1-3. Taano ta mamunduon si Ezekiel, asin ano an ipinasabong sa saiya na isurat?

 INI an ikaanom na taon kan pagkadistiyero ni Ezekiel. * Mamunduon an propeta mantang hinuhurop-hurop niya an bakong marahay na pamamahala sa Juda, an saiyang namumutan na dagang tinubuan na ginatos na kilometro an rayo. Nagkapirang hadi na an nahiling niyang namahala diyan.

² Ipinangaki si Ezekiel sa katahawan kan pamamahala kan maimbod na si Hading Josias. Siguradong naugma si Ezekiel kan maaraman niya an manungod sa kampanya ni Josias na parasaon an mga inukit na imahen asin ibalik an dalisay na pagsamba sa Juda. (2 Cron. 34:1-8) Pero an mga paghihinguwa ni Josias dai nagresulta sa permanenteng pagbabago, huli ta an kadaklan sa suminunod na mga hadi padagos na nagsagibo nin idolatriya. Bakong makangangalas na sa irarom kan pamamahala kan maraot na mga hading iyan lalong naggrabe an espirituwal asin moral na kamugtakan kan nasyon. Mayo na daw nin ano man na paglaom? Igwa!

³ Pinasabngan ni Jehova an saiyang maimbod na propeta na isurat an inot sa nagkapirang propesiya manungod sa Mesiyas, an maabot na Tagapamahala asin Pastor na permanenteng mabalik kan dalisay na pagsamba asin mamumuton na mangangataman sa mga karnero ni Jehova.  Marahay na maingat tang siyasaton an mga propesiyang iyan, huling an kautuban kan mga iyan makakaapekto sa satong daing sagkod na puturo. Kaya siyasaton ta an apat na propesiya manungod sa Mesiyas na yaon sa libro nin Ezekiel.

4. Anong propesiya an sinabi ni Ezekiel, asin paano inintrodusir ni Jehova an propesiyang iyan?

⁴ Kan mga 612 B.C.E., “an tataramon ni Jehova” uminabot ki Ezekiel, asin sinabi niya an sarong propesiya na ipinapahiling an hiwas kan sakop kan pamamahala kan Mesiyas asin an pangangaipo na magtiwala sa saiyang Kahadian. Inintrodusir ni Jehova an propesiya paagi sa pagtaong instruksiyon ki Ezekiel na sabihon sa mga kapwa niya idinistiyero an sarong propetikong talinhaga na naglaladawan sa pagigin bakong maimbod kan mga tagapamahala kan Juda asin nagduduon kan pangangaipo para sa matanos na Mesiyanikong Tagapamahala.—Ezek. 17:1, 2.

5. Ano an pinakasumaryo kan propetikong talinhaga?

⁵ Basahon an Ezekiel 17:3-10. Ini an pinakasumaryo kan talinhaga: Sinapi nin “dakulang agila” an supang na yaon sa pinakapuro kan kahoy na sedro asin dinara iyan “sa daga kan mga negosyante.” Pagkatapos, kinua kan agila an “ibang banhi kan kadagaan” asin itinanom iyan sa matabang daga “sa gilid nin katubigan.” Nagtubo an banhi asin nagin sarong “nagkakanap na puon nin ubas.” Dangan, nag-abot an ikaduwang “dakulang agila.” Sa pagmawot na maitanom sa ibang matubig na lugar, “desididong inunat” kan puon nin ubas an mga gamot kaini pasiring sa ikaduwang agila. Dai nagustuhan ni Jehova an ginibo kan puon nin ubas, asin sinabi niya na gagabuton an mga gamot kaiyan asin na “biyo iyan na maaalang.”

6. Ipaliwanag an kahulugan kan talinhaga.

⁶ Ano an kahulugan kan talinhaga? (Basahon an Ezekiel 17:11-15.) Kan 617 B.C.E., an Jerusalem sinalikupan ni Hading Nabucodonosor kan Babilonya (an inot na “dakulang agila”). Sinapi, o hinali, niya sa trono an hadi kan Juda na si Jehoiakin (an ‘supang sa pinakapuro’) asin dinara sa Babilonya (“sarong siyudad nin mga negosyante”). Pinatukaw ni Nabucodonosor sa trono sa Jerusalem si Zedekias (saro sa mga “banhi kan kadagaan,” o sarong gikan kan hadi). An bagong hading ini kan Juda pinasumpa sa ngaran nin Diyos, na nag-oobligar sa saiya na magin maimbod na basalyong hadi. (2 Cron. 36:13) Pero binasang-basang ni Zedekias an saiyang panunumpa; nagrebelde siya sa Babilonya asin nagpatabang sa Faraon kan Ehipto (an ikaduwang “dakulang agila”) para sa pakikipaglaban, alagad dai man ini nakatabang. Kinondenar ni Jehova an bakong maimbod na paggawi kan parabalgang iyan nin sumpa, si Zedekias. (Ezek. 17:16-21) Kan huri, hinali sa trono si Zedekias, asin nagadan siya sa presuhan sa Babilonya.—Jer. 52:6-11.

7. Anong mga leksiyon an manunudan ta sa propetikong talinhaga?

⁷ Anong mga leksiyon an manunudan ta sa propetikong talinhagang iyan? Inot, bilang tunay na mga parasamba, kaipuhan tang utubon kun ano an satong sinabi. “Siyertuhon . . . nindo na an saindong ‘Iyo’ mangahulugan nin iyo, asin an saindong ‘Dai,’ dai,” an sabi ni Jesus.  (Mat. 5:37) Kun kaipuhan tang sumumpa sa atubangan nin Diyos na masabi kita nin totoo—arog baga pag matestigo sa korte—ibinibilang tang seryosong bagay an panunumpang iyan. Ikaduwa, dapat kitang mag-ingat manungod sa kun kiisay kita nagtitiwala. Nagpapatanid sa sato an Bibliya: “Dai kamo magtiwala sa mga pamayo ni sa aki nin tawo, na dai makakapagligtas.”—Sal. 146:3.

8-10. Paano ilinadawan ni Jehova an maabot na Mesiyanikong Tagapamahala, asin paano nautob an propesiyang iyan? (Hilingon man an kahon na “Propesiya Manungod sa Mesiyas—An Magayunon na Kahoy na Sedro.”)

⁸ Alagad, igwa nin sarong tagapamahala na maninigo nanggad sa satong pagtitiwala. Pagkatapos na itao ni Jehova an propetikong talinhaga manungod sa supang na ilinipat nin natatanuman, naggamit giraray Siya nin matalinhagang pananaram para iladawan an maabot na Mesiyanikong Tagapamahala.

⁹ Kun ano an sinasabi kan propesiya. (Basahon an Ezekiel 17:22-24.) Sa pagkakataon na ini, bakong darakulang agila an mahiro kundi si Jehova mismo. Masapi siya nin lumbod na supang “sa puro kan halangkawon na sedro asin itatanom [niya] iyan . . . sa ibabaw nin halangkawon na bukid.” Magigin marambong an supang na ini asin magigin “sarong magayunon na sedro” na nagtatao nin istaran sa “gabos na klase nin gamgam.” Dangan, maaaraman kan “gabos na kahoy sa kalangtadan” na si Jehova mismo an nagparambong sa magayunon na kahoy na ini.

¹⁰ Kun paano nautob an propesiya. Sinapi, o kinua, ni Jehova an saiyang Aki, si Jesu-Cristo, hali sa linya nin mga hadi na gikan ki David (an “halangkawon na sedro”) asin itinanom siya sa langitnon na Bukid nin Sion (sarong “halangkawon na bukid”). (Sal. 2:6; Jer. 23:5; Kap. 14:1) Kaya kinua ni Jehova an saiyang Aki, na ibinilang kan mga kaiwal niya na “pinakahamak sa mga tawo,” asin ilinangkaw siya paagi sa pagtao sa saiya kan “trono ni David na saiyang ama.” (Dan. 4:17; Luc. 1:32, 33) Hali sa langit, papamahalaan kan Mesiyanikong Hadi na si Jesu-Cristo an bilog na daga asin bebendisyunan an gabos na sakop niya. Ini talaga an Tagapamahala na maninigo sa satong pagtitiwala. Sa lindong kan pamamahala ni Jesus sa Kahadian, an masinunod na mga tawo sa bilog na daga “maistar sa katiwasayan asin dai mapupurisaw nin grabeng takot sa kapahamakan.”—Tal. 1:33.

11. Anong mahalagang leksiyon an manunudan ta sa propesiya manungod sa “lumbod na supang” na nagin “magayunon na sedro”?

¹¹ Kun ano an manunudan ta sa propesiya. An nakakapukaw sa buot na propesiya manungod sa “lumbod na supang” na nagin “magayunon na sedro” makakatabang sa sato na masimbag an mahalagang marhay na hapot: Kiisay kita magtitiwala? Kamangmangan na magtiwala sa mga gobyerno nin tawo asin sa puwersa militar kan mga iyan. Para magkaigwa nin tunay na seguridad, sarong kadunungan na itao niyato an satong lubos na pagtitiwala sa Mesiyanikong Hadi, si Jesu-Cristo. An gobyerno sa langit sa irarom kan pamamahala niya iyo an solamenteng paglaom kan katawuhan.—Kap. 11:15.

12. Paano lininaw ni Jehova na dai niya tinalikdan an saiyang tipan ki David?

¹² Huli sa paliwanag nin Diyos sa propetikong talinhaga manungod sa duwang agila, nasabutan ni Ezekiel na si Zedekias, na sarong bakong  maimbod na hadi hali sa linya nin mga hadi na gikan ki David, hahalion sa trono asin dadarahon na bihag sa Babilonya. Tibaad inisip-isip kan propeta, ‘Ano daw an mangyayari sa tipan nin Diyos ki David, na nanunuga na sarong hadi hali sa angkan ni David an mamamahala sagkod lamang?’ (2 Sam. 7:12, 16) Kun talagang naisip iyan ni Ezekiel, dai niya kinaipuhan na maghalat nin haloy para sa simbag. Kan mga 611 B.C.E., kan ikapitong taon kan pagkadistiyero, mantang namamahala pa sa Juda si Zedekias, “nag-abot [ki Ezekiel] an tataramon ni Jehova.” (Ezek. 20:2) Ipinagbuot sa saiya ni Jehova na sabihon an saro pang propesiya manungod sa Mesiyas na naglilinaw na dai tinalikdan nin Diyos an saiyang tipan ki David. Imbes, ipinarisa kan propesiya na an maabot na Mesiyanikong Tagapamahala igwa nin legal na deretso na mamahala bilang tagapagmana ni David.

13, 14. Ano an pinakasumaryo kan propesiya na nasa Ezekiel 21:25-27, asin paano nautob an propesiya?

¹³ Kun ano an sinasabi kan propesiya. (Basahon an Ezekiel 21:25-27.) Paagi ki Ezekiel, diretsahan na kinaulay ni Jehova an “maraot na pamayo kan Israel,” na madali nang padusahan. Sinabi ni Jehova sa maraot na tagapamahalang ini na kukuanon sa saiya an saiyang “turbante” asin “korona,” o diyadema, (mga simbolo kan kapangyarihan nin hadi). Dangan, an mga namamahala na “hababa” ilalangkaw, asin an mga “halangkaw” ibababa. An mga namamahala na ilinangkaw padagos  na mamamahala, pero sagkod sana sa panahon na “an saro na may legal na deretso mag-abot,” dangan itatao ni Jehova sa sarong iyan an Kahadian.

¹⁴ Kun paano nautob an propesiya. Kan 607 B.C.E., ibinaba an “halangkaw” na kahadian nin Juda, na an sentro iyo an Jerusalem, kan laglagon kan mga Babilonyo an siyudad na iyan, halion sa trono si Hading Zedekias, asin darahon siyang bihag. Dangan, kan mayo nang namamahalang hadi sa Jerusalem na hali sa linya nin mga hadi na gikan ki David, ilinangkaw an ‘hababang’ mga kapangyarihan na Hentil, asin sinda na an may kontrol sa daga—pero sa limitadong panahon sana. An Mga Panahon kan mga Hentil, o “an itinalaan na mga panahon para sa mga nasyon,” natapos kan 1914 kan itao ni Jehova ki Jesu-Cristo an pamamahala. (Luc. 21:24) Bilang gikan ni Hading David, igwa nanggad nin “legal na deretso” si Jesus sa Mesiyanikong Kahadian. * (Gen. 49:10) Kaya, paagi ki Jesus, inutob ni Jehova an saiyang panuga na tatawan niya si David nin sarong permanenteng tagapagmana para sa daing katapusan na Kahadian.—Luc. 1:32, 33.

15. Taano ta lubos kitang makakapagtiwala sa Hadi na si Jesu-Cristo?

¹⁵ Kun ano an manunudan ta sa propesiya. Lubos kitang makakapagtiwala sa Hadi na si Jesu-Cristo. Taano? Huling bakong arog nin mga tagapamahala sa kinaban na tibaad ibinoboto nin mga tawo o  nang-aagaw nin pamamahala, si Jesus pinili ni Jehova asin ‘itinao sa saiya an sarong kahadian’ na diyan igwa siyang legal na deretso na mamahala. (Dan. 7:13, 14) Siyerto nanggad na maninigo sa satong pagtitiwala an Hadi na si Jehova mismo an nagnombra!

16. Ano an namamatian ni Jehova manungod sa saiyang mga karnero, asin paano trinato kan “mga pastor kan Israel” an aripumpon kan panahon ni Ezekiel?

¹⁶ Si Jehova, na Kahuruhalangkawing Pastor, nagmamalasakit na marhay sa saiyang mga karnero—an saiyang mga parasamba sa daga. (Sal. 100:3) Pag ipinagkakatiwala niya an pangangataman sa saiyang mga karnero sa mga tawong katabang na pastor—an mga nasa katungdan na may awtoridad—maingat niyang binabantayan kun paano ninda tinatrato an saiyang mga karnero. Isip-isipa na sana kun ano an namatian ni Jehova manungod sa “mga pastor kan Israel” kan panahon ni Ezekiel. An mga lider na idto daing supog na namahala nin “maringis saka mapang-api.” Bilang resulta, nagsakit an aripumpon asin dakul an nagbaya sa dalisay na pagsamba.—Ezek. 34:1-6.

17. Paano ilinigtas ni Jehova an saiyang mga karnero?

¹⁷ Ano an gigibuhon ni Jehova? Sinabi niya sa maringis na mga tagapamahala kan Israel na “papanimbagon” niya sinda. Nanuga pa siya: “Ililigtas ko an sakong mga karnero.” (Ezek. 34:10) Pirming inuutob ni Jehova an saiyang tataramon. (Jos. 21:45) Kan 607 B.C.E., ilinigtas niya an saiyang mga karnero paagi sa paggamit kan nananakyadang mga Babilonyo para halion sa pamamahala an makasadiring mga pastor na idto. Pakalihis nin 70 taon, ilinigtas niya hali sa Babilonya an arog-karnerong mga parasamba niya asin ibinalik sinda sa saindang sadiring daga tanganing maibalik ninda duman an tunay na pagsamba. Pero delikado pa man giraray an kamugtakan kan saiyang mga karnero, huling magpapadagos sindang nasa irarom kan mga namamahala sa kinaban. Dakul na siglo pang magpapadagos “an itinalaan na mga panahon para sa mga nasyon.”—Luc. 21:24.

18, 19. Anong propesiya an sinabi ni Ezekiel kan 606 B.C.E.? (Hilingon an ritrato sa kapinunan kan kapitulo.)

¹⁸ Kan 606 B.C.E., mga sarong taon pagkatapos na laglagon an Jerusalem asin pirang dekada bago patalingkason an mga Israelita sa pagkadistiyero sa Babilonya, pinasabngan ni Jehova si Ezekiel na sabihon an sarong propesiya na nagpapahiling na nagmamalasakit na marhay an Kahuruhalangkawing Pastor para sa daing sagkod na kapakanan kan saiyang mga karnero. Ilinaladawan kan propesiya kun paano papasturan kan Mesiyanikong Tagapamahala an mga karnero ni Jehova.

¹⁹ Kun ano an sinasabi kan propesiya. (Basahon an Ezekiel 34:22-24.) An Diyos matao nin “sarong pastor,” na inaapod niyang “sakuyang lingkod na si David.” An pananaram na “sarong pastor” pati na an tataramon na “lingkod” na nasa pormang singular nagpaparisa na dai ibabalik kan Tagapamahala an dinastiya nin mga hadi sa linya ni David. Imbes, siya an saro na magigin permanenteng tagapagmana ni David. Papakakanon kan Pastor na Tagapamahala an mga karnero nin Diyos asin “magigin pamayo ninda” siya. Makikipagtipan si Jehova nin “tipan nin katuninungan” sa saiyang mga karnero. “Mauran nin mga bendisyon” sa sainda, asin ikakaugma nindang marhay an katiwasayan,  kaginhawahan, asin abundansiya. Asin magkakaigwa nanggad nin katuninungan bako lang sa pag-iribanan nin mga tawo kundi sa pag-iribanan man nin tawo saka hayop!—Ezek. 34:25-28.

20, 21. (a) Paano nautob an propesiya manungod sa “sakuyang lingkod na si David”? (b) Ano an kahulugan para sa maabot na panahon kan mga tataramon ni Ezekiel manungod sa “tipan nin katuninungan”?

²⁰ Kun paano nautob an propesiya. Sa pag-apod sa Tagapamahalang ini na “sakuyang lingkod na si David,” an pinapanungdan nin Diyos sa propesiya iyo si Jesus, an gikan ni David na igwa kan legal na deretso na mamahala. (Sal. 89:35, 36) Kaidtong yaon digdi sa daga si Jesus, pinatunayan niya na siya “an marahay na pastor” paagi sa pagtao kan saiyang buhay “alang-alang sa mga karnero.” (Juan 10:14, 15) Pero ngunyan, saro na siyang langitnon na Pastor. (Heb. 13:20) Kan 1914, pinatukaw nin Diyos si Jesus bilang Hadi asin ipinagkatiwala sa saiya an paninimbagan na pasturan asin pakakanon an mga karnero nin Diyos digdi sa daga. Dai nahaloy, kan 1919, ninombrahan kan bagong patukawon na Hadi “an maimbod asin mapagmansay na uripon” para pakakanon an “mga lingkod niya sa harong”—an maimbod na mga parasamba nin Diyos na igwa kan langitnon o kan daganon na paglaom. (Mat. 24:45-47) Sa paggiya ni Cristo, an maimbod na uripon padagos na nakakapagtao nin bastanteng espirituwal na kakanon sa mga karnero nin Diyos. An espirituwal na kakanon na ini nakakatabang sa sainda na mapagdanay an katuninungan asin katiwasayan sa espirituwal na paraiso na padagos na nag-uuswag ngunyan.

²¹ Ano an kahulugan para sa maabot na panahon kan mga tataramon ni Ezekiel manungod sa “tipan nin katuninungan” asin sa pag-uran nin mga bendisyon? Sa maabot na bagong kinaban, lubos na maeeksperyensiyahan kan tunay na mga parasamba ni Jehova digdi sa daga an mga bendisyon kan “tipan nin katuninungan.” Sa literal na paraiso sa bilog na daga, an maimbod na mga tawo dai na nuarin man giraray mamumugtak sa peligro huli sa giyera, krimen, tiggutom, hilang, o mabangis na mga hayop. (Isa. 11:6-9; 35:5, 6; 65:21-23) Dai ka daw nauugma sa paglaom na mabuhay nin daing katapusan sa sarong paraisong daga kun sain an mga karnero nin Diyos “maistar . . . nin tiwasay, na mayo nin siisay man na matakot sa sainda”?—Ezek. 34:28.

22. Ano an namamatian ni Jesus sa mga karnero, asin paano maaarog kan mga naglilingkod bilang mga katabang na pastor an pagmalasakit ni Jesus sa mga karnero?

²² Kun ano an manunudan ta sa propesiya. Arog kan saiyang Ama, nagmamalasakit na marhay si Jesus sa mga karnero. Sinisigurado kan Pastor na Hadi na an mga karnero kan saiyang Ama bastanteng napapakakan sa espirituwal asin na igwa sinda nin katuninungan saka katiwasayan sa espirituwal na paraiso. Nakakaugma nanggad na mapasairarom sa pangangataman kan siring na Tagapamahala! An mga naglilingkod bilang mga katabang na pastor kaipuhan na arugon an pagmalasakit ni Jesus sa mga karnero. Dapat na pasturan kan mga elder an aripumpon nin “gikan sa buot,” asin dapat na “gustong-gusto” nindang gibuhon iyan. Asin kaipuhan man na magin marahay sindang halimbawa sa mga karnero. (1 Ped. 5:2, 3) Dai nanggad gugustuhon nin sarong elder na tratuhon nin bakong marahay an saro sa mga karnero ni Jehova! Tandaan an mga tataramon ni Jehova sa maringis na mga pastor kan Israel kan panahon ni Ezekiel: “Papanimbagon ko  sinda.” (Ezek. 34:10) Maingat na binabantayan kan Kahuruhalangkawing Pastor asin kan saiyang Aki kun paano tinatrato an mga karnero.

23. Ano an ipinanuga ni Jehova may koneksiyon sa pagkasararo kan nasyon nin Israel, asin paano niya inutob iyan?

²³ Gusto ni Jehova na maglingkod na may pagkasararo an saiyang mga parasamba. Sa sarong propesiya manungod sa pagbabalik, nanuga an Diyos na titipunon niya an saiyang banwaan—an mga representante kan duwang tribong kahadian nin Juda saka kan sampulong tribong kahadian nin Israel—asin pagsasaruon sinda bilang “sarong nasyon,” arog sa duwang “pidaso nin kahoy” na pinagtaid asin ‘nagin saro’ sa saiyang kamot. (Ezek. 37:15-23) Bilang sarong kautuban kan propesiya, an pinagsarong nasyon nin Israel ibinalik nin Diyos sa Dagang Panuga kan 537 B.C.E. * Pero igwa nin mas dakula saka mas nagdadanay na pagkasararo na mangyayari sa maabot. Pagkatapos manuga ni Jehova na pagsasaruon niya an Israel, tinawan niya nin propesiya si Ezekiel manungod sa kun paano pagsasararuon kan maabot na Tagapamahala an tunay na mga parasamba sa bilog na daga paagi sa bugkos nin pagkasararo na magdadanay sagkod lamang.

24. Paano inapod ni Jehova an Mesiyanikong Tagapamahala, asin paano mailaladawan an pamamahala kan Hading ini?

²⁴ Kun ano an sinasabi kan propesiya. (Basahon an Ezekiel 37:24-28.) Sa giraray, inapod ni Jehova an Mesiyanikong Tagapamahala na “lingkod kong si David,” “pastor,” asin “pamayo,” pero ngunyan, inapod man siya ni Jehova na sarong “hadi.” (Ezek. 37:22) Paano mailaladawan  an pamamahala kan Hading ini? Magigin permanente an pamamahala niya. An paggamit kan mga tataramon na “sagkod lamang” asin “daing sagkod” nagpapahiling na magigin daing katapusan an mga bendisyon sa irarom kan pamamahala kan Hadi. * Magkakaigwa nin pagkasararo sa irarom kan pamamahala niya. Sa irarom kan “sarong hadi,” susunudon kan maimbod na mga sakop an saro sanang ‘mga ipinapautob na desisyon,’ asin “maistar sinda sa daga” nin iribanan. Sa pamamahala niya, mas mapaparani sa Diyos na Jehova an mga sakop kan Hadi. Makikipagtipan si Jehova nin “tipan nin katuninungan” sa mga sakop kan Kahadian. Si Jehova an magigin Diyos ninda, asin sinda an magigin banwaan niya. Asin an saiyang santuwaryo mamumugtak “sa tahaw ninda sagkod lamang.”

25. Paano nautob an propesiya manungod sa Mesiyanikong Hadi?

²⁵ Kun paano nautob an propesiya. Kan 1919, an maimbod na mga linahidan pinagkasararo sa irarom kan ‘sarong pastor,’ an Mesiyanikong Hadi na si Jesu-Cristo. Pag-abot nin panahon, “sarong dakulang kadaklan” hali sa “gabos na nasyon asin tribo asin banwaan saka lengguwahe” an uminiba sa linahidan na mga kapagtubod ninda. (Kap. 7:9) Nagin “sarong aripumpon” sinda sa pangangataman nin “sarong pastor.” (Juan 10:16) Sa langit man o sa daga an saindang paglaom, gabos sinda nagsusunod sa mga ipinapautob na desisyon ni Jehova. Bilang resulta, iribanan sindang nag-iistar sa espirituwal na paraiso bilang nagkakasararong pambilog na kinaban na magturugang. Binebendisyunan sinda ni Jehova nin katuninungan, asin yaon sa tahaw ninda an  saiyang santuwaryo, na nagrerepresentar sa dalisay na pagsamba. Si Jehova an saindang Diyos, asin orgulyo nindang magin mga parasamba niya—ngunyan asin sagkod pa man!

26. Paano ka makakakontribwir sa pagkasararo sa espirituwal na paraiso?

²⁶ Kun ano an manunudan ta sa propesiya. Pribilehiyo niyatong magin kabilang sa nagkakasararong pambilog na kinaban na magturugang na nakikikabtang sa dalisay na pagsamba ki Jehova. Pero may kaibang paninimbagan an pribilehiyong iyan—dapat kitang magkontribwir sa pagkasararo. Huli kaini, kaipuhan na gibuhon niyato gabos an satong kabtang para mapagdanay an pagkauruyon sa paniniwala asin paghiro. (1 Cor. 1:10) Sa katuyuhan na iyan, saro sanang espirituwal na kakanon an kinakakan ta, saro sanang pamantayan sa Kasuratan manungod sa paggawi an sinusunod ta, asin nakikikabtang kita sa saro sanang mahalagang marhay na gibuhon na paghuhulit kan Kahadian asin paggibo nin disipulo. Alagad, an panginot na dahilan kan satong pagkasararo iyo an pagkamuot. Mantang pinagmamaigutan tang patalubuon asin ipahiling an manlain-lain na aspekto nin pagkamuot—kaiba na an empatiya, pagmalasakit, asin pagpapatawad—nagkokontribwir kita sa satong pagkasararo. “An pagkamuot,” an sabi kan Bibliya, “bugkos nin lubos na pagkasararo.”—Col. 3:12-14; 1 Cor. 13:4-7.

27. (a) Ano an namamatian mo sa mga propesiya manungod sa Mesiyas na yaon sa libro nin Ezekiel? (b) Ano an sisiyasaton ta sa masunod na mga kapitulo?

²⁷ Ipinagpapasalamat nanggad niyato an mga propesiya manungod sa Mesiyas na yaon sa libro nin Ezekiel! An pagbasa asin paghurop-hurop sa mga propesiyang ini nagtutukdo sa sato na an namumutan tang Hadi na si Jesu-Cristo maninigo sa satong pagtitiwala, igwa kan legal na deretso na mamahala, asin mamumuton na nagpapastor sa sato. Nanudan ta man na papagdanayon niya an satong bugkos nin pagkasararo sagkod lamang. Pribilehiyo nanggad niyato na magin mga sakop kan Mesiyanikong Hadi! Tandaan na an mga propesiyang ini manungod sa Mesiyas kabtang kan tema manungod sa pagbabalik na tinutukar sa libro sa Bibliya na Ezekiel. Si Jesus an ginagamit ni Jehova para tipunon an Saiyang banwaan asin ibalik an dalisay na pagsamba sa tahaw ninda. (Ezek. 20:41) Sa masunod na mga kapitulo kan publikasyon na ini, sisiyasaton ta an nakakapukaw sa buot na tema manungod sa pagbabalik asin kun paano ini tinukar sa libro nin Ezekiel.