1-3. a) ¿Mbaʼérepa Ezequiel opyta yvýre? b) ¿Mbaʼépa oskrivi raʼe Ezequiel Jehová espíritu rupive?

KÓVA hína pe sexto áño Ezequiel oĩha prisionéroramo. * Haʼe oĩ mombyryeterei Judágui, iválle haʼe ohayhuetéva. Heta rréi ogovernáma pe nasión, ha Ezequiel opyta yvýre opensávo mbaʼeichaitépa oñegoverna vai hetã.

² Ezequiel onasérõ guare ogoverna vaʼekue pe rréi ifiélva Josías, upérõ haʼe omoalamitáma hína kuri pe tiémpo ogovernáta vaʼekue. Oiméne Ezequiel ovyʼaiterei raʼe oikuaávo umi mbaʼe ojapo vaʼekue Josías ohundi hag̃ua umi dios fálso ha ojeadora jey hag̃ua Jehovápe Judápe (2 Crón. 34:1-8). Péro umi mbaʼe porã ojapo vaʼekue Josías ndopytái vaʼekue heta tiémpore, pórke enterove lénto umi rréi oĩ vaʼekue haʼe rire osegi oadora umi dios fálsope. Upévare ndajahecharamói umi governánte iñañaitéva poguýpe pe nasión oho vaivéntema hague, upéicha rupi haʼekuéra hekovai ha omongyʼa pe adorasión verdadéra. ¡Péro oĩ gueteri esperánsa!

³ Ijespíritu rupive Jehová ogia iproféta ifiélvape oskrivi hag̃ua unos kuánto profesía oñeʼẽva pe Mesías rehe. Ko Mesías haʼéta avei Rréi ha Pastór, ha omoĩ jeýta pe adorasión verdadéra hendaitépe  opa árare, avei mborayhúpe oñangarekóta Jehová ovechakuérare. Iñimportánte ningo jastudia porã umi profesía, pórke ñande rekove amo gotyove g̃uarã odepende hína ikumplimiéntore. Koʼág̃a jahecháta 4 profesía oĩva lívro de Ezequiélpe oñeʼẽva pe Mesías rehe.

4. a) ¿Mbaʼe profesíapa omombeʼu Ezequiel? b) ¿Mbaʼéichapa omoñepyrũ vaʼerã Ezequiel upe profesía?

⁴ Áño 612 rupi a.C. “Jehová oñeʼẽ” Ezequiélpe ha omombeʼu chupe peteĩ profesía omyesakãva umi mbaʼe ojehupytýtava pe Mesías goviérno rupive, ha mbaʼérepa iñimportánte ojejerovia upe Goviérnore. Péro Jehová heʼi Ezequiélpe omoñepyrũ hag̃ua iprofesía omombeʼúvo iñirũnguéra oĩvape prisionéroramo peteĩ adivinánsa. Upe adivinánsa ohechauka umi rréi de Judá naiñeʼẽrenduiha ha omyesakã porã mbaʼeichaitépa oñekotevẽ peteĩ governánte ihústova: Pe Mesías (Ezeq. 17:1, 2).

5. ¿Mbaʼépa hína pe adivinánsa?

⁵ (Elee Ezequiel 17:3-10). Kóva hína pe adivinánsa: Peteĩ “ágila tuichaitéva” oipeʼa pe “hakã ijyvatevéva” ha “oñotỹ umi komersiánte siudápe”. Upéi pe ágila ojagarra “peteĩ semílla pe yvýgui” ha oñotỹ yvy porãme, “peteĩ ysyry tuicháva ykére”. Pe semílla heñói ha oiko chugui peteĩ parrál máta iporãitereíva. Upe rire ou “ótro ágila tuicháva”, pe segundo. Pe parrál máta ohoségui ótro lugár ojerrega porãvetahápe, omondo umi hapo pe segundo ágila oĩha gotyo ikatu hag̃uáicha oguerova chupe. Jehová okondena upe parrál ojapóva ha heʼi ojehapoʼotaha chupe ha ‘ipirupaitetaha’.

6. ¿Mbaʼépa heʼise pe adivinánsa?

⁶ ¿Mbaʼépa heʼise pe adivinánsa? (Elee Ezequiel 17:11-15). Áño 617-pe a.C. rréi Nabucodonosor de Babilonia (pe primer “ágila tuichaitéva”) omongora Jerusalén. Haʼe oipeʼa itrónogui rréi Joaquín de Judápe (pe “hakã ijyvatevéva”) ha ogueraha Babilóniape (“umi komersiánte siudápe”). Upéi Nabucodonosor omoĩ Sedequíaspe (“peteĩ semílla pe yvýgui”, térã peteĩ oúva David familiarégui) ogoverna hag̃ua Jerusalén. Sedequías forsadoite ohura vaʼekue Ñandejára rérape oñemoĩtaha Nabucodonosor poguýpe (2 Crón. 36:13). Péro Sedequías nokumplíri upe huraménto: Opuʼã Babilonia kóntrape ha ojerure faraón de Egíptope (pe “ótro ágila tuicháva”) oipytyvõmi hag̃ua chupe. Péro reiete ojapo upéva, pórke Sedequías naiñeʼẽrendúi ha nokumplíri pe huraménto, upévare Jehová okondena chupe (Ezeq. 17:16-21). Ipahápe ojepeʼa igoviérno Sedequíasgui ha omano kárselpe Babilóniape (Jer. 52:6-11).

7. ¿Mbaʼépa ñaaprende upe adivinánsagui?

⁷ ¿Mbaʼépa ñaaprende upe adivinánsagui? Primeroite, ñande jaadoráva Jehovápe ñakumpli vaʼerã umi mbaʼe ñaprometéva. Jesús heʼi vaʼekue: “Pejéramo: ‘Si’, upéva si vaʼerã, ha pejéramo: ‘No’, upéva no vaʼerã” (Mat. 5:37). Oĩta situasión tekotevẽtahápe jahura Ñandejára rérare, por ehémplo peteĩ trivunálpe. Ñandéve g̃uarã isério hína peichagua huraménto. Segundo, ñañatende vaʼerã ani jajerovia umi persóna ndovaléivare. La Biblia heʼi voi: “Ani pejerovia umi  governánte rehe, ni ótro kuimbaʼére, pórke koʼã persóna ndaikatúi ñandesalva” (Sal. 146:3).

8-10. a) ¿Mbaʼépa oprofetisa Jehová pe Mesías goviérnore? b) ¿Mbaʼéichapa oñekumpli upe profesía? (Ehecha avei pe rrekuádro “Peteĩ profesía oñeʼẽva pe sédro tuichaitévare”).

⁸ Péro oĩ peteĩ governánte omereséva jajerovia hese ñande pyʼaite guive. Omombeʼu rire pe adivinánsa oñeʼẽva pe “hakã” ojeguerova vaʼekuére, Jehová oipuru jey umi palávra poétika oñeʼẽ hag̃ua pe persóna ogovernátavare: Pe Mesías.

⁹ ¿Mbaʼépa heʼi pe profesía? (Elee Ezequiel 17:22-24). Koʼág̃a ndahaʼevéima peteĩ ágila guasu la ojapótava upe oñekotevẽva, síno Jehová voi. Haʼe oipeʼáta pe hakã pyahu “pe sédro ruʼãgui” ha oñotỹta “peteĩ montáña ijyvatetereívape”. Upe hakã okakuaáta ha oikóta chugui “peteĩ sédro tuicha ha iporãitereíva”, ha upépe “opaichagua guyra” ohóta oñemoʼã. “Ha kompletoite umi yvyramáta oĩva umi ñúre” oikuaáta Jehová voi omongakuaa hague pe yvyramáta tuicha ha iporãitéva.

¹⁰ ¿Mbaʼéichapa oñekumpli pe profesía? Jehová onohẽ Itaʼýra Jesucrístope David familiarégui (pe “sédro ruʼãgui”) ha oñotỹ chupe pe Sérro Sion yvagapeguápe (“peteĩ montáña ijyvatetereívape”) (Sal. 2:6; Jer. 23:5; Apoc. 14:1). Péicha Jesús, haʼéramo jepe iñenemigokuérape g̃uarã ‘pe iñumildevéva entéro umi hénte apytépe’, Jehová omeʼẽ chupe pe lugár ijyvatevéva, ha omoĩ chupe “Rréiramo itúa David haʼe haguéicha avei” (Dan. 4:17; Luc. 1:32, 33). Yvága guive, pe Mesías Jesucristo, ogovernáta ko yvy kompletoitére ha ovendesíta entéro yvypórape. Jesús goviérno poguýpe, enterove yvypóra iñeʼẽrendúva oikóta “pyʼaguapýpe, ndokyhyjemoʼãi ojehúramo g̃uarã chupe mbaʼeve ivaíva” (Prov. 1:33). ¡Añetehápe peichagua Governánte omerese jajerovia hese!

11. ¿Mbaʼépa ñaaprende pe profesía oñeʼẽvagui pe ‘hakã pyahúre’ ha oikóva chugui “peteĩ sédro tuicha ha iporãitereíva”?

¹¹ ¿Mbaʼépa ñaaprende upe profesíagui? Ko profesía ndaijojaháiva oñeʼẽva pe ‘hakã pyahúre’ ha oikóva chugui “peteĩ sédro tuicha ha iporãitereíva”, ñanepytyvõ ñambohovái hag̃ua ko pregúnta: ¿Mávarepa jajerovia? Ñandevyroitereíta ningo jajeroviáramo yvyporakuéra goviérnore ha pe podér militár orekóva rehe hikuái. Ikatu hag̃uáicha jareko pe segurida añetetéva ñakonfia vaʼerã ñande pyʼaite guive pe Rréi ha Mesías rehe, haʼéva hína Jesucristo. Pe igoviérno añoite hína la ñane esperánsa (Apoc. 11:15).

12. ¿Mbaʼéichapa Jehová omyesakã porã ndahesaráiri hague pe kompromíso ojapo vaʼekuégui David ndive?

¹² ¿Mbaʼépa Ezequiel ontende pe adivinánsa Jehová omyesakã vaʼekuégui oñeʼẽva umi mokõi ágila rehe? Ezequiel ontende ojepeʼataha igoviérno Sedequíasgui (peteĩ rréi naiñeʼẽrendúiva oúva rréi David familiarégui) ha ojeguerahataha prisionéroramo Babilóniape. Ikatu oime pe proféta oñeporandu raʼe: “¿Hesaráipa Jehová pe kompromíso ojapo vaʼekuégui David ndive? Haʼe ningo opromete vaʼekue chupe: ‘Ne família ha ne rréino núnka ndopamoʼãi’” (2 Sam. 7:12, 16). Oiméramo Ezequiel oñeporandu raʼe upéva, nohaʼarõʼaréi oñembohovái hag̃ua chupe. Áño 611 rupi a.C., Sedequías ogoverna  aja gueteri Judápe, “Jehová oñeʼẽ” Ezequiélpe 7 áño oĩ haguépe prisionéroramo (Ezeq. 20:2). Ezequiel rupive, Jehová omombeʼu ótra profesía oñeʼẽva pe Mesías rehe, upéva omyesakã porã Jehová ndahesaráiri hague pe kompromíso ojapo vaʼekuégui David ndive. Upéva rangue, pe profesía ohechauka pe Mesías ogovernátava orekotaha pe derécho legál ogoverna hag̃ua haʼe rupi David familiare.

13, 14. a) ¿Mbaʼépa heʼi pe profesía oĩva Ezequiel 21:25-27-pe? b) ¿Mbaʼéichapa oñekumpli upe profesía?

¹³ ¿Mbaʼépa heʼi pe profesía? (Elee Ezequiel 21:25-27). Ezequiel rupive, Jehová heʼi porã voi og̃uahẽmaha pe tiémpo ojekastiga hag̃ua pe mburuvicha añáme. Jehová heʼi upe governánte añágui ojepeʼataha pe “turvánte ha pe koróna” (koʼã mbaʼe orrepresenta haʼe orekoha podér ogoverna hag̃ua). Upe rire ‘oñemboyvatéta pe ikarapévape ha oñemongarapéta pe ijyvatévape’, upéva heʼise orekotaha podér umi goviérno ojeapoʼíva ha ojeapoʼitaha umi goviérno ipoderósovape. ¿Arakaʼe pevépa ogovernáta umi ‘ikarapéva’ oñemboyvate vaʼekue? “Og̃uahẽ meve pe orekóva derécho” ha Jehová omeʼẽ chupe pe autorida ogoverna hag̃ua.

¹⁴ ¿Mbaʼéichapa oñekumpli pe profesía? Pe goviérno de Judá ningo ‘oñemboyvate’ vaʼekue, péro áño 607-pe a.C. ‘oñemongarape’, umi babilonio ohundírõ guare Jerusalén ha ogueraha rréi Sedequíaspe  prisionéroramo. Péicha, ndopytavéima ni peteĩ oúva rréi David familiarégui ogoverna hag̃ua Jerusalén. Upérõ umi goviérno ‘oñemongarapéva’ térã umi ndahaʼéiva judío, ‘oñemboyvate’ ha oñepyrũ ogoverna, péro upéva ndoikomoʼãi kuri heta tiémpore. Pe tiémpo ogoverna hag̃ua umi ndahaʼéiva judío térã “pe tiémpo oñemeʼẽva umi nasiónpe”, opa áño 1914-pe Jehová omeʼẽrõ guare Jesúspe autorida ogoverna hag̃ua (Luc. 21:24). Jesús ningo ou rréi David familiarégui, upévare haʼe añetehápe oreko voi pe “derécho” legál oiko hag̃ua chugui rréi Ñandejára Rréinope * (Gén. 49:10). Péicha Jesús rupive Jehová okumpli pe promésa ojapo vaʼekue Davídpe: Ifamiliare ogovernataha opa ára g̃uarã, ha Irréino núnka ndopamoʼãiha (Luc. 1:32, 33).

15. ¿Mbaʼérepa ikatu jajerovia ñande pyʼaite guive pe rréi Jesucristo rehe?

¹⁵ ¿Mbaʼépa ñaaprende upe profesíagui? Ikatuha jajerovia ñande pyʼaite guive pe rréi Jesucristo rehe. Ñande ningo jaikuaa peteĩ yvypóra ogoverna hag̃ua oiporavoha jepi chupe ótro yvypóra, térã mbaretépentema oñepyrũ ogoverna. Péro Jesús idiferénte, pórke Jehová voi oiporavo chupe rreirã, ha haʼe oreko voi pe “derécho” legál oiko hag̃ua chugui rréi Ñandejára Rréinope (Dan. 7:13, 14). ¡Upévare ko Rréi omerese jajerovia hese ñande pyʼaite guive!

16. a) ¿Mbaʼépa oñandu Jehová ijovechakuérare? b) ¿Mbaʼéichapa otrata vaʼekue “Israel pastorkuéra” umi ovechápe Ezequiel tiémpope?

¹⁶ Pe Pastór Tuichavéva Jehová, ojepyʼapy ijovechakuérare, umíva hína umi isiervokuéra oĩva ko yvy ape ári (Sal. 100:3). Jehová ohejárõ guare ijovechakuéra umi yvyporakuéra kárgope, haʼe omaña porã mbaʼéichapa ojetrata chupekuéra. Epensamína mbaʼéichapa oiméne oñeñandu raʼe ohechárõ guare umi mbaʼe ojapóva umi omoakãva Israel oikóva Ezequiel tiémpope. “Israel pastorkuéra” oipuru vai vaʼekue ijautorida, ‘mbaretépe ogoverna ha otrata vai chupekuéra’. Upéicha rupi umi ovecha ohasa asy ha oĩ voi heta ohejáva pe adorasión verdadéra (Ezeq. 34:1-6).

17. ¿Mbaʼéichapa Jehová osalva ijovechakuérape?

¹⁷ ¿Mbaʼépa ojapóta kuri Jehová? Haʼe heʼi ‘okovrataha’ koʼã pastór iñañaitévape upe ojapo vaʼekuére. Jehová opromete avei: “Asalváta che ovechakuérape” (Ezeq. 34:10). Ha Jehová siémpre okumpli umi mbaʼe oprometéva (Jos. 21:45). Áño 607-pe a.C. Jehová osalva ijovechakuérape, upearã haʼe ojevale Babilonia ehérsito rehe ha oipeʼa igoviérno umi pastór iñañaitévagui. Avei 70 áño upe rire, Jehová osalva ijovechakuérape Babilonia poguýgui ha ogueraha chupekuéra Jerusalénpe, ikatu hag̃uáicha pe puévlo oñepyrũ jey oadora chupe añoiténte. Péro Jehová ovechakuéra oikotevẽta gueteri oñeñangareko hesekuéra, pórke umi nasión osegíta ogoverna chupekuéra. “Pe tiémpo oñemeʼẽva umi nasiónpe” ipukúta gueteri heta áño (Luc. 21:24).

18, 19. ¿Mbaʼe profesíapa oskrivi vaʼekue Ezequiel áño 606-pe a.C.? (Ehecha pe taʼanga oĩva iñepyrũme).

¹⁸ Pe Pastór Tuichavéva Jehová, ojepyʼapy ijovechakuérare ha oipota oiko porã opa árare. Upéva jahecha porã pe heʼi vaʼekuére Ezequiel Jehová espíritu rupive áño 606-pe a.C. Haʼe omombeʼu upéva un áño oñehundi rire Jerusalén ha heta áño umi israelita osẽ mboyve Babilóniagui, upe oĩhágui hikuái prisionéroramo. Upe profesía ohechauka mbaʼéichapa pe Rréi oñepromete vaʼekue oñangarekóta Jehová ovechakuérare.

¹⁹ ¿Mbaʼépa heʼi pe profesía? (Elee Ezequiel 34:22-24). Jehová omoĩta “peteĩ pastór” oñangareko hag̃ua ijovechakuérare, ha haʼe ohenói chupe “che siérvo David”. Oipurúvo umi palávra “peteĩ pastór” ha “siérvo”, ontendeka peteĩ persóna añoite ogovernataha ha oguapytaha David trónope pára siémpre. Ndaiporimoʼãvéima David familiare ogoverna jeýtava upe rire, oiko haguéicha yma. Upe Rréi ha Pastór oñangarekóta Ñandejára ovechakuérare ha “omoakãta chupekuéra”. Jehová ojapóta “peteĩ kompromíso de paz” ijovechakuérandi. “Umi vendisión hoʼáta amáicha” hiʼarikuéra, oikóta hikuái segúro porã, vyʼápe ha ndofaltamoʼãi chupekuéra mbaʼeve. ¡Umi yvypóra oikóta pyʼaguapýpe oñondive ha umi animalkuéra jepe oĩta pyʼaguapýpe yvyporakuérandi! (Ezeq. 34:25-28).

20, 21. a) ¿Mbaʼéichapa oñekumpli pe profesía heʼíva: “Che siérvo David”? b) ¿Mbaʼépa heʼise amo gotyove g̃uarã Ezequiel oñeʼẽrõ guare “peteĩ kompromíso de paz” rehe?

²⁰ ¿Mbaʼéichapa oñekumpli pe profesía? Ñandejára heʼívo “che siérvo David”, omyesakã upe Governánte haʼetaha Jesús, David familiare  orekóva pe derécho legál ogoverna hag̃ua (Sal. 89:35, 36). Oĩrõ guare ko yvy ape ári, Jesús ohechauka haʼeha pe “pastór imbaʼeporãva” omeʼẽvo hekove “umi ovechakuéra rehehápe” (Juan 10:14, 15). Koʼág̃a katu Jesús haʼe hína Pastór yvágape (Heb. 13:20). Áño 1914-pe, Jesúsgui oikórõ guare Rréi, Jehová onkarga chupe oñangareko ha omongaru hag̃ua ijovechakuéra oĩvape ko yvy ape ári. Upe rire, áño 1919-pe, Jesús onombra peteĩ “esklávo de konfiánsa ha iñarandúva” omongaru hag̃ua ‘umi ótro siérvope’, umíva hína Ñandejára siérvo ifiélva, tahaʼe umi orekóva esperánsa ohóvo yvágape térã oikovévo ko yvy ape ári (Mat. 24:45-47). Ko esklávo de konfiánsa ningo osegi Jesucristo gía ha omongaru porã Ñandejára ovechakuérape. Upe aliménto oipytyvõ chupekuéra oiko hag̃ua pyʼaguapýpe ha en unida Ñandejára puévlope, peteĩ paraíso espirituál osegívape okakuaa.

²¹ Ezequiel ningo oñeʼẽ vaʼekue “peteĩ kompromíso de paz” rehe, ha heʼi avei ‘umi vendisión hoʼataha amáicha’, ¿mbaʼépa heʼise umíva amo gotyove g̃uarã? Pe múndo pyahúpe, umi oadoráva Jehovápe ko yvy ape ári, orresivíta entéro umi vendisión ojehupytýtava pe “kompromíso de paz” rupive. Pe paraíso oĩtavape ko yvy ape ári, yvyporakuéra ndohasaʼasymoʼãvéima koʼã mbaʼe káusare: Gérra, violénsia, ñembyahýi, mbaʼasy ha umi animál salváhe káusare (Is. 11:6-9; 35:5, 6; 65:21-23). Ñandejára siervokuéra oikóta opa ára g̃uarã peteĩ paraísope ko yvy ape ári, “ha oikóta hikuái segúro porã, ha avave nomongyhyjemoʼãi chupekuéra”. ¡Ajépa ñanembovyʼaite jaikuaávo ñande ikatuha avei jahupyty koʼã mbaʼe! (Ezeq. 34:28).

22. a) ¿Mbaʼépa oñandu Jesús umi ovechakuérare? b) ¿Mbaʼéichapa umi ansiáno ikatu osegi Jesús ehémplo?

²² ¿Mbaʼépa ñaaprende upe profesíagui? Itúaicha avei Jesús ojepyʼapyeterei umi ovecháre. Haʼe rupi Pastór ha Rréi, ojapo opa ikatúva oñemongaru porã hag̃ua Itúa ovechakuérape ha oĩ hag̃ua en unida Ñandejára puévlope. ¡Ajépa ojapo porãite ñanderehe jaikuaávo oñangarekoha ñanderehe peichagua Governánte! Umi oñangarekóva koʼág̃a Jehová ovechakuérare osegi vaʼerã Jesús ehémplo okuida porãvo hesekuéra. Umi ansiáno oñangareko vaʼerã umi ovecháre ndahaʼéi ‘oĩgui oovligáva chupekuéra, síno kyreʼỹme’ ha omoĩ vaʼerã ehémplo porã chupekuéra (1 Ped. 5:2, 3). ¡Umi ansiáno ningo núnka nomaltratái vaʼerã Jehová ovechakuérape! Haʼekuéra imanduʼa vaʼerã Jehová heʼi vaʼekuére umi pastór iñañáva oĩ vaʼekuépe Ezequiel tiémpope: “Akovráta chupekuéra upe ojapo vaʼekuére che ovechakuérare” (Ezeq. 34:10). Jehová ha Jesús omaña porã mbaʼéichapa ojetrata ijovechakuérape.

23. a) ¿Mbaʼépa opromete Jehová oikotaha Judá ha Israel rehe? b) ¿Mbaʼéichapa oñekumpli upe promésa?

²³ Jehová ningo oipota isiervokuéra oadora chupe en unida. Peteĩ profesía heʼívape oñemoĩ jeytaha pe adorasión verdadéra hendaitépe, Ñandejára opromete ipuévlogui oiko jeytaha peteĩ  nasiónte. Péicha umi hénte Judagua (pe rréino de 2 trívu) ha umi hénte Israelgua (pe rréino de 10 trívu) oĩ jeýta en unida ha oikóta chuguikuéra “peteĩ tetãnte”, mokõi yvyrágui oikoramoguáicha peteĩ yvyránte Ñandejára pópe (Ezeq. 37:15-23). Upéva pe profesía oñekumpli Ñandejára ombyaty jeýrõ guare pe nasión de Israel pe Tiérra Prometídape áño 537-pe a.C. * Péro upe unida oiko vaʼekue upérõ, ohechaukánte peteĩ unida tuichavéva oikótava upe rire. Jehová opromete rire pe nasión de Israel oĩ jeytaha en unida, haʼe omeʼẽ Ezequiélpe peteĩ profesía omombeʼúva amo gotyove pe Rréi ombyatytaha entéro omeʼẽvape adorasión verdadéra Ñandejárape, oĩ hag̃ua en unida opa árare ko yvy ape ári.

24. a) ¿Mbaʼe frásepa Jehová oipuru ohenói hag̃ua pe Rréi ha Mesíaspe? b) ¿Mbaʼéichapa ojeikóta upe Governánte poguýpe?

²⁴ ¿Mbaʼépa heʼi pe profesía? (Elee Ezequiel 37:24-28). Jehová ohenói jey pe Mesías ogovernátavape: “Che siérvo David”, “peteĩ pastór” ha ‘oporomoakãtava’. Péro koʼág̃a Jehová heʼi avei hese “rréi” (Ezeq. 37:22). ¿Mbaʼéichapa ojeikóta upe Governánte poguýpe? Jahechamína. Igoviérno ndopamoʼãi arakaʼeve: Umi palávra “pára siémpre” ha “etérno” heʼise umi vendisión ojehupytýtava pe goviérno rupive núnka ndopamoʼãiha. * Jesús goviérno poguýpe oĩta unida: Ogoverna vove “peteĩ rréi”, enterove umi hénte okumplíta la mísma “léi”, ha oikóta oñondivepa ‘ko yvýpe’. Igoviérno oipytyvõta umi héntepe oñemoag̃ui hag̃ua Jehováre: Ñandejára Jehová  ojapóta hendivekuéra “peteĩ kompromíso de paz”, Jehová haʼéta Idioskuéra, ha haʼekuéra haʼéta ipuévlo. Ha Ñandejára témplo oĩta “ijapytepekuéra pára siémpre”.

25. ¿Mbaʼéichapa oñekumpli pe profesía oñeʼẽva pe Rréi ha Mesías rehe?

²⁵ ¿Mbaʼéichapa oñekumpli pe profesía? Áño 1919-pe, umi unhído ifiélvape oñembyatypaite vaʼekue “peteĩ pastór” poguýpe, haʼéva pe Rréi ha Mesías Jesucristo. Upe rire “peteĩ aty guasu” oúva “entéro tetã, trívu ha puévlogui, ha oñeʼẽva diferénte idióma” omoirũ umi unhídope (Apoc. 7:9). Péicha oiko chuguikuéra “peteĩ ovecha atýnte” ha oĩ hikuái “peteĩ pastór” poguýpente (Juan 10:16). Tahaʼe umi orekóva esperánsa ohóvo yvágape térã oikovévo ko yvy ape ári, enterove haʼekuéra okumpli Jehová léi. Upéicha rupi, haʼekuéra oiko peteĩ ñeʼẽme Ñandejára puévlope, haʼeramoguáicha peteĩ família oĩva en unida ko múndo tuichakuére. Jehová ovendesi ko puévlope omeʼẽvo chupekuéra pyʼaguapy, ha oĩ ijapytepekuéra itémplo, orrepresentáva pe adorasión verdadéra. ¡Jehová hína Idioskuéra, ha upévare haʼekuéra omombaʼeterei ikatu haguére oadora chupe koʼág̃a ha opa árare!

26. ¿Mbaʼéichapa nde ikatu reipytyvõ oĩ hag̃ua unida Ñandejára puévlope?

²⁶ ¿Mbaʼépa ñaaprende upe profesíagui? Ñande ningo javyʼaiterei ñaime haguére peteĩ família oĩvape en unida ko múndo tuichakuére ha oadoráva Jehovápe añoiténte. Péro upéva heʼise avei jarekoha peteĩ rresponsavilida: Jajapo vaʼerã ñande párte siémpre oĩ  hag̃ua unida. Upéicha rupi, enterove ñañehaʼã vaʼerã ñaime en unida umi mbaʼe jagueroviávape ha umi mbaʼe jajapóvape (1 Cor. 1:10). Ha upearã ñañalimenta peteĩchapa térã jarresivi hína la mísma enseñánsa, enterove ñakumpli peteĩchapa umi konsého oĩva la Bíbliape ha enterovete japredika ha jajapo disípulo peteĩchapa. Péro upe añetehápe ñanepytyvõva ñaime hag̃ua en unida haʼe hína pe mborayhu. Pe oporohayhúva oñemoĩ hapicha lugárpe, oporoporiahuvereko ha oporoperdona. Jahechaukáramo peichagua mborayhu ñaipytyvõ hína oĩ hag̃ua unida. La Biblia heʼi voi “pe mborayhu” oipytyvõha enterovépe “oĩ hag̃ua unído oñondivepa” (Col. 3:12-14; 1 Cor. 13:4-7).

27. a) ¿Mbaʼéichapa nde reñeñandu restudiávo umi profesía oĩva lívro de Ezequiélpe oñeʼẽva pe Mesías rehe? b) ¿Mbaʼépa jastudiáta umi kapítulo oúvape?

²⁷ ¡Ñamombaʼeterei ningo umi profesía oĩva lívro de Ezequiélpe oñeʼẽva pe Mesías rehe! Jalee ha jajepyʼamongetávo umi profesíare, ñanepytyvõ jahechakuaa hag̃ua ñande Rréi Jesucristo omereseha jajerovia hese, ha orekoha pe derécho legál ogoverna hag̃ua. Avei haʼe oñangareko porãha ñanderehe ha ñanepytyvõtaha ñaime hag̃ua en unida pára siémpre. ¡Ajépa javyʼaite Jesús haʼe haguére ñande Rréi! Nañanderesaráiri vaʼerã umi profesía oñeʼẽva pe Mesías rehe oikeha avei pe téma iñimportantevéva oĩvape pe lívro de Ezequiélpe: Ojeadora jeytaha Jehovápe añoiténte. Jehová ningo ojevale Jesús rehe ombyaty hag̃ua ipuévlo ha oipytyvõ chupekuéra oadora jey hag̃ua Ñandejárape (Ezeq. 20:41). Umi kapítulo oúvape jastudiáta mbaʼéichapa ojeadora jeýta Jehovápe añoiténte ha mbaʼéichapa oñemyesakã ohóvo upéva lívro de Ezequiélpe.