1, 2. (a) Nupaṣamẹ tẹlẹ wẹ Ezekiẹli wà? (Pọ́n yẹdide he tin to bẹjẹeji hosọ ehe tọn.) (b) Dọdai etẹ tọn wẹ nuyiwa etọn lẹ yin?

BLEUN wẹ linlin lọ gbayipe gbọn Ju he to kanlinmọgbenu to aigba Babilọni tọn ji lẹ ṣẹnṣẹn gando nupaṣamẹ he wà yẹwhegán Ezekiẹli te lẹ go. Na osẹ dopo blebu, e sinai po flumẹjijẹ po to kanlinmọ lọ lẹ ṣẹnṣẹn bo gbọṣi abọẹ, ṣigba to ajiji mẹ, e fọ́n bo suhọ̀n do ede do ohọ̀ etọn mẹ. Todin, e paṣa kọmẹnu etọn lẹ nado mọdọ yẹwhegán lọ tọ́n bo ze zannu de donukọnna ede bosọ jẹ yẹdide de do e go ji. Enẹgodo, Ezekiẹli jẹ awuwlena adó kleun de ji bo ma tlẹ kẹnù bo dọho dopo tata.—Ezek. 3:10, 11, 15, 24-26; 4:1, 2.

² Nupọntọ he na ko jẹ pipli do finẹ ji lẹ na ko to kinkanse yede dọ, ‘Etẹwẹ ehe lẹpo zẹẹmẹdo?’ Nukọn mẹ wẹ e na wá họnwun na Juvi he to kanlinmọgbenu enẹlẹ dọ nuyiwa yẹwhegán Ezekiẹli tọn he paṣamẹ enẹ yin dọdai de, ehe gando nujijọ dobu de he na do homẹgble dodo tọn Jehovah Jiwheyẹwhe tọn hia go. Nujijọ tẹwẹ? Nawẹ e gando akọta Islaeli hohowhenu tọn go gbọn? Zẹẹmẹ tẹwẹ e tindo na sinsẹ̀n-basitọ nugbo lẹ to egbehe?

3, 4. (a) Adà atọ̀n whẹdida Jiwheyẹwhe tọn tẹlẹ sin wadohia wẹ Ezekiẹli basi? (b) Nawẹ Ezekiẹli basi wadohia osladido lẹdo Jelusalẹm tọn gbọn?

³ To nudi 613 J.W.M., Jehovah na anademẹ Ezekiẹli nado basi wadohia adà atọ̀nnọ de tọn gando whẹdida Jiwheyẹwhe tọn he na wá Jelusalẹm ji go. Adà lọ lẹ wẹ: osla he na yin dido lẹdo tòdaho lọ, oyà he mẹhe nọ nọ̀ e mẹ lẹ na ji podọ lehe tòdaho lọ po mẹhe nọ nọ̀ e mẹ lẹ po na yin vivasudo do. * Mì gbọ mí ni gbadopọnna adà atọ̀n ehelẹ to gigọ́ mẹ.

⁴ Osla he na yin dido lẹdo Jelusalẹm. Jehovah dọna Ezekiẹli dọmọ: “Ze zannu de donukọnna dewe. . . . Yinuwa taidi mẹhe dosla lẹdo e.” (Hia Ezekiẹli 4:1-3.) Zannu lọ nọtena tòdaho Jelusalẹm tọn bọ Ezekiẹli nọtena awhànpa Babilọni tọn he Jehovah na yizan. Ezekiẹli sọ mọ anademẹ yí nado wleawuna adó kleun de gọna osla de po awhàn-kẹkẹ lẹ po. Enẹgodo, e dona tò onú enẹlẹ lẹdo zannu lọ. Yé nọtena awhànfunnu he kẹntọ Jelusalẹm tọn lẹ na yizan nado dosla lẹdo tòdaho lọ bo tọ́nawhàn ẹn. Nado dohia dọ awhànfuntọ kẹntọ lọ lẹ dohuhlọn di gànyuu, Ezekiẹli dona ze “agbánvla gànyuu tọn de” do ede po tòdaho lọ po ṣẹnṣẹn. To mọwiwà godo, ewọ na “diọnukunsọ” tòdaho lọ. Nuyiwa avùntọ́nmẹ tọn enẹlẹ na yin “ohia de . . . na owhé Islaeli tọn” dọ nuhe yé ma gán kudlọ etọn pọ́n de jlo na jọ. Jehovah na yí awhànpa kẹntọ lẹ tọn zan nado dosla lẹdo Jelusalẹm, yèdọ tatọ́-tònọ omẹ Jiwheyẹwhe tọn lẹ tọn, fihe tẹmpli Jiwheyẹwhe tọn tin te!

5. Nawẹ Ezekiẹli basi wadohia nuhe na jọ do mẹhe nọ nọ̀ Jelusalẹm lẹ go tọn gbọn?

⁵ Oyà he mẹhe nọ nọ̀ Jelusalẹm lẹ na ji. Jehovah degbena Ezekiẹli dọ: “Yí likun, balekun, ayìví, apàkún lẹntile tọn, milẹti po likun wunmẹ devo po . . . bo yí yé do basi akla,” podọ “hiẹ na nọ jlẹ núdùdù ṣekẹli 20 nado nọ dù to azán dopodopo ji.” Enẹgodo, Jehovah basi zẹẹmẹ dọmọ: “Yẹn na súali núdùdù tọn.” (Ezek. 4:9-16) To adà wadohia lọ tọn ehe mẹ, Ezekiẹli masọ nọtena awhànpa Babilọni tọn ba; kakatimọ e to adà mẹhe nọ nọ̀ Jelusalẹm lẹ tọn yiwà. Nuyiwa yẹwhegán lọ tọn lẹ dohia dọ osladido he to nukọn ja lọ na zọ́n bọ núdùdù na hán to tòdaho lọ mẹ. To ojlẹ enẹ mẹ, jinukun depope he alọ plá wẹ na nọ yin ṣiṣakadopọ nado basi akla, ehe dohia dọ nudepope he mẹlọ lẹ mọ wẹ yé na nọ dù. Obá tẹ mẹ wẹ huvẹ lọ na sinyẹn jẹ? Ezekiẹli dọho taidi dọ e to hodọna mẹhe nọ nọ̀ Jelusalẹm lẹ tlọlọ dọmọ: “Otọ́ he to ṣẹnṣẹn towe lẹ na dù visunnu yetọn lẹ, podọ visunnu lẹ na dù otọ́ yetọn lẹ.” To godo mẹ, mẹsusu na jiya na “ogá huvẹ tọn he nọ hẹn okú wá lẹ” tọn wutu, bọ mẹlọ lẹ na “yọ́ kọnyinai.”—Ezek. 4:17; 5:10, 16.

6. (a) Adà awe tẹlẹ wẹ Ezekiẹli yiwà to ojlẹ dopolọ mẹ? (b) Etẹwẹ gbedide Jiwheyẹwhe tọn “nado jlẹ ofún lọ lẹ bo má yé” dohia?

⁶ Vasudo Jelusalẹm po omẹ etọn lẹ po tọn. To adà wadohia dọdai tọn ehe mẹ, Ezekiẹli yí adà voovo awe wà to ojlẹ  dopolọ mẹ. Tintan, Ezekiẹli basi wadohia nuhe Jehovah na wà tọn. Jehovah dọna ẹn dọ: “Yí ohí didá he hiẹ na yizan taidi dàlunhi dàpatọ tọn de.” (Hia Ezekiẹli 5:1, 2.) Alọ Ezekiẹli tọn he e na yí do hẹn ohí lọ go nọtena alọ Jehovah tọn—yèdọ whẹdida etọn—he awhànpa Babilọni tọn na hẹnṣẹ. Awetọ, Ezekiẹli basi wadohia adán he na gbò Juvi lẹ tọn. Jehovah dọna ẹn dọmọ: “Whlẹ́ ota towe po ogbì towe po.” Ota whiwhlẹ́ Ezekiẹli tọn nọtena lehe yè na tọ́nawhàn Ju lẹ bo zà yé sẹ̀ do. Humọ, gbedide lọ dọ ni “ze nujlẹgàn nado jlẹ ofún lọ lẹ [enẹ wẹ oda po ogbì lọ lẹ po] bo má yé do gọnu-gọnu” dohia dọ whẹdida Jehovah tọn sọta Jelusalẹm na yin hinhẹnṣẹ, e ma yin gbọn kosọ dali, ṣigba sọn ojlo mẹ wá podọ to gigọ́ mẹ.

7. Naegbọn Jehovah do biọ to Ezekiẹli si nado má ofún lọ lẹ do atọ̀n ji bo yí adà dopodopo do wà onú voovo?

 ⁷ Naegbọn Jehovah do biọ to Ezekiẹli si nado má ofún etọn he yin whiwhlẹ́ lọ lẹ do atọ̀n ji bo yí adà dopodopo do wà onú voovo? (Hia Ezekiẹli 5:7-12.) Ezekiẹli mẹ̀ adà ofún lọ tọn dopo “to tòdaho lọ mẹ” nado dohia nupọntọ lẹ dọ delẹ to mẹhe nọ nọ̀ Jelusalẹm lẹ mẹ na kú do tòdaho lọ mẹ. Ezekiẹli yí ohí do já adà ofún lọ tọn devo “gbọn tòdaho lọ mẹ lẹdo pé” nado dohia dọ mẹdevo lẹ na yin hùhù to gbonu tòdaho lọ tọn. E vúnvún adà he pò lọ pé do jẹhọn mẹ nado dohia dọ omẹ tòdaho lọ tọn devo lẹ na gbàpe gbọn akọta lẹ mẹ, ṣigba “ohí” de na “dómọna yé.” Gbọnmọ dali, mahopọnna fidepope he luntọ́ntọ enẹlẹ sọgan yì nọ, yé ma na tindo jijọho gbede.

8. (a) Owẹ̀n todido tọn tẹwẹ wadohia Ezekiẹli tọn bẹhẹn? (b) Nawẹ ohó dọdai tọn he gando ofún “vude” he yin biblá lọ go wá mọ hẹndi gbọn?

⁸ Ṣigba, wadohia dọdai tọn Ezekiẹli tọn lọ sọ bẹ owẹ̀n todido tọn de hẹn. Jehovah dọna Ezekiẹli gando ofún he e whlẹ́ sẹ̀ lọ lẹ go dọmọ: “Yí vude to e mẹ bo . . . blá ẹ do tónu tewu towe tọn.” (Ezek. 5:3) Gbedide enẹ dohia dọ omẹ vude na yin pipò dai to Juvi he na gbàpe gbọn akọta lẹ ṣẹnṣẹn lọ lẹ mẹ. Delẹ to omẹ “vude” enẹlẹ mẹ na tin to kanlinmọ he na lẹkọ sọn Babilọni yì Jelusalẹm to kanlinmọgbenu-ninọ owhe 70 tọn lọ godo lẹ mẹ. (Ezek. 6:8, 9; 11:17) Be ohó dọdai tọn enẹ mọ hẹndi ya? Mọwẹ. Owhe delẹ to vivọnu kanlinmọgbenu-ninọ Babilọni tọn lọ godo, yẹwhegán Hagai na linlin dọ delẹ to Ju he gbàpe lọ lẹ mẹ ko lẹkọwa Jelusalẹm nugbo. Yewlẹ wẹ “sunnu mẹhomẹ he ko mọ ohọ̀ hoho lọ lẹ,” enẹ wẹ, tẹmpli Sọlomọni tọn. (Ẹzla 3:12; Hag. 2:1-3) Jehovah hẹn ẹn diun dọ sinsẹ̀n-bibasi wiwe-ṣeke yin hinhẹndote, kẹdẹdile e ko dopà etọn do. Mí na wá gbadopọnna nususu dogọ gando hẹngọwa enẹ go to Weta 9tọ owe ehe tọn mẹ.—Ezek. 11:17-20.

9, 10. Nujijọ ayidego tọn he yin didọdai na sọgodo tẹlẹ wẹ wadohia dọdai tọn he Ezekiẹli basi lẹ hẹn mí flin?

⁹ Nujijọ he Ezekiẹli basi wadohia yetọn lẹ hẹn mí flin nujijọ ayidego tọn he Ohó Jiwheyẹwhe tọn dọ dọdai etọn na  sọgodo lẹ. Etẹwẹ yin delẹ to yé mẹ? Dile e jọ do tòdaho Jelusalẹm hohowhenu tọn go do, Jehovah na yí huhlọn aihọn tọn lẹ zan nado wà nuhe mẹde ma na ko kudlọ etọn pọ́n de—enẹ wẹ nado tọ́nawhàn titobasinanu sinsẹ̀n lalo tọn he to aigba ji lẹpo. (Osọ. 17:16-18) Kẹdẹdile vasudo Jelusalẹm tọn yin “nugbajẹmẹji vonọtaun de” do, mọ wẹ “nukunbibia daho” lọ po awhàn Amagẹdọni tọn he na bọdego po na yin nujijọ he “nkọ ma ko jọ pọ́n” de do niyẹn.—Ezek. 5:9; 7:5; Mat. 24:21.

¹⁰ Ohó Jiwheyẹwhe tọn dohia dọ suhugan hagbẹ sinsẹ̀n lalo tọn lẹ ma na dọ̀n to vasudo titobasinanu sinsẹ̀n tọn lẹ tọn he ja lọ whenu. Po obu po, yé mẹhe luntọ́n enẹlẹ na kọnawudopọ hẹ mẹdevo he wá sọn ninọmẹ voovo mẹ bo na to fihe yé na họ̀n whlá do dín lẹ. (Zek. 13:4-6; Osọ. 6:15-17) Ninọmẹ yetọn hẹn mí flin nuhe jọ do omẹ Jelusalẹm hohowhenu tọn he lùn vasudo tòdaho lọ tọn tọ́n bo wá vúnvún pé “do jẹhọn mẹ” lẹ go. Dile mí mọ do to  hukan 7tọ mẹ, mahopọnna dọ yé yin pipò dogbẹ̀ na ojlẹ de, Jehovah wá “yí ohí do dómọna yé.” (Ezek. 5:2) Mọdopolọ, bẹtẹn depope he mẹ mẹhe lùn vasudo sinsẹ̀n lalo tọn tọ́n lẹ họ̀n whlá do ma na basi hihọ́na yé sọn ohí Jehovah tọn nù. To Amagẹdọni, yé na yin hùhù to pọmẹ hẹ mẹhe pò bo taidi gbọgbọẹ lẹpo.—Ezek. 7:4; Mat. 25:33, 41, 46; Osọ. 19:15, 18.

11, 12. (a) Nawẹ nukunnumimọjẹ dọdai Ezekiẹli tọn mẹ gando osladido lẹdo Jelusalẹm go dona yinuwado nukun he mí nọ yí do pọ́n lizọnyizọn mítọn to egbehe ji gbọn? (b) Diọdo tẹlẹ wẹ sọgan wá aimẹ gando azọ́n yẹwhehodidọ tọn mítọn po owẹ̀n he lá mí te po go?

¹¹ Nawẹ nukunnumọjẹnumẹ mítọn gando dọdai ehe go dona yinuwado nukun he mí nọ yí do pọ́n lizọnyizọn mítọn po niyaniya-yinyin etọn po ji gbọn? E hẹn ẹn họnwun na mí dọ mí dona wà nuhe go mí pé lẹpo to egbehe nado gọalọna mẹlẹ nado lẹzun devizọnwatọ Jehovah tọn. Etẹwutu? Ojlẹ gli de wẹ pò nado “hẹn gbẹtọ lẹ sọn akọta lẹpo mẹ zun devi lẹ.” (Mat. 28:19, 20; Ezek. 33:14-16) Whenue “opò lọ” (huhlọn aihọn tọn lẹ) na bẹ awhàn-tọ́nmẹ etọn sọta sinsẹ̀n lẹ jẹeji, mí ma nasọ lá owẹ̀n whlẹngán tọn de ba. (Ezek. 7:10) Na nuhe dù wẹndagbe lilá, mí na lẹzun “unbọpẹnnọ,” kẹdẹdile Ezekiẹli lẹzun unbọpẹnnọ, kavi doalọtena owẹ̀n etọn lẹ lilá na ojlẹ de to lizọnyizọn etọn whenu do. (Ezek. 3:26, 27; 33:21, 22) Nugbo wẹ dọ to vasudo sinsẹ̀n lalo tọn godo, gbẹtọ lẹ na to dindin vẹkuvẹku “nado mọ numimọ sọn yẹwhegán de dè” to linlẹn de mẹ, amọ́ anademẹ gbẹwhlẹngán tọn depope ma na yin nina yé. (Ezek. 7:26) Whenu na ko fẹ́ nado mọ anademẹ mọnkọ yí bo lẹzun devi Klisti tọn.

¹² Etomọṣo, azọ́n yẹwhehodidọ tọn mítọn ma na doalọte. Etẹwutu? To nukunbibia daho lọ whenu, mí sọgan jẹ owẹ̀n whẹdida tọn he na taidi azọ̀nylankan kẹ́nsu tọn de lá ji. Owẹ̀n enẹ na dohia hezeheze dọ opodo aihọn ylankan ehe tọn ko wá gbẹtọvi lẹ ji.—Osọ. 16:21.

13. Naegbọn Jehovah do dọna Ezekiẹli dọ ni mlọnai do adà amiyọn tọn etọn ji podọ to enẹgodo do adà adusi tọn etọn ji?

¹³ Gbọnvona dọ Ezekiẹli dọ dọdai gando lehe Jelusalẹm na yin vivasudo do go, e sọ basi wadohia gando whenue enẹ na jọ go. Jehovah dọna Ezekiẹli dọ ni mlọnai do adà amiyọn tọn etọn ji na azán 390 podọ do adà adusi tọn ji na azán 40. Azán dopodopo nọtena owhe dopo. (Hia Ezekiẹli 4:4-6; Sọh. 14:34) Wadohia enẹ he Ezekiẹli na ko nọ basi na ojlẹ de poun to azán dopodopo ji gọalọ nado yọ́n owhe he mẹ Jelusalẹm na yin vivasudo te pẹẹ. E họnwun dọ nuṣiwa Islaeli tọn he nọ aimẹ na owhe 390 lọ bẹjẹeji to 997 J.W.M., yèdọ owhe he mẹ ahọluduta whẹndo 12 tọn lọ yin mimá do awe te. (1 Ahọ. 12:12-20) Ylando Juda tọn he nọ aimẹ na owhe 40 lọ na ko bẹjẹeji to 647 J.W.M., yèdọ owhe he mẹ Jelemia yin dide taidi yẹwhegán nado na avase ahọluduta Juda tọn madoadúdẹji gando vasudo etọn he to nukọn ja lọ go. (Jel. 1:1, 2, 17-19; 19:3, 4) Gbọnmọ dali, ojlẹ awe lọ lẹpo na wá vivọnu to 607 J.W.M., yèdọ  owhe he mẹ Jelusalẹm jai bo yin vivasudo te pẹẹ, kẹdẹdile Jehovah ko dọ dọdai etọn do. *

14. (a) Nawẹ Ezekiẹli dohia dọ emi dejido gànmẹ ji ninọ Jehovah tọn go gbọn? (b) Etẹlẹ wẹ na jọ jẹnukọnna vasudo Jelusalẹm tọn?

¹⁴ To whenue e yin didọna Ezekiẹli dọ ni dọ dọdai azán 390 tọn po azán 40 tọn lọ po, e sọgan nọma ko yọ́n owhe he mẹ opodo na wá Jelusalẹm ji te taun. Etomọṣo, to owhe he jẹnukọnna vasudo tòdaho lọ tọn lẹ mẹ, e na avase Juvi lẹ pludopludo dọ whẹdida Jehovah tọn to unklẹn. E lá dọ: “Opodo ko wá ji we todin.” (Hia Ezekiẹli 7:3, 5-10.) Ezekiẹli ma tindo ayihaawe depope gando gànmẹ ji ninọ Jehovah tọn go. (Isa. 46:10) Yẹwhegán lọ sọ dọ dọdai gando nujijọ he na jẹnukọnna vasudo Jelusalẹm tọn lẹ go dọmọ: “Nugbajẹmẹji na wá . . . debọdo-dego.” Nujijọ enẹlẹ wẹ na wá dekọtọn do bẹwlu pete mẹ to omẹ akọta lọ tọn lẹ, nukọntọ sinsẹ̀n tọn lẹ po gandutọ lẹ po ṣẹnṣẹn.—Ezek. 7:11-13, 25-27.

15. Adà dọdai Ezekiẹli tọn tẹlẹ wẹ jẹ hẹndi mọ ji bẹsọn 609 J.W.M.?

¹⁵ Owhe vude to whenue Ezekiẹli ko lá aijijẹ Jelusalẹm tọn godo, dọdai etọn jẹ hẹndi mọ ji. To 609 J.W.M., Ezekiẹli sè dọ kẹntọ lẹ tọ́nawhàn Jelusalẹm. To ojlẹ enẹ mẹ, opẹ̀n yin kúnkún nado ylọ mẹhe to tòdaho lọ mẹ lẹ pli nado wá yiavùnlọ na tòdaho yetọn, ṣigba dile Ezekiẹli ko dọ dọdai etọn do, “mẹdepope ma jei awhàn.” (Ezek. 7:14) Mẹhe to Jelusalẹm lẹ ma wá alọgọ na tòdaho yetọn nado funawhàn sọta mẹgbeyantọ Babilọninu lẹ. Ju delẹ sọgan ko lẹndọ Jehovah na whlẹn yé. E ko wàmọ wayi to whenue Asilianu lẹ sìn adán nado hò Jelusalẹm yí bọ angẹli Jehovah tọn dopo và suhugan awhànpa yetọn tọn sudo. (2 Ahọ. 19:32) Ṣigba, angẹli depope ma wá alọgọ na yé to ojlẹ ehe mẹ. E ma dẹn bọ tòdaho he yè dosla lẹdo lọ wá taidi “nudàzẹ́n” he to “adò ji” de, bọ tòmẹnu etọn lẹ wá yin ginglọn do e mẹ taidi “olàn he yè já lẹ.” (Ezek. 24:1-10) To whenue Jelusalẹm ko nọ ninọmẹ ylankan osladido tọn mẹ na osun 18 godo, tòdaho lọ wá yin vivasudo.

16. Nawẹ mí sọgan dohia to egbehe dọ mí dejido gànmẹ ji ninọ Jehovah tọn go gbọn?

¹⁶ Etẹwẹ mí sọgan plọn sọn adà dọdai Ezekiẹli tọn ehe mẹ? Be e gando owẹ̀n he lá mí te po aliho he mẹ mẹhe mí nọ dọyẹwheho na lẹ nọ yinuwa te po go wẹ ya? Jehovah ko de ojlẹ he mẹ vasudo sinsẹ̀n lalo tọn he to dindọnsẹpọ lọ na wá te—podọ whladopo dogọ gànmẹ ji ninọ etọn ma na gblá. (2 Pita 3:9, 10; Osọ. 7:1-3) Mí ma yọ́n azán he gbè nujijọ enẹ na wá aimẹ te taun. Amọ́, kẹdẹdi Ezekiẹli, mí zindonukọn nado to azọ́n he Jehovah zọ́n mí lọ wà, enẹ wẹ nado na avase gbẹtọ lẹ pludopludo dọ: “Opodo ko wá [mì ji] todin.” Naegbọn mí dona to owẹ̀n enẹ lá pludopludo? Na whẹwhinwhẹ́n dopolọ he wutu Ezekiẹli do wàmọ wutu wẹ. * Suhugan mẹhe e lá dọdai Jiwheyẹwhe tọn gando aijijẹ Jelusalẹm tọn go na lẹ tọn ma yí i sè. (Ezek. 12:27, 28) Ṣigba to godo mẹ, delẹ to Juvi  he to kanlinmọgbenu to Babilọni lẹ mẹ wá do ninọmẹ ahun mẹ tọn dagbe hia, podọ yewlẹ wá lẹkọyi otò yetọn mẹ. (Isa. 49:8) Mọdopolọ, to egbehe mẹsusu ma nọ yise dọ aihọn ehe sọgan wá opodo to gbèdopo. (2 Pita 3:3, 4) Etomọṣo, dile e na dẹnsọ bọ ojlẹ he Jiwheyẹwhe de na gbẹtọvi lẹ nado kẹalọyi owẹ̀n etọn na pò to ote, mí jlo na gọalọna ahunjijlọnọ lẹ nado mọ aliho he nọ planmẹ yì ogbẹ̀ mẹ lọ.—Mat. 7:13, 14; 2 Kọl. 6:2.

17. Ninọmẹ po nujijọ tẹlẹ po wẹ mí na mọ to nukunbibia daho he ja lọ whenu?

¹⁷ Dọdai Ezekiẹli tọn sọ flinnu mí dọ whenue mẹgbeyinyan he to unklẹn sọta titobasinanu sinsẹ̀n tọn lẹ na wá aimẹ, ṣọṣi-yitọ lẹ ma na yì “awhàn” nado yiavùnlọna sinsẹ̀n yetọn. Kakatimọ, whenue yé na jẹ ayidego ji dọ mẹde ma siọ awhá he do yé te dọ, “Oklunọ, Oklunọ,” “alọ yetọn lẹpo na kuyẹ̀,” bọ yé nasọ “to sijọsijọ ji.” (Ezek. 7:3, 14, 17, 18; Mat. 7:21-23) Nudevo tẹwẹ yé nasọ wà? (Hia Ezekiẹli 7:19-21.) Jehovah dọmọ: “Yé na ze fataka yetọn dlan tòhomẹ-liho lẹ ji.” Hodidọ he gando tòmẹnu Jelusalẹm hohowhenu tọn lẹ go enẹ sọ  do nuhe na jọ to nukunbibia daho lọ whenu hia hezeheze. To ojlẹ enẹ mẹ, mẹlẹ na wá mọdọ akuẹ ma gán whlẹn yé sọn nugbajẹmẹji he ja lọ mẹ.

18. Etẹwẹ mí gán plọn sọn dọdai Ezekiẹli tọn mẹ gando nuhe dona tin to otẹn tintan mẹ na mí lẹ go?

¹⁸ Be a doayi nude go he mí sọgan plọn sọn adà dọdai Ezekiẹli tọn ehe mẹ ya? Mí gán plọn nude gando nuhe jẹ lẹ zizedo otẹn tintan mẹ go. Lẹnnupọndo ehe ji: Kiki whenue omẹ Jelusalẹm tọn lẹ wá mọdọ opodo tòdaho yetọn po ogbẹ̀ yetọn tọn po ko wá yé ji bọ nutindo agbasa tọn yetọn lẹ ma gán whlẹn yé godo wẹ yé wá diọ nuhe to otẹn tintan mẹ na yé lẹ petepete. Yé bẹ nutindo yetọn lẹ dlan bo jẹ dindin ji “nado mọ numimọ sọn yẹwhegán de dè”—amọ́ whenu ko fẹ́ do yé. (Ezek. 7:26) To vogbingbọn mẹ, míwlẹ mọnukunnujẹemẹ hezeheze dọ opodo aihọn ylankan ehe tọn ko wá mí ji. Enẹwutu, yise mítọn to opagbe Jiwheyẹwhe tọn lẹ mẹ ko whàn mí nado ze nuhe jẹ lẹ do otẹn tintan mẹ to gbẹzan mítọn mẹ. Taidi kọdetọn de, mí nọ hẹn alọnu ján to afọdidona adọkunnu gbigbọmẹ tọn lẹ mẹ, ehe nọ nọ̀ aimẹ dẹn bo ma na yin bibẹ dlan “tòhomẹ-liho lẹ ji” pọ́n gbede.—Hia Matiu 6:19-21, 24.

19. Nawẹ nulila dọdai tọn Ezekiẹli tọn lẹ yọ́n-na-yizan na mí to egbehe gbọn?

¹⁹ To bladopọ mẹ, aliho tẹlẹ mẹ wẹ dọdai he Ezekiẹli dọ gando aijijẹ Jelusalẹm tọn go lẹ yọ́n-na-yizan na mí te to egbehe? Yé nọ hẹn mí flindọ ojlẹ gli de wẹ pò nado gọalọna mẹdevo lẹ nado wá lẹzun devizọnwatọ Jiwheyẹwhe tọn. Enẹwutu, mí nọ wazọ́n mẹhẹnzun devi tọn mítọn po linlẹn niyaniya-yinyin tọn po. Mí nọ jaya tlala eyin ahunjijlọnọ lẹ jẹ sinsẹ̀n basi hlan Otọ́ mítọn, Jehovah ji. Ṣigba, etlẹ yin na mẹhe ma ze afọdide enẹlẹ, mí nọ zindonukọn nado to avase na dile Ezekiẹli na mẹhe nọgbẹ̀ to ojlẹ etọn mẹ lẹ do dọmọ: “Opodo ko wá ji we todin.” (Ezek. 3:19, 21; 7:3) To ojlẹ dopolọ mẹ, gbemima mítọn wẹ nado hẹn jidide mítọn to Jehovah mẹ go bo dike sinsẹ̀n-bibasi wiwe-ṣeke etọn ni tin to otẹn tintan mẹ to gbẹzan mítọn mẹ zọnmii.—Salm. 52:7, 8; Howh. 11:28; Mat. 6:33.