1-3. Nganong naguol pag-ayo si Ezequiel, ug unsay giparekord sa Diyos kaniya?

 KADTO ang ikaunom nga tuig sa pagkadestiyero, o pagkabihag, ni Ezequiel. * Naguol pag-ayo ang propeta samtang naghunahuna sa makapasubong kahimtang sa pagmando sa Juda, ang iyang gimahal nga yutang natawhan nga gatosan ka kilometro ang gilay-on. Nakita niya nga kapila na pulihi ang mga hari niini.

² Si Ezequiel natawo sa tungatunga sa pagmando sa matinumanong hari nga si Josias. Lagmit nalipay si Ezequiel dihang nahibaloan niya ang kampanya nga gihimo ni Josias sa pagwagtang sa kinulit nga mga larawan ug sa pagpasig-uli sa putling pagsimba sa Juda. (2 Cron. 34:1-8) Apan ang gihimo ni Josias wala moresultag permanenteng kausaban, kay ang kadaghanan sa mga hari nga misunod kaniya padayong naghimog idolatriya. Dili ikatingala nga ubos sa maong mga magmamando, misamot pa ka grabe ang espirituwal ug moral nga pagkadaot sa nasod. Wala na ba gyoy paglaom? Duna!

³ Gigiyahan ni Jehova ang iyang matinumanong propeta sa pagrekord ug tagna​—ang una sa ubay-ubayng tagna—​bahin sa Mesiyas, ang umaabot nga Magmamando ug Magbalantay nga maoy permanenteng magpasig-uli sa putling pagsimba ug mapinanggaong mag-atiman  sa mga karnero ni Jehova. Angay gyod natong tun-an pag-ayo ang maong mga tagna, kay ang katumanan niini makaapektar sa atong dumalayong kaugmaon. Busa atong hisgotan ang upat ka tagna bahin sa Mesiyas sa basahon sa Ezequiel.

4. Unsang tagna ang gipahayag ni Ezequiel, ug sa unsang paagi gisugdan ni Jehova ang maong tagna?

⁴ Sa mga 612 B.C.E., si Ezequiel nakadawat ug “mensahe gikan kang Jehova,” ug nagpahayag siyag tagna nga nagpakita kon unsay sakop sa awtoridad sa Mesiyas ug kon nganong kinahanglang mosalig sa iyang Gingharian. Gisugdan ni Jehova ang tagna pinaagi sa pagsugo kang Ezequiel nga sultihan ang iyang kaubang mga destiyero ug tigmo nga nagpakita sa kawalay-pagtuo sa mga magmamando sa Juda ug nagpasiugda nga gikinahanglan ang matarong nga Mesiyanikong Magmamando.​—Ezeq. 17:1, 2.

5. Unsa ang tigmo?

⁵ Basaha ang Ezequiel 17:3-10. Kini ang tigmo: Gibali sa “dakong agila” ang kinatumyang salingsing sa kahoyng sedro ug gibutang kini sa “usa ka siyudad sa mga negosyante.” Unya ang agila nagkuhag “pipila ka binhi sa yuta” ug gipugas kini sa tabunok nga uma sa “daplin sa dagayang katubigan.” Ang binhi miturok ug nahimong “punoan sa ubas nga nagakatay.” Unya mitungha ang ikaduhang “dakong agila.” Ang mga gamot sa punoan sa ubas “matinguhaong” mipaingon sa ikaduhang agila kay gusto niini nga mabalhin sa dapit nga daghag tubig. Gihukman sa Diyos ang gihimo sa punoan sa ubas, nga nagpadayag nga ang mga gamot niini ibton ug “bug-os malaya.”

6. Unsay kahulogan sa tigmo?

⁶ Unsay kahulogan sa tigmo? (Basaha ang Ezequiel 17:11-15.) Sa 617 B.C.E., si Haring Nabucodonosor sa Babilonya (ang unang “dakong agila”) milikos sa Jerusalem. Iyang gitangtang sa trono ang hari sa Juda nga si Jehoiakin (ang “kinatumyang salingsing”) ug gidala siya sa Babilonya (“usa ka siyudad sa mga negosyante”). Gipuli ni Nabucodonosor si Zedekias (usa sa harianong mga “binhi sa yuta”) sa trono sa Jerusalem. Ang bag-ong hari sa Juda gipapanumpa sa ngalan sa Diyos, mao nga obligado siya nga mahimong maunongong sakop nga hari. (2 Cron. 36:13) Apan wala tumana ni Zedekias ang iyang panumpa; siya mirebelde sa Babilonya ug nagpatabang sa Paraon sa Ehipto (ang ikaduhang “dakong agila”), pero wala kini molampos. Gihukman ni Jehova ang pagkadili-maunongon ni Zedekias. (Ezeq. 17:16-21) Sa kataposan, si Zedekias gitangtang sa trono, ug siya namatay sa prisohan sa Babilonya.​—Jer. 52:6-11.

7. Unsang mga leksiyon ang atong makat-onan sa tigmo?

⁷ Unsang mga leksiyon ang atong makat-onan sa maong tigmo? Una, ingong putli nga mga magsisimba, kinahanglang tumanon nato ang atong isulti. “Himoa ang inyong ‘Oo’ nga oo, ang inyong ‘Dili,’ dili,” miingon si Jesus. (Mat. 5:37) Kon kinahanglan gyod tang manumpa atubangan sa Diyos sa pagsulti sa tinuod​—sama dihang motestigo sa korte—​isipon nato nga seryoso kana nga panumpa. Ikaduha, kinahanglang magbantay ta kon kang kinsa ta mosalig. Ang  Bibliya nagpasidaan kanato: “Ayaw mog salig sa mga prinsipe o sa anak sa tawo, nga dili makaluwas.”​—Sal. 146:3.

8-10. Giunsa paghulagway ni Jehova ang umaabot nga Mesiyanikong Magmamando, ug sa unsang paagi natuman ang tagna? (Tan-awa sab ang kahong “Tagna Bahin sa Mesiyas​—Ang Dako nga Kahoyng Sedro.”)

⁸ Pero dunay magmamando nga takos sa atong bug-os nga pagsalig. Human ipahayag ang tigmo bahin sa gibalhin nga salingsing, si Jehova migamit ug samang paghulagway bahin sa umaabot nga Mesiyanikong Magmamando.

⁹ Kon unsay giingon sa tagna. (Basaha ang Ezequiel 17:22-24.) Karon, dili na dagkong agila ang mohimog aksiyon kondili si Jehova na. Siya mokuhag linghod nga sanga “gikan sa tumoy sa habog nga sedro ug itanom kini . . . sa habog ug nagbuntaog nga bukid.” Kini nga sanga motubo, nga mahimong “dako nga sedro” nga kapuy-an sa “tanang matang sa langgam.” Unya ang “tanang kahoy sa kapatagan” makaila nga si Jehova mismo ang nagpahinabo nga modako ang sedro.

¹⁰ Kon sa unsang paagi natuman ang tagna. Gikuha ni Jehova ang iyang Anak, si Jesu-Kristo, gikan sa harianong banay ni David (ang “habog nga sedro”) ug gibutang siya sa langitnong Bukid sa Zion (ang “habog ug nagbuntaog nga bukid”). (Sal. 2:6; Jer. 23:5; Pin. 14:1) Busa gikuha ni Jehova ang iyang Anak, kinsa giisip sa iyang mga kaaway ingong “kinaubsan sa katawhan,” ug gibayaw siya pinaagi sa paghatag kaniya sa “trono ni David nga iyang amahan.” (Dan. 4:17; Luc. 1:32, 33) Samag dako nga sedro, ang Mesiyanikong Hari, si Jesu-Kristo, magbuntaog, o magmando gikan sa langit, ibabaw sa tibuok yuta ug mahimong tinubdan sa panalangin sa tanan niyang sakop. Siya, sa pagkatinuod, ang Magmamando nga takos sa atong pagsalig. Ubos sa landong sa paghari ni Jesus sa Gingharian, ang matinumanong katawhan sa tibuok kalibotan “magpuyo nga may kasegurohan ug dili mahadlok nga may moabot nga katalagman.”​—Prov. 1:33.

11. Unsang importanteng leksiyon ang atong makat-onan sa tagna bahin sa “linghod nga sanga” nga nahimong “dako nga sedro”?

¹¹ Kon unsay atong makat-onan sa tagna. Ang makapalipayng tagna bahin sa “linghod nga sanga” nga nahimong “dako nga sedro” nakatabang nato nga matubag ang importante kaayong pangutana: Kang kinsa ta mosalig? Kabuangan ang pagsalig sa mga gobyerno sa tawo ug sa ilang puwersa militar. Aron makabatog tinuod nga kasegurohan, maalamon nga bug-os kitang mosalig sa Mesiyanikong Hari, si Jesu-Kristo. Ang langitnong gobyerno ubos sa iyang pagmando mao ang bugtong nga paglaom sa katawhan.​—Pin. 11:15.

12. Giunsa pagklaro ni Jehova nga wala niya kalimti ang iyang pakigsaad kang David?

¹² Base sa pagpatin-aw sa Diyos sa tigmo bahin sa duha ka agila, nasabtan ni Ezequiel nga ang dili matinumanong hari sa harianong banay ni David nga si Zedekias tangtangon sa trono ug bihagon sa Babilonya. Lagmit siya naghunahuna, ‘Unsa na may mahitabo sa pakigsaad sa Diyos kang David, nga may hari gikan sa iyang banay nga magmando hangtod sa hangtod?’ (2 Sam. 7:12, 16) Kon mao gyod  nay gihunahuna ni Ezequiel, wala ra kaayo siya maghulat ug dugay sa tubag. Mga 611 B.C.E., sa ikapitong tuig sa pagkadestiyero, samtang si Zedekias naghari pa sa Juda, si Ezequiel ‘nakadawat ug mensahe gikan kang Jehova.’ (Ezeq. 20:2) Gisugo siya ni Jehova sa pagpahayag ug lain pang tagna bahin sa Mesiyas, tagna nga klarong nagpaila nga wala kalimti sa Diyos ang iyang pakigsaad kang David. Hinuon, gipakita niini nga ang umaabot nga Mesiyanikong Magmamando dunay legal nga katungod sa pagmando ingong manununod ni David.

13, 14. Unsay giingon sa tagna diha sa Ezequiel 21:25-27, ug sa unsang paagi kana natuman?

¹³ Kon unsay giingon sa tagna. (Basaha ang Ezequiel 21:25-27.) Pinaagi kang Ezequiel, si Jehova nagpahayag ug klarong mensahe batok sa “daotang pangulo sa Israel,” kay ang panahon nga silotan siya miabot na. Giingnan ni Jehova kining daotang magmamando nga siya tangtangan sa iyang “turban” ug “korona,” o diadema (mga simbolo sa pagkahari). Dayon, ang “ubos” nga mga magmamando ituboy, ug ang “taas” nga mga magmamando ipaubos. Ang gituboy nga mga magmamando magpadayon sa pagmando hangtod moabot “ang usa nga may legal nga katungod,” ug ihatag ni Jehova kaniya ang Gingharian.

 ¹⁴ Kon sa unsang paagi natuman ang tagna. Sa 607 B.C.E., sa pagkalaglag sa Jerusalem, ang “taas” nga gingharian sa Juda, nga ang sentro mao ang Jerusalem, gipaubos dihang gilaglag sa mga Babilonyanhon ang siyudad ug gibihag ang gitangtang nga haring si Zedekias. Kay walay hari sa harianong banay ni David nga nagmando sa Jerusalem, ang “ubos” nga Hentil nga mga magmamando gibayaw ug mao nay nagmando sa yuta​—pero sa limitado lang nga panahon. Ang Panahon sa mga Hentil, o “ang gitakdang mga panahon sa kanasoran,” natapos niadtong 1914 dihang gihatag ni Jehova ang pagkahari kang Jesu-Kristo. (Luc. 21:24) Ingong kaliwat ni Haring David, si Jesus duna gyoy “legal nga katungod” sa Mesiyanikong Gingharian. * (Gen. 49:10) Busa pinaagi kang Jesus, gituman ni Jehova ang iyang panumpa nga hatagan si David ug permanenteng manununod sa walay kataposang Gingharian.​—Luc. 1:32, 33.

15. Nganong makasalig gyod ta sa Hari, si Jesu-Kristo?

¹⁵ Kon unsay atong makat-onan sa tagna. Kita makasalig gayod sa Hari, si Jesu-Kristo. Ngano? Kay dili sama sa mga magmamando sa kalibotan nga mahimong ibotar sa mga tawo o mangilog ug gahom, si Jesus gipili ni Jehova ug “gihatagag . . . gingharian” nga niana  siya may legal nga katungod. (Dan. 7:13, 14) Ang Hari nga gitudlo mismo ni Jehova takos gyod sa atong pagsalig!

16. Unsay pagbati ni Jehova sa iyang mga karnero, ug giunsa pagtratar sa “mga magbalantay sa Israel” sa panahon ni Ezequiel ang panon?

¹⁶ Si Jehova, ang Kinalabwang Magbalantay, naghunahuna pag-ayo sa kaayohan sa iyang mga karnero​—ang iyang mga magsisimba sa yuta. (Sal. 100:3) Dihang iyang ipiyal ang iyang mga karnero sa mga tawo nga luyoluyong magbalantay​—kadtong gihatagan niyag awtoridad—​siya maniid pag-ayo kon unsaon nila pagtratar ang iyang mga karnero. Busa hunahunaa kon unsay gibati ni Jehova sa “mga magbalantay sa Israel” sa panahon ni Ezequiel. Ang maong mga lider wala maulaw sa pagmando sa “mapig-oton ug pintas nga paagi.” Ingong resulta, nag-antos ang panon, ug daghan ang mibiya sa putling pagsimba.—Ezeq. 34:1-6.

17. Giunsa pagluwas ni Jehova ang iyang mga karnero?

¹⁷ Unsay himoon ni Jehova? “Papanubagon nako sila,” miingon si Jehova sa way kaluoy nga mga magmamando sa Israel. Siya usab nagsaad: “Luwason nako ang akong mga karnero.” (Ezeq. 34:10) Kanunayng tumanon ni Jehova ang iyang isulti. (Jos. 21:45) Sa 607 B.C.E., iyang giluwas ang iyang mga karnero pinaagi sa paggamit sa misulong nga mga Babilonyanhon sa paghukas sa awtoridad sa maong hakog nga mga magbalantay. Paglabayg 70 ka tuig, iyang giluwas gikan sa Babilonya ang iyang samag karnero nga mga magsisimba ug gidala silag balik sa ilang yutang natawhan aron ilang mapasig-uli ang matuod nga pagsimba didto. Pero ang mga karnero ni Jehova makaluluoy gihapon, kay padayon silang mailalom sa mga magmamando sa kalibotan. “Ang gitakdang mga panahon sa kanasoran” magpadayon pa sa daghang siglo.​—Luc. 21:24.

18, 19. Unsang tagna ang giasoy ni Ezequiel sa 606 B.C.E.? (Tan-awa ang hulagway sa sinugdan sa kapitulo.)

¹⁸ Balik sa 606 B.C.E., mga usa ka tuig human malaglag ang Jerusalem ug pipila ka dekada una pa maluwas ang mga Israelinhon gikan sa pagkadestiyero sa Babilonya, gigiyahan ni Jehova si Ezequiel sa pagpahayag ug tagna nga nagpakita nga ang Kinalabwang Magbalantay naghunahuna gyod pag-ayo sa dumalayong kaayohan sa iyang mga karnero. Gipakita niini nga tagna kon sa unsang paagi ang Mesiyanikong Magmamando magbantay sa mga karnero ni Jehova.

¹⁹ Kon unsay giingon sa tagna. (Basaha ang Ezequiel 34:22-24.) Ang Diyos ‘magpatunghag usa ka magbalantay’ nga iyang gitawag ug “akong alagad nga si David.” Ang mga pulong nga “usa ka magbalantay” ug “alagad” nagpasabot nga ang Magmamando dili magpatunghag dinastiya sa mga hari sa banay ni David, kondili siya ang mahimong permanenteng manununod ni David. Kining Magbalantay nga Hari magpakaon sa mga karnero sa Diyos ug mahimong “ilang pangulo.” Si Jehova ‘maghimog pakigsaad sa pakigdait’ sa iyang mga karnero. “Moulan ug mga panalangin” para kanila, ug tagamtamon nila ang kasegurohan, kalamboan, ug kadagaya. Ang pakigdait unya  dili lang tali sa mga tawo, kondili tali sab sa mga tawo ug hayop!​—Ezeq. 34:25-28.

20, 21. (a) Sa unsang paagi natuman ang tagna bahin sa “akong alagad nga si David”? (b) Unsay umaabot nga katumanan sa giingon ni Ezequiel nga “pakigsaad sa pakigdait”?

²⁰ Kon sa unsang paagi natuman ang tagna. Pinaagi sa pagtawag sa Diyos niini nga Magmamando nga “akong alagad nga si David,” iyang gitumong si Jesus, ang kaliwat ni David nga dunay legal nga katungod sa pagmando. (Sal. 89:35, 36) Dihang dinhi si Jesus sa yuta, gipamatud-an niya nga siya “ang maayong magbalantay,” nga naghatag sa iyang kinabuhi “alang sa mga karnero.” (Juan 10:14, 15) Apan karon siya usa ka langitnong Magbalantay. (Heb. 13:20) Sa 1914, gientrono sa Diyos si Jesus ingong Hari ug gipiyal kaniya ang pagbantay ug pagpakaon sa mga karnero sa Diyos dinhi sa yuta. Wala madugay, sa 1919, gitudlo sa bag-ong naentrono nga Hari “ang matinumanon ug maalamong ulipon” sa pagpakaon sa “mga sulugoon”​—ang maunongong mga magsisimba sa Diyos nga may langitnon o yutan-on nga paglaom. (Mat. 24:45-47) Ubos sa pagdumala sa Kristo, gibusog sa matinumanong ulipon ang mga karnero sa Diyos sa espirituwal nga pagkaon. Kini nga pagkaon nakatabang nila sa pagpatunghag kalinaw ug kasegurohan sa espirituwal nga paraiso nga ila nang natagamtam karon.

²¹ Unsay umaabot nga katumanan sa giingon ni Ezequiel bahin sa “pakigsaad sa pakigdait” ug ‘pag-ulan ug mga panalangin’? Sa bag-ong kalibotan, ang putling mga magsisimba ni Jehova sa yuta bug-os nga makatagamtam sa mga panalangin sa “pakigsaad sa pakigdait.” Sa tibuok yutang paraiso, ang matinumanong mga tawo dili na gyod mahadlok kay wala nay giyera, krimen, gutom, o sakit, ug ang ihalas nga mga mananap dili na mangunsa. (Isa. 11:6-9; 35:5, 6; 65:21-23) Dili ba ka malipay sa paglaom nga mabuhi sa walay kataposan sa paraisong yuta diin ang mga karnero sa Diyos ‘magpuyo sa kasegurohan, nga walay usa nga makapahadlok kanila’?​—Ezeq. 34:28.

22. Unsay pagbati ni Jesus sa mga karnero, ug unsaon pagpakita sa luyoluyong mga magbalantay ang pagmahal ni Jesus?

²² Kon unsay atong makat-onan sa tagna. Sama sa iyang Amahan, si Jesus naghunahuna pag-ayo sa kaayohan sa mga karnero. Seguroon gyod sa Magbalantay nga Hari nga ang mga karnero sa iyang Amahan busog sa espirituwal ug magtagamtam ug kalinaw ug kasegurohan sa espirituwal nga paraiso. Seguradong mobati tag kasegurohan ubos sa pag-atiman sa maong Magmamando! Para niadtong nag-alagad ingong luyoluyong mga magbalantay, kinahanglang ipakita nila ang pagmahal ni Jesus sa mga karnero. Ang mga ansiyano angay nga “kinabubut-on” ug “kinasingkasing” nga magbantay sa panon ug magpakitag maayong panig-ingnan sa mga karnero. (1 Ped. 5:2, 3) Dili gyod trataron sa ansiyano ang karnero ni Jehova sa dili maayong paagi! Hinumdomi ang giingon ni Jehova sa way kaluoyng mga magbalantay sa Israel sa panahon ni Ezequiel: “Papanubagon nako sila.” (Ezeq. 34:10) Ang Kinalabwang Magbalantay naniid pag-ayo kon giunsa pagtratar ang iyang mga karnero​—ingon sab niana ang iyang Anak.

23. Unsay gisaad ni Jehova bahin sa paghiusa sa nasod sa Israel, ug giunsa niya kini pagtuman?

²³ Gusto ni Jehova nga ang iyang mga magsisimba mag-alagad nga nagkahiusa. Sa tagna bahin sa pagpasig-uli, ang Diyos nagsaad nga iyang tigomon ang iyang katawhan​—mga sakop sa 2 ka tribo nga gingharian sa Juda ug sa 10 ka tribo nga gingharian sa Israel—​ug hiusahon sila ingong “usa ka nasod,” nga daw nagtapo ug duha ka “estik” aron “mahimong usa” diha sa iyang kamot. (Ezeq. 37:15-23) Ingong katumanan sa tagna, gipasig-uli sa Diyos ang nahiusang nasod sa Israel ngadto sa Yutang Saad niadtong 537 B.C.E. * Apan kana nga panaghiusa patilaw lang sa mas dako ug mas dumalayong panaghiusa sa umaabot. Human mosaad si Jehova nga hiusahon ang Israel, iyang gihatagan si Ezequiel ug tagna kon sa unsang paagi hiusahon sa umaabot nga Magmamando ang matuod nga mga magsisimba sa tibuok kalibotan hangtod sa hangtod.

24. Unsay pagtawag ni Jehova sa Mesiyanikong Magmamando, ug unsa unya ang pagmando niini nga Hari?

²⁴ Kon unsay giingon sa tagna. (Basaha ang Ezequiel 37:24-28.) Gitawag pag-usab ni Jehova ang Mesiyanikong Magmamando nga “akong alagad nga si David,” ‘usa ka magbalantay,’ ug “pangulo,” apan karon kining Sinaad nga Usa gitawag sab ni Jehova nga “hari.” (Ezeq. 37:22) Unsa unya ang pagmando niini nga Hari? Ang iyang pagmando permanente. Ang mga terminong “hangtod sa hangtod” ug  ‘walay kataposan’ nagpakita nga walay kataposan ang mga panalangin sa pagmando sa Hari. * Duna unyay panaghiusa ubos sa iyang pagmando. Ubos sa ilang “usa ka hari,” ang maunongong mga sakop mosunod sa samang “hudisyal nga mga hukom,” ug sila magkaubang “mopuyo sa yuta.” Ang iyang pagmando magpasuod sa mga sakop sa Hari ngadto kang Jehova nga Diyos. Si Jehova maghimog “pakigsaad sa pakigdait” kanila. Si Jehova mahimong ilang Diyos, ug sila mahimong iyang katawhan. Ug ang iyang sangtuwaryo ‘maanaa sa ilang taliwala hangtod sa hangtod.’

25. Sa unsang paagi natuman ang tagna bahin sa Mesiyanikong Hari?

²⁵ Kon sa unsang paagi natuman ang tagna. Sa 1919, ang matinumanong mga dinihogan gihiusa ubos sa ilang ‘usa ka magbalantay,’ ang Mesiyanikong Hari, si Jesu-Kristo. Sa ulahi, ang “usa ka dakong panon” gikan sa “tanang kanasoran ug tribo ug katawhan ug pinulongan” nahiusa sa ilang dinihogan nga mga isigkamagtutuo. (Pin. 7:9) Silang tanan nahimong “usa ka panon ubos sa usa ka magbalantay.” (Juan 10:16) Langitnon man o yutan-on ang ilang paglaom, silang tanan matinumanong nagtuman sa hudisyal nga mga hukom ni Jehova. Ingong resulta, sila nagpuyo sa espirituwal nga paraiso, nga nagkahiusa ingong managsoon sa tibuok kalibotan. Gipanalanginan sila ni Jehova ug kalinaw, ug ang iyang sangtuwaryo, nga nagrepresentar sa putling pagsimba, anaa sa ilang taliwala. Si Jehova ang  ilang Diyos, ug sila mapasigarbohon nga sila iyang mga magsisimba​—karon ug hangtod sa hangtod!

26. Unsaon nimo pag-amot sa panaghiusa sa espirituwal nga paraiso?

²⁶ Kon unsay atong makat-onan sa tagna. Pribilehiyo nato nga mahiusa sa atong mga igsoon sa tibuok kalibotan nga naghatag ug putling pagsimba kang Jehova. Apan kana nga pribilehiyo may responsibilidad​—kinahanglang moamot ta sa panaghiusa. Busa kitang tanan kinahanglang mohimo sa atong bahin aron mamentinar ang panaghiusa sa pagtulon-an ug panggawi. (1 Cor. 1:10) Aron mahimo kana, kita nagpahimulos pag-ayo sa samang espirituwal nga pagkaon, nagsunod sa samang Kasulatanhong sukdanan sa paggawi, ug madasigong nakigbahin sa samang importanteng buluhaton sa pagsangyaw sa Gingharian ug paghimog mga tinun-an. Pero ang sekreto gyod sa atong panaghiusa mao ang gugma. Samtang naningkamot ta sa pag-ugmad ug pagpakita sa gugma ug sa lainlaing bahin niini​—sama sa empatiya, pagkamabination, ug pagpasaylo—​kita makaamot sa atong panaghiusa. “Ang gugma,” sumala sa Bibliya, maoy “hingpit nga bugkos sa panaghiusa.”​—Col. 3:12-14; 1 Cor. 13:4-7.

27. (a) Unsay imong pagbati sa mga tagna bahin sa Mesiyas sa basahon sa Ezequiel? (b) Unsay hisgotan nato sa mosunod nga mga kapitulo?

²⁷ Mapasalamaton gyod ta sa mga tagna bahin sa Mesiyas diha sa Ezequiel! Ang pagbasa ug pagpamalandong niini nga mga tagna nagtudlo nato nga ang atong minahal nga Hari, si Jesu-Kristo, takos sa atong pagsalig, may legal nga katungod sa pagmando, mapinanggaong nagbantay nato, ug maghiusa nato hangtod sa hangtod. Pagkadakong pribilehiyo nga nahimo tang sakop sa Mesiyanikong Hari! Atong hinumdoman nga kini nga mga tagna maylabot sa Mesiyas maoy bahin sa katibuk-ang tema sa pagpasig-uli nga gihisgotan sa Ezequiel. Si Jesus ang gigamit ni Jehova sa pagtigom sa Iyang katawhan ug sa pagpasig-uli sa putling pagsimba diha kanila. (Ezeq. 20:41) Sa mosunod nga mga kapitulo, atong susihon kanang makapalipay nga tema ug kon giunsa kana paghisgot sa basahon nga Ezequiel.