1-3. ¿Kunatsa Ezequielajj wal llakisïna? ¿Kunsa Diosan amuytʼayatäsin Ezequielajj qellqäna?

 EZEQUIELAJJ sojjta maranakaw yaqha markankjjäna. * Naskäna uka markat walja patak kilometronak jayankänwa. Judá markan reyinakapajj jan wal apnaqapjjatap amtasajj wal llakisïna. Kunjamsa walja reyinakajj apnaqawayapjje uksa uñjarakïnwa.

² Diosar taqe chuyma serviri Josías reyejj apnaqkäna ukhaw Ezequielajj nasïna. Josiasajj Judá markat idolonak qʼal tukjañatakisa Jehová Diosaruk sum adorasjjañapatakisa mä campaña lurkäna uk yatisajja, Ezequielajj wal kusispachäna (2 Crón. 34:1-8). Ukampis kuntï Josiasajj lurkäna ukajj jukʼa tiempotakikïnwa. ¿Kunatsa ukham sistanjja? Jupa qhepat apnaqeri reyinakajj idolonakaruw adorapjjäna. Uka jan wali reyinakajj apnaqapkäna uka tiemponjja, israelitanakajj jan walinakwa lurjjapjjäna, janirakiw Jehová Diosarus sum sirvjjapjjänti. Ukhamajj ¿Israel markan janit mä suytʼäwejj utj-jjäna? Janiw ukhamäkänti, mä suma suytʼäwiw utjäna.

³ Jehová Diosajj jupar taqe chuyma serviri Ezequiel profetarojja, Mesiasat parlir mä profecía qellqañapatakiw yanaptʼäna. Uka  Mesiasaw Reyïñapäna, Awatirirakiñapäna, jupaw Jehová Dios saparuk adorasiñap qʼomachañapäna, Diosan ovejanakaparus wali munasiñamp uñjañaparakïna. Ezequielajj ukhapuniw nayrïr kutin Mesiasat parlir profecianak qellqäna. Uka profecianakajj jutïr urun wiñayataki jakañ suytʼañasatakiw yanaptʼistu, ukatwa jiwasajj ukanak wali amuyump yatjjatañasa. Aka yatichäwinjja, Mesías toqet parliri Ezequielan pusi profecianakapatwa yatjjataskañäni.

4. 1) ¿Kuna profecía arunaksa Ezequielajj arsüna? 2) Uka profecía janïr arskasajja, ¿kunsa Ezequielajj sañapäna?

⁴ Khä 612 antes de Cristo (a.C.) mara jakʼanakanjja, Jehová Diosajj mayampiw Ezequielar parläna, ukatjja Mesiasan gobiernopajj kawkjakamänisa, kunatsa gobiernopar confiyañajj wakisi ukwa jupajj mä profecian arsüna. Uka profecía yaqha markar apatanakar janïr yatiykipanjja, chʼama amuykaña mä profecía jupanakar sañapwa Diosajj Ezequielar mayïna. Uka profeciajja, Judá markan gobernantenakapajj yaqha diosanakar adorapjjatapa, cheqapar apnaqer mä gobernante munasitapwa qhanstayäna, ukajj Mesiasänwa (Ezeq. 17:1, 2).

5. Chʼama amuykañ profecía mä qhawqha arunakamp qhanañchtʼam.

⁵ Ezequiel 17:3-10 liytʼañataki. Amuyañajj chʼamäki uka profeciajj akham sasispawa: Mä ‘jachʼa pakaw’ cedro qoqan ‘altonkkäna uka jachʼa ramapa’ apaqäna, ukatjja ‘negociantenakan markaparuw uk ayruntäna’. Ukjjarusti ‘oraqet jatha aptasaw suma achoqer oraqer uchantäna’, ‘walja umanak jakʼaru’. Uka jathajj alsunisin uva aliruw tuküna, ramanakapajj manqharuw jilarakïna. Ukjjarusti yaqha ‘jachʼa pakaw’ uñstäna, uka uva alin saphinakapajj uka paka toqer saratatañatakiw wal chʼamachasïna, ukhamat walja umanakani yaqha lugarar ayruntatäñapataki. Kuntï uka uva alejj lurkäna ukajj Jehová Diosatakejj janiw walïkänti, ukatwa saphinakapajj jikʼsutäniwa, qʼal wañsjjarakini sasin säna.

6. ¿Chʼama amuykañ profeciajj kamsañsa munäna?

⁶ ¿Chʼama amuykañ profeciajj kamsañsa munäna? (Ezequiel 17:11-15 liytʼañataki). 617 a.C. maranjja, Jerusalenajj Babilonia markan Nabucodonosor (nayrïr ‘jachʼa paka’) reyipampi qʼala muyuntatänwa. Uka reyejj tronotwa Joaquín (‘altonkkäna uka jachʼa rama’) reyirojj apaqäna, ukatsti Babiloniaruw (‘negociantenakan markapa’) aparakïna. Nabucodonosor reyejj Sedequiasaruw (‘oraqenkir jatha’, mä arunjja David reyit jutiri) Jerusalenan reyipäñapatak uttʼayäna. Sedequías reyejj Nabucodonosor reyirukiw taqe kunan istʼäjja sasaw Diosan sutipjjar juramentompi arsüna (2 Crón. 36:13). Ukampis janiw uka juramentop phoqkänti, jan ukasti Babilonia contraw saytʼäna, Egipto markan faraonaparuw (payïr jachʼa paka) guerran nuwasiñatak yanaptʼa mayirakïna.  Ukham luratapajj inamayakïnwa. Juramentop jan phoqatapatwa Jehová Diosajj Sedequías reyir juchañchäna (Ezeq. 17:16-21). Qhepatjja Sedequiasajj janiw reyëjjänti, jiwañapkamaw Babilonia markan preso katuntatarakïna (Jer. 52:6-11).

7. ¿Kunsa uka chʼama amuykañ profeciat yateqsna?

⁷ ¿Chʼama amuykañ uka profeciajj kunsa yatichistu? 1) Diosan servirinakapajja, kuntï arsktan uk phoqañasawa. Jesusajj akham sänwa: “‘Jïsa’ sapjjsta ukhajja phoqapjjam, ‘janiwa’ sapjjsta ukhasti janiraki” sasa (Mat. 5:37). ‘Kunatï cheqäki ukakwa säjja’ sasin Dios nayraqatan mä juramento arsstan ukhajja, phoqañasapuniwa. 2) Khitirus confiytan uk sum amuyasiñasawa. Bibliajj akham  ewjjtʼistu: ‘Pʼeqtʼirinakarojj jan confiyapjjamti, janirak khiti jaqenakarus confiyapjjamti, kuna laykutejj janiw jupanakajj khitirus salvapkaspati’ sasa (Sal. 146:3).

8-10. ¿Kuna profecía arunaksa Jehová Diosajj Mesías Reyit arsüna? ¿Kunjamsa uka profeciajj phoqasïna? (“Mesiasat parlir profecía: wali suma cedro qoqa” sat recuadro uñjjattʼäta).

⁸ Ukampis wali confiykañ mä reyiw utji. Jehová Diosajj chʼama amuykañ profecian ayruntat (mallkintat) mä jiskʼa ramat parlkäna uka qhepatjja, jutañapäkäna uka Mesías Reyit qhanañchañatakejj niya uka pachpwa sarakïna.

⁹ Profeciajj kamsisa (Ezequiel 17:22-24 liytʼañataki). Jichha kutinjja, jachʼa pakanakat sipansa Jehová Diosaw ayruntani. Jupajj ‘altokam jilir cedro qoqan ramanakapan chʼojjñatatir puntap’ apaqasajja, ‘mä jachʼa alto qolluruw’ ayruntarakini. Uka jiskʼa ramajj wali jachʼa cedro qoqar tukuñkamaw jiltani, ukanjja ‘kunayman jamachʼinakaw’ jakapjjani. Ukatsti ‘camponkir taqe qoqanakaw’ Jehová Diosan uka jachʼa qoqar jilayatap yatipjjani.

¹⁰ Kunjamsa uka profeciajj phoqasïna. Jehová Diosajja David (‘altokam jilir cedro’) reyit jutiri Jesucristo Yoqaparuw alajjpachankir Sion qollur (‘jachʼa alto qollur’) ayruntäna (Sal. 2:6; Jer. 23:5; Apoc. 14:1). Jesusarojja enemigonakapajj janis kunäkaspa ukhamwa uñjapjjäna, ukampis Jehová Diosajj “David awkipan tronop” churasaw jachʼar aptäna (Luc. 1:32, 33; Dan. 4:17). Jesucristo Mesías Reyejja, alajjpachatwa oraqpach apnaqanini. Ukatsti taqenitakiw walja bendicionanak apanini. Uka reyiruw taqe chuyma confiyañasa. Jesusajj reyïkani ukhajja, taqeniw jupar istʼapjjani, ‘jan ajjsarasaw jakapjjani, janirakiw kuna jan waltʼäwirus ajjsarapkaniti’ (Prov. 1:33).

11. ‘Jiskʼa ramanakapan chʼojjñatatir’ alejj ‘wali suma cedro’ qoqar tukutapat parlir profeciajja, ¿kunsa yatichistu?

¹¹ Kunsa uka profeciajj yatichistu. ‘Jiskʼa ramanakapan chʼojjñatatir’ alejj ‘wali suma cedro’ qoqar tukutapat parlir profeciajja, khitirus confiyañäni uka jisktʼar qhanañchañatakiw yanaptʼistu. Akapachankir gobiernonakaru ejercitonakaparu confiyañajj inamayakiwa. Sum jakasiñatakejja Jesucristo Mesías Reyiruw taqe chuym confiyañasa, jupamp apnaqata alajjpachankir gobiernokiw aka oraqer sumankañ apanispa (Apoc. 11:15).

12. ¿Jehová Diosajj David reyimpi mä pacto lurkäna uk jan armasitap kunjamatsa yattanjja?

¹² Jehová Diosajj pä jachʼa pakanakat parlir profecía qhanañchkäna ukhajja, Davidat jutiri Sedequías reyejj kunjamsa reyit apaqatäjjañapäna, Babiloniarus presot apatäñaparakïna ukwa Ezequielajj amuyäna. Jupajj inas akham jisktʼaschïna: “¿Diosajj Davidampi mä pacto lurkäna uk janit phoqkpachäni? ¿Janit Davidat jutiri mä reyejj wiñayatak gobernañapäkäna?” sasa (2 Sam. 7:12, 16). Ukhamächïna ukhajja, mä jukʼa tiempot uka jisktʼapajj qhanañchatäjjänwa. 611 a.C. mara jakʼanakanjja (ukhakamajj paqallqo maranakaw yaqha markan jakjjapjjäna), mä arunjja Sedequiasajj Judá markan reyit apnaqaskäna ukhajja, Diosajj Ezequielaruw parläna (Ezeq. 20:2). Jehová Diosajja Mesiasat yaqha profecía arsuñapatakiw Ezequielar mayïna, uka profecianjja Davidampi mä pacto lurkäna uk jan armasitapwa uñachtʼayäna. Uka profeciarjamajja, Mesías Reyiw Davidat jutirïtap laykojj gobernañatak derechonïna.

13, 14. 1) Ezequiel 21:25-27 textonkir profecía mä qhawqha arunakamp qhanañchtʼam. 2) ¿Kunjamsa uka profeciajj phoqasïna?

¹³ Profeciajj kamsisa (Ezequiel 21:25-27 liytʼañataki). ‘Israelan jan wali jilïriparojja’, juchañchatäñamataki horasajj purinjjewa sasaw Jehová Diosajj Ezequiel taypejj qhan säna. Diosajj  uka jan wali reyirojj ‘turbantemampi coronamampi’ (ukanakajja reyin autoridadanïtapwa uñachtʼayi) aparapjjätam, ukatjja ‘aynachankki’ ukanakaw altor uchatäni, ‘altonkki’ ukanakasti aynachar uchatäniwa sasaw säna. Altor uchatäpkani uka autoridadanakajja, ‘gobernañatak derechonïki’ ukan puriniñapkamakiw altonkapjjani sasaw sarakïna. Ukatsti Jehová Diosajj ‘gobernañatak derechonïki’ ukaruw Reino katuyani.

¹⁴ Kunjamsa uka profeciajj phoqasïna. 607 a.C. maranwa babilonionakajj Jerusalén mark qʼal tukjapjjäna, Sedequiasarojj reyïñat apaqasajj preso apasjjapjjarakïna. Ukhamatwa ‘altonkkäna’ ukarojj ‘aynachar’ uchasïna, mä arunjja Judá markan reyiparuw tronot apaqasïna. Ukapachaw Jerusalenan Davidat jutiri mä reyejj jan utj-jjänti, ‘aynachankkäna’ ukanakaw ‘altor’ uchatäjjapjjäna, mä arunjja yaqha markankir gobiernonakaw apnaqjjapjjäna. Ukhamatwa oraqpachajj yaqha gobiernonakampi apnaqatäjjäna, ukampis mä jukʼa tiempotakikiw ukham apnaqapjjañapäna. Jehová Diosajj 1914 maran Jesucristor reyit uttʼaykäna ukhaw “yaqha markanakar churat tiemponakajj” phoqasjjäna (Luc. 21:24). Niyakejjay Jesusajj  David reyit jutirïchïnjja, jupaw Diosan Reinopan ‘gobernañatak derechonïna’ (Gén. 49:10). * Jehová Diosajj juman wawanakamat mayniw wiñayatak reyïni sasin Davidar siskäna ukjja, Jesús toqew phoqäna (Luc. 1:32, 33).

15. ¿Kunatsa Jesucristo Reyirojj taqe chuyma confiysna?

¹⁵ Kunsa uka profeciajj yatichistu. Jesucristo Reyirojj jan pächasisaw confiysna. ¿Kunatsa? Jesusajj janiw akapachankir gobernantenakjamäkiti, jupanakajj jaqenakampi ajllitakïpjjewa, jan ukajj munañapampikiw gobiernor mantapjje. Ukampis Jesucristojj Jehová Diosampi ajllitawa, gobernañatak derechonïki uka ‘reino’ katoqaraki (Dan. 7:13, 14). Ukhamasti Diosajj Reyit uttʼayki ukarukiw taqe chuyma confiyañasa.

16. 1) ¿Kunjamsa Jehová Diosajj ovejanakapar uñji? 2) Ezequiel tiemponjja, ¿kunjamsa ‘Israelan awatirinakapajj’ Diosan ovejanakapar uñjapjjäna?

¹⁶ Jachʼa Awatiri Jehová Diosajj walpun ovejanakapat llakisi, mä arunjja aka oraqenkir servirinakapat wal llakisi (Sal. 100:3). Ovejanakapar uñjapjjañapatak awatirinakar jaytki ukhajja, kunjamsa ovejanakap uñjasipki uk sum uñchʼukisinki. ‘Israelan awatirinakap’ kawsajja Jehová Diosajj wal llakispachäna. Ezequiel tiempon utjkäna uka pʼeqtʼirinakajj jan phenqʼanïpjjänwa, Diosan markaparojj ‘jan sinttʼasisa tʼaqesiyasaw’ apnaqapjjäna, ukatwa waljanejj Diosat jitheqtjjapjjäna (Ezeq. 34:1-6).

17. ¿Jehová Diosajj ovejanakapar salvañatakejj kunsa luräna?

¹⁷ ¿Kunsa Jehová Diosajj uka jan wali gobernantenakar lurpachäna? ‘Jupanakarojj ovejanakajat cuenta mayëjja’ sasaw Diosajj säna. Ukatsti ‘nayajj lakanakapatwa ovejanakajar salväjja’ sasaw sarakïna (Ezeq. 34:10). Jehová Diosajj kuntï arski uk phoqapuniwa (Jos. 21:45). 607 a.C. maranjja, Jehová Diosajj babilonio soldadonakampiw jan wali awatirinakat israelitanakar salväna. 70 maranak qhepatjja mayampiw israelitanakar Diosajj salväna, babilonionakan amparanakapat qhespiyasaw israelitanakarojj markapar kuttʼayäna, ukhamat mayampi Jupa saparuk adorjjapjjañapataki. Ukhampachasa Jehová Diosan ovejanakapajj jan walinakan uñjasisipkakispänwa. ¿Kunatsa? Akapachankir autoridadanakampi apnaqatäsipkakiñapänwa. ‘Markanakar churat tiemponakan’ phoqasiñapkamajja, walja tiempow faltaskäna (Luc. 21:24).

18, 19. ¿Ezequielajj kuna profecía arunaksa 606 a.C. maran qellqäna? (Aka yatichäwi qalltan utjki uka dibujo uñjjattʼäta).

¹⁸ Jachʼa Awatiri Jehová Diosajja ovejanakapat wal llakisi, wiñayatak kusisita jakasipjjaspa ukwa munaraki. Ukajj Ezequielar mä profecía 606 a.C. maran qellqaykäna ukanwa qhan amuyasi. Uka profeciajj Jerusalenajj qʼala tukjata uñjaskäna uka marat niya mä mara qhepatwa qellqasïna. Uka profeciajja, kunjamsa jutïrin Mesías Reyejj Jehová Diosan ovejanakapar uñjani ukwa uñachtʼayi.

¹⁹ Profeciajj kamsisa (Ezequiel 34:22-24 liytʼañataki). Diosajj akham sänwa: ‘Jupanakjjarojj mä sapa awatirik saytʼayäjja, jupajj David servirijawa’ sasa. ‘Sapa awatiri’, ‘servirija’ sasinjja,  mayampiw Davidan wawanakapajj reyëjjapjjani sañ janiw munkänti. Jan ukasti mä reyitak parlaskatapwa uñachtʼayi, jupaw wiñayataki gobernañapäna. Uka Awatiri Reyiw Diosan ovejanakapar manqʼayani, ‘pʼeqtʼarakini’. Ovejanakapat parlkasajja Jehová Diosajj akham sänwa: ‘Jupanakampejj mä sumankañ pacto luräjjaʼ sasa. Ukatjja, jupanakjjarojj ‘bendicionanak jallur uñtatwa’ purjjatayäjja, janiw kunsa ajjsarapkaniti, sumaw jakasipjjani sasaw sarakïna. Sumankañaw jaqenak taypin utjani, jaqenakampi animalanakampis sumankañanwa jakasipjjani (Ezeq. 34:25-28).

20, 21. 1) ‘David servirijawa’ sasin Jehová Diosajj Jesusat siskäna uka profeciajj ¿kunjamsa phoqasïna? 2) ¿Kuntï Ezequielajj ‘sumankañ pactot’ arskäna ukajj kunjamsa phoqasini?

²⁰ Kunjamsa uka profeciajj phoqasïna. Uka profecian ‘David servirija’ sasinjja, Jehová Diosajj Jesusaw Reyïni saskänwa. Davidan wawanakapat jutirinakatjja, Jesusaw gobernañatak derechoni (Sal. 89:35, 36). Jupajj aka oraqenkkäna ukhajja, ‘ovejanakap’ layku vidap loqtasaw ‘suma awatirïtap’ uñachtʼayäna (Juan 10:14, 15). Jichhajja, alajjpachatwa suma awatirïtap uñachtʼayasinki (Heb. 13:20). Diosajja ovejanakapar awatiñapataki manqʼa churañapatakejj 1914 maranwa Jesusarojj Reyit uttʼayäna. 1919 maranjja, Jesusajj ‘suma phoqeri amuyasir esclavoruw’ uttʼayarakïna, ukhamat ‘utapan servirinakaparu’, mä arunjja alajjpachana jan ukajj aka oraqen jakañ suyasipki Diosarus taqe chuyma servipkaraki ukanakar manqʼa churañapataki (Mat. 24:45-47). Criston pʼeqtʼatajja uka esclavojj walja yanaptʼanakwa Diosan ovejanakapar churaski, ukaw mä paraisonjam suman jakasipjjañapataki jan ajjsaras jakasipjjañapatak yanaptʼi, jutïr urunakansa yanaptʼaskakiniwa.

²¹ ¿Ezequielajj parlkäna uka ‘sumankañ pactotsa’ ‘jallur uñtat bendicionanakatsa’ kamsaraksnasa? ¿Kunjamsa uka profeciajj phoqasini? Jutïr machaq mundonjja, aka oraqen Jehová Diosaruk servipkani ukanakaw ‘sumankañ pactot’ walja sumanak katoqapjjani. Aka oraqpachaw paraisöjjani. Guerranakasa, jan wali jaqenakasa, manqʼat pistʼañanakasa, usunakasa, salvaje animalanakasa janiw Diosan servirinakaparojj jan waltʼayjjaniti (Is. 11:6-9; 35:5, 6; 65:21-23). Jehová Diosan ovejanakapajja, paraison wiñayatakiw wali kusisita jakasipjjani, ‘wali segurow jakasipjjani, janirakiw khitis jupanakar sustj-jjaniti’. ¡Paraison jakasiñajj wali sumäniwa! (Ezeq. 34:28).

22. 1) ¿Kunjamsa Jesusajj Diosan ovejanakapar uñji? 2) ¿Diosan ovejanakapar uñjapki uka ancianonakajj kunjamsa Jesusat yateqasipjjatap uñachtʼayapjje?

²² Kunsa uka profeciajj yatichistu. Jesusajj Awkipjamarakiw Diosan servirinakapat wal llakisi. Jehová Diosan ovejanakapar manqʼa jan faltayañatakisa, Diosar servisin sumana, jan ajjsaras jakasipjjañapatakisa Jesusajj wal chʼamachasi. ¡Ukham suma gobernantenïñajj wali kusiskañawa! Kunjamtï Jesusajj Diosan ovejanakapar uñjkejja, ukhamarakiw ancianonakajj Diosan ovejanakapar uñjapjjañapa, ‘taqe chuymaw uk lurapjjañapa’, ‘congregacionatakis yateqaskayäpjjañapawa’ (1 Ped. 5:2, 3). ¡Ancianonakajj  janipuniw Diosan ni mä ovejaparus jan waltʼayapkaspati! ¿Kuntï Jehová Diosajj Ezequiel tiempon jan wali awatirinakar siskäna uk amttati? ‘Jupanakarojj ovejanakajat cuenta mayëjja’ sasaw säna (Ezeq. 34:10). Jachʼa Awatiri Jehová Diosajja, kunjamsa ovejanakapar uñjasipki uk sumwa uñchʼukisinki, Jesusas ukhamarakiw uñchʼukisinki.

23. ¿Israel markar mayamp mayachthapiñat Jehová Diosajj kunsa arsüna? ¿Kunjamsa Diosajj arsutap phoqäna?

²³ Jehová Diosajja servirinakapan jupar mayachtʼat adorapjjañapwa muni. Israel markar mayampi mayachthapiñat Diosajj mä profecía arskäna ukanjja, pä ‘lawanakatwa’ parläna, uka lawanakajj amparapan ‘mä sapa lawarukiw’ tuküna. Ukham lurasaw kunjamsa Judá markampi (pä tribunaka) Israel markampejj (tunka tribunaka) ‘mä sapa markaruk’ tukuñapäna uk qhanstayäna (Ezeq. 37:15-23). Uka profeciajj 537 a.C. maranwa nayrïr kutin phoqasïna, uka maranwa Diosajj markapar Suma Oraqen mayamp mayachthapïna. * Ukhamätapajj kunatï jutïrin pasañapäki ukatak mä uñachtʼäwikïnwa. Israel markar mayachthapiñ arskäna uka qhepatjja, Jehová Diosajj mä profecía Ezequielar qellqayäna. Uka profecianjja, kunjamsa jutïrin Mesías Reyejj Diosan cheqpach adoririnakaparojj oraqpachan wiñayataki mayachthapini ukwa uñachtʼayäna.

24. Mesías Reyit parlkasajj ¿Jehová Diosajj kamsänsa? ¿Mesías Reyin gobiernopajj kunjamänisa?

 ²⁴ Profeciajj kamsisa (Ezequiel 37:24-28 liytʼañataki). Jehová Diosajja mayampiw ‘David servirijaʼ, ‘mä sapa awatiri’, ‘pʼeqtʼiri’ sasin Mesiasat parlkasajj säna. Ukampis jichha kutinjja ‘rey’ sarakïnwa (Ezeq. 37:22). Uka Reyin gobiernopajj wiñayatakiw utjani. Profecianjja ‘wiñayataki’ aruw uñsti, uka arojj uka gobiernon bendicionanakapajj jan tukuskirïtapwa amuytʼayistu. * Jesusajj apnaqkani ukhajj mayachtʼat jakasiñaw utjani. Uka gobiernon ‘reyipampiʼ apnaqata jaqenakajja, kunanaktï Diosajj ‘juezjam amtkani ukarjamaw sarnaqapjjani’, mayachtʼatarakiw aka ‘oraqen’ jakapjjani. Ukatjja, uka gobiernow jaqenakarojj Jehová Diosar jukʼamp jakʼachasipjjañapatak yanaptʼani, Diosasti ‘jupanakampejj sumankañ pacto lurani’. Jupaw jupanakan Diosapäni, jupanakasti markapäpjjaniwa, santuariopasti ‘wiñayatakiw jupanak taypinkarakini’.

25. ¿Mesías Reyit parlir profeciajj kunjamsa phoqasiwayi?

²⁵ Kunjamsa uka profeciajj phoqasïna. 1919 maranjja, Jesucristo ‘awatiri’ Reyin pʼeqtʼatajj ajllit cristianonakaruw mayachthapisïna. Qhepatjja ‘taqe markanakata, tribunakata, kunayman kasta jaqenakata, kunayman aru parlirinakat jutiri’ ‘walja jaqenakaruw’ uka ajllit cristianonakamp mayakïpjjañapatak mayachthapisïna (Apoc. 7:9). Taqe jupanakajj ‘mä sapa awatirin’ pʼeqtʼatajj ‘mä sapa tamakïpjjewa’ (Juan 10:16). Jupanakajj alajjpachana jan ukajj aka oraqen jakañsa suyasipkchejja, taqeniw Diosan  mayitanakaparjamasa, leyinakaparjamas sarnaqapjje. Ukatwa Diosar servisajj mä paraisonjam jakasipjje, oraqpachan mayachtʼat mä familiakïpjjaraki. Jehová Diosasti sum jakasipjjañapatakiw bendisi, santuariopas jupanak taypinkarakiwa, ukajj Dios saparuk adorañampi sasiwa. Jehová Diosaw jupanakan Diosapajja, jupanakasti kusisitaw jichhasa jutïrinsa adorasipkakini.

26. ¿Diosan markapan mayachtʼatäñapatakejj kunanaksa jumajj lurasma?

²⁶ Kunsa uka profeciajj yatichistu. Jiwasajj Jehová Diosarukiw oraqpachan mayachtʼat adortanjja, ukajj mä suma privilegiowa. Ukampis mä wawaki Diosar adorañatakiw chʼamachasiñasa, mä pachpa amtanikïñatakisa sum sarnaqañatakis taqeniw chʼamachasiñasaraki (1 Cor. 1:10). Ukatakejja kuntï Diosan markapajj churkistu ukanakampiw yanaptʼayasiñasa, Biblian yatichäwinakaparjamaw sarnaqañasa, taqenirakiw predicañatakisa jaqenakar yatichañatakis chʼamachasiñasa. Ukampis munasiñaw mayachtʼatäñatakejj jukʼamp yanaptʼistu. Munasirïsajja mayninakat sinttʼastanwa, khuyaptʼayastanwa, perdonaraktanwa, ukanakaw Diosan markapan mayachtʼatäñatak yanaptʼistu. Bibliajj akham siwa: ‘Munasiñajja jaqenakarojj wali sum mayachthapi’ sasa (Col. 3:12-14; 1 Cor. 13:4-7).

27. 1) ¿Mesiasat parlir profecianak liytʼasajj kunjamakis jikjjatasta? 2) ¿Kunsa jutïr yatichäwinakan yatjjataskañäni?

²⁷ Ezequiel libron Mesiasat parlir profecianak utjatapatjja, Diosar wal yuspärtanjja. Uka profecianak liytʼasasa uka toqet lupʼisasa, akanakwa Jesucristo Reyisat amuytanjja: Jesusarojj taqe chuymaw confiyañasa, jupaw gobernañatak derechonejja, wali munasiñampiw jupajj jichhürunakan uñjistu, jutïrinsa wiñay mayachtʼatäñatakiw yanaptʼistani. ¡Mesías Reyimpi apnaqatäñajj wali sumawa! Mesiasat parlir profecianakajja, Dios saparuki adorañatwa Ezequiel libron jilpach parli. Jehová Diosajj Jesús toqew markapar mayachthapi, ukhamat jupanakajj Jupa saparuk adorapjjañapataki (Ezeq. 20:41). Akjjar jutki uka yatichäwinakanjja, Dios saparuki adorañatwa parlaskakiñäni, kunjamsa ukajj Ezequiel libron jukʼat jukʼat qhanañchasi uksa yatjjataskarakiñäniwa.