaskani uka qhepatjja, jan kun lurirjamaw jaqenakajj sarnaqapjjani, jupanakajj ‘mä profetan visionap thaqapjjani’, ukampis salvasiñatakejj janiw khitis yanaptʼañ puedjjaniti (Ezeq. 7:26). Salvasiñatakejj kunsa maynejj lurañapa uk yatiñ tiemposa, Criston discipulopar tukuñ tiemposa tukuyjjaniwa.

 ¹² Ukampis Diosan arunakap yatiyañ tiempojj janïraw tukuyatäkaniti. ¿Kunatsa ukham sistanjja? Jachʼa tʼaqesiñ tiemponjja inas jiwasajj juchañchäwi arunak yatiyjjchiñäni, ukajja ‘chhijchhir uñtasit plagäniwa’. Ukham yatiyatasajja, aka jan wali pachajj niya tukusiñampïskatapwa qhanstayani (Apoc. 16:21).

13. ¿Kunatsa Jehová Diosajj Ezequiel profetarojj chʼeqa ladot winktʼasiñapsa kupi ladot winktʼasiñapsa maypachäna?

¹³ Ezequielajj janiw kunjamas Jerusalenajj tʼunjasiñapäna ukak siskänti, jan ukasti kunapachas ukajj pasañapäna uksa uñachtʼayarakïnwa. Jehová Diosajja chʼeqa ladot 390 urunak winktʼasiñapwa Ezequielarojj mayïna, kupi ladotjja 40 urunak winktʼasiñapwa mayirakïna. Ezequielajj urun mä qhawqha horanakakiw ukham lurpachäna, sapa urojj mä marampi sasïnwa (Ezequiel 4:4-6 liytʼañataki; Núm. 14:34). Ezequielan ukham luratapajja, Jerusalén markajj kuna maran tukjatänisa ukwa uñachtʼayäna. Israel markan 390 maranak juchachasitapajj 997 a.C. maranwa qalltäna, uka maranwa  12 tribunakajj payar jaljtäna (1 Rey. 12:12-20). Ukatsti Judá markan 40 maranak juchachasitapajj inas 647 maran qalltchïna. Uka maranjja Judá markarojj kunjamas tukjasini uk yatiyañapatakiw Jeremías profetar Diosajj khitäna, uksti qhana arunakampiw yatiyañapäna (Jer. 1:1, 2, 17-19; 19:3, 4). Ukhamasti 390 maranakasa 40 maranakasa, 607 maranwa tukuyjjäna, uka maranwa Diosan arsutaparjamajj Jerusalén markajj qʼala tukjatäjjäna. *

14. 1) ¿Diosajj arsutanakap horasaparuw phoqani sasin confiyatap kunjamsa Ezequielajj uñachtʼayäna? 2) ¿Jerusalenajj janïr qʼala tukjatäkipanjja kunas pasañapäna?

¹⁴ Ezequielajj 390 urunakampita 40 urunakampita mä profecía katoqkäna ukhajja, inas jupajj kuna maras Jerusalenajj tukjatäni uk jan amuykchïnti. Ukampis Jerusalén markajj tukjatäñapatak mä qhawqha maranak faltkäna ukhaw Ezequielajj ‘tukuyamajj purinjjewa’ sasin sapa kuti judionakar yatiyjjäna (Ezequiel 7:3, 5-10 liytʼañataki). Kuntï Jehová Diosajj arski uk horasaparuw phoqani sasaw Ezequielajj taqe chuym confiyäna (Is. 46:10). Jerusalenan qʼala tukjatäñapatak mä jukʼa faltkipan kunas pasani uksa, Ezequielajj akham sasaw qhanañcharakïna: ‘Jan waltʼañanakasti mayat mayatwa jutarakini’ sasa. Ukanakajj jaqenakarusa, religión pʼeqtʼirinakarusa, marka apnaqerinakarus qʼal aynachtʼayañapäna (Ezeq. 7:11-13, 25-27).

15. ¿Ezequielajj arskäna uka profeciat kawkïr cheqas 609 a.C. maran phoqasiñ qalltäna?

¹⁵ Ezequielajj Jerusalenan tʼunjasïwipat parlkäna ukhatjja mä qhawqha maranakakiw pasaskäna, ukhaw uka profeciajj phoqasiñ qalltäna. 609 a.C. maranjja, Jerusalenar atacañ qalltapjjatapwa Ezequielajj amuyäna. Uka urunakansti mä trompetaw tuktʼasïna, ukhamat judionakajj Jerusalén markar arjjatir sarapjjañapataki, ukampis kuntï Ezequielajj arskäna ukaw phoqasïna, ‘janiw khitis guerrar nuwasir’ sarkänti (Ezeq. 7:14). Judionakajj janiw markar arjjatañatakisa, babilonionak contra nuwasiñatakisa mayachtʼasipkänti. Inas yaqhep judionakajj Jehová Diosaw salvistani sasin amuyapjjchïna. Cheqas asirionakajj Jerusalén marka katuntasiñ munapkäna ukhajja, Diosaw salväna. Mä angelaw walja asirio soldadonakar jiwarayäna (2 Rey. 19:32). Ukampis jichha kutinjja, janiw angelanakajj Jerusalenan jakirinakarojj yanaptʼapkänti. Mä jukʼa tiemponakwa Jerusalenajj qʼala muyuntatäjjäna, ‘ninar uchat phukur’ uñtasitänwa, uka markan jakirinakasti phukunkir ‘jiskʼa aychanakarʼ uñtasitarakïnwa (Ezeq. 24:1-10). Jerusalenajj 18 phajjsinakaw qʼala muyuntata jarkʼantata ukham uñjasïna, ukatsti qʼala tukjatäjjarakïnwa.

16. ¿Diosajj horasaparupuniw taqe kuns phoqe sasin confiyatas kunjamsa uñachtʼaysna?

¹⁶ ¿Ezequielan uka profeciapajj kunsa yatichistu? Predicatasasa, prediktan ukarjamajj jaqenakajj kunsa lurapjje ukasa ¿profeciarjamarakit phoqasi? Jehová Diosajja, kunapachas falso religionanakar tukjani uk amtjjewa, uka amtapjja nayra tiemponjamarakiw sum phoqani (2 Ped. 3:9, 10; Apoc. 7:1-3). Kuna urus Diosajj taqe ukanak lurani uk janiw jiwasajj yatktanti. Ukampis Ezequiel profetjamarakiw kuntï Jehová Diosajj maykistu ukanak phoqasktanjja, mä  arunjja sapa kutiw jaqenakarojj ‘tukuyamajj purinjjewa’ sasin yatiyasktanjja. ¿Ukham yatiyañajj wakisipuniti? Jïsa. Kuna razonattï Ezequielajj kutin kutin yatiykänjja, ukhamarakiw jiwasajj sapa kuti yatiyañasaraki. * Jerusalenajj qʼala tukjatäniwa sasin yatiyir istʼasajja, waljaniw jan creyipkänti (Ezeq. 12:27, 28). Ukampis Babiloniar apata yaqhep judionakajja, Diosatakejj kunatï walïki uk lurañ munapjjatapwa uñachtʼayapjjäna, ukatwa nasipkäna uka markar kuttʼapjjäna (Is. 49:8). Jichhürunakanjja niya ukhamarakiw pasi, jaqenakat jilapartejj janiw akapachan tukjatäñap creyipkiti (2 Ped. 3:3, 4). Ukhamäkchisa, janïr akapach tukuskipanjja suma chuymani jaqenakar yatiyañatak chʼamachasiskaktanwa, ukhamat wiñay jakañar apki uka thakir sarjjatapjjañapataki (Mat. 7:13, 14; 2 Cor. 6:2).

17. ¿Kunanaksa ‘jachʼa tʼaqesiñ tiempon’ uñjañäni?

¹⁷ Ezequielan profeciapajj ak amtayarakistu, falso religionanakar tukjañ qalltaskani ukhajj ukankir jaqenakapajj janiw religionapar arjjatañatakejj ‘khitis guerrar nuwasir sarkaniti’. Antisas jupanakajj “Tatay, Tatay” sasaw yanaptʼayasiñatak wal arnaqasipjjani. Jan  khitin istʼatäsajj ‘amparanakapajj jan chʼamanïniwa’, ukatsti ‘jupanakarojj khatatiñaw katuntani’ (Ezeq. 7:3, 14, 17, 18; Mat. 7:21-23). ¿Kunampsa lurapjjani? (Ezequiel 7:19-21 liytʼañataki). Jerusalenan jakirinakatjja Diosajj akham sänwa: ‘Qollqenakap callenakaruw jaqtapjjani’ sasa. Uka arunakajj kunatï jachʼa tʼaqesiñ tiempon paskani ukwa uñachtʼayaraki. Uka urunakanjja, kunatï pasañampïkani ukanakat janiw qollqepajj qhespiykaniti, ukwa jaqenakajj amuyasipjjani.

18. ¿Ezequielan profeciaparjamajj kunanaksa jakäwisan nayrar uchañasa?

¹⁸ ¿Kunanaksa Ezequielan profeciapat yateqsna? Kunanak lurañtï amtktan ukanakjja, wali wakiskirïki ukarjamaw amtañasa. Ak amtañäni, judionakajja markapajj niya tukusiñampïskatapa, jupanakas niya jiwarañampïskatapa, ukhamarak kunanakatï jupanakan utjkäna ukanakas inamayakïtap amuyasipjjäna uka qhepatakwa kunas jukʼamp importantejja uk thaqapjjäna. Jupanakan utjkäna ukanak apanukusajj ‘mä profetan visionap thaqapjjäna’, ukampis ukham lurañatakejj janiw tiempöjjänti (Ezeq. 7:26). Jiwasajj janiw Jerusalén markan jakirinakjamäktanti, aka jan wali pacharojj kunas pasañampïski ukanak sum amuytanjja. Jehová Diosajj kunanaktï jutïritak arsuwayki ukanakarus taqe chuymaw confiytanjja, ukaw jakäwisan kunatï nayrankañapäki uk amtañasatak yanaptʼistu. Ukatwa kunatï valoranïki ukanak alajjpachar imkatañatak wal chʼamachastanjja, ukham luratasajj janiw inamayäkaniti, ni ‘callenakar jaqtatäkanisa’ (Mateo 6:19-21, 24 liytʼañataki).

19. ¿Ezequielan profecianakapajj kunjamsa yanaptʼistu?

¹⁹ ¿Jerusalenajj tʼunjatäniwa sasin Ezequielajj yatiykäna ukajj kunjamsa yanaptʼistu? Jaqenakar Diosan serviripar tukuyañatakejj jukʼa tiempok utj-jjatap amtayistu. Ukatwa Diosan arupat yatichañajj jiwasatak wali wakiskirejja. Suma chuyman jaqenakajj Diosar adorañ qalltjjapjje uk uñjañajj wal kusisiyistu. Ukampis yaqhepajj janis ukham lurapkchejja, jiwasajj Ezequieljamarakiw ‘tukuyamajj purinjjewa’ sasin jaqenakar yatiyaskaktanjja (Ezeq. 3:19, 21; 7:3). Ukatsti Jehová Diosar taqe chuym confiyaña, Jupar adorañ nayrar uchañwa amtaraktanjja (Sal. 52:7, 8; Prov. 11:28; Mat. 6:33).