1, 2. (a) Ania dagiti karkarna a tigtignay nga impakita ni Ezekiel? (Kitaen ti ladawan iti rugi ti kapitulo.) (b) Ania ti impakpakauna dagiti inaramidna?

TI DAMAG maipapan iti karkarna a tigtignay ni propeta Ezekiel ket nagbiit a nagwaras kadagiti naipanaw a Judio nga agnanaed idiay Babilonia. Makalawas a nakatugaw a nakamulengleng ken di agsasao, ngem pagammuan ta bigla a timmakder sa nagpupok iti balayna. Bayat a kitkitaen dagiti masmasdaaw a kaarrubana, rimmuar, nangpidut iti ladrilio, inkabilna iti sangona, sana drinowingan. Kalpasanna, di nagun-uni a nangaramid iti bassit nga alad.​—Ezek. 3:10, 11, 15, 24-26; 4:1, 2.

² Pinampanunot la ketdi dagiti umar-aribungbong, ‘Apay a kasta ti ar-aramidenna?’ Idi laeng agangay a naan-anay a naawatan dagiti naipanaw a Judio a ti karkarna a tigtignay ni propeta Ezekiel ket pakpakauna ti um-umay a nakabutbuteng a pasamak a mangipakita iti nalinteg a pungtot ni Jehova a Dios. Ania a pasamak? Kasano a naapektaran ti nagkauna a nasion ti Israel? Ania ti kaipapanan dayta kadagiti mangipapaay ita iti nadalus a panagdaydayaw?

3, 4. (a) Ania ti tallo a paset ti panangukom ti Dios nga impakita ni Ezekiel? (b) Kasano nga inyakto ni Ezekiel ti pannakapalawlaw ti Jerusalem?

³ Idi agarup 613 B.C.E., binilin ni Jehova ni Ezekiel nga ipakitana babaen ti pagilasinan ti tallo a paset ti um-umayen a panangukom ti Dios iti Jerusalem: ti pannakapalawlaw ti siudad, ti panagsagaba dagiti umili, ken ti pannakadadael ti siudad ken dagiti umilina. * Usigentayo ti ad-adu pay a detalye dagitoy a tallo a paset.

⁴ Ti pannakapalawlaw ti Jerusalem. Imbaga ni Jehova ken Ezekiel: “Mangalaka iti ladrilio ket ikabilmo iti sanguanam. . . . Iyaktom a palpalawlawam ti siudad.” (Basaen ti Ezekiel 4:1-3.) Ti siudad ti Jerusalem ti irepresentar ti ladrilio, ket ni Ezekiel ti irepresentar ti armada ti Babilonia nga inusar ni Jehova. Naibilin pay ken Ezekiel a mangaramid iti bassit nga alad, bunton a pagdalanan, ken pagtebbag, sa ikabilna dagita iti aglawlaw ti ladrilio. Dagita ti mangirepresentar kadagiti banag nga usaren dagiti kabusor a pakigubat iti Jerusalem inton palawlawan ken rautenda ti siudad. Tapno maipakita ti kasla landok a kinapigsa dagiti kalaban a soldado, masapul a mangikabil ni Ezekiel iti “daplat a paglutuan a landok” iti nagbaetan ti siudad ken isuna, sa ‘sumango’ iti siudad. Dagita nga aramidenna ti “pagilasinan iti sangakabbalayan ti Israel” a dandanin mapasamak ti dida pulos ninamnama. Usaren ni Jehova ti armada ti kalaban a mangpalawlaw iti Jerusalem, ti kangrunaan a siudad ti ili ti Dios ken ayan ti templona!

5. Iladawanmo no kasano nga impakita ni Ezekiel ti mapasamak kadagiti umili ti Jerusalem.

⁵ Ti panagsagaba dagiti umili ti Jerusalem. Imbilin ni Jehova ken Ezekiel: “Mangalaka iti trigo, sebada, patani, lentehas, mijo, ken espelta [maysa a kita ti trigo] . . . sa mangaramidka iti tinapay,” ken “timbangemto ti kanem, 20 a siklo iti kada aldaw.” Kalpasanna, inlawlawag ni Jehova: “Pasardengek ti suplay a taraon.” (Ezek. 4:9-16) Iti daytoy nga eksena, saanen a ti armada ti Babilonia ti irepresentar ni Ezekiel no di ket dagiti umili ti Jerusalem. Ipakpakauna ti inaramid ti propeta a gapu iti um-umay a pannakapalawlaw, bumassit ti suplay a taraon ti siudad. Iti dayta a tiempo, karkarna dagiti mapaglalaok a maaramid a tinapay, a mangipakita a kanen dagiti tattao ti uray ania a masarakanda. Kasano kakaro ti bisin? Kasla direkta nga ibagbaga ni Ezekiel kadagiti umili ti Jerusalem: “Kanento dagiti amma ti annakda, ket kanento dagiti annak ti ammada.” Adunto ngarud ti agsagaba gapu kadagiti “makapapatay a pana ti nakaro a bisin,” ken ‘in-inut a kumapsut’ dagiti tattao.​—Ezek. 4:17; 5:10, 16.

6. (a) Ania ti dua a naggiddan a papel nga inyakto ni Ezekiel? (b) Ania ti kaipapanan ti bilin ti Dios a “timbangem ken bingaybingayem dagiti buok”?

⁶ Ti pannakadadael ti Jerusalem ken dagiti umilina. Iti daytoy a paset ti padto nga inyakto ni Ezekiel, dua ti naggiddan a  papelna. Umuna, inyakto ni Ezekiel ti aramiden koma ni Jehova. Imbaga ni Jehova: “Mangalaka iti natadem nga espada nga usarem kas labaha ti mammukis.” (Basaen ti Ezekiel 5:1, 2.) Ti ima ni Ezekiel a nangiggem iti labaha inrepresentarna ti ima ni Jehova​—ti panangukomna—​babaen ti armada ti Babilonia. Maikadua, inyakto ni Ezekiel ti mapasaranto dagiti Judio. Imbaga ni Jehova: “Kiskisam ti ulo ken barbasmo.” Ti panangkiskisna iti ulona inrepresentarna no kasano a maraut ken mapapatay dagiti Judio. Ti bilin a “timbangem ken bingaybingayem dagiti buok” kaipapananna met a nairanta ken interamente a maitungpal ti panangukom ni Jehova iti Jerusalem ket awan ti maipuera.

7. Apay nga imbaga ni Jehova ken Ezekiel a bingayenna iti tallo a paset ti kiniskisna a buokna ken agduduma ti aramidenna kadagita?

 ⁷ Apay nga imbaga ni Jehova ken Ezekiel a bingayenna iti tallo a paset ti kiniskisna a buokna ken agduduma ti aramidenna kadagita? (Basaen ti Ezekiel 5:7-12.) Pinuoran ni Ezekiel ti maysa a paset “iti uneg ti siudad” tapno ipakitana kadagiti agbuybuya a matay iti siudad ti dadduma nga umili ti Jerusalem. Intagbat ni Ezekiel ti espada iti maysa a paset ti kiniskisna a buok “iti intero nga aglawlaw ti siudad” tapno ipakitana a ti dadduma nga umili ket matay iti ruar ti siudad. Inwarisna iti angin ti nabati a paset ti buok tapno ipakitana a dadduma pay nga umili ket maiwarawara kadagiti nasion, ngem ‘kamaten ida ti espada.’ Isu a sadinoman ti ayan dagiti makalasat, agpeggadto latta ti biagda.

8. (a) Ania a namnama ti linaon ti panangyakto ni Ezekiel? (b) Kasano a pimmayso ti padto maipapan iti “sumagmamano a buok”?

⁸ Ngem naglaon met iti namnama ti padto nga inyakto ni Ezekiel. Maipapan iti buok a kiniskis ni Ezekiel, imbaga ni Jehova kenkuana: “Mangalaka met iti sumagmamano a buok ket ikabilmo kadagiti karenken ti badom.” (Ezek. 5:3) Ipakita dayta a bilin a maisalakan ti sumagmamano a Judio a maiwarawara kadagiti nasion. Dadduma kadagita a “sumagmamano a buok” ket dagiti naipanaw nga agsubli idiay Jerusalem kalpasan a naadipenda iti Babilonia iti 70 a tawen. (Ezek. 6:8, 9; 11:17) Pimmayso kadi dayta? Wen. Adu a tawen kalpasan a nagpatingga ti pannakaadipenda idiay Babilonia, impadamag ni propeta Haggeo a talaga a nagsubli idiay Jerusalem ti dadduma kadagiti naiwarawara a Judio. Isuda dagiti ‘lallakay a nakakita iti dati a balay,’ kayatna a sawen, ti templo ni Solomon. (Esd. 3:12; Hag. 2:1-3) Sinigurado ni Jehova nga agtalinaed ti nadalus a panagdaydayaw kas inkarina. Mausig iti Kapitulo 9 daytoy a libro ti ad-adu pay a detalye maipapan iti dayta a pannakaisubli.​—Ezek. 11:17-20.

9, 10. Ania dagiti napateg a pasamak iti masanguanantayo nga ipalagip dagiti padto nga inyakto ni Ezekiel?

⁹ Ipalagip dagiti pasamak nga inyakto ni Ezekiel dagiti napateg a pasamak nga impadto ti Sao ti Dios para iti masanguanantayo.  Ania ti dadduma kadagita? Kas iti napasamak iti nagkauna a siudad ti Jerusalem, usarento ni Jehova dagiti puersa ti gobierno a mangaramid iti di ipagpagarup​—rautenda ti amin nga ulbod a narelihiosuan nga organisasion ditoy daga. (Apoc. 17:16-18) No kasano a “naidumduma a didigra” ti pannakadadael ti Jerusalem, ti “dakkel a rigat” ken ti gubatna nga Armagedon ket maysanto met a pasamak a “saan pay a napaspasamak.”​—Ezek. 5:9; 7:5; Mat. 24:21.

¹⁰ Ipasimudaag ti Sao ti Dios a makalasatto dagiti miembro ti ulbod a relihion iti um-umay a pannakadadael dagiti narelihiosuan nga organisasion. Gapu iti buteng, dagita a nakalasat ket makikaduanto iti amin a klase ti tattao nga agbirbirok iti paglemmenganda. (Zac. 13:4-6; Apoc. 6:15-17) Ti situasionda ti mangipalagip kadatayo iti napasamak kadagiti umili ti nagkauna a Jerusalem a nakalasat iti pannakadadaelna ken naiwaris “iti angin.” Kas naammuantayo iti  parapo 7, nupay nakalasatda idi a tiempo, nangasut ni Jehova iti “espada a mangkamat kadakuada.” (Ezek. 5:2) Kasta met, sadinoman a paglemmengan dagiti nakalasat iti pannakaraut ti relihion ket saan a makasalaknib kadakuada iti espada ni Jehova. Mapapatayda inton Armagedon, agraman ti amin a tattao nga arig kalding.​—Ezek. 7:4; Mat. 25:33, 41, 46; Apoc. 19:15, 18.

11, 12. (a) Gapu ta naawatantayon ti padto ni Ezekiel maipapan iti pannakapalawlaw ti Jerusalem, ania ti epektona iti panangmatmattayo iti ministeriotayo ita? (b) Ania a panagbalbaliw ti mabalin a mapasamakto iti trabahotayo a panangasaba ken iti mensahe nga ikaskasabatayo?

¹¹ Ania ti epekto ti pannakaawattayo iti daytoy a padto iti panangmatmattayo iti ministeriotayo ken iti kinaganatna? Ipaganetgetna a masapul nga ikagumaantayo ita a tulongan dagiti tattao nga agbalin nga adipen ni Jehova. Apay? Bassiten ti tiempo a nabati tapno ‘dagiti tattao iti amin a nasion ket agbalin nga adalan.’ (Mat. 28:19, 20; Ezek. 33:14-16) Inton mangrugin ti iraraut ti “sarukod” (dagiti puersa ti gobierno) kadagiti relihion, saanen a mensahe ti pannakaisalakan ti ikasabatayo. (Ezek. 7:10) No maipapan iti panangipakaammo iti naimbag a damag, ‘agumeltayto’ kas ken Ezekiel, wenno kas iti panagsardengna a mangipakaammo iti mensahena bayat ti maysa a paset ti ministeriona. (Ezek. 3:26, 27; 33:21, 22) Wen, kalpasan a madadael ti ulbod a relihion, desperadonto ti tattao nga arigna ‘agsapulda iti sirmata manipud iti propeta,’ ngem awanton ti maipakaammo nga instruksion a mangsalbar iti biagda. (Ezek. 7:26) Nagpatinggan ti panangipaay kadagita nga instruksion ken ti panagbalin nga adalan ni Kristo.

¹² Ngem saan nga agsardeng ti trabahotayo kas manangaskasaba. Apay? Bayat ti dakkel a rigat, mabalin a rugiantayton nga ipakaammo ti mensahe ti panangukom, a kasla mangdidigra nga uraro.  Dayta a mensahe ti nalawag a pagilasinan a dimtengen iti sangatauan ti panagpatingga ti dakes a lubong.​—Apoc. 16:21.

13. Apay nga imbaga ni Jehova ken Ezekiel nga agsikig iti kannigid sa iti kannawanna?

¹³ Saan la a no kasano a madadael ti Jerusalem ti impadto ni Ezekiel. Inyaktona met no kaano a mapasamak dayta. Imbaga ni Jehova kenkuana nga agsikig iti kannigid iti 390 nga aldaw sa iti kannawanna iti 40 nga aldaw. Maysa a tawen ti irepresentar ti tunggal aldaw. (Basaen ti Ezekiel 4:4-6; Num. 14:34) Dayta a panangyakto, nga inaramid ni Ezekiel iti sumagmamano a tiempo iti kada aldaw, ipakitana ti eksakto a tawen ti pannakadadael ti Jerusalem. Ti 390 a tawen a panagbasol ti Israel ket nalawag a nangrugi idi 997 B.C.E., ti tawen a nabingay ti 12 a tribu a pagarian ti Israel. (1 Ar. 12:12-20) Ti 40 a tawen a panagbasol ti Juda ket mabalin a nangrugi idi 647 B.C.E., a pannakadutok ni Jeremias kas propeta a mangusar iti direkta a sasao a mangpakdaar iti pagarian ti Juda  nga um-umayen ti pannakadadaelna. (Jer. 1:1, 2, 17-19; 19:3, 4) No kasta, agpada a nagpatingga dagita iti 607 B.C.E., ti eksakto a tawen a naparmek ken nadadael ti Jerusalem kas impadto ni Jehova. *

14. (a) Kasano nga impakita ni Ezekiel ti panagtalekna nga agtignay ni Jehova iti eksakto a tiempo? (b) Ania dagiti pasamak sakbay a nadadael ti Jerusalem?

¹⁴ Idi naawat ni Ezekiel ti padto maipapan iti 390 ken 40 nga aldaw, mabalin a dina pay ammo ti eksakto a tawen ti panagpatingga ti Jerusalem. Ngem kadagiti tawen sakbay a nadadael, naulit-ulit a pinakdaaranna dagiti Judio nga um-umayen ti panangukom ni Jehova. Impakaammona, “Itan ti panungpalam.” (Basaen ti Ezekiel 7:3, 5-10.) Saan a nagduadua ni Ezekiel nga agtignay ni Jehova iti eksakto a tiempo. (Isa. 46:10) Impadtona met dagiti pasamak sakbay a madadael ti Jerusalem: “Agsasarunonto ti didigra.” Nagresulta dagita iti pannakadadael ti sistema ti kagimongan, relihion, ken gobierno.​—Ezek. 7:11-13, 25-27.

15. Ania dagiti paset ti padto ni Ezekiel a nangrugi a natungpal manipud idi 609 B.C.E. ken agpatpatuloy?

¹⁵ Nangrugi a natungpal ti padto sumagmamano a tawen kalpasan nga impakaammo ni Ezekiel a madadael ti Jerusalem. Idi 609 B.C.E., naammuannan a nangrugin a maraut ti Jerusalem. Iti dayta a tiempo, nangngeg ti uni ti trumpeta a mangayab kadagiti umili tapno idepensada ti siudadda, ngem kas impadto ni Ezekiel, “awan ti napan iti gubat.” (Ezek. 7:14) Saan a nagkaykaysa dagiti umili ti Jerusalem a mangidepensa iti siudad tapno labananda dagiti rumaut a Babilonio. Nalabit impagarup ti dadduma a Judio nga arayaten ida ni Jehova. Kasta ngamin ti inaramidna idi impangta dagiti Asiriano a sakupenda ti Jerusalem ken pinatay ti anghel ni Jehova ti kaaduan kadagiti soldado ti armada. (2 Ar. 19:32) Ngem ita, awan ti anghel a timmulong. Di nagbayag, ti napalawlawan a siudad ket nagbalin a kasla “kaldero” a ‘naisaang’ ken dagiti umilina ket kasla “karne” iti uneg ti kaldero. (Ezek. 24:1-10) Kalpasan ti 18 a bulan a nasaem a panangraut, nadadael ti Jerusalem.

16. Kasano a maipakitatayo ita ti panagtalektayo nga agtignay ni Jehova iti eksakto a tiempo?

¹⁶ Ania ti masursurotayo iti daytoy a paset ti padto ni Ezekiel? Adda kadi koneksionna iti mensahe nga ikaskasabatayo ken iti reaksion dagiti kaskasabaantayo? Inkeddengen ni Jehova no kaano ti umas-asideg a pannakadadael ti ulbod a relihion​—ket agtignay manen iti eksakto a tiempo. (2 Ped. 3:9, 10; Apoc. 7:1-3) Ditay ammo ti eksakto a petsana. Ngem kas ken Ezekiel, itultuloytayo nga aramiden ti instruksion ni Jehova nga ulit-ulitentayo nga ipakdaar kadagiti tattao: “Itan ti panungpalam.” Apay a masapul nga ulit-ulitentayo dayta? Gapu iti isu met la a rason nga inaramid idi dayta ni Ezekiel. * Saan a namati ti kaaduan a nangibagaanna iti padto ti Dios a madadael ti Jerusalem. (Ezek.  12:27, 28) Ngem idi agangay, dadduma a Judio a naipan idiay Babilonia ti nangipakita a nalinteg ti panagpuspusoda, ket nagsublida iti dati nga ilida. (Isa. 49:8) Adu met ita ti saan a mamati nga agpatingga daytoy a lubong. (2 Ped. 3:3, 4) Nupay kasta, agingga nga adda pay tiempo nga awaten dagiti tattao ti mensahe ti Dios, kayattayo a tulongan dagiti interesado a mangbirok iti dalan nga agturong iti biag.​—Mat. 7:13, 14; 2 Cor. 6:2.

17. Ania dagiti kasasaad ken pasamak a makitatayonto bayat ti um-umay a dakkel a rigat?

¹⁷ Ipalagip met kadatayo ti padto ni Ezekiel nga inton maraut dagiti narelihiosuan nga organisasion, dagiti miembro dagiti relihion ket saanto a ‘mapan iti gubat’ tapno idepensada ti relihion. Imbes ketdi, “agkapuyto ti amin nga imada” ken “napalalo ti panagpigergerda” ta maamirisdan a di masungsungbatan ti panangipakaasida iti “Apo, Apo.” (Ezek. 7:3, 14, 17, 18; Mat. 7:21-23) Ania pay ti aramidenda? (Basaen ti Ezekiel 7:19-21.) Kuna ni Jehova: “Ipuruakdanto ti pirakda iti kalsada.” Dagita a sasao  maipapan kadagiti umili ti nagkauna a Jerusalem ket nalawag a mangiladawan met kadagiti mapasamak bayat ti dakkel a rigat. Maamiriston dagiti tattao a saan ida a maisalakan ti kuarta iti um-umayen a pannakadadael.

18. Ania ti masursurotayo iti padto ni Ezekiel maipapan iti panangaramid kadagiti prioridad?

¹⁸ Ania ti masursurotayo iti daytoy a paset ti padto ni Ezekiel? Isu ti kinapateg ti panangaramid kadagiti umiso a prioridad. Panunotem: Sa la binalbaliwan dagiti umili ti Jerusalem dagiti prioridadda kalpasan a naawatanda a dimtengen ti pannakadadael ti siudadda ken ti biagda, ken saan ida a maisalakan dagiti material a bambanag. Impuruakda dagiti sanikuada ket rinugianda ti ‘agsapul iti sirmata manipud iti propeta’—ngem naladaw unayen ti panagbalbaliwda. (Ezek. 7:26) Naidumatayo ta talaga nga ammotayon a dandanin ti panungpalan daytoy dakes a lubong. Adda pammatitayo kadagiti kari ti Dios isu a nangaramidtayon kadagiti umiso a prioridad iti biag. Kas resultana, aktibotayo nga agpabpabaknang iti naespirituan, nga agnanayon ti pategda ken dinto pulos maipuruak “iti kalsada.”​—Basaen ti Mateo 6:19-21, 24.

19. Ania ti epekto dagiti padto ni Ezekiel kadatayo ita?

¹⁹ Kas sumario, ania dagiti epekto kadatayo dagiti padto ni Ezekiel maipapan iti pannakadadael ti Jerusalem? Ipalagipda a bassiten ti nabati a tiempo a panangtulong iti sabsabali nga agbalin nga adipen ti Dios. Sigaganat ngarud a makiramantayo iti trabaho a panagaramid kadagiti adalan. Maragsakantay unay no dagiti interesado ket agdaydayawen iti Amatayo a ni Jehova. Ngem uray kadagiti saan pay a nangaramid iti dayta, itultuloytayo latta nga ibaga ti impakdaar ni Ezekiel kadagiti tattao idi panawenna: “Itan ti panungpalam.” (Ezek. 3:19, 21; 7:3) Determinadotayo met a kanayon nga agtalek ken Jehova ken pagbalinen a kapatgan iti biagtayo ti nadalus a panagdaydayaw kenkuana.​—Sal. 52:7, 8; Prov. 11:28; Mat. 6:33.