1, 2. (a) Antoy nidumaduman inkiwas nen Ezequiel? (Nengnengen so litrato ed gapo na kapitulo.) (b) Antoy ipapasakbay na saray ginawa to?

MAPLES ya kinmayat ed saray Judion inawit ed Babilonia so balita ya nidumadumay ikikiwas nen propeta Ezequiel. Sakey simba ya akayurong ya ameneng tan agmansasalita, insan biglan inmalagey tan nankulong ed abung to. Natan, legan ya akanengneng iray mankelaw ya kakaabay to, pinmaway ed abung so propeta, angalay laryo, inyan tod arapan to, tan walay inyukit ton drowing ed samay laryo. Insan ginapoan toy nanggawa na kunwarin padir ed satan tan agbalot nansalita.​—Eze. 3:10, 11, 15, 24-26; 4:1, 2.

² Seguradon dinmakel so ombabantay tan nayarin inisip da, ‘Antoy gagawaen to?’ Agtampol ya atalosan na saraman a Judio ya samay nidumaduman gagawaen nen Ezequiel et pasakbay ya walay makapataktakot ya nagawa, ya mangipatnag ed matunong ya sanok nen Jehova. Anto itan ya nagawa? Antoy epekto na satan ed nasyon na Israel nensaman? Akin et importante itan ed saray tuan mandadayew ed Dios natan?

3, 4. (a) Anto so taloran aspekto na panangukom na Dios ya inyakto nen Ezequiel? (b) Panon ya inyakto nen Ezequiel so pansakop ed Jerusalem?

³ Nen manga 613 B.C.E., ingganggan nen Jehova si Ezequiel ya  iyakto so taloran aspekto na onsabin panangukom na Dios ed Jerusalem. Saratan et: say pansakop ed syudad, say panirap na saray manaayam ditan, tan say kaderal na syudad tan saray totoo ditan. * Aralen tayo ya mas detalyado irayan taloran aspekto.

⁴ Say pansakop ed Jerusalem. Imbaga nen Jehova ed si Ezequiel: “Mangala kay sakey a laryo tan iyan mod arapan mo. . . . Iyaktom a singano sasakopen mo itan.” (Basaen so Ezequiel 4:1-3.) Irerepresenta na laryo so syudad na Jerusalem, si Ezequiel balet et irerepresenta toy armada na Babilonia ya usaren nen Jehova. Ingganggan met si Ezequiel ya manggawa na kunwarin padir, tambak a dalanen parad pangubkob, tan saray panagtebag na padir ya iyan tod paliber na laryo. Irerepresenta na saratan iray usaren na saray kalaban na Jerusalem no paliberan tan lusoben day syudad. Pian ipanengneng so singa balatyang ya kabiskeg na saray sundalo na kalaban, mangiyan si Ezequiel na “balatyang a kawali,” odino tirampiak ya balatyang, ed baetan to tan say syudad. Insan ‘iyarap toy lupa to’ ed syudad. Saratan ya gawaen to et onkanan “tanda ed sankaabungan na Israel” ya walay magano lan nagawa ya agda iilaloan. Usaren nen Jehova so armada na kalaban pian sakopen so Jerusalem, say manunan syudad na totoo to, say kawalaan na templo to!

5. Deskribien no panon ya inyakto nen Ezequiel so nagawa ed saray manaayam ed Jerusalem.

⁵ Say panirap na saray manaayam ed Jerusalem. Ingganggan nen Jehova si Ezequiel: “Mangala kay bukel na trigo, sebada, agayep, lentehas, milit tan espelta [sakey a klase na trigo] . . . tan gawam iratan a tinapay,” tan “simbangen mo so kanen mo, 20 siklo ed kada agew.” Insan imbaga nen Jehova so rason: “Paandien koy suplay na kakanen.” (Eze. 4:9-16) Diad sayan pangiyakto nen Ezequiel, agto la irepresenta so armada na Babilonia. Imbes, irepresenta to la iray manaayam ed Jerusalem. Saray gawaen na propeta et mangipasakbay ya no paliberan lay Jerusalem, ondaiset so suplay na kakanen ed syudad. Diad satan a panaon, nambabangil so panlalaoken da pian makagawa ray tinapay, kanian ipapanengneng na satan ya kanen na totoo no antoy naromog da. Panon kagrabe so nagawan eras? Oniay imbaga nen Ezequiel ya para ed saray manaayam ed Jerusalem: “Saray kaamaan ed limog mo et kanen da iray anak da, tan kanen na saray anak iray ama ra.” Diad satan, dakel a totoo so manirap lapud saray “pana na eras,” tan “nabulok ira.”​—Eze. 4:17; 5:10, 16.

6. (a) Anto so duaran bansag ya inrepresenta nen Ezequiel? (b) Anto so ipapanengneng na ganggan na Dios ya “simbangen tan apag-apagen so buek”?

⁶ Say kaderal na Jerusalem tan saray totoo ditan. Diad sayan parte na propesiya ya iyakto nen Ezequiel, duara so bansag ya irepresenta to. Unona, iyakto to no antoy gawaen nen Jehova. Imbaga nen Jehova: “Mangala kay makdem ya espada ya usaren mon singa labahas na barbero.” (Basaen so Ezequiel 5:1, 2.) Say lima nen Ezequiel ya amemben ed espada et mangirerepresenta ed lima  nen Jehova—say panangukom To—ya usaren Toy armada na Babilonia. Komadua, iyakto nen Ezequiel no antoy naeksperiensya na saray Judio. Imbaga nen Jehova: “Kiskisan moy ulom tan ahit moy balbas mo.” Say pankiskis nen Ezequiel na ulo to tan pan-ahit na balbas to et mangirerepresenta ed ilusob tan pamatey na armada na Babilonia ed saray Judio. Niarum ni, ipapanengneng na samay ganggan ya “simbangen tan apag-apagen so buek” ya say panangukom nen Jehova ed Jerusalem et aliwan palpalaran, noagta ginagala tan organisado.

7. Akin et imbaga nen Jehova ed si Ezequiel ya pankatloen to may buek ya kiniskis to tan balbas ya inahit to tan dumay gawaen to ed kada kakatlo?

 ⁷ Akin et imbaga nen Jehova ed si Ezequiel ya pankatloen to may buek ya kiniskis to tan balbas ya inahit to tan dumay gawaen to ed kada kakatlo? (Basaen so Ezequiel 5:7-12.) Pinoolan nen Ezequiel so sakey ya kakatlo diad “loob na syudad” pian ipanengneng ed saray ombabantay ya arum ed saray manaayam ed Jerusalem et ompatey ed syudad. Panamegley na espada, kinabil odino tinegteg nen Ezequiel “diad kaliberliber na syudad” so sananey a kakatlo pian ipanengneng ya saray arum et pateyen diad paway na syudad. Insibwag tod dagem so unor a kakatlo pian ipanengneng ya say arum ni et nitayak ed saray nasyon, balet walay “sakey ya espada a mangusil ed saratan.” Kanian anggan iner so panayaman na saray makaliktar, anggapoy kareenan da.

8. (a) Anton ilalo so kaibad propesiyan inyakto nen Ezequiel? (b) Panon ya tinmua so propesiya nipaakar ed “daiset a buek”?

⁸ Balet, say propesiyan inyakto nen Ezequiel et walay kaiba ton ilalo. Oniay imbaga nen Jehova ed si Ezequiel nipaakar ed buek tan balbas ya inekal to: “Mangala kay daiset . . . tan balkot mod saray tupi na kawes mo.” (Eze. 5:3) Ipapanengneng na sayan ganggan ya wala ray daiset ya makaliktar ed saramay Judion nitaytayak ed saray nasyon. Arum ed saratan ya “daiset a buek” et kaibad saramay inawit ed Babilonia ya ompawil ed Jerusalem kayari na 70 taon ya pakaaripen da. (Eze. 6:8, 9; 11:17) Kasin tinmua itan ya propesiya? On. Pigaran taon kayarin anampot so impakaaripen dad Babilonia, imbaga nen propetan Aggeo ya arum ed saramay nitaytayak ya Judio et talagan akapawil ed Jerusalem. Sikara iramay “mamasiken ya akanengneng ed samay datin abung,” samay templo nen Solomon. (Esd. 3:12; Ag. 2:1-3) Sineguro nen Jehova ya agnaandi so dugan panagdayew, a singa impromisa to. Wala ni ray kaaruman ya detalye nipaakar ed satan a kipawil ya aralen tayo diad Kapitulo 9 na sayan publikasyon.​—Eze. 11:17-20.

9, 10. Anto ran importantin nagawad arapen so ipapanonot ed sikatayo na saramay inyakto nen Ezequiel?

⁹ Ipapanonot ed sikatayo na saramay inyakto nen Ezequiel iray importantin nagawad arapen ya ipapasakbay na Salita na Dios. Antoy arum ed saratan? Singa agawa ed syudad na Jerusalem  nensaman, usaren nen Jehova iray manuley ed mundo pian gawaen so ag-iilaloan—atakien day amin ya palson relihyon ed dalin. (Apo. 17:16-18) No panon ya say impakaderal na Jerusalem et “sakey a nikaduman kadederal,” ontan met, say “baleg a kairapan” ya mansumpal ed guerra ed Armagedon et “agni agawa” ed anggan kapigan.​—Eze. 5:9; 7:5; Mat. 24:21.

¹⁰ Ipapaimano na Salita na Dios ya wala ray onsusuporta ed palson relihyon ya makaliktar ed onsabin kaderal na saratan ya relihyon. Natatakot ira kanian miulop irad nanduruman klase na totoo ya mananap na amotan. (Zac. 13:4-6; Apo. 6:15-17) Lapud sayan situasyon da, nayarin nanonotan tayo so agawad saray manaayam ed Jerusalem nensaman ya akaliktar ed inkaderal na syudad, insan singa ra ‘insibwag ed dagem.’ Naaralan tayod  parapo 7 ya anggano akaliktar ira, anguyos si Jehova na ‘sakey ya espada a mangusil ed sikara.’ (Eze. 5:2) Ontan met, anggan iner so amotan na saray makaliktar ed kaderal na relihyon, ag-ira makaliktar ed espada nen Jehova. Diad Armagedon, sikaray pateyen kaiba iray arum nin totoo ya tutukoyen na Biblia ya singa kanding.​—Eze. 7:4; Mat. 25:33, 41, 46; Apo. 19:15, 18.

11, 12. (a) Panon ya naapektoan so panmoria tayod ministeryo tayo natan lapud pakatalos tayo ed propesiya nen Ezequiel? (b) Antoy nayarin manguman ed panagpulong tan mensahe tayo?

¹¹ Panon ya naapektoan so panmoria tayod ministeryo lapud pakatalos tayo ed sayan propesiya? Idadanet na saya ya inkaganatan so ministeryo tayo kanian gawaen tayoy anggaay nayarian tayo ya tulongan iray totoo ya magmaliw a lingkor nen Jehova. Akin? Lapud daiset lay nakekeran panaon ya ‘ibangat iray totoo ed amin a nasyon pian magmaliw iran disipulo.’ (Mat. 28:19, 20; Eze. 33:14-16) No onggapo lan atakien na “baston” (saray manuley ed mundo) iray relihyon, agti la ipulong so mensahe na kilalaban. (Eze. 7:10) No nipaakar ed pangipulong na maong a balita, magmaliw tayon “emel,” a singa si Ezequiel ya walay panaon ya tinmundan angiyabawag na saray mensahe. (Eze. 3:26, 27; 33:21, 22) Tua, kayarin naderal so palson relihyon, desperado iray totoo ya singa da “anapen . . . so pasingawey na sakey a propeta,” balet anggapoy naawat dan instruksion no panon iran makaliktar. (Eze. 7:26) Asumpal la so panaon na pangawat ed ontan iran instruksion tan pagmaliw ya disipulo na Kristo.

¹² Balet, agni asumpal so kimey tayon manpulong. Akin ey? Legan na baleg a kairapan, ompan igapo tayo lan iyabawag so mensahe na panangukom ya singa uran a kristal ya mansalot ed totoo. Satan ya mensahe so malinew a mangipaamta ya manampot la iyan mauges a mundo.​—Apo. 16:21.

13. Akin ya imbaga nen Jehova ed si Ezequiel ya ondukol ya akariking ed kawigi to insan ed kawanan to?

¹³ Aglabat impasakbay nen Ezequiel no panon ya naderal so Jerusalem, inyakto to met no kapigan itan nagawa. Imbaga nen Jehova  ed si Ezequiel ya ondukol ya akariking ed kawigi to diad 390 agew tan ed kawanan to diad 40 agew. Kada agew et mangirepresenta ed sakey a taon. (Basaen so Ezequiel 4:4-6; Num. 14:34) Nayarin wala labat so panaon ed kada agew ya ginawa to itan. Satan ya impangiyakto nen Ezequiel et ipapanengneng toy eksakton taon na kaderal na Jerusalem. Say 390 a taon na impankasalanan na Israel et mapatnag ya ginmapo nen 997 B.C.E., say taon ya apaldua so 12 tribu a panarian. (1 Ara. 12:12-20) Say 40 taon ya impankasalanan na Juda et nayarin ginmapo nen 647 B.C.E., say taon ya nagmaliw a propeta si Jeremias pian diretsaan ya pasakbayan so panarian na Juda ya naderal itan. (Jer. 1:1, 2, 17-19; 19:3, 4) Kanian saratan ya panaon et parehon anampot ed 607 B.C.E., say eksakton taon ya aderal so Jerusalem, a singa impasakbay nen Jehova. *

14. (a) Panon ya impanengneng nen Ezequiel so panagmatalek to ya sumpalen nen Jehova ed eksakton panaon iray imbaga To? (b) Anto ray nagawa antis ya naderal so Jerusalem?

¹⁴ Nen naawat nen Ezequiel so propesiya nipaakar ed 390 agew tan 40 agew, nayarin agto ni alinewan no kapigan so eksakton  taon na kaderal na Jerusalem. Balet, pigaran taon labat antis ya naderal itan, aminpiga ton pinasakbayan iray Judio ya onsabi lay panangukom nen Jehova. “Sinmabi lad sika so anggaan,” so inyabawag to. (Basaen so Ezequiel 7:3, 5-10.) Segurado si Ezequiel ya sumpalen itan nen Jehova ed eksakton panaon. (Isa. 46:10) Impasakbay met na propeta no anto ray nagawa antis ya naderal so Jerusalem: “Mantutumbokan so onsabin kadederal.” Lapud satan et naderal iray institusyon na relihyon, gobierno, tan arum nin organisasyon ya ginaway totoo.​—Eze. 7:11-13, 25-27.

15. Anto ran kabiangan na propesiya nen Ezequiel so agawa manlapu la nen 609 B.C.E.?

¹⁵ Pigaran taon kayarin inyabawag nen Ezequiel ya naderal so Jerusalem, ginmapo lan nagawa so propesiya. Nen 609 B.C.E., naamtaan nen Ezequiel ya ginmapo lay inlusob na Babilonia ed Jerusalem. Diad panaon to, no narengel na totoo so tanol na trumpeta, mantitipon ira pian idepensa so syudad da. Balet, singa impropesiya nen Ezequiel, ‘anggapoy linma ed guerra.’ (Eze. 7:14) Agnantitipon iray manaayam ed Jerusalem pian idepensa so syudad tan labanan iray onlulusob ya armada na Babilonia. Nayarin inisip na arum ya Judio ya tulongan ira nen Jehova, ta ontan so ginawa to nen linmusob iray Asiryano pian sakopen so Jerusalem. Diad saman et pinatey na anghel to so dakdakel ya sundalo na Asirya. (2 Ara. 19:32) Balet natan, anggapoy anghel ya tinmulong. Ag-abayag, say apaliberan ya syudad et nagmaliw a singa “kaldero” ya intapew “ed apoy,” tan akulong iray manaayam ditan ya singa ra “ategteg a karne” ya walad loob na samay kaldero. (Eze. 24:1-10) Kayari na 18 bulan ya impanirap da tan impansakop ed sikara, aderal so Jerusalem.

16. Panon tayon nipanengneng natan so panagmatalek tayo ya sumpalen nen Jehova ed eksakton panaon iray imbaga to?

¹⁶ Antoy naaralan tayod sayan kabiangan na propesiya nen Ezequiel? Kasin walay koneksion to ed mensahe na ministeryo tayo tan say reaksion na saray pupulongan tayo? Inggeter la nen Jehova no kapigan nagawa so magano lan kaderal na palson relihyon—tan seguradon sumpalen to lamet itan ed eksakton panaon. (2 Ped. 3:9, 10; Apo. 7:1-3) Agtayo amta no kapigan so eksakton petsa. Balet singa si Ezequiel, tuloytuloy tayon uunoren so ganggan nen Jehova ya nepeg tayon maminpigapigan pasakbayan iray totoo, ya ibaga so mensahen: “Sinmabi lad sika so anggaan.” Akin et kaukolan ya maminpiga tayon ibaga itan? Pareho so rason tayo ed si Ezequiel. * Maslak ed saray totoon angibagaan toy propesiya na Dios nipaakar ed pakaderal na Jerusalem et ag-anisia ya nagawa itan. (Eze. 12:27, 28) Balet sinmabi panaon, wala ray pigaran Judion wadman ed Babilonia ya angipanengneng na dugan kipapasen na puso, tan pinmawil ira ed dalin da. (Isa. 49:8) Ontan met  natan, agpanisiaan na dakel a totoo ya manampot iyan mundo. (2 Ped. 3:3, 4) Balet, anggad wala ni panaon pian awaten na totoo so mensahe na Dios, labay tayon tulongan iray mauyamon totoo ya naromog day dalan ya ompugta ed bilay.​—Mat. 7:13, 14; 2 Cor. 6:2.

17. Anto ray naimatonan tayo no onsabi lay baleg a kairapan?

¹⁷ Ipapanonot met ed sikatayo na propesiya nen Ezequiel ya no nagawa lay pangataki ed saray organisasyon na relihyon, ‘anggapoy onla ed guerra’ ya membro na saray simbaan pian idepensa so relihyon da. Imbes, no namoria dan say pangibabaga dan “Katawan, Katawan” pian onkerew na tulong et agnaeebatan, “onlaylay iray lima ra” tan ‘onggiwgiw’ ira. (Eze. 7:3, 14, 17, 18; Mat. 7:21-23) Anto ni gawaen da? (Basaen so Ezequiel 7:19-21.) Imbaga nen Jehova: “Ibantak dad karsada so pilak da.” Satan ya agawa ed Jerusalem nensaman et malinew ya mangipanengneng no antoy nagawa diad baleg a kairapan. Diad satan, namoria na saray totoo ya ag-ira nisalba na kuarta ra ed onsasabin kadederal.

18. Antoy naaralan tayo ed propesiya nen Ezequiel nipaakar ed dugan prayuridad?

 ¹⁸ Kasin naimanom no antoy naaralan tayo ed sayan parte na propesiya nen Ezequiel? Kaukolan ya duga iray prayuridad tayo. Imanoen iya: Kayarin amoria na saray manaayam ed Jerusalem ya sinmabi lay anggaan na syudad tan say bilay da, tan ag-ira nisalba na saray kayamanan da, insan ira labat nanggawa na baleg iran pananguman ed no anto ray prayuridad da. Imbantak da ray kayarian da insan da ‘aanapen so pasingawey na sakey a propeta,’ balet atrasado lan maong so impanguman da. (Eze. 7:26) Diad sikatayo balet, amta tayo ya onsabi la so anggaan na sayan mauges a mundo. Kanian, say pananisia tayod saray promisa na Dios so amakiwas ed sikatayon manggawa na duga iran prayuridad ed bilay. Lapud satan, iyuuna tayo ray espiritual a bengatla ta ag-iratan naderal tan agbalot ‘ibantak ed karsada.’—Basaen so Mateo 6:19-21, 24.

19. Anto ray epektod sikatayo natan na saray propesiya nen Ezequiel?

¹⁹ Bilang sumaryo, anto ray pigaran epektod sikatayo natan na saray propesiya nen Ezequiel nipaakar ed kaderal na Jerusalem? Ipapanonot na satan ed sikatayo ya antiktikey lay nakekeran panaon pian tulongan so arum ya magmaliw a lingkor na Dios. Kanian, apuraan so kimey tayon bangatan iray totoo pian magmaliw iran disipulo. Malikeliket tayo no wala ray mauyamon totoo ya onggapon mandayew ed Ama tayon si Jehova. Balet singa ginawa nen Ezequiel nensaman, anggan saramay ag-onkiwas et siansia nin papasakbayan tayo, ya ibaga so mensahen: “Sinmabi lad sika so anggaan.” (Eze. 3:19, 21; 7:3) Ontan met, determinado tayo ya tuloytuloy a manmatalek ed si Jehova tan iyuna ed bilay tayo so dugan panagdayew.​—Sal. 52:7, 8; Pro. 11:28; Mat. 6:33.