1-3. Ki kabakalañi Ezekiele hanaaikutwile hahulu bumaswe, mi ki litaba mañi zañola ka kususumezwa ki moya okenile?

EZEKIELE sainzi mwa buhapiwa ka lilimo ze 6. * Mupolofita yo, uikutwa hahulu bumaswe kabakala moibusezwa Juda, sona sibaka sasimuluha ku sona sesi kwahule ni kwainzi. Uiponezi malena babañata bane babusize mwa linako zahae.

² Ezekiele naapepilwe ka nako yanaabusa Mulena Josiasi yasepahala. Ezekiele ulukela kuba yanaatabile hahulu hanaautwile kuli Josiasi naasweli kusinya maswaniso a kupanga ni kutusa batu kuli balapele Jehova hape ka nzila yelukile mwa Juda. (2 Makol. 34:1-8) Kono licinceho zanaaezize Josiasi nelisika ina nako yetelele kakuli buñata bwa malena bane babusize hamulaho wahae, nebazwezipili kulapela milimu ya maswaniso. Ka nako yene babusa malena babamaswe bao, batu nebaeza lika zemaswe mi silikani sabona ni Jehova nesizwelapili kusinyeha. Kana muinelo wo neukazwelapili? Kutokwa!

³ Ka kuitusisa moya okenile, Jehova ususumeza mupolofita wahae yasepahala kuñola bupolofita bwapili kwa bupolofita bobuñata bobubulela za Mesia, yena Mulena yakabusa kwapili ni Mulisana  yakatusa batu kuli balapele Jehova hape ka nzila yelukile kuya kuile ni yakababalela lingu za Jehova. Luswanela kunyakisisa bupolofita bo ka tokomelo, kakuli kutalelezwa kwa bupolofita bo kulutusa kuto pila kuya kuile. Kacwalo, halunyakisiseñi bupolofita bobune bobubulela za Mesia, ili bobufumaneha mwa buka ya Ezekiele.

4. Ki bupolofita mañi bwanaapolofitile Ezekiele, mi Jehova naakalisize cwañi bupolofita bo?

⁴ Ibato ba ka 612 B.C.E., “linzwi la Jehova” lataha ku Ezekiele, mi Jehova amubulelela bupolofita bobutalusa za puso ya Mesia ni libaka batu habatokwa kusepa Mubuso wahae. Jehova naakalisize bupolofita bo, ka kulaela Ezekiele kuli ataluseze bahapiwa babañwi nguli ya bupolofita yebonisa kusasepahala kwa babusi ba Juda, ni kutalusa libaka Mulena yalukile yali Mesia haswanela kubusa.—Ezek. 17:1, 2.

5. Nguli ya bupolofita neibulela zañi?

⁵ Mubale Ezekiele 17:3-10. Nguli ye, ibulela za “mbande yetuna” yekayula mutai kwa njongonjongo ya kota ya sidare ni kuyo ucala mwa “muleneñi wa balekisi.” Mbande yeo cwale iinga “yeñwi ya lipeu za mwa naha” ni kuyo icala mwa simu yenunile, ili bukaufi ni “mezi amañata.” Peu yeo yamela ni kuba ‘kota ya veine yenamalalile.’ Kuzwa fo, “mbande yetuna” yabubeli yataha. Cwale kota ya veine yeo “yanamululela” mibisi yayona kwa mbande yabubeli yeo, kuli iiswe kokunani mezi amañata. Jehova hatabiswi ki likezo za kota yeo, mi ubonisa kuli mibisi yayona ikasinyeha ni ‘kuoma hahulu.’

6. Nguli yeo italusañi?

⁶ Nguli yeo italusañi? (Mubale Ezekiele 17:11-15.) Ka silimo sa 617 B.C.E., Mulena Nebukadenezare wa Babilona (yena “mbande yetuna” yapili) aambeka Jerusalema. Naazwisize Joyakini Mulena wa Juda (yena ‘mutai o kwa njongonjongo’) mwa lubona lwahae ni kumutisa mwa Babilona (“muleneñi wa balekisi”). Nebukadenezare naabeile Zedekia (yomuñwi wa “lipeu za mwa naha” za lusika lwa silena) fa lubona mwa Jerusalema. Mulena yomunca yo wa Juda naakonkisizwe ka libizo la Mulimu kuli aipeye kwatasaa Mulena Nebukadenezare. (2 Makol. 36:13) Kono Zedekia naasika kuteka buitamo bwahae; naakwenuhezi Babilona ni kuswalisana ni Faro mulena wa Egepita (yena “mbande yetuna” yabubeli) kuli amutuse mwa ndwa, kono naasika fumana tuso yanaatokwa. Jehova naasika tabiswa ki likezo za kusasepahala za Zedekia ili yanaasika taleleza buitamo bwahae. (Ezek. 17:16-21) Kwa mafelelezo, Zedekia naatuluzwi fa bulena mi ashwela mwa tolongo ya mwa Babilona.—Jer. 52:6-11.

7. Lukona kuitutañi kwa nguli ya bupolofita?

⁷ Luitutañi kwa nguli ya bupolofita yeo? Sapili, ka kuba balapeli ba niti, luswanela kutalelezanga buitamo bwaluna. Jesu naabulezi kuli: “‘Eni’ yamina ibe eni honacwalo, mi ‘Awa’ yamina,  ibe awa honacwalo.” (Mat. 5:37) Haiba lukupiwa kukonka fapilaa Mulimu kuli lubulele niti, inge cwalo halufa bupaki mwa kuta, luswanela kuunga taba yeo kuba ya butokwa. Sabubeli, luswanela kutokomela kuli ki batu babacwañi boluswanela kusepa. Bibele ilulemusa kuli: “Musike mwasepa manduna kamba kusepa mwanaa mutu, yasakoni kupilisa.”—Samu 146:3.

8-10. Jehova naatalusize cwañi Mubusi yali Mesia yakabusa kwapili mi bupolofita bo butalelelizwe cwañi? (Mubone mbokisi yeli, “Bupolofita bwa Mesia—Kota ya Sidare Yende Hahulu.”)

⁸ Nihakulicwalo, kunani mubusi yeluswanela kusepa hahulu. Hasaabulezi za nguli ya bupolofita bwa mutai oyocalelwa kusili, Jehova hape uitusisa litaba zeswana za bupolofita bo, kutalusa za Mubusi yali Mesia yataha.

⁹ Zebubulela bupolofita. (Mubale Ezekiele 17:22-24.) Mwa bupolofita bo, Jehova ki yena yakaanga muhato isiñi limbande zetuna. Ukakayula katainyana kakabunolo ka ‘kota ya sidare yetelele ni kukacala fa lilundu lelitelele, lelipahami.’ Katai kao kakahula ni kuba “kota ya sidare yende hahulu” mi “linyunywani za mifuta kaufela” likapila mwatasaa yona. Kuzwa fo, “likota kaufela za mwa naheñi” likaziba kuli ki Jehova yatahisize kuli kota yende yeo ihule.

¹⁰ Kutalelezwa kwa bupolofita. Jehova naakayuzi kamba naangile Mwanaa hae, Jesu Kreste, mwa lusika lwa silena lwa Davida (“kota ya sidare yetelele”) ni kumucala fa Lilundu la Sione la mwa lihalimu (“lilundu lelitelele, lelipahami”). (Samu 2:6; Jer. 23:5; Sin. 14:1) Jehova naapahamisize Mwanaa hae ka kumufa “lubona lwa Davida ndatahe,” kusina taba kuli lila zahae neliinga mwanaa hae yo kuba “yomunyinyani hahulu mwahalaa batu.” (Dan. 4:17; Luka 1:32, 33) Sina kota ya sidare yende hahulu, Mulena yali Mesia, yena Jesu Kreste, ukabusa lifasi kaufela mi ukatahisa limbuyoti kwa batu kaufela babaka busiwa ki yena. Ka niti luli, yo ki yena Mubusi yeluswanela kusepa. Ka nako yakabusa Jesu, batu kaufela babasepahala fa lifasi ‘bakapila mwa buiketo mi habana kunyanganyiswa ki sabo ya kusaba ziyezi.’—Liprov. 1:33.

11. Ki tuto mañi ya butokwa yeluituta kwa bupolofita bwa “katainyana kakabunolo” kakaba “kota ya sidare yende hahulu”?

¹¹ Zelukona kuituta kwa bupolofita bo. Bupolofita bobunde hahulu bobubulela za “katainyana kakabunolo” kakaba “kota ya sidare yende hahulu,” bulutusa kualaba puzo ya butokwa hahulu yeli: Ki mañi yeluswanela kusepa? Ki butoto kusepa mibuso ya batu ni masole bayona babamaata. Kuli lupile mwa buiketo, luswanela kusepa hahulu Mulena yali Mesia, yena Jesu Kreste. Ka kuba mulena wa Mubuso wa kwa lihalimu, lwakona kusepa kuli ukaluezeza lika zende kwapili.—Sin. 11:15.

12. Jehova naabonisize cwañi kuli ukataleleza tumelelano yanaaezize ni Davida?

¹² Kulikana ni mwanaataluselize Mulimu nguli ya bupolofita bwa limbande zepeli, Ezekiele naautwisisize kuli Zedekia, mulena  yasasepahali wa lusika lwa silena lwa Davida, ukatululwa fa bulena ni kuiswa mwa buhapiwa kwa Babilona. Mwendi Ezekiele naaipuzize kuli, ‘Kucwañi ka za tumelelano ya Mulimu ni Davida, ili sepiso ya kuli mulena yakazwa mwa lusika lwa silena lwa Davida uka busa kuya kuile?’ (2 Sam. 7:12, 16) Haiba Ezekiele naaipuzize puzo yeo, uzibe naasatokwi kulibelela nako yetelele kuli azibe kalabo. Ibato ba ka 611 B.C.E., mwa silimo sabu 7 sa kuba mwa buhapiwa, Zedekia inze asabusa mwa Juda, ‘linzwi la Jehova lataha’ ku Ezekiele. (Ezek. 20:2) Jehova asusumeza Ezekiele hape kubulela bupolofita bobuñwi ka za Mesia, ili bone bubonisa hande kuli Mulimu naasika libala tumelelano yanaaezize ni Davida. Bupolofita bo, nebubonisize kuli Mubusi wa kwapili yali Mesia naakaba ni tukelo ya ka mulao ya kuyola mwa lubona lwa Davida.

13, 14. Bupolofita bobu kwa Ezekiele 21:25-27 bubulela zañi, mi bupolofita bo nebutalelelizwe cwañi?

¹³ Zebubulela bupolofita. (Mubale Ezekiele 21:25-27.) Jehova uitusisa Ezekiele kubulela ka kusakekuluha za ‘nduna wa Isilaele yamaswe,’ ili yanaatuha afiwa koto. Jehova ubulelela mubusi yamaswe yo kuli naakaamuhiwa ‘lisila lahae la kwa toho’ ni “kuwani  ya bulena” (lisupo za maata a bulena). “Yakokobelizwe” naakapahamiswa, mi “yapahami” naakakokobezwa. Yapahamisizwe naakazwelapili kubusa kufitela Jehova afa Mubuso ku mutu ‘yanani tukelo ya ka mulao.’

¹⁴ Kutalelezwa kwa bupolofita. Ka silimo sa 607 B.C.E., Jerusalema haisinyiwa, mubuso ‘opahami’ wa Juda one uli mwa Jerusalema, wakokobezwa muta Mababilona nebasinyize muleneñi wo ni kutulula Mulena Zedekia ni kumuisa mwa buhapiwa. Ka nako yeo, hane kusina mulena mwa Jerusalema yanaazwa mwa lusika lwa silena lwa Davida, batu ba macaba ‘bane bakokobelizwe’ bapahamiswa, mi baba ni maata a kubusa lifasi, kono nebabusize ka nako yekuswani feela. “Linako zetomilwe za macaba,” nelifelile ka silimo sa 1914 muta Jehova naafile bulena ku Jesu Kreste. (Luka 21:24) Bakeñisa kuli naasimuluha ku Mulena Davida, Jesu luli naanani “tukelo ya ka mulao” mwa Mubuso wa Mesia. * (Gen. 49:10) Kacwalo, Jehova hanaafile Jesu bulena, naatalelelize sepiso yahae ya kufa Davida mutu yanaaka muyola kuya kuile mwa Mubuso osike wafela.—Luka 1:32, 33.

15. Ki kabakalañi haluswanela kusepa hahulu Mulenaa luna, yena Jesu Kreste?

 ¹⁵ Zelukona kuituta kwa bupolofita bo. Lwakona kusepa hahulu Mulenaa luna, yena Jesu Kreste. Libaka? Bakeñisa kuli yena uketilwe ki Jehova mi ‘ufilwe mubuso’ wanani tukelo ya kubusa, ili kushutana ni babusi ba mwa lifasi babaketiwangwa ki batu kamba kuipeya fateñi bona bañi. (Dan. 7:13, 14) Ka niti, luswanela kusepa Mulena yo yaketilwe ki Jehova!

16. Jehova uikutwa cwañi ka za lingu zahae, mi “balisana ba Isilaele” ba mwa miteñi ya Ezekiele nebaeza cwañi mutapi?

¹⁶ Jehova, yena Mulisana Yomutuna, utokomela hahulu lingu zahae, bona balapeli bahae ba fa lifasi. (Samu 100:3) Hafa balisana ba fa lifasi buikalabelo bwa kubabalela lingu zahae, ili babanani maata a kuzamaisa, watalimisisanga mobaezeza lingu zahae. Munahane feela mwanaaikutwezi Jehova ka za “balisana ba Isilaele” ba mwa linako za Ezekiele. Balisana bao nebabusa lingu zeo ka “taata ni ka kulihatelela.” Kabakaleo, mutapi wanyanda hahulu kuli mane batu babañata batuhela kulapela Mulimu ka nzila yelukile.—Ezek. 34:1-6.

17. Jehova naalamulezi cwañi lingu zahae?

¹⁷ Ki lika mañi zanaaka eza Jehova? Naabulelezi babusi ba Isilaele bane babusa lingu ka taata kuli: ‘Nikatokwa kuli muikalabele.’ Kihona asepisa kuli: “Nikayangwela lingu zaka.” (Ezek. 34:10) Jehova watalelezanga lisepiso zahae kamita. (Josh. 21:45) Ka silimo sa 607 B.C.E., naayangwezi lingu zahae ka kuitusisa Mababilona bane batilo tulula balisana bane baitata bao fa maata. Hamulaho wa lilimo ze 70 kuzwa fo, naalamulezi balapeli bahae babaswana sina lingu mwa Babilona mi abakutisa habobona ilikuli bayo lapela Jehova hape ka nzila yelukile. Kono lingu za Jehova nelisali mwa butata, kakuli nelika zwelapili kuhatelelwa ki mibuso yemaata ya lifasi. Nekukaanga lilimo zeñata-ñata kuli “linako zetomilwe za macaba” lifele.—Luka 21:24.

18, 19. Ki litaba mañi zanaapolofitile Ezekiele ka silimo sa 606 B.C.E.? (Mubone siswaniso sesi fa likepe 84.)

¹⁸ Ka silimo sa 606 B.C.E., ili silimo silisiñwi kuzwa foisinyezwa Jerusalema ni lilimo zeñata-ñata pili Maisilaele basika lukululwa kale mwa buhapiwa bwa mwa Babilona, Jehova naasusumelize Ezekiele ka moya okenile kupolofita taba yebonisa kuli Mulisana Yomutuna yo, walata lingu zahae mi ubata kuli lipile kuya kuile. Bupolofita bo, bubulela mo Mubusi yali Mesia akaliseza lingu za Jehova.

¹⁹ Zebubulela bupolofita. (Mubale Ezekiele 34:22-24.) Mulimu ukalifa “mulisana alimuñwi,” ili yo abiza kuli “mutangaaka Davida.” Pulelo yeli “mulisana alimuñwi” ni linzwi la “mutanga,” libonisa kuli Mulena yo naasike aswana ni malena ba lusika lwa silena lwa Davida bane babusize pili, kono yena naakayola lubona lwa Davida kuya kuile. Mulisana yali Mubusi yo, ukafepa lingu za Mulimu mi “ukaba nduna mwahalaa zona.” Jehova ‘ukaeza tumelelano  ya kozo’ ni lingu zahae. “Limbuyoti likanela [fahalimwaa zona] sina pula,” mi bakapila mwa kozo, bakakatuluha, ni kukondisa. Batu ni lifolofolo bakapila mwa kozo yetuna!—Ezek. 34:25-28.

20, 21. (a) Bupolofita bwa kuli “mutangaaka Davida” butalelelizwe cwañi? (b) Manzwi anaabulezi Ezekiele ka za “tumelelano ya kozo” abonisa kuli kukaezahalañi kwapili?

²⁰ Kutalelezwa kwa bupolofita. Ka kubiza Mubusi yo kuli “mutangaaka Davida,” Mulimu naapolofita ka za Jesu, yena yasimuluha mwa lusika lwa Davida ili yanani tukelo ya kubusa. (Samu 89:35, 36) Hanaali fa lifasi, Jesu naabonisize kuli ki “mulisana yomunde,” naafanile bupilo bwahae “kabakala lingu.” (Joani 10:14, 15) Kono ka nako ye, ki Mulisana ya kwa lihalimu. (Maheb. 13:20) Ka silimo sa 1914, Mulimu naabeile Jesu fa bulena mi naamufile musebezi wa kulisa ni kufepa lingu za Mulimu fa lifasi. Kusika fita kale nako yetelele, ili ka silimo sa 1919, Mulena yomunca yo aketa “mutanga yasepahala yanani kutwisiso” kuli afepe “babeleki ba mwa ndu yahae,” ili balapeli ba Mulimu babasepahala, ibe kuli banani sepo ya kuyo pila kwa lihalimu kamba fa lifasi. (Mat. 24:45-47) Ka kuetelelwa ki Kreste, mutanga yasepahala uzwezipili kufa lico za kwa moya kwa lingu za Mulimu. Lico zeo litusize balapeli ba Jehova kuzwelapili kupila ka kozo ni kuikutwa kusilelezwa mwa paradaisi ya kwa moya.

²¹ Manzwi anaabulezi Ezekiele ka za “tumelelano ya kozo” ni pula ya limbuyoti abonisa zekaezahala kwapili. Mwa lifasi lelinca lelitaha, balapeli ba Jehova ba niti ba fa lifasi bakaikola limbuyoti zetiswa ki “tumelelano ya kozo.” Mwa Paradaisi, batu babasepahala habana kusabiswa ki lindwa, bukebenga, lukupwe, matuku, kamba libatana za mwa naheñi. (Isa. 11:6-9; 35:5, 6; 65:21-23) Kuba ni sepo ya kuto pila kuya kuile mwa paradaisi fa lifasi, ili fo lingu za Mulimu “likapila linze liiketile, kusina yalisabisa” kulufa tabo yetuna.—Ezek. 34:28.

22. Jesu naaikutwile cwañi ka za lingu, mi batu babaeza musebezi wa bulisana bakona kubonisa cwañi kuli baiyakatwa zona?

²² Zelukona kuituta kwa bupolofita bo. Ka kuswana sina Ndatahe, Jesu ni yena uiyakatwa hahulu lingu. Mulisana yali Mulena yo, ubonanga teñi kuli lingu za Ndatahe zafepiwa kwa moya ni kuli zaikola kozo ni buiketo mwa paradaisi ya kwa moya. Kwatabisa luli kubusiwa ki Mulena yacwalo! Batu kaufela babaeza musebezi wa bulisana baswanela kuiyakatwa lingu sina Jesu. Baana-bahulu baswanela kulisa mutapi ka “kuitatela” ni “ka kutukufalelwa” ni kutomela lingu mutala. (1 Pit. 5:2, 3) Muuna-muhulu haaswaneli kunyandisa lingu za Jehova! Muhupule manzwi anaabulezi Jehova kwa balisana bababuhali ba mwa miteñi ya Ezekiele, hanaaize: ‘Nikatokwa kuli muikalabele.’ (Ezek. 34:10) Mulisana Yomutuna uisanga mamelelo ka moliezezwa lingu zahae, mi ni Mwanaa hae uezanga nto yeswana.

23. Ki taba mañi yanaasepisize Jehova ka za kuswalisanisa sicaba sa Isilaele, mi naatalelelize cwañi sepiso yeo?

²³ Jehova ubata kuli balapeli bahae baswalisane. Mwa bupolofita bobubulela za kulapela Jehova hape ka nzila yelukile, Mulimu naasepisize kuli naakakubukanya batu bahae, ili kutalusa babayemela mubuso wa masika amabeli a Juda ni babayemela mubuso wa masika alishumi a Isilaele. Mi uka bakubukanya sina “sicaba silisiñwi,” inge yakopanya “milamu” yemibeli kuli ‘ifetuhe mulamu ulimuñwi’ mwa lizoho lahae. (Ezek. 37:15-23) Bupolofita bo, nebutalelelizwe muta Mulimu naakutisize sicaba sesiswalisani sa Isilaele kwa Naha ya Sepiso ka silimo sa 537 B.C.E. * Kono kuswalisana kwa Maisilaele ko, nekubonisa feela mobakaswalisanela batu kwapili. Jehova hasaasepisize kuswalisanisa Isilaele, alaela Ezekiele kupolofita za Mubusi wa kwapili yanaaka kubukanya balapeli ba niti mwa lifasi kaufela, kuli baswalisane kuya kuile.

24. Jehova naatalusize cwañi Mubusi yali Mesia, mi kukaezahalañi mubuso wa Mulena yo hauka busa?

²⁴ Zebubulela bupolofita. (Mubale Ezekiele 37:24-28.) Jehova hape naabizize Mubusi yali Mesia kuli “mutangaaka Davida,” “mulisana alimuñwi,” ni “nduna,” kono cwale fa Jehova hape ubiza mutu Yasepisizwe yo kuli “mulena.” (Ezek. 37:22) Puso ya Mulena yo ikaba cwañi? Puso yahae ikaba ya kuya kuile. Kuitusiswa  kwa manzwi a kuli “kuya kuile” ni “kamita” kubonisa kuli Mulena yo ukatahisa limbuyoti zekaina kuya kuile. * Mulena yo hakabusa, batu bakaswalisana. Mwa puso ya ‘mulenaa bona alimuñwi,’ babusiwa babasepahala bakalatelela “likatulo” zeswana mi “bakapila mwa naha” hamoho. Puso ya Mulena yo ikatahisa kuli babusiwa bahae babe bukaufi ni Jehova Mulimu. Jehova ukaeza “tumelelano ya kozo” ni babusiwa bao. Jehova ukaba Mulimu wabona mi bona bakaba batu bahae. Mi sibaka sahae sesikenile sikaina “mwahalaa bona kuya kuile.”

25. Bupolofita bobubulela za Mulena yali Mesia butalelelizwe cwañi?

²⁵ Kutalelezwa kwa bupolofita. Ka silimo sa 1919, batu babasepahala babatozizwe nebaswalisani ka kuetelelwa ki “mulisana alimuñwi,” yena Mulena yali Mesia, Jesu Kreste. Hasamulaho, “buñata bobutuna” bwa batu babazwa mwa “macaba kaufela ni mishobo ni batu ni malimi” baswalisana ni Bakreste babatozizwe. (Sin. 7:9) Kaufelaa bona bafetuhile “mutapi ulimuñwi” oetelelwa ki “mulisana alimuñwi.” (Joani 10:16) Ibe kuli sepo yabona ki ya kuyo pila kwa lihalimu kamba fa lifasi, kaufelaa bona balatelela likatulo za Jehova. Ka libaka leo, bapila hamoho ka swalisano mwa paradaisi ya kwa moya mwa lifasi kaufela. Jehova ubafuyauzi ka kubatusa kuba ni kozo, mi hape ubeile sibaka sahae  sesikenile mwahalaa bona, ili kutalusa kuli ubatusize kumulapela ka nzila yelukile. Jehova ki Mulimu wabona, mi banani tabo yetuna ya kuba balapeli bahae ka nako ya cwale ni kuya kuile!

26. Mukona kutusa cwañi kuli mwa paradaisi ya kwa moya kube ni swalisano?

²⁶ Zelukona kuituta kwa bupolofita bo. Lunani tohonolo yetuna ya kuswalisana ni mizwale ni likaizeli mwa lifasi kaufela halunze lulapela Jehova ka nzila yelukile. Kono tohonolo yeo itokwa kuli lueze molukonela kaufela kuzwelapili kuswalisana. Ka mukwa ocwalo, kaufelaa luna lutokwa kuswalisana hamoho mwa tumelo ni mwa likezo. (1 Makor. 1:10) Ka kueza cwalo, luzwelapili kuca lico zeswana za kwa moya, kulatelela likuka za mwa Mañolo zeswana za muzamao, ni kueza musebezi oswana wa butokwa, ona wa kukutaza ni kutusa batu kuba balutiwa. Nihakulicwalo, lilato ki kona kalemeno ka butokwa hahulu kakalutusa kuli luswalisane. Halunze lueza molukonela kaufela kubonisa lilato ka kubonisa tulemeno totucwale ka mukekecima, makeke, ni kuswalelana, lukaswalisana hahulu ni babañwi. Bibele ibulela kuli: “Lilato liswalisanisa batu ka kutala.”—Makolo. 3:12-14; 1 Makor. 13:4-7.

27. (a) Muikutwa cwañi ka za bupolofita bwa Mesia bobufumaneha mwa buka ya Ezekiele? (b) Lukanyakisisañi mwa likauhanyo zetatama?

²⁷ Lwaitumela hahulu kwa bupolofita bobubulela za Mesia bobufumaneha mwa buka ya Ezekiele! Kubala ni kunahanisisa bupolofita bo, kululuta kuli Mulenaa luna yalilato, yena Jesu Kreste, ki yena yeluswanela kusepa, unani tukelo ya kubusa, ululisa ka lilato, mi ukaluswalisanisa kuya kuile. Lunani tohonolo yetuna hahulu ya kubusiwa ki Mulena yali Mesia! Haike luhupule kuli bupolofita bobubulela ka za Mesia ki bobuñwi bwa litaba ze mwa buka ya Ezekiele zebulela za kulapela Mulimu ka nzila yelukile. Jehova uitusisa Jesu kukubukanya batu bahae ni kubatusa kumulapela ka nzila yelukile. (Ezek. 20:41) Mwa likauhanyo zetatama za buka ye, lukanyakisisa taba yetabisa ya kulapela Mulimu ka nzila yelukile ni moitaluselizwe taba yeo mwa buka ya Ezekiele.